Skákþáttur Morgunblaðsins: Kramnik í banastuði á EM taflfélaga

Af þeim heimsmeistaraeinvígjum sem háð hafa verið frá því fyrsta sem fram fór árið 1886 má telja að tvö hafi ákveðna sérstöðu hvað varðar væntingar um úrslit; þegar Capablanca tefldi við Aljekín í Buenos Aires 1927 var talið nánast útilokað að Aljekín ynni. Niðurstaðan varð samt sú að Aljekin vann 6:3 en þeir gerðu 25 jafntefli. Garrí Kasparov hafði unnið tíu stórmót í röð er hann mætti Kramnik í London haustið 2000. En Kramnik vann 8½:6½ og tapaði ekki skák. Einvígið fór fram undir merkjum PCA, Samtaka atvinnuskákmanna, en sex árum síðar mættust Topalov og Kramnik í „sameiningareinvígi“ FIDE og PCA í Elista í Kalmykíu. Kramnik vann einvígið, sem hlaut nafnið „Toilet-gate“ vegna deilna um tíðar salernisferðir Kramniks. Þessir tveir talast ekki lengur við, takast ekki í hendur við upphaf skáka sinna og heldur ekki þegar þeim lýkur. Í Evrópukeppni skákfélaga sem lauk í Skopje í Makedoníu fyrir viku leiddi Kramnik lið sitt Síbería til sigurs og hlaut 4½ vinning af fimm mögulegum. Ekkert íslenskt lið tók þátt í keppninni að þessu sinni. Kramnik vann Nepomniachtchi, Svidler, Ívantsjúk og Topalov, árangur sem fleytir honum upp í 5. sæti á heimslistanum. Hann teflir á 1. borði fyrir Rússa á EM í Laugardalshöllinni. Sigur hans yfir Topalov var sérlega glæsilegur:

EM taflfélaga 2015; 2. umferð:

Vladimir Kramnik – Veselin Topalov

Drottningarindversk vörn

1. d4 Rf6 2. Rf3 e6 3. e3

Þessi hógværa leikaðferð, sem rakin er til hins kunna stórmeistara Artúrs Jusupov, er furðu sveigjanleg þegar að er gáð; það má ákveða síðar hvernig best er að haga uppstillingu peða á drottningarvæng.

3.... c5 4. Bd3 b6 5. 0-0 Bb7 6. c4 cxd4 7. exd4 Be7 8. Rc3 d5 9. cxd5 Rxd5 10. Re5 0-0 11. Dg4 f5!?

Talin öruggasta leið svarts en skapar veikleika á e6. Þekkt gildra kemur upp eftir 11.... Rf6 12. Dh4 Rc6 13. Bg5! g6 14. Ba6! og svarta staðan er töpuð.

12. De2 Bf6 13. Bc4 He8 14. Hd1 Rd7?!

Vafasamur vegna þeirrar leppunar sem nú kemur fram. Betra var 14.... Rc6 eða 14.... a6.

15. Bb5! Bxe5 16. dxe5 De7 17. Rxd5 Bxd5 18. Dh5!

Hótar 19. Bg5. Svartur neyðist til veikja sig á svörtu reitunum.

18.... g6 19. Dh6 Hec8 20. Bg5 Df7 21. Bxd7 Dxd7 22. Bf6

Einn vandi Topalovs er hversu erfitt er að andæfa hrókunum á d-línunni.

22.... Df7 23. b3 Df8 24. Df4 Hc2 25. h4 Hac8 26. h5 De8 27. Hd3 H2c3 28. Had1 gxh5

Það er erfitt að finna betri leik. Í sumum tilvikum getur hvítur skipt upp á öllum hrókunum og ruðst inn eftir c-línunni.

 

29. Hxd5! exd5 30. e6!

Snarplega leikið, 30.... H3c5 er svarað með 31. Hd3! o.s.frv.

30.... H3c7 31. Hxd5 Dxe6 32. Dg5 Kf8 33. Hxf5 Hf7 34. Dh6 Ke8 35. He5 Hc6

Hyggst bjarga sér með því að leppa biskupinn, 36. Hxe6+ Hxe6 o.frv. En Kramnik á tvöfalda „gagnleppun“.

 

36. Dxh5!

– og Topalov lagði niður vopnin.

 

 

 

 

 

 

 

 

 

 

Vinningsleiðin

Jón L. Árnason – Jon Ludvig Hammer

Í síðasta pistli birtist brot úr skemmtilegri viðureign á Íslandsmóti skákfélaga. Vinningsleiðin er þessi:

62.... Kf2! 63. f7

Eini leikurinn.

63.... Hd3+! 64. Kc1

64. ... Kc2 kemur í sama stað niður.

64.... Hf3 65. f8(D) Hxf8 66. Bxf8 Ke2!

– og vinnur; hvítur getur vissulega stöðvað d-peðið með – Bb4 en þá rennur g-peðið upp í borð.

 

Helgi Ólafsson [e-mail]

Grein þessi birtist í Morgunblaðinu 31. október

Skákþættir Morgunblaðsins

[Event "European Club Cup"] [Site "Skopje MKD"] [Date "2015.10.22"] [EventDate "2015.10.18"] [Round "5.1"] [Result "1-0"] [White "Vladimir Kramnik"] [Black "Veselin Topalov"] [ECO "A46"] [WhiteElo "2777"] [BlackElo "2813"] [PlyCount "71"] 1. d4 Nf6 2. Nf3 e6 3. e3 c5 4. Bd3 b6 5. O-O Bb7 6. c4 cxd4 7. exd4 Be7 8. Nc3 d5 9. cxd5 Nxd5 10. Ne5 O-O 11. Qg4 f5 12. Qe2 Bf6 13. Bc4 Re8 14. Rd1 Nd7 15. Bb5 Bxe5 16. dxe5 Qe7 17. Nxd5 Bxd5 18. Qh5 g6 19. Qh6 Rec8 20. Bg5 Qf7 21. Bxd7 Qxd7 22. Bf6 Qf7 23. b3 Qf8 24. Qf4 Rc2 25. h4 Rac8 26. h5 Qe8 27. Rd3 R2c3 28. Rad1 gxh5 29. Rxd5 exd5 30. e6 R3c7 31. Rxd5 Qxe6 32. Qg5+ Kf8 33. Rxf5 Rf7 34. Qh6+ Ke8 35. Re5 Rc6 36. Qxh5 1-0

FIDE-þjálfara námskeið samhliða EM landsliða - einn virtasti skákþjálfari heims kennir

Einn virtast skákþjálfari heims, Adrian Mikhalchishin, verður með FIDE-þjálfaranámsskeið samhliða EM landsliða. Námskeiðið er meðal annars ætlað hinum erlendu gestum sem hingað koma en íslenskir skákáhugamenn eru að sjálfsögðu velkomnir. Mismunandi gráður eru í boði fyrir þá sem sækja námskeiðið.

Þátttökugjöld fyrir námskeiðið eru €100 en auk þess kostar útnefningin svo €50-200. Rétt er að taka fram að námskeiðið er öllum opið.

Þjálfarinn, Adrian Mikhalchishin, er einn virtasti skákþjálfari heims. Hann er þjálfari Tyrkja á EM landsliða og hefur þjálfari Anatoly Karpov, fyrrum heimsmeistara í skák, um sex ára skeið. Auk þess hefur hann  meðal annars þjálfað Ivanchuk og Polgar-systur.

Upplýsingar um Íslendinga sem hafa FIDE-þjálfaragráðu má finna á heimasíðu SÍ.

Nánari upplýsingar um námskeiðið eru heimasíðu EM.

Hraðskákmót Hugins fer fram á mánudagskvöld

Hraðskákmót Hugins í Mjóddinni verður haldið mánudaginn 9. nóvember nk. Teflt er í félagsheimili Hugins í Álfabakka 14a og hefst tafliðkl. 20. Tefldar verða 7 umferðir 2*5 mínútur.

Mótið verður reiknað til hraðskákstiga. Heildarverðlaun á mótinu eru kr. 20.000.

Núverandi hraðskákmeistari Hellis er Hallgerður Helga Þorsteinsdóttir. Þetta er í tuttugasta sinn sem mótið fer fram. Björn Þorfinnsson og Davíð Ólafsson hafa hampað titlinum oftast eða fjórum sinnum.

Verðlaun skiptast svo:

1. 10.000 kr.
2. 6.000 kr.
3. 4.000 kr.

Þátttökugjöld eru kr. 400 fyrir félagsmenn en kr. 600 fyrir aðra. Fyrir unglinga í Huginn eru þau kr. 300 en kr. 400 fyrir aðra.

Mótið verður reiknað til alþjóðlegra hraðskákstiga.

Íslandsmót eldri skákmanna - Strandbergsmótið hefst kl. 10

Íslandsmót eldri skákmanna 65+ (fædda 1950 eða fyrr) verður haldið laugardaginn 7. nóvember nk. í Strandbergi, safnaðarheimili Hafnarfjarðarkirkju í umsjá  RIDDARANS - skákklúbbs öldunga,  sem þar hefur aðsetur sitt. 

Þetta er í annað sinn sem slíkt mót með atskákarsniði fer fram í þessum aldursflokki. Tefldar verða 9 umferðir með 10 mínútna umhugsunartíma plús 3 sekúndur á leik. Fjórar umferðir fyrir hádegi en lokaumferðirnar fimm eftir hádegisverðarhlé. 

Mótið hefst kl. 10 árdegis og lýkur um kl. 16 með verðlaunaafhendingu og kaffisamsæti.  Teflt verður í hátíðarsalnum við kjöraðstæður. Boðið verður upp á kaffi, svaladrykki og snarl meðan á móti stendur.  Góð verðlaun og aldursflokkaviðurkenningar. 

Verðlaun

• 1. 10.000 kr.
• 2.  6.000 kr.
• 3.  4.000 kr.

Aldurflokkaverðlaun.

• 65-70
• 71-75
• 76 -80
• 81 og eldri

Jói Útherji gefur alla verðlaunagripi.

Sértök verðlaun fyrir 70+, 75+ og 80+. Jói Útherji gefur aukaverðlaunin.

Þátttökugjald er kr. 2.500.

Skráing fer fram á Skák.is. Upplýsingar um þegar skráða keppendur má finna hér. 

Bikarsyrpan - Mót 2 hefst í dag

Bikarsyrpa Taflfélags Reykjavíkur heldur áfram þegar annað mót syrpunnar fer fram helgina 6.-8. nóvember og hefst fyrsta umferð föstudaginn 6. nóvember kl. 17.30. Mótum syrpunnar hefur verið fjölgað og telur hún alls sex kappskákmót sem eru ætluð börnum á grunnskólaaldri (fædd 2000 og síðar) sem ekki hafa náð 1600 skákstigum. Þar með gefst þeim tækifæri til að næla sér í alþjóðleg skákstig á skákmótum sem sérhönnuð eru fyrir þau.

Tefldar eru 5 umferðir eftir svissnesku kerfi. Tímamörk eru 30 mínútur + 30 sekúndur á hvern leik og geta skákirnar því varað í allt að tvær klukkustundir. Þó svo við leggjum ætíð áherslu á að krakkarnir vandi sig og noti tímann vel, þá má gera ráð fyrir að margar skákir taki mun styttri tíma.

Mótið er sérstaklega hugsað fyrir krakka sem hafa sótt skákæfingar TR (og/eða annarra taflfélaga) reglulega síðastliðinn vetur eða lengur. Það er gott að byrja sem fyrst að keppa á kappskákmótum, en hingað til hefur þeim krökkum sem vilja tefla á “alvöru mótum” mestmegnis staðið til boða að taka þátt í opnum mótum. Þar er styrkleikamunurinn oft mikill, mótin taka langan tíma, auk þess sem marga krakka óar við tilhugsuninni um að tefla við fullorðna á sínum fyrstu kappskákmótum. Bikarsyrpan er svarið við því.

Einungis börn og unglingar á grunnskólaaldri sem ekki hafa náð 1600 alþjóðlegum skákstigum geta tekið þátt í mótum Bikarsyrpunnar. Þannig er styrkleikamunurinn minni en ella og krakkarnir njóta þess betur að tefla kappskákir. Tímamörkin eru líka styttri, og henta krökkunum betur en langar 90 mínútna skákir sem tíðkast á venjulegum kappskákmótum. Mótið uppfyllir öll skilyrði Alþjóða skáksambandsins FIDE og er reiknað til alþjóðlegra skákstiga sem gott er að byrja að safna snemma. Eins og á aðra viðburði félagsins þá er frítt í mótin fyrir krakka í Taflfélagi Reykjavíkur. Fyrir krakka í öðrum taflfélögum er þátttökugjaldið 1000 krónur fyrir hvert mót Bikarsyrpunnar.

Dagskrá:
1. umferð 17.30 á föstudegi (6. nóvember)
2. umferð 10.30 á laugardegi (7. nóvember)
3. umferð 14.00 á laugardegi (7. nóvember)
4. umferð 10.30 á sunnudegi (8. nóvember)
5. umferð 14.00 á sunnudegi (8. nóvember). (Lokaumferð + verðlaunaafhending).

Ein yfirseta (bye) er leyfð í umferðum 1-3 og fæst fyrir hana 1/2 vinningur.  Tilkynna þarf skákstjóra um yfirsetu fyrir lok umferðarinnar á undan.

Vinsamlegast skráið þátttakendur sem fyrst, það hjálpar við undirbúning mótsins!

Skráningarform

Skráðir keppendur

Bikarsyrpan samanstendur af sex mótum í vetur. Bikarar og medalíur eru í verðlaun fyrir efstu sætin í hverju
 móti auk áskrifta á Chess.com eða Chesskid.com.  Þá verða veitt sérstök verðlaun fyrir samanlagðan árangur á mótunum.

Sigurvegari fyrsta móts Bikarsyrpunnar var Róbert Luu.

Hlökkum til að sjá ykkur!

• Mót 1 – úrslit
• Mót 1 – umfjöllun

Næstu mót syrpunnar:

• Mót 3: 4.-6. desember 2015
• Mót 4: 12.-14. febrúar 2016
• Mót 5: 1.-3. apríl 2016
• Mót 6: 27.-29. maí 2016

TORG - skákmót Fjölnis laugardaginn 14. nóvember - Ókeypis þátttaka og ókeypis ís

Hið vinsæla TORG – skákmót Fjölnis verður haldið í 12. skipti laugardaginn 14. nóvember og hefst kl. 11.00 í hátíðarsal Rimaskóla.  Þátttakendur eru beðnir um að mæta til skráningar og upphitunar tímanlega. Öllum grunnskólabörnum er boðið að vera með í mótinu og er þátttakan ókeypis.

Í skákhléi býður Emmess öllum keppendum upp á íspinna og í lok mótsins verður glæsileg verðlaunahátíð með 20 vinningum og happadrættisvinningum til viðbótar frá Emmess og fyrirtækjunum á TORGINU í Hverafold. Hægt verður að vinna glæsilega íspakka frá Emmess, hamborgaratilboð, pítsur, tískuvörur frá Coco´s, bækur og blómavörur.

Tefldar verða sex umferðir og umhugsunartíminn sjö mínútur. Heiðursgestur Skákdeildar Fjölnis að þessu sinni verður Össur Skarphéðinsson þingmaður Reykjavíkur norður sem leikur fyrsta leik mótsins. TORG skákmót Fjölnis eru stutt, skemmtileg og spennandi.

Allir áhugasamir skákkrakkar eru hvattir til að mæta í Rimaskóla laugardaginn 14. nóvember. Leið 6 hjá Strætó stoppar 100 m frá Rimaskóla.  Foreldrum velkomið að fylgjast með og þiggja kaffiveitingar.

HM ungmenna: Átta vinningar í lokaumferðinni

Ellefta og síðasta umferð HM ungmenna fór fram í dag. Átta vinningar komu í hús í lokumferðinni. Dagur Ragnarsson (u18), Jón Trausti Harðarson (u18), Björn Hólm Birkisson (u16), Heimir Páll Ragnarsson (u14), Óskar Víkingur Davíðsson (u10), og Veronika Steinunn Magnúsdóttir (u18) unnu sínar skákir. 

Úrslit krakkanna má finna hér (hægt að stækka með því að tvíklikka á mynd)

Nánar á Chess-Results

Vignir Vatnar Stefánsson (u12) og Óskar Víkingur (u10) urðu efstir Íslendinganna með 6,5 vinninga. Símon Þórhallsson (u16) hlaut 6 vinninga. Dagur Ragnarsson (u18), Björn Hólm Birkisson (u16) og Róbert Luu (u10) hlutu 5,5 vinninga.

Alls komu 66 skákstig inní íslenskt skákstigahagkerfi (hækkun að frádreginni lækkun). Björn Hólm Birkisson hækkaði mest allra eða um 149 stig. Aðrir sem hækkuðu á stigum voru Stefán Orri Davíðsson (107), Símon (100), Dawid Kolka (28), Adam Omarsson (25), Veronika Steinunn Magnúsdóttir (23) og Óskar Víkingur (5).

Fararstjórar krakkanna voru Helgi Ólafsson, Lenka Ptácníková og Björn Ívar Karlsson.

 

• Heimasíða mótsins
• Chess-Results
• Beinar útsendingar

HM ungmenna: 11. pistill

10. umferðin, sem fór fram í gær, var okkar versta hingað til; 5 vinningar af 17. Stundum skiptast á skin og skúrir í þessum bransa. Það er spurning hvort góði árangurinn í 9. umferð hafi verið of mikil innspýting í hópinn en það var eitthvað einbeitingarleysi í flestum íslensku keppendunum í gær.

Adam byrjaði á því að vinna, í góðri skák, gegn Kungys (1211) frá Litháen. Hann fékk þægilegra tafl eftir byrjunina og fórnaði tveimur peðum á meðan hann kom mönnum sínum á framfæri. Andstæðingurinn skildi mest allt lið sitt eftir uppi í borði og Adam þakkaði pent fyrir sig, fórnaði skiptamun, og mátaði. Mjög vel klárað! Veronika hafði hvítt á Gabrielu Ebeling (1515) sem kemur úr stórri finnskri skákfjölskyldu. Veronika var vel undirbúin fyrir byrjunina og fékk snemma þægilega stöðu. Í miðtaflinu tókst henni að vinna mann og eftir það var úrvinnslan auðveld. Góður sigur.

Dawid Kolka hafði hvítt gegn Adar (2060) frá Ísrael. Dawid fékk yfirburðartafl eftir byrjunina en var heldur bráður á sér í framhaldinu og hleypti Ísraelsmanninum aðeins inn í skákina. Staðan var sem betur fer það góð að það skipti ekki máli og Dawid vann fínan sigur. Hann hefur verið á góðu skriði í síðustu umferðum.

Jón Trausti hafði svart á Narayanan (1758) frá Bandaríkjunum. Hann fékk fína stöðu eftir byrjunina en hvítur settist í skotgrafirnar, beið rólegur, og var greinilega mjög sáttur með jafntefli. Jóni tókst að setja töluverða pressu á Narayanan en fann aldrei neitt afgerandi. Í tímahrakinu fékk Bandaríkjamaðurinn mótspil og náði í framhaldinu þráskák. Símon hafði svart gegn Tahbaz (2350) frá Íran, í beinni útsendingu á efstu borðunum. Þessi skák var ótrúlega spennandi. Símon tefldi Najdorf-afbrigði sikileyjarvarnar og fékk fína stöðu. Í miðtaflinu tókst honum að töfra fram kröftugt mótspil á drottningarvæng á meðan Íraninn þandi sig á kóngsvæng. Í kjölfarið fórnaði Símon manni og fékk óstöðvandi frípeð á a-línunni. Íraninn gat gefið skiptamun til að stöðva peðið en tók í staðinn þá ákvörðun að leyfa Símoni að vekja upp drottningu svo skyndilega var hann með tvær drottningar í miðtaflinu! Í framhaldinu kom upp staða þar sem Símon hafði tvo hróka og drottningu gegn tveimur hrókum og biskupapari Tahbaz. Sú staða var ekki eins einföld og við héldum því biskupaparið var ótrúlega öflugt. Eftir mikið sprikl hvíts í framhaldinu þráléku keppendur í óljósri stöðu. Svolítið svekkjandi að ná ekki að vinna þessa skemmtilegu skák en engu að síður fyrirfram góð úrslit hjá Símoni sem er búinn að standa sig frábærlega á mótinu.
Róbert hafði hvítt á CM Low (1798) frá Kanada. Róbert tefldi byrjunina vel en missti nokkrum sinnum af góðum sóknarleiðum í miðtaflinu. Hann komst út í hróksendatafl, peði yfir, og átti góða vinningsmöguleika. Skákin fjaraði þó út í jafntefli sem svartur mátti þakka fyrir. Með örlítið meiri ákveðni hefði Róbert vafalaust unnið skákina. Freyja hafði svart gegn Ziegenfuss (1608) frá Þýskalandi. Freyja hefur verið að bæta sig jafnt og þétt frá því að mótið hófst. Hún tefldi byrjunina vel, enda hafði hún undirbúið sig sérstaklega fyrir hana. Hún vann peð en gaf andstæðingnum smá spil í framhaldinu. Hún vann skiptamun en vegna veikrar kóngstöðu Freyju voru sífelldar hættur á þráskák. Með örlítið meiri nákvæmni hefði hún átt góða sigurmöguleika en á endanum fann Ziegenfuss leið til að þráskáka og jafntefli varð niðurstaðan. Oliver, Dagur, Jón Kristinn, Björn Hólm, Bárður Örn, Hilmir Freyr, Heimir Páll, Vignir Vatnar, Óskar Víkingur og Stefán Orri töpuðu allir.

Erfið umferð en svona er þetta stundum. Þegar þessi orð eru skrifuð er lokaumferðin nýhafin. Í kvöld er svo verðlaunaafhending en við stefnum að því að nota frítímann vel í dag og fara út í sólina.

Bestu kveðjur,
Björn Ívar

EM ungmenna: Ekki gekk vel í tíundu umferð

Ekki gekk vel í tíundu umferð HM ungmenna sem fram fór í Porto Carras í Grikklandi í dag. Alls komu 5 vinningar í hús í 17 skákum. Dawid Kolka (u16), Adam Omarsson (u8) og Veronika Steinunn Magnúsdóttir (u18) unnu sínar skákir. Jón Trausti Harðarson (u18), Símon Þórhallsson (u16) og Róbert Luu (u10) gerðu jafntefli.

Úrslit krakkanna má finna hér (hægt að stækka með því að tvíklikka á mynd)

Nánar á Chess-Results

Símon Þórhallsson(u16) og Vignir Vatnar (u12) eru efstir íslensku krakkanna með 6 vinninga, Óskar Víkingur Davíðsson (10) hefur 5,5 vinning og Jón Kristinn Þorgeirsson (u16),  Dawid Kolka (u16), Hilmir Freyr Heimisson (u14), Róbert Luu (u10) og Freyja Birkisdóttir (u10) hafa 5 vinninga. 

Lokaumferðin hefst kl. 8 í fyrramálið.

Sautján fulltrúar taka þátt fyrir hönd Íslands á HM ungmenna og hafa aldrei verið fleiri.

 

• Heimasíða mótsins
• Chess-Results
• Beinar útsendingar

HM ungmenna: 10. pistill

9. umferðin, sem fram fór í gær, var okkar besta hingað til; 12 vinningar af 17 mögulegum.

Dagur hafði svart gegn Portúgalanum Leao (1994). Hvítur óð beint út í afbrigði sem Dagur hafði undirbúið sig vel fyrir og Dagur fékk yfirburðarstöðu. Hann vann peð í miðtaflinu og yfirspilaði Portúgalann í endataflinu. Öruggur sigur hjá Degi. Oliver hafði svart gegn Isaakidis (1819) frá Kýpur. Isaakidis tefldi vel í byrjuninni og Oliver var ekki nógu sáttur með stöðuna sína. Í miðtaflinu valdi hvítur kolranga leið og lék sig í mát í framhaldinu. Mikilvægir sigrar fyrir Dag og Oliver sem eiga alla möguleika á því að klára mótið með stæl. Símon hafði hvítt gegn FM Livaic (2372). Símon valdi trausta leið í byrjuninni og upp kom staða með jöfnum færum. Livaic þandi sig á kóngsvængnum en Símon varðist vel og hélt sínu. Eftir mikil uppskipti á mönnum sættust keppendur á jafntefli. Símon hefur verið að sýna að hann stendur alveg jafnfætis þessum stigaháu andstæðingum.

Jón Kristinn hafði hvítt á Chew (2112) frá Ástralíu. Jón Kristinn fékk mun betra tafl eftir byrjunina og var sennilega með unnið tafl í miðtaflinu þegar hann gaf andstæðingnum færi á gagnsókn og þráskák í kjölfarið. Örlítil óheppni. Dawid Kolka gerði einnig jafntefli, með svörtu, gegn hinum ísraelska Triger (2091). Góð úrslit hjá Dawid sem hefur verið á fínu skriði eftir rólega byrjun. Tvíburarnir, Björn Hólm og Bárður Örn, unnu báðir góða sigra gegn hinum skoska Abdulla (2001) og CM Klevansky (1640) frá Suður-Afríku. Strákarnir hafa báðir verið að breyta aðeins til í byrjunarvali og það virðist hitta vel í mark. Hilmir Freyr vann heimamanninn Serpetsidakis (1854) af öryggi. Hann fékk trausta stöðu eftir byrjunina og þegar miðtaflið tók við var Grikkinn yfirspilaður. Hilmir Freyr hefur verið á góðri siglingu í síðustu umferðum. Heimir Páll sigraði Evans (1488) frá Wales, með hvítu mönnunum. Heimir Páll tefldi örlítið ónákvæmt eftir byrjunina en það kom sem betur fer ekki að sök því það gerði andstæðingurinn líka og sá tapar víst sem leikur síðasta afleiknum! Mikilvægur sigur fyrir Heimi Pál.

Vignir Vatnar hafði hvítt á Nakada (1831) frá Bandaríkjunum. Vignir hélt áfram að tefla nýja gæluafbrigðið sitt með hvítu og fékk mun betri stöðu. Þá fór Nakada að sprikla heilmikið og lagði nokkur erfið vandamál fyrir Vigni. Vignir er orðinn reynslumikill og leysti vandamálin vel og vann góðan sigur. Óskar Víkingur hafði svart gegn Cebotari (1422) frá Moldavíu. Óskar tefldi byrjunina af öryggi og uppskar fína stöðu. Í miðtaflinu tókst honum að vinna peð af andstæðingnum og skákina í framhaldinu. Óskar hefur verið að tefla mjög vel í mótinu og er að bæta sig mikið. Róbert Luu hafði svart á Ghosh frá Bandaríkjunum. Róbert tefldi traust í byrjuninni eins og oft áður. Hann fékk örlítið betra tafl og komst út í hróksendatafl tveimur peðum yfir sem hann vann af öryggi. Góð skák hjá Róberti sem er á góðri siglingu eftir rólega byrjun. Stefán Orri hafði hvítt gegn Hartman (1310) frá Skotlandi. Stefán fannst við hæfi að tefla skoska leikinn get Skotanum og var vel undirbúinn fyrir byrjunina. Hann vann mann í miðtaflinu og úrvinnslan var góð í framhaldinu. Öruggur sigur og Stefán er í góðum stigagróða eftir flottan árangur á mótinu. Freyja hafði hvítt gegn hinni rússnesku WCM Olgu Melenchuk (1497). Freyja var spennt fyrir skákina því hún hafði aldrei áður teflt gegn titilhafa. Hún tefldi skoska leikinn, sem við höfðum undirbúið vel, og byrjunarleikirnir voru nánast þeir sömu og hjá Stefáni Orra. Hún fékk betra tafl en Olga varðist vel, að rússneskum sið! Freyja pressaði stíft en sætti sig að lokum við jafntefli. Góð skák og mér fannst Freyja alveg hafa átt skilið að vinna.

Jón Trausti, Veronika og Adam töpuðu öll í skákum þar sem þau áttu góð tækifæri. Hlutirnir hafa ekki alveg verið að falla með þeim í síðustu skákum.

Nú erum við farin að fara í tvo göngutúra á dag. Annars vegar er það morgungangan, sem við förum í rétt fyrir hádegismat, og svo er það Botvinnik-gangan góða sem við tökum að kvöldi dags. Þetta virðist hafa haft góð áhrif á íslensku keppendurnar í síðustu tveimur umferðum.

Á morgun er lokaumferðin og hefst hún kl. 10 að staðartíma. Annað kvöld er svo verðlaunaafhending kl. 20:30. Heimför er um miðjan dag á föstudaginn. Við ættum að hafa einhvern frítíma eftir umferðina á morgun og mér skilst að menn séu farnir að pússa takkaskóna...

Bestu kveðjur heim,
Björn Ívar