Hraðskákkeppnin; Öruggur sigur SA gegn Fjölni

Hraðskákkeppni taflfélaga er nýfarin af stað og margar viðureignir í þessari viku. Í gærkveldi mættust Fjölnir og SA. Þetta er í þriðja sinn á síðustu fjórum árum sem þessi tvö félög mætast í keppninni. Mikill vinarbragur er meðal liðsmanna enda margir helstu skákmenn beggja félaga teflt saman í unglingalandsliðum Íslands undanfarin ár. Þá hafa tveir liðsmenn SA tekið virkan þátt í skákstarfi Fjölnis í gegnum störf sín fyrir Skákakademíu Reykjavíkur og m.a. margoft kennt í skákbúðum félagsins. En enginn er annars bróðir í leik eins og þar stendur. Skákfélagsmenn nokkrir hverjir höfðu hist fyrir leikinn og horft á KA-menn leika gegn Kefvíkingum í Inkasso-deildinni. KA menn eiga góðar minningar frá Keflavík en árið 1989 hampaði liðið sínum fyrsta og eina Íslandsmeistaratitli eftir sigur á heimamönnum í lokaumferðinni. Vigreifir af þeim hughrifum héldu Skákfélagsmenn í Rimaskóla þar sem teflt var við afar góðar aðstæður á kaffistofu skólans. Liðsstjórarnir þeir Stefán Bergsson SA og Helgi Árnason Fjölni voru ansi hvumsa þegar tölur fóru að berast frá fyrstu umferð. Eftir að yfirfara úrslit á öllum borðum varð niðurstaðan ljós; 0-6 fyrir SA! Og áfram héldu þessi undur í næstu umferð: 1-5!! Þegar fjórum umferðum var lokið var staðan orðin 19.5 - 4.5 fyrir SA. Ansi ótrúlegar tölur miðað við að liðin eru nokkuð jöfn á pappírunum þó svo breidd SA sé líkast til ögn meiri. Í umferðum 5-12 jöfnuðust leikar; umferðirnar fóru alltaf 3 - 3 eða 3.5 - 2.5 fyrir öðru hvoru liðinu. Fjölnismenn náðu sumsé að bíta vel frá sér og höfðu seinni hálfleikinn 19-17.

Bestir í liði SA voru Halldór Brynjar Halldórsson og Björn Ívar Karlsson sem báðir fengu níu vinninga af tólf mögulegum. Björn var taplaus fram í tólftu umferð þegar hann tapaði fyrir Sigurbirni Björnssyni. Sigurbjörn stóð sig best heimamanna með sjö vinninga af tólf. Oliver Aron Jóhannesson og Dagur Ragnarsson fengu báðir sex vinninga af tólf.

Einstaklingsúrslit SA:

Björn Ívar Karlsson 9v/12

Rúnar Sigurpálsson 5v/12

Halldór Brynjar Halldórsson 9v/12

Jón Kristinn Þorgeirsson 6v/9

Símon Þórhallsson 5.5v/9

Mikael Jóhann Karlsson 6v/11 (vann fimm fyrstu!)

Arnar Þorsteinsson 1.5v/3

Óskar Long Einarsson 0v/3

Stefán Bergsson 1v/1

 

Einstaklingsúrslit Fjölnis

Sigurbjörn Björnsson 7v/12

Tómas Björnsson 3.5v/10

Dagur Ragnarsson 6v/12

Oliver Aron Jóhannesson 6v/12

Jón Trausti Harðarson 3v/10

Erlingur Þorsteinsson 1.5v/7

Jón Árni Halldórsson 0.5v/5

Hörður Aron Hauksson 1.5v/4

Heildarúrslit:

SA 43 - Fjölnir 29

Ljóst er af þessum úrslitum að Skákfélagsmenn eru til alls líklegir í næstu umferð keppninnar. Hafði þriðja borðs maður félagsins Halldór Brynjar það eftir sér að hann vildi helst mæta Skákgenginu í næstu umferð en Skákgengismenn fengu sitt skákuppeldi innan Skákfélagsins á níunda og tíunda áratug síðustu aldar. Óskoraður leiðtogi þeirra hann Páll Þórsson var einmitt á keppnisstað í gær og hvatti fyrrum félaga sína í SA óspart áfram. Félagsmenn SA og Skákgengis munu allmargir mæta á Sigufjörð um aðra helgi til að taka þátt í Skákþingi Norðlendinga. Eru allir skákmenn hvattir til þátttöku á því rómaða móti sem haldið hefur verið í marga áratugi.

 

 

Ólympíufarinn: Ríkharður Sveinsson

Ólympíuskákmótið fer fram 2.-13. september nk. í Bakú í Aserbaísjan. Nítján manns verða í sendinefnd Íslands. Fram að móti verða Ólympíufararnir kynntir - einn á dag.

Í dag kynnum við sögunnar Ríkharð Sveinsson sem er einn fimm íslenskra skákstjóra á mótinu.

Nafn?

Ríkharður Sveinsson

Aldur?

Á besta aldri

Hlutverk?

Dómari

Uppáhalds íþróttafélag?

Valur

Hvernig er undirbúningi þínum fyrir mótið háttað?

Lesa skákreglur og undirbúa ferðalagið

Hvenær tókstu fyrst þátt á Ólympíuskákmóti og hversu oft hefur þú tekið þátt?

Fyrsta skiptið

Getur þú nefnt frægan skákmann fæddan í Bakú?

13. heimsmeistarinn er fæddur þar

Minnisstæðasta atvik á Ólympíuskákmóti?

5. sætið í Dubai 1986

Er Kaspíahafið haf eða stöðuvatn?

Stöðuvatn.

Minnisstæða skák á Ólympíuskákmóti og af hverju?

Þegar Friðrik vann ríkjandi heimsmeistara Anatoly Karpov

Hverjar eru þínar væntingar/vonir um gengi íslensku liðanna?

Góðar

Í ljósi þess að Björn Þorfinnsson er ekki í Bakú-hópnum – hver verður aðaltrúður ferðarinnar?

Á ekki von á trúðslátum enda er þetta háalvarleg keppni

Eitthvað að lokum?

Áfram Ísland!

Útitaflið: Heljarinnar skákstuð á Menningarnótt

Skákakademía Reykjavíkur stendur fyrir skákdagskrá á Menningarnótt. Klukkan 12:30 fer fram hið kunna Alheimsmót í Leifturskák þar sem þátttakendur eru aðeins með eina mínútu á klukkunni. Í hverri umferð þarf að vinna tvær skákir. Mótið er boðsmót með tólf keppendum sem tefla allir við alla. Sex sterkir keppendur eru þegar skráðir og geta aðrir áhugasamir sent þátttökubeiðni á [e-mail]. Eftir Alheimsmótið eða klukkan 14:00 fer fram Menningarnæturmótið í Heilinn og höndin. Heilinn og höndin er þannig skák að tveir og tveir eru saman í liði. Annar segir mann en hinn leikur. Skemmtilegt fyrirkomulag á skák sem hefur notið aukinna vinsælda síðustu árin. Í hverju liði mega heildarstig hvers pars ekki vera hærri en 4500 FIDE- skákstig.  Tefldar verða fimm umferðir. Skráning á [e-mail]

Hátíðin fer fram við útitaflið í Lækjargötu.Á myndinni að neðan má sjá einn sterkasta Leifturskákmann landsins Jón Gunnar Jónsson að tafli. Jón er sigurstranglegur fyrir laugardaginn en það er hinn eldsnöggi Halldór Brynjar Halldórsson frá Akureyri einnig.

Ljósanæturmót HS Orku

Skákfélag Reykjanesbæjar í samstarfi við HS Orku halda Ljósanæturmót laugardaginn 3.sept kl.13:00. Tefldar verða 13 umferðir með 7 mínútna umhugsunartíma og í einum opnum flokki. Staðsetning í Njarðvíkurskóla og skráning hér að ofan í gula kassanum. Lokað verður fyrir skráningu ef fjöldi fer yfir 80 keppendur. 

Verðlaunarfé frá HS Orku er 100.000 kr. og mun deilast. 

• 1.verðlaun 40.000 kr.
• 2.verðlaun 25.000 kr.
• 3.verðlaun 15.000 k.r

Sérstök unglingarveðlaun fyrir 14 ára og yngri 10.000 kr. og fyrir óvæntustu úrstlitin 10.000 kr.

Mæting 12:45 og staðfesta skráningu hjá Palla

Mótstjóri verður Páll Sigurðsson

Borgarskákmótið fer fram í dag

Borgarskákmótið fer fram miðvikudaginn 17. ágúst, og hefst það kl. 16:00. Mótið fer fram venju samkvæmt í Ráðhúsi Reykjavíkur og standa  Taflfélag Reykjavíkur og Skákfélagið Huginn, að mótinu, eins og þau hafa gert síðustu ár. Gera má ráð fyrir að margir af sterkustu skákmönnum þjóðarinnar taka þátt í því. Skákmenn eru hvattir til að skrá sig sem fyrst eftir að opnað verður fyrir skráningu. Mótið verður reiknað til hraðskákstiga og er öllum opið og er þátttaka ókeypis en skráning fer fram á Skák.is

Einnig er hægt að skrá sig í í síma 866 0116 (Vigfús) og 862 0099 (Kjartan). Tefldar verða 7 umferðir með 7 mínútna umhugsunartíma. Þetta er í 29. sinn sem mótið fer fram og er þetta iðulega eitt best sótta skákmót hvers árs. Í fyrra sigraði Jón Viktor Gunnarsson, sem þá tefldi fyrir Malbikunarstöðina Höfða.

Verðlaun:

1. 30.000 kr.
2. 20.000 kr.
3. 10.000 kr.

Upplýsingar um þegar skráða keppendur má nálgast hér.

Skákþing Norðlendinga fer fram á Siglufirði 26.-28. ágúst

Skákþing Norðlendinga 2016 verður haldið í safnaðarheimili Siglufjarðarkirkju helgina 26. til 28. ágúst næstkomandi. Skákfélag Siglufjarðar sér um mótshaldið. Mótið er opið öllu skákáhugafólki. Tefldar verða sjö umferðir eftir Monrad-kerfi, þ.e.a.s. fjórar atskákir og þrjár kappskákir.

Mótið verður reiknað til íslenskra skákstiga og til FIDE-skákstiga. Skákstjóri verður Ingibjörg Edda Birgisdóttir. Núverandi Skákmeistari Norð-lendinga er Jón Kristinn Þorgeirsson frá Akureyri.

Dagskrá

• Föstudagur 26. ágúst kl. 20.00: 1.-4. umferð. Atskákir, 25 mínútur á mann.
• Laugardagur 27. ágúst kl. 10.30: 5. umferð. 90 mínútur + 30 sekúndur við hvern leik.
• Laugardagur 27. ágúst kl. 16.30: 6. umferð. 90 mínútur + 30 sekúndur við hvern leik.
• Sunnudagur 28. ágúst kl. 10.30: 7. umferð. 90 mínútur + 30 sekúndur við hvern leik.

Aðalverðlaun

1. sæti: 50.000 krónur. 

(Ef sigurvegari mótsins er ekki með lögheimili á Norðurlandi eru verðlaun Skákmeistara Norðlendinga einnig 50.000 krónur.)

2. sæti:  25.000 krónur.
3. sæti:  10.000 krónur.

Aukaverðlaun

1. Efstur skákmanna undir 1800 íslenskum skákstigum (með lögheimili á Norðurlandi).
2. Efstur heimamanna (í Skákfélagi Siglufjarðar).
3. Efstur stigalausra (með lögheimili á Norðurlandi).

Eingöngu verður hægt að vinna til einna aukaverðlauna.

Peningaverðlaunum verður skipt á milli manna, verði þeir jafnir að vinningum. Þetta á við um bæði aðal- og aukaverðlaun.

Skráning og þátttökugjald

Skráning er hafin og fer hún fram á vefslóðinni: siglfirdingur.is/skakthing. Upplýsingar um skráða keppendur er jafnframt að finna þar. Skráningu verður lokað á hádegi 26. ágúst. Þátttökugjaldið er krónur 3.000 fyrir 17 ára og eldri, en 1.500 krónur fyrir 16 ára og yngri.

Hraðskákmót Norðlendinga 2016

Hraðskákmót Norðlendinga 2016 verður svo haldið sunnudaginn 28. ágúst á sama stað en það hefst ekki fyrr en kl. 15.00. Ekkert þátttökugjald er í það. Núverandi Hrað-skákmeistari Norðlendinga er áðurnefndur Jón Kristinn Þorgeirsson frá Akureyri.

Bakhjarlar

Bakhjarlar þessara skákmóta tveggja eru Arion banki, Hótel Siglunes, Rammi, Samkaup-Úrval, Siglufjarðarkirkja, Skáksamband Íslands, SR-vélaverkstæði og Verkfræðistofan Grundun.

Nánari upplýsingar

Sigurður Ægisson, formaður Skákfélags Siglufjarðar, veitir allar frekari upplýsingar um mótin. Símanúmer hans eru 467-1263 og 899-0278 og netfang [e-mail].

Minningarmót Birnu á laugardaginn: Fjöldi skákmeistara á Reykhólum

Fjórir stórmeistarar og kvennalandsliðið í skák eru meðal þeirra sem skráð eru til leiks á Minningarmóti Birnu Norðdahl á Reykhólum laugardaginn 20. ágúst kl. 14. Mótið er öllum opið og eru skákáhugamenn hvattir til að skrá sig sem fyrst. Mótið verður hið sterkasta sem haldið er utan höfuðborgarsvæðisins á árinu. Skákfélagið Hrókurinn skipuleggur mótið með stuðningi Reykhólahrepps, Þörungaverksmiðjunnar, Skáksambands Íslands og fjölda fyrirtækja og einstaklinga. 

Birna Norðdahl (1919-2004) skipar merkan sess í íslenskri skáksögu. Hún var frumkvöðull að því að Íslendingar sendu í fyrsta skipti kvennasveit til keppni á Ólympíuskákmótið í Argentínu 1978 og efndi til söfnunar svo af þeirri sögulegu ferð gæti orðið. Birna var svo í liðinu sem fór til Buenos Aires og stóð sig með miklum sóma. Hún tefldi jafnframt á Ólympíuskákmótinu tveimur árum síðar og Íslandsmeistari varð hún 1976 og 1980. 

Kvennalandsliðið í skák, sem senn heldur til keppni á Ólympíuskákmótinu í Bakú, tekur þátt í mótinu, en það skipa Lenka Ptacnikova stórmeistari, Guðlaug Þorsteinsdóttir, Hallgerður Helga Þorsteinsdóttir, Hrund Hauksdóttir og Veronika Steinunn Magnúsdóttir. Þá mætir til leiks Sigurlaug Regína Friðþjófsdóttir, sem tefldi í liði Íslands með Birnu á Möltu 1980. 

Stigahæsti stórmeistari Íslendinga, Hannes Hlífar Stefánsson, verður með á mótinu, sem og Jóhann Hjartarson nýbakaður Íslandsmeistari og Jón L. Árnason fv. heimsmeistari sveina. Af öðrum öflugum meisturum má nefna Björn Þorfinnsson, Guðmund Stefán Gíslason, Björn Ívar Karlsson og Rúnar Sigurpálsson. Almennir áhugamenn fá því einstakt tækifæri til að komast í tæri við sterkustu skákmenn landsins. Tekið er við skráningum í [e-mail] og eru skákmenn hvattir til að skrá sig sem allra fyrst.

Við setningu mótsins á laugardaginn flytur Hlynur Þór Magnússon sagnfræðingur á Reykhólum ávarp, en hann átti þá hugmynd að heiðra minningu Birnu með veglegu skákmóti, en síðan mun Ingibjörg Birna Erlingsdóttir sveitarstjóri setja mótið formlega. Tefldar verða 8 umferðir með 10 mínútna umhugsunartíma. Kvenfélagið Katla á Reykhólum, sem veitir margvíslega aðstoð við framkvæmd mótsins, mun annast veitingar meðan á móti stendur. Þá verða ýmsir munir og myndir sem tengjast Birnu til sýnis.

Verðlaun á mótinu nema alls rúmlega 400 þúsund krónum og í fyrsta skipti í íslenskri skáksögu, svo vitað sé, renna hærri verðlaun til kvenna.

Fjölmargir leggja Hróknum lið við skipulagningu og framkvæmd Minningarmóts Birnu Norðdahl: Reykhólahreppur, Þörungaverksmiðjan, Skáksamband Íslands, Hólabúð, Kvenfélagið Katla, Reykhólaskóli, Gistiheimilið á Reykhólum, Gistiheimilið á Miðjanesi, Hótel Bjarkalundur, Kjarnafæði, Bónus, Innnes, Bílaleiga Akureyrar, MS, Samskipti, Ísspor, Skrudda og Ugla.

Frekari upplýsingar um mótið og gistingu í Reykhólahreppi: http://hrokurinn.is/minningarmot-birnu-norddahl-a-reykholum-20-agust-keppendur-hvattir-til-ad-skra-sig-sem-fyrst/

Nánari upplýsingar veitir Hrafn Jökulsson í síma 6950205

 

Ólympíufarinn: Hjörvar Steinn Grétarsson

Ólympíuskákmótið fer fram 2.-14. september nk. í Bakú í Aserbaísjan. Nítján manns verða í sendinefnd Íslands. Fram að móti verða Ólympíufararnir kynntir - einn á dag.

Í dag kynnum við sögunnar Hjörvar Stein Grétarsson sem teflir á öðru borði fyrir lið Íslandsmót í opnum flokki.

Nafn?

Hjörvar Steinn Grétarsson

Aldur?

23 ára

Hlutverk?

Liðsmaður í landsliði karla í skák.

Uppáhalds íþróttafélag?

Manchester United og Huginn.

Hvernig er undirbúningi þínum fyrir mótið háttað?

Undirbúningur minn fyrir mótið verður svipaður og hann er alltaf. Reyna að vera andlega og líkamlega tilbúinn fyrir mót.

Hvenær tókstu fyrst þátt á Ólympíuskákmóti og hversu oft hefur þú tekið þátt?

Ég tók fyrst þátt árið 2010 í Síberíu. Þetta verður mitt fjórða Ólympíumót.

Getur þú nefnt frægan skákmann fæddan í Bakú?

Garry Kasparov.

Minnisstæðasta atvik á Ólympíuskákmóti?

Ólympíumótið er að mínu mati stærsta mót sem skákmaður getur teflt á. Þar koma saman allir heimsins bestu skákmenn við algjörar topp aðstæður. Þessi samsetning verður til þess að minnistæðu atvikin verða ófá og því ómögulegt að velja eitt atvik sem sker sig úr fjöldanum.

Er Kaspíahafið haf eða stöðuvatn?

Google segir mér að um sé að ræða saltað stöðuvatn. Google og ég erum góðir vinir.

Minnisstæða skák á Ólympíuskákmóti og af hverju?

Minnisstæðar skákir tilheyra fortíðinni, ég er meira fyrir að horfa til framtíðar. Minnisstæðasta skák Ólympíumótsins verður þar af leiðandi tefld á næstkomandi Ólympíumóti.

Hverjar eru þínar væntingar/vonir um gengi íslensku liðanna?

Liðin líta vel út og get ég vottað fyrir það að liðsandi er og verður góður. Báðum þessum liðum eru allir vegir færir. Engin markmið og engar væntingar, heldur verður hver viðureign tekin fyrir sig og síðan skulum við sjá hvar við endum.

Í ljósi þess að Björn Þorfinnsson er ekki í Bakú-hópnum – hver verður aðaltrúður ferðarinnar?

Við erum öll trúðar á okkar eigin hátt.

Eitthvað að lokum?

Ég vona að íslenskir skákmenn og skák áhugamenn styðji við bakið á liðunum tveimur. Við munum gera okkar besta og sjá til þess að við verðum land og þjóð til sóma.
Áfram Ísland. 

Aðalfundur TR í kvöld

Aðalfundur Taflfélags Reykjavíkur verður haldinn þriðjudaginn 16.ágúst 2016 kl.20:30 í húsnæði félagsins að Faxafeni 12. Dagskrá fundarins er venjuleg aðalfundarstörf.

Wesley So sigraði á Sinquefield Cup

Bandaríski stórmeistarainn Wesley So (2771) sigraði á Sinquefield Cup sem lauk í gær í St. Louis í Bandaríkjunum. So fékk 5½ vinning í 9 skákum og varð ½ vinningi fyrir ofan Aronian (2792), Topalov (2761), Caruana (2807) og Anand (2770).

Ítarlega frásögn má finna á Chess.com.

 

• Heimasíða mótsins
• Beinar útsendingar