Ljósanæturmót HS Orku fer fram 3. september

Skákfélag Reykjanesbæjar í samstarfi við HS Orku halda Ljósanæturmót laugardaginn 3.sept kl.13:00. Tefldar verða 11 umferðir með 7 mínútna umhugsunartíma og í einum opnum flokki. Staðsetning í Njarðvíkurskóla og skráning hér að ofan í gula kassanum. Lokað verður fyrir skráningu ef fjöldi fer yfir 80 keppendur. 

Verðlaunarfé frá HS Orku er 100.000 kr. og mun deilast. 

• 1.verðlaun 40.000 kr.
• 2.verðlaun 25.000 kr.
• 3.verðlaun 15.000 k.r

Sérstök unglingarveðlaun fyrir 14 ára og yngri 10.000 kr. og fyrir óvæntustu úrstlitin 10.000 kr.

Mæting 12:45 og staðfesta skráningu hjá Palla

Upplýsingar um þegar skráða keppendur má finna hér.

Mótstjóri verður Páll Sigurðsson

Taflfélag Garðabæjar lagði Breiðablik í bráðabana

Taflfélag Garðabæjar fór í heimsókn í stúkuna í kópavogi þar sem félagið fékk fínar móttökur. Nú skyldi tekið þátt í 16 liða úrslitum í Hraðskákkeppni Taflfélaga

Nokkuð vantaði í lið TG en samt voru mættir þar 2 A liðs menn auk kjarninn úr B liði félagsins og mættum þar mjög ungu liði Breiðabliks sem var svo sannarlega sýnd veiði en ekki gefin.

Fyrirliði Blikana fór Birkir Karl Sigurðsson þjálfari sem gerði sér lítið fyrir og vann 11 af 12 skákum og fór fremur illa með okkar menn. Strákarnir sem hann þjálfar eru ekki orðnir neinir aukvisar og ótrúlegir hlutir hafa gerst í unglingastarfi Blika með stráka sem varla kunnu meira en mannganginn fyrir 2-3 árum síðan eru orðnir vel þéttir skákmenn. Stephan Briem var þar fremstur með 7,5 vinning og Sverrir Hákonarson var með 6 vinninga.

Páll Andrason og Jón Magnússon voru bestir gestanna með 10 vinninga

Meðalstigin voru samt duglega okkar megin (1684/1770 gegn 1462) og ljóst að við megum æfa okkur meira.

TG var yfir frá fyrstu umferð og fram í 10 umferð með mjög litlum mun ca. 1-3 vinningar (1 vinningur í hálfleik 17,5 – 18,5 þegar TG styrkti lið sitt) en komst í 4 vinninga forustu fyrir síðustu umferð en hún hvarf í þeirri síðustu þegar Blikar unnu 5-1 stórsigur og tryggðu sér bráðabana.

Bráðabanann vann svo TG 4-2 og eru því komnir áfram í 8 liða úrslit og mæta Taflfélag Reykjavíkur þar.

Páll Sigurðsson
liðsstjóri TG.

Ólympíuskákmót á Stofunni á fimmtudagskvöldið

Ólympíuskákmót á Stofunni! Í tilefni af Ólympíumótinu í Bakú bjóða Hrókurinn og Stofan til hraðskákmóts fimmtudagskvöldið 25. ágúst kl. 20. Landsliðsfólkið okkar sérstakir gestir. Tefldar verða 8 umferðir með 5 mínútna umhugsunartíma. Veitingar á sértilboði, margvísleg verðlaun & ókeypis þátttaka. Skráið ykkur sem fyrst hjá [e-mail] eða [e-mail]. Þetta verður skemmtilegt.

 

Ólafur Leifturskákmeistari

Skákakademía Reykjavíkur stóð fyrir Alheimsmótinu í Leifturskák á Menningarnótt. Leifturskákin fór fram á útitaflinu við Lækjargötu. Mikið skáklíf hefur verið við útiðtaflið í sumar og eitthvað um að vera í hverri viku. Tíu keppendur tefldu allir við alla. Vinna þurfti tvær skákir til að hafa sigur. Fór svo að Ólafur B. Þórsson kom fyrstur í mark ef svo má segja með átta vinninga. Í öðru til fjórða sæti með sjö vinninga urðu Gunnar Freyr Rúnarsson, Halldór Brynjar Halldórsson og Stefán Bergsson.

Ólympíufarinn: Bragi Þorfinnsson

Ólympíuskákmótið fer fram 2.-13. september nk. í Bakú í Aserbaísjan. Nítján manns verða í sendinefnd Íslands. Fram að móti verða Ólympíufararnir kynntir - einn á dag.

Í dag kynnum við til Braga Þorfinnsson sem teflir á sínu þriðja ólympíuskákmóti.

Nafn?

Bragi Þorfinnsson

Aldur?

35

Hlutverk?

Tefli í landsliðinu í opnum flokki.  

Uppáhalds íþróttafélag?

Taflfélag Reykjavíkur og Fram.

Hvernig er undirbúningi þínum fyrir mótið háttað?

Undirbúningurinn hefur verið fjölbreytilegur, hef mest lagt áherslu á byrjanirnar mínar sem og endatöflin. Þá tefldi ég ásamt Hannesi Hlífari á alþjóðlegu móti í Dresden fyrir skömmu sem var mikilvægur undirbúningur fyrir Ólympíumótið.

Hvenær tókstu fyrst þátt á Ólympíuskákmóti og hversu oft hefur þú tekið þátt?

Tók fyrst þátt í Calvía á Spáni 2004 og var líka í liðinu  árið 2010 í Khanty-Mansiysk. Þetta verður því mitt þriðja Ólympíuskákmót.

Getur þú nefnt frægan skákmann fæddan í Bakú?

Það fyrsta sem kemur upp  í hugann er að sjálfsögðu skrímslið með þúsund augun, Garry Kasparov.

Minnisstæðasta atvik á Ólympíuskákmóti?

Ólympíumót  eru ein stór samfelld veisla fyrir minnið. Maður einfaldlega drekkur í sig allt andrúmsloftið og stemninguna. Hver mínúta á þeim er minnisstæð. Man þó ekki eftir neinu sérstöku í augnablikinu.  

Er Kaspíahafið haf eða stöðuvatn?

Stöðuvatn eða?  

Minnisstæða skák á Ólympíuskákmóti og af hverju?

Líklega þegar ég vann Svíann Stellan Brynell í langri og erfiðri skák á Ólympíumótinu í Calvía. Man að ég var verulega sáttur eftir þá skák, og það er líka eitthvað extra skemmtilegt að vinna Svía,  hvort sem það er í skák eða öðru.  Viðureignin fór 2-2, svo því sé haldið til haga. 

Hverjar eru þínar væntingar/vonir um gengi íslensku liðanna?

Ég hef bjargfasta trú á því að báðum liðunum muni ganga mjög vel. Það er þó best að vera ekki með neinar stóar yfirlýsingar um gengi fyrirfram heldur láta verkin tala á skákborðinu. Þetta verður hörð barátta í hverri umferð, en ég held að menn verði tilbúnir í þá baráttu og muni skila sínu með fagmennsku og samheldni að leiðarljósi .

Í ljósi þess að Björn Þorfinnsson er ekki í Bakú-hópnum – hver verður aðaltrúður ferðarinnar?

Gunnar Björnsson tekur við því kefli. Held að hann muni standa sig frábærlega í því hlutverki og mynda nauðsynlegt mótvægi við þá alvöruþrungnu baráttu sem Ólympíumót eru vissulega.  

Eitthvað að lokum?

Fram til sigurs! Bring it on Baku!

Íslandsmót skákfélaga 2016-17

Fyrri hluti Íslandsmóts skákfélaga 2016-2017 fer fram dagana 29. sept – 2. okt.  nk.  Mótið fer fram í Rimaskóla í Reykjavík.  1. umferð (eingöngu í 1.deild) mun hefjast kl. 19.30 fimmtudaginn 29. september. Aðrar deildir munu hefja taflmennsku föstudaginn 30. september. kl. 20.00 og síðan tefla 1. október  kl. 11.00 og kl. 17.00 sama dag.  Síðasta umferðin í fyrri hlutanum hefst kl. 11.00 sunnudaginn 2. október. 

Umhugsunartími er 90 mín. á skákina + 30 sek. viðbótartími bætist við eftir hvern leik.

Þátttökugjöld:

• 1. deild kr. 70.000.-
• 2. deild kr. 60.000.-
• 3. deild kr. 20.000.-
• 4. deild kr. 15.000.-

Skáksamband Íslands mun greiða fargjöld utan stór-Reykjavíkursvæðisins samkvæmt reikningum fyrir sveitir í 1. og 2. deild.  Miða skal við einn brottfararstað á hverju svæði, t.d. Akureyri, Egilsstaði, Ísafjörð.  Sami háttur verður hafður í 3. og 4. deild og áður, þ.e. þátttökugjöld höfð lág en sveitirnar verða sjálfar að sjá um ferðakostnað á skákstað.

Meðfylgjandi er 3. kafli skáklaga Skáksambands Íslands sem varða Íslandsmót skákfélaga og reglugerð um Íslandsmót skákfélaga.

Vakin er athygli á viðbót við 2. grein reglugerðar um Íslandsmót Skákfélaga:

2. gr.

Framkvæmdanefnd Íslandsmóts skákfélaga, sem skipuð er af stjórn Skáksambands Íslands, ákveður töfluröð og skipar skákstjóra og umsjónarmenn Íslandsmóts skákfélaga.  Öllum taflfélögum, sem eiga sveitir í 1. deild, ber að útvega einn skákstjóra.  

Athugið að tilkynningar v. Keppendaskrár Skáksambands Íslands skulu hafa borist SÍ í síðasta lagi 9. september nk. sbr. 18. gr. skáklaga. 

Vakin er athygli á eftirfarandi texta í 19. grein skáklaga:  „Fyrir upphaf 1.umferðar fyrri hluta ÍS skulu félögin skila inn styrkleikaröðuðum lista allra þeirra keppenda sem þeir hyggjast nota í keppninni.“ 

Þátttökutilkynningar þurfa að berast Skáksambandi Íslands fyrir 20. september með bréfi, tölvupósti ([e-mail]), símleiðis eða á Skák.is (guli kassinn). Að gefnu tilefni er minnt á að nauðsynlegt er að skrá sveitir í keppnina, ekki síst í 4. deild. 

Stjórn SÍ mælist til – af gefnu tilefni - að félögin skrái ekki fleiri sveitir til keppni en þau treysta sér til að manna í báðum hlutum keppninnar.

Aðalfundur Vinaskákfélagsins fer fram í kvöld

Aðalfundur Vinaskákfélagsins verður haldinn 23. ágúst 2016 í Vin, Hverfisgötu 47, 101 Reykjavík klukkan 20. 

Dagskrá aðalfundar er sem hér segir:

1. Forseti setur fundinn.
2. Kosning fundarstjóra og fundarritara.
3. Skýrsla stjórnar lögð fram.
4. Reikningar lagðir fram til samþykktar.

(Vegna endurskipulagningar Vinaskákfélagsins, þarf stjórn félagsins að fá undanþágu með atkvæðagreiðslu um að sleppa þessum lið).

5. Lagabreytingar.

Kaffihlé!!

6. Kosning stjórnar.
7. Önnur mál.

Stjórnin.

EM ungmenna: Benedikt, Róbert, Símon og Freyja unnu í dag

Vel gekk í dag hjá íslensku ungmennanna í 5. umferð EM ungmenna. 5½ vinningur kom í hús í ellefu skákum. Benedikt Þórisson (u10), Róbert Luu (u12), Símon Þórhallsson (u18) og Freyja Birkisdóttir (u10) unnu sínar skákir. Vignir Vatnar Stefánsson (u14) og Bárður Örn og Björn Hólm Birkissynir (u16) gerðu jafntefli. 

Vignir hefur staðið sig best íslensku krakkanna en hann hefur 3 vinninga. Bárður hefur 2½ vinning og Tómas Möller (u8), Róbert, Björn Hólm, Símon, Jón Kristinn Þorgeirsson (u18) og Freyja hafa 2 vinninga.

Úrslit 5. umferðar:

Staðan

 

 

Frídagur er á morgun. 

• Heimasíða mótsins
• Chess-Results
• Beinar útsendingar

Barna- og unglingaæfingar Hugins í Mjóddinni hefjast á mánudaginn

Barna- og unglingaæfingar Skákfélagsins Hugins í Mjóddinni hefjast aftur eftir sumarfrí mánudaginn 29. ágúst 2016. 

 

Æfingarnar byrja kl. 17:15 og þeim lýkur yfirleitt rétt fyrir kl. 19.

 

Æfingarnar eru opnar öllum 15 ára og yngri en skipt verður í tvo flokka eftir aldri og styrkleika á flestum æfingum.

 

Engin þátttökugjöld.

 

Æfingarnar verða haldnar í félagsheimili Hugins í Álfabakka 14a, Mjódd. Inngangur er milli Fröken Júlíu og Subway en salur félagsins er á þriðju hæð hússins.

 

Á æfingunum verða 5 eða 6 umferðir með umhugsunartíma 10 eða 7 mínútur. Einnig verður farið í dæmi og endatöfl eins og tíma vinnst til.

 

Þegar starfsemin verður komin vel af stað verður unnið í litlum verkefnahópum á einni æfingu í mánuði og þannig stuðlað að því að efla einingu og samstöðu innan hópsins.  Þær æfingar verða eingöngu fyrir félagsmenn og verða kynntar síðar. Jafnframt verður þegar tímabilið er komið vel af stað í boði kennsla fyrir félagsmenn utan hefðbundins æfingatíma.

 

Umsjón með æfingunum hefur Vigfús Ó. Vigfússon

Skákþing Norðlendinga hefst á föstudaginn

Skákþing Norðlendinga 2016 verður haldið í safnaðarheimili Siglufjarðarkirkju helgina 26. til 28. ágúst næstkomandi. Skákfélag Siglufjarðar sér um mótshaldið. Mótið er opið öllu skákáhugafólki. Tefldar verða sjö umferðir eftir Monrad-kerfi, þ.e.a.s. fjórar atskákir og þrjár kappskákir.

Mótið verður reiknað til íslenskra skákstiga og til FIDE-skákstiga. Skákstjóri verður Ingibjörg Edda Birgisdóttir. Núverandi Skákmeistari Norð-lendinga er Jón Kristinn Þorgeirsson frá Akureyri.

Dagskrá

• Föstudagur 26. ágúst kl. 20.00: 1.-4. umferð. Atskákir, 25 mínútur á mann.
• Laugardagur 27. ágúst kl. 10.30: 5. umferð. 90 mínútur + 30 sekúndur við hvern leik.
• Laugardagur 27. ágúst kl. 16.30: 6. umferð. 90 mínútur + 30 sekúndur við hvern leik.
• Sunnudagur 28. ágúst kl. 10.30: 7. umferð. 90 mínútur + 30 sekúndur við hvern leik.

Aðalverðlaun

1. sæti: 50.000 krónur. 

(Ef sigurvegari mótsins er ekki með lögheimili á Norðurlandi eru verðlaun Skákmeistara Norðlendinga einnig 50.000 krónur.)

2. sæti:  25.000 krónur.
3. sæti:  10.000 krónur.

Aukaverðlaun

1. Efstur skákmanna undir 1800 íslenskum skákstigum (með lögheimili á Norðurlandi).
2. Efstur heimamanna (í Skákfélagi Siglufjarðar).
3. Efstur stigalausra (með lögheimili á Norðurlandi).

Eingöngu verður hægt að vinna til einna aukaverðlauna.

Peningaverðlaunum verður skipt á milli manna, verði þeir jafnir að vinningum. Þetta á við um bæði aðal- og aukaverðlaun.

Skráning og þátttökugjald

Skráning er hafin og fer hún fram á vefslóðinni: siglfirdingur.is/skakthing. Upplýsingar um skráða keppendur er jafnframt að finna þar. Skráningu verður lokað á hádegi 26. ágúst. Þátttökugjaldið er krónur 3.000 fyrir 17 ára og eldri, en 1.500 krónur fyrir 16 ára og yngri.

Hraðskákmót Norðlendinga 2016

Hraðskákmót Norðlendinga 2016 verður svo haldið sunnudaginn 28. ágúst á sama stað en það hefst ekki fyrr en kl. 15.00. Ekkert þátttökugjald er í það. Núverandi Hrað-skákmeistari Norðlendinga er áðurnefndur Jón Kristinn Þorgeirsson frá Akureyri.

Bakhjarlar

Bakhjarlar þessara skákmóta tveggja eru Arion banki, Hótel Siglunes, Rammi, Samkaup-Úrval, Siglufjarðarkirkja, Skáksamband Íslands, SR-vélaverkstæði og Verkfræðistofan Grundun.

Nánari upplýsingar

Sigurður Ægisson, formaður Skákfélags Siglufjarðar, veitir allar frekari upplýsingar um mótin. Símanúmer hans eru 467-1263 og 899-0278 og netfang [e-mail].