Ólympíufarinn: Guðmundur Kjartansson

Ólympíuskákmótið fer fram 2.-13. september nk. í Bakú í Aserbaísjan. Nítján manns verða í sendinefnd Íslands. Fram að móti verða Ólympíufararnir kynntir - einn á dag.

Í dag kynnum við til leiks Guðmund Kjartansson sem teflir á sínu öðru Ólympíuskákmóti. 

Nafn?

Guðmundur Kjartansson

Aldur?

28 ára

Hlutverk?

4.borði í karlaliðinu

Uppáhalds íþróttafélag?

Fylkir

Hvernig er undirbúningi þínum fyrir mótið háttað?

Ég ákveð hvaða byrjanir ég ætla að tefla, tefli hraðskákir á netinu, leysi mikið af þrautum, skoða endatöfl og fylgist með þeim mótum sem eru í gangi. Ég tek þátt í sterku móti í Abu Dhabi sem verður góð æfing rétt fyrir Ólympíumótið. Svo kíki ég í fótbolta, fer í göngutúra eða syndi til að halda mér í líkamlegu formi og reyni almennt að líða vel og vera með rétt hugarfar 

Hvenær tókstu fyrst þátt á Ólympíuskákmóti og hversu oft hefur þú tekið þátt?

Ég tók fyrst þátt í Tromsö 2014 svo þetta verður í annað skipti

Getur þú nefnt frægan skákmann fæddan í Bakú?

Rauf Mamedov

Minnisstæðasta atvik á Ólympíuskákmóti?

Það var alltaf gaman að spila fótbolta með hinum og þessum stórstjörnum, ég man þegar næst stigahæsti skákmaður heims, MVL, var í marki og gerði tilraun til þess að kasta boltanum út en dreif því miður ekki nema svona einn metra þannig að einn af andstæðingunum okkar náði boltanum og skoraði frekar auðveldlega.

Er Kaspíahafið haf eða stöðuvatn?

Væntanlega stöðuhaf

Minnisstæða skák á Ólympíuskákmóti og af hverju?

Þegar ég mætti Andrew Greet og tefldi kóngsindverjann. Ég var með tapað tafl en tókst að búa til svaka flækjur og að lokum verjast vel.

Hverjar eru þínar væntingar/vonir um gengi íslensku liðanna?

Við ætlum að pakka öllum saman!

Í ljósi þess að Björn Þorfinnsson er ekki í Bakú-hópnum – hver verður aðaltrúður ferðarinnar?

Við erum allir trúðar! ... en líklega Gunnar Björnsson

Eitthvað að lokum?

Ég hef aldrei komið til Bakú áður og svo er líka mjög sérstök stemmning á svona mótum svo að ég er að sjálfsögðu spenntur fyrir ferðinni og ekki skemmir fyrir að það er mjög góður 20 manna hópur að fara frá Íslandi. Við erum allir góðir vinir í liðinu og það verður gaman að tefla í sama liði og Jói í fyrsta skipti. 

Hannes og Hallgerður efst á sterku skákmóti Hróksins á Stofunni

Stórmeistarinn Hannes Hlífar Stefánsson varð efstur á mjög sterku skákmóti sem Hrókurinn og Stofan Café efndu til á fimmtudagskvöldið, í tilefni af Ólympíuskákmótinu sem hefst í Bakú í Aserbaídsjan í næstu viku. Hallgerður Helga Þorsteinsdóttir sigraði í kvennaflokki. Keppendur voru 32 og var mótið æsispennandi og bráðskemmtilegt frá upphafi til enda. 

Helgi Hrafn Gunnarsson þingmaður lék fyrsta leikinn á mótinu fyrir Hannes Hlífar gegn Jon Olav Fivelstad.  Hannes hefur orðið Íslandsmeistari tólf sinnum, oftar en nokkur annar, og hann tefldi af miklu öryggi á mótinu. Goðsögnin Jóhann Hjartarson veitti honum harða keppni framan af, sem og stórmeistarinn Helgi Áss Grétarsson, en Hannes gaf engan höggstað á sér. 

Helgi Áss varð í 2. sæti í karlaflokki og hinn ungi og bráðefnilegi Dagur Ragnarsson náði bronsinu. 

Keppni var mjög tvísýn í kvennaflokki, enda allar landsliðskonurnar fimm meðal keppenda, sem og Sigurlaug Regína Friðþjófsdóttir, fv. Íslandsmeistari. Leikar fóru svo að Hallgerður Helga hreppti gullið, Lenka Ptacnikova silfrið og Guðlaug Unnur Þorsteinsdóttir bronsið. Þær skipa íslenska kvenna liðið á Ólympíumótinu í Bakú, ásamt Hrund Hauksdóttur og Veróniku Steinunni Magnúsdóttur. 

Í mótslok afhenti Kristjana Guðmundsdóttir Motzfeldt, heiðursforseti Hróksins á Grænlandi, verðlaun frá Stofunni og óskaði íslenska landsliðsfólkinu gæfu og gengis á Ólympíumótinu í Bakú. 

Liðsmenn Hróksins hafa undanfarin misseri staðið fyrir mörgum viðburðum á Stofunni, Vesturgötu 3, og þar er góð aðstaða til skákiðkunar.

 

Stórt start hjá SA 3. september

Nú þegar sumri hallar fara kóngar og drottningar á kreik. Riddarar, biskupar og peð. Og framhjáhlaupin byrja fyrir alvöru.

Við hjá Skákfélagi Akureyrar ætlum að hleypa okkar taflmönnum á skeið á STÓRA STARTMÓTINU laugardaginn 3.september. Þá er meiningin að kalla til leiks alla þá sem peði geta valdið og hafa minnsta grun um það hvernig riddarin hoppar um taflborðið. Við stefnum að fjölmennasta móti norðan heiða í áratugi - jafnvel aldir. Markmiðið er að ná saman minnst 40 þátttakendum.

Staður og stund: Íþróttahöllin við Skólastíg, ath gengið inn að sunnan um aðaldyr! Laugardaginn 3. september kl. 13.00

Á STÓRA STARTMÓTINU geta keppendur og gestir:

Kynnt sér haustdagskrá Skákfélagsins

Fengið sér kaffisopa

Skráð sig í félagið eða á vinalista á Facebook

Skráð sig á mót eða aðra viðburði félagsins

Tekið eina bröndótta

Teflt þrjár sjö mínútna skákir á Startmótinu - fyrri hluta

Gætt sér á veitingum í hléi í góðra vina hópi

Teflt allar sjö skákirnar á Startmótinu - fyrri og seinni hluta

Þeir sem vilja geta sumsé látið þrjár skákir nægja og hellt sér í veitingarnar eða ef skákviljinn er brennandi, teflt til þrautar allat umferðirnar sjö. Umhugsunartími fyrir hverja skák verður 7 mínútur. 

Fjölmörg verðlaun verða í boði - aðallega þó ánægjan af því að tefla skák.

Sjáumst öll í höllinni laugardaginn 3. september!

Ólympíufarinn: Hrund Hauksdóttir

Ólympíuskákmótið fer fram 2.-13. september nk. í Bakú í Aserbaísjan. Nítján manns verða í sendinefnd Íslands. Fram að móti verða Ólympíufararnir kynntir - einn á dag.

Í dag kynnum við til leiks Hrund Hauksdóttir sem teflir á sína fyrsta Ólympíuskákmóti

Nafn?

Hrund Hauksdóttir

Aldur?

20 ára

Hlutverk?

Tefla með kvennaliðinu. 

Uppáhalds íþróttafélag?

Ætli það sé ekki Fjölnir.

Hvernig er undirbúningi þínum fyrir mótið háttað?

Æfingar hjá Birni Ívari.

Hvenær tókstu fyrst þátt á Ólympíuskákmóti og hversu oft hefur þú tekið þátt?

Þetta verður mitt fyrsta Ólympíumót.

Getur þú nefnt frægan skákmann fæddan í Bakú?

Kasparov.

Minnisstæðasta atvik á Ólympíuskákmóti?

Veit ekki...

Er Kaspíahafið haf eða stöðuvatn?

Mmm stöðuvatn?

Minnisstæða skák á Ólympíuskákmóti og af hverju?

Man ekki eftir neinni svo vonandi verður einhver skák minnisstæð á þessu Ólympíumóti haha

 

Hverjar eru þínar væntingar/vonir um gengi íslensku liðanna?

Að við endum ofar en í upphafi móts.

 

Í ljósi þess að Björn Þorfinnsson er ekki í Bakú-hópnum – hver verður aðaltrúður ferðarinnar?

Það eru allnokkrir trúðar í hópnum. 

Eitthvað að lokum?

Áfram Ísland!

Ólympíuskákmót á Stofunni í kvöld

Hrókurinn heldur Ólympíumótið í skák á Stofunni, Vesturgötu 3, á fimmtudagskvöldið kl. 20 og meðal keppenda verða margir af sterkustu skákmönnum landsins. Mótið er haldið í tilefni af því að 42. Ólympíumótið í Bakú fer fram í september og þar tefla karla- og kvennasveitir Íslands. 

 

Meðal keppenda á Stofunni verða stórmeistararnir Jóhann Hjartarson, Lenka Ptacnikova, Hannes Stefánsson, Helgi Áss Grétarsson og Stefán Kristjánsson. Kvennalandsliðið mætir í heild en það skipa, auk Lenku, þær Guðlaug Þorsteinsdóttir, Hallgerður Helga Þorsteinsdóttir, Hrund Hauksdóttir og Verónika Steinunn Magnúsdóttir.

Af öðrum meisturum sem skráðir eru til leiks má nefna landsliðsmanninn Braga Þorfinnsson, Ingvar Þór Jóhannesson, Björn Ívar Karlsson og Elvar Guðmundsson. Alls munu 32 skákmenn leika listir sínar á Stofunni og er þetta eitt alsterkasta hraðskákmót ársins.

Skáklífið hefur blómstrað á Stofunni undanfarin misseri og þer eru reglulega haldin stórmót. Áhorfendur eru velkomnir og er tilboð á veitingum í tilefni af mótinu.

 

Skákþing Norðlendinga hefst á morgun

Skákþing Norðlendinga 2016 verður haldið í safnaðarheimili Siglufjarðarkirkju helgina 26. til 28. ágúst næstkomandi. Skákfélag Siglufjarðar sér um mótshaldið. Mótið er opið öllu skákáhugafólki. Tefldar verða sjö umferðir eftir Monrad-kerfi, þ.e.a.s. fjórar atskákir og þrjár kappskákir.

Mótið verður reiknað til íslenskra skákstiga og til FIDE-skákstiga. Skákstjóri verður Ingibjörg Edda Birgisdóttir. Núverandi Skákmeistari Norð-lendinga er Jón Kristinn Þorgeirsson frá Akureyri.

Dagskrá

• Föstudagur 26. ágúst kl. 20.00: 1.-4. umferð. Atskákir, 25 mínútur á mann.
• Laugardagur 27. ágúst kl. 10.30: 5. umferð. 90 mínútur + 30 sekúndur við hvern leik.
• Laugardagur 27. ágúst kl. 16.30: 6. umferð. 90 mínútur + 30 sekúndur við hvern leik.
• Sunnudagur 28. ágúst kl. 10.30: 7. umferð. 90 mínútur + 30 sekúndur við hvern leik.

Aðalverðlaun

1. sæti: 50.000 krónur. 

(Ef sigurvegari mótsins er ekki með lögheimili á Norðurlandi eru verðlaun Skákmeistara Norðlendinga einnig 50.000 krónur.)

2. sæti:  25.000 krónur.
3. sæti:  10.000 krónur.

Aukaverðlaun

1. Efstur skákmanna undir 1800 íslenskum skákstigum (með lögheimili á Norðurlandi).
2. Efstur heimamanna (í Skákfélagi Siglufjarðar).
3. Efstur stigalausra (með lögheimili á Norðurlandi).

Eingöngu verður hægt að vinna til einna aukaverðlauna.

Peningaverðlaunum verður skipt á milli manna, verði þeir jafnir að vinningum. Þetta á við um bæði aðal- og aukaverðlaun.

Skráning og þátttökugjald

Skráning er hafin og fer hún fram á vefslóðinni: siglfirdingur.is/skakthing. Upplýsingar um skráða keppendur er jafnframt að finna þar. Skráningu verður lokað á hádegi 26. ágúst. Þátttökugjaldið er krónur 3.000 fyrir 17 ára og eldri, en 1.500 krónur fyrir 16 ára og yngri.

Hraðskákmót Norðlendinga 2016

Hraðskákmót Norðlendinga 2016 verður svo haldið sunnudaginn 28. ágúst á sama stað en það hefst ekki fyrr en kl. 15.00. Ekkert þátttökugjald er í það. Núverandi Hrað-skákmeistari Norðlendinga er áðurnefndur Jón Kristinn Þorgeirsson frá Akureyri.

Bakhjarlar

Bakhjarlar þessara skákmóta tveggja eru Arion banki, Hótel Siglunes, Rammi, Samkaup-Úrval, Siglufjarðarkirkja, Skáksamband Íslands, SR-vélaverkstæði og Verkfræðistofan Grundun.

Nánari upplýsingar

Sigurður Ægisson, formaður Skákfélags Siglufjarðar, veitir allar frekari upplýsingar um mótin. Símanúmer hans eru 467-1263 og 899-0278 og netfang [e-mail].

EM ungmenna: 6½ vinningur í hús í dag

Vel gekk í dag hjá íslensku ungmennanna í 6. umferð EM ungmenna. 6½ vinningur kom í hús í ellefu skákum. Benedikt Þórisson (u10), Róbert Luu (u12), Bárður Örn Birkisson (u16), Gauti Páll Jónsson (u18) og Freyja Birkisdóttir (u10) unnu sínar skákir. Björn Hólm Birkisson (u16), Símon Þórhallsson (u18) og Jón Kristinn Jónsson (u18) gerðu jafntefli.

Bárður Örn er efstur íslensku ungmennanna með 3½ vinning. Róbert, Freyja og Vignir Vatnar Stefánsson (u14) koma næst með 3 vinninga.

Sjöunda umferð af níu verður tefld á morgun.

Úrslit 6. umferðar:

Staðan

 

 

• Heimasíða mótsins
• Chess-Results
• Beinar útsendingar

Aðalfundur Vinaskákfélagsins í gær

Í gærkvöldi var aðalfundur í Vinaskákfélaginu. Meistari Hörður Jónasson hafði veg og vanda af undirbúningi og hann tók við embætti varaforseta af Hrafni Jökulssyni, en hinn ástsæli Róbert Lagerman verður forseti áfram, með vaska stjórn. Hrafni hlotnaðist hinsvegar sá heiður að vera útnefndur Verndari Vinaskákfélagsins.

Nú eru 13 ár síðan Hróksmenn komu fyrst í Vin Fræðslu Og Batasetur, sem Rauði krossinn rekur. Þessi heimsókn hefur fætt af sér alveg óteljandi gleðistundir.

Allir eru velkomnir í Vin -- og Vinaskákfélagið.

Stjórn Vinaskákfélagsins

Forseti: Róbert Lagerman
Varaforseti: Hörður Jónasson
Gjaldkeri: Héðinn Sveinn Baldursson Briem
Ritari: Aðalsteinn Thorarensen
Meðstjórnandi: Ingi Tandri Traustason
Varamaður 1: Hjálmar Hrafn Sigurvaldason
Varamaður 2: Embla Optimisti
Verndari Vinaskákfélagsins er: Hrafn Jökulsson

Ólympíufarinn: Kjartan Maack

Ólympíuskákmótið fer fram 2.-13. september nk. í Bakú í Aserbaísjan. Nítján manns verða í sendinefnd Íslands. Fram að móti verða Ólympíufararnir kynntir - einn á dag.

Í dag kynnum við til leiks Kjartan Maack sem verður fararstjóri hópsins.

Nafn?

Kjartan Maack

Aldur?

40 vetra

Hlutverk?

Fararstjóri. Fréttaflutningur. Aukinheldur mun ég bregða mér í hvert það hlutverk sem landsliðsfólk okkar þarfnast hverju sinni.  

Uppáhalds íþróttafélag?

Taflfélag Reykjavíkur

Hvernig er undirbúningi þínum fyrir mótið háttað?

Ég byrja daginn á raddæfingum með áherslu á framgómmælt nefhljóð, til að tryggja skýrleika í viðtölum við landsliðsfólk okkar í Baku. Að öðru leyti er undirbúningur minn með hefðbundnu sniði; sprettæfingar, hnébeygjur, upphífingar, jóga, hugleiðsla, uppbyggilegt mataræði og nægur svefn.

Hvenær tókstu fyrst þátt á Ólympíuskákmóti og hversu oft hefur þú tekið þátt?

Ég var liðsstjóri á Ólympíuskákmóti u16 í Slóvakíu í júlí síðastliðnum. Því er skammt stórra högga á milli á þessu mikla Ólympíuári.

Getur þú nefnt frægan skákmann fæddan í Bakú?

Já.

Minnisstæðasta atvik á Ólympíuskákmóti?

Þegar rússnesku bílstjórarnir tveir renndu í hlað á hóteli u16 ólympíulandsliðsins í Búdapest fyrr á þessu ári til þess að keyra liðið til Poprad í Slóvakíu. Fyrr um morguninn höfðu þeir sótt landslið Azerbaijan á flugvöllinn. Þeir voru 3 klst að keyra frá flugvellinum að hótelinu, leið sem við fórum kvöldið áður á 7 mínútum. Á leiðinni til Slóvakíu varð rússnesku bílstjórunum reglulega uppsigað við konuna í google maps appinu og fengum við því að dvelja aukalega í klukkustund um borð í bifreið þeirra félaga. Var það fagnaðarefni því fyrir vikið náðum við djúpri tengingu við rússneska dægurlagatónlist. Azerarnir voru gjörsamlega úrvinda þegar til Slóvakíu var komið, eftir að hafa setið í 8 klukkustundir í óloftkældum bílnum. Enda voru þeir heillum horfnir í mótinu, þó innan raða þeirra væri ungur heimsmeistari. Sökum línuskorts læt ég vera að lýsa því er félagarnir tveir drápu á bílnum úti á miðri götu við lítinn fögnuð slavneskra ökumanna, og voru drykklanga stund að finna út úr því hvernig koma skyldi bílgarminum aftur í gang. Ekki er með öllu útilokað að aðalpersónur í hinum merku sjónvarpsþáttum 'Klaufabárðarnir' séu byggðar á þessum tveimur rússnesku atvinnubílstjórum. 

Er Kaspíahafið haf eða stöðuvatn?

Það er hafið yfir allan vafa að Kaspíahafið er ekki hafið sem margir telja það vera, heldur ku það vera rammsalt stöðuvatn.

Minnisstæða skák á Ólympíuskákmóti og af hverju?

Minnisstæðasta skákin frá Ól u16 í Slóvakíu er skák Vignis Vatnars Stefánssonar á 1.borði gegn Belgíu í 8.umferð. Í jafnteflislegu mislitu biskupaendatafli smíðaði Vignir Vatnar sannkallaða stórmeistarafléttu sem fól í sér mannsfórn. Í kjölfarið var allur vindur úr Belgum og Ísland vann 3,5-0,5. 

Hverjar eru þínar væntingar/vonir um gengi íslensku liðanna?

Ég vænti þess að landsliðin fari fram úr eigin væntingum og allir fari heim með vasa fulla af skákstigum. Jafnframt mun einhver þurfa auka pláss í ferðatöskunni fyrir grjótharðan áfanga.

Í ljósi þess að Björn Þorfinnsson er ekki í Bakú-hópnum – hver verður aðaltrúður ferðarinnar?

Ég trúi því og treysti að Björn muni áfram sinna hlutverki sínu af kostgæfni í gegnum samfélagsmiðla. .  

Eitthvað að lokum?

Gætum að því hvaða hugsunum við gefum vængi. Það getur skipt sköpum við skákborðið.

Breiðablik - skákþjálfun veturinn 2016-2017

Viltu æfa skák oft í viku og stefna á afreksmörk Skáksambands Íslands ?

Skákdeild Breiðabliks í samstarfi við Skákakademía Kópavogs og Skákskóla Íslands býður í vetur upp á öfluga skákþjálfun með það að markmiði.

Boðið er upp á æfingatíma í stúkunni við Kópavogsvöll mánudaga til föstudaga frá 16:00 – 17:30.
Þjálfari er Birkir Karl Sigurðsson FIDE National Instructor

Æfingarnar henta skákkrökkum sem hafa náð grunnfærni í skák, hafa mikinn áhuga og vilja æfa skák oft í viku að stefna að því að verða í fremstu röð á Íslandi og að standa sig með sóma á alþjóðlegum barna- og unglingaskákmótum.

Hver iðkandi velur sér þrjár æfingar í viku, en frjálst verður að hafa þær fleiri eða færri. Einnig verður hægt að velja um að mæta seinna og fara fyrr ef tíminn t.d. rekst á aðrar tómstundir. Við búumst við að geta myndað tvo kjarna, eldri og reyndari krakkar og svo hóp af ungum og efnilegum. Í athugun er að vera með hóp c.a. 10 ára og yngri í efri byggðum Kópavogs ef næg þátttaka fæst.

Iðkendur utan Kópavogs og í hvaða taflfélagi sem er eru velkomnir. Allir geta mætt í nokkur skipti til að prófa án æfingagjalds.

Fyrsta æfing verður mánudaginn 29.ágúst
Síðasta æfing fyrir jólafrí verður föstudaginn 9.desember.
Fyrsta æfing eftir áramót verður mánudaginn 2.janúar
Páskafrí mánudag 10.apríl – mánudags 17.apríl.
Síðasta æfing fyrir sumarfrí verður föstudaginn 12.mai
Frí er á æfingum alla hátíðisdaga. (fim 20.apríl: Sumardagurinn fyrsti, mán 1.mai: Verkalýðsdagurinn)

Æfingagjöld veturinn 2016-17: (eru styrkhæf sem tómstundastyrkur hjá Kópavogsbæ og Reykjavíkurborg):
Þrisvar sinnum eða oftar í viku: 30.000kr
Tvisvar sinnum í viku: 20.000kr
Einu sinni í viku: 10.000kr
Skráning í Íbúagátt Kópavogsbæjar 

Æfingarnar eru á jarðhæð í stúkunni við Kópavogsvöll og vonandi einnig í efri byggðum Kópavogs. Gengið inn á jarðhæð í gegnum hlið eins og verið sé að fara á fótboltaleik og þaðan inn í glerbygginguna. 

Nánari upplýsingar hjá Halldóri Grétari. 

Afreksmörk SÍ.