Meistaramót Ása í dag

Þriðjudaginn 20 mars halda Æsir í Ásgarði sitt meistaramót. Tefldar verða 10 umferðir með 10 mín. umhugsunar tíma.Taflið byrjar stundvíslega kl 13.00. Allir karlar velkomnir sem verða 60 ára á árinu og eldri.Einnig konur sem verða 50 ára  og eldri. Skákstaðurinn er Stangarhylur 4, félagsheimili eldri borgara í Reykjavík.              

Álfhólsskóli Íslandsmeistari grunnskólasveita (4.-7. bekkur)

Álfhólsskóli a-sveit er Íslandsmeistari barnaskólasveita eftir sigur í gær á jöfnu og skemmtilegu íslandsmóti sem haldið var í Rimaskóla um helgina. Ekki leit þó lengi vel út fyrir að Álfhólsskóli myndi hirða gullið því skólinn var ekki í verðlaunasæti eftir laugardaginn. Miklu munaði um að Róbert Luu sem kom inn í liðið og styrkti það mikið og skólinn byrjaði á að vinna Rimaskóla stórt sem hafði leitt keppnina fram að því. Ísak Orri Karlsson fékk samt flesta vinninga fyrir liðið eða 7 alls. 

Íslandsmeistarasveitina skipuðu þeir. Róbert Luu (3,5 af 4), Ísak Orri Karlsson (7 af 9), Rayan Sharifa (6 af 9), Alexander Már Bjarnþórsson (6 af 9) og Gabríel Sær Bjarnþórsson (4 af 5).

Sveitirnar sem á eftir komu voru mjög jafnar:

 

Hefði í raun hver þeirra sem var hafa hirt gullið á góðum degi. Þær voru a.m.k. mikið í því að hirða stig af hvorri annarri. Háteigsskóli endaði í 2 sæti með fleiri liðsstig en Vatnsendaskóli sem urðu jafnir þeim að vinningum.

 

Rima- og Ölduselsskóli urðu svo ekki langt undan. Háteigsskóli hafði reyndar flest liðsstig allra liða.

Efsta b-liðið var b-lið Vatnsendaskóla sem stal sigrinum í síðustu umferð með stórsigri og örugglega í efsta sæti c-liða var c-lið Rimaskóla sem endaði í 6. sæti keppninni allri.  

 

Borðaverðlaun fengu fyrir 

• 1. borð. Joshua Davíðsson Rimaskóla 6,5 vinningar.
• 2. borð. Tómas Möller Vatnsendaskóla 7,5 vinningar.
• 3. borð. Bjartur Þórisson Austurbæjarskóla og Birgir Logi Steinþórsson Ölduselsskóla 8 vinningar.
• 4. borð. Kjartan Karl Gunnarsson Rimaskóla 7 vinningar. 

 

Lokastaðan á Chess-Results.

Rúnar hraðskákmeistari Akureyrar

Það er skammt stórra högga á milli hjá FM Rúnari Sigurpálssyni. Eftir að hafa orðið Skákmeistari Akureyrar nýlega með sigri í einvígi um titilinn, bætti hann nú öðrum titli í safn sitt þegar hann bar sigur úr býtum á Hraðskákmóti Akureyrar.  Þar þurfti reyndar líka aukakeppni til að útkljá mótið, því þeir Rúnar og Áskell Örn Kárason urðu jafnir á mótinu sjálfu. Mjög góð þátttaka var á mótinu og tefldu 18 skákmenn einfalda umferð, alls 17 skákir hver. Þeir Áskell og Rúnar höfðu nokkra yfirburði og fengu báðir 16 vinninga. Ólafur Kristjánsson var þriðji með 13,5; Símon Þórhallsson fékk 13 og Jón Kristinn Þorgeirsson 12,5. 

Þeir tefldu svo tvær skákir til úrslita; þeirri fyrri lyktaði með jafntefli en Rúnar vann þá seinni og er því Hraðskákmeistari Akureyrar 2018; líklega í 55. sinn sem hann hampar þeim titli.  

Lokastöðuna má sjá hér:

Caruana efstur í hálfleik í Berlín

Línur eru farnar að skýrast á áskorendamótinu í skák. Sjö umferðum er 14 er lokið. Caruana (2784) er efstur með 5 vinninga eftir sigur Aronian (2794) í gær þar sem hann síðarnefndi lagði í mikla sókn þar sem Caruana varðist vel. Mamedyarov (2809) gerði öruggt jafntefli með svörtu með Grischuk (2767) og er annar með 4,5 vinninga. Baráttan virðist vera milli þeirra tveggja en þó má ekki útiloka Dinge Liren (2769), Grischuk og Kramnik (2800) sem allir hafa 3,5 vinninga 

Áttunda umferð hefst kl. 14 í dag. 

Sjá nánar á Chess.com. 

Myndir: Maria Emelianova (Chess.com)

 

• Heimasíða mótsins
• Beinar útsendingar (Chess24)
• Beinar útsendingar (Chessbrah)

Öðlingamót TR hefst á miðvikudaginn

Skákmót öðlinga 40 ára og eldri hefst miðvikudaginn 21. mars kl. 19.30 í félagsheimili T.R. að Faxafeni 12. Tefldar verða 7 umferðir eftir svissneska-kerfinu og er umhugsunartíminn 90 mínútur á alla skákina  auk 30 sekúndna viðbótartími á hvern leik. Núverandi Skákmeistari öðlinga er Björgvin Víglundsson.

Dagskrá:
1. umferð miðvikudag 21. mars kl. 19.30
2. umferð miðvikudag 28. mars kl. 19.30
3. umferð miðvikudag 4. apríl kl. 19.30
4. umferð miðvikudag 11. apríl kl. 19.30
5. umferð miðvikudag 18. apríl kl. 19.30
6. umferð miðvikudag 25. apríl kl. 19.30
7. umferð miðvikudag 2. maí kl. 19.30

Tvær yfirsetur (bye) eru leyfðar í umferðum 1-5 og fæst 1/2 vinningur fyrir hvora yfirsetu. Láta skal skákstjóra vita um yfirsetu fyrir lok umferðarinnar á undan.

Hraðskákmót öðlinga fer fram miðvikudaginn 9. maí kl. 19:30 og að því loknu fer þar fram verðlaunaafhending fyrir bæði mót. Keppt er um veglegan farandbikar, en auk hans eru verðlaun fyrir þrjú efstu sætin, bæði í aðalmótinu og hraðskákmótinu.

Tímamörk
90 mín + 30 sek viðbót eftir hvern leik

Verðlaun
1. sæti kr. 40.000
2. sæti kr. 20.000
3. sæti kr. 10.000

Verðlaunafé verður skipt eftir Hort-kerfi verði keppendur jafnir að vinningum. Lokaröð keppenda ræðst af mótsstigum (tiebreaks).

Röð mótsstiga (tiebreaks): 1. Buchholz (-1) 2. Buchholz 3. Innbyrðis viðureign 4. Sonneborn-Berger

Þátttökugjald (greiðist með reiðufé við upphaf móts)

kr. 5.000 – Innifalið er frítt kaffi allt mótið ásamt rjómavöfflum og öðru góðgæti á lokakvöldi

Skákstjórn: Þórir Benediktsson – s. 867 3109 – [e-mail]

Skráningarform

Skráðir keppendur

Hraðkvöld hjá Hugin í kvöld

Hraðkvöld Hugins verður mánudaginn 19. mars nk. og hefst taflið kl. 20:00. Tefldar verða 7-10 umferðir með umhugsunartímanum 4 mínútur + 3 sekúndur eða 5 mínútur + 3 sekúndur á hvern leik. Teflt er í félagsheimili Hugins í Álfabakka 14a í Mjóddinni.

Sigurvegarinn á hraðkvöldinu fær í verðlaun máltíð fyrir einn á Saffran eða pizzu frá Dominos Einnig verður dreginn út af handahófi annar keppandi sem einnig fær sama val. Þar eiga allir jafna möguleika, án tillits til árangurs á mótinu.

Þátttökugjöld eru kr. 300 fyrir félagsmenn (kr. 200 fyrir 15 ára og yngri) og kr. 500 fyrir aðra (kr. 300 fyrir 15 ára og yngri).

Páskaeggjamót Taflfélags Reykjavíkur haldið 25. mars

Páskaeggjamót Taflfélags Reykjavíkur verður haldið sunnudaginn 25.mars. Mótið er opið öllum grunnskólabörnum í 1.-7.bekk. Sex umferðir verða tefldar með 4 mínútna umhugsunartíma og bætast 2 sekúndur við tímann eftir hvern leik (4+2). Mótið verður tvískipt að þessu sinni og er dagskrá mótsins sem hér segir:

• 1.-3.bekkur kl.12:30 – 14:30.
• 4.-7.bekkur kl. 15:00 – 17:00.

Verðlaunapeningur og páskaegg verða veitt fyrir þrjú efstu sætin í hvorum flokki. Þá verður jafnframt páskaegg í verðlaun fyrir efstu stúlkuna í hvorum flokki sem og fyrir efsta sæti í hverjum árgangi (2005-2011). Að móti loknu í hvorum flokki verða tveir þátttakendur dregnir út í happdrætti og hljóta þeir að launum páskaegg. Mikilvægt er að hafa í huga að þátttakendur geta mest fengið eitt páskaegg hver í mótinu, þó er happdrættið undanskilið þeirri reglu.

Skráning fer fram í gegnum skráningarformið hér að neðan, en einnig má nálgast það í gula kassanum á skak.is.

Skráningarform

Skráðir keppendur

Meistaramót Ása á þriðjudaginn

Þriðjudaginn 20 mars halda Æsir í Ásgarði sitt meistaramót. Tefldar verða 10 umferðir með 10 mín. umhugsunar tíma.Taflið byrjar stundvíslega kl 13.00. Allir karlar velkomnir sem verða 60 ára á árinu og eldri.Einnig konur sem verða 50 ára  og eldri. Skákstaðurinn er Stangarhylur 4, félagsheimili eldri borgara í Reykjavík.              

Skákþáttur Morgunblaðsins: Jóhann lagði Eljanov og er í toppbaráttunni

Sigur Jóhanns Hjartarsonar á Úkraínumanninum Pavel Eljanov í 4. umferð Reykjavíkurskákmótsins er stærsta afrek okkar manna á mótinu til þessa og gefur vísbendingu um að Jóhann muni taka þátt í baráttunni um efstu sætin. Eftir umferðina var Tyrkinn Mustava Yilmaz einn efstur með fullt hús vinninga en Jóhann var í 2.-7. sæti með 3½ vinning.

Margir íslenskir skákmenn hafa staðið sig vel, t.d. hinn 15 ára Birkir Ísak Jóhannesson sem hefur hlotið þrjá vinninga. Með sömu vinningatölu eru Hannes Hlífar Stefánsson og Þröstur Þórhallsson.

Frídagur var í gær en hliðarviðburðir voru m.a. „Fischer-random mót“ og um kvöldið spurningakeppnin „pub-quiz“.

Áður en fjórða umferð hófst á fimmtudaginn var slegið upp stúlknaskákmóti í tengslum við ungversku skákkonuna Susan Polgar en Katrín Jakobsdóttir forsætisráðherra afhenti verðlaun í mótslok. Batel Goitom sigraði.

Skák Jóhanns og Eljanovs fylgir hér. Jóhann, sem var með svart, jafnaði taflið auðveldlega, náði síðan frumkvæðinu og knúði fram sigur með nokkrum hárbeittum leikjum:

Pavel Eljanov – Jóhann Hjartarson

Kóngsindversk vörn

1. d4 Rf6 2. c4 g6 3. Rc3 Bg7 4. e4 d6 5. Rf3 0-0 6. Be2 e5 7. 0-0 Rc6 8. d5 Re7 9. b4

„Byssustingur“ er þetta afbrigði kallað og var mikið í tísku í kringum síðustu aldamót. Í dag hafa slík afbrigði tapað gildi sínu, m.a. vegna reiknigetu „skákvélanna“.

9.... a5 10. Ba3 He8 11. bxa5 Hxa5 12. Bb4 Ha8 13. a4 c5!

Mikilvægur leikur. Hvítur getur hirt peðið á d6 með 14. dxc6 Rxc6 15. Bxd6 en eftir 15.... Rd4 hefur svartur nægar bætur.

14. Ba3 Ha6 15. Rd2 Hf8 16. Bb2 Re8 17. Rb5 f5 18. exf5?!

Það lifnar heilmikið yfir stöðu svarts eftir þessi uppskipti. Betra var 18. Ha3.

18.... gxf5!

Eins og hver einasti skólastrákur í Úkraínu veit drepa menn aftur með peði á f5 í kóngsindverskri vörn.

19. f4 Rg6 20. fxe5 Rxe5 21. Ha3 Bd7 22. Da1 De7 23. He1 Dh4

24. g3?

Hæpinn leikur því nú mun framrás f-peðsins aukast að afli.

24.... Dh6 25. Rf3 Rg4 26. Bxg7 Rxg7 27. Bf1 f4!

Auðvitað. Leikurinn var Eljanov sérstaklega erfiður því hann var að komast í mikið tímahrak.

28. gxf4?

Og hér var betra að leika 28. Dc1.

28.... Hxf4 29. He7 Rf6 30. Rc7 Hb6 31. He2

Eljanov er alveg búinn að missa tökin, m.a. vegna þess að það er enginn samgangur í liðsafla hvíts.

31.... Hxc4 32. Re6 Hc1 33. Da2 Hb4 34. Hg2 Hg4!

Hvítur er leppaður fram og til baka. Það er engin vörn í þessari stöðu.

35. Hb3 Rxe6 36. dxe6 Bxe6

– og Eljanov gafst upp.

 

Vanaviðbrögðin kosta

Indverskir skákmenn hafa sett mikinn svip á Reykjavíkurskákmótin undanfarin ár. Nihal Sarin, sem er 13 ára, og Rameshbabu Pragnandahaa, 12 ára, tefla annað árið í röð á mótinu. Stórhættulegir báðir tveir eins og dæmin sanna. En þeir eiga samt ýmislegt ólært, samanber þetta dæmi úr 3. umferð:

 

Pragnanandahaa – Cornette

Síðasti leikur svarts var 26.... Hd8-d1+ (betra var 26.... Bd1) Indverjinn var á „sjálfstýringunni“ og svaraði um hæl með 27. Hxd1 og eftir 27.... Bxd1 sættust þeir á skiptan hlut þremur leikjum síðar. Athugun á stöðunni leiddi í ljós að hvítur gat leikið 27. Bf1! og svartur er bjargarlaus þar sem 27.... Hxc1 er svarað með millileiknum 28. Dxb3+ og síðan fellur hrókurinn óbættur.

Helgi Ólafsson [e-mail]

Skákþættir Morgunblaðsins eftir Helga Ólafsson birtast u.þ.b. viku síðar á Skák.is.

Grein þessi birtist í Morgunblaðinu 10. mars 2018

Skákþættir Morgunblaðsins

Verðlaunahafar og ýmiss tölfræði frá GAMMA Reykjavíkurskákmótinu

"I was telling my friends, I hope the spirit of Fischer is with me. I think it was!"

Svo sagði Baskaran Adhiban að móti loknu í viðtal á skákstað. Þessi mynd tefkin af Alinu L´Ami var tekin í uppáhaldshorninu hans Fischers á Fornbókókasölunni Bókinni á Hverfisgötu.

Eins og fram hefur komið lauk GAMMA Reykjavíkurskákmótinu á miðvikudag en mótið fór fram í Hörpu sjötta til fjórtánda mars. Lokahófið fór fram í Ráðhúsi Reykjavíkur og afhenti Líf Magneudóttir forseti borgarstjórnar verðlaunin. 

Fyrr um daginn skrifuðu Gunnar Björnsson forseti Skáksambands Íslands og Dagur B. Eggertsson borgarstjóri undir þriggja ára samning um stuðning borgarinnar við Reykjavíkurskákmótið. Borgarstjóri lék svo fyrsta leik lokaumferðarinnar. 

Degi áður var tilkynnt að GAMMA yrði bakhjarl mótsins 2019-2021 og mótshaldið væri jafnframt tryggt í Hörpu þau ár. GAMMA hefur verið aðalstyrktaraðili mótsins síðan 2014 og að þessum samningi loknum hefur samstarf GAMMA og SÍ staðið í átta ár og mótið verður haldið i Hörpu í 10 ár!

Í upphafi Fischer-slembiskákarmótsins tilkynnti Zurab Azmaiparashvili að mjög líklega yrði GAMMA Reykjavíkurskákmótið áframhaldandi vettvangur fyrir Evrópumóti í slíkri skák. 

Framtíð Reykjavíkurskákmótsins í Hörpu hefur bersýnilega mjög styrkar stoðir á komandi árum!

Mótsstjóri hefur tekið saman smá samantekt mótið. Hún hefur því miður dregist nokkuð því beðið var eftir myndum frá verðlaunaafhendingunni sem enn hafa ekki borist eins og hafði verið lofað. Myndirnar af verðlaunahöfum verða birtar þegar þær berast! 

Efstu menn

Indverski stórmeistarinn Baskaran Adhiban kom sá og sigraði eins og áður hefur komið fra. Hann hlaut 7½ í 9 skákum og er vel að sigrinum kominn. Stórmeistararnir, Maxime Lagarde, Frakklandi, og Mustafa Yilmaz, Tyrklandi urðu í 2.-3. sæti með 7 vinninga. 17 skákmenn hlutu 6½ vinning og í þeim hópi var Hannes Hlífar Stefánsson sem var efstur Íslendinga. Skákmennirnir sem enduðu í 4.-10. sæti eftir stigaútreikning skipta á milli sér verðlaunasjóðnum fyrir þau sæti. 

Nr.		Nafn	Stig	Land	Vinn.
1	GM	B., Adhiban	2650	IND	7½
2	GM	Maxime, Lagarde	2587	FRA	7
3	GM	Mustafa, Yilmaz	2619	TUR	7
4	GM	Eugene, Perelshteyn	2513	USA	6½
5	GM	Erwin, l'Ami	2634	NED	6½
6	GM	Pavel, Eljanov	2713	UKR	6½
7	GM	Richard, Rapport	2715	HUN	6½
8	GM	Suri, Vaibhav	2544	IND	6½
9	GM	Alejandro, Ramirez	2568	USA	6½
10	IM	R, Praggnanandhaa	2507	IND	6½
11	GM	Elshan, Moradiabadi	2535	USA	6½
	IM	Deimante, Cornette	2447	LTU	6½
13	IM	Johan-Sebastian, Christiansen	2486	NOR	6½
14	GM	Matthieu, Cornette	2620	FRA	6½
15	GM	Emre, Can	2603	TUR	6½
16	GM	Konstantin, Landa	2613	RUS	6½
17	IM	Nodirbek, Abdusattorov	2518	UZB	6½
18	GM	Gata, Kamsky	2677	USA	6½
19	GM	Hannes, Stefansson	2533	ISL	6½
20	GM	Kidambi, Sundararajan	2427	IND	6½

Kvennaverðlaun

Litháíska skákkonan Deimante Cornette vann sigur í kvennaflokki. Frammistaða hennar var frábær því hún náði sér í sinn fyrsta áfanga að stórmeistaratitli. Lenka Ptácníková hlaut bronsið. 

 

Nr.		Nafn	Stig	Vinn.
1	IM	Deimante, Cornette	2447	6½
2	WGM	Tatev, Abrahamyan	2369	6
3	WGM	Lenka, Ptacnikova	2200	5½

 

Bestu ungmenni (u16)

Skáksamband Íslands hefur lagt áherslu á að bjóða efnilegustu skákmönnum heims á mótið ár hvert. Í ár tókst það framúrskarandi því að öllum líkindum skipa þessi sæti þrír efnilegustu skákmenn heims! Pragga. Allir verða þeir án efa orðnir stórmeistarar næst þegar þeir mæta á Reykjavíkurskákmótið!

 

Nr.		Nafn	Stig	Vinn.
1	IM	R Praggnanandhaa	2507	6½
2	IM	Nodirbek Abdusattorov	2518	6½
3	IM	Nihal Sarin	2534	6

Verðlaun 2201-2400

Sex skákmenn hlutu sex vinninga og þrír þeirra hlutu verðlaun. Sigurvegarinn varð Bandaríkjamaðurinn grænhærði, Konstantin Kavutskiy. Björn Þorfinnsson hlaut bronsið.

Nr.		Nafn	Stig	Vinn.
1	IM	Konstantin Kavutskiy	2383	6
2	IM	Shiyam Thavandiran	2399	6
3	IM	Bjorn Thorfinnsson	2399	6

Verðlaun 2001-2200

Þrír skákmenn hlutu 5½ og hlaut hún Lenka okkar gullið! Krækti sér í tvenn verðlaun.  

Nr.		Nafn	Stig	Vinn.
1	WGM	Lenka Ptacnikova	2200	5½
2	FM	Dirk Maxion	2187	5½
3		Rhys Cumming	2155	5½

Verðlaun 0-2000

Jon Olav Fivelstad vann þau verðlaun. Þótt hann sé merktur norskur hefur hann verið búsettur á Íslandi um áratugaskeið.

 

Nr.		Nafn	Stig	Vinn.
1		Jon Olav Fivelstad	1916	5½
2		Juan Luis Velez Romero	1981	5½
3		Margar M. Berg	1811	5

Besti árangur í samanburði við eigin skákstig

Þar röðuðu tveir Íslendingar sér í verðlaunasæti. Annars vegar Tómas Möller og hins vegar Baltasar Máni Wedholm Gunnarsson. Agnar Tómas Möller frá GAMMA tók við verðlaununum fyrir hönd sonar síns Tómasar.

1. Pietor Mancini (+320)
2. Tómas Möller (+275)
3. Baltasar Máni (+266)

Efstu Íslendingarnir

Hannes Hlífar Stefánsson var eini Íslendingurinn sem náði að blanda sér í toppbaráttuna að ráði að þessu sinni og hlaut 6½ vinning.

Jóhann Hjartarson og Björn Þorfinnsson komu næstir með 6 vinninga.

Lenka Ptácníková, Þröstur Þórhallsson, Dagur Ragnarsson, Guðmundur Kjartansson og Þorsteinn Þorsteinsson hlutu 5½ vinning. 

Mesti stigagróði.

Tæp 700 skákstig (nettó) runnu inn í íslenskt skákstigahagkerfi að þessu sinni sem segir margt um mikilvægti mótisns - ekki síst fyrir ungu kynslóðina!

Eftirtaldir hækka um 50 stig eða meira:

 

No.	Nafn	Stig+/-
1	Signyjarson Arnar Smari	90
2	Haile Batel Goitom	88
3	Gunnarsson Baltasar Mani Wedhol	84
4	Johannsson Birkir Isak	74
5	Briem Benedikt	73
6	Karlsson Isak Orri	72
7	Stefansson Benedikt	66
8	Birkisson Bjorn Holm	66
9	Thorisson Benedikt	65
10	Moller Tomas	64
11	Hjaltason Magnus	57
12	Heidarsson Arnar	52
13	Davidsson Oskar Vikingur	51

Tölfræðin

Alls tóku 248 skákmenn frá 34 löndum þátt. 93 Íslendingar og 155 erlendir keppendur. Fjölmennastir gestanna voru Bandaríkjamenn (23) næstir voru Englendingar (16), Þjóðverjar (14), Hollendingar (12) og Indverjar (11). Keppendur komu alla leiðina frá Ástralíu, Brasilíu og Argentínu og voru á aldursbilinu 9 ára til 85 ára! Yngstur var Bjartur Þórisson og elstur var Páll G. Jónsson og sló þar með eigið met!

Þakkir

33. Reykjavíkurskákmótið tókst framúrskarandi vel. Skáksambandið vill þakka öllu starfsfólkinu fyrir frábært starf. Eftir að hafa sótt mörg erlend skákmót þá get ég fullyrt að jafn gott starfsfólk og á GAMMA Reykjavíkurskákmótinu er vandfundið.

Sérviðburðnir tókust flestir afar vel og verður gert betri skil síðar. Heimsókn Susan Polgar tókst afar vel. 

Starfsfólk Hörpu fór miklar þakkir en hjálpsemin og viðmótið gagnvart okkur er einstakt. 

Sérstakar þakkir fá GAMMA og Reykjavíkurborg fyrir ómetanlegan stuðning við mótshaldið. Án hans væri mótið ekki jafn val úr gerði gert og og raun ber.

Að lokum fá allir keppendur miklar þakkir fyrir allar þær frábæru skákir sem tefldar voru á mótinu.

GAMMA Reykjavíkurskákmótið 2019 verður haldið 7.-17. apríl í Hörpu. 

Myndirnar frá verðlaunaafhendingunni vonandi væntanlegar! 

 

Gunnar Björnsson,
Mótsstjóri GAMMA Reykjavíkurskákmótsins 2018