Skákþáttur Morgunblaðsins: Stefáns Kristjánssonar verður sárt saknað

Fráfall Stefáns Kristjánssonar stórmeistara hinn 28. febrúar sl. er eitt mesta áfall sem skáklífið í landinu hefur orðið fyrir. Aðeins 35 ára gamall er genginn einn mesti hæfileikamaður sem fram hefur komið og voru hæfileikar hans ekki einskorðaðir við skákina. Svalari keppnismann undir pressu var ekki hægt að finna. Leiftrandi greind, gamansemi, góðvild og smá skammtur af því sem kalla mátti „afstöðuvanda“ gerðu hvern fund við þennan hressa félaga skemmtilegan. Rakið hefur verið hvernig hann komst í ólympíulið Íslands 17 ára gamall, varð alþjóðlegur meistari fljótlega upp úr því, raðaði inn stórmeistaraáföngum en virtist verða afhuga frekari skákafrekum undir lok síðasta áratugar. Um það er þó erfitt að fullyrða nokkuð; alvarlegt slys móður hans setti á manninn mark en það var ekki hans stíll að kvarta.

Ég fór í fjölmargar ferðir með honum á árunum 1998-2006 í ýmsum hlutverkum. Minnisstæð er t.d. ferð á EM unglingalandsliða 18 ára og yngri við Balatonvatn í Ungverjalandi með frábærum hópi ungmenna í flokki pilta og stúlkna. Þá eins og oft síðar kom yfir mig þessi tilfinning hversu gott það væri hafa slíkan liðsmann sem væri einhvern veginn með „allan pakkann“.

Við vorum nýkomnir frá ólympíumótinu í Bled 2002 og nokkrar vikur í HM 20 ára og yngri og sett upp æfingaáætlun. Dagur eitt: Í gamansömum tón kveðst Stefán vilja fá strax allan sannleikann um helstu byrjanir og engar refjar. Ég svara því til að ég sé því miður búinn að týna sannleikanum en við munum leita hans næstu daga. Ekki veit ég hvor lærði meira en það var gaman að fylgjast með Stefáni úr fjarlægð þegar hann var kominn á HM til perlu Indlands og Austurlanda fjær, Goa. Og nú röskum 15 árum síðar er ég að „gramsa“ á netinu og rekst á gamla frétt frá mótinu af erlendri vefsíðu og segir þar að austurblokkin sé mætt með sín bestu ungmenni, einnig ný stórveldi skákarinnar, Indverjar, Kínverjar og Víetnamar. Þetta er um miðbik og Armeninn Levon Aronjan og síðar sigurvegari er efstur með 5½ vinning að loknum sjö umferðum af 13. Stefán Kristjánsson er ½ vinningi á eftir. Hann varð síðan í hópi efstu manna.

Mér fannst gaman að lesa minningarorð þegar sagði frá því er Viktor Kortsnoj stóð yfir Stefáni og fylgdist með honum tefla og kvaðst síðar aldrei hafa getað getið sér til um leiki hans en hrósaði taflmennskunni. Helstu afrek Stefáns verða ekki rakin hér en í bestu skákum hans komu reiknihæfileikar hans vel í ljós eins og í eftirfarandi dæmi þegar langbesti skákmaður Pólverja nú um stundir tapar án þess að fá rönd við reist:

EM landsliða, Krít 2007:

Stefán Kristjánsson – Radoslaw Wojtaszek

Hollensk vörn

1. d4 f5 2. Rc3 Rf6 3. Bg5

Alltaf fundvís á óhefðbundnar leiðir.

3.... d5 4. Bxf6 exf6 5. e3 Be6 6. Df3 Dd7 7. Bb5 Rc6 8. Rge2 a6 9. Ba4 0-0-0 10. Rf4 Bf7 11. Rd3 g6 12. a3 Dd6 13. b4 Rb8 14. 0-0 h5 15. Bb3 h4 16. h3 Bh6 17. Hfc1 c6 18. Ra4 g5 19. c4!

Ef nú 19.... dxc4 þá kemur 20. Dxf5+! Be6 21. Rb6+ Kc7 22. Da5! með hótuninni 23. Rc4+.

19.... g4 20. Dxf5 Be6 21. Rb6 Kc7 

22. Rxd5+! Kc8

22.... Dxd5 er svarað með 23. Dxd5! og vinnur.

23. Rb6+ Kc7 24. Da5! Bxe3 25. c5 Dg3 26. Rd5+!

– og svartur gafst upp, mátið blasir við á c7 eða e7.

Helgi Ólafsson [e-mail]

Skákþættir Morgunblaðsins eftir Helga Ólafsson birtast u.þ.b. viku síðar á Skák.is.

Grein þessi birtist í Morgunblaðinu 17. mars 2018

Skákþættir Morgunblaðsins

Öðlingamótið hafið

Tæplega 40 keppendur eru skráðir í Skákmót öðlinga sem hófst miðvikudagskvöldið í húsnæði Taflfélags Reykjavíkur en sú þátttaka er með betra móti hin síðari ár. Stigahæstur keppenda er Kristján Guðmundsson (2289) sem er margreyndur þrátt fyrir langa fjarveru frá skákborðinu. Skammt undan er Fide-meistarinn Sigurbjörn Björnsson (2278) sem hafnaði á dögunum í 3.-4. sæti á Skákþingi Reykjavíkur. Þá er stórmeistari kvenna, Lenka Ptacnikova (2200), einnig á meðal keppenda en hún nældi sér í aukaverðlaun á Alþjóðlega Reykjavíkurskákmótinu sem lauk fyrr í mánuðinum. Búast má við því að þau verði öll í toppbaráttu Öðlingamótsins þó leiðin verði ekki greið því keppendalistinn er vígalegur að sjá.

Strax í fyrstu umferðinni voru framreiddar margar jafnar og spennandi viðureignir en á fyrsta borði atti Kristján kappi við hinn eitilharða Halldór Viðar Garðarsson (1793) sem gaman er að sjá hversu öflugur er við taflmennskuna en þess má geta að hann verður áttræður á næsta ári. Halldór átti í fullu tré við Kristján með svörtu mönnunum og þegar jafntefli var samið eftir spennuþrungna baráttu prísaði Kristján sig sælan og hafði á orði að hann hefði verið stálheppinn verandi með tapaða stöðu á tímabili.

Á öðru borði lagði Sigurbjörn Magnús Kristinsson (1770) þar sem Magnús réði ekki við frípeð Sigurbjörns sem var með drottningu gegn tveimur hrókum Magnúsar. Á þriðja borði hafði Lenka svo öruggan sigur gegn hinum sókndjarfa Friðgeiri Hólm (1746). Óvæntustu úrslit kvöldsins verða að teljast sigur Óskars Long Einarssonar (1729) á Björgvini Víglundssyni (2147) og þá gerðu Sverrir Örn Björnsson (2135) og Björgvin Jónas Hauksson (1704) jafntefli í maraþonskák. Páll Þórsson (1693) vann baráttusigur á Halldóri Pálssyni (2056) þar sem sá síðarnefndi hafði lengi vel innan við mínútu á klukkunni.

Alls verða tefldar sjö umferðir og fer önnur umferð fram næstkomandi miðvikudagskvöld. Taflmennskan hefst á slaginu 19.30 og þá mætast m.a. Sigurbjörn og Haraldur Baldursson (1949), Jóhann H. Ragnarsson (1985) og Lenka, sem og Þór Valtýsson (1922) og Þorvarður F. Ólafsson (2176). Eins og ávallt eru áhorfendur velkomnir og alltaf er heitt á könnunni!

Öll úrslit ásamt stöðu eru birt á Chess-Results og þangað fara aukinheldur skákir mótsins jafnóðum og þær berast.

Nánar á heimasíðu TR.

Tímaritið Skák kemur út í haust

Vegna seinkunar aðsendra greina og anna hefur verið ákveðið að tímaritið Skák komi út kringum Íslandsmót skákfélaga næstkomandi haust en ekki nú með vorinu eins og áður hafði verið ráðgert. Ætlunin er að blaðið verði veglegra fyrir vikið og þar verði fjallað um alla helstu atburði skáklífs Íslendinga undanfarið ár og jafnvel lengra aftur í tímann.

Páskaeggjamót Hugins fer fram á mánudaginn

Páskaeggjamót Hugins verður haldið í 26. sinn mánudaginn 26. mars 2018, og hefst taflið kl. 17, þ.e. nokkru fyrr heldur en venjulegar mánudagsæfingar. Páskaeggjamótið kemur í stað mánudagsæfingar. Tefldar verða 7 umferðir með umhugsunartímanum 4 mínútur + 3 sekúndur á hvern leik. Mótið er opið öllum krökkum á grunnskólaaldri. Skráningarform verður sett upp á skak.is og eru væntanlegir þátttakendur beðnir um að skrá sig til að auðvelda undirbúning mótsins. Mótið verður reiknð til alþjóðlegra hraðskákstiga.

Allir þátttakendur keppa í einum flokki en verðlaun verða veitt í tveimur aðskildum flokkum. Páskaegg verða í verðlaun fyrir þrjú efstu sætin, bæði í eldri flokki (fæddir 2002 – 2004) og yngri flokki (fæddir 2005 og síðar). Sá sem er efstur í hverjum árgangi fær einnig páskaegg sem og efstu þrjár stúlkurnar á mótinu. Að auki verða tvö páskaegg dregin út. Enginn fær þó fleiri en eitt páskaegg. Lítið páskaegg verður svo fyrir þá sem ekki vinna til verðlauna.

Páskaeggjamótið verður haldið í félagsheimili Hugins í Álfabakka 14a í Mjóddinni. Inngangur er milli Subway og Lyfjaval í Mjódd en salur félagsins er á þriðju hæð hússins.

Skákþáttur Morgunblaðsins: Adhiban Baskaran sigraði á 33. Reykjavíkurskákmótinu

Fyrir síðustu umferð 33. Reykjavíkurmótsins hafði indverski stórmeistarinn Adhiban Baskaran ½ vinnings forskot á Tyrkjann Mustafa Yilmaz og vinnings forskot á þá sem næstir komu þar á eftir. Hann tefldi við Yilmaz og þurfti aðeins jafntefli til að tryggja sigur sinn í mótinu og það hafðist eftir 30 leikja baráttu og hlaut hann 7 ½ vinning af níu mögulegum. Lengi vel var útlit fyrir að Hannes Hlífar Stefánsson næði 2. sæti því að hann stóð til vinnings um tíma gegn Richard Rapport en missti þráðinn og lauk skákinni með jafntefli eftir 108 leiki.

Efstu menn: 1. Adhiban Baskaran 7 ½ v. (af 9) 2.-3. Maxime Lagarde Frakkland ) og Mustafa Yilmaz (Tyrkland) 7 v.

17 skákmenn fengu 6 ½ vinning þ. á m. Hannes Hlífar Stefánsson. Hinn 13 ára gamli Indverji Nihal Sarin tapaði að vísu í lokaumferðinni en var þá búinn að tryggja sér annan áfanga sinn að stórmeistaratitli og er það mál manna að ekki þurfi að bíða lengi eftir lokaáfanganum. Indverjar hafa undanfarin ár sett mikinn svip á Reykjavíkurskákmótin.

Jóhann Hjartarson og Björn Þorfinnsson komu næstir íslenskra keppenda á eftir Hannesi, hlutu 6 vinninga af níu.

Indverjinn Adhiban Baskaran er sjöundi stigahæsti skákmaður Indverja um þessar mundir en í fyrra vakti hann mikla athygli er hann varð í 3.-7. sæti í Wijk aan Zee í fyrra á eftir Wesley So og Magnusi Carlsen og sigraði þar m.a. Sergei Karjakin. Lykilsigur sinn vann hann gegn stigahæsta keppandanum: 8. umferð:

Adhiban Baskaran – Richard Rapport

Slavnesk vörn

1. d4 d5 2. c4 c6 3. Rf3 Rf6 4. Rc3 dxc4 5. e4 b5 6. Be2!?

Peðsfórnin er þekkt en í eina tíð léku menn nær alltaf að hætti Kasparovs, 6. e5 Rd5 7. a4 o.s.frv.

6. ... e6 7. O-O Be7 8. a4 b4 9. e5 bxc3 10. exf6 Bxf6 11. bxc3 Ba6 12. Re5!

Snjall riddaraleikur sem svartur hefði átt að svara með 12. .... Rd7, t.d. 13. Rxc6 Dc7 með flóknu miðtafli. Uppskiptin sem nú fara í hönd veikja mjög svörtu reitina í stöðu Rapports.

12. ... Bxe5? 13. dxe5 Dxd1 14. Hxd1 Rd7 15. f4 Rb6 16. Hd6 O-O 17. Bf3 Rc8?

Bæði hér og áður varð svartur að verjast með því leika riddaranum til d5.

18. Hxc6 Bb7

19. Hxc8!

Einföld leikflétta. Barátta hróka svarts gegn biskupaparinu í opinni stöðu er vonlaus.

19. ... Haxc8

20. Bxb7 Hb8 21. Ba6 Hb3 22. Ba3 Hd8 23. Bb4 Hd2 24. Bxc4 Hbb2 25. Bf1 h5 26. a5 a6 27. Bc5 g6

– og svartur gafst upp um leið.

 

Horft til elo-stiganna

Þó að vinningarnir tali sínu máli í þessu móti sem taldi 248 keppendur á gríðarlegu styrkleikabili þá miða margir af yngri kynslóðinni meira við elo-stigaávinning heldur en vinningatölu. Þessir hækkuðu um meira en 50 elo-stig fyrir frammistöðu sína: Arnar Smári Signýjarson 90, Batel Haile Goitom 88, Baltasar Máni Wedholm 84, Birkir Ísak Jóhannsson 74, Benedikt Briem 73, Ísak Orri Karlsson 72, Björn Hólm Birkisson 66, Benedikt Þórisson 65, Tómas Möller 64, Magnús Hjaltason 57, Óskar Víkingur Davíðsson 51, Arnar Heiðarsson 51. 

Nýr samningur

Aðalstyrktaraðili 33. Reykjavíkurskákmótsins var fjárfestingafyrirtækið GAMMA. Gunnar Björnsson, forseti SÍ, og Agnar Tómas Möller, einn stofnenda GAMMA, skrifuðu á þriðjudaginn undir samning um áframhaldandi kostun Reykjavíkurskákmótsins næstu þrjú árin.

Helgi Ólafsson [e-mail]

Skákþættir Morgunblaðsins eftir Helga Ólafsson birtast u.þ.b. viku síðar á Skák.is.

Grein þessi birtist í Morgunblaðinu 15. mars 2018

Skákþættir Morgunblaðsins

Hraðskákmótaröð TR – Mót 3 fer fram 23. mars

Þriðja mót Hraðskákmótaraðar Taflfélags Reykjavíkur fer fram föstudagskvöldið 23.mars í skáksal TR að Faxafeni 12. Taflið hefst stundvíslega klukkan 19:30. Mótið er opið öllum skákmönnum með yfir 2000 skákstig, eða þeim sem hafa einhverntíman á ferlinum rofið 2000 stiga múrinn. Mótsnefnd áskilur sér rétt til þess að bjóða völdum gestum undir 2000 stigum að tefla með.

Tefldar verða 11 umferðir með tímamörkunum 3+2 og verður mótið reiknað til alþjóðlegra hraðskákstiga. Frítt inn!

Dagskrá mótaraðarinnar:

• Mót 1: 26.janúar
• Mót 2: 23.febrúar
• Mót 3: 23.mars
• Mót 4: 27.apríl

Mælst er til þess að skákmenn skrái sig í gegnum skráningarformið til þess að auðvelda skipulagningu mótsins. Einnig verður hægt að skrá sig til leiks á skákstað á mótsdegi en skráningu lýkur kl.19:20.

SKRÁNINGARFORM

SKRÁÐIR KEPPENDUR

Páskaeggjamót Taflfélags Reykjavíkur haldið á sunnudaginn

Páskaeggjamót Taflfélags Reykjavíkur verður haldið sunnudaginn 25.mars. Mótið er opið öllum grunnskólabörnum í 1.-7.bekk. Sex umferðir verða tefldar með 4 mínútna umhugsunartíma og bætast 2 sekúndur við tímann eftir hvern leik (4+2). Mótið verður tvískipt að þessu sinni og er dagskrá mótsins sem hér segir:

• 1.-3.bekkur kl.12:30 – 14:30.
• 4.-7.bekkur kl. 15:00 – 17:00.

Verðlaunapeningur og páskaegg verða veitt fyrir þrjú efstu sætin í hvorum flokki. Þá verður jafnframt páskaegg í verðlaun fyrir efstu stúlkuna í hvorum flokki sem og fyrir efsta sæti í hverjum árgangi (2005-2011). Að móti loknu í hvorum flokki verða tveir þátttakendur dregnir út í happdrætti og hljóta þeir að launum páskaegg. Mikilvægt er að hafa í huga að þátttakendur geta mest fengið eitt páskaegg hver í mótinu, þó er happdrættið undanskilið þeirri reglu.

Skráning fer fram í gegnum skráningarformið hér að neðan, en einnig má nálgast það í gula kassanum á skak.is.

Skráningarform

Skráðir keppendur

Icelandic Open - Íslandsmótið í skák fer fram 1.-9. júní

Icelandic Open - Íslandsmótið í skák fer fram dagana 1.-9. júní nk. Teflt verður Valsheimilinu við Hlíðarenda við frábærar aðstæður í veislusal hússins. Mótið fer eftir sama fyrirkomulagi og mótið 2013 í Turninum árið sem var 100 ára afmælismót Skákþings Íslands. Þá sigraði Hannes Hlífar Stefánsson eftir að hafa lagt Björn Þorfinnsson að velli í úrslitaeinvígi. Björn krækti sér hins vegar í stórmeistaraáfanga á mótinu. Teflt verður til minningar um Hemma Gunn - en hann einmitt lést á mótið fór fram í Turninum 2013. 

Mótið er opið öllum íslenskum sem og erlendum skákmönnum. Tefldar verða 10 umferðir og má finna umferðartöflu mótsins hér. Hægt er að taka tvær hálfs vinnings yfirsetur í umferðum 1-7. 

Þátttökugjöld eru 10.000 kr. Stórmeistarar og alþjóðlegir meistarar fá frítt. FIDE-meistarar og unglingar 16 ára og yngri fá 50% afslátt. 

Góð verðlaun eru á mótinu eða samtals €7.500 eða um 950.000 kr. 

Allar nánari upplýsingar má nálgast á heimasíða mótsins sem eins og er aðeins á ensku. Hægt er að skrá sig Skák.is (guli kassinn). Skákmenn eru hvattir til að skrá sig til leiks sem fyrst. 

Öðlingamót TR hefst í kvöld

Skákmót öðlinga 40 ára og eldri hefst miðvikudaginn 21. mars kl. 19.30 í félagsheimili T.R. að Faxafeni 12. Tefldar verða 7 umferðir eftir svissneska-kerfinu og er umhugsunartíminn 90 mínútur á alla skákina  auk 30 sekúndna viðbótartími á hvern leik. Núverandi Skákmeistari öðlinga er Björgvin Víglundsson.

Dagskrá:
1. umferð miðvikudag 21. mars kl. 19.30
2. umferð miðvikudag 28. mars kl. 19.30
3. umferð miðvikudag 4. apríl kl. 19.30
4. umferð miðvikudag 11. apríl kl. 19.30
5. umferð miðvikudag 18. apríl kl. 19.30
6. umferð miðvikudag 25. apríl kl. 19.30
7. umferð miðvikudag 2. maí kl. 19.30

Tvær yfirsetur (bye) eru leyfðar í umferðum 1-5 og fæst 1/2 vinningur fyrir hvora yfirsetu. Láta skal skákstjóra vita um yfirsetu fyrir lok umferðarinnar á undan.

Hraðskákmót öðlinga fer fram miðvikudaginn 9. maí kl. 19:30 og að því loknu fer þar fram verðlaunaafhending fyrir bæði mót. Keppt er um veglegan farandbikar, en auk hans eru verðlaun fyrir þrjú efstu sætin, bæði í aðalmótinu og hraðskákmótinu.

Tímamörk
90 mín + 30 sek viðbót eftir hvern leik

Verðlaun
1. sæti kr. 40.000
2. sæti kr. 20.000
3. sæti kr. 10.000

Verðlaunafé verður skipt eftir Hort-kerfi verði keppendur jafnir að vinningum. Lokaröð keppenda ræðst af mótsstigum (tiebreaks).

Röð mótsstiga (tiebreaks): 1. Buchholz (-1) 2. Buchholz 3. Innbyrðis viðureign 4. Sonneborn-Berger

Þátttökugjald (greiðist með reiðufé við upphaf móts)

kr. 5.000 – Innifalið er frítt kaffi allt mótið ásamt rjómavöfflum og öðru góðgæti á lokakvöldi

Skákstjórn: Þórir Benediktsson – s. 867 3109 – [e-mail]

Skráningarform

Skráðir keppendur

Grischuk blandar sér í baráttuna eftir sigur á Kramnik

Rússinn Alexander Grischuk (2767) blandaði sér í toppbaráttuna á áskorendamótinu í skák með góðan sigur á Vladimir Kramnik (2800) í maraþonskák í gær. Heimsmeistarinn fyrrverandi, sem hefur ekki náð sér á strik, hefur tapað þremur skákum á mótinu. Öðrum skákum lauk með jafntefli. Fabiano Caruana (2784) er efstur með 5,5 vinning, Shakhriyar Mamedyarov (2808) er annar með 5 vinninga og Grischuk er þriðji með 4,5 vinninga. Líklegast er að baráttan um að tefla heimsmeistaraeinvígi við Carlsen standi á milli þessara þriggja.

Níunda umferð hefst kl. 14 í dag. Þá teflir Caruana við Ding Liren (2769), Mamedyarov mætir Aronian (2794), sem hefur verið heillum hofirinn, og Grischuk við Wesley So (2799).

Áttunda umferð hefst kl. 14 í dag. 

Sjá nánar á Chess.com. 

Myndir: Peter Doggers (Chess.com)

 

• Heimasíða mótsins
• Beinar útsendingar (Chess24)
• Beinar útsendingar (Chessbrah)