Jón Kristinn bikarmeistari SA - Páskahraðskákmót SA í dag

Að venju var bikarmót SA haldið um páskana. Mótið hófst á skírdag og lauk á föstudaginn langa. Átta skákjöfrar tefldu um bikarinn að þessu sinni, en mótið er útsláttarkeppni með þeim hætti að þátttakendur falla út eftir þrjú töp (jafntefli = 1/2 tap). Umhugsunartími er 15 mín á skákina. 

Þegar fyrri degi lauk voru þeir Heiðar Ólafsson, Benedikt Stefánsson, Haraldur Haraldsson og Sigurður Einarsson slegnir út, en fimm umferðir voru tefldar þann dag. Á langa deginum áttust við þeir sem eftir sátu og drógust saman þannig að Símon tefldi þrjár skákir við Áskel og Jón Kristinn þrjár við Sigurð Arnarson málningarmeistara. Drátturinn vildi hafa þetta svona og aðrir kostir voru ekki í boði. Ungu mennirnir náðu að knésetja þá eldri (2-1 í báðum tilvikum) og sátu því einir að lokaviðureigninni, þar sem Jón Kristinn hafði betur og hampar því þessum eftirsótta titli.

Næst verður PÁSKAHRAÐSKÁKMÓTIРá dagskrá á mánudag, annan páskadag og hefst kl. 13.00.

TR og Huginn vilja sameinast!

Þau tíðindi hafa orðið í íslenskum skákheimi að stjórnir Taflfélags Reykjavíkur og Skákfélagsins Hugins hafa afráðið að leggja til við félagsfundi hvors félags um sig að þessi tvö fjölmennustu skákfélög landsins renni saman í eitt. Þetta var endanleg niðurstaða stjórna beggja félaganna eftir fundarhöld undanfarna daga. Verði samruninn samþykktur, er lagt til að hið sameinaða félag hljóti nafnið TR Huginn og mun það þá senda sveitir undir því nafni á Íslandsmót skákfélaga leiktíðina 2018-2019. Miðað við fjölda sveita félaganna á nýafstöðnu Íslandsmóti má ætla að hið nýja félag sendi að minnsta kosti 12-13 sveitir á Íslandsmótið sem væri nýtt þátttökumet.

Fyrstu hugmyndir um sameiningu félaganna tveggja komu fram í kringum Íslandsmót skákfélaga um síðustu mánaðamót. Gagnkvæmur áhugi kom upp úr dúrnum og eftir óformlegar þreifingar skipuðu stjórnir félaganna átta manna undirbúningsnefnd undir forystu formannanna Kjartans Maack og Pálma R. Péturssonar til að láta reyna á sameininguna af alvöru.

Kjartan Maack, formaður TR: „Ég geri mér fulla grein fyrir því að þessi samþykkt stjórnar TR mun koma ýmsum félagsmönnum á óvart og það eru alls ekki allir sáttir, sérstaklega sumir eldri félaganna. En staðreyndin er bara sú að það verður æ erfiðara með hverju árinu að halda úti öflugu félagsstarfi sem kostar bæði tíma og peninga. Þróunin bæði hjá okkur og Hugin, rétt eins og hjá félagasamtökum almennt, hefur verið sú að æ færri hendur bera uppi starfið. Menn lýjast og það bitnar á starfinu.

Það er heldur ekkert launungarmál að Víkingaklúbburinn býr að óþrjótandi fjárstreymi sem ekki sér fyrir endann á. Þannig hafa þeir hrifsað til sín nokkra af sterkustu skákmönnum þjóðarinnar, þar á meðal úr okkar röðum, auk öflugra erlendra málaliða. Það er von stjórnarmanna beggja félaga að með sameiningunni getum við veitt Víkingaklúbbnum verðuga keppni.“

Pálmi R. Pétursson, formaður Hugins: „Það var sameiginleg ákvörðun okkar Kjartans að fara okkur að engu óðslega í þessu vandmeðfarna máli sem ég veit að kemur mörgum í opna skjöldu. Við hjá Hugin höfum vissulega gengið í gegnum sambærilegt ferli áður með sameiningu Goðans-Máta og Hellis, svo að úr varð Huginn. Þó að sú sameining heppnaðist vel, í heildina tekið, reyndist hún bæði flókin og vandasöm. Í ljósi þess hve vel við höfum undirbúið  alla vinnu nú, leyfi ég mér að vera  bjartsýnn á framtíð þessa langstærsta skákfélags landsins, ef samþykki félagsmanna fæst. Ég sé fyrir mér heilmikil samlegðaráhrif, bæði varðandi nýtingu mannafla, fjármuna og húsnæðis, og ekki síst möguleika á að sameina mótahald með glæsibrag. Þar nægir að nefna sameiningu Skákhátíðar MótX og Skákþings Reykjavíkur í eina allsherjar Skákhátíð sem stæði yfir allan janúarmánuð.

Vert er að geta þess að félagar okkar í Hugin norður setja nokkurn fyrirvara við sameininguna, telja að valdahlutföllin milli SV og NA kunni að raskast meira en góðu hófi gegnir. Við þá vil ég segja að jafnræðis verður gætt og sérstakar mótvægisaðgerðir verða settar í stofnsamning hins nýja félags. Ekki er óhugsandi að hið nýja félag muni leita hófanna vestur yfir Vaðlaheiði eða öllu heldur í gegnum hana þegar göngin verða loks tekin í notkun“ sagði Pálmi að lokum kankvís.

Boðað verður til félagsfunda hjá TR og Hugin strax eftir helgi, þannig að síðar í þessum mánuði fæst úr því skorið hvort af sameiningu félaganna verður. 

Carlsen og Caruana gerðu jafntefli - heimsmeistarinn nærri því að leggja áskorendann

Heimsmeistarinn Magnus Carlsen (2843) var afar nærri því að leggja áskorendann, Fabiano Caruana (2784) að velli í hróksendaendatafli. Magnús átti vinningsleik í 54. leik sem honum yfirsást. Öðrum skákum lauk með jafntefli nema að Nikita Vitiugov (2735) vann Matthias Bluebaum (2631) með glæsilegri fléttu.

Frásögn af gangi mála má finna á Chess.com.

Vignir Vatnar Stefánsson (2300) gerði tvö jafntefli í gær í a-flokki og hefur 2 vinninga eftir 5 umferðir.

Í b-flokki hefur stefán Már Pétursson (1698) 2,5 vinning en Guðmundur G. Guðmundsson (1591) 2 vinninga. 

Taflmennskan heldur áfram í dag og hefst kl. 13. Heimsmeistarinn teflir við Hou Yifan (2654), Caruana við Bluebaum. MVL (2789) og Anand (2776) mætast einnig.

 

• Heimasíða GRENKE Chess Classic
• Beinar útsendingar (hefjast kl. 13)
• GRENKE Chess Open

 

Skákþing Norðlendinga haldið 27.-29. apríl á Húsavík

Skákþing Norðlendinga 2018 verður haldið 27. – 29. apríl á Húsavík. Telfdar verða sjö umferðir. Fyrstu fjórar umferðirnar verða atskákir (25 mín) en lokaumferðirnar þrjár verða kappskákir (90 mín + 30 sek fyrir hvern leik). Mótið verður reiknað til íslenskra og alþjóðlegra stiga.

Skákmeistari Norðlendinga getur aðeins orðið sá sem á lögheimili á Norðurlandi, en mótið er öllum opið.

Skákstjóri verður Ingibjörg Edda Birgisdóttir.

Núverandi Skákmeistari Norðlendinga er Haraldur Haraldsson frá Akureyri.

Mótsstaður: Framsýn, Garðarsbraut 26.

Dagskrá

• Mótið hefst kl. 20.00 á föstudagskvöldið 27. apríl, en þá verða telfdar 4 umferðir af 25 mínútna atskákum.
• 5. umferð kl. 11.00 laugardaginn 28. apríl (kappskák 90 + 30 sekúndur á leik)
• 6 umferð kl. 17.00 laugardaginn 28. apríl (kappskák 90 + 30 sekúndur á leik)
• 7. umferð kl. 11.00 sunnudaginn 29. apríl (kappskák 90 + 30 sekúndur á leik)

Verðlaun

1. sæti 45.000 kr.
2. sæti 30.000
3. sæti 20.00
4. sæti 15.000
5. sæti 10.000

Aukaverðlaun fær efsti skákmaður með minna en 1800 stig, 10.000 kr.. Verði menn jafnir að vinningum skiptast verðlaun jafnt milli þeirra.

Verðlaun verða einnig veitt fyrir þrú efstu sætin í flokkin skákmanna 16 ára og yngi.

Þátttökugjöld

Þátttökugjöld fullorðnir : 4000 kr.
Unglingar 16 ára og yngri : 2000 kr.

Yfirseta

Heimilt verður hverjum keppanda að taka sjálfvalda yfirsetu (bye) tvisvar í mótinu og fæst hálfur vinningur fyrir hvert bye.

Ekki verður þó hægt að taka bye í 1. eða 7. umferð.

Tilkynna þarf til skákstjóra hvenær keppandi ætlar að taka sjálfvalda yfirsetu áður en parað er í viðkomandi umferð.

Skráning

• Skráningarform
• Skráðir keppendur

 

Stigaútreikningur

Verði fleiri en einn jafn í keppni um titilinn „Skákmeistari Norðlendinga“ munu stig ráða, en notast verður við leiðbeinandi fyrirmæli frá Alþjóðaskáksambandinu FIDE.

• Direct encounter
• The greater number of wins
• The greater number of games with Black (unplayed games shall be counted as played with White)
• AROC
• Buchholz Cut 1

Hraðskákmót Norðlendinga

Hraðskákmót Norðlendinga 2018 verður haldið að aðalmótinu loknu, sunnudaginn 29. apríl og hefst kl. 14.30 eða síðar.

Ekkert þáttökugjald er í það mót og í verðlaun eru hefðbundnir verðlaunagripir.

Upplýsingar

Hermann Aðalsteinsson veitir allar frekari upplýsingar – [e-mail]

Skákþáttur Morgunblaðsins: Caruana líklegasti áskorandi Magnúsar Carlsen

Allt útlit er fyrir æsispennandi lokasprett áskorendamótsins í skák sem nú stendur yfir í Berlín, en Bandaríkjamaðurinn Fabiano Caruana heldur hálfs vinnings forystu á Aserann Shakhriyar Mamedyarov þegar fjórar umferðir eru eftir. Átta skákmenn unnu sér rétt til þátttöku í áskorendamótinu og tefla þeir tvöfalda umferð. Fyrsta sætið skiptir öllu máli, því að sigurvegarinn vinnur réttinn til að skora á heimsmeistarann Magnús Carlsen í einvígi um heimsmeistaratitilinn sem mun hefjast í London 9. nóvember næstkomandi. Staðan eftir jafnteflisskák efstu manna á fimmtudaginn er þessi:

1. Caruana 6½ v. (af 10) 2. Mamedyarov 6 v. 3. Grischuk 5½ v. 4.-5. Karjakin og Ding 5 v. 6. Kramnik 4½ v. 7. So 4 v. 8. Aronjan 3½ v.

Þar sem Elo-stigamunur á keppendum er sáralítill og varla marktækur virtust allir keppendur eiga sigurmöguleika við upphaf móts. Armenar, sem eignuðust heimsmeistara árið 1963 þegar Tigran Petrosjan vann Mikhael Botvinnik 12½:9½ í Moskvu, hafa lengi alið þá von í brjósti að Aronjan myndi feta í fótspor níunda heimsmeistarans. Aronjan hefur hins vegar ekki náð sér á strik; hann situr einn í neðsta sæti og á enga möguleika á sigri.

Vladimir Kramnik fékk 2½ vinning úr fyrstu þrem skákunum en hreppti þá mikinn mótbyr, tapaði fjórum skákum en vann þó aftur í 10. umferð. Kínverjinn Ding hefur gert jafntefli í öllum tíu skákum sínum. Sergei Karjakin vann síðasta áskorendamót en er ekki líklegur til að ná þeim frábæra endaspretti sem honum er nauðsynlegur og einungis Alexander Grischuk virðist geta blandað sér í baráttu Caruana og Mamedyarovs um sigurinn.

Hvað samsetningu keppendalista mótsins varðar er það að segja að manni finnst að Vachier-Lagrave og Nakamura ættu að vera þarna. Það er eins og Rússarnir nái alltaf að fjölmenna eftir einhverju regluverki sem virðist henta þeim vel. Þó hafa þeir fyrir löngu glatað forystuhlutverki sínu í skákheiminum. Fjölmargar skemmtilegar skákir hafa séð dagsins ljós en stórbrotinn sigur Kramniks yfir Aronjan ber af öðrum:

Áskorendamótið í Berlín 2018; 2. umferð:

Levon Aronjan – Vladimir Kramnik

Spænskur leikur

1. e4 e5 2. Rf3 Rc6 3. Bb5 Rf6 4. d3 Bc5 5. Bxc6 dxc6 6. 0-0 De7 7. h3 Hg8! 

„Þetta er bara eins og Benóný sé að tefla,“ sagði Jón L. Árnason um þennan frumlega hróksleik. Svartur er þess albúinn að ráðast fram með g-peðið eins og Benóný gerði oft í spænska leiknum.

8. Kh1 Rh5 9. c3 g5 10. Rxe5 g4! 

 

 

 

Annar bráðsnjall leikur sem byggist á hugmyndinni 12. hxg4 Dh4+ 13. Kg1 Rg3! og mátar á h1.

11. d4 Bd6 12. g3 Bxe5 13. dxe5 Dxe5 14. Dd4 De7 15. h4 c5 16. Dc4 Be6 17. Db5 c6 18. Da4 f5!

Herjar á hvítu reitina, 19. exf5 má svara með 19.... Rxg3+! t.d. 20. fxg3 Bd5+ 21. Kg1 De2 og mátar.

19. Bg5 Hxg5!

Vitaskuld kýs hann hraðann og frumkvæðið.

20. hxg5 f4! 21. Dd1 Hd8 22. Dc1 fxg3 23. Ra3 Hd3 24. Hd1

Reynir að spyrna við fótum en slagkrafturinn í næsta leik Kramniks er mikill. 

24.... Bd5! 25. f3 gxf3 26. exd5 De2!

Leyfir leppun drottningarinnar. Hugmyndin skýrist strax í næsta leik.

27. He1 g2+!

Glæsilegur lokahnykkur. Nú er 28. Kh2 (28. Kg1 strandar á 28.... f2+) svarað með 28.... g1(D)+! 29. Kxg1 f2+ og vinnur. Aronjan gafst upp.

Helgi Ólafsson [e-mail]

Skákþættir Morgunblaðsins eftir Helga Ólafsson birtast u.þ.b. viku síðar á Skák.is.

Grein þessi birtist í Morgunblaðinu 24. mars 2018

Skákþættir Morgunblaðsins

Ný alþjóðleg skákstig

Ný alþjóðleg skákstig eru komin út og taka þau gildi á morgun. Héðinn Steingrímsson er sem fyrr stigahæsti skákmaður landsins. Þórleifur Karlsson er stigahæstur nýliða og Arnar Smári Signýjarson hækkar mest frá mars-listanum. Miklar sviptingar áttu sér stað á milli lista enda bæði Reykjavíkurskákmót og Íslandsmót skákfélaga reiknað til skákstiga nú. 

Stigalistann í heild sinni má nálgast hér sem viðhengi.

Topp 20

Héðinn Steingrímsson (2574) er stigahæsti skákmaður landsins. Hjörvar Steinn Grétarsson (2557) er annar og Hannes Hlífar Stefánsson (2541) þriðji.

No	Name	Tit	apr.18	Diff	Gms
1	Steingrimsson, Hedinn	GM	2574	0	0
2	Gretarsson, Hjorvar Steinn	GM	2557	-11	6
3	Stefansson, Hannes	GM	2541	8	12
4	Hjartarson, Johann	GM	2523	10	13
5	Olafsson, Helgi	GM	2510	2	3
6	Danielsen, Henrik	GM	2500	2	1
7	Petursson, Margeir	GM	2486	-13	3
8	Gunnarsson, Jon Viktor	IM	2472	1	3
9	Gretarsson, Helgi Ass	GM	2460	9	2
10	Arnason, Jon L	GM	2449	-1	3
11	Thorfinnsson, Bragi	IM	2445	-3	2
12	Kjartansson, Gudmundur	IM	2430	-2	13
13	Thorsteins, Karl	IM	2421	-5	1
14	Thorhallsson, Throstur	GM	2416	-3	13
15	Thorfinnsson, Bjorn	IM	2408	9	13
16	Kjartansson, David	FM	2404	-5	4
17	Arngrimsson, Dagur	IM	2370	0	4
18	Ulfarsson, Magnus Orn	FM	2361	-3	2
19	Olafsson, Fridrik	GM	2355	0	0
20	Jensson, Einar Hjalti	IM	2343	20	4

 

Nýliðar

 

Tólf nýliðar eru á listanum nú. Stigahæstur þeirra er Þórleifur Karlsson (1986). Í næstu sætum eru Magnús Sigurjónsson (1895) og Júlíus Björnsson (1887).

No	Name	Tit	apr.18	Diff	Gms
1	Karlsson, Thorleifur		1986	1986	7
2	Sigurjonsson, Magnus		1895	1895	6
3	Bjornsson, Julius		1887	1887	6
4	Hardarson, Petur Palmi		1748	1748	10
5	Gardarsson, Magnus		1694	1694	5
6	Asbjornsson, Magnus Dagur		1585	1585	13
7	Haraldsson, Gunnar Orn		1582	1582	5
8	Valdimarsson, Johann		1546	1546	5
9	Helgason, Sigurdur		1457	1457	6
10	Ammendrup, Pall J.		1421	1421	5
11	Njardarson, Arnar Ingi		1392	1392	9
12	Helgadottir, Idunn		1229	1229	7

Mestu hækkanir

Eins og svo oft áður setja ungir og efnilegir skákmenn mestan svip á listann yfir mestu hækkanir.  Arnar Smári Signýjarson (+133) hækkar mest allra. Í næstu sætum eru Benedikt Briem (+110) og Tómas Möller (+98).

No	Name	Tit	apr.18	Diff	Gms
1	Signyjarson, Arnar Smari		1484	133	11
2	Briem, Benedikt		1670	110	11
3	Moller, Tomas		1169	98	7
4	Johannsson, Birkir Isak		1957	90	9
5	Haile, Batel Goitom		1446	85	10
6	Davidsson, Oskar Vikingur		1962	80	10
7	Thorisson, Benedikt		1291	77	10
8	Briem, Stephan		1915	74	9
9	Gunnarsson, Baltasar Mani Wedhol		1338	68	10
10	Karlsson, Isak Orri		1354	66	10
11	Stefansson, Benedikt		1360	63	10
12	Hjaltason, Magnus		1338	57	7
13	Kristjansson, Atli Freyr		2177	54	12
14	Fridthofsson, Sigurjon Thor		1599	54	3
15	Birkisson, Bjorn Holm		2073	51	12
16	Davidsson, Stefan Orri		1414	49	9
17	Finnbogason, Knutur		1651	48	3
18	Halfdanarson, Jon		2176	45	3
19	Jensson, Erlingur		1647	44	3
20	Olafsson, Arni		1275	44	10

Stigahæstu skákkonur landsins

Lenka Ptácníková (2198) er sem fyrr langstigahæsta skákkona landsins. Í næstu sætum eru Hallgerður Helga (2040) og Guðlaug Þorsteinsdætur (1983). 

No	Name	Tit	apr.18	Diff	Gms
1	Ptacnikova, Lenka	WGM	2198	-2	13
2	Thorsteinsdottir, Hallgerdur	WFM	2040	-1	11
3	Thorsteinsdottir, Gudlaug	WFM	1983	-5	1
4	Davidsdottir, Nansy		1936	-39	8
5	Johannsdottir, Johanna Bjorg		1900	9	3
6	Finnbogadottir, Tinna Kristin		1880	-3	1
7	Kristinardottir, Elsa Maria		1856	19	3
8	Hauksdottir, Hrund		1781	-12	2
9	Helgadottir, Sigridur Bjorg		1759	-4	1
10	Magnusdottir, Veronika Steinunn		1732	-3	9

Stigahæstu ungmenni landsins (u20)

Jón Kristinn Þorgeirsson (2317) hefur endurheimt efsta sætið á ungmennalistanum. Í næstu sætum eru Vignir Vatnar Stefánsson (2294) og Oliver Aron Jóhannesson (2284). Óskar Víkingur Davíðsson (1962) kemst í fyrsta skipti á topp 10.

No	Name	Tit	apr.18	Diff	Gms	B-day
1	Thorgeirsson, Jon Kristinn	FM	2317	19	12	1999
2	Stefansson, Vignir Vatnar	FM	2294	-6	12	2003
3	Johannesson, Oliver	FM	2284	3	4	1998
4	Birkisson, Bardur Orn	CM	2198	-14	12	2000
5	Heimisson, Hilmir Freyr	CM	2131	-93	13	2001
6	Thorhallsson, Simon		2092	32	13	1999
7	Jonsson, Gauti Pall		2074	-30	12	1999
8	Birkisson, Bjorn Holm		2073	51	12	2000
9	Mai, Aron Thor		1999	24	11	2001
10	Davidsson, Oskar Vikingur		1962	80	10	2005

Stigahæstu öldungar landsins (y65)

Friðrik Ólafsson (2355) er sem fyrr langstigahæsti skákmaður landsins 65 ára og eldri. Í næstu sætum eru Jónas Þorvaldsson (2239) og Jón Torfason (2238).

No	Name	Tit	apr.18	Diff	Gms	B-day
1	Olafsson, Fridrik	GM	2355	0	0	1935
2	Thorvaldsson, Jonas		2239	0	0	1941
3	Torfason, Jon		2238	3	1	1949
4	Einarsson, Arnthor		2233	-19	7	1946
5	Karason, Askell O	FM	2228	-36	4	1953
6	Thorvaldsson, Jon		2184	0	0	1949
7	Halfdanarson, Jon		2176	45	3	1947
8	Fridjonsson, Julius		2156	-11	10	1950
9	Viglundsson, Bjorgvin		2155	8	3	1946
10	Halldorsson, Bragi		2123	-3	9	1949

Reiknuð kappskákmót

• GAMMA Reykjavíkurskákmótið 
• Íslandsmót skákfélaga (1.-4. deild)
• Skákþing Akureyrar (úrslitakeppni)

Stigahæstu skákmenn heims

Magnus Carlsen (2843) er stigahæsti skákmaður heims. Í næstu sætum eru Shakhriyar Mamedyarov (2814) og Fabiano Caruana (2804). 

Heimslistann má nálgast hér. 

 

 

Skrár tengdar þessari bloggfærslu:

• Alþjóðleg skákstig, 1. apríl 2018

Vignir, Stefán, Magnús og Guðmundur tefla á GRENKE - Magnús teflir við Fabi í dag

 

FIDE-meistarinn Vignir Vatnar Stefánsson (2300) er meðal keppenda á GRENKE Chess Open sem er í gagni í Karlsruhe í Þýskalandi. Vignir hefur ekki byrjað vel og hefur 1 vinning eftir 3 umferðir í a-flokki. Faðir hans, Stefán Már, og Guðmundur G. Guðmundsson tefla í b-flokki. Stefán hefur 1,5 vinninga en Guðmundur hefur 1 vinning.

Í dag hefst svo GRENKE Chess Classic. Þar er heimsmeistarinn Magnus Carlsen (2843) meðal keppenda. Í fyrstu umferð teflir hann við áskorendann Fabiano Caruana (2784). Umferð dagsins hefst kl. 13.

• Heimasíða GRENKE Chess Classic
• Beinar útsendingar (hefjast kl. 13)
• GRENKE Chess Open

 

Páskamót Vinaskákfélagsins 2018

Páskamót Vinaskákfélagsins verður haldið mánudaginn 9 apríl kl: 13, í Vin að Hverfisgötu 47. Tefldar verða 6 umferðir með 7 mínútur á skák. Skákstjóri verður Hörður Jónasson. Mótið verður reiknað til hraðskákstiga. 

Í hléi verður boðið upp á kaffi og vöfflur. Góð verðlaun verða í boði. Þið getið skráð ykkur á mótið á gula kassanum efst á síðunni á skak.is. Einnig getið þið skráð ykkur á staðnum.

Allir velkomnir!!

Upplýsingar um þegar skráða keppendur má finna hér!

 

Vignir Vatnar sigraði á páskaeggjamóti Hugins

Páskaeggjamót Hugins í Mjódd fór fram í 26. sinn síðastliðinn mánudag 26. mars. Mótið var vel skipað með 44 þátttakendum og í raun þrælsterkt. Að þessu sinni var umhugsunartíminn 4 mínútur + 3 sekúndur á hvern leik og umferðirnar voru eins og ævinlega sjö. Eins og og oft áður fengust afgerandi úrslit því í þetta sinn sigraði Vignir Vatnar Stefánsson á mótinu með 6,5 af sjö mögulegum. Jafnteflið kom í lokaumferðinni gegn Stephan Briem í skák sem hefði alveg mátt vera lengri en hafði sennilega ekki mikil áhrif á lokastöðuna. Í öðrum viðureignum var það helst Óskar Víkingur sem var með mótþróa og var ekki langt frá því still upp broddgaltarstöðu sem ekki væri árennileg. Vignir Vatnar náði að plokka nokkra brodda úr stöðunni á drottningarvæng og brjótast þar í gegn og vinna skákina.

Um næstu sæti var tekist á í lokaumferðinni. Fyrir síðustu umferð voru fjórir jafnir með 5v en það voru Óskar Víkingur Davíðsson, Stephan Briem, Örn Alexandersson og Aleksandr Domalchuk-Jonasson, sem er Íslensk-Úkranískur strákur sem dvelur hér um páskana. Hann er meðal sterkustu skákmanna í sínum aldursflokki í Úkraínu og hefur greinilega fengið góða þjálfun. Í lokaumferðinni tefli Örn við Magnús Hjaltason og hafði Örn sigur. Á meðan tefldu Aleksandr og Óskar langa baráttuskák, sem var vel tefld þótt seinni hlutinn væri tefldur í stöðugu tímahraki. Aleksandr sem stýrð hvítu mönnunum virtist vera að ná yfirhöndinn í fyrri hluta miðtaflsins en með taktískri brellu, sem fólst í línurofi, tókst Óskari að snúa taflinu sér í vil. Seint í skákinni kom upp endatafl þar sem Óskar var með biskup og riddara og tvö stök peð en Aleksandr með biskup og þrjú stök peð. Þrátt fyrir liðsmuninn var alls ekki auðvelt að vinna þetta peð sem hvítur hafði umfram án þess að svartur tapaði ekki peði sjálfur og lenti kannski út í endatafli með biskup og riddar á móti biskup eða upp kæmi endatafl þar sem svartur þyrfti að máta með biskup og riddara, sem er alls ekki auðvelt með lítinn tíma eftir á klukkunni. Óskari tókst að forðast þetta allt og vinna aukpeðið af hvíti eftir nokkrar hringferðir með mennina um borðið. Eftir það var sigurinn fljótlega í höfn.  Óskar Víkingur og Örn voru því jafnir með 6v en óskar var hærri á stigum og þvi í öðru sæti og Örn í þriðja sæti á mótinu.

Veitt voru verðlaun í þremur flokkum og af þeim voru tveir aldursflokkar. Í elsta aldursflokknum þeirra sem fæddir voru 2002-2004 voru efstir þeir Vignir Vatnar Stefánsson, Stephan Briem og Elfar Ingi Þorsteinsson. Vignir Vatnar var svo einnig sigurvegari mótsins. Í flokki þeirra sem fæddir voru 2005 og síðar voru efstir Óskar Víkingur Davíðsson, Örn Alexandersson og Aleksandr Domalchuk-Jonasson.

Stúlknaverðlaun fengu Batel Goitom Haile, Iðunn Helgadóttir og Elín Lára Jónsdóttir. Þær tefldu á efstu borðum allt mótið og stóðu sig mjög vel og gáfu strákunum ekkert eftir.

Auk þess fékk efsti keppandi í hverjum aldursflokki páskaegg í verðlaun. Ef sá efsti hafði unnið páskaegg í aðalverðlaun fékk sá næsti í aldursflokknum páskaeggið.

Í lokin voru sjö páskaegg dregin út og duttu þar í lukkupottinn þau Daníel Freyr Ófeigsson, Davíð Már Aðalbjörnsson, Brynjólfur Yan Brynjólfsson, Eythan Már Einarsson, Rayan Sharifa, Andri Hrannar Elvarsson og Katrín María Jónsdóttir. Þau sem ekki hlutu verðlaun á mótinu voru svo leyst út með páskaeggi nr. 3 svo enginn færi tómhentur heim. Mótsstjórar voru Alec Elías Sigurðarson, Erla Hlín Hjálmarsdóttir og Vigfús Ó. Vigfússon.

Eftirtaldir hlutu verðlaun á páskaeggjamótinu:

Flokkur 2002-2004:

1. Vignir Vatnar Stefánsson, 6,5v
2. Stephan Briem, 5,5v
3. Elfar Ingi Þorsteinsson, 4v

Flokkur 2005 og yngri:

1. Óskar Víkingur Davíðsson, 6v
2. Örn Alexandersson, 6v
3. Aleksandr Domalchuk-Jonasson, 5v

Stúlkur:

1. Batel Goitom Haile, 5v
2. Iðunn Helgadóttir, 4v
3. Elín Lára Jónsdóttir, 3,5v

 

Árgangaverðlaun:

• Árgangur 2011: Jósef Omarsson
• Árgangur 2010: Kjartan Halldór Jónsson (Elín Lára Jónsdóttir)
• Árgangur 2009: Bjartur Þórisson
• Árgangur 2008: Tómas Möller
• Árgangur 2007: Gunnar Erik Guðmundsson (Batel Goitom Haile)
• Árgangur 2006: Stefán Orri Davíðsson
• Árgangur 2005: Joshua Davíðsson (Óskar Víkingur Davíðsson)
• Árgangur 2003: Viktor Már Guðmundsson (Vignir Vatnar Stefánsson)

Lokastaðan á páskaeggjamótinu í chess-results

Nánar á heimasíðu Hugins

Arnar Smári og Fannar Breki skólaskákmeistarar Akureyrar - Jökull Máni meistari í barnaflokki!

Skólaskákmót Akureyrar fór fram mánudaginn 26. mars. Til mótsins voru mættir nemendur sex grunnskóla á Akureyri. Teflt var um meistaratitil í tveimur aldursflokkum auk þess sem þeir keppendur sem fæddir voru 2007 og síðar tefldu um meistaratitil Akureyrar í barnaflokki.  Keppendur voru 14 og fengu þessir flesta vinninga:

Óttar Örn Bergmann, Snælandsskóla         6

Fannar Breki Kárason, Glerárskóla         4,5

Arnar Smári Signýjarson, Giljaskóla       4,5

Jökull Máni Kárason, Glerárskóla          3,5

Ingólfur Bjarki Steinþórsson, Naustaskóla 3,5

Gabríel Freyr Björnsson, Brekkuskóla      3

Ingólfur Árni Benediktsson, Naustakóla    3

Anton Bjarni Bjarkason, Brekkuskóla       3

Sigurður Máni Guðmundsson, Brekkuskóla    3

Óttar Örn telfdi sem gestur og vann allar sínar skákir þótt hann lenti oft í kröppum dansi. Í eldri flokki (8-10. bekk) varð Arnar Smári hlutskarpastur og Gabríel Freyr í öðru sæti. Fannar Breki varð efstur keppenda í 1-7. bekk; Jökull bróðir hans og Ingólfur Máni komu næstir og hreppti Jökull barnameistaratitilinn á stigum. Efstu menn úr hvorum aldursflokki á skólaskákmótinu munu tefla á umdæmismóti Norðurlands eystra sem háð verður um miðjan apríl.  Efsta sætið í hvorum flokki gefur keppnisrétt á landsmótinu í skólaskák sem að venju fer fram snemma í maí.