Fimmta mót Bikarsyrpunnar hefst á föstudaginn

Bikarsyrpa Taflfélags Reykjavíkur hefur fest sig í sessi undanfarin misseri og fer nú af stað þriðja árið í röð. Mót syrpunnar í vetur verða fimm talsins og hefur umferðum hvers móts verið fjölgað í sjö.

Fimmta mót Bikarsyrpunnar hefst föstudaginn 17. mars og stendur til sunnudagsins 19. mars. Tefldar eru 7 umferðir eftir svissnesku kerfi. Tímamörk eru 30 mínútur + 30 sekúndur á hvern leik og geta skákirnar því varað í allt að tvær klukkustundir. Þó svo mikilvægt sé að börnin vandi sig og noti tímann vel, þá má gera ráð fyrir að margar skákir taki mun styttri tíma.

Teflt verður í einum flokki og hvetjum við stelpur jafnt sem stráka til að koma og spreyta sig í lokamóti Bikarsyrpunnar þennan veturinn.

Fyrir börn sem vilja taka framförum í skák þá er gott að byrja sem fyrst að tefla í kappskákmótum, en hingað til hefur þeim börnum sem vilja tefla á “alvöru mótum” einkum staðið til boða að taka þátt í opnum mótum. Þar er styrkleikamunur oft mikill og mótin taka langan tíma, auk þess sem mörgum börnum óar við tilhugsuninni um að tefla við fullorðna á sínum fyrstu kappskákmótum. Bikarsyrpan er svarið við því. Þessi mótaröð TR er ekki síður sniðin að þörfum þeirra barna sem dreymir um að næla sér í sín fyrstu skákstig.

Einungis börn á grunnskólaaldri (fædd árið 2001 eða síðar) sem ekki hafa náð 1600 alþjóðlegum skákstigum geta tekið þátt í mótum Bikarsyrpunnar. Þannig er styrkleikamunurinn minni en ella og börnin njóta þess betur að tefla. Tímamörkin eru jafnframt styttri, og henta börnum betur en langar 90 mínútna skákir sem tíðkast á hefðbundnum kappskákmótum fullorðinna. Mótin uppfylla öll skilyrði Alþjóða skáksambandsins FIDE og eru reiknuð til alþjóðlegra skákstiga.

Dagskrá Bikarsyrpu V:

1. umferð: 17. mars kl. 17.30 (fös)
2. umferð: 18. mars kl. 10.00 (lau)
3. umferð: 18. mars kl. 13.00 (lau)
4. umferð: 18. mars kl. 16.00 (lau)
5. umferð: 19. mars kl. 10.00 (sun)
6. umferð: 19. mars kl. 13.00 (sun)
7. umferð: 19. mars kl. 16.00 (sun)

Verðlaunaafhending fer fram strax að lokinni síðustu umferð, bæði fyrir lokamótið og samanlagðan árangur í mótunum fimm í vetur.

Tvær yfirsetur (bye) eru leyfðar í umferðum 1-5 og fæst 1/2 vinningur fyrir hvora yfirsetu. Tilkynna þarf skákstjóra um yfirsetu fyrir lok umferðarinnar á undan.

Þátttökugjald í mótið er 1.500kr. Börn sem eru félagar í TR greiða ekki þátttökugjald.

Sigurvegari mótsins hlýtur að launum bikar. Verðlaunapeningur eru veittur fyrir 2. sæti og 3. sæti. Sérstök verðlaun verða veitt næsta vor fyrir samanlagðan árangur í mótunum fimm, þar á meðal er veglegur farandbikar. Þá verða veitt sérstök verðlaun fyrir samanlagðan árangur fyrir börn sem eru félagar í TR, en það eru einkatímar hjá einhverjum af sterkustu skákmönnum félagsins; 1. sæti gefur 5 einkatíma, 2. sæti gefur 3 einkatíma og 3. sæti gefur 2 einkatíma.

Vinsamlegast skráið þátttakendur sem fyrst, það hjálpar til við undirbúning mótsins. Hlökkum til að sjá ykkur!

Skákstjórn: Þórir Benediktsson (867 3109).

Skráningarform

Skráðir keppendur

Íslandsmót grunnskólasveita fer fram 25. og 26. mars

Íslandsmót grunnskóla 8.–10. bekkur 2017 fer fram í Rimaskóla dagana 25. og 26. mars. Tefldar verða 7-9 umferðir eftir fjölda þátttökusveita. Teflt verður eftir svissneska kerfinu. Fimm á laugardegi og fjórar á sunnudegi Umhugsunartími verður 10 mínútur á skák fyrir hvern keppenda auk fimm sekúnda viðbótatartíma á hvern leik. Taflið hefst kl. 13 á laugardeginum en kl. 11 á sunnudeginum.

Hver skóli getur sent fleiri en eina sveit. Í hverri sveit eru fjórir skákmenn. Keppendur skulu vera í 8.–10. bekk. Ef sérstaklega efnilegir skákmenn finnast í 1.–7. bekk er þeim leyfilegt að tefla með sínum skóla en þá aðeins í a-sveit hans! Í hverri sveit mega vera allt að þrír varamenn.

Þátttökugjöld kr. 7.500.- á sveit.  Þó ekki hærri en kr. 15.000.- fyrir hvern skóla.

Veitt verða verðlaun fyrir efstu b-e sveitir ásamt verðunum fyrir efstu sveitir af landsbyggðinni.

Veitt verða borðaverðlaun fyrir bestan árangur á 1.-4. borði. 

Tvær efstu sveitirnar fá keppnisrétt til þátttöku á Norðurlandamóti grunnskólasveita sem fram fer í september næstkomandi Í Íslandi

Skráning fer fram á Skák.is

Skráningu skal lokið í í síðasta lagi 23. apríl

Ath. Áríðandi er að sveitirnar séu skráðar fyrirfram.

Upplýsingar um þegar skráðar sveitir má finna hér.

 

Álfhólsskóli Íslandsmeistarar!

Íslandsmót barnaskóla 4. – 7. bekkur fór fram í Grindavík um liðna helgi. Teflt var við góðar aðstæður í Grunnskóla Grindavíkur. Skáknefnd UMFG og Skákakademía Reykjavíkur önnuðust mótshaldið. Tuttugu og ein sveit tók þátt í mótinu og þar af fjórar frá Suðurnesjum. Tefldar voru átta umferðir með tíu mínútna umhugsunartíma auk tveggja viðbótarsekúnda við hvern leik. Fyrirfram mátt búast við sterkum sveitum frá Ölduselsskóla, Áfhólsskóla og Rimaskóla. Sú varð raunin og sköruðu þessar sveitir nokkuð fram úr.

Sveit Álfhólsskóla tók snemma forystu í mótinu og náði að leggja að velli bæði sveit Ölduselsskóla og Rimaskóla. Sveitin gerði jafntefli við efnilega sveit Vatnsendaskóla en náði að vinna síðustu þrjár umferðirnar 4-0 og sigldi þannig titlinum örugglega í höfn. Baráttan um annað sætið var mjög spennandi. Annað sætið skipti miklu máli þar sem það gaf keppnisrétt á Norðurlandamót barnaskóla sem haldið verður á Íslandi í haust. Fyrir síðustu umferðina voru sveitir Ölduselsskóla og Rimaskóla hnífjafnar. Harðskeytt sveit Hörðuvallaskóla náði tveimur vinningum af Grafarvogspiltum á meðan Ölduselsskóli vann 4-0 og fara því Breiðhyltingar á Norðurlandamótið.

Sveit Íslandsmeistarana skipa: Róbert Luu, Ísak Orri Karlsson, Alexander Már Bjarnþórsson, Gabríel Sær Bjarnþórsson og Rayan Sharifa. Þjálfari og liðsstjóri er Lenka Ptacnikova.

B-sveit Háteigsskóla varð efst b-sveita og c-sveit Grunnskóla Grindavíkur var bæði efst c-sveita og landsbyggðarsveita.

Borðaverðlaun hlutu Róbert Luu Álfhólsskóla á fyrsta borði með fullt hús, Hilmir Arnarson Rimaskóla og Adam Omarsson Háteigsskóla á öðru borði með sjö vinninga af átta, Baltasar Máni Ölduselsskóla á þriðja borði með sex vinninga af sjö og Sigurður Bergvin Grunnskóla Grindavíkur á fjórða borði með sex vinninga af átta.

Skákstjórar voru Stefán Bergsson og Siguringi Sigurjónsson.

Myndaalbúm má finna hér.

Lokastöðuna má finna á Chess-Results.

Björgvin efstur á Öðlingamótinu

Hún var hörð baráttan í þriðju umferð Skákmóts öðlinga sem fram fór sl. miðvikudagskvöld en þegar klukkan nálgaðist 23. stund sólarhringsins var enn stærstur hluti bardaganna í gangi. Á efsta borði mættust hinir reynslumiklu jaxlar, Ögmundur Kristinsson (2015) og Gunnar K. Gunnarsson (2115), í hörkuskák þar sem Gunnar virtist vera að fá nokkuð vænlega stöðu. Úr varð mikil spenna og eftir allnokkrar tilfæringar manna á hinu köflótta borði var liðskipan þannig að Ögmundur hafði tvo hróka gegn hæstvirtri drottningu Gunnars auk þess sem hvor keppandi hafði yfir nokkrum peðum að ráða. Eftir það reyndist höfðingjunum ómögulegt að bæta stöður sínar svo nokkru næmi og voru sverð því slíðruð síðla kvölds. Skiptur hlutur niðurstaðan.

Sömu sögu má segja um viðureign Þórs Valtýssonar (1962) og Siguringa Sigurjónssonar (2021) á öðru borði. Eftir harða rimmu var samið jafntefli þegar út í hnífjafnt endatafl var komið. Raunar lauk fimm orrustum af sjö á efstu borðum með jafntefli en það voru aðeins Fide-meistarinn Ingvar Þór Jóhannesson (2377) og Björgvin Víglundsson (2185) sem höfðu betur gegn sínum andstæðingum; Ingvar gegn Kristni Jóni Sævaldssyni (1934) og Björgvin gegn Magnúsi Matthíassyni (1694).

Staðan er nú þannig að áðurnefndur Björgvin er efstur með fullt hús vinninga en fimm keppendur koma í humátt með 2,5 vinning. Fjórða umferð fer fram næstkomandi miðvikudagskvöld og þá verður stórviðureign á fyrsta borði þar sem Björgvin stýrir hvítu mönnunum gegn Ingvari. Einnig mætast m.a. höfðingjarnir Gunnar og Þór og Siguringi etur kappi við Ögmund.

• Chess-Results
• Skákirnar (pgn): 1 2 3

Hraðkvöld hjá Hugin í kvöld

Hraðkvöld Hugins í Mjóddinni verður mánudaginn 13. mars nk. og hefst taflið kl. 20:00. Tefldar verða 7-10 umferðir með umhugsunartímanum 4 mínútur + 3 sekúndur á hvern leik eða 5 mínútur + 3 sekúndur á hvern leik eftir fjölda umferða. Teflt er í félagsheimili Hugins í Álfabakka 14a í Mjóddinni. Hraðkvöldið verður reiknað til hraðskákstiga. Í vetur verða svo hraðkvöldin fyrsta og síðasta mánudag í hverjum mánuði að því undanskildu þegar mánudag ber upp á stórhátíð eða aðrir viðburðir eru til staðar..

Sigurvegarinn á hraðkvöldinu fær í verðlaun máltíð fyrir einn á Saffran eða pizzu frá Dominos Einnig verður dreginn út af handahófi annar keppandi sem einnig fær sama val. Þar eiga allir jafna möguleika, án tillits til árangurs á mótinu.

Þátttökugjöld eru kr. 300 fyrir félagsmenn (kr. 200 fyrir 15 ára og yngri) og kr. 500 fyrir aðra (kr. 300 fyrir 15 ára og yngri).

Jón Kristinn hraðskákmeistari Akureyrar

Tíu skákkempur mættu til leiks í dag, 12. mars til að skera úr um það hver myndi hampa titlinum "Hraðskákmeistari Akureyrar" næsta árið. Hart var barist og spenna mikil og var mönnum nú skammtaðar fjórar mínútur á skákina og tvær sekúndur að auki fyrir hvern leik (4-2). Þá var mótið og reiknað til alþjóðlegra hraðskákstiga, sem jók vitanlega mjög á taugatitring í hópi keppenda.

Eins og venjulega tók Jón Kristinn Þorgeirsson forystuna, en nokkrir félagar hans voru þó skammt undan. Kvað svo rammt að þessu að ef Jón hefði tapað skák sinni við Áskel Örn Kárason í síðustu umferð hefði sigurinn fallið þeim síðarnefnda í skaut. Leit lengi út fyrir að svo færi, en að lokum mátti snerpa unga mannsins sín meira og hann hafði sigur, eins og undantekningarlaust á öðrum mótum vetrarins. Jón fékk sumsé átta vinninga, Andri Freyr Björgvinsson sjö, en þeir Áskell og Sigurður Arnarson sex og hálfan. Töfluna má sjá á Chess-results. 

Sæbjörn sterkur í Stangarhyl

Æsir tefldu sinn 20 skákdag vetrarins síðasta þriðjudag. Sæbjörn G Larsen varð efstur með 8 vinninga af 10 mögulegum. Í öðru sæti varð Ingimar Halldórsson með 7,5 vinninga og Þór Valtýsson varð í þriðja sæti með 7 vinninga.

Röð næstu manna

• 4      Stefán Þormar 6,5
• 5-9    Kristján Stefánsson 6
•        Kristinn Bjarnason 6
•        Guðfinnur R Kjartansson 6
•        Valdimar Ásmundsson 6
•        Axel Skúlason 6
• 10-12  Gunnar Örn Haraldsson 5,5
•        Jóhann Larsen 5,5
•        Finnur Kr Finnsson 5,5

 

Næstu 16 fengu aðeins færri vinninga að þessu sinni. Næsta þriðjudag, 14 mars, höldum við Meistaramót Ása. Ögmundur Kristinsson varð meistari Ása 2016 og líka 2015

Allir skákmenn 60+ eru velkomnir til leiks. Við fögnum hverju nýju andliti sem gengur í salinn. Við teflum í Stangarhyl 4, félagsheimili F E B

Skákin hefst alltaf stundvíslega kl. 13.00. Tefldar 10 umferðir með 10 mín. umhugsun.

Vignir með tvö hörkujafntefli á lokadeginum í Stokkhólmi - góð frammistaða

FIDE-meistarinn Vignir Vatnar Stefánsson (2353) gerði tvö hörkujafntefli á lokadegi Stockholm Chess Challange í gær.  Í þeirri fyrri við Svíann Milton Pantzar (2257) og í þeirri síðari gegn indverska FIDE-meistaranum Jena Kumar Rakesh (2315).

Síðari skákin var afar skemmtileg en þar fórnaði Vignir manni á h7. Fórnin stóðst til sigurs með bestu taflmennsku en Vignir missti á einu augnabliki af vinningsleið og endaði á að þráskáka.

Góð frammistaða hjá Vigni á mótinu og var hann á pari stigalega. Frammistaða hans samsvaraði 2348 skákstigum. Hann vann tvær skákir, tapaði tveimur og gerði fimm jafntefli. 

• Heimasíða mótsins
• Chess-Results
• Beinar útsendingar

 

Magnús + Skákmót fyrir 10-18 ára fer fram í dag

Skákviðburður fyrir ungt fólk verður haldinn eftir sýningu heimildarmyndarinnar um norska skákmeistarann Magnus Carlsen

Myndin Magnus er sýnd 12. mars kl. 13:00. Eftir myndina er ungu fólki á aldrinum 10-18 ára boðið að taka þátt í skákmóti (hraðskák).  Skáksamband Íslands skipuleggur viðburðinn í samstarfi við Norska Sendiráðið.  Verðlaunahafi hlýtur spennandi gjöf frá Norska sendiráðinu. Viltu vera með?  Sendu póst á [e-mail] með nafni og aldri fyrir 9. mars.

Myndin MAGNUS er sýnd kl. 13:00. Mótið fer fram á milli kl. 15:00 – 17:00.

Magnus (NO)

Magnus Carlsen hefur verið kallaður "Mozart of Chess" þar sem hann hefur til að bera kunnáttu og greind stórmeistara í skák ásamt framúrskarandi frumleika og innsæi. Magnus er einstök saga ungs manns sem reis upp úr vítahring eineltis í það að verða ein skærasta stjarna og leiðandi í heimi stórmeistara í skák. Magnus býður áhorfendum ekki aðeins að heyra um hinn magnaða og einstaka keppnisheim í skák, heldur líka að kynnast örlítið huga manns með snilligáfu.

Sýnishorn

Skákþáttur Morgunblaðsins: Á svona augnablikum ræðst gengi manna

Um miðjan ágúst sl. brast á hið svokallaða "demantsafmæli" undirritaðs. Í tilefni þess hófust miklar heitstrengingar um þátttöku á öflugu skákmóti og þá var ekki verið að hugsa um eitt af þessum túristamótum sem nú eru haldin út um allar koppagrundir, heldur „djúpu laugina“, „Volga, Volga mikla móða“. A-flokkur hins endurreista Aeroflot-móts í Moskvu og Gíbraltar-mótið eru sterkustu opnu mót ársins. Aeroflot-mótið rakst að vísu á heimsbikarmót FIDE sem fram fór í Sameinuðu arabísku furstadæmunum en á Cosmos-hótelið í Moskvu voru mættir til leiks margir af sterkustu ungu skákmönnum heims og stigalágmörk sett við 2550 elo.

Aðstæður mínar voru aðrar en flestra; ef undan eru skildar ýmsar flokkakeppnir hef ég aðeins tekið þátt í tveim einstaklingsmótum sl. tíu ár. Ýmsar aðvörunarbjöllur klingdu: æfingaleysi getur leitt til rangra ákvarðana, þreytu; sjálfstraust kann að hrapa. En hafði maður ekki lent í verðlaunasæti á þessum vettvangi árið 2004? Mótið var keyrt áfram – enginn frídagur og langar setur reyndu á úthaldið eða það sem Rússarnir kalla taugaorkuna. Lögmál Murphys um að allt sem getur farið úrskeiðis fari úrskeiðis virtist allsráðandi í fyrstu tveim skákunum: 

Irriturizaga – Helgi

64. ... Bb8??

"Lært úrræðaleysi," voru svona mistök kölluð í eina tíð af gömlum félögum mínum. Ég hafði tvisvar áður misst af jafntefli og drýgði nú þá höfuðsynd að gefa upp alla von. Það blasir við að eftir 64. ... Bxg3! þvingar svartur fram jafntefli því að eftir 65. hxg3 er svartur patt.

Ekki gott vegarnesti að tapa þessari skák sem kostaði gríðarleg orkuútlát og 6 klst. taflmennsku.

„Það er kannski fulldjúpt í árinni tekið að halda því fram að ónákvæmni í 18. leik snemma móts geti skipt sköpum en ég hef nú samt á tilfinningunni að þarna hafi ég misst af 1. verðlaunum,“ skrifaði Bent Larsen um glatað tækifæri í skák sem hann tefldi við Anatolí Karpov í San Antonio í Texas haustið 1972. Larsen karlinn talaði oft digurbarkalega en áratuga keppnisreynsla hafði kennt honum að á nákvæmlega svona augnablikum ræðst gengi manna á skákmótum.

Annars staðar í salnum sat hinn frægi Gata Kamsky með tapað tafl gegn Serbanum Indjic:

 

Indjic – Kamsky

Indic lék nú 59. f5 og eftir 59. ... Kf7 60. f6 Kf8 61. Ke6 Ke8 62. f7+ Kf8 63. Kf6 h6 64. Kg6 h5! varð hvítur að sættast á skiptan hlut.

"Aðeins sá sem hefur lært af mér getur leyst þessa þraut," skrifaði persneski skáksnillingurinn As Suli sem fæddur var árið 880 um skákdæmi sem hann birti í skákkennslubók sem lá gleymd og grafin í meira en þúsund ár eða þar til elsti núlifandi stórmeistari heims, Júri Averbakh, vakti athygli á henni og dæminu á Ólympíumótinu í Dubai árið 1986. "Reitirnir kallast á". Í því hugtaki lá lausnin sem Averbakh fann. Andspæni í ýmsum myndun: á ská, þversum og langsum, er gott íslenskt orð um þá tegund leikþvingunar sem Persinn kunni full skil á.

Aftur að stöðumyndinni: As Suli hefði ekki verið lengi að finna vinninginn: 59. h5 Kf7 60. Kd6 Kf6 61. h6! Kf7 62. Kd7! og vinnur, t.d. 62. ... Kf6 63. Ke8 o.s.frv.

Í B-flokki tefldu Guðmundur Kjartansson, Dagur Ragnarsson og Sigurður Daði Sigfússon. Þeir tveir síðastnefndu bættu ætlaðan árangur sinn og Guðmundur var á pari. 

------------------

Skákþættir Morgunblaðsins eftir Helga Ólafsson birtast u.þ.b. viku síðar á Skák.is.

Grein þessi birtist í Morgunblaðinu 4. mars 2017

Skákþættir Morgunblaðsins