Hraðkvöld Hugins í kvöld

Hraðkvöld Hugins í Mjóddinni verður mánudaginn 27. mars nk. og hefst taflið kl. 20:00. Tefldar verða 7-10 umferðir með umhugsunartímanum 4 mínútur + 3 sekúndur á hvern leik eða 5 mínútur + 3 sekúndur á hvern leik eftir fjölda umferða. Teflt er í félagsheimili Hugins í Álfabakka 14a í Mjóddinni. Hraðkvöldið verður reiknað til hraðskákstiga. Í vetur verða svo hraðkvöldin fyrsta og síðasta mánudag í hverjum mánuði að því undanskildu þegar mánudag ber upp á stórhátíð eða aðrir viðburðir eru til staðar..

Sigurvegarinn á hraðkvöldinu fær í verðlaun máltíð fyrir einn á Saffran eða pizzu frá Dominos Einnig verður dreginn út af handahófi annar keppandi sem einnig fær sama val. Þar eiga allir jafna möguleika, án tillits til árangurs á mótinu.

Þátttökugjöld eru kr. 300 fyrir félagsmenn (kr. 200 fyrir 15 ára og yngri) og kr. 500 fyrir aðra (kr. 300 fyrir 15 ára og yngri).

Ingvar sigurvegari Skákþings Norðlendinga - Haraldur Norðlendingameistari

Skákþing Norðlendinga fór fram um helgina á Sauðárkróki og lauk fyrr í dag. FIDE-meistarinn Ingvar Þór Jóhannesson (2359) sigraði með yfirburðum á mótinu. Ingvar var taplaus á mótinu, leyfði aðeins tvö jafntefli en vann fimm skákir.  

Haraldur Haraldsson (1920) og Stefán Bergsson (1997) komu næstir með 5 vinninga. Haraldur varð skákmeistari Norðlendinga þar sem hann fékk flesta vinninga þeirra sem hafa lögheimili á Norðurlandi.

Lokastaðan á Chess-Results.

Í dag fór fram Hraðskákmót Norðlendinga. Róbert Lagerman og Jón Kristinn Þorgeirsson urðu eftir og jafnir. Jón Kristinn var Norðlendingameistari. Ingvar Þór Jóhannesson varð þriðji.

Ákaflega vel var staðið að mótinu að hálfu mótshaldara en þar fór fremstur í flokki Jón Arnljótsson. Teflt var í Kaffi Króki. Ingibjörg Edda Birgisdóttir var skákstjóri. 

Heimasíða Skákfélags Sauðárkróks.

Páskaeggjasyrpa TR og Nóa Síríus hefst í dag klukkan 14

Páskaeggjasyrpa Nóa Síríus og Taflfélags Reykjavíkur hefur slegið rækilega í gegn undanfarin ár og hefur mikill fjöldi barna tekið þátt í mótum syrpunnar. Páskaeggjasyrpan í ár hefst sunnudaginn 26.mars er fyrsta mótið verður haldið. Næsta mót verður haldið 2.apríl og hið þriðja í röðinni fer fram 9.apríl. Öll mótin eru á sunnudegi og hefjast klukkan 13. Mótin í ár verða reiknuð til alþjóðlegra hraðskákstiga. Mótið í dag hefst kl. 14!

Keppt verður í tveimur flokkum, 1-3.bekk (og yngri) og 4-10.bekk. Sjö umferðir verða tefldar í hverju móti með 5 mínútna umhugsunartíma á mann og bætast 3 sekúndur við tímann eftir hvern leik (5+3). Páskaegg verða í verðlaun á hverju móti sem og fyrir þrjú efstu sætin samanlagt í hvorum flokki mótanna þriggja. Einnig verða verðlaunapeningar veittir fyrir þrjú efstu sætin í hvorum flokki á hverju páskaeggjamóti.

Allir sem taka þátt í minnst tveimur af þremur mótum Páskaeggjasyrpunnar fá páskaegg í verðlaun fyrir þátttökuna og verða þau afhent í lok þriðja mótsins.

Taflfélag Reykjavíkur og Nói Síríus hlakka til að sjá ykkur á PÁSKAEGGJASYRPUNNI 2017!

 

Skráningarform

Skráðir keppendur

Skákþáttur Morgunblaðsins: Akureyringarnir á Íslandsmóti skákfélaga

Á Íslandsmóti skákfélaga sem lauk í Rimaskóla á dögunum sáust að venju stórskemmtileg tilþrif. Hvað varðar baráttuna um efsta sætið í 1. deild er sennilega hægt fallast á þá skýringu að keppnin, sem stendur ár eftir ár milli Hugins og Taflfélags Reykjavíkur, minni heilmikið á baráttu Celtic og Rangers í skoska boltanum. Þessi lið er skipuð titilhöfum á flestum borðum og styrkleikamunurinn sem kemur fram í miklum stigamun gerir það að verkum að barátta þeirra við önnur lið er oft skoðuð með tilliti til þess hversu marga vinninga þau missa í einstökum viðureignum. Vert er að taka fram að stig eru ekki látin ráða eins og t.d. í þýsku Bundesligunni, heldur samanlagður vinningafjöldi.

Akureyringar hafa oft í þessum viðureignum náð dýrmætum vinningum frá toppliðunum. Þeir hafa gert lítið af því að sækja skákmenn út fyrir landsteinana en byggja á reyndum skákmönnum í bland við yngri. Það er heilmikill félagslegur auður í þessu liði þeirra. Þegar keppnin hófst að nýju fimmtudagskvöldið 2. mars vann a-sveit TR Akureyringana 5:3 og við það að TR missti þrjá vinninga jukust sigurlíkur Hugins í keppninni. Þar vakti athygli glæsilegur sigur hins unga Jóns Kristins Þorgeirsson yfir einum af máttarstólpum TR-inga.

Jón Kristinn Þorgeirsson (SA) – Arnar Gunnarsson (TR)

Ítalskur leikur

1. e4 e5 2. Rf3 Rc6 3. Bc4 Bc5 4. c3 Rf6 5. d4 exd4 6. cxd4 Bb4 7. Bd2!?

Þetta afbrigði ítalska leiksins nýtur nokkurra vinsælda. Löng og þvinguð leið sem hefst með 7. Rc3 Rxe4 8. O-O Bxc3 9. d5 Bf6! gefur svarti betri möguleika.

7. ... Bxd2+ 8. Rbxd2 d5 9. exd5 Rxd5 10. Db3 Rce7 11. 0-0 0-0 12. Hfe1 Rb6!?

Svartur ætti að geyma riddarann á d5 og því er 12. .... c6 sennilega betri leikur.

13. Had1 Rf5 14. Db4 Dd6 15. Dc5! Ra4?

Arnari hefur sennilega sést yfir næsti leikur hvíts en hvíta staðan er ógnandi.

16. Bxf7+! Kh8 17. Dc2 b5 18. Re4 Df4 19. Bd5 Hb8 20. Reg5 g6 21. He5 Rg7 22. Dxc7 Rxb2 23. He8!

Glæsilega leikið. „Þungu fallstykkin“ í herbúðum hvíts eru öll í uppnámi. Samt er svartur varnarlaus.

23. ... Be6 24. Hxb8

og hvítur gafst upp.

Óvæntustu úrslit Íslandsmóts skákfélaga urðu þegar KR-ingar náðu jafntefli við a-sveit Hugins, 4:4. Ingvar Þ. Jóhannesson hafði unnið nálega allar skákir sínar fyrir Hugin en gætti ekki að sér í eftirfarandi viðureign:

Jón Bergþórsson (KR) – Ingvar Þ. Jóhannesson (Huginn)

Síðasti leikur Ingvars var 27. .... Be8-c6 og Jón greip tækifærið og tefldi sóknina af mikilli nákvæmni:

28. Rf6+! gxf6 29. gxf6! Kh8?

Eftir 29. ... Bxf3 30. Dg3+ Kf8 31. Dg7+ Ke8v 32. Dg8+ Kd7 33. Dxf7+ Kc6 34. Dxe6+ og Hxf3 er hvíta staðan betri en þetta var samt besti möguleiki svarts.

30. Bxc6 b5 31. Be4 Hd4 32. Bxh7! Bxe5 33. Dh4! Bxf6 34. Dxf6+ Kxh7 35. Dxf7+ Kh8 36. Df6+ Kh7 37. Hf3 Hd1+ 38. Kf2 Hd2+ 39. Ke1 Hxh2 40. Df7+ Kh8 41. Hg3!

– og svartur gafst upp.

Taflfélag Garðabæjar sigraði örugglega í 2. deild og endurkoman í 1. deild á næsta ári verður skemmtileg. Þá verður gaman að fylgjast með Hrókum alls fagnaðar, sem unnu 3. deildina og stefna hærra. Ýmis önnur lið hafa verið að endurskipuleggja sig, t.d. Taflfélag Vestmanneyja, sem leggur nú meiri áherslu á grasrótina en vann sæti í 3. deild á næsta keppnistímabili.

------------------

Skákþættir Morgunblaðsins eftir Helga Ólafsson birtast u.þ.b. viku síðar á Skák.is.

Grein þessi birtist í Morgunblaðinu 18. mars 2017

Skákþættir Morgunblaðsins

Ingvar með vinningsforskot

Ingvar Þór Jóhannesson hefur náð vinningsforskoti á Skákþingi Norðlendinga eftir sigur á Erni Leó Jóhannssyni í 5 umferð sem hófst kl 11 í morgun og lauk um 3 leitið.  Í 2.-5. sæti með 3,5 vinninga eru Róbert Lagermann, Gauti Páll Jónsson, Haraldur Haraldsson og Tómas Veigar Sigurðsson, en Haraldur og Tómas eru efstir Norðlendinga. Aukaverðlaun verða veitt þeim efsta þeirra sem hafa minna en 1800 stig og er Karl Egill Steingrímsson efstur í þeim flokki.  Nánari útlistun á stöðu og úrslitum má finna hér. 

Næsta umferð hefst kl. 17 og þá tefla m.a. Haraldur og Ingvar, Róbert og Gauti Páll og Stefán Bergson og Tómas.

Heimasíða Skákfélags Sauðárkróks.

Ingvar efstur á Skákþingi Norðlendinga

Skákþing Norðlendinga hófst í gær á Sauðárkróki. Tefldar voru fjórar atskákir. Ingvar Þór Jóhannesson (2359) er efstur með 3,5 vinninga. Örn Leó Jóhannsson (2230) og Sigurður Eiríksson (1926) koma næstir með 3 vinninga.

Síðustu þrjár umferðirnar verða kappskákir og hefst fimmta umferðin kl. 11.

Stöðuna má finna á Chess-Results.

Páskaeggjasyrpa TR og Nóa Síríus hefst á sunndaginn

Páskaeggjasyrpa Nóa Síríus og Taflfélags Reykjavíkur hefur slegið rækilega í gegn undanfarin ár og hefur mikill fjöldi barna tekið þátt í mótum syrpunnar. Páskaeggjasyrpan í ár hefst sunnudaginn 26.mars er fyrsta mótið verður haldið. Næsta mót verður haldið 2.apríl og hið þriðja í röðinni fer fram 9.apríl. Öll mótin eru á sunnudegi og hefjast klukkan 13. Mótin í ár verða reiknuð til alþjóðlegra hraðskákstiga.

Keppt verður í tveimur flokkum, 1-3.bekk (og yngri) og 4-10.bekk. Sjö umferðir verða tefldar í hverju móti með 5 mínútna umhugsunartíma á mann og bætast 3 sekúndur við tímann eftir hvern leik (5+3). Páskaegg verða í verðlaun á hverju móti sem og fyrir þrjú efstu sætin samanlagt í hvorum flokki mótanna þriggja. Einnig verða verðlaunapeningar veittir fyrir þrjú efstu sætin í hvorum flokki á hverju páskaeggjamóti.

Allir sem taka þátt í minnst tveimur af þremur mótum Páskaeggjasyrpunnar fá páskaegg í verðlaun fyrir þátttökuna og verða þau afhent í lok þriðja mótsins.

Taflfélag Reykjavíkur og Nói Síríus hlakka til að sjá ykkur á PÁSKAEGGJASYRPUNNI 2017!

 

Skráningarform

Skráðir keppendur

Áskorendaflokkur hefst 1. apríl í Stúkunni

Áskorendaflokkur Íslandsmótsins í skák fer  1.-9. apríl nk. Teflt er í Breiðabliks-stúkunni í Kópavogi. Tefldar verða níu umferðir eftir svissneska kerfinu.

Verðlaun í áskorendaflokki eru sem hér segir: 

1. 75.000 kr.
2. 45.000 kr.
3. 30.000 kr. 

Verðlaun skiptast eftir Hort-kerfi séu menn efstir í verðlaunasætum í áskorendaflokki. Tvö efstu sætin gefa keppnisrétt í landsliðsflokki í ár sem fram fer á Hafnarfirði, 9.-20. maí nk.

Séu menn jafnir ræður stigaútreikningur.

Skráning

Þátttökugjöld eru 5.000 kr. Unglingar 15 ára og yngri (2000 og síðar) fá 50% afslátt. F3-félagar fá frítt í mótið.

Skráning fer fram á Skák.is (guli kassinn efst). Þátttökugjöld greiðist inn á reikning 101-26-12763, kt. 580269-5409 fyrir mót.

Upplýsingar um þegar skráða keppendur má finna hér.

Tímamörk

Áskorendaflokkur: 90 mínútur + 15 mínútur eftir 40 leiki. 30 sekúnda viðbótartími eftir hvern leik.

Opinn flokkur: 30 mínútur auk 30 sekúnda viðbótartími eftir hvern leik.

Dagskrá: 

1. umferð, laugardagurinn, 1. apríl, kl. 13:00
2. umferð, sunnudagurinn, 2. apríl, kl. 13:00
3. umferð, mánudagurinn, 3. apríl, kl. 18:30
4. umferð, þriðjudagurinn, 4. apríl, kl. 18:30
5. umferð, miðvikudagurinn, 5. apríl, kl. 18:30
6. umferð, fimmtudagurinn, 6. apríl, kl. 18:30
7. umferð, föstudagurinn, 7. apríl, kl. 18:30
8. umferð, laugardagurinn, 8. apríl, kl. 13:00
9. umferð, sunnudagurinn, 9. apríl, kl. 13:00

Jafnteflisreglur 

Takmarkanir eru settar á jafnteflisboð. Hún gengur út á það að ekki er heimilt að bjóða jafntefli fyrr en báðir keppendur hafa leikið 30 leiki. Á því má gera undantekningar sé þráteflt en þá verður að stöðva klukku, kalla á skákstjóra og koma með jafntefliskröfu. 

Yfirseta

Hægt er að taka tvær yfirsetur í umferðum 1-6 og fá fyrir hana hálfan vinning. Óska þarf eftir yfirsetunni með góðum fyrirvara og fylla út eyðublað þess efnis hjá skákstjóra.

Þegar skráðir keppendur

 

Íslandsmót grunnskólasveita hefst á laugardaginn - skráningarfrestur rennur út á miðnætti

Íslandsmót grunnskóla 8.–10. bekkur 2017 fer fram í Rimaskóla dagana 25. og 26. mars. Tefldar verða 7-9 umferðir eftir fjölda þátttökusveita. Teflt verður eftir svissneska kerfinu. Fimm á laugardegi og fjórar á sunnudegi Umhugsunartími verður 10 mínútur á skák fyrir hvern keppenda auk fimm sekúnda viðbótatartíma á hvern leik. Taflið hefst kl. 13 á laugardeginum en kl. 11 á sunnudeginum.

Hver skóli getur sent fleiri en eina sveit. Í hverri sveit eru fjórir skákmenn. Keppendur skulu vera í 8.–10. bekk. Ef sérstaklega efnilegir skákmenn finnast í 1.–7. bekk er þeim leyfilegt að tefla með sínum skóla en þá aðeins í a- eða b-sveit hans! Í hverri sveit mega vera allt að þrír varamenn.

Þátttökugjöld kr. 7.500.- á sveit.  Þó ekki hærri en kr. 15.000.- fyrir hvern skóla.

Veitt verða verðlaun fyrir efstu b-e sveitir ásamt verðunum fyrir efstu sveitir af landsbyggðinni.

Veitt verða borðaverðlaun fyrir bestan árangur á 1.-4. borði. 

Tvær efstu sveitirnar fá keppnisrétt til þátttöku á Norðurlandamóti grunnskólasveita sem fram fer í september næstkomandi Í Íslandi

Skráning fer fram á Skák.is

Skráningu skal lokið í í síðasta lagi 23. mars.

Ath. Áríðandi er að sveitirnar séu skráðar fyrirfram.

Upplýsingar um þegar skráðar sveitir má finna hér.

 

Benedikt Briem sigraði á lokamóti Bikarsyrpunnar

Fimmta og síðasta mót Bikarsyrpu TR þennan veturinn fór fram um síðastliðna helgi. Keppendur voru hátt í 30 talsins, flestir ef ekki allir komnir með nokkra reynslu af þátttöku í skákmótum. Að venju voru tefldar sjö umferðir og urðu úrslit þau að Benedikt Briem varð efstur með 6 vinninga, Árni Ólafsson varð annar með 5,5 vinning og þriðji með 5 vinninga varð Alexander Már Bjarnþórsson. Rayan Sharifa og Ísak Orri Karlsson hlutu einnig 5 vinninga en Alexander hlaut bronsið eftir stigaútreikning.

Að loknu móti voru aukinn heldur veitt verðlaun fyrir samanlagðan vinningafjölda í mótunum fimm í vetur. Þar varð hlutskarpastur Fjölnispilturinn knái, Magnús Hjaltason, en hann krækti í alls 22,5 vinning. Glæsilega gert hjá Magnúsi sem missti ekki úr skák og hefur verið afar iðinn við kolann á reitunum 64 að undanförnu. Hlýtur hann að launum veglegan farandbikar. Þrír efstu félagsmenn Taflfélags Reykjavíkur samanlagt fengu afhend viðurkenningarskjöl og inneign í einkatíma hjá einhverjum af alþjóðlegu meisturum félagsins. Þar var fyrrnefndur Árni hlutskarpastur, Batel Goitom Haile varð önnur og í þriðja sæti hafnaði Kristján Dagur Jónsson.

Lítum sem snöggvast á gang mála í móti helgarinnar. Fyrsta umferð hófst venju samkvæmt seinnipart föstudags og eins og gjarnan er í fyrstu umferð var getumunur keppenda nokkur og margar skákirnar því snarpar. Allir áttu keppendur þó sameiginlegt að vera feykilega einbeittir við skákborðin og vakti atgervi þeirra á mótsstað töluverða athygli mótsstjórnar. Var sannast sagna líkt og um væri að ræða skákmenn með margra áratuga reynslu. Algjörlega til fyrirmyndar.

Segja má að úrslit fyrstu umferðar hafi verið nokkuð eins og búast mátti við en þó má nefna góðan sigur Einars Tryggva Petersen á Bjarti Þórissyni í skák þar sem sá síðarnefndi var fullrólegur í uppstillingu sinna manna. Einar nýtti sér það vel, náði virkri stöðu og landaði góðum vinningi í kjölfarið. Í annarri umferð mættust m.a. nafnarnir Benedikt Briem og Benedikt Þórisson á efsta borði og varð úr spennandi orrusta. Stilltu báðir liðsmönnum sínum vel upp en í jöfnu og rafmögnuðu miðtafli gaf BÞ BB færi á að vinna skiptamun sem BB var ekki lengi að nýta sér. Sigldi hann sigrinum örugglega í höfn eftir það.

Í þriðju umferð sigraði Benedikt Briem Batel Goitom og var því orðinn efstur með 3 vinninga. Að loknum fjórðu og fimmtu umferð var Breiðablikspilturinn enn efstur þrátt fyrir að taka yfirsetu í fjórðu umferð og hafði nú 4,5 vinning. Alexander, Magnús og Adam Omarsson komu næstir með 4 vinninga. Viðureign Alexanders og Magnúsar í fimmtu umferð stóð í næstum 2,5 klst og var spennan hreinlega rafmögnuð. Lauk bardaganum í afar spennandi og lærdómsríku hróksendatafli þar sem Alexander varðist vel og varð jafnteflið ekki umflúið.

Í sjöttu og næstsíðustu umferð gerðu Magnús og Benedikt Briem sannkallað stórmeistarajafntefli á efsta borði þar sem allt virtist vera stál í stál í miðtaflinu þó svo að fullmikið væri eftir af skákinni að mati dómara. Á sama tíma vann Alexander Adam og Árni lagði Tómas Möller. Þar með voru Benedikt og Alexander efstir og jafnir með 5 vinninga en Magnús og Árni komu næstir með 4,5 vinning.

Æsispennandi lokaumferð hófst seinnipart sunnudags og þar áttust við í úrslitaviðureign Alexander og Benedikt þar sem sá síðarnefndi hafði að lokum sigur og tryggði sér þar með efsta sætið í mótinu. Á sama tíma lagði Árni Magnús og skaust þar með upp í annað sætið en Alexander varð þriðji eins og fyrr segir.

Enn einni skemmtilegri og lærdómsríkri skákhelgi er því lokið og viljum við þakka öllum þeim krökkum sem voru með okkur í Bikarsyrpunni í vetur og ekki síst foreldrum og forráðamönnum því það er meira en að segja það að leggja heila helgi undir svo “massífa” dagskrá sem mót Bikarsyrpunnar eru. Hinsvegar teljum við mótin vera gríðarlegan lærdóm fyrir unga skákmenn sem eru að stíga sín fyrstu skref á framabraut skáklistarinnar og teljum því þessum tíma mjög vel varið.

Það er ánægjulegt að sjá þátttöku stigalausra keppenda aukast á ný og þá eykst þátttaka stúlkna í mótunum hægt og sígandi en þær viljum við sjá við skákborðin ekki síður en alla “gaurana”. Við bíðum spennt eftir næsta tímabili og hlökkum til nýrrar Bikarsyrpu sem hefst að öllu óbreyttu í september. Þangað til þá hvetjum við ykkur krakkar að æfa ykkur vel og reglulega, helst eitthvað á hverjum degi – það þarf ekki að vera langur tími í senn. Jöfn og góð ástundun er alltaf árangursríkust.

Sjáumst í haust!

Öll úrslit í mótum Bikarsyrpunnar í vetur: Mót 1, Mót 2, Mót 3, Mót 4, Mót 5

Myndskreytta frásögn má finna á heimasíðu TR.