Skák.is

Færsluflokkur: Íþróttir

15.7.2010 | 20:46

Dortmund skákmótið hófst í dag

Dortmund Sparkassen skákmótið hófst í dag. Eins og á svo mörgum ofurskákmótum nú til dags taka sex skákmenn þátt og tefla tvöfalda umferð. Meðalstig mótsins eru 2731 skákstig og telst mótið því vera í 20. styrkleikaflokki. Aðeins einni skák í fyrstu umferð lauk með jafntefli.

Úrslit 1. umferðar:

Ponomariov, Ruslan	- Leko, Peter	1-0
Kramnik, Vladimir	- Le Quang Liem	½-½
Naiditsch, Arkadij	- Mamedyarov, Shakhriyar	0-1

Heimasíða mótsins
Skákirnar í beinni (15 mínútna seinkun - útsending hefst kl. 13:15 hvern dag)

Íþróttir | Slóð | Facebook | Athugasemdir (0)

15.7.2010 | 11:26

Afmælismót herra Magnúsar Matthíassonar

Á mánudaginn næsta, 19. júlí klukkan 13:00 verður haldið skákmót í Vin, Hverfisgötu 47. Er það í tilefni afmælis heiðurspiltsins Magnúsar Matthíassonar, aka Magnus von Matheus, fráfarandi varaforseta skáksambandsins en hann fer nú bráðlega að nálgast miðjan aldur miðað við hann ætlar sér að verða allavega hundrað ára.

Magnús er mikill dugnaðarpiltur og fellur aldrei verk úr hendi. Framandi tungumál hafa ekki vafist honum um tönn og snarar hann heilu skjölunum yfir á íslensku ótt og títt fyrir landann. Þá er drengurinn mikill útivistarálfur og hjólar reglulega milli Selfoss og Reykjavíkur auk þess að vera áhugamaður um allt sem þýskt er. Frægt er orðið myndasafn hans af ísbirninum Knúti og kolkrabbanum Páli frá Oberhausen.

Þó Magnús hafi átt afmæli 13. júlí sl. vill Skákfélag Vinjar fagna afmælisbarninu með léttu síðbúnu móti og um leið þakka pilti hlýjan hug til félagsins undanfarin misseri. Allir eru hjartanlega velkomnir og vonandi að sem flestir sjái sér fært að taka nokkrar bröndóttar drengnum góða
til heiðurs.

Tefldar verða 6 umferðir með 7 mínútna umhugsunartíma og skákstjóri er fyrirliði Vinjarliðsins, Hrannar Jónsson. Forseti skáksambandsins, Gunnar Björnsson, setur mótið og leikur fyrsta leikinn í nýju og ábyrgðarlausu lífi fráfarandi varaforsetans.

Bókaverðlaun fyrir efstu sætin og kaffi og viðeigandi sumarveitingar milli umferða. Bara mæta tímanlega og skrá sig.

Íþróttir | Slóð | Facebook | Athugasemdir (0)

15.7.2010 | 01:09

Hammer gengur til liðs við TV

Norðmaðurinn Jon Ludvig Hammer (2636) er genginn til liðs við Vestmannaeyinga (TV) og mun hann tefla fyrir liðið í haust. Jon Ludvig er aðeins tvítugur að aldri og næstbesti skákmaður Norðmanna en hann hefur að vissu leyti fallið í skuggann af stórstirninu Magnúsi Carlsen (2826).

Í liði TV eru fyrir stórmeistararnir Alexey Dreev (2660), Sebastien Maze (2573), Igor-Alexandre Nataf (2541), Helgi Ólafsson (2527) auk alþjóðlega meistarans Nils Grandelius (2505), sem verður væntanlega útnefndur stórmeistari í haust, og Fide meistarans Þorsteins Þorsteinssonar (2231).

Íþróttir | Breytt s.d. kl. 10:05 | Slóð | Facebook | Athugasemdir (0)

13.7.2010 | 00:20

Guðmundur með jafntefli í næstsíðustu umferð

Guðmundur Kjartansson (2384) gerði stutt jafntefli við jórdanska FIDE-meistarann Ahmad Samhouri (2379) í tíundu og næstsíðustu umferð SM-flokks First Saturday-mótsins sem fram fór í kvöld. Guðmundur hefur 3,5 vinning og er í 11. sæti. Í lokaumferðinni, sem fram í fyrramálið, teflir Guðmundur við danska alþjóðlega meistarann Bjorn Brinck-Claussen (2290).

Bandaríski FIDE-meistarinn Daniel Naroditsky (2403) er efstur með 7 vinninga og hefur tryggt sér áfanga að alþjóðlegum meistaratitli.

Skákir Guðmundar úr 1.-10. umferð fylgja með fréttinni.

First Saturday-mótin hefjast eins og nafnið ber með sér fyrsta laugardag hvers mánaðar. Guðmundur teflir í stórmeistaraflokki og eru meðalstigin þar 2411 skákstig. 8½ vinning þarf í áfanga að stórmeistaratitli í 11 skákum. Guðmundur er sjöundi í stigaröð keppenda.

First Saturday-mótin

Íþróttir | Breytt s.d. kl. 00:49 | Slóð | Facebook | Athugasemdir (1)

12.7.2010 | 00:23

Guðmundur tapaði í níundu umferð

Guðmundur Kjartansson (2384) tapaði fyrir bandaríska FIDE-meistarann Daniel Naroditsky (2403) í níundu umferð SM-flokks First Saturday-mótsins sem fram fór í kvöld. Guðmundur hefur 3 vinninga og er ellefti. Í tíundu og næstsíðustu umferð, sem fram fer á morgun, teflir Guðmundur við jórdanska FIDE-meistarann Ahmad Samhouri (2379).

Naroditsky er efstur með 6,5 vinning.

First Saturday-mótin

Íþróttir | Slóð | Facebook | Athugasemdir (0)

11.7.2010 | 18:17

Emanuel Berg sænskur meistari

Stórmeistarinn Emanuel Berg (2680) varð í dag skákmeistari Svíþjóðar. Berg sigraði helsta andstæðing sinn Jonny Hector (2646) í næstsíðustu umferð sem fram fór í gær. Þeir gerðu báðir jafntefli í dag og komu jafnir í mark með 6,5 vinning í 9 skákum en Berg hefði betur eftir stigaútreikning. Tiger Hillarp Persson (2588) og Nilse Grandelius (2523) urðu í 3.-4. sæti með 5,5 vinning.

Lokastaðan:

Plac.	Namn	Rating	Poäng
1	Berg Emanuel	2680	6,5
2	Hector Jonny	2646	6,5
3	Hillarp Persson Tiger	2588	5,5
4	Grandelius Nils	2523	5,5
5	Tikkanen Hans	2523	5
6	Brynell Stellan	2567	5
7	Semcesen Daniel	2480	4
8	Eriksson Anders	2335	3,5
9	Vas Peter	2385	2
10	Abdollahzadeh Sani Arash	2312	1,5

Ólympíulið Svía skipa eftirtaldir:

Emanuel Berg, Evgenij Agrest, Slavko Cicak, Tiger Hillarp-Persson, Nils Grandelius

Íþróttir | Slóð | Facebook | Athugasemdir (0)

10.7.2010 | 16:47

Fjórir jafnir í mark á Skákþingi Noregs - aukakeppni

Fjórir skákmenn urðu jafnir og efstir á Noregsmótinu í skák sem lauk í dag í Fredriksstad. Það voru Lie-bræðurnir, Kjetil (2529), sem er stórmeistari, og Espen (2464), sem er alþjóðlegur meistari, og FIDE-meistararnir, Frode Urkedal (2414) og hinn 19 ára Joachim Thomassen. Hinir tveir síðarnefndu náðu báðir AM-áfanga. Joachim sínum fjórða og síðasta. Fjórmenningarnir þurfa að há aukakeppni um Noregsmeistaratitilinn.

Árangur Joachim vakti mikla athygli en hann var efstur fyrir síðustu umferð. Á Bergensjakk má meðal annars lesa: Sjakkhistoriker Øystein Brekke sier til Nettavisen at en eventuell førsteplass til Thomassen vil gi tidenes mest overraskende norgesmester i sjakk.

Þess má geta að lið Noregs á Ólympíuskákmótinu skipa: GM Magnus Carlsen, GM Jon Ludvig Hammer, IM Frode Elsness, GM Kjetil A. Lie and FM Frode Urkedal

Rétt er einnig að benda á það að sænska meistaramótið er í fullum gagni. Jonny Hector (2646) er efstur eftir 7 umferðir af 9 en næstir eru Emanuel Berg (2680) og Stellan Brynell (2567). Upplýsingar um sænska meistaramótið má finna hér. Fjallað verður nánar um það á Skák.is á morgun en þá lýkur mótinu.

Alls tóku um 500 skákmenn þátt í Skákþingi Noregs. 20 skákmenn tefldu í landsliðsflokki þar sem tefldar voru 9 umferðir. Meðal keppenda voru 3 stórmeistarar og 5 alþjóðlegir meistarar.

Heimasíða Skákþings Noregs

Íþróttir | Slóð | Facebook | Athugasemdir (0)

9.7.2010 | 23:13

Guðmundur með jafntefli í sjöundu umferð

Guðmundur Kjartansson (2384) gerði jafntefli við kúbanska stórmeistarann Reynaldo Vera Gonzalez-Quevedo (2513) í sjöundu umferð SM-flokks First Saturday-mótsins sem fram fór í Búdapest í dag. Guðmundur hefur 2,5 vinning og er í 10.-11. sæti. Í áttundu umferð, sem fram fer á morgun, teflir Guðmundur við ungverska stórmeistarann Zoltan Varga (2488).

Allar skákir Guðmundar úr mótinu fylgja með sem viðhengi.

First Saturday-mótin

Íþróttir | Breytt s.d. kl. 23:18 | Slóð | Facebook | Athugasemdir (0)

9.7.2010 | 00:42

Guðmundur tapaði í sjöttu umferð í Búdapest

Alþjóðlegi meistarinn Guðmundur Kjartansson (2384) tapaði fyrir serbneska stórmeistaranum Zlatko Ilincic (2455) í sjöttu umferð SM-flokks First Saturday-mótsins sem fram fór í dag. Guðmundur hefur 2 vinninga og er í 10.-11. sæti. Ilincic er efstur með 4 vinninga.

Skákir Guðmundur í 1.-5. umferð fylgja með fréttinni.

First Saturday-mótin

Íþróttir | Breytt s.d. kl. 08:17 | Slóð | Facebook | Athugasemdir (0)

7.7.2010 | 21:01

Guðmundur enn með jafntefli í Búdapest

Alþjóðlegi meistarinn Guðmundur Kjartansson (2384) gerði sitt fjórða jafntefli í röð í fimmtu umferð SM-flokks First Saturday-mótsins sem fram fór í dag. Að þessu sinni við ungverska alþjóðlega meistarann Gyula Pap (2508). Guðmundur hefur 2 vinninga og er í 10. sæti.

First Saturday-mótin

Íþróttir | Breytt s.d. kl. 22:54 | Slóð | Facebook | Athugasemdir (0)

« Fyrri síða | Næsta síða »