Guðmundur tapaði í fyrstu umferð á stóra sleipa skákmótinu

FIDE-meistarinn Guðmundur Kjartansson (2388) tapaði fyrir enska alþjóðlega meistaranum Jack Rudd (2357) í fyrstu umferð stóra sleipa skákmótsins (Big Slick Chess) sem fram fór í dag í London en teflt mun vera í spilavíti.  Í 2. umferð, sem fram fer á morgun, teflir Guðmundur við rússneska alþjóðlega meistarann Alexander Cherniev (2423).

Alls taka 10 skákmenn þátt í efsta flokki og tefla þeir allir við alla.  Til að ná áfanga að stórmeistaraáfanga þarf 7 vinninga en til að ná áfanga að alþjóðlegum meistaratitli þarf 5,5 vinning.

Heimasíða mótsins

 

 

Sr. Gunnþór “skákprestur” sleginn til riddara

Stjórn Riddarans, skákklúbbs eldri borgara, Strandbergi, Hafnarfjarðarkirkju,  ákvað nýlega, með fulltingi allra innvígðra og innmúraðra klúbbfélaga sinna,

að heiðra Sr. Gunnþór Þ. Ingason, með því að sæma hann heiðursriddaranafnbót í þakklætis- og kveðjuskyni,

nú þegar hann lætur af störfum sóknarprests við Hafnarfjarðarkirkju eftir 32 ára þrotlaust og gróskumikið starf og hverfur til annarra mikilvægra kennimanns- og fræðastarfa á vegum Þjóðkirkjunnar á Biskupsstofu, þar sem hann mun m.a. sinna rannsóknum á keltneskri kristni

og menningu og áhrifum hennar á íslenskt kristnihald.   

Sr. Gunnþór hefur verið verndari Skákklúbbsins Riddarans, allt  frá því hann var stofnaður fyrir 10 árum og stutt starfsemi hans ötullega og beitt sér fyrir  ýmsum nýjungum, þar sem Skákmótið Æskan og Ellin ber hæst. Þá hefur hann borið ríka umhyggju fyrir  klúbbnum, efnt til sérstakra skákmessa, blessað meðlimi hans og allt skáklíf á Íslandi og mært taflið í dýrum kveðskap.   

Á skákfundi klúbbsins í dag, sló Einar S. Einarsson, formaður, Sr. Gunnþór til heiðursriddara með pomp og pragt. Þessu til staðfestu var honum síðan afhent silfurslegin riddarastytta með áletruðu nafni hans, klúbbsins og ártali, ásamt viðurkenningar-skjali um leið og honum var óskað velfarnaðar í störfum á nýjum vettvangi.

Bjarni Jens sigraði á útiskákmóti

Útiskákmót var haldið á Egilsstöðum laugardaginn 20. júní.  Þátttakendur voru 10, þeir Hjálmar Jóelsson, Jón Björnsson, Magnús Ingólfsson, Guðmundur Ingvi Jóhannsson, Hákon Sófusson, Ernst Bachmann, Albert Geirsson, Jóhann Þorsteinsson, Bjarni Kristinsson og Sölvi Aðalbjarnarson.
Tefld var einföld umferð 5 mín. hraðskák. 

Sigurvegari varð Bjarni Kristinsson með 9 vinninga. Í öðru sæti Hjálmar Jóelsson með 7 vinninga.  Í þriðja sæti Magnús Ingólfsson með 5½ vinning og í 4.- 5. sæti urðu Guðmundur Ingvi Jóhannsson og Jóhann Þorsteinsson með 5 vinninga.

Myndasafn Skáksambands Íslands

Glæsilegt myndasafn Skáksambandsins er tilbúið. Í myndasafninu er að finna margar óborganlegar myndir úr skáklífi Íslands. Skönnun mynda og uppsetning var í höndum Braga Þórs Valssonar.

Ritstjóri hefur skoðað þessar myndir og skemmt sér konunglega.  Sérstaklega er skemmtilegt að skoða Eigtís-myndirnar!

Myndasafnið má nálgast í gegnum heimasíðu SÍ.

Áskorendaflokkur Íslandsmótsins í skák hefst 29. ágúst

Stjórn Skáksambands Íslands hefur ákveðið að keppni í áskorendaflokki 2009 fari fram dagana 29. ágúst - 6. september n.k. . Mótið mun fara fram á höfuðborgarsvæðinu.   Efstu tvö sætin gefa föst sæti í Landsliðsflokki að ári. 

Dagskrá:

• Laugardagur               29. ágúst                     kl. 13.00                     1. umferð
• Laugardagur               29. ágúst                     kl. 19.00                     2. umferð
• Sunnudagur                30. ágúst                     kl. 13.00                     3. umferð
• Þriðjudagur                   1. sept.                      kl. 18.00                     4. umferð
• Miðvikudagur               2. sept.                      kl. 18.00                     5. umferð
• Fimmtudagur                3. sept.                      kl. 18.00                     6. umferð
• Laugardagur                 5. sept.                      kl. 11.00                     7. umferð
• Laugardagur                 5. sept.                      kl. 18.00                     8. umferð
• Sunnudagur                  6. sept                       kl. 13.00                     9. umferð

Umhugsunartími:        90 mín. + 30 sek. til að ljúka.

Verðlaun:

• 1.                  50.000.-
• 2.                  30.000.-
• 3.                  20.000.-

 

Aukaverðlaun:

• U-2000 stigum           10.000.-
• U-1600 stigum           10.000.-
• U-16 ára                     10.000.-
• Kvennaverðlaun         10.000.-
• Fl. stigalausra             10.000.-

Aukaverðlaun eru háð því að a.m.k. 5 keppendur séu í hverjum flokki og eingöngu er hægt að vinna til einna aukaverðlauna.  Reiknuð verða stig séu fleiri en einn í efsta sæti.  Stigaverðlaunin miðast við íslensk skákstig.

Þátttökugjöld: 

• 18 ára og eldri            3.000.-
• 17 ára og yngri           2.000.-

 

Skráningu skal senda í tölvupósti á [e-mail] eða tilkynna í síma 568 9141 virka daga kl. 10-13 í síðasta lagi 26. ágúst 2009.  Skráningarform vegna áskorendaflokksins verður sett upp á Skák.is þegar nær dregur móti.

Bragi tapaði í lokaumferðinni

Alþjóðlegi meistarinn Bragi Þorfinnsson (2383) tapaði fyrir Norðmanninum Nicolai Getz (2191) í níundu og síðustu umferð minningarmótsins um Svein Johannessen sem fram fór í Osló í dag.  Bragi hlaut 5 vinninga og hafnaði í 17.-27 sæti.   Bragi lækkar um 16 stig fyrir frammistöðu sína á mótinu.

Norski stórmeistarinn Jon Ludvig Hammer (2582) vann öruggan sigur á mótinu en hann hlaut 8 vinninga.  Í 2.-4. sæti urðu Norðmennirnir Frode Olav Olsen Urkedal (2321), sem er FIDE-meistari, og Hallvard V Ådnøy (2316) og enski stórmeistarinn Mark L Hebden (2510) en þeir hlutu allir 6½ vinning.   

Heimasíða mótsins

 

Bragi tapaði í áttundu umferð

Alþjóðlegi meistarinn Bragi Þorfinnsson (2383) tapaði fyrir Norðmanninum Hallvard V Ådnøy (2299) í áttundu og næstsíðustu umferð minningarmótsins um Svein Johannessen sem fram fór í Osló í morgun.  Bragi hefur 5 vinninga og er í 11.-17. sæti. 

Í níundu umferð, sem nú er í gangi, teflir Bragi við enn einn Norðmanninn, nú Nicolai Getz (2191).

Norski stórmeistarinn Jon Ludvig Hammer (2582) er efstur með 7 vinninga, Ådnøy er annar með 6½ vinning og norski FIDE-meistarinn Frode Olav Olsen Urkedal (2321) og danski alþjóðlegi meistarinn Nikolaj Mikkelsen (2394) er í 3.-4. sæti með 6 vinninga. 

Heimasíða mótsins

 

Helgi Ólafsson sigraði á Minningarmóti Guðmundar Jónssonar frá Stóru-Ávík

Helgi Ólafsson stórmeistari sigraði á Minningarmóti Guðmundar Jónssonar, sem haldið var í Djúpavík laugardaginn 20. júní. Mótið var fjölmennt, fjörugt og tókst framúrskarandi vel. Stórmeistarar röðuðu sér í fjögur efstu sætin, en verðlaun voru veitt í mörgum flokkum.

Minningarmót Guðmundar Jónssonar var haldið í gömlu síldarverksmiðjunni í Djúpavík, sem breytt hafði verið í sannkallaða skákhöll.

Jafnframt var opnuð sýning á ljósmyndum dr. Kára Stefánssonar úr ríki fjörunnar. Myndir Kára er í senn hrífandi og glæsilegar og veittu keppendum góðan innblástur yfir taflborðinu.

Helgi Ólafsson tefldi af miklu öryggi og fékk 8 vinninga af 9 mögulegum. Næstur kom Þröstur Þórhallsson, sem var í efsta sæti um hríð, og þriðji varð Jóhann Hjartarson.

Sigurvegari í kvennaflokki varð Erla Margrétar Gunnarsdóttir,  Gabríel Kári Mánason sigraði í flokki grunnskólabarna og Jón Gunnar Jónsson hlaut flesta vinninga skákmanna með minna en 2100 stig. Hrafn Jökulsson sigraði í flokkum heimamanna og stigalausra skákmanna.

Þá voru veitt sérstök verðlaun fyrir háttvísi, og þau komu í hlut Vigfúsar Vigfússonar, hins nýja formanns Hellis sem þótti sýna mikinn drengskap á mótinu. Verðlaunin voru ekki af lakari endanum, ljúffengt lambalæri frá Melum í Árneshreppi. Best klæddu keppendurnir voru valdir Elvar Guðmundsson og Erla Margrét Gunnarsdóttir.

Fyrir sigurinn á Minningarmóti Guðmundar Jónssonar hlaut Helgi Ólafsson 50 þúsund krónur og stórbrotinn verðlaunagrip eftir Guðjón Kristinsson frá Dröngum. Um er að ræða skúlptúr, unninn úr rekaviði, vel á annan metra á hæð og þurfti fjóra vaska menn til að bera hann inn í skáksalinn. Margir aðrir vinningar á skákhátíðinni voru ættaðir úr Árneshreppi, hannyrðir og listmunir, gisting og siglingar, svo nokkuð sé nefnt.

Við segjum fleiri fréttir af mótinu og skákhátíðinni í Árneshreppi á næstu dögum.

Lokastaðan á Minningarmóti Guðmundar Jónssonar:

1. sæti: Helgi Ólafsson (2522 stig) 8 vinningar.

2. sæti: Þröstur Þórhallsson (2442) 7,5 vinningar. 

3. sæti: Jóhann Hjartarson  (2596)  7 vinningar.

4. sæti: Henrik Danielsen (2482)  6,5 vinningar.

 5.-8. sæti:  Pétur Atli Lárusson (2128), Áskell Örn Kárason  (2239), Gylfi Þórhallson (2232),  Jón Gunnar Jónsson  (1660) 6 vinningar.

9.-14. sæti:  Guðmundur Gíslason (2351), Björn Þorfinnsson  (2422), Elvar Guðmundsson                  (2324), Gunnar Björnsson (2135), Árni Ármann Árnason (2142)  Jorge Fonseca (2040)  5,5 vinningar.

15.-21. sæti: Vigfús Óðinn Vigfússon  (2051), Magnús Gíslason  (1980), Daði Guðmundsson (1950), Gísli Gunnlaugsson (1830), Hrafn Jökulsson, Stefán Karlsson, Hallgrímur Guðmundsson 5 vinningar.

22.-25. sæti: Jakob Thorarensen, Bragi Halldórsson (2238), Arngrímur Þór Gunnhallsson (1955), Gunnar Nikulásson (1550)  4,5 vinningar.

 26.-34. sæti: Atli Viðar Thorstensen, Jóhann Örn Bjarnason, Ólafur Thorarensen, Ingólfur Benediktsson, Gunnar Dalkvist, Kristján Albertsson, Erla Margrét Gunnarsdóttir, Gabríel Máni Kárason, Guðmundur Rafn Guðmundsson  4 vinningar.

35.-37. sæti: Andri Thorstensen, Viðar Gylfason, Ásrún Bjarnadóttir 3,5 vinningar.

38.-41. sæti: Nökkvi Mikaelsson, Saga Kjartansdóttir, Björn Torfason, Unnur Jóna Stefánsdóttir 3 vinningar.

42. sæti:   Júlíana Lind Guðlaugsdóttir  2,5 vinningar.

43.-44. sæti: Magni Snær Kjartansson, HafsteinnÞór Hafsteinsson 2 vinningar.

45. sæti: Ástrós Guðmundsdóttir 1 vinningur.

Bragi sigraði í sjöundu umferð

Alþjóðlegi meistarinn Bragi Þorfinnsson (2383) vann norska FIDE-meistarann Trond Gabrielsen (2300) í sjöundu umferð minningarmótsins um Svein Johannessen sem fram fór í Osló í dag.  Bragi hefur 5 vinninga og er í 4.-8. sæti.  

Í áttundu og næstsíðustu umferð, sem fram fer í fyrramálið og verður væntanlega sýnd beint á vefsíðu mótsins, teflir Bragi við Norðmanninn Hallvard V Ådnøy (2299).

Efstir með 6 vinninga eru Norðmennirnir Jon Ludvig Hammer (2582), stórmeistari, og Frode Olav Olsen Urkedal (2321).  Þriðji með 5½ vinning er áðurnefndur Ådnøy.

Tilvalið er fyrir árrisula að horfa á skák Braga þar sem hún hefst kl. 7 í fyrramálið.

 Heimasíða mótsins

 

Ný mótaáætlun

Stjórn Skáksambands Íslands hefur samþykkt nýja mótaáætlun.  Hana má finna sem excel-viðhengi sem fylgir með fréttinni.  Mótaáætlun á Skák.is verður svo uppfærð í samræmi við áætlunina fljótlega.

 

Skrár tengdar þessari bloggfærslu:

• Mótaáætlun SÍ 2009-10