Björn með jafntefli í Quebec - Dagur og Jón Viktor töpuðu

Björn Þorfinnsson (2395) gerði jafntefli við Kanadamann Louie Jiang (2250) í 5. umferð Meistaramóts Quebec sem fram fór í nótt.  Dagur Arngrímsson (2396) og Jón Viktor Gunnarsson (2462) töpuðu báðir.  Dagur fyrir makedónska stórmeistaranum Vladimir Georgiev (2530) og Jón fyrir úkraínska stórmeistarann Yaroslav Zherebukh (2541).

Dagur hefur 3 vinninga og er í 3.-8. sæti, Jón Viktor hefur 2 vinninga og er í 15.-18. sæti og Björn hefur 1 vinning og er í 19.-20. sæti.  

Efstur er kanadíski stórmeistarinn Bator Sambuev (2491) með 4,5 vinning og annar er er Georgiev með 4 vinninga. 

Í sjöttu umferð, sem hefst kl. 22 í kvöld, teflir Dagur við hvít-rússneska stórmeistarann Sergei Kasparov (2487), sjötti stórmeistarinn í röð sem hann mætir.  Jón Viktor og Björn tefla svo saman.  Að þessu sinni verður enginn Íslendinganna í beinni í kvöld svo áhugasömum er bent á að fara að snemma svona í kvöld.  Rétt er að benda á Bragi Þorfinnsson verður í beinni frá Politiken Cup núna a kl. 11 en hann teflir við danska stórmeistarann Sune Berg Hansen.

Alls tekur 21 skákmaður þátt í efsta flokki.  Þar af eru 10 stórmeistarar og 8 alþjóðlegir meistarar.  Semsagt afar sterkt skákmót.

• Heimasíða mótsins
• Skákirnar í beinni

Valgarð Ingibergsson í TA

Valgarð Ingibergsson (1905) hefur gengið til liðs Taflfélags Akraness úr Taflfélagi Reykjavíkur.  Valgarð er nú búsettur á Akranesi.

 

Gott gengi í fimmtu umferð á Politiken Cup

Mun betur gekk í fimmtu umferð Politiken Cup sem fram fór í dag, en í þeirri fjórðu.  Bragi Þorfinnsson, (2377), Bjarni Jens Kristinsson (1985) og Atli Antonsson (1720) unnu en Ólafur Gísli Jónsson (1899) tapaði.  Daði Ómarsson (2091) sat yfir.  Bragi mætir danska stórmeistaranum Sune Berg Hansen (2554) í sjöttu umferð, sem hefst kl. 11 í fyrramálið.  Skákin verður sýnd beint á vef mótsins.  

 

Staða íslensku skákmannanna:

• 13.-35. Bragi Þorfinnsson (2377) 4 v.
• 132.-178. Bjarni Jens Kristinsson (1985) 2,5 v.
• 179.-240. Daði Ómarsson (2091) og Ólafur Gísli Jónsson (1899) 2 v.
• 241.-269. Atli Antonsson (1720) 1,5 v.

Efstir með fullt hús eru stórmeistararnir Vladimir Malakhov (2707), Rússlandi, Peter Heine Nielsen (2680), Danmörku, og Jonny Hector (2556), Svíþjóð.

Alls taka 307 skákmenn þátt í mótinu og þar af 20 stórmeistarar, 14 alþjóðlegir meistarar og 17 FIDE-meistarar. 

• Heimasíða mótsins
• Skákirnar í beinni

Skákkeppni unglingalandsmóts UMFÍ fer fram á Sauðárkróki 1. ágúst

Skákkeppni á Unglingalandsmóti UMFÍ fer fram á Sauðárkróki um Verslunarmannahelgina. Keppt verður í 8 flokkum, þ.e. 4 stráka og 4 stelpna.

• Flokki 17-18 ára
• Flokki 15-16 ára
• Flokki 13-14 ára
• Flokki 11-12 ára

Telft verður laugardaginn 1. ágúst og hefst keppnin kl. 10. Gert er ráð fyrir 10 mín upphugsunartíma, en fyrirkomulag keppninnar ræðst að öðru leiti af þátttöku.

Skráning fer fram á www.umfi.is.

Útiskákmót á Lækjartorgi á morgun

Skákakademía Reykjavíkur og Vinnuskóli Reykjavíkur standa á morgun, miðvikudag, að útiskákmóti við útitaflið á Lækjartorgi.  Mótið hefst kl. 13 og er öllum opið.  Ókeypis aðgangur.   Tefldar verða 5-6 umferðir með 7 mínútna umhugsunartíma og munu bragðgóð verðlaun (ís) vera í boði. Þetta verður næstsíðasta mótið á útitaflinu sem SR og Vinnuskólinn standa fyrir í sumar.

Hraðskákkeppni taflfélaga hefst eftir verslunarmannahelgi

Hraðskákkeppni taflfélaga, hefst eftir verslunarmannahelgi.  Þetta er í fimmtánda sinn sem keppnin fer fram en Taflfélag Reykjavíkur er núverandi meistari og hafa ásamt Helli unnið keppnina oftast eða sex sinnum hvort félag.   Auk þess hafa Hrókurinn og Skákfélag Hafnarfjarðar sigrað í einu sinni hvort félag í keppninni.

Hvet ykkur til að skrá ykkar félög til leiks sem fyrst en nú þegar hafa bæði Hellismenn og Bolvíkingar skráð sig.

Áætlunin er sem hér segir:

• 1. umferð (u.þ.b. 12 liða úrslit): Skuli vera lokið 15. ágúst
• 2. umferð (8 liða úrslit): Skuli vera lokið 22. ágúst
• 3. umferð (undanúrslit): Skuli vera lokið 28. ágúst (áður en áskorendaflokkur hefst)
• 4. umferð (úrslit): Fer fram á Bolungarvík, föstudaginn 11. september.

Skráning til þátttöku rennur út 7. ágúst nk.   Forráðamenn taflfélaga eru vinsamlegast beðnir um að hafa samband við umsjónarmann í netfangið [e-mail] eða í síma 820 6533.  Eða á Skákhorninu.

Tilkynna þarf eftirfarandi:

• Lið
• Liðsstjóri
• Símanúmer liðsstjóra
• Netfang liðsstjóra

Reglur keppninnar:

1.  Sex manns eru í hvoru liði og tefld er tvöföld umferð, þ.e. allir í öðru liðinu tefla við alla í hinu liðinu. Samtals 12 umferðir, eða 72 skákir.

2.  Heimalið sér um dómgæslu. Komi til deiluatriða er Ólafur S. Ásgrímsson yfirdómari keppninnar.

3.  Varamenn mega koma alls staðar inn. Þó skal gæta þess að menn tefli ekki oftar en tvívegis gegn sama andstæðingi og hafi ekki sama lit í báðum skákunum.

4.  Ætlast er til þess að þeir sem tefli séu fullgildir meðlimir síns félags. Aðeins má tefla með einu taflfélagi í keppninni.

5.  Liðsstjórar koma sér saman um hvenær er teflt og innan tímaáætlunar.  Komi liðsstjórar sér ekki saman um dagsetningu innan tímaramma getur umsjónaraðili ákvarðað tímasetningu.

6.  Verði jafnt verður tefldur bráðabani. Það er tefld er einföld umferð þar sem dregið er um liti á fyrsta borði og svo hvítt og svart til skiptist. Verði enn jafnt verður áfram teflt áfram með skiptum litum þar til úrslit fást.

7.  Heimalið bjóði upp á léttar veitingar, t.d. kaffi, gos, kökur eða kex.

8.  Viðureignirnar skulu fara innan 100 km. radíus frá Reykjavík nema að félög komi sér saman um annað.  Úrslitaviðureignin fer þó fram í Bolungarvík þann 11. september og er ábyrgst að ferðakostnaður verði greiddur fyrir aðallið hvors liðs.   

9.  Úrslitum skal koma til umsjónarmann eins fljótt og auðið er í netfangið [e-mail] og eigi síðar en 12 klukkustundum eftir að keppni lýkur.

10.Úrslit keppninnar verða ávallt aðgengileg á heimasíðu Hellis, www.hellir.blog.is , sem er heimasíða keppninnar, og á www.skak.is.

11.Mótshaldið er í höndum Taflfélagsins Hellis sem sér um framkvæmd mótsins.

Keppendalisti landsliðsflokks Íslandsmótsins í skák

Keppendalisti landsliðsflokks Íslandsmótsins í skák, sem fram fer á Bolungarvík, 11.-13. september nk., liggur nú fyrir.  Meðal keppenda eru 2 stórmeistarar, 5 alþjóðlegir meistarar og 4 fjórir FIDE-meistarar.  Meðalstigin er 2386 skákstig.  Ekki er mögulegt að ná stórmeistaraáfanga en 6,5 vinning þarf í áfanga að alþjóðlegum meistaratitli.  Aðeins einn keppendanna hefur áður orðið Íslandsmeistari en það er Jón Viktor Gunnarsson sem hampaði titlinum árið 2000.

Keppendalistinn:

 

Nr.	Nafn	Titill	Félag	Stig
1	Henrik Danielsen	SM	Haukar	2473
2	Jón Viktor Gunnarsson	AM	Bol	2462
3	Stefán Kristjánsson	AM	Bol	2462
4	Þröstur Þórhallsson	SM		2433
5	Dagur Arngrímsson	AM	Bol	2396
6	Björn Þorfinnsson	AM	Hellir	2395
7	Bragi Þorfinnsson	AM	Bol	2377
8	Róbert Lagerman	FM	Hellir	2351
9	Guðmundur Gíslason		Bol	2348
10	Davíð Ólafsson	FM	Hellir	2327
11	Ingvar Þór Jóhannesson	FM	Hellir	2323
12	Sigurbjörn Björnsson	FM	Hellir	2287
	Meðalstig			2386

 

Dagur og Björn gerðu jafntefli í 2. umferð í Quebec

Alþjóðlegu meistararnir Dagur Arngrímsson (2396) og Björn Þorfinnsso (2395) gerðu báðir jafntefli í 2. umferð meistaramóts Quebec sem fór í dag.  Dagur við rússneska stórmeistarann Vadim Malakhatko (2570) og Björn við Sylvain Barbeau (2357).  Jón Viktor Gunnarsson (2462) tapaði fyrir stórmeistaranum Nikola Mitkov (2526).  Dagur er í beinni útsendingu og er hægt að fylgjast með skák beint á vefsíðu mótsins.

Dagur hefur 1,5 vinning og er í 2.-6. sæti, Jón Viktor og Björn hafa 0,5 vinning og eru 16.-20. sæti.

Í 3. umferð, sem nú er gangi teflir Dagur við Mitkov eins og áður sagði, Björn við stórmeistarann Merab Gagunashvili (2574) og Jón Viktor við Barbeau.  

• Heimasíða mótsins
• Skákirnar í beinni

Bragi með fullt hús eftir 3 umferðir á Politiken Cup

Alþjóðlegi meistarinn, Bragi Þorfinnsson (2377), Daði Ómarsson (2091), Ólafur Gísli Jónsson (1899) unnu allir sínar skákir í 3. umferð Politiken Cup.  Bragi er meðal þeirra 24 skákamanna sem hafa fullt hús vinninga.  Bjarni Jens Kristinsson (1985) gerði jafntefli og Atli Antonsson (1720) tapaði.

Í fjórðu umferð, sem fram fer á morgun, teflir Bragi við sænska stórmeistarann Jonny Hector (2554).  Skákin verður sýnd beint á vefsíðu mótsins og hefst kl. 11.

Staða íslensku skákmannana:

• 1.-24. Bragi Þorfinnsson 3 v.
• 47.-129. Daði Ómarsson og Ólafur Gísli Jónsson 2 v.
• 130.-177. Bjarni Jens Kristinsson 1,5 v.
• 264.-285. Atli Antonsson 0,5 v.

Alls taka 307 skákmenn þátt í mótinu og þar af 20 stórmeistarar, 14 alþjóðlegir meistarar og 17 FIDE-meistarar. 

• Heimasíða mótsins
• Skákirnar í beinn

Guðmundur með stórmeistaraáfanga!

In

FIDE-meistarinn Guðmundur Kjartansson (2356) gerði jafntefli við enska stórmeistarann Mark Hebden (2468) í níundu og síðustu umferð skoska meistaramótsins sem lauk í Edinborg í dag.  Þar með krækti Guðmundur sér í sinn fyrsta áfanga að stórmeistaratitli en hann fékk 6,5 vinning í 9 skákum og þar af 4,5 í 6 skákum gegn stórmeisturum og hækkar um 42 skákstig fyrir frammistöðu sína. Guðmundur endaði í 4.-8. sæti.

Stórglæsilegur árangur hjá Guðmundi sem fyrr í sumar náði sínum síðasta áfanga að alþjóðlegum meistaratitli.  Skammt stórra á högga á milli hjá Guðmundi!

Guðmundur hefur eftir mótin í sumar um 2380 skákstig og vantar því um 20 stig til viðbótar til að verða útnefndur alþjóðlegur meistari. 

Aron Ingi Óskarsson (1876) vann Skotann Andrew McHarg (1586) og hlaut 3,5 vinning.

Sigurvegari mótsins var indverski stórmeistarinn A. Arun Prasad (2556) sem fékk 7,5 vinning.  Tapaði aðeins fyrir Guðmundi!  FIDE-meistarinn Iain Gurley (2349) varð skoskur meistari en hann var efstur Skota.

Guðmundur er 13. stigahæsti keppandi á mótinu en alls tefla 88 skákmenn í efsta flokki.  Meðal annarra keppenda má nefna skosku stórmeistarana Jonathan Rowson (2591), Kati Arakhamia-Grant (2506), Paul Motwani (2503), Colin McNab (2474) og John Shaw (2462).  Alls taka 10 stórmeistarar þátt, 1 alþjóðlegur meistari og 8 FIDE-meistarar.

• Heimasíða mótsins
• Skákirnar í beinni