Færsluflokkur: Skákþættir Morgunblaðsins

3.12.2016 | 20:00

Skákþáttur Morgunblaðsins: Magnús Carlsen jafnaði metin

Þungu fargi er létt af Magnúsi Carlsen og norsku þjóðinni. Eftir meira en 6½ klst. baráttu og 75 leiki gafst Rússinn Sergei Karjakin upp í 10. einvígisskákinni og fyrsti sigur Magnúsar í einvíginu var í höfn. Staðan er nú 5:5 og aðeins tvær skákir eftir þannig að talsverðar líkur standa til þess að úrslit einvígisins ráðist í styttri skákum. Ellefta skákin er á dagskrá í dag og hefst kl. 19 að íslenskum tíma. Og taugaspennan tekur sinn toll; í viðtali við norska blaðamenn strax eftir tíundu skákina kvaðst Magnús lítið hafa getað sofið, en hann var nálægt því að tapa þeirri níundu, sem lauk með jafntefli eftir 74 leiki upp úr miðnætti á fimmtudaginn. Það mun ekkert skorta á dramatík á lokasprettinum, en verði jafnt að loknum 12. skákinni á mánudaginn ráðast úrslitin á þriðjudaginn, fyrst með fjórum atskákum með tímamörkunum 25 10, verði enn jafnt verða tefldar tvær hraðskákir, 5 3, og ef allt um þrýtur fást úrslit með bráðabanaskák. Sá sem dregur hvítt þá verður að vinna en fær meiri tíma, 5 3 á móti 4 3.

Að skákir skuli hafa verið leiddar til lykta í löngum og ströngum endatöflum kemur ekki á óvart; ferill norska heimsmeistarans hin síðari ár hefur gengið út á það að vinna slíkar stöður. Ýmsum gagnrýnendum einvígisins finnst þó baráttan litlaus: „Bobby Fischer, við fyrirgefum þér allt. Komdu aftur,“ stóð skrifað í breska stórblaðinu The Guardian:

New York 2016; 10. einvígisskák:

Magnús Carlsen – Sergei Karjakin

Spænskur leikur

1. e4 e5 2. Rf3 Rc6 3. Bb5 Rf6 4. d3 Bc5 5. c3 0-0 6. Bg5 h6 7. Bh4 Be7 8. 0-0 d6 9. Rbd2 Rh5 10. Bxe7 Dxe7 11. Rc4 Rf4 12. Re3 Df6 13. g3 Rh3+ 14. Kh1 Re7 15. Bc4 c6 16. Bb3 Rg6 17. De2 a5 18. a4 Be6 19. Bxe6 fxe6 20. Rd2

„Skákvélarnar“ ráku upp „stór augu“. Hér gat Karjakin þvingað fram jafntefli með 20. ... Rxf2+ 21. Kg1 Rh4+! 22. Kg1 ( 22. gxh4 Dg6+ og svartur vinnur) Rh3+ o.s.frv. Hægt er að halda taflinu gangandi með því að taka á sig lakari stöðu, 21. Kg1 Rh3+ 22. Kg2?! Rhf4+ 23. gxf4 Rxf4+ 24. Hxf4 exf4 25. Rc2.

20. ... d5 21. Dh5 Rg5 22. h4 Rf3 23. Rxf3 Dxf3 24. Dxf3 Hxf3 25. Kg2 Hf7 26. Hfe1 h5 27. Rf1 Kf8 28. Rd2 Ke7 29. He2 Kd6 30. Rf3 Haf8 31. Rg5 He7 32. Hae1 Hfe8 33. Rf3 Rh8 34. d4 exd4 35. Rxd4 g6 36. He3 Rf7 37. e5+ Kd7 38. Hf3 Rh6 39. Hf6 Hg7 40. b4 axb4 41. cxb4 Rg8 42. Hf3 Rh6 43. a5 Rf5 44. Rb3 Kc7 45. Rc5 Kb8 46. Hb1 Ka7 47. Hd3 Hc7 48. Ha3 Rd4 49. Hd1 Rf5 50. Kh3 Rh6 51. f3 Hf7 52. Hd4 Rf5 53. Hd2 Hh7 54. Hb3 Hee7 55. Hdd3 Hh8 56. Hb1 Hhh7?

Karjakin beið átekta og aðhafðist ekkert en klukkan rak á eftir og nú þvælast svörtu hrókarnir hvor fyrir öðrum.

57. b5!

Spilar út síðasta trompinu. Skyndilega er Magnús kominn með frábæra vinningsmöguleika.

57. ... cxb5 58. Hxb5 d4 59. Hb6 Hc7 60. Rxe6 Hc3 61. Rf4 Hhc7 62. Rd5?

Aftur segir þreytan til sín. Hvíta staðan er léttunnin eftir 62. Hxg6 Hxd3 63. Rxd3 Hc3 64. Hf6 Re3 65. Rf4 Hc1 66. g4! o.s.frv.

62. ... Hxd3 63. Rxc7 Kb8 64. Rb5 Kc8! 65. Hxg6 Hxf3 66. Kg2 Hb3 67. Rd6+ Rxd6 68. Hxd6 He3?

Nú er staðan vonlaus, 68. .. Kc7! var eini möguleikinn, 69. Hxd4 Hb5 70. He4 Kd7! með jafnteflismöguleikum.

69. e6 Kc7 70. Hxd4 Hxe6 71. Hd5 Hh6 72. Kf3 Kb8 73. Kf4 Ka7 74. Kg5 Hh8 75. Kf6

- og Karjakin gafst upp.

Grein þessi birtist í Morgunblaðinu 26. nóvember 2016

Skákþættir Morgunblaðsins

Skákþættir Morgunblaðsins | Breytt 28.11.2016 kl. 23:09 | Slóð | Facebook | Athugasemdir (0)

30.11.2016 | 20:00

Skákþáttur Morgunblaðsins: Magnús tapaði og mætti ekki á blaðamannafund

Sigur rússneska áskorandans Sergei Karjakin með svörtu í áttundu skákinni í heimsmeistaraeinvíginu í New York setur spádóma um úrslitin í uppnám; staðan er nú 4½:3½ Karjakin í vil og aðeins fjórar skákir eru eftir af einvíginu. Magnús Carlsen var greinilega sleginn út af laginu og mætti ekki á blaðamannafund eftir á, eins og keppendur verða að gera vilji þeir hlíta einvígisskilmálum. Fyrir vikið á hann yfir höfði sér sekt, en reglur kveða á um að draga megi 5% verðlaunafjár frá hlut skákmannsins í slíkum tilvikum.

Vandi Magnúsar er í hnotskurn sá að hann hefur enga byrjun „sem bítur“. Þá vekur taflmennska hans spurningar um það hvernig undirbúningi hans hefur verið háttað. Skynsemi þess að tefla langt hraðskákeinvígi við Nakamura rétt fyrir stóra slaginn er hér með dregin í efa. Auðvitað er hægt að vera gáfaður eftir á og ekki má gleyma því að Magnús hrekkur yfirleitt í gang eftir dapurt gengi – en hraðskákir og kappskákir eru ólík keppnisform.

Helsta ástæða þess að Magnús tapaði á mánudag var fífldjörf taflmennska í miðtaflinu. Í tímahraki rétt fyrir 40. leik virtist Karjakin hafa sigurinn í hendi sér en sást þá yfir glæsilegan riddaraleik Magnúsar. En þá var eins og „orkan“ væri farin; Magnús var ekki með verra en gekk illa að fást við frípeð Karjakins á a-línunni og biskupnum var haldið úti. Að lokum fann Karjakin snjalla leið til að spinna mátnet, með takmörkuðum liðsafla þó:

New York 2016; 8. einvígisskák:

Magnús Carlsen – Sergei Karjakin

Drottningarindversk vörn

1. d4 Rf6 2. Rf3 d5 3. e3 e6 4. Bd3 c5 5. b3 Be7 6. O-O O-O 7. Bb2

Drottningarpeðsbyrjun af þessu tagi kemur ekki á óvart og trúlega hefur Karjakin undirbúið sig fyrir þessa „stöðutýpu“.

7. ... b6 8. dxc5 Bxc5 9. Rbd2 Bb7 10. De2 Rbd7 11. c4 dxc4 12. Rxc4 De7 13. a3 a5 14. Rd4 Hfd8 15. Hfd1 Hac8 16. Hac1 Rf8 17. De1 Rg6 18. Bf1 Rg4 19. Rb5 Bc6 20. a4 Bd5 21. Bd4 Bxc4 22. Hxc4 Bxd4 23. Hdxd4 23. ... Hxc4 24. bxc4!?

Djörf ákvörðun „strategískt“ séð.

24. ... Rf6 25. Dd2 Hb8 26. g3 Re5 27. Bg2 h6 28. f4 Red7 29. Ra7 Da3!

Svarta staðan er ekki án gagnfæra og Magnús spennir bogann hátt.

30. Rc6 Hf8 31. h3?!

31. Hxd7 leiðir til jafnteflislegrar stöðu.

31. ... Rc5 32. Kh2 Rxa4 33. Hd8 g6 34. Dd4 Kg7 35. c5?

Skemmtilegur leikur en ekki góður. Jafnvægi var náð með 35. Hd7! t.d. 35. ... Dc3 36. Hb7! o.s.frv.

35. ... Hxd8 36. Rxd8 Rxc5 37. Dd6 Dd3?!

Betra var 37. ... Da4! með yfirburðastöðu.

38. Rxe6+!

Bráðsnjallt. Hvítur er sloppinn.

38. ... fxe6 39. De7+ Kg8 40. Dxf6 a4 41. e4 Dd7 42. Dxg6+ Dg7 43. De8+ Df8 44. Dc6 Dd8 45. f5! a3 46. fxe6 Kg7 47. e7?

Þetta peð átti hann ekki að gefa. Hvítur er sennilega með heldur betra eftir 47. Db5! t.d. 57. ... Rxe6 48. Db4! Df8 49. Dxb6.

47. ... Dxe7 48. Dxb6 Rd3 49. Da5 Dc5 50. Da6 Re5 51. De6?

Tapleikurinn. Hann gat varist með 51. h4!

51. ... h5!

Fáir efuðust um að Karjakin myndi finna þennan leik, sem vinnur.

52. h4

52. ... a2!

Hér er hugmyndin komin fram, 53. Dxa2 er svarað með 53. ... Rg4+ 54. Kh2 Dg1! 55. Db2+ Kg6! Þar sem svarta drottningin valdar a7- og b6-reitinn finnst engin vörn. Magnús gafst því upp. Níunda skákin verður tefld í kvöld og hefur Karjakin hvítt.

Grein þessi birtist í Morgunblaðinu 23. nóvember 2016

Skákþættir Morgunblaðsins

Skákþættir Morgunblaðsins | Breytt 28.11.2016 kl. 23:18 | Slóð | Facebook | Athugasemdir (0)

26.11.2016 | 20:00

Skákþáttur Morgunblaðsins: Magnús Carlsen leikur sér að eldinum

Íslandsmeistari unglinga Bárður Örn Birkisson sigraði á Unglingameistaramóti Íslands skipuðu skákmönnum 22 ára og yngri. Bárður hlaut 5½ vinning af sex mögulegum en Dagur Ragnarsson varð í 2. sæti hlaut 4 vinninga. Með sigrinum vann Bárður sér keppnisrétt í landsliðsflokki á Skákþingi Íslands á næsta ári. Mótið í ár var helgað minningu Sveins Gunnars Gylfasonar, unglingameistara Íslands árið 1980, sem lést sviplega árið 1983 aðeins 16 ára gamall. Fjölskylda Sveins gaf nýjan bikar til mótsins, en það var systir Sveins, Bára Kolbrún Gylfadóttir, sem afhenti Bárði Sveinsbikarinn. — Morgunblaðið/Guðmundur Ólafs

Magnúsi Carlsen gengur illa að finna höggstað á mótherja sínum, Sergei Karjakin, í heimsmeistaraeinvíginu í New York. Það sannaðist í þriðju og fjórðu einvígisskákinni fyrr í vikunni, en sigurlíkar hans í báðum skákunum voru miklar en uppskeran rýr. Í fimmtu skákinni á fimmtudagskvöldið var eins og vonbrigðin með niðurstöðuna hefðu slæm áhrif á taflmennsku hans og alla ákvarðanatöku. Hann náði að vísu að byggja upp örlítið betra tafl í byrjun tafls en þegar peðameirihluti hans á kóngsvæng þokaðist áfram missti sú atlaga marks því að kóngur Karjakins hafði áður tekið á sig ferðalag yfir á drottningarvænginn, þar sem fyrir var skjól gott. Aðdáendum norska heimsmeistarans var ljóst að þeirra maður var að leika sér að eldinum; peðsleikir hans afhjúpuðu nefnilega ákveðna veikleika í eigin kóngsstöðu og hann virtist ekki einu sinni vera með tímamörkin við 40. leik á hreinu. Skyndilega fékk Karjakin fyrsta tækifæri sitt til að tefla sigurs:

New York 2016; 5. einvígisskák:

Magnús Carlsen – Sergei Karjakin

42. ... d4!

Gefur peð en vinnur d5-reitinn fyrir biskupinn.

43. Dxd4!?

„Vélarnar“ voru á því að þetta væri ónákvæmni en ekkert hefur sannast í þeim efnum.

43. ... Bd5!?

43. .. Hh8 virtist betra, en hvítur getur bjargað sér með 44. De4! Dh6 45. Kf1 Dh1+ 46. Ke2 þó að svarta staðan sé áfram vænleg eftir 46. ... Bd5.

44. e6!

Geldur í sömu mynt og opnar línur.

44. ... Dxe6 45. Kg3 De7 46. Hh2! Df7 47. f4 gxf4+ 48. Dxf4 De7 49. Hh5! Hf8 50. Hh7 Hxf4 51. Hxe7 He4

Knýr fram hrókakaup og steindautt jafntefli.

Í gærkvöldi kl. 19 hófst svo baráttan aftur. Aftur varð jafntefli, eftir aðeins 32 leiki, og báðir virtust þreyttir. „Skyldan“ býður stjórnanda hvíta liðsaflans að reyna að tefla til vinnings undir þessum kringumstæðum en Karjakain var greinilega sáttur við skiptan hlut.

Í „hálfleik“ hefur því öllum skákunum sex lokið með jafntefli, sem er auðvitað fullmikið af því góða en þó ekki met í heimsmeistaraeinvígjum; Karpov og Kortsnoj gerðu jafntefli í fyrstu sjö skákum sínum í Baguio á Filippseyjum árið 1978 og Kasparov og Anand hófu PCA-heimsmeistaraeinvígi sitt í New York árið 1995 með átta jafnteflum. Ekkert skorti á dramatík í lokakafla þessara einvígja og það mun draga til tíðinda á næstu dögum í heimsborginni. Leikir í gærkvöldi gengu þannig fyrir sig:

New York 2016; 6. einvígisskák:

Sergei Karjakin – Magnús Carlsen

Spænskur leikur

1. e4 e5 2. Rf3 Rc6 3. Bb5 a6 4. Ba4 Rf6 5. O-O Be7 6. He1 b5 7. Bb3 O-O 8. h3 Bb7 9. d3 d5 10. exd5 Rxd5 11. Rxe5 Rd4 12. Rc3 Rb4 13. Bf4 Rxb3 14. axb3 c5

Endurbót Magnúsar. Áður hefur verið leikið 14. ... Rd5 eða 14. ... f6.

15. Re4 f6 16. Rf3 f5 17. Reg5 Bxg5 18. Rxg5 h6 19. Re6 Dd5 20. f3 Hfe8 21. He5 Dd6

22. c3

Sem fyrr er Karjakin sáttur við jafntefli. Hann gat reynt 22. He2 Dd7 23. Rc7 Hxe2 24. Dxe2 Hc8 25. He1!? þó að svartur geti varist með 25. ... Dd4+! 26. De3 Rxc2 o.s.frv. Nú verður staðan afar jafnteflisleg með mislitum biskupum.

22. ... Hxe6 23. He6 Dxe6 24. cxb4 cxb4 25. Hc1 Hc8 26. Hxc8 Dxc8 27. De1 Dd7 28. Kh2 a5 29. De3 Bd5 30. Db6 Bxb3 31. Dxa5 Dxd3 32. Dxb4 Be6

- Jafntefli.

Sjöunda skákin verður tefld á morgun, sunnudag.

Grein þessi birtist í Morgunblaðinu 19. nóvember 2016

Skákþættir Morgunblaðsins

Skákþættir Morgunblaðsins | Breytt 20.11.2016 kl. 14:12 | Slóð | Facebook | Athugasemdir (0)

24.11.2016 | 20:00

Skákþáttur Morgunblaðsins: Magnús Carlsen nær ekki að brjóta niður varnir Karjakins

Ég hef aldrei haft mikla trú á varnargirðingum,“ sagði Magnús Carlsen eftir að fjórðu skákinni í heimsmeistaraeinvíginu í New York gegn Sergei Karjakin lauk rétt eftir miðnætti í gær með jafntefli eftir 94 leiki í gær. Samt tókst honum ekki að brjóta niður þann varnarmúr sem Karjakin reisti eftir að hafa farið halloka í byrjun tafls og mátti eftir það verjast í óhagstæðu endatafli þar sem Magnús naut biskupaparsins í þess konar stöðu sem honum tekst yfirleitt að leiða til lykta með sigri. Í þriðju skákinni lét Norðmaðurinn einnig upplögð vinningsfæri ganga sér úr greipum. Fyrstu fjórum skákunum hefur því lokið með jafntefli en á dagskrá eru 12 skákir, helmingi færri en í heimsmeistaraeinvígjum áranna 1951-'72 og 1985-'93 . Verði jafnt munu viðureignir með styttri umhugsunartíma ráða því hvort Magnús Carlsen haldi titlinum eða Rússar eignist heimsmeistara að nýju.

Karjakin hefur reynst erfiðari viðureignar en margir bjuggust við. Til samanburðar má geta þess að Indverjanum Wisvanathan Anand tókst ekki að vinna nema eina skák í þeim tveim einvígjum sem hann háði við Magnús árin 2013 og 2014 en samtals tefldu þeir 21 skákir. Karjakin virðist gera sér jafntefli að góðu í hverri skák en er líklegur til að skipta um takt á lokasprettinum þegar spennan og álagið á keppendur mun aukast. Norskir fjölmiðlar eru ekki alls kostar ánægðir með sinn mann og þarlendir sérfræðingar sem kallaðir hafa verið til telja að Magnús tefli undir getu. Fyrstu tvær skákirnar þóttu fremur daufar en tvær þær síðustu hafa haldið athygli skákáhugamanna fanginni klukkustundum saman um allan heim. Í þeirri þriðju, maraþon-viðureign sem stóð í næstum sjö klukkkustundir, virtist sigurinn blasa við Magnúsi þegar hér var komið sögu:

New York 2016; 3. einvígisskák:

Magnús Carlsen – Sergei Karjakin

72. Hb7??

Hann gat unnið með því að virkja kónginn, 72. Hf7+!, t.d. 72. ... Ke4 73. Kg4! Ha1 74. Rc6 og vinnur.

72. ... Ha1! 73. Hb5+

Eftir 73. Rc4 h3! er svartur sloppinn.

73. ... Kf4 74. Hxb4+

Vandinn er sá að 74. Kxh4 er svarað með 74. ... Hh1 mát!

74. ... Kg3! 75. Hg4+ Kf2 76. Rc4 h3 77. Hh4 Kg3 78. Hg4+ Kf2

Jafntefli.

Sl. þriðjudag sat Karjakin í leiðindastöðu lengi vel. Hann taldi að varnir gætu vart haldið næði Magnús að finna bestu áætlunina:

New York 2016; 4. einvígisskák:

Sergei Karjakin – Magnús Carlsen

45. ... f4?

„Ég loka,“ er yfirlýsingin sem fylgir þessum leik. Carlsen varð starsýnt á b3-reitinn fyrir kónginn en frábæra vinningsmöguleika var að hafa með 45. .. Be6! því hvítur neyðist fyrr eða síðar til að skipta upp á f5 og þá opnast leiðir fyrir svarta kónginn.

46. Bd4! Bc7 47. Rf2!

Setur upp varnargirðingu. Magnús hélt með kónginn til b3 – og raunar til a2 síðar – en hvíti kóngurinn varðist þá frá c1-reitnum. Enga glufu var að finna í þessari þvergirðingu hins „nýja varnarmálaráðherra Pútíns“ eins og einhver kallaði Karjakin eftir skákina. Jafntefli var samið eftir 94 leiki.

Fimmta einvígisskákin er á dagskrá í kvöld og hefst kl. 19 að íslenskum tíma og hefur Magnús hvítt. Hægt er að fylgjast með á ýmsum vefsvæðum, t.d. Chess24, ICC og Chess.bomb svo dæmi séu tekin.

Grein þessi birtist í Morgunblaðinu 17. nóvember 2016

Skákþættir Morgunblaðsins

Skákþættir Morgunblaðsins | Breytt 20.11.2016 kl. 13:17 | Slóð | Facebook | Athugasemdir (0)

19.11.2016 | 20:00

Skákþáttur Morgunblaðsins: Líkur á jafntefli í fyrstu einvígiskák Carlsen og Karjakin

Fyrsta einvígisskák norska heimsmeistarans Magnúsar Carlsen og Rússans Sergei Karjakin hófst í New York í gær kl. 19 að íslenskum tíma. Skákinni var ekki lokið þegar þetta var ritað í gærkvöldi en hér að neðan birtist viðureignin fram að þeim tíma en jafntefli blasti þá við. Þetta kemur ekki á óvart því í fyrstu skák margra slíkra er eins og keppendur séu að þreifa fyrir sér og venjast aðstæðum.

Strax í byrjun reyndi Magnús að koma Karjakin á óvart með því að velja byrjunarleið sem þótti minna á sigurvegara bandarísku forsetakosninganna, Trompovsky- byrjun. Hann kom ekki að tómum kofanum hjá andstæðingi sínum sem jafnaði taflið án teljandi erfiðleika en reyndi ekki að nýta sér þau færi sem buðust og var greinilega sáttur við jafntefli. Magnús náði forskoti á skákklukkunni en eftir drottningaruppskipti og enn meiri uppskipti virtist ekki eftir miklu að slægjast. Skákinni var ekki lokið þegar greinarhöfundur skildi við þá félaga.

Þeir munu tefla 12 skákir og verði þá jafnt verður gripið til skáka með styttri umhugsunartíma. Tímamörk eru 100 mínútur á mann fyrir fyrstu 40 leikina, 50 mínútur fyrir næstu 20 leiki og eftir það 15 mínútur á skákina allt til loka, 30 sekúndur bætast við tímann eftir hvern einasta leik. Önnur einvígisskákin fer fram í dag og hefst kl. 19 að íslenskum tíma, frí á morgun og svo eru tefldar tvær skákir, aftur frídagur og svo tvær skákir og þannig koll af kolli. 12. skákin er á dagskrá þann 28. nóvember.

Leitað eftir aðstoð Microsoft

Þó að Magnús Carlsen sé talinn mun sigurstranglegri eru fræðimenn ýmsir fljótir að benda á nokkur einvígi í sögu heimsmeistarakeppninnar þar sem „minnipokamaðurinn“ hefur staðið uppi sem sigurvegari. Helsta von Karjakins liggur á sviði byrjana en þar þykir hann beittari en Carlsen sem gerir sér far um að sneiða hjá alfaraleiðum.

Sálfræðiþátt þessarar baráttu má ekki vanmeta og Rússarnir kunna ýmislegt fyrir sér á því sviði. Gamall vinur Magnúsar, rússneski stórmeistarinn Jan Nepomniahctchi, sigurvegari á minningarmótinu um Tal á dögunum, var í liði heimsmeistarans í Sochi fyrir tveim árum en er að sögn kominn yfir í herbúðir Karjakin. Á blaðamannafundi sl. fimmtudag kvaðst Magnús ekki hafa áhyggjur af vistaskiptum Nepo. Hann hefur hinsvegar leitað eftir aðstoð hjá Microsoft til að girða fyrir þann möguleika að Rússarnir komist yfir gögn sem varða undirbúning hans fyrir einvígið. Tortryggni vegna ólöglegrar notkunar á hugbúnaði á meðan skák stendur yfir komst í hámæli þegar Topalov og Kramnik háðu heimsmeistaraeinvígi sitt í Elista í Kalmykíu árið 2006. Í dag mega skákmenn ekki koma með snjallsíma á skákstað og armbandsúr eru líka á bannlista. Fjölmörg svindlmál hafa komið upp undanfarið og FIDE hefur neyðst til að auka mikið við regluverk sitt.

New York hefur áður verið vettvangur heimsmeistaraeinvígis; Kasparov og Anand tefldu um PCA-heimsmeistaratitilinn á 107. hæð World trade center haustið 1995. Einvígið fer nú fram í Fulton-Market byggingunni á Manhattan í grennd við Wall Street og steinsnar frá Brooklyn-brúnni sem liggur yfir í þann hluta heimsborgarinnar sem ól upp frægasta skákmann Bandaríkjanna, Bobby Fischer.

Aðalskipuleggjandi einvígisins í New York er Agon, fyrirtæki sem staðið hefur fyrir skákviðburðum á borð við heimsmeistarakeppnina í hraðskák og atskák. Agon mun láta reyna á einkarétt sinn vegna útsendinga frá einvíginu og kynnir nýjar lausnir þar sem áskrifendur eru mataðir með ólíklegustu upplýsingum til viðbótar við útreikninga „skákvélanna“. Skákmeistararnir eru jafnframt í nærmynd meðan á hverri viðureign stendur. Skákin í gær gekk þannig fyrir sig:

HM-einvígið New York 2016; 1. einvígisskák:

Magnús Carlsen – Sergei Karjakin

Trompowsky-byrjun

1. d4 Rf6 2. Bg5 d5 3. e3 c5 4. Bxf6 gxf6 5. dxc5 Rc6

(Kramnik lék 5....e6 gegn Magnúsi á minningarmótinu um Tal árið 2013.)

6. Bb5 e6 7. c4 dxc4 8. Rd2 Bxc5 9. Rgf3 0-0 10. 0-0 Ra5 11. Hc1 Be7 12. Dc2 Bd7?!

(Hvassara var 12....a6 og svarta staðan er síst lakari.)

13. Bxd7 Dxd7 14. Dc3 Dd5 15. Rxc4 Rxc4 16. Dxc4 Dxc4 17. Hxc4 Hfc8 18. Hfc1 Hxc4 19. Hxc4 Hd8 20. g3

(Bíður áttekta. Flestir áttu von 20. g4 eða 20. Kf1.)

20.... Hd7 21. Kf1 f5 22. Ke2 Bf6 23. b3 Kf8 24. h3 h6 25. Re1

(Riddarinn er á leið til d3 þar sem hann stendur vel.)

25....Ke7 26. Rd3 Kd8 27. f4 h5 28. a4 Hd5

Þetta var staðan eftir þriggja klst. taflmennsku. Karjakin átti ekki að vera í neinum vandræðum að ná jafntefli.

Grein þessi birtist í Morgunblaðinu 12. nóvember 2016

Skákþættir Morgunblaðsins

Skákþættir Morgunblaðsins | Breytt 20.11.2016 kl. 01:18 | Slóð | Facebook | Athugasemdir (0)

12.11.2016 | 20:00

Skákþáttur Morgunblaðsins: Dagur og Vignir Vatnar unnu "Uppsala young champions"

Dagur Ragnarsson og Vignir Vatnar Stefánsson sigruðu á alþjóðlegu unglingamóti sem fram fór í Uppsölum í Svíþjóð "Uppsala young champions" og lauk á miðvikudaginn. Þeir hlutu báðir 6½ vinning af níu mögulegum en Dagur var ½ stigi ofar og hreppti því gullverðlaunin. Mótið var eins og nafnið bendir til skipað ungum skákmönnum undir tvítugu og voru keppendur 20 talsins þar af 16 Svíar, þrír Íslendingar en stigahæsti keppandinn var frá Finnlandi. Oliver Aron Jóhannesson var í lokaumferðinni í færum til að lenda einn í 3. sæti en missti þráðinn í betri stöðu og tapaði. Hann hlaut 5 vinninga og varð í 8.-9 sæti. Íslands-tengingin nær aðeins lengra þar sem einn af skipuleggjendum mótsins var Guðmundur Sverrir Þór sem býr í Svíþjóð og er þekktur skákdómari. Tefldar voru níu umferðir á sex dögum en tímamörk voru 90 30.

Dagur og Vignir Vatnar bættu báðir duglega við stigatölu sína og á næsta lista verður Vignir sem er aðeins 13 ára væntanlega kominn með í kringum 2.350 elo-stig.

Dagur náði forystunni snemma og hélt henni allt til loka. Hann fór illa að ráði sínu með gjörunnið tafl gegn Svíanum Martin Jogstad í 3. umferð en í 8. umferð slapp hann með skrekkinn í tapaðri stöðu gegn Finnanum Toivo Keinänen. Þessu var ekki ólíkt farið með Vigni Vatnar sem oft komst í 'ann krappan og flýtti sér stundum of mikið. Lokadaginn hefði hann getað náð efsta sæti einn en missti unna stöðu niður í jafntefli í fyrri skákinni af tveimur sem tefldar voru þann dag.

Mótið er ágæt vísbending um styrkleika okkar yngstu skákmanna en sænskir skákmenn hafa alltaf verið þéttir fyrir. Ungir skákmenn eiga það til að fyllast vonleysi þegar þeir sitja andspænis mun stigahærri andstæðingi. Vænlegra til árangurs er að líta á slíkt stigabil sem áskorun og það gerði Vignir Vatnar þegar hann mætti stigahæsta keppanda mótsins í upphafi móts:

2. umferð:

Toivo Kainänen – Vignir Vatnar Stefánsson

Enskur leikur

1. c4 e5 2. g3 h5!?

Hrauslega leikið í anda Ungverjans Rapport. Finninn gerir enga tilraun til að stöðva för h-peðsins.

3. Rc3 Rc6 4. Rf3 Bc5 5. d3 Rge7 6. Bg2 d6 7. a3 a5 8. 0-0 Rg6 9. Hb1 h4 10. Bg5? f6 11. Bxh4 Bg4!

Biskupinn getur sig hvergi hrært á h4 og svartur vinnur peðið til baka.

12. Re4 Bxf3 13. Bxf3 Rxh4 14. gxh4 f5! 15. Rg5

Þvingað þar sem 15. Rxc5 er svarað með 15.... Dxh4! o.s.frv.

15.... Hxh4 16. Re6 De7 17. Bd5 Rd8 18. Rxc5 Dg5+ 19. Bg2 dxc5 20. e3 Re6 21. Df3 Ke7 22. h3 Hah8 23. Dg3 Df6 24. f4

Svartur er búinn að hlaða liðsafla sínum á kóngsvænginn og hótaði 24.... f4 en þessi leikur gerir illt verra.

24.... exf4 25. exf4 Dd4+ 26. Kh1 Rxf4 27. Hbe1+ Kf6!

Þarna stendur kóngurinn ágætlega.

28. Hf3 Hxh3+

Einfaldara var sennilega 28.... Hg4! en þetta vinnur líka.

29. Bxh3 Hxh3+ 30. Dxh3 Rxh3 31. Hxh3 Dxb2 32. Hhe3 Db6 33. He8 Dd6 34. H8e3 c6 35. Hb1 Dd4 36. Hg3 f4 37. Hh3 Dd7 38. Kh2 g5 39. Hg1 g4 40. Hh4 Kg5 41. Hh8 g3 42. Kg2 Dxd3 43. Hg8+ Kf6 44. Hf8+ Ke7 45. Hxf4 Dd2+ 46. Kf3 Df2+

– og hvítur gafst upp.

Guðmundur fimmti á NM

Guðmundur Kjartansson vann í lokaumferð Skákþings Norðurlanda sem lauk í Finnlandi um síðustu helgi. Guðmundur hlaut 5 vinninga af níu mögulegum og endaði í 5. sæti.

Grein þessi birtist í Morgunblaðinu 5. nóvember 2016

Skákþættir Morgunblaðsins

Skákþættir Morgunblaðsins | Breytt s.d. kl. 20:23 | Slóð | Facebook | Athugasemdir (0)

5.11.2016 | 20:00

Skákþáttur Morgunblaðsins: Hitað upp fyrir heimsmeistaraeinvígi

Guðmundur Kjartansson og Einar Hjalti Jensson eru fulltrúar Íslands í efsta flokki Skákþings Norðurlanda sem stendur yfir þessa dagana í Sastamala í Finnlandi. Mótið fer fram í þrem flokkum þar af tveimur öldungaflokkkum, 50 ára og eldri og 65 ára eldri. Í síðarnefnda flokknum tefla tveir Íslendingar, Gunnar Finnlaugsson og Sigurður H. Jónsson.

Í efsta flokki tefla 10 skákmenn og er Norðmaðurinn Jon Ludwig Hammer stigahæstur. Guðmundur Kjartansson gerir nú atlögu að 2.500 elo-stiga „múrnum „ en með því uppfyllir hann þau skilyrði sem til þarf til að hljóta útnefningu FIDE sem stórmeistari. Hann tapaði fyrir Svíanum Blomqvist í 6. umferð og er um miðjan hóp keppenda. Staðan efstu manna þegar þrjár umferðir eru eftir:

1. Erik Blomqvist 5 v. (af 6 ) 2.-3. Jon Ludwig Hammer og Martin Percivaldi 4½ v. 4. Axel Smith 4 v. 5.-6. Guðmundur Kjartansson og Mikla Kartunen 3 v.

Besta skák Guðmundar kom í 4. umferð:

NM 2016:

Johan Salomon – Guðmundur Kjartansson

Vængtafl

1. c4 e6 2. g3 d5 3. Bg2 Rf6 4. Rf3 Be7 5. 0-0 0-0 6. b3 c5 7. Bb2 Rc6 8. e3 d4 9. exd4 cxd4 10. He1 He8 11. Re5?!

Í þessari byrjun sem vel mætti kalla Benony-vörn með skiptum litum er sennilega affararsælast að fara sér hægt, 11. d3 var traustara.

11.... Rxe5 12. Hxe5 Rd7 13. He1 e5 14. Ba3 a5 15. d3 Bxa3 16. Rxa3 Rc5 17. Bd5 Bf5 18. Df3 Dd7 19. Had1

Smá leikbrella sem svartur fellur ekki fyrir, 19... Bg4? er vitanlega svarað með 20. Bxf7+! o.s.frv.

19.... He7 20. Hd2 Bg4 21. Dg2 Kh8 22. f3 Be6 23. Bxe6 Hxe6 24. Rc2 f5 25. b4

Þessi leikur skilar ekki neinu en það er erfitt að finna einhverja áætlun.

25.... axb4 26. Rxb4 b5 27. Hc2 e4 28. fxe4 fxe4 29. cxb5 Dxb5 30. Hec1 He5!

Heldur spennunni í stöðunni. Einnig var hægt að leika 30.... Rxd3 en eftir 31. a4! Dxb4 32. Hc8+ He8 33. Hxa8 Hxa8 34. Dxe4 á hvítur góða möguleika á jafntefli.

31. Hc4 Hae8 32. dxe4 Hxe4

Gengur beint til verks , 33. Hxc5 strandar á 33.... He1+ og vinnur en nú gat hvítur varist með 33. Df1! þar sem drottningin valdar d3-reitinn.

33. Df2 d3! 34. Hxe4

Eða 34. dxc5 Dxc5 35. Hxc5 d2 o.s.frv.

34.... Rxe4 35. Dd4 d2 36. Hf1

36.... Rxg3!

Lagleg lokaflétta.

37. hxg3 Dxf1+ 39. Kxf1 He1+ 40. Kf2 d1(D)

– og hvítur gafst upp.

Magnús Carlsen vann Nakamura á netinu

Heimsmeistaraeinvígi Magnúsar Carlsen og Sergei Karkain hefst í New York 11. nóvember nk. Bandaríkjamenn höfðu vonast eftir að mótstöðumaður Norðmannsins yrði annaðhvort Hikaru Nakamura eða Fabiano Caruana en það fór á annan veg og í áskorendakeppninni í vor sigraði Rússinn/Úkraínumaðurinn Sergei Karjakin.

Magnús hitaði upp fyrir stóra slaginn með hraðskákeinvígi við Nakamura sem fram fór sl. fimmtudag. Fyrirkomulagið var með óvenjulegum hætti; þeir voru báðir í mynd en sátu ekki augliti til auglitis heldur fyrir framan tölvu á hótelherbergi og tefldu á netinu alls 25 skákir. Í fyrsta hluta voru tefldar hraðskákir 5 2 og vann Magnús 5½:3½. Hann hafði einnig betur í næsta kafla, 5:2, en þá voru tefldar hraðskákir, 3 2. Í „bullet“ skákunum“, 1 1, voru m.a. tefldar þrjár „Fischer-random“ skákir. Þar náði Nakamura sér loksins á strik og vann 5:4. Lokaniðurstaðan var samt öruggur sigur Magnúsar, 14½:10½.

Grein þessi birtist í Morgunblaðinu 29. október 2016

Skákþættir Morgunblaðsins

Skákþættir Morgunblaðsins | Breytt s.d. kl. 20:02 | Slóð | Facebook | Athugasemdir (0)

29.10.2016 | 20:00

Skákþáttur Morgunblaðsins: Ingvar vann haustmótið – Vignir Vatnar skákmeistari TR

Ingvar Þ. Jóhannesson sigraði á haustmóti Taflfélags Reykjavíkur sem lauk um síðustu helgi. Ingvar hlaut 7 vinninga af níu mögulegum og var ½ vinningi fyrir ofan næsta mann, Dag Ragnarsson. Ingvar var vel að sigrinum kominn. Hann var talinn sigurstranglegastur fyrir mótið, náði strax forystu og hélt henni til loka. Þar sem hvorki Ingvar né Dagur eru félagsmenn í TR gátu þeir ekki unnið sæmdarheitið skákmeistari TR 2016 og hinn nýi handhafi þess titils er yngsti þátttakandinn í A-riðli, Vignir Vatnar Stefánsson. Vignir sem er 13 ára gamall er nú með 2300 elo-stig. Leita þarf aftur til ársins 1986 til að finna svo ungan meistara en það ár varð Þröstur Árnason skákmeistari Reykjavíkur eftir harða keppni við Hannes Hlífar Stefánsson og Héðin Steingrímsson. Lokaniðurstaðan í A- riðli:

1. Ingvar Þ. Jóhannesson 7 v. (af 9) 2. Dagur Ragnarsson 6 ½ v. 3. Vignir Vatnar Stefánsson 6 v. 4. – 5. Þorvarður Ólafsson og Jón Trausti Harðarson 5 v. 6. – 7. Oliver Aron Jóhannesson og Björgvin Víglundsson 4 ½ v. 8. Hrafn Loftsson 3 ½ v. 9. Gauti Páll Jónsson 2 v. 10. Birkir Karl Sigurðsson 1 v.

Hinn nýi skákmeistari TR komst nokkrum sinnum í hann krappan en var seigur í verri endatöflum, t.d. í maraþonskák við Dag Ragnarsson í sjöttu umferð sem hafði talsverð áhrif á lokaniðurstöðuna:

Vignir – Dagur

Dagur lék nú 70. ... Ke7 en hefði betur gefið gaum peðsendataflinu sem kemur upp eftir 70. ... Rxb5 71. cxb5 Kg5! 72. Kf3 Kh5! og vinnur. Hinn möguleikinn var 71. axb5 en þá er komin upp staða þar sem svartur hefur valdað frípeð og vinnur eftir 71. ... Ke7 o.s.frv.

Þó að staða Vignis væri áfram slæm náði hann að snúa taflinu sér í vil en þó var ekkert meira en jafntefli að hafa í stöðunni sem kom upp eftir 100 leiki:

Vignir – Dagur

Svartur heldur jafntefli með 100. ... Rc5, 100. ... Rc3 eða 100. ... Rd6. Hann lék hinsvegar ...

100. ... Rd2??

og eftir ...

101. Ke6! Re4

102. c7+!

... mátti hann gefast upp því að 102. ... Kxc7 er svarað með 103. Ke7 og d-peðið verður að drottningu.

Í B- riðli haustmótsins sigraði Aron Thor Mai glæsilega, hlaut 7 ½ vinning af níu mögulegum og vinnur sér þar með keppnisrétt í A-riðli á næsta ári. Hörður Aron Hauksson varð í 2. sæti og Steinunn Veronika Magnúsdóttir í 3. sæti. Í Opna flokknum sigraði Ólafur Evert Úlfsson með fullu húsi vinninga, hlaut 9 vinninga af níu mögulegum.

Bræðurnir Aron Thor og Alexander tefldu báðir í B-riðli. Þeir hafa margt til brunns að bera, sá eldri teflir og þekkir hvassar byrjanir býsna vel eins og Magnús Kristinsson fékk á að kenna í 5. umferð:

Aron Thor Mai – Magnús Kristinsson

Sikileyjarvörn

1. e4 c5 2. Rf3 Rf6 3. Rc3 d6 4. d4 cxd4 5. Rxd4 g6 6. Be3 Bg7 7. f3 Rc6 8. Dd2 O-O 9. g4 Bd7 10. h4 h5 11. O-O-O Hc8 12. Kb1 hxg4 13. h5 Re5

14. Bh6?

Eðlilegasti leikurinn en „stungan“ 14. h6! vinnur, 14. ... Bh8 15. h7+! Rxh7 16. Dh2! o.s.frv.

14. ... gxf3 15. Bxg7 Kxg7 16. hxg6 fxg6 17. Rd5 Hh8 18. Hxh8 Dxh8 19. Rxe7 He8 20. Rd5 Dh4 21. Db4 Rxe4 22. Bd3 Kh6??

Á h-línunni er ekkert skjól. Svartur var sloppinn og gat unnið með 22. ... a5! 23. Dxa5 Rf2! o.s.frv.

23. Bxe4 Dxe4 24. Hh1+ Kg5 25. Dd2+ Kg4 26. Re3+ Kg5 27. Rd5+ Kg4 28. Rf6+

- og svartur gafst upp.

Grein þessi birtist í Morgunblaðinu 22. október 2016

Skákþættir Morgunblaðsins

Skákþættir Morgunblaðsins | Breytt s.d. kl. 20:01 | Slóð | Facebook | Athugasemdir (0)

22.10.2016 | 20:00

Skákþáttur Morgunblaðsins: Ingvar Þór Jóhannesson efstur á haustmóti TR

Skoski leikurinn er valkostur sem hvítur hefur eftir tvo hefðbundna kóngspeðsleiki, 1. e4 e5 2. Rf3 Rc6 og nú kemur sá skoski, 3. d4. Lengi vel þótti þessi leikaðferð ekkert sérlega vænleg til árangurs eða þar til Kasparov tók af skarið í fimmta heimsmeistaraeinvígi sínu við Karpov í New York og Lyon árið 1990 og beitti skoska leiknum í fyrsta skipti á ferlinum. Sumir hafa haldið því fram að hann hafi þá verið búinn að kynna sér viðureignir helstu bréfskákmanna heims. Hann vann altént mikilvægan sigur og síðan einvígið. Síðan þá hafa margar hugmyndir komið fram og í efsta flokki haustmóts Taflfélags Reykjavíkur sem nú stendur yfir sást nýstárlegt bragð sprottið upp úr skoska leiknum:

Haustmót TR 2016; 2. umferð:

Þorvarður Ólafsson – Björgvin Víglundsson

Skoskur leikur

1. e4 e5 2. Rf3 Rc6 3. d4 exd4 4. Rxd4 Bc5 5. Be3 Df6 6. Rb5!?

Sjaldséður leikur og stórhættulegur ef svartur er ekki vel með á nótunum.

6. ... Bxe3 7. fxe3 Dh4+

Liggur beinast við en öruggast er 7. ... Dd8 8. Dg4 g6 o.s.frv.

8. g3 Dxe4 9. Rxc7+ Kd8 10. Rxa8 Dxh1 11. Dd6 Rf6 12. Rd2 Dd5

Liggur beinast við en 12. ... Re8 kom einnig til greina.

13. Dc7+ Ke7

14. O-O-O! Dxa2?

Tapleikurinn. Eftir 14. ... Dc5! getur svartur varist.

15. Rb3! He8 16. Dd6+ Kd8 17. Dc7+ Ke7 18. Dd6+ Kd8 19. Bb5 Re4 20. Dc7+ Ke7 21. Hd5!

Laglegur lokahnykkur. Björgvin gafst upp því hann sá fram á að 21. ... Kf8 er svarað með 22. Bxc6 bxc6 23. Ha5! og drottningin fellur.

Í A-riðli haustmótsins vekur frammistaða hins 13 ára Vignis Vatnars mesta athygli en hann er í 2. sæti eftir þrjá sigra í röð, á inni myndarlega stigahækkun og verður væntanlega með í kringum 2300 elo-stig á næsta lista FIDE. Hann tekur þátt í opnu alþjóðlegu móti í Uppsala í Svíþjóð í lok mánaðarins ásamt þeim Degi Ragnarssyni og Oliver Aron Jóhannessyni. Telja má afar líklegt að Vignir Vatnar verði skákmeistari TR í ár þar sem helstu keppinautar hans eru í öðrum skákfélögum. Staðan þegar tvær umferðir eru eftir:

1. Ingvar Þór Jóhannesson 5 ½ v. (af 7) 2. Vignir Vatnar Stefánsson 5 v. 3. Dagur Ragnarsson 4 v. 4. – 6. Oliver Aron Jóhannesson, Jón Trausti Harðarson og Björgvin Víglundsson 4 v. 7. Þorvarður Óafsson 3 ½ v. 8. Hrafn Loftsson 2 ½ v. 9. – 10. Gauti Páll Jónsson og Birkir Karl Sigurðsson 1 v.

Í B-riðli er Aron Þór Mai efstur með 5 ½ v. af sjö mögulegum og í opna flokknum er Ólafur Evert Úlfsson efstur með fullt hús, 7 vinninga af sjö mögulegum.

Nepo vann Tal-mótið

Rússneski stórmeistarinn Jan Nepomniachtchi sigraði á minningarmótinu um Mikhail Tal sem lauk í Moskvu á dögunum. Hann náði snemma forystunni og hélt henni út allt mótið. Lokaniðurstaðan varð þessi:

1. Nepomniachtchi 6 v. ( af 9) 2. Girki 5 ½ v. 3. – 4. Aronjan og Anand 5 v. 5. – 8. Svidler, Li Chao, Kramnik og Mamedyarov 4 ½ v. 9. Tomashevsky 3 ½ v. 10. Gelfand 2 v.

TR og Huginn eigast við á Sólon í dag

Úrslitaviðureign Íslandsmóts skákfélaga í hraðskák fer fram í dag og eins og við mátti búast mætast sveitir Taflfélags Reykjavíkur og Hugins í úrslitaviðureigninni. Teflt er á sex borðum, tvöföld umferð. Keppnin fer fram á 2. hæð veitingstaðarins Sólon við Bankastræti og hefst kl. 14 í dag.

Helgi Ólafsson helol@simnet.is

Grein þessi birtist í Morgunblaðinu 15. október 2016

Skákþættir Morgunblaðsins

Skákþættir Morgunblaðsins | Breytt s.d. kl. 21:07 | Slóð | Facebook | Athugasemdir (0)

15.10.2016 | 20:00

Skákþáttur Morgunblaðsins: Huginn og TR berjast um sigurinn á Íslandsmóti skákfélaga

Huginn hefur forystu eftir fyrri hluta Íslandsmóts skákfélaga sem fram fór í Rimaskóla um síðustu helgi. Tíu lið eru í efstu deild og er staðan á toppnum þessi: 1.Huginn 30 ½ v.(af 40) 2. TR 28 v. 3. Fjölnir 22 v. 4. Víkingaklúbbur 21 v. 5. TB 19 v.

Taflfélag Garðabæjar og b-sveit Skákfélags Akureyrar leiða 2. deild, í 3. deild er Skákfélag Selfoss í efsta sæti og í 4. deild leiðir b-sveit Víkingaklúbbsins.

Nokkrir kunnir meistarar náðu frábærum árangri um helgina, t.d. félagarnir úr TR, Bragi Þorfinnsson sem skilaði 4½ vinningi á 1. borði og Guðmundur Kjartansson á 2. borði með 4 vinninga. Hrannar Baldursson vann fjórar skákir fyrir skákdeild KR og Halldór Brynjar Halldórsson náði góðum úrslitum gegn stigahærri andstæðingum. Greinargott yfirlit og tölfræði ýmsa má finna á skak.is.

Viðburðarík keppni Hugins og Fjölnis

Skákdeild Fjölnis er á hraðri uppleið þessi misserin. „Rimaskóladrengirnir“ Dagur Ragnarsson, Oliver Aron Jóhannesson og Jón Trausti Harðarson, fengu 2½ vinning í sögulegri viðureign Fjölnis og Hugins í fimmtu umferð. Dagur, var hvergi banginn þegar Hannes bauð honum jafntefli á 4. borði, hafnaði og lagði síðan stómeistarann með eftirfarandi fléttu:

Hannes Hlífar – Dagur

26. ... Rf4+! 27. gxf4 exf4

– og Hannes gafst upp, 28. Hxe8 er svarað með 28. .. f3+!

Í þessari sömu umferð samdi Jón L. Árnason fljótlega jafntefli fyrir Bolvíkinga á 2. borði, gerði stuttan stans í skáksalnum og sá í sviphendingu að allt stefndi í söguleg úrslit milli Fjölnis og Hugins; Hannes Hlífar var búinn að tapa, greinarhöfundur var með tapað tafl gegn Hollendingnum Ris og Hjörvar í basli með Oliver Aron. Jón fylgdist svo með einstökum úrslitum á netinu heima hjá sér. Og þá birtist á skjánum að sá hollenski hefði beðið lægri hlut. Jón var ekki trúaður á að slíkt gæti hafa gerst og að hætti Njáls á Bergþórshvoli endurræsti i hann heimasíðu mótsins eigi sjaldnar en þrisvar sinnum: alltaf sama niðurstaðan og ekkert annað í stöðunni en að hringja í greinarhöfund og spyrja tíðinda. Á afmælismóti TV á dögunum gekk mér bærilega að fást við vígreifar drottningar. Það sama varð uppá teningnum í þessari viðureign:

Helgi Ólafsson (Huginn) – Robert Ris (Fjölnir)

Slavnesk vörn

1. c4 e6 2. Rc3 d5 3. d4 c6 4. e3 Rf6 5. Rf3 Rbd7 6. Be2 Bd6 7. b3 O-O 8. O-O b6 9. Bb2 Bb7 10. Dc2 Hc8 11. Hac1 c5 12. cxd5 cxd4 13. Rxd4 Rxd5 14. Dd2 Rxc3 15. Bxc3 Rf6 16. Bb2 Re4 17. Hxc8?

Morgunumferðir virðast kalla á svona yfirsjónir. Ég vildi forðast 17. Dd3 Hxc1 18. Bxc1 – en ekki 18. Hxc1 Bxh2+. Samt féll ég í þennan pytt!

17. ... Bxh2+! 18. Kxh2 Dh4+ 19. Kg1 Rxd2 20. Hxf8+ Kxf8 21. Hc1

Hvíta staðan er auðvitað gjörtöpuð en með því að halda nokkrum trompum geta opnast óvæntir möguleikar.

21. ... Re4 22. f3 Df2+ 23. Kh2 Dg3+ 24. Kg1 Rg5 25. Kf1 h5 26. Hd1 h4?

Tapleikurinn.

27. Rf5!

Hvað er þetta?

27. ... exf5

Ekki 27. ... Dc7 28. Be5! Dc8 29. Bxg7+ og drottningin fellur. Eini leikurinn var 27. ... Db8 þó hvítur eigi betri færi eftir 28. Be5! Da8 29. Bxg7+ Kg8 30. Bf6! o.s.frv.

28. Ba3+ Kg8 29. Bd6!

Drottningin á engan reit!

29. .. Bxf3 30. Bxf3

– og Ris gafst upp. Það sá undir iljar hans á leið út úr skáksalnum.

Helgi Ólafsson helol@simnet.is

Grein þessi birtist í Morgunblaðinu 8. október 2016

Skákþættir Morgunblaðsins

Skákþættir Morgunblaðsins | Breytt s.d. kl. 21:12 | Slóð | Facebook | Athugasemdir (0)

Færsluflokkur: Skákþættir Morgunblaðsins

Leitað eftir aðstoð Microsoft

Guðmundur fimmti á NM

Magnús Carlsen vann Nakamura á netinu

Nepo vann Tal-mótið

Viðburðarík keppni Hugins og Fjölnis

RSS-straumar

Erlendar vefsíður

Tenglar

Mót í gangi

Lykilvefir

Kennsluvefir

Íslensk taflfélög

Erlendir skákvefir

Almanök

Teflt á netinu

Færsluflokkar

Heimsóknir

Flettingar

Annað

Efni

Leita í þessu bloggi

Skákmót

Mótaáætlun SA (Prufa)

Mótaskráning

Fréttabréf SÍ

Fischer-setur

Auglýsing

Myndaalbúm

Eldri færslur

2018

2017

2016

2015

2014

2013

2012

2011

2010

2009

2008

2007

Innskráning

Innskráning: