Yfirlýsing frá Stefáni Kristjánssyni

Stefán Kristjánsson hefur sent Skák.is eftirfarandi yfirlýsingu.  

Ég gekk í raðir Taflfélags Bolungarvíkur nú nýlega vegna þess ég taldi það gott félag á uppleið með góðan móral. Ég gerði ekki skriflegan samning, hvorki varðandi peningagreiðslur né skyldur af minni hálfu. Það var munnlegt samkomulag um að TB myndi greiða fyrir mig á EM taflfélaga ef ég gæfi kost á mér. Síðastliðinn sunnudagsmorgun hringdi ég í Guðmund Daðason (liðsstjóra) og tilkynnti honum að ég teldi mig ekki geta teflt í 4. umferð ÍS þar sem ég væri undir áhrifum áfengis. Áfengið hefur reynst mér fjötur um fót síðustu ár og er ég að reyna að ná stjórn á því. 

Stjórnarmaður Taflfélags Bolungarvíkur sá ástæðu til að gera þetta tiltekna mál opinbert án þess að hafa samband við mig áður. Það finnst mér lágkúrulegt og óskiljanlegt. Í samræmi við hvernig TB hóf þetta mál á opinberum vettvangi lýk ég því hér með á opinberum vettvangi. 

Ég, Stefán Kristjánsson, segi mig úr Taflfélagi Bolungarvíkur.

Ivanov teflir fyrir TR

Rússneski stórmeistarinn, Mikhail M. Ivanov (2459), mun leiða A-sveit
Taflfélags Reykjavíkur í fyrri hluta Íslandsmóts skákfélaga sem fram
fer um næstu helgi.  Ivanov mun án nokkurs vafa vera góður liðsstyrkur
fyrir félagið í baráttunni í fyrstu deildinni.

Óttar Felix hættir í stjórn TR

Óttar Felix Hauksson hefur ákveðið að taka sér hlé frá stjórnarstörfum fyrir Taflfélag Reykjavíkur að sinni.  Björn Jónsson kemur inn í stjórn í stað Óttars og Eiríkur Björnsson tekur að sér varaformennsku.  Óttar mun eftir sem áður vera meðlimur í félaginu líkt og síðustu áratugi.

Óttar sat fyrst í stjórn T.R. á fyrri hluta níunda áratugar síðustu aldar og síðan aftur frá aldamótum til dagsins í dag.  Hann var formaður félagsins á árunum 2005-2009 en á síðasta aðalfundi lét hann af formennsku og við honum tók núverandi formaður, Sigurlaug Regína Friðþjófsdóttir, en Óttar tók við varaformennsku.

Óttar hefur verið trúr og tryggur T.R. alla sína tíð og lagt mikið af mörkum í þágu félagsins.  Stjórn Taflfélags Reykjavíkur þakkar Óttari kærlega fyrir samstarfið og vonar að hann haldi áfram að láta gott af sér leiða þó hann standi nú fyrir utan stjórnina.

Hannes Hlífar í Helli

blank_page

Íslandsmeistarinn í skák, stórmeistarinn, Hannes Hlífar Stefánsson er genginn til liðs við Taflfélagið Helli eftir tveggja ára veru í Taflfélagi Reykjavíkur. 

Hannes er stigahæstur virkra íslenskra skákmanna með 2577 skákstig og hefur oftar en ekki teflt á fyrsta borði í landsliði Íslands.   Hannes er tífaldur Íslandsmeistari í skák og er sá skákmaður sem oftast hefur hampað Íslandsmeistaratitli. 

Hannes Hlífar hefur í öll þau fjögur skipti sem Hellir hefur hampað Íslandsmeistaratitlinum leitt sveit félagsins og náði yfirleitt afar góðum árangri.  

 

Sigurður Páll í TR

Sigurður Páll Steindórsson (2216) hefur gengið í Taflfélag Reykjavíkur eftir eins árs veru í Skákdeild KR en Sigurður var þar áður í TR. 

Jóhann Hjartarson til Bolungarvíkur

Stórmeistarinn kunni Jóhann Hjartarson gekk í gær frá félagaskiptum úr Helli yfir í Taflfélag Bolungarvíkur, sem er ríkjandi Íslandsmeistari: Jóhann er stigahæsti skákmaður landsins með tæplega 2.600 Elo-stig en hann hefur mest náð 2.640 stigum árið 2003.

 

Ögmundur og Emil í Helli

Ögmundur Kristinsson (2035) og Emil Sigurðarson (1515) hafa gengið til liðs við Helli.  Ögmundur kemur úr Taflfélagi Garðabæjar en Emil úr Ungmennafélagi Laugdæla. 

Báðir voru þeir áður í félaginu og hafa snúið til baka eftir fjarveru. 

Sindri, Sigurjón og Árni Garðar gerast Goðar

Skákmennirnir Sindri Guðjónsson, Sigurjón Benediktsson og Árni Garðar Helgason, hafa gengið í skákfélagið Goðann.  Þetta er að sjálfsögðu mikið fagnaðarefni fyrir Goðann og koma þeirra í félagið styrkir félagið mikið.

 

Sindri Guðjónsson (1760) (1635 at) (1915 FIDE) ólst upp að hluta til, á Húsavík á sínum yngri árum, en hefur verið í Taflfélagi Garðabæjar. Sindri er fluttur til Bakkafjarðar í Norður-Þingeyjarsýslu. Hann mun annast skákkennslu í grunnskólanum á Bakkafirði og grunnskóla Þórshafnar í vetur.

Sindri mun tefla með Goðanum í Íslandsmóti skákfélaga í haust og þá að öllu óbreyttu á fyrsta borði í A-sveitinni.

 

Sigurjón Benediktsson (1520) (1460 at) er vel þekktur í skáklífi Þingeyinga enda var hann formaður Taflfélags Húsavíkur sáluga, um árabil. Sigurjón er nú um stundir í Noregi en er væntanlegur heim í desember. Hann mun því ekki tefla með Goðanum í fyrri hluta Íslandsmóts Skákfélaga.

Árni Garðar Helgason (0) Ætlar að draga verulega úr notkun á spilum í vetur og tefla meira enda mun skemmtilegar að tefla á æfingum og skákmótum hjá Goðanum heldur en spila Bridds. 

Sigurður Daði í TR

FIDE-meistarinn, Sigurður Daði Sigfússon (2335) er genginn til liðs við Taflfélag Reykjavíkur úr Taflfélaginu Helli.

 

Þröstur til Bolungarvíkur

Stórmeistarinn Þröstur Þórhallsson (2433) hefur gengið til við Taflfélag Bolungarvíkur en Þröstur hefur verið utan félaga síðan í vor er hann sagði sig úr Taflfélagi Reykjavíkur.