Íslandsmót stúlkna 2009 - einstaklingskeppni

Íslandsmót stúlkna 2009 - einstaklingskeppni fyrir stúlkur á grunnskólaaldri fer fram sunnudaginn 8. febrúar nk. í Salaskóla, Kópavogi og hefst kl. 13.00.

Teflt verður í tveimur flokkum:

• Fæddar 1993-1995
• Fæddar 1996 og síðar.

Tefldar verða 15 mín. skákir - umferðafjöldi fer eftir fjölda þátttakenda.

Veitt verða verðlaun í hverjum aldursflokki.

Akureyrarmótið í yngr flokkum hefst í dag

Akureyrarmótið í yngri flokkum hefst á mánudaginn 2. febrúar kl. 16.30 í Íþróttahöllinni og verður framhaldið miðvikudaginn 4. febrúar. Veitt verða þrenn verðlaun í barnaflokki, 9 ára og yngri, drengjaflokki 12 ára og yngri, unglingaflokki 15 ára og yngri og stúlknaflokki.

Tímamörk: 15 mínútur á keppenda.Q

Björn og Davíð kenna skák á Húsavík

Björn Þorfinnsson forseti skáksambands Íslands mætti galvaskur í Borgarhólsskóla á Húsavík kl 10:00 í morgun.  Björn forseti fór og leit inn í valda bekki í skólanum ásamt Halldóri Valdimarssyni skólastjóra Borgarhólsskóla og Hermanni formanni skákfélagins Goðans.

Hann færði öllum nemendum í 3. bekk bókina Skák og mát að gjöf frá skáksambandinu og síðan var efnt til fjölteflis við alla þá nemendur sem vildu.  30 krakkar mættu í fjölteflið og vann Björn sigur í öllum skákunum nema að Benedikt Þór Jóhannsson gerði jafntefli við Björn.  Fram að þessu hafði Björn unnið síðustu 230 skákir í þeim skólum sem hann hefur heimsótt að undanförnu.

Eftir hádegi var svo efnt til skákkennslu í sal Framsýnar-stéttarfélags og þangað mættu 30 krakkar frá Húsavík, Mývatnssveit og úr Reykjadal. Nú var Davíð Kjartansson einnig mættur og skiptust þeir á að kenna nemendum fram til 17:30.

Um kvöldið var svo efnt til fjölteflið fyrir fullorðna í Borgarhólsskóla, þar sem allir sem vildu gátu reynt sig við Björn. Ekki var mætingin eftir væntingum í fjölteflið því aðeins 11 öttu kappi við Björn. Davíð Kjartansson vann Björn og Smári Sigurðsson gerði jafntefli við Björn. Aðrar skákir vann Björn.

Á morgun verður kennslu framhaldið kl 10:00 og kl 13:00 verður skákmót fyrir börn og unglinga í sal Framsýnar-stéttarfélags. Myndir frá heimsókninni má sjá hér í myndaalbúmi á heimasíðu Goðans.

Heimasíða Goðans

Akureyrarmótið í yngri flokkum

Akureyrarmótið í yngri flokkum hefst á mánudaginn 2. febrúar kl. 16.30 í Íþróttahöllinni og verður framhaldið miðvikudaginn 4. febrúar. Veitt verða þrenn verðlaun í barnaflokki, 9 ára og yngri, drengjaflokki 12 ára og yngri, unglingaflokki 15 ára og yngri og stúlknaflokki.

Tímamörk: 15 mínútur á keppenda.

Glerárskóli sigraði í sveitakeppni barnaskóla á Akureyri

A-sveit Glerárskóla sigraði með yfirburðum í sveitakeppni barnaskóla sveita á Akureyri og nágrenni, hlaut 14,5 vinning af 16. Alls voru fimm sveitir með og voru tímamörk 10 mínútur á keppenda.

 

 

Lokastaðan:

1.	Glerárskóli  a	14,5 v. af 16.
2.	Glerárskóli  b	8,5
3.	Lundarskóli	6,5
4.	Glerárskóli  c	6
5.	Valsárskóli	4,5

Keppnin fór fram sl. miðvikudag.  Þetta er þriðja árið í röð sem Glerárskóli vinnur þessi keppni og hefur þar með farandbikar sem hefur verið keppt um til eignar.

Heimsókn skákskóla Íslands og verkefnisins "Skák í skólana" til Húsavíkur

Davíð Kjartansson og Björn Þorfinnsson fara í heimsókn til Húsavíkur á vegum Skákskóla Íslands og Skáksambands Íslands dagana 30.-31. janúar.  Dagskrá þeirra félaganna er sem hér segir:

Föstudaginn 30. janúar.

Kl 10:00 Davíð og Björn koma í Borgarhólsskóla og afhenda bókina Skák og Mát til allra nemenda í 3. bekk í Borgahólsskóla. Einnig munu þeir kíkja inn í nokkra aðra bekki í skólanum.

Kl 12:00.  Formleg afhending styrksins vegna verkefnisins "Skák í skólana" til Borgarhólsskóla.

Kl 13:00. Fjöltefli fyrir alla nemendur í Borgarhólsskóla, sem áhuga hafa, við FIDE meistarann  Davíð Kjartansson.  Fjölteflið fer fram í stofu 6. í Borgarhólsskóla.Kl 15:00. Skákkennsla á vegum Skákskóla Íslands og skákfélagsins Goðans í sal Framsýnar-stéttarfélags að Garðarsbraut 26. Kennslan er ætluð öllum börnum í Þingeyjarsýslu sem áhuga hafa á skák.  Kennslunni lýkur kl 17:30. 

Kl 20:30. Fjöltefli fyrir fullorðna við alþjóðlega meistarann Björn Þorfinnsson forseta skáksambands Íslands í stofu 6. í Borgarhólsskóla.                     

                            

Laugardagur 31. janúar.

Kl 10:00 : Áframhaldandi skákkennsla í sal Framsýnar-stéttarfélags.

Kl 12:00 :  Pizzu-hlaðborð fyrir þátttakendur á Veitingahúsinu Sölku á Húsavík.                

Kl 13:00 Skákmót Skákskóla Íslands fyrir börn og unglinga.Vegleg verðlaun í formi skákbókavinninga.

Fjölteflið og skáknámskeiðið er ókeypis, en pizzu-hlaðborðið kostar 1100 krónur fyrir 9 ára og yngri og 1400 krónur fyrir 10 ára og eldri.

Heimasíða Goðans

NM barnaskólasveita í Eyjum í haust?

Nú er allt útlit fyrir að Norðurlandamót barnaskólasveita fari fram í Vestmannaeyjum í september 2009.

Skáksamband Íslands hefur samþykkt beiðni TV í þessa veru, en þó eru enn ákveðin skilyrði sem þarf að uppfylla til þess að endanleg ákvörðun verði tekin.  Þau atriði verða þó ljós í marsmánuði.

Ef mótið verður haldið í Eyjum, þá er það tvímælalaust mikil lyftistöng fyrir skáklífið í Vestmannaeyjum og rétt að Grunnskólinn, Taflfélagið og bæjaryfirvöld taki höndum saman með að gera mótið sem eftirminnilegast.

Í þessu sambandi má ekki gleyma því að síðustu tvö ár hafa sveitir frá Vestmannaeyjum tekið þátt í þessu móti, fyrst í Svíþjóð og síðan á Álandseyjum, svo það ætti engum að koma á óvart að vel hafi verið tekið í beiðni TV.

Jón Kristinn Þorgeirsson Íslandsmeistari barna

Jón Kristinn Þorgeirsson frá Akureyri er Íslandsmeistari barna í skák 2009. Hann sigraði í úrslitamóti þriggja efstu á mótinu sem öll urðu jöfn að vinningum eftir hörkuspennandi og fjölmennt Íslandsmót í þessum yngsta flokki. Í öðru sæti varð Oliver Aron Jóhannesson úr Rimaskóla og Karen Eva Kristjánsdóttir í Hjallaskóla varð í þriðja sæti auk þess sem hún vann titilinn Íslandsmeistari telpna 2009.

Þeir Jón Kristinn og Oliver Aron unnu sér sæti á Norðurlandamóti í skólaskák sem fram fer í Færeyjum dagana 12. - 14. febrúar.

Nokkrar myndir frá mótinu má finna í myndaalbúmi mótsins.  Forráðamenn félaganna og foreldrar sem tóku myndir eru hvattir til að senda myndir í netfangið [e-mail]. Þegar hefur Taflfélag Vestmannaeyja sent myndir.   

Myndaalbúm mótsins

Íslandsmót barna fer fram í dag

Íslandsmót barna í skák 2009 verður haldið laugardaginn 10. janúar nk.  Öll börn 10 ára og yngri (fædd 1998 og síðar) geta verið með á mótinu.  Tefldar verða 8 umferðir, umhugsunartími 15. mín. á skák fyrir hvern keppenda. 

Mótið verður haldið í  Faxafeni 12 og hefst kl. 13.00.  Skráning:  [e-mail] - sími 568 9141 kl. 10-13 virka daga. Þátttökugjöld eru kr. 500.-

Veglegur bikar er fyrir sigurvegara mótsins og verðlaun veitt fyrir þrjú efstu sætin.  Sérstök verðlaun verða veitt þrem efstu stúlkunum í mótinu (ef a.m.k. 10 stúlkur taka þátt) og hlýtur sú efsta titilinn "Íslandsmeistari telpna 2009."  Einnig verður sigurvegurum í  hverjum aldursflokki fædd 1999 og síðar veitt sérstök verðlaun. 

Mótið er einnig úrtökumót vegna Norðurlandamóts í skólaskák - einstaklingskeppni 2009 sem fram fer í Færeyjum dagana 12. - 15. febrúar nk. og gefur tvö sæti á því móti.

Áramótanámskeið Skákskóla Íslands á Akureyri

Afráðið hefur verið að hefðbundið áramóta-námskeið Skákskóla Íslands fari fram á Akureyri dagana 16. - 18. janúar nk. Miðast námskeiðshaldið við þarfir drengja og stúlkna á Norðurlandi. Það er haldið í samstarfi við Skákfélag Akureyrar í húsakynnum félagsins.

Barna- og unglinganámskeiðið verður með hefðbundnum hætti. Það hefst laugardaginn 17. janúar kl. 11 stundvíslega og stendur til kl. 16 með matarhléi kl. 12 og kaffihléi um kl. 15. Sunnudaginn 18. janúar hefst námskeiðið kl. 10 og stendur með stuttum hléum til kl. 16.

Aðalkennari verður Helgi Ólafsson stórmeistari og skólastjóri Skákskóla Íslands.

Þar sem listi yfir væntanlega þátttakendur liggur ekki fyrir sendum við þér ramma yfir dagskrá námskeiðsins. Gert er ráð fyrir skiptingu eftir aldri en gera má ráð fyrir að styrkleiki þátttakenda ráðist af einhverju leyti af aldri þeirra.

Föstudagur 16. janúar

Kl. 20 - 22. Æfing fyrir bestu ungu skákmenn Akureyringa

Laugardagur 17. janúar:

Kl. 11-12. Kennsla.

Kl. 12- 13. Hádegisverður fyrir alla þátttakendur.

Kl. 13 - 15. Kennsla.

Kl. 15 - 15.30. Kaffitími.

Kl. 15.30 - 16.30. Skákmót beggja flokka.

Kl. 17. - 19. Æfing fyrir bestu ungu skákmenn Akureyringa

Sunnudagur 18. janúar.

Kl. 10-12. Kennsla.

Kl. 12 - 13. Hádegisverður fyrir alla þátttakendur

Kl. 13 - 15. Kennsla

Kl. 15-15. 30. Kaffitími.

Kl. 15.3-16.30. Skákmót og verðlaunaafhending.

Kl 20 - 23. Klukkufjöltefli við bestu skákmenn Norðlendinga.