Skák.is

Færsluflokkur: Íslenskar skákfréttir

11.9.2010 | 17:13

Bent Larsen

Skák.is barst eftirfarandi minningargrein um Bent Larsen frá Gunnari Finnlaugssyni.

Skákkonungurinn og mannlífsriddarinn Bent Larsen er horfinn af skákborði lífsins. Auk þess að vera afburða skákmaður var hann einnig skemmtilegur fyrirlesari, ásamt því að vera afkastamikill og góður skákblaðamaður.

Eitt af því fyrsta sem ég man eftir var skákeinvígi Friðriks og Larsens í byrjun árs 1956. Þá var Larsen „vondi strákurinn" og tók Norðurlandatitilinn af skákgoði okkar Íslendinga, Friðrik Ólafssyni. Þeir voru góðir kunningjar, en friðsemi og vingjarnlegheit voru þeim fjarri þegar barist var á skákborðinu. Þessir tveir heiðursmenn hafa auðgað skákmenningu Norðurlanda í meira en hálfa öld!

Ég kynntist Larsen lítillega haustið 1989 í Holstebro í Danmörku. Þá fór fram aukakeppni um sæti í millisvæðamóti milli Margeirs, Yrjölä og Larsens. Sem nýbakaður formaður í Malmö Schacksällskap fékk ég þá hugmynd að fá Larsen til Málmeyjar. Hann tók vel í mína málaleitun og seinna um haustið kom hann, tefldi klukkufjöltefli, fjöltefli og hélt fyrirlestur við mikla hrifningu skákáhugamanna hér á Skáni. Mér er það sérstaklega minnisstætt hve auðvelt var að ná samkomulagi við hann um þóknun og annað varðandi heimsóknina.

Vinur minn Lars Grahn í Málmey gaf út Schacknytt í um það bil tvo áratugi. Draumur hans var að fá Larsen til að skrifa reglulega. Sá draumur rættist einfaldlega vegna þess að Larsen sætti sig við lág ritlaun. Lars hefur sagt mér að hann dansaði af gleði þegar svar Larsens kom. Larsen skrifaði mikið, og er án efa Norðurlandameistari skákblaðamanna. Fyrst og fremst skrifaði hann i Skakbladet, Schacknytt og dönsk dagblöð. Meðal annars skrifaði hann skákþátt daglega árum saman í Extra Bladet.

Upp úr 1970 flutti Larsen til Las Palmas. Hann var meira eða minna flæmdur úr landi af skattayfirvöldum.

Skatturinn taldi að maturinn sem hann fékk á skákmótum utan Danmerkur væru fríðindi sem borga ætti skatt af! Hann snéri aldrei aftur til Danmerkur og bjó síðustu árin í Argentínu.

Danir syrgja sína stærstu skákstjörnu fyrr og síðar. Á heimasíðu Danska Skáksambandsins er vitnað í forseta sambandsins. Hann segir þar að Larsen hafi á sínum bestu árum verið einn vesturlandabúa sem gat boðið Sovétmönnum byrginn. Hann gleymir illilega íslendingunum Friðrik Ólafssyni og Robert James Fischer!

Larsen var fróður og áhugasamur um margt. Hefði hann einblínt á skákborðið hefði hann trúlega náð enn lengra. En Larsen var ekki bara skákmaður, hann var heimsborgari og boðberi skákarinnar. Sagt er að sjaldan hafi honum orðið svarafátt. Einn vina minna í Danmörku sagði mér að eina svarið sem maður fékk aldrei frá Larsen væri;

Ég veit það ekki.

Heimur okkar skákmann verður fátæklegri eftir andlát Larsens en minningin um skákstjörnu Norðurlanda lifir!

Gunnar Finnlaugsson

Íslenskar skákfréttir | Slóð | Facebook | Athugasemdir (0)

11.9.2010 | 17:04

Stórsigur Salaskóla gegn Dönum

Skáksveit Salaskóla vann stórsigur 4-0 á Danmörku II í 2. umferð NM grunnskólasveita sem fram fór í dag. Salaskóli hefur 5 vinninga og er í öðru sæti. Þriðja umferð er nú í gangi og tefla Salskælingar nú við Svíana sem eru neðstir.

Staðan:

1. Noregur 7 v.
2. Salaskóli 5 v.
3.-4. Danmörk II og Finnland 4 v.
5. Danmörk I 2½ v.
6. Svíþjóð 1½ v.

Lið Salaskóla:

Páll Andrason 1 v. af 2 (1665)
Eiríkur Örn Brynjarsson 1½ v. af 2 (1585)
Guðmundur Kristinn Lee 1 v. af 2 (1575)
Birkir Karl Sigurðsson 1½ v. af 2 (1440)
Ómar Yamak (1000)

Liðsstjóri strákanna er Tómas Rasmus.

Danir hafa sett upp virkilega góða heimasíðu fyrir mótið þar sem þegar má finna úrslit, myndir og skákir, meðal annars.

Heimasíða mótsins

Íslenskar skákfréttir | Slóð | Facebook | Athugasemdir (0)

10.9.2010 | 21:49

NM grunnskólasveita: Salaskóli tapaði í fyrstu umferð

Skáksveit Salaskóla tapaði í fyrstu umferð fyrir norsku sveitinni, 1-3, á NM grunnskólasveita sem hófst í dag í Tranum í N-Jótlandi í Danmörku. Norska sveitin er áberandi sterkasta sveitin á pappírnum. Eiríkur Örn Brynjarsson og Birkir Karl Sigurðsson gerðu jafntefli en Páll Andrason og Guðmundur Kristinn Lee töpuðu. Á morgun verða tefldar tvær umferðir en þá tefla strákarnir við Dani I og Svía.

Lið Salaskóla:

Páll Andrason (1665)
Eiríkur Örn Brynjarsson (1585)
Guðmundur Kristinn Lee (1575)
Birkir Karl Sigurðsson (1440)
Ómar Yamak (1000)

Liðsstjóri strákanna er Tómas Rasmus.

Danir hafa sett upp virkilega góða heimasíðu fyrir mótið þar sem þegar má finna úrslit, myndir og skákir, meðal annars.

Heimasíða mótsins

Íslenskar skákfréttir | Breytt 11.9.2010 kl. 08:51 | Slóð | Facebook | Athugasemdir (0)

10.9.2010 | 16:07

Áskell nýr formaður SA

Áskell teflir fjöltefli á Húsavík Aðalfundur Skákfélags Akureyrar var haldinn í gærkvöldi. Þar gerðust þau stórtíðindi að Gylfi Þórhallsson, sem gengt hefur stöðu formanns undanfarin ár og alls í 14 ár, gaf ekki kost á sér til áframhaldandi formennsku. Í stað hans var Áskell Örn Kárason kjörinn formaður og aðrir í stjórn eru Árný Hersteinsdóttir, Hjörleifur Halldórsson, María Stefánsdóttir, Smári Ólafsson og Sigurður Arnarson (til vara).

Á fundinum kom m.a. fram að unglingastarf félagsins stendur með allnokkrum blóma, en halli á rekstri síðasta starfsárs óviðunandi og þarfnast verulegra úrbóta.

Íslenskar skákfréttir | Slóð | Facebook | Athugasemdir (0)

10.9.2010 | 16:05

Laugardagsæfingar TR hefjast á morgun

Áratuga löng hefð er fyrir laugardagsæfingum Taflfélags Reykjavíkur. Þær hefjast aftur eftir sumarfrí laugardaginn 11. september kl. 14. Að venju fara æfingarnar fram í húsnæði félagsins að Faxafeni 12.

Í fyrra mætti oftar en ekki vel á fjórða tug barna á æfingarnar en alls voru í kringum 100 börn sem sóttu þær. Á æfingunum eru sett upp skákmót, skákkennsla fer fram og skákþrautir leystar ásamt ýmsum öðrum uppákomum. Þá er boðið upp á léttar veitingar um miðbik æfinganna en sá partur er orðinn órjúfanlegur hluti af æfingunum hjá börnunum.

Haldið er utan um mætingu og árangur barnanna og hverri æfingu er gerð góð skil í ítarlegum pistlum.

Aðgangur er ókeypis og eru æfingarnar ætlaðar börnum fæddum 1997 og síðar.

Umsjón með laugardagsæfingunum skipta þær með sér, Sigurlaug Regína Friðþjófsdóttir, formaður T.R. og Elín Guðjónsdóttir sem situr í stjórn félagsins.

Skákkennarar eru Torfi Leósson og Ólafur Kjartansson, félagsmenn í T.R. Báðir eru þeir sterkir skákmenn með yfir 2000 elo-stig.

Pistlar laugardagsæfinga veturinn 2009-2010

Myndir frá laugardagsæfingum

Íslenskar skákfréttir | Slóð | Facebook | Athugasemdir (0)

10.9.2010 | 00:29

Hellismenn lögðu Bolvíkinga í mjög spennandi viðureign

Ein mest spennandi viðureign í sögu Hraðskákkeppni taflfélaga fór fram í kvöld þegar Hellismenn lögðu Íslandsmeistara Bolvíkinga, í undanúrslitum Hraðskákkeppni taflfélaga, með minnsta mögulega mun, 36½-35½. Staðan var hálfleik var 18½-17½ fyrir Helli.

Hellismenn byrjuðu með látum, unnu 3 fyrstu umferðirnar og voru komnir með góða forystu, 12-6. Þá fóru Bolvíkingar í stuð, unnu næstu 3 umferðir og höfðu nánast jafnað leikin í hálfleik. Bolvíkingar unnu svo sjöundu umferðina 5-1 og voru komnir með 3ja vinninga forskot. Áttundu umferð lauk með jafntefli. Hellismenn unnu svo níundu umferðina 4½-1½ og jöfnuðu þar með metin. 10. og 11. umferð lauk með jafntefli og var því jafnt fyrir lokaumferð mótsins. Þá unnu Hellismenn með minnsta mögulega mun 3½-2½ og viðureignina því samanlagt 36½-35½.

Landsliðsmennirnir Hannes Hlífar Stefánsson og Hjörvar Steinn Grétarsson fóru fyrir jafnri sveit Hellis. Hannes fékk 9 vinninga í 12 skákum en Hjörvar 7½. Aðrir voru rétt undir 50% en það er athyglisvert að 5 af 7 leikmönnum Hellis voru undir helmings vinningshlutfalli.

Jóhann Hjartarson var bestur Víkara með 9 vinninga, Landsliðsmaðurinn Bragi Þorfinnsson fékk 8½ vinning og Þröstur Þórhallsson fékk 8 vinninga.

Einstaklingsárangur:

Hellir:

Hannes Hlífar Stefánsson 9 v. af 12
Hjörvar Steinn Grétarsson 7½ v. af 12
Sigurbjörn J. Björnsson 5½ v. af 12
Magnús Örn Úlfarsson 5 v. af 12
Róbert Lagerman 5 v. af 12
Björn Þorfinnsson 2½ v. af 6
Davíð Ólafsson 2 v. af 6

Bolungarvík:

Jóhann Hjartarson 9 v. af 12
Bragi Þorfinnsson 8½ v. af 12
Þröstur Þórhallsson 8 v. af 12
Stefán Kristjánsson 5½ v. af 12
Jón L. Árnason 4 v. af 12
Halldór Grétar Einarsson ½ v. af 10
Magnús Pálmi Örnólfsson 0 v. af 2

Úrslitaviðureign Hellis og TR fer fram miðvikudaginn 15. september í TR og hefst kl. 19:30.

Íslenskar skákfréttir | Slóð | Facebook | Athugasemdir (0)

10.9.2010 | 00:06

TR sigraði Hauka nokkuð örugglega

Taflfélag Reykjavíkur sigraði Skákfélag Hauka í undanúrslitum Hraðskákkeppni taflfélaga örugglega með 46 vinningum gegn 26. Staðan í hálfleik var 20-16 fyrir TR. Haukamenn töpuðu með eins vinnings mun í fyrstu umferð, unnu aðra umferðina stórt, 3. og 4. umferð var jöfn en svo töpuðu þeir nánast öllum sem eftir voru og sumum með nokkrum mun.

Drýgstir TR-inga voru Guðmundur Kjartansson (10 af 12), Snorri Bergsson (7,5 af 9) og Arnar Gunnarsson (7 af 10); aðeins Stefán Freyr Guðmundsson náði 50% skori af Haukamönnum.

Íslenskar skákfréttir | Breytt s.d. kl. 00:30 | Slóð | Facebook | Athugasemdir (0)

9.9.2010 | 23:55

Ráðgátan um Lewis-taflmennina

Kenning Guðmundar G. Þórarinssonar um að hinir fornu, fögru og frábæru Lewis taflmenn séu líklegast af íslensku bergi brotnir, skornir í rostungstennur af Margréti hinni högu, prestkonu í Skálholti á síðari hluta 12 aldar vegur nú mikla athygli og fær umfjöllun um allan heim að tilhlutan the New York Times.

Guðmundur mun ásamt Einari S. Einarssyni sækja ráðstefnu "The Lewis Chessmen Unmasked" í Edinborg á laugardaginn og taka þátt í að afhjúpa leyndardóminn um upprunnar þessar fágætu forn- og listmuna. Á morgun munu þeir félagar eiga fund með fræðimönnum The British Museum í London um þessu merku kenningu Guðmundar, sem mun ef rétt reynist breyta Íslandssögunni.

Sett hefur verið upp heimasíða fyrir verkefnið og hafa þeir félagar, sem báðir eru fyrrverandi forsetar SÍ, látið prenta bækling (sjá viðhengi sem fylgir frétt) um efnið og þetta nýja baráttumál og fagnaðarerindi.

Frétt var um málið í fréttatíma Stöðvar 2 í gær og einnig má benda á frétta um málið á Gambit.

Heimasíða verkefnisins

Skrár tengdar þessari bloggfærslu:

skak_0.pdf

Íslenskar skákfréttir | Breytt 10.9.2010 kl. 08:19 | Slóð | Facebook | Athugasemdir (0)

9.9.2010 | 09:16

Undanúrslit Hraðskákkeppni taflfélaga fara fram í kvöld

Undanúrslit Hraðskákkeppni taflfélaga fara fram fimmtudaginn 9. september í húsnæði TR. Þá mætast annars vegar Íslandsmeistarar Taflfélags Bolungarvíkur og Hellismenn og hins vegar Taflfélag Reykjavíkur og Skákdeild Hauka.

Úrslitaviðureign keppninnar fer fram miðvikudaginn 15. september kl. 19:30.

Heimasíða Hellis

Íslenskar skákfréttir | Slóð | Facebook | Athugasemdir (0)

9.9.2010 | 09:15

Starfsemi Taflfélags Akraness endurvakin - skákæfing í kvöld

Skagastaðir, sem er hluti verkefnis, sem gengur út á að virkja unga atvinnuleitendur til athafna og hvetja þá til góðra verka og hjálpa fólki í atvinnuleit á Akranesi, hefur tekið að sér að endurvekja starfsemi Taflfélags Akraness.

Ákveðið hefur verið að fimmtudagskvöldið 9. sept verður haldið Skákkvöld í Garðakaffi og opnar húsið kl. 2000. Kaffiterían verður með kaffisölu og eitthvað með því. Allir velkomnir sem hafa áhuga á skák.

Um verkefnið

Íslenskar skákfréttir | Slóð | Facebook | Athugasemdir (0)

« Fyrri síða | Næsta síða »