Skákþáttur Morgunblaðsins: Róleg byrjun á heimsmeistaraeinvígi

Tólf skáka einvígi heimsmeistarans Wisvanathans Anands og Ísraelsmannsins Boris Gelfands, sem stendur yfir þessa dagana í Moskvu, byrjar svo dauflega að greinarhöfundur man ekki eftir öðru eins. Fimm fyrstu skákunum hefur lokið með jafntefli. Fyrir liggur að í undirbúningi sínum styðjast skákmennirnir við mikið tölvuafl og í þessum fyrstu skákum er engu líkara en þeir séu að ota framan í andstæðinginn niðurstöðum beint út úr töluprentaranum. Ýmsa hefur lengi grunað að með tölvuvæðingu skákarinnar myndu möguleikar hennar tæmast og jafnteflisdauðinn næði yfirhendinni. Sterkustu forritin hafa vissulega breytt skákinni og varpað ljósi á ýmislegt sem áður var hulið mönnum en ein helsta niðurstaða tölvuvæðingarinnar er þó engu að síður sú að „Tölvan" í öllu sínu veldi hefur að einhverju leyti afhjúpað manninn sem fremur ófullkomna vitsmunaveru; við munum sem betur fer aldrei ná þeirri reiknigetu sem öflugustu forritin búa yfir. Allir vita að það er tilgangslaust fyrir bestu skákmenn heims að stilla upp í einvígi gegn fremstu forritunum, þeir hafa og munu tapa slíkri keppni.

Þó að gestir Tretjakov-safnsins í Moskvu, þar sem einvígið fer fram, hafi enn ekki fundið snilldina í skákum þeirra Anands og Gelfands er hún þó innan seilingar; innan veggja þessa safns hanga uppi mörg snilldarverk Ilja Repins, frægasta málara Rússa og Úkraínu.

Undanfarin misseri hefur indverski heimsmeistarinn verið að gefa eftir í samkeppni við yngri menn en sigrar hans í HM-einvígjunum við Kramnik árið 1988 og Topalov 2010 voru fyllilega verðskuldaðir. Ýmsir telja að hann hafi verið að spara kraftana í þeim mótum sem hann hefur tekið þátt í undanfarið. Boris Gelfand yrði hálfhlægilegur heimsmeistari, afrekaskrá hans verðskuldar ekki titilinn sem Anand hefur borið með miklum sóma undanfarin ár. Anand komst næst sigri í þriðju einvígisskákinni sem hér fer á eftir:

Wisvanathan Anand - Boris Gelfand

1. d4 Rf6 2. c4 g6 3. f3

Kemur í veg fyrir meginafbrigði Grunfeld-varnarinnar sem koma upp eftir 3. Rc3 d5. En varla hefur Anand náð að koma Gelfand á óvart þótt hann velji fremur sjaldséðan leik.

3.... d5 4. cxd5 Rxd5 5. e4 Rb6 6. Rc3 Bg7 7. Be3 O-O 8. Dd2 e5 9. d5 c6 10. h4!?

Dálítið í anda Larsens sem hikaði ekki við að ýta h-peðinu fram ef riddari á f6 var horfinn af vettvangi.

10.... cxd5 11. exd5 R8d7 12. h5 Rf6 13. hxg6 fxg6 14. O-O-O Bd7 15. Kb1 Hc8 16. Ka1!?

Þetta mun allt hafa komið fram áður og aðstoðarmaður Anands, Peter Heine Nielsen, leikið 16. d6 með góðum árangri.

16.... e4 17. Bd4 Ra4 18. Rge2 Da5!?

Hví ekki 18.... exf3 19. gxf3 og nú 19.... Da5?

19. Rxe4 Dxd2 20. Rxf6+ Hxf6 21. Hxd2 Hf5 22. Bxg7 Kxg7 23. d6 Hfc5 24. Hd1 a5 25. Hh4 Hc2

Svartur virðist hafa ágæt gagnfæri en reyndin er önnur.

26. b3! Rb2 27. Hb1 Rd3 28. Rd4 Hd2 29. Bxd3 Hxd3 30. He1 Hd2

- Sjá stöðumynd -

31. Kb1

Hér var 31. He7+ sigurstranglegri leikur, t.d. 31.... Kf6 32. Kb1 Bf5+ 33. Rxf5 gxf5? 34. f4! Hd1+ 35. Kb2 Hxd6 36. Hexh7 með góðum vinningsmöguleikum.

31.... Bf5 32. Rxf5 gxf5 33. He7 Kg6 34. Hc7?

Hann varð að reyna 34. d7! Hcc2! 35. Hc4! og á þá er enn sigurvon. Nú er staðan jafntefli.

34.... He8 35. Hh1 Hee2 36. d7 Hb2 37. Kc1 Hxa2

Jafntefli.

Helgi Ólafsson [e-mail]

-------------------------------------------

Skákþættir Morgunblaðsins eru birtir á Skák.is viku síðar en í sjálfu Morgunblaðinu.  

Grein þessi birtist í Sunnudagsmogganum, 20. maí

Skákþættir Morgunblaðsins

[Event "Anand-Gelfand World Chess Championship"] [Site "Moscow, Russia"] [Date "2012.05.14"] [EventDate "2012.05.10"] [Round "3"] [Result "1/2-1/2"] [White "Viswanathan Anand"] [Black "Boris Gelfand"] [ECO "D70"] [WhiteElo "?"] [BlackElo "?"] [PlyCount "74"] 1.d4 Nf6 2.c4 g6 3.f3 d5 4.cxd5 Nxd5 5.e4 Nb6 6.Nc3 Bg7 7.Be3 O-O 8.Qd2 e5 9.d5 c6 10.h4 cxd5 11.exd5 N8d7 12.h5 Nf6 13.hxg6 fxg6 14.O-O-O Bd7 15.Kb1 Rc8 16.Ka1 e4 17.Bd4 Na4 18.Nge2 Qa5 19.Nxe4 Qxd2 20.Nxf6+ Rxf6 21.Rxd2 Rf5 22.Bxg7 Kxg7 23.d6 Rfc5 24.Rd1 a5 25.Rh4 Rc2 26.b3 Nb2 27.Rb1 Nd3 28.Nd4 Rd2 29.Bxd3 Rxd3 30.Re1 Rd2 31.Kb1 Bf5+ 32.Nxf5+ gxf5 33.Re7+ Kg6 34.Rc7 Re8 35.Rh1 Ree2 36.d7 Rb2+ 37.Kc1 Rxa2 1/2-1/2

Þröstur jafnaði metin gegn Braga í æsispennandi skák

 

Þröstur Þórhallsson (2425) vann Braga Þorfinnsson (2449) í æsispennandi skák í þriðju einvígisskák þeirra um Íslandsmeistaratitilinn.  Staðan í einvíginu er nú 1,5-1,5 en fjórða og síðasta skákin fer fram á morgun og hefst kl. 14.  Teflt er í Stúkunni við Kópavogsvöll.  Verði jafnt verður teflt til þrautar með styttri umhugsunartíma á miðvikudag.

 

Þröstur hafði hvítt og var teflt Evans-bragð.  Skákin var mjög æsileg og en Þröstur hafði vinning eftir 55 leiki eftir laglega hróksfórn.    Bragi hefur hvítt í fjórðu skákinni.  

Hægt er að fylgjast með skákunum á heimasíðu mótsins og einnig er hægt að fylgjast með skákunum á risaskjá á skákstað og hlusta um leið á skýringar skákspekinga.  

Mikið er í húfi í einvíginu.  Ekki nóg með að sigurvegarinn verði Íslandsmeistari heldur fær hann sjálfkrafa sæti í Ólympíulandsliði Íslands, sem keppir í Tyrklandi í haust, og keppnisrétt fyrir Íslands hönd á EM einstaklinga sem fram fer í Póllandi í apríl 2013. 

Hvorki Þröstur né Bragi hafa hampað Íslandsmeistaratitlinum, og því er ljóst að nýr Íslandsmeistari verður krýndur eftir nokkra daga.  Alls tefla þeir 4 skákir um hvítasunnuhelgina og verði jafnt að þeim loknum tefla þeir til þrautar með skemmri umhugsunartíma á miðvikudag.  

• Heimasíða Íslandsmótsins í skák
• Myndaalbúm (HÁ)
• Chess-Results

Skákþing Norðlendinga: Davíð efstur fyrir lokaumferðina

Davíð Kjartansson (2320) er efstur með 5 vinninga að lokinni sjöttu og næstsíðustu umferð Skákþings Norðlendinga sem fram fór í dag.  Davíð gerði jafntefli við Jón Viktor Gunnarsson (2406) sem er annar með 4,5 vinning ásamt Stefáni Bergssyni (2170) sem gerði sér lítið fyrir og vann Sigurð Arnarson (2047).  

Halldór Brynjar Halldórsson (2177) tapaði nú fyrir Gylfa Þórhallssyni (2131).  

Stöðu mótsins má finna hér. 

Sjöunda og síðasta umferð fer fram í fyrramálið.  Þá mætast meðal annars: Sigurður - Davíð og Jón Viktor - Stefán. 

Pörun 7. umferðar má finna hér.

Mótið er sterkt og fjölmennt að þessu sinni en 20 skákmenn taka þátt.

• Heimasíða SA
• Chess-Results