Landsliðshópurinn í skák í ströngum æfingum

Nýskipaður landsliðshópur í skák er farinn að hittast reglulega.  Í gærkvöldi fór fram landsliðsæfing og laumaði ritstjórinn sér á æfinguna og tók nokkrar myndir af áhugasömum landsliðsmönnum.   Þeir landsliðsmenn sem áttu heimangengt létu sig ekki vanta en 4 stigahæstu menn liðsins vantaði, þá Hannes Hlífar Stefánsson, Héðin Steingrímsson, Henrik Danielsen og Stefán Kristjánsson en þeir eru allir staddir erlendis.   Guðmundur Gíslason, sem búsettur er í Hnífsdal, lét fjarlægðina ekki á sig heldur var tengdur landsliðshópnum í gegnum netið.   Halldór Grétar Einarsson er Helga innanhandar um tæknimál.  

Áður hafði hópurinn m.a. komið saman til að horfa á tvenna fyrirlestra Héðins.   Næsta verkefni hópsins verður að fá Daða Örn Jónsson í heimsókn þar sem Daði ætlar að kynna fyrir hópnum hvernig nýta megi sér kosti tölvutækninnar á sem bestan hátt við skákrannsóknir.  

Ekki má ritstjórinn ljóstra upp hvað meistararnir voru að skoða en e.t.v. á snilldin eftir sjást í Síberíu í haust. 

 

Á myndinni hér til vinstri eru: Hjörvar Steinn Grétarsson, Davíð Ólafsson, landsliðsþjálfari kvennaliðsins, Björn Þorfinnsson, Lenka Ptácníková, sem væntanlega mun leiða kvennasveitina í haust, Dagur Arngrímsson, Bragi Þorfinnsson, Jón Viktor Gunnarsson, Guðmundur Kjartansson, Þröstur Þórhallsson og Helgi Ólafsson, landsliðsþjálfari.  Á myndinni fyrir ofan má "sjá" Guðmund Gíslason!

Myndaalbúm landsliðsæfinga

Elsa María sigraði á fimmtudagsmóti TR

Elsa María Kristínardóttir sigraði á fimmtudagsmóti gærdagsins í Taflélagi Reykjavíkur. Hún gerði jafntefli við Jón Úlfljótsson og Erling Þorsteinsson en vann hinar fimm skákirnar og var þannig eini taplausi keppandinn á mótinu. Eins og venjulega voru telfdar sjö umferðir með sjö mínútna umhugsunartíma. Mótið hefst kl. 19:30 stundvíslega og er yfirleitt lokið  um eða upp úr 21:30.  

Lokastaðan:

• 1   Elsa María Kristínardóttir                 6
• 2   Guðmundur Lee                              5.5 
• 3-6  Örn Stefánsson                            5       
•      Sverrir Sigurðsson                        5        
•      Örn Leó Jóhannsson                        5
•      Páll Snædal Andrason                      5       
• 7    Kristinn Sævaldsson                       4.5     
• 8-10  Jóhann Bernhard                          4       
•       Birkir Karl Sigurðsson                   4       
•       Valur Sveinbjörnsson                     4       
• 11-14 Erlingur Þorsteinsson                    3.5     
•       Jón Úlfljótsson                          3.5     
•       Gunnar Friðrik Ingibergsson              3.5     
•       Jóhann Karl Hallsson                     3.5     
• 15-18 Björgvin Kristbergsson                   3       
•       Alexander Már Brynjarsson                3       
•       Finnur Kr. Finnsson                      3       
•       Friðrik Helgason                         3       
• 19-20 Kristinn Andri Kristinsson               2.5     
•       Pétur Jóhannesson                        2.5     
• 21-22 Margrét Rún Sverrisdóttir                2       
•       Aron Freyr Bergsson                      2       
•  23   Harpa Rut Ingólfsdóttir,                 1       

   

Henrik með jafntefli í næstsíðustu umferð í Prag

Stórmeistarinn Henrik Danielsen (2495) gerði jafntefli við Tékkann Vojtech Kovar (2365) í áttundu og næstsíðustu umferð Prag Open sem fram fór í dag.  Henrik hefur 5½ vinning og er í 10.-19. sæti. I lokaumferðinni, sem fram fer í fyrramálið, teflir Henrik við ÞJóðverjann Sebastian Schmidt-Schaeffer (2393).

Efstur með 6½ vinning er rússneski stórmeistarinn Viacheslav Zahartsov (2562).

Alls taka 133 skákmenn þátt í mótinu og þar af eru 8 stórmeistarar og 17 alþjóðlegir meistarar.  Henrik er fimmti stigahæsti keppandinn.

• Heimasíða mótsins
• Chess-Results