Íslandsmótið í skák fer fram í Hafnarfirði 10.-20. maí

Íslandsmótið í skák 2017 fer fram í Hraunseli (húsnæði Félags eldri borgara), Flatahrauni 3, í Hafnarfirði dagana 10.-20. maí næstkomandi. 

Það er mikil ánægja innan Skáksambands Íslands að mótið skuli vera haldið í Hafnarfirði, eftir 14 ára hlé. Á næsta skólaári fyrirhugar Skáksamband Íslands að auka mjög kraftinn við skákkennslu í Hafnarfirði í samvinnu við Skákdeild Hauka og Hafnarfjarðarbæ. 

Keppendalistinn í ár er hvorttveggja í senn sterkur og afar athyglisverður. Íslandsmeistarinn frá því í fyrra, Jóhann Hjartarson, mun þó ekki verja titil sinn í ár. 

Meðal keppenda eru stórmeistararnir Hannes Hlífar Stefánsson, tólffaldur Íslandsmeistari, og Héðinn Steingrímsson, þrefaldur Íslandsmeistari. Tveir aðrir fyrrverandi Íslandsmeistarar taka þátt en það eru Guðmundur Kjartansson (2014) og Þröstur Þórhallsson (2012). Alþjóðlegi meistarinn Björn Þorfinnsson lætur sig ekki vanta nú frekar en endranær, enda margfaldur verðlaunahafi á mótinu, og til alls líklegur. 

Meðal annarra keppenda má nefna efnilegasta skákmann landsins, Vigni Vatnar Stefánsson, sem er aðeins 14 ára og einn sá yngsti sem teflt hefur í landsliðsflokki. Vignir komst í fréttirnar fyrir skemmstu þegar hann varð sá yngsti í skáksögunni hérlendis til þess að fara yfir 2400 skákstig.   

Heimamenn eiga sinn fulltrúa en meðal keppenda er Hafnfirðingurinn Sigurbjörn Björnsson.

Aðrir keppendur eru Vestfirðingurinn knái, Guðmundur Gíslason, sem oft hefur náð eftirtektarverðum árangri á Íslandsmótinu, ungmennin Dagur Ragnarsson og Bárður Örn Birkisson, eru báðir tefla nú á sínu fyrsta Íslandsmóti. Sá síðarnefndi er unglingameistari Íslands. 

Keppendalistinn (skákstig í sviga) 

1. Hannes Hlífar Stefánsson (2566) - stórmeistari
2. Héðinn Steingrímsson (2562) - stórmeistari
3. Guðmundur Kjartansson (2437) – alþjóðlegur meistari
4. Þröstur Þórhallsson (2420) - stórmeistari
5. Björn Þorfinnsson (2407) – alþjóðlegur meistari
6. Guðmundur Gíslason (2336) – FIDE-meistari
7. Vignir Vatnar Stefánsson (2334) – FIDE-meistari
8. Dagur Ragnarsson (2320) – FIDE-meistari
9. Sigurbjörn Björnsson (2268) – FIDE-meistari
10. Bárður Örn Birkisson (2162) 

Mótið verður sett miðvikudaginn 10. maí kl. 16:45. Forseti bæjarstjórnar Guðlaug Kristjánsdóttir mun setja mótið fyrir hönd Hafnarfjarðar og leika fyrsta leik þess. Dregið verður um töfluröð degi fyrir mótið eða þann 9. maí kl. 12:30.  

Góð aðstaða verður á skákstað fyrir áhorfendur. Hægt verður að fylgjast með skákunum þar á tjaldi. Auk þess verða beinar útsendingar á vefsíðu mótsins, http://icelandicchesschampionship.com/.

Skákþáttur Morgunblaðsins: Anish Giri sigraði á Reykjavíkurskákmótinu

Hollenski stórmeistarinn Anish Giri varð einn efstur á 35. Reykjavíkurskákmótinu sem lauk í Hörpu í gær. Giri vann landa sinn Erwin l‘Ami fremur auðveldlega í aðeins 30 leikjum en þegar flestum skákum á efstu borðum var ólokið var ljóst að enginn gat náð Giri sem þá hafði þá hlotið 8½ vinning af 10 mögulegum. Í 2.-5. sæti komu Indverjinn Gupta, Hollendingurinn Van Foreest, Armeníumaðurinn Serge Movsesian og Bandaríkjamaðurinn Gata Kamsky, allir með 8 vinninga

Sigur Giri kom ekki á óvart þar sem hann var stigahæsti keppandinn en í byrjun apríl sat hann í 11. sæti heimslistans. Giri sem er 22 ára gamall hefur um nokkurra ára skeið verið fremsti skákmaður Hollendinga og hefur svipaða yfirburðastöðu þar í landi og Max Euwe, heimsmeistari 1935-37, hafði áður og Jan Timman síðar. Hann er fæddur í Rússalandi en árið 2008 fluttist hann til Hollands með foreldrum sínum, rússneskri móður og nepölskum föður. Áður höfðu þau búið í Japan. Hann talar reiprennandi sex tungumál: rússnesku, japönsku, hollensku, ensku, þýsku og nepölsku. Skákstíll hans er léttur og leikandi. Hann getur státað af betra skori í innbyrðis viðureignum sínum við norska heimsmeistarann Magnús Carlsen. Í lokaumferðinni í gær kom Giri mönnum sínum þannig fyrir á drottningarvæng að L´Ami gat sig hvergi hrært og tapaði án þess að fá rönd við reist:

Reykjavíkurskákmótið 2017 – 10. umferð:

Anish Giri – Erwin L´Ami

Pólsk vörn

1. Rf3 Rf6 2. d4 e6 3. g3 b5 4. Bg5 Bb7 5. Rbd2 d5

Eðlilegra er 5. ... c5. Þó að svartur nái í augnablikinu að loka á hvíta hornalínuna á hún eftir að galopnast.

6. e3 a6 7. a4 b4 8. Rb3 Rbd7

Hann gat leikið 8. ... a5 en eftir 9. Re5 er aðstaðan allt annað en þægileg.

9. Ra5! Dc8 10. Bxf6 Rxf6 11. c4 dxc4 12. Rxb7 Dxb7 13. Bg2 c3 14. bxc3 bxc3 15. O-O Bb4 16. Re5 Rd5 17. a5! 

17. ... Hb8 18. Da4+ Db5 19. Bxd5! exd5 20. Rc6 O-O 21. Hfb1 Dc4?

Eftir þetta er staðan vonlaus. Hann gat barist áfram með 21. .... Dxa4 22. Hxa4 Hb5 23. Hbxb4 c2 þó að hróksendataflið sem kemur upp eftir 24. Ha1 Hfb8 25. Hc1 Hxb4 26. Rxb4 Hxb4 27. Hxc2 sé trúlega tapað.

23. Rxb4 Hb8 24. Rc2 De2 25. Re1 h6 26. Dc2 Dc4 27. Rd3 Hb3 28. Kg2 g6 29. Rc5 Hb2 30. Dd3

– og svartur gafst upp. 

Jóhann, Bragi og Hannes Hlífar efstir íslensku þátttakendanna

Jóhann Hjartarson, Bragi Þorfinnsson og Hannes Hlífar Stefansson náðu bestum árangri islensku skákmannanna, hlutu 7 vinninga og enduðu í 11. – 29. sæti. Hannes tók tvær ½-vinnings yfirsetur en eftir fremur slysalegt tap um miðbik mótsins átti hann ekki möguleika á að blanda sér í baráttu efstu manna. Jóhann og Bragi teldu allar tíu skákirnar og bættu báðir ætlaðan árangur sinn. Árangur íslensku keppendanna sem voru 88 talsins var undir meðallagi miðað við sum fyrri mót en fjölmargra sterkra íslenskra skákmanna var saknað og framvarðasveitin því full-þunnskipuð. Margir hækkuðu myndarlega á stigum, enginn þó meira en Birkir Ísak Jóhannsson sem bætti sig um 122 elo-stig. Aðrir sem hækkuðu sig um 50 elo stig eða meira voru Jón Þór Lemery, 79 elo-stig, Arnar Heiðarsson, 77 elo-stig, Nansý Davíðsdóttir, 72 elo-stig, Jóhann Arnar Finnsson 62 elo-stig. Aðal styrktaraðili 35. Reykjavíkurskákmótins var GAMMA.

------------------

Skákþættir Morgunblaðsins eftir Helga Ólafsson birtast u.þ.b. viku síðar á Skák.is.

Grein þessi birtist í Morgunblaðinu 28. apríl 2017

Skákþættir Morgunblaðsins

Hraðkvöld hjá Hugin í kvöld

Hraðkvöld Hugins verður mánudaginn 8. maí nk.  og hefst taflið kl. 20:00. Tefldar verða 7-10 umferðir með umhugsunartímanum 4 mínútur + 3 sekúndur eða 5 mínútur + 3 sekúndur á hvern leik. Teflt er í félagsheimili Hugins í Álfabakka 14a í Mjóddinni. Hraðkvöldið verður reiknað til hraðskákstiga. Sigurvegarinn á hraðkvöldinu fær í verðlaun máltíð fyrir einn á Saffran eða pizzu frá Dominos Einnig verður dreginn út af handahófi annar keppandi sem einnig fær sama val. Þar eiga allir jafna möguleika, án tillits til árangurs á mótinu. Þátttökugjöld eru kr. 300 fyrir félagsmenn (kr. 200 fyrir 15 ára og yngri) og kr. 500 fyrir aðra (kr. 300 fyrir 15 ára og yngri).

Benedikt Briem Íslandsmeistari í skólaskák í yngri flokki - aukakeppni þarf í þeim eldri

Landsmótinu í skólaskák lauk í dag á Akureyri. Benedikt Briem (1431) kom sá og sigraði í yngri flokki (1.-7. bekk) Landsmótsins í skólaskák. Hann hlaut 6 vinninga í sjö skákum. Róbert Luu (1733) og Gunnar Erik Guðmundsson (1247) urðu jafnir í 2.-3. sæti með 5,5 vinninga en Róbert fékk silfrið eftir stigaútreikning.

Lokastöðuna má finna á Chess-Results. 

 

Vignir Vatnar Stefánsson (2334) og Hilmir Freyr Heimisson (2144) komu jafnir í mark með 6 vinninga í eldri flokki og þurfa að heyja aukakeppni um Íslandsmeistaratitilinn.  Það einvígi dregst fram yfir 20. maí vegna þátttöku Vignis í landsliðsflokksins Íslandsmótsins í skák. Stephan Briem varð þriðji með 5 vinninga og fær bronsið.

Lokastöðuna má finna á Chess-Results.

Það er athyglisvert að Kópavogsbúar hirða öll sex verðlaunin. 

Stefán Bergsson, Landsmótsstjóri, mun skrifa ítarlegan pistil um gang mótsins á morgun. 

 

Síðasta umferð á Landsmóti framundan

Sjötta og næstsíðasta umferð á Landsmótinu í skólaskák fór fram seinni partinn og í kvöld. Margar spennandi skákir voru tefldar og sérstaklega í eldri flokki á efstu borðunum tveimur. Á öðru borði stýrði Nansý Davíðsdóttir hvítu mönnunum gegn Vigni Vatnari Stefánssyni. Nansý tefldi byrjunina af miklum krafti og hafði drottninguna af Vigni en gaf í staðinn tvo hróka. Nansý þáði að lokum jafntefli í stöðu þar sem möguleikarnir voru allir hennar. Á fyrsta borði hafði Hilmir Freyr hvítt gegn Stephan Briem. Hilmir fékk betri stöðu en staða Stephans var nokkuð traust þó svo kóngurinn hafi lengi vel verið á d7 í miðtaflinu. Miðborðið var þó lokað en Hilmir Freyr var sjálfum sér líkur og tók nokkra áhættu við að sprengja upp miðborðið. Við það lifnaði biskup Stephans á b7 við og fékk svartur þá ýmsa sénsa. Fljótlega skiptist svo upp í endatafl þar sem Hilmir stóð betur. Stephan varðist þó af mikilli hörku og tryggði sér gott jafntefli gegn eldri og reyndari keppanda.

Hilmir og Vignir eru því enn efstir og jafnir en nú með einn vinning niður og hafa því fimm vinninga af sex mögulegum. Stpehan er í þriðja sæti með fjóra vinninga.

Í yngri flokki er Benedikt Briem einn efstur með fimm vinninga. Í jöfnum flokki hefur taflmennska Benedikts verið hvað best og hann gert fá mistök og nýtt sér þá sénsa sem hafa gefist. Róbert Luu og Gunnar Erik koma í öðru til þriðja sæti með fjóra og hálfan vinning.

Síðasta umferð hefst 10:00 á sunnudagsmorgni.

Paranir:

http://www.chess-results.com/tnr279319.aspx?lan=1&art=2&rd=7&wi=821

http://www.chess-results.com/tnr279386.aspx?lan=1&art=2&rd=7&wi=821

Spennan eykst á Landsmóti

Í morgun fór fram fimmta umferð Landsmótsins í skólaskák. Síðustu skák umferðarinnar var rétt að ljúka þar sem Hilmir Freyr lagði Nansý eftir fjögurra tíma setu. Hilmir pressaði alla skákina án þess að fá mikið meir en örlítið betra tafl. Tíminn minnkaði og í tímahraki beggja lék Nansý af sér sem Hilmir nýtti sér um leið. Vignir Vatnar vann sína skák örugglega og leiða þeir félagar þá áfram flokkinn með hálfan vinning niður.

Í yngri flokki var mest spennandi skákin milli þeirra Kristjáns Dags Jónssonar og Róberts Luu. Í peðsendatafli átti Róbert mun þægilegra tafl og hreinan vinningsleik í einni stöðunni. Róbert gáði hins vegar ekki að sér, lék vitlausu peði sem gaf Kristjáni færi á snotru gegnumbroti sem tryggði honum unnið tafl. Á efsta borði gerðu Gunnar Erik og Benedikt Briem jafntefli. Þessi úrslit þýða að Benedikt er einn efstur með fjóra vinninga en Róbert, Kristján, Freyja og Gunnar Erik koma í humátt eftir með þrjá og hálfan vinning. Mikil spenna framundan í yngri flokki.

Nánari úrslit á chess-results.com.

131 krakki tók þátt í Skólameistaramóti Kópavogs!

Skólameistaramót Kópavogs 2017 í 1.-4.bekk fóru fram föstudaginn 5.mai í stúkunni við Kópavogsvöll. Alls tóku 131 skákkrakkar þátt. 50 í 3.-4. bekk, 49 í 2.bekk og 32 í 1.bekk. 

Úrslit: 

Skólameistarar Kópavogs

• 1.bekk: Guðrún Fanney Briem Hörðuvallaskóla
• 2.bekk: Guðmundur Orri Sveinbjörnsson Vatnsendaskóla
• 3.-4.bekk: Tómas Möller Vatnsendaskóla 

1.bekkur strákar

1. Steinar Logi Halldórsson Vatnsendaskóla 4 v
2. Kirill Igorsson Hörðuvallaskóla 4 v
3. Arnór Víglundsson Salaskóla 4 v 

1.bekkur stelpur

1. Guðrún Fanney Briem Hörðuvallaskóla 5v
2. Elín Lára Jónsdóttir  Salaskóla 3,5 v
3. Þórhildur Helgadóttir Smáraskóla 2 v 

2.bekkur strákar

1. Guðmundur Orri Sveinbjörnsson Vatnsendaskóla 6 v
2. Friðbjörn Orri Friðbjörnsson Vatnsendaskóla 5 v
3. Mikael Bjarki Vatnsendaskóla 5v 

2.bekkur stelpur

1. Hildur Sara Björnsdóttir Smáraskóla 5 v
2. Berglind Edda Birkisdóttir Salaskóla 3 v
3. Sunna Dögg Björgvinsdóttir Smáraskóla 3 v 

3.-4.bekkur strákar

1. Tómas Möller Vatnsendaskóla 8 v
2. Rayan Sharifa Álfhólsskóla 7 v
3. Fannar Smári Jóhannsson Hörðuvallaskóla 6 v 

3.-4.bekkur stelpur

1. Katrín María Jónsdóttir Salaskóla 6 v
2. Sesselja Kjartansdóttir Salaskóla 4 v
3. Vigdis Erla Davíðsdóttir Smáraskóla 3,5 v
4. Arey Amelía Sigþórsdóttir Salaskóla 3 v 

Það var Skákdeild Breiðabliks sem sá um mótið með aðstoð skákkennara í Kópavogi.

Móts&skákstjóri var Halldór Grétar Einarsson 

Úrslit á Chess-Results:

• 1.bekkur:  http://chess-results.com/tnr279379.aspx?lan=1
• 2.bekkur: http://chess-results.com/tnr279376.aspx?lan=1
• 3.- 4.bekkur: http://chess-results.com/tnr279375.aspx?lan=1

Myndaalbúm 

Landsmót hafið á Akureyri

Landsmót í skólaskák hófst í dag á Akureyri. Teflt er við góðar aðstæður í Rósenborg sem var áður Barnaskóli Akureyrar og þar áður Barnaskóli Íslands eins og hann eitt sinn hét. Flestir keppendur gista einnig í skólanum og þegar þessar línur eru ritaðar er hópurinn saman úti á fótboltavelli að hressa sig við eftir langa skátsetu og pizzuát.

Í dag voru tefldar fjórar atskákir. Gekk á ýmsu í þeim og margar jafnar og spennandi skákir tefldar. Í eldri flokki eru efstir og jafnir með þrjá og hálfan vinning þeir Hilmir Freyr Heimisson og Vignir Vatnar Stefánsson. Þeir gerðu tilþrifalítið jafntefli í þriðju umferð en hafa unnið örugga sigra í öðrum skákum sínum.

Í yngri flokki eru efstir með þrjá og hálfan vinning þeir Robert Luu og Benedikt Briem. Þeir gerðu jafntefli í vel tefldri skák. Róbert pressaði framan af skákinni en Benedikt varðist vel og færin voru hans megin undir lok skákarinnar.  

Klukkan tíu í fyrramálið hefst fimmta umferð og byrjar þá kappskákhluti mótsins.

Paranir flokkanna má sjá á tenglunum að neðan:

http://www.chess-results.com/tnr279319.aspx?lan=1&art=2&rd=5&wi=821

http://www.chess-results.com/tnr279386.aspx?lan=1&art=2&rd=5&wi=821

 

Róbert endurkjörinn forseti Vinaskákfélagsins

Aðalfundur Vinaskákfélagsins haldin þann 4 maí 2017.

Aðalfundur Vinaskákfélagsins var haldin þann 4 maí 2017. Öll almenn aðalfundastörf voru afgreidd, eins og skýrsla stjórnar, Uppgjör reikninga félagsins og lagabreytingar.

Sjálfkjörið var í flest embætti en þó dró einn varamaður sig til baka þegar áhugi kom frá öðrum í það embætti.

Hér er hin nýja stjórn:

Forseti: Róbert Lagerman

Varaforseti: Hörður Jónasson

Gjaldkeri: Héðinn Briem

Ritari: Hjálmar Sigurvaldason

Meðstjórnandi: Ingi Tandri Traustason

Varamaður 1: Aðalsteinn Thorarensen

Varamaður 2: Þorvaldur Ingveldarson

Verndari félagsins er sem fyrr Hrafn Jökulsson.

Tómas Veigar skákmeistari Hugins á Húsavík

Tómas Veigar Sigurðarson vann sigur á meistaramóti Hugins sem lauk 30. apríl sl. á Húsavík. Tómas fékk 4 vinninga af 5 mögulegum. Rúnar Ísleifsson, Smári Sigurðsson og Ævar Ákason urðu í 2-4. sæti með 3,5 vinninga hver en Rúnar hreppti 2. sætið, Smári 3. sætið og Ævar 4. sætið eftir stigaútreikning.

Tefldar voru 5 umferðir með tímamörkunum 90+30/leik og teflt var á Laugum, Húsavík og Vöglum.

Nokkur óvænt úrslit litu dagsins ljós í mótinu og ber það hæst óvænt tap Hermanns fyrir Piotr Wipior í 3. umferð og sömuleiðs óvænt tap Sighavts fyrir Andrzej Witala í lokaumferðinni.

Verðlaun voru afhent fyrir meistaramótið á lokaskákæfingu á Húsavík í gærkvöldi og þá voru meðfylgjandi myndir teknar.

Mótið á chess-results.

Nánar á heimasíðu Hugins.