Hjörvar í 1.-2. sæti í Wales

Stórmeistarinn Hjörvar Steinn Grétarsson (2550) vann enska alþjóðlega meistarann Jack Rudd (2213) í sjöttu umferð alþjóðlegs skákmóts í Cardiff í Wales í gær. Hjörvar hefur 5 vinninga og er efstur með 5 vinninga ásamt búlgarska stórmeistaranum Marian Petrov (2461). Þeir sitja einmitt að tafli núna er hægt að fylgjast með skák þeirra í beinni.

Birkir Karl Sigurðsson (1883) hefur 3 vinninga og einnig í beinni. Hann teflir við velska skákmanninn John Waterfield (1980).

Tvær umferðir fara fram í dag. Síðari umferð dagsins hefst kl. 16.

• Heimasíða mótsins
• Chess-Results
• Beinar útsendingar

Sumarskákmót í Vin á miðvikudaginn

Vinaskákfélagið & Hrókurinn bjóða til skákmóts í Vin, miðvikudaginn 13. júlí klukkan 13. Sex umferðir, 7 mínútna umhugsunartími. Veitingar að hætti hússins. Allir hjartanlega velkomnir.

Hjörvar í 2.-7. sæti í Wales - Guðmundur með fullt hús í Ankara - í beinni kl. 14 í dag

Hjörvar Steinn Grétarsson (2550) er í 2.-7. sæti á alþjóðlegu móti í Cardiff í Wales. Hjörvar hefur 4 vinninga eftir 5 umferðir. Í gær hlaut hann 1½ vinning í tveimur skákum. Birkir Karl Sigurðsson (1883) hefur 2½ vinning en hann gerði tvö jafntefli í gær. Sjötta umferð mótsins hefst í dag kl. 14.

Þá teflir Hjörvar við enska alþjóðlega meistarann Jack Rudd (2213) en Birkir við enska skákmanninn Joshua Huggs (2003). Þeir félagar verða í beinni.

• Heimasíða mótsins
• Chess-Results
• Beinar útsendingar 

Guðmundur Kjartansson (2442) hefur byrjað með miklum látum á alþjóðlegu móti í Ankara. Í morgun vann Anar Aliakbarov (2332) og hefur fullt hús eftir fjórar umferðir.

Fimmta umferð hefst kl. 14 og verður hægt að fylgjast með Gumma í beinni.

• Heimasíða mótsins
• Beinar útsendingar

Dortmund-mótið hófst í gær: MVL vann Caruana

Dortmund-mótið hófst í gær. Átta skákmenn taka þátt venju samkvæmt. Stigahæstur keppenda er, Hr. Dortmund, Vladmir Kramnik (2812), en hann hefur unnið mótið oftar en nokkur annar. Næstir í stigaröð keppenda eru Caruana (2810) og Vachier-Lagrave (2798). Þessir kappar eru í 2.-4. sæti á stigalista FIDE.

Kramnik gerði jafntefli við Dominguez (2713) í fyrstu umferð. Stóru tíðindi voru hins vegar þau að MVL (Maxime Vachier-Lagrave) lagði Caruana (2818), sigurvega mótsins tvö síðustu ár, að velli. 

Úrslit 1. umferðar:

 

 

 

 

 

 

MVL og Kramnik mætast í annarri umferð sem hefst kl. 13:15 í dag. 

 

• Heimasíða mótsins
• Beinar útsendingar (Chess24) - hefjast kl. 13:15

Skákþáttur Morgunblaðsins: Brögð og brellur á HM 50+ í Dresden

Eftir fjóra sigra í fyrstu umferðum HM skáksveita skipaðra skákmönnum 50 ára og eldri hefur íslenska sveitin misst dampinn, fyrst með því að tapa mikilvægri viðureign fyrir Armeníu og síðan kom fyrir Þjóðverjum. Ekki verður sagt að heppnin hafi verið með okkur þessa dagana, t.d. missti Jóhann Hjartarson niður afar vænlega stöðu gegn Vaganjan á fimmtudaginn og í gær voru bæði Jóhann og Jón L. Árnason með góð færi í miðtaflinu en töpuðu aftur. Af þessu má ráða að óraunhæft hafi verið að gera sér vonir um sigur fyrir fram þó að íslenska sveitin hafi verið sú stigahæsta í mótinu þegar lagt var af stað. Ýmsar aðrar sveitir virðast vera í betri æfingu og eru vanari hinum óvenjulega upphafstíma hverrar umferðar, kl. 9.30 að morgni. Eftir umferð gærdagsins eru Þjóðverjar efstir með 12 stig og síðan koma Armenar með 11 stig. Fram að þessu er það einungis Margeir Pétursson sem hefur teflt að fullum styrk, en hann hefur hlotið fjóra vinninga úr fimm skákum. En með góðum endaspretti er hægt að ná viðunandi árangri.

Heimsmeistaramótið er háð í tveimur aldursflokkum, 50 ára og eldri og 65 ára og eldri. Það fer fram í Radebeul, sem er úthverfi Dresden, en meðal þess sem hægt er að sjá og skoða er safn um útgefandann Karl May, mikinn ævintýramann sem kom undir sig fótunum með því að skrifa bókaflokk um indíána. Dómarinn úr „einvígi aldarinnar“, Lothar Schmid, átti og rak forlagið síðustu æviár sín.

Samsetning mótsins er þannig að ýmsir þýskir klúbbar geta verið með. Þannig tefldum við í fyrstu umferð við sveit skipaða hinum svonefndu Dettman-bræðrum, en styrkleikinn þar á bæ var æði misjafn. Einn bræðranna komst býsna nálægt því að ná jafntefli við greinarhöfund en smá brella gerði honum lífið leitt:

Gerd Dettman – Helgi

Hvítur hafði ekki tekið neina áhættu og stefndi að miklum uppskiptum og jafntefli. Það bærast ýmsar tilfinningar í brjósti þess sem gera sér vonir um ná sigri og hjá undirrituðum var það aðallega ergelsi yfir því að hafa villst út í þessa leiðinlegu stöðu. Ég hafði nýverið lagað peðastöðu mína með því að leika 25. ...h6-h5 en meira virtist ekki spunnið í þann leik. En peðið valdar g4-reitinn og sennilega hefur það komið bróður Dettman á óvart þegar ég bauð drottningaruppskipti og lék:

26. ... De6!

Hvítur gerir nú best í því að víkja drottningunni til en ég þóttist sjá að með 27 ... Rxe2+ 28. Dxe2 Db3 gæti svartur skapað sér einhver færi. Hvítur á hins vegar svarið 29. Ha1! og jafnteflið er ekki langt undan. En hann gekk í gildruna ...

27. Dxe6? Rxe2+ 28. Kf1 Rxc1!

Girt er fyrir allt aðgengi drottningarinnar að d1-reitnum og hvítur neyddist til að leika 29. Dd7 en eftir 29. ... Hxd7 30. Hxd7 Rb3 31. Hxb7 a5 vann svartur án teljandi erfiðleika.

Í fjórðu umferð vann íslenska sveitin öfluga þýska sveit, Thüringen, og það var Margeir sem tryggði sigurinn:

Margeir – Brüggeman

Andstæðingi Margeirs var umhugað um að verða ekki „kæfingarmát“ – 38. Rf7+ Kg8 39. Rh6+ Kh8 40 Dg8+! Hxg8 41. Rf7 mát – til að valda f7-reitinn kyrfilega lék hann 37. ... Hc8-c7. En samt kom:

38. Rf7+ Kg8

Eftir 38. .. Hcxf7 vaknar þemað mát í borði, 39. Dxf7! Hxf7 40. Hd8+ og mátar.

39. Rd8+ Kh8 40. Re6!

„Fjölskyldugaffall“. Svartur gafst upp.

Grein þessi birtist í Morgunblaðinu 2. júlí 2016

Skákþættir Morgunblaðsins

Guðmundur, Hjörvar, Birkir Karl og Dortmund í beinni í dag!

Skákáhugamenn sem hafa gaman að fylgjast með skákum beint á netinu geta tekið gleði sína eftir margar mjög rólegar vikur í skákheimi. Hvert mótið á fætur öðrum að skella á um þessar mundir. 

Guðmundur Kjartansson (2442) er í beinni í dag frá alþjóðlegu móti í Ankara í Tyrklandi. Í dag teflir hann við Gökhan Narman (2010) og hófst skákin kl. 7. Tvær umferðir eru tefldar í dag og hefst sú síðari kl. 14. Í gær vann hann mun stigalægri andstæðing í fyrstu umferð. 143 skákmenn taka þátt í mótinu og þar af eru tveir stórmeistarar. 

Beinar útsendingar

Skákmótið í Wales heldur einnig áfram í dag. Sú fyrri hefst núna kl. 9:30 en sú síðari kl. 16. Í fyrri umferð dagsins teflir Hjörvar Steinn Grétarsson (2550) við Wales-verjann Nigel Ralphs (2000) og Birkir Karl Sigurðsson (1883) við serbnesku skákkonuna Tihana Ivekovic (2129). Báðir eru þeir í beinni.

Hjörvar hefur 2,5 vinning eftir 3 umferðir en Birkir hefur 1,5 vinning.

Beinar útsendingar

Dortmund-mótið hefst kl. 13:30. Meðal keppenda eru Kramnik, Caruana og Vachier-Lagrave.

Beinar útsendingar. 

Hjörvar Steinn og Birkir Karl í beinni frá Wales

Hjörvar Steinn Grétarsson (2550) og Birkir Karl Sigurðsson (1883) hófu í gær taflmennsku á alþjóðlegu móti í Cardiff í Wales. Þeir tóku reyndar yfirsetu í fyrstu umferð en komu inn í annarri umferð sem einnig fór fram í gær. Þá unnu þeir báðir mun stigalægri andstæðinga. 

Þriðja umferðin er nýhafin. Hjörvar teflir við austurríska FIDE-meistarann Walter Braun (2207) og Birkir teflir við eitt lykilmanna Wales á Ólympíuskákmótum í 10 ár, Tim Kett (2209).

Hægt er að fylgjast með þeim í beinni. Umferðin hófst kl. 14. Tvær umferðir fara fram á morgun.

Alls taka 58 skákmenn þátt í mótinu og þar af fimm stórmeistarar.

• Heimasíða mótsins
• Chess-Results
• Beinar útsendingar 

Fjölbreytt dagskrá á uppskeruhátíð Hróksins á laugardaginn

Hrókurinn býður til uppskeruhátíðar laugardaginn 9. júlí milli klukkan 14 og 16 í Pakkhúsi Hróksins, Geirsgötu 11, við Reykjavíkurhöfn. Þar verður tafl og tónlist, vöfflur og bókamarkaður, myndasýning frá Grænlandi og kynning á starfi félagsins.

Hrókurinn hefur haft aðstöðu í vöruskemmu Brims sl. tvö ár og þar hefur verið miðstöð fatasöfnunar í þágu barna og ungmenna á Grænlandi. Fjölmargir hafa lagt söfnuninni lið og hefur mikið af góðum fatnaði farið til fjölmargra þorpa og bæja á Grænland og komið í góðar þarfir.

Á laugardag verður margt til gamans gert; Linda Guðmundsdóttir frá Finnbogastöðum í Trékyllisvík mun leika á harmónikku, Valdimar Tómasson mun stýra bókamarkaði í þágu verkefna Hróksins á Grænlandi og skákmeistarar tefla við gesti og gangandi.

Hróksliðar hafa á síðustu 12 mánuðum farið sex sinnum til Grænlands að útbreiða skák og vináttu, og fjölmargar ferðir eru á teikniborðinu. Hér heima hefur Hrókurinn síðan árið 2003 heimsótt Barnaspítala Hringsins flesta fimmtudaga, auk þess að halda uppi líflegu skákstarfi í þágu fólks með geðraskanir, aldraðra og barna. Þá efndi Hrókurinn í vor til afar vel heppnaðs MótX-einvígis milli stórmeistaranna Nigels Shorts og Hjörvars Steins Grétarssonar. Síðast en ekki síst stóð Hrókurinn fyrir afar vel heppnuðu skákmaraþoni í maí í þágu sýrlenskra flóttabarna og söfnuðust þrjár milljónir króna, sem runnu óskiptar til Fatimusjóðs og UNICEF.

Í nóvember veitti Hrafn Jökulsson forseti félagsins viðtöku viðurkenningu Barnaheilla -- Save the children fyrir starf í þágu barna á Íslandi og Grænlandi. Þá var Hrafn útnefndur máttarstólpi Vinjar, fræðslu- og bataseturs Rauða krossins og í janúar hlaut Hrókurinn viðurkenningu Minningarsjóðs Gunnars Thoroddsens.

Verkefni Hróksins næstu misseri verða kynnt á uppskeruhátíðinni, og má nefna skákmót í öllum landsfjórðungum, áframhaldandi skáklíf í Hringnum, Vin og víðar og þátttöku í ýmsu góðargerðarstarfi.

Allir eru hjartanlega velkomnir á uppskeruhátíð Hróksins.

Sólarmót Skákakademíunnar á fimmtudag

Á fimmtudaginn kemur verður heiðskýrt og hlýtt um alla borg. Skákakademía Reykjavíkur efnir því til Sólarmóts Skákakademíunnar í hádeginu. Taflið hefst 12:05 og tefldar verða fimm umferðir hraðskák. Mótið fer fram á Útitaflinu við Lækjargötu.

Unglingalandslið Íslands æfir grimmt þessa dagana undir Ólympíumót 16ára og yngri sem fram fer í Slóvakíu síðar í mánuðinum. Krakkarnir mæta til leiks í Sólarmótið og munu án efa skipa sér í efstu sætin.

Góð verðlaun fyrir efstu þrjú sætin.

Skráning á staðnum, fyrir 12:00.

Stórsigur gegn Skotum í lokaumferðinni - sjöunda sæti niðurstaðan

Gullaldarliðið vann skosku sveitina 3½-½ í lokaumferð heimsmeistaramóts skáksveita 50 ára og eldri sem fram fór í dag. Jóhann Hjartarson, Jón L. Árnason og Friðrik Ólafsson unnu sínar skákir í dag. Verr gekk hins vegar í gær en þá náði ensku skákmennirnir að hefna fyrir enska fótboltalandsliðið með sigri á okkar mönnum með minnsta mun. Íslenska sveitin endaði í sjöunda sæti en Þjóðverjar unnu nauman sigur á mótinu eftir harða baráttu við Armena. 

Úrslit 8. umferðar

 

 

 

Úrslit 9. umferðar

 

 

 

Íslensku skáksveitina skipuðu:

1. Jóhann Hjartarson (2547) 4 v. af 8
2. Helgi Ólafsson (2543) 5 v. af 8
3. Margeir Pétursson (2509) 6 v. af 8
4. Jón L. Árnason (2490) 5 v. af 8
5. Friðrik Ólafsson (2377) 3. v af 4

Lokastöðu mótsins má nálgast hér.

• Heimasíða Hróksins (ítarlegar fréttaflutningur
• Skákhornið (skákskýringar liðsstjóra)
• Heimasíða mótsins
• Beinar útsendingar (hefjast kl. 7:30)