Georgískir stórmeistarar reyndust Gumma erfiðir - góð niðurstaða engu að síður

Georgískir stórmeistarar reyndust Guðmundi Kjartanssyni erfiðir í lokaumferðunum tveimur á alþjóðlegu móti í Ankara í Tyrklandi. Í næstsíðustu umferð tapaði hann fyrir Konstanine Shanava (2526) og þeirri síðustu fyrir Girogi Bagaturov (2407). Niðurstaðan engu að síður góð hjá Gumma. Hann hlaut 6½ vinning og endaði í 8.-11. sæti.

Frammistaðan samsvaraði 2448 skákstigum og hækkar um hann 6 dýrmæt skákstig. 

 

• Heimasíða mótsins
• Beinar útsendingar

Stefán sigurvegari á Sólarmóti Skákakademíunnar

Sólarmót Skákakademíunnar fór fram í síðustu viku. Tefldar voru fimm umferðir á mótinu sem fór fram á útitaflinu við Lækjargötu. Sautján vaskir keppendur voru mættir til leiks. Í hópnum voru m.a. liðsmenn Ólympíusveitar Íslands 16ára og yngri sem mun síðar í mánuðinum tefla á Ólympíumótinu sem fer fram í Slóveníu. Einnig var gaman að þátttöku Hallgerðar Helgu Þorsteinsdóttur landsliðskonu sem er nú stödd hér á landi og undirbýr sig fyrir Ólympíumótið í Bakú.

Eins og jafnan í svo stuttum mótum þá ná ekki allir sterkustu skákmennirnir að tefla innbyrðis. Þeir félagar Björn Ívar Karlsson og Stefán Bergsson gerðu jafntefli í fyrstu umferð en gáfu svo öðrum keppendum engin grið og kom Stefán sjónarmun undan Birni í mark á hærri stigum.

Nánari úrslit hér:http://chess-results.com/tnr230408.aspx?lan=1&art=1&wi=821

 

 

 

Bilbao-mótið hefst í dag: Carlsen og Karjakin meðal keppenda - fjör í Dortmund

Ofurmótið í Bilbaó hefst í dag. Meðal keppenda eru Magnus Carlsen (2855) og áskorandinn Sergey Karjakin (2773) en þeir mætast í heimsmeistaraeinvígi í New York nóvember nk. Aðrir keppendur á mótinu eru Hikaru Nakamura (2787), Anish Giri (2785), Wesley So (2770) og Wei Yi (2696). Tefld er tvöföld umferð, alls 10 skákir.  

Í umferð dagsins teflir Carlsen við Nakamura, Karjakin við So og Giri við Wei Yi.

• Heimasíða mótsins
• Beinar útsendingar (hefjast kl. 14)

Bilbao-ofurmótið er ekki eina ofurmótið í gangi því sterkt mót er einnig haldið í Dortmund. Þar hefur taflmennskan verið kröftugleg. Eftir 3 umferðir eru Maxime Vachier-Lagrave (2798) og Kúbumaðurinn Lenier Dominguez (2713) efstir með 2 vinninga. Fjórða umferð hefst kl. 13:15.

• Heimasíða mótsins
• Beinar útsendingar (Chess24) - hefjast kl. 13:15

Sumarskákmót í Vin í dag

Vinaskákfélagið & Hrókurinn bjóða til skákmóts í Vin, miðvikudaginn 13. júlí klukkan 13. Sex umferðir, 7 mínútna umhugsunartími. Veitingar að hætti hússins. Allir hjartanlega velkomnir.

Sumarskákmót í Vin í dag klukkan 13 - Allir velkomnir

Vinaskákfélagið og Hrókurinn bjóða til Sumarskákmóts í Vin, Hverfisgötu 47, miðvikudaginn 13. júlí klukkan 13. Tefldar verða sex umferðir með 7 mínútna umhugsunartíma. Í leikhléi verða veitingar að hætti hússins og eru allir hjartanlega velkomnir.

Vinaskákfélagið var stofnað árið 2003 í kjölfar þess að Hróksmenn komu fyrsta skipti í heimsókn í Vin, sem rekið er af Rauða krossinum í Reykjavík. Síðan hefur skáklífið blómstrað og er Vinaskákfélagið eitthvert líflegasta og skemmtilegasta skákfélag landsins.

Á nýliðnu Íslandsmóti skákfélaga sigraði A-sveit Vinaskákfélagsins með miklum yfirburðum í 3. deild og B-sveitin hreppti brons í 4. deild.

Nýlega gengu hinir vösku skákkempur Áttavilltra til liðs við Vinaskákfélagið, sem mun tefla fram a.m.k. þremur sveitum á Íslandsmótinu í vetur.

Forseti Vinaskákfélagsins er Róbert Lagerman og varaforseti Hrafn Jökulsson. Burðarásar í starfi félagsins eru Hörður Jónasson og Hjálmar Hrafn Sigurvaldason sem undanfarið ár hafa m.a. staðið fyrir vikulegum skákæfingum í Hlutverkasetrinu.

Fastar æfingar eru í Vin á mánudögum kl. 13, en þar er teflt alla daga.

90 ára afmælismót Taflfélags Vestmannaeyja

Helgina 10.-11. september 2016 fer fram atskákmót í Eyjum í tilefni af  90 ára  afmæli Taflfélags Vestmannaeyja.

Keppendur verða ýmist úr Eyjum eða fastalandinu. Reiknað er með flestir keppendur ofan af landi komi með Herjólfi laugardaginn 10. sept. frá Landeyja-höfn kl. 09.45 og komið til Eyja  um kl. 10.30.  Akstur frá Reykjavík til Landeyjahafnar tekur tæplega  2,0 klst. og þurfa farþegar og ökutæki að vera mætt 30 mín. fyrir brottför Herjólfs frá Landeyjahöfn.  Algengt er  að farþegar geymi ökutæki sín á bílastæðum í Landeyjahöfn meðan á dvöl þeirra í Eyjum stendur.

Næsta  ferð til Landeyjahafnar frá Eyjum að loknu skákmótinu  er kl. 18.30  sunnudaginn 11. sept.  og nú síðasta þann dag  kl.  21.00 um kvöldið. Mæting um borð  30 mín. fyrir brottför.

Tefldar verða níu umferðir, umhugsun 20 mín.  á  skák  auk 5 sek. á hvern leik.  Reiknað er með að hver umferð taki um 60 mín.

Laugardagur 10. sept. 2016

Kl. 12.00 – 17.00  Tefldar verða fimm umferðir fyrri daginn.

Kl. 17.00 – 18.00   Skoðunarferð með rútu um Heimaey.

Sunnudagur 11. sept. 2016

Kl. 12.00 - 16.00   Tefldar verða fjórar umferðir seinni daginn.

Kl. 16.30 – 17.00   Mótsslit og verðlaunahending.

Ekkert þátttökugjald er á  atskákmótið og í  skoðunarferðina.

Fyrstu verðlaun  verða 75 þús. kr.,  önnur verðlaun  kr. 50 þús. kr. og þriðju verðlaun  kr. 25 þús. kr.

Nánari upplýsingar um ferðir til  og frá Eyjum á  herjolfur.is  og gistingu í Eyjum  á visitvestmannaeyjar.is  Skráning þátttakenda á mótið á netfangið [e-mail]

Afmælisnefnd Taflfélags Vestmannaeyja.

Guðmundur efstur í Ankara

Guðmundur Kjartansson (2442) heldur áfram að gera frábæra hluti á alþjóðlegu móti í Ankara í Tyrklandi. Eftir sjö umferðir hefur hann 6½ vinning. Í morgun lagði hann aserska FIDE-meistarann Shahriyar Rahamov (2321) að velli. Gummi er efstur ásamt georgíska stórmeistaranum Konstantine Shanava (2526). Þeir mætast í áttundu umferð sem hefst kl. 14 í dag. Hægt er að fylgjast með Gumma í beinni.

Lokaumferðin hefst svo kl. 7 í fyrramálið. 

• Heimasíða mótsins
• Beinar útsendingar

Hjörvar með vinningsforskot í Cardiff - búlgarskir stórmeistarar lagðir að velli

Stórmeistarinn Hjörvar Steinn Grétarsson (2550) hefur vinningsforskot á alþjóðlegu skákmóti sem fram fer í Cardiff í Wales. Átta umferðum af tíu er lokið á mótinu. Í gær voru tveir búlgarskir stórmeistarar á matseðli Hjörvars. Það voru Marian Petrov (2461) og Boris Chatalbashev (2545). Hjörvar hefur 7 vinninga. Í 2.-3. sæti eru Petrov og enski stórmeistarinn Peter Wells (2419). 

Hjörvar mætir Wells í níundu og síðustu umferð sem hefst kl. 16 í dag. Birkir Karl Sigurðsson (1883) hefur 4 vinninga og er um miðbik mótsins. 

• Heimasíða mótsins
• Chess-Results
• Beinar útsendingar

Skáktilboð á tónleika Soryang Yoo í Norðurljósasal Hörpu á laugardaginn

Vakin er athygli á tónlistarviðburði, sem Skáksamband Íslands stendur fyrir í Norðurljósasal Hörpu, laugardaginn 16. júlí nk., en þar kemur fram píanistinn SoRyang Yoo, sem borin er og barnsfædd í Seoul í S-Kóreu. Henni var á unga aldri spáð miklum frama í tónlistinni og hafði þegar 11 ára að aldri unnið til fjölda tónlistarverðlauna í heimalandi sínu. 16 ára gömul yfirgaf hún heimabæ sinn og hélt til Evrópu til að afla sér frekari menntunar í tónlistinni.

Hún útskrifaðist frá Folkvang-Tónlistarháskólanum í Essen með prófgráðu sem konsert píanisti, innritaðist að því loknu í Tón-og sviðslistaskólann í Vínarborg og lauk þaðan prófi sem Master of Arts.  Síðan þá hefur SoRyang haldið tónleika víða um lönd, aðallega í Evrópu. Hún er vel þekkt fyrir túlkun sína á Mozart og heldur reglulega tónleika, þar sem verk hans eru flutt, í Mirabell-höllinni í Salzburg, Mozart-húsinu og í St. Péturskirkjunni í Vínarborg.  

Líklega er SoRyang kunnust fyrir að hafa flutt músíkina úr tónlistarsölunum út á „opin svæði“ borganna og þannig gefið almenningi kost að á njóta klassískra verka hinna miklu meistara. Hún hefur  haldið tónleika á ýmsum sögufrægum stöðum, m.a í Vínarborg og ýmsum öðrum borgum í Evrópu. Þetta hefur borið hróður SoRyang víða, langt út fyrir hið nýja heimaland hennar, Austurríki. 

Þeim sem hafa hug á að vita meira um SoRuyang er hægt að benda á vefsíðu hennar eða þá "gúgla" SoRyang Yoo, SoRyang pianiste, eða eitthvað í þá veru. Þar er að finna mikinn fróðleik um feril hennar auk fjölda hljóðdæma frá tónleikum hennar.

Tildrög þessara tónleika eru í stuttu máli þau að Friðrik Ólafsson, stórmeistari, kynntist SoRyang á skákhátíð í Dresden sem hann hefur sótt undanfarin ár, en það er sambýlismaður SoRyang, Dr. Rainer Maas, sem staðið hefur fyrir skákhátíðinni í samvinnu við borgaryfirvöld í Dresden og skákhreyfinguna þar í borg. Þess má geta að Dr.Maas, sem rekur öflug fyrirtæki í byggingariðnaðinum í Dresden og víðar, er einlægur aðdáandi skáklistarinnar og hefur látið gott af sér leiða í hennar þágu. Er nú Dresden talin sú borg í Þýskalandi þar sem skáklífið stendur með hvað mestum blóma og eru þó margar um hituna.

Til þess að gera langa sögu stutta þá hafði Dr. Maas samband við Friðrik fyrir nokkru og tjáði honum áhuga þeirra SoRyang á því að koma til Íslands í sumar og ferðast hér um. Hann gat þess í leiðinni að SoRyang gæti vel hugsað sér að halda hér einn konsert eða svo. Brást Skáksamband Íslands vel við óskinni og tók að sér skipulagningu tónleikanna.

Meiri upplýsingar um tónleikana er að finna á vefsíðu Hörpu.

Kaupa miða með 20% afslætti

Guðmundur á toppnum í Ankara

Guðmundur Kjartansson (2442) hefur 5½ vinning eftir sex umferðir á alþjóðlegu móti sem fram fer í Ankara í Tyrklandi. Í fimmtu umferð vann hann tyrkneska alþjóðlega meistarann Mert Erdogdu (2451) og í sjöttu umferð sem fram fór í morgun gerði hann jafntefli við moldóska alþjóðlega meistarann Vladimir Hamitevici(2475). 

Aðeins ein umferð er tefld í dag en á morgun eru tvær umferðir. Hefjast þær kl. 7 og 14.

• Heimasíða mótsins
• Beinar útsendingar