Hannes endaði í 14.-31 sæti

Stórmeistarinn Hannes Hlífar Stefánsson (2431) hlaut 6½ vinning og endaði í 14.-31. sæti (20. sæti á stigum) á Hasselbacken-mótinu í Stokkhólmi sem lauk í dag. Hann vann norska FIDE-meistarann Sebastian Mihajlov (2343) í lokaumferðinni. Guðmundur Kjartansson (2457) tapaði í fyrir paragvæska stórmeistaranum Axel Bachmann (2621) og endaði í 32.-50 sæti (38. á stigum) með 6 vinninga.

Frammistaða Hannesar samsvaraði 2537 og hækkar hann um 2 skákstig. Frammistaða Guðmundar samsvaraði 2485 skákstigum og hækkar hann um 6  skákstig.

Þeir félagar halda á morgun til Gjakova í Kosovo til að taka þátt í EM einstaklinga sem fram fer þar 12.-23. maí.

Alls tóku 387 skákmenn þátt í mótinu frá 53 löndum. Þar af voru 39 stórmeistarar. Hannes var nr. 24 í stigaröð keppenda en Guðmundur var nr. 37.

• Heimasíða mótsins
• Beinar útsendingar (hefjast kl. 12)
• Chess-Results

 

Skákmót öðlinga: Skákir sjöttu umferðar

Þórir Benediktsson hefur slegið inn skákir sjöttu umferð Skákmóts öðlinga sem nú er í gangi. Þær fylgja með sem viðhengi.

Stefán Arnalds er fremstur meðal jafningja á því móti eins og sjá má á heimasíðu TR.

 

 

Landsmótið: Vignir Vatnar hefur tryggt sér sigur - mikil spennan í eldri flokki

Vignir Vatnar Stefánsson (2227) hefur tryggt sér sigur í yngir flokki Landsmótsins í skólaskák þótt að einni umferð sé enn ólokið. Hann hefur 1½ vinnings forskot á Róbert Luu (1684) sem er annar. Stephen Briem (1538) og Alaxender Oliver Mai (1741) koma næstir með 4 vinninga.

Mótstöfluna má finna á Chess-Results.

Gríðarlega spenna er í eldri flokki og þar stefnir flest til að grípa þurfi til aukakeppni að loknu móti. Tvíburarnir, Björn Hólm (1946) og Bárður Örn Birkissynir (2052), Aron Þór Mai (1837) og Hilmir Freyr Heimisson (2079) eru efstir og jafnir með 4½ vinning. 

Mótstöflu má nálgast á Chess-Results.

Lokaumferðin hefst kl. 10 í Smáraskóla.

Skákþáttur Morgunblaðsins: Loksins vann Magnús Carlsen á heimavelli

Annað veifið gefst manni kostur á því að tefla upp skák sem skilur eftir þá tilfinningu að vart sé hægt að gera betur – snilld er orðið sem kemur upp í hugann þegar sigurskák Magnúsar Carlsen yfir Vladimír Kramnik úr sjöundu umferð norska skákmótins er skoðuð. Með sigrinum náði Magnús vinnings forskoti á næstu menn en glutraði því niður strax í næstu umferð þegar hann hann tapaði fyrir Levon Aronjan, sem með því tókst að komast upp við hlið Magnúsar í toppnum. Í lokaumferðinni í gær vann Magnús hins vegar Úkraínumanninn Eljanov en á sama tíma gerði Aronjan jafntefli. Þar með varð ljóst að heimsmeistarinn hafði unnið sitt fyrsta stórmóti í heimalandinu sínu. Lokaniðurstaðan varð þessi:

1. Magnús Carlsen 6 v. (af 9 ) 2. Aronjan 5½ v. 3.-5. Vachier-Lagrave, Kramnik og Topalov 5 v. 6.-7. Harikrishna og Li Chao 4½ v. 8. Giri 4 v. 9. Eljanov 3 v. 10. Grandelius 2½ v.

Eftir slælega frammistöðu á EM landsliða sl. haust hefur Magnús Carlsen nú unnið öll þau fjögur mót sem hann hefur tekið þátt í. Í skákinni við Kramnik kom upp byrjun sem margoft hefur sést áður. Svartur sat uppi með að því er virtist meinlausa veikleika en þegar fram liðu stundir snerist baráttan meira og minna um þessa galla:

Magnús Carlsen – Vladimir

Kramnik

Drottningarbragð

1. d4 d5 2. c4 e6 3. Rc3 Rf6 4. cxd5 exd5 5. Bg5 c6 6. e3 Bf5 7. Df3 Bg6 8. Bxf6 Dxf6 9. Dxf6 gxf6 10. Rf3 Rd7 11. Rh4 Be7 12. Re2 Rb6 13. Rg3

Með liðsflutningi riddaranna herjar hvítur strax á f5-reitinn þó að ávinningurinn sé ekki augljós.

13. ... Bb4 14. Kd1 Ra4 15. Rgf5!

Einfalt leikbragð sem byggir á hugmyndinni 15. ... Rxb2+ 16. Kc2 Rc4 17. Bxc4 dxc4 18. Hhb1 os.frv.)

15. ... Kd7 16. Hb1 Ke6 17. Bd3 Hhc8 18. Ke2 Bf8 19. g4 c5 20. Rg2 cxd4 21. exd4! Bd6 22. h4! h5 23. Rg7+ Ke7 24. gxh5 Bxd3 25. Kxd3 Kd7 26. Re3 Rb6 27. Rg4 Hh8 28. Hhe1 Be7 29. Rf5 Bd8 30. h6 Hc8 31. b3! Hc6 32. Rge3 Bc7 33. Hbc1 Hxc1 34. Hxc1 Bf4 35. Hc5 Ke6 36. Rg7 Kd6 37. Rg4 Rd7 38. Hc2 f5

Lætur annað peð af hendi, Kramnik var hálfpartinn í leikþröng.

39. Rxf5+ Ke6 40. Rg7+ Kd6 41. He2 Kc6 42. He8 Hxe8 43. Rxe8 Rf8 44. Re5+! Bxe5 45. dxe5 Kd7 46. Rf6+ Ke6 47. h5 Kxe5 

48. Rd7+! Rxd7 49. h7 Rc5+ 50. Ke2

– og Kramnik gafst upp. 

 

 

 

 

 

 

 

Kasparov í kröppum dansi í Missouri

Garrí Kasparov er aftur í sviðsljósi skákarinnar. Þátttaka hans í tveggja daga hraðskákmóti sem hófst sl. fimmtudag í St. Louis í Bandaríkjunum og lauk í gær, þar sem hann tefldi ásamt þrem öflugustu stórmeisturum Bandaríkjanna, Nakamura, Caruana og So, hefur vakti gífurlega athygli og útsendingar á vefsíðunni Chess24 verið frábær skemmtun. Tímamörkin voru 5 3 Bronstein og tefldu þeir sexfalda umferð. Þótt Kasparov virkaði svolítið ryðgaður þegar taflið hófst á fimmtudaginn tókst honum samt að yfirspila andstæðinga sína en lék stundum herfilega af sér í tímahraki. En í gær fékk „skrímslið með þúsund augun“ útreið sem lengi verður í minnum höfð. Það var eins og Suðurríkjamaðurinn sem lagði „Gamla heiminn“ að fótum sér um miðja 19. öld, Paul Morphy, væri að tefla í gegnum gegnum Filippseyinginn, slík voru tilþrifin. Eftir 15 umferðir af 18 var staðan: 1. Nakamura 9½ v. 2. So 8 v 3. Kasparov 7 v. 4. Caruana 5½ v.

Grein þessi birtist í Morgunblaðinu 30. april 2016

Skákþættir Morgunblaðsins

Aron Þór og Vignir Vatnar efstir á Landsmótinu í skólaskák

Landsmótið í skólaskák hófst í gær í Smáraskóla í Kópavogi. Að þessu sinni er nýtt fyrirkomulag á mótinu en tefldar eru 7 umferðir eftir svissneska kerfinu. Þrjár atskákir og fjórar kappskákir.

Þegar fjórum umferðum er lokið er Aron Þór Mai (1837), Reykjavík, efstur í eldri flokki með 3,5 vinninga. Björn Hólm Birkisson (1946), Reykjanesi, Hilmir Freyr Heimisson (2079), Vestfjörðum, og Jón Þór Lemery (1585), Reykjavík, í 2.-4. sæti með 3 vinninga.

Mótstöflu má nálgast á Chess-Results.

Vignir Vatnar Stefánsson (2227), Kópavogi, er efstur með fullt hús í yngri flokki. Alexander Oliver Mai (1741), Reykjavík, og Róbert Luu (1684), Reykjanesi, eru í 2.-3 sæti með 3 vinninga..

Mótstöflu má nálgast á Chess-Results.

Tvær umferðir eru tefldar í dag. Sú fyrri hefst kl. 11 og sú síðari kl. 17.

 

Aðalfundur Skáksambands Íslands haldinn á morgun í húsnæði SÍ

Aðalfundur Skáksambands Íslands verður haldinn á morgun í húnsæði SÍ, Faxafeni 12. Inngangur að vestan. Fundurinn hefst kl. 10 í fyrramálið.

Lagabreytingatillögur og önnur viðhengi má finna hér.

Afreks-og æfingameistarar Fjölnis 2016

Vikulegar skákæfingar Fjölnis á miðvikudögum hafa undantekningarlaust verið afar vel sóttar í vetur. Um 30 - 40 börn og unglingar hafa mætt á hverja einustu æfingu, bæði drengir og stúlkur. Á síðustu æfingu vetrarins voru krýndir afreks-og æfingameistarar vetrarins líkt og undanfarin ár. Sæmundur Árnason fyrirliði skáksveitar Foldaskóla hlaut afreksbikarinn að þessu sinni og Ágúst Ívar Árnason í Rimaskóla var valinn æfingameistari vetrarins en þar var valið erfitt þar sem fjöldi Fjölniskrakka voru með 100% mætingu.

 

Í fyrsta sinn var verðlaunað fyrir peðaskák. Leikskólabarnið Svandís Gunnarsdóttir er óumdeilanlega peðaskákdrottning Fjölnis því þessi væntanlegi Rimaskólanemi varð í 1. - 3. sæti á Peðaskákmóti Fjölnis á sumardaginn fyrsta og var einnig efst stúlkna á Peðajólaskákmóti Hugins í des. sl.

Helgi Árnason formaður skákdeildar Fjölnis hefur haft umsjón með Fjölnisæfingunum í vetur og haft unga og efnilega Fjölnisskákmenn sér til aðstoðar ásamt hópi foreldra sem hefur séð um veitingar og aðra ómetanlega aðstoð við þessar fjölmennu skákæfingar. 

Hannes í 4.-17. sæti í Stokkhólmi

Hannes Hlífar Stefánsson (2581) vann flottan sigur á Svíanum Jonas Lundvik (2204) í sjöttu umferð Hasselbacken-mótsins í gær. Hannes hefur 5 vinninga og er í 4.-17. sæti. Guðmundur Kjartansson (2457) tapaði fyrir franska stórmeistaranum Vladislav Tkachiev (2660) og hefur 4 vinninga.

Í sjöundu umferð teflir Hannes við indverska stórmeistarann Gujrathi Vidid Santosh (2648) en Guðmundur við sænska FIDE-meistarann Rolf Bergström (2298).

Umferð dagsins hefst kl. 12 og verða skákir beggja sýndar beint. 

Alls taka 387 skákmenn þátt í mótinu frá 53 löndum. Þar af eru 39 stórmeistarar. Hannes er nr. 24 í stigaröð keppenda en Guðmundur er nr. 37.

• Heimasíða mótsins
• Beinar útsendingar (hefjast kl. 12)
• Chess-Results

 

Sviptingar á Öðlingamótinu – Stefán efstur

Það var sannarlega hart barist í sjöttu og næstsíðustu umferð Skákmóts öðlinga sem fram fór í fyrrakvöld þar sem fjórum orrustum af ellefu lauk með skiptum hlut. Á efsta borði lagði hinsvegar Stefán Arnalds (2007) Ólaf Gísla Jónsson (1904) með svörtu eftir að hafa verið mjög tæpur á tíma drjúgan hluta skákar sem telst reyndar ekki til tíðinda þegar Stefán á í hlut. Jafntefli varð á öðru borði þar sem Sigurður Daði Sigfússon (2299) stýrði hvítu gegn Þorvarði F. Ólafssyni (2195) en útlit var fyrir sigur þess fyrrnefnda vegna afar tæps tíma Þorvarðar. Sigurður Daði notaði hinsvegar skyndilega tíma sinn nánast í botn og skömmu síðar gátu þeir félagar lítið annað gert en rétt fram sáttarhönd.

Á þriðja borði hafði Siguringi Sigurjónsson (1971) betur gegn Árna H. Kristjánssyni (1894) og heldur því áfram í baráttu efstu manna. Ekkert var um óvænt úrslit ef frá er skilinn öruggur sigur Kristjáns Geirssonar (1492) á Herði Garðarssyni (1731) en styrkur Kristjáns er augljóslega mun meiri en stigin segja til um enda er hann að hala inn um 80 Elo-stigum.

Fyrir lokaumferðina er Stefán Arnalds efstur með 5 vinninga en hann hefur hvítt gegn hinum margreynda Þór Valtýssyni næstkomandi miðvikudagskvöld. Jafnir í 2.-3. sæti með 4,5 vinning eru Þorvarður og Siguringi en þeir mætast innbyrðis. Fjórir keppendur koma næstir með 4 vinninga og því ljóst að úrslit ráðast ekki fyrr en síðla miðvikudagskvölds en klukkurnar verða settar í gang á slaginu 19.30.

Minnum jafnframt á hraðskákmót öðlinga sem fer fram miðvikudaginn 18. maí en að því loknu mun fara fram verðlaunaafhending fyrir Skákmót öðlinga.

• Heimasíða TR
• Chess-Results

Vignir Vatnar vann Hemmamót Vals

Vignir Vatnar Stefánsson varð efstur á Hemmamóti Vals, keppninni um Vals-hrókinn, sem fram fór í Lollastúku í félagsmiðstöð Vals að Hlíðarenda ígær. Tefldar voru níu umferðir eftir tímamörkunum 4 2 . Alls hófu 26 skákmenn keppni og átti Vignir í harðri keppni við Björn Ívar Karlsson sem varð annar með 8 vinninga. Þeir gerðu jafntefli í innbyrðis skák en Björn missti ½ vinning niður í skák sinni í skák sinni við Davíð Kjartansson og það gerði gæfumuninn. Róbert Harðarson varð svo í þriðja sæti með 7 vinninga.

 

Gamall vinur Hermanns Gunnarssonar, Gunnar Kristjánsson lék fyrsta leikinn fyrir stigahæsta keppendann, Davíð Kjartansson, sem tefldi við Óskar Víking Davíðsson og tapaði óvænt.  Áður en Gunnar lék drottningarpeðinu tvo reiti fram fyrir Davíð sagði Gunnar stutta en smellna sögu af Hemma sem var eitthvað á þá leið að fyrir margt löngu hafi nokkrir ferðafélagar Hermanns viljað taka eina skák og bauðst Hermann þá til að tefla við þá. Þeir aftóku það og sögðu að Hermann væri miklu betri og myndi alltaf vinna. „En ég skal þá tefla með vinstri hendi. Kannski eigið þið meiri möguleika þá,“ sagði Hemmi.  

 

Þetta var fjórða árið í röð sem keppnin um Valshrókinn fer fram en bikarinn, sem er úr tré, var upphaflega gefinn af Jóhanni Eyjólfssyni fyrrverandi formanni Vals. Bikarinn kom í leitirnar eigi alls fyrir löngu og í tilefni þess ákvað Halldór Einarsson, HENSON, sem er formaður skákdeildar Vals að blása aftur lífi í Valsmótið. Samstarfsaðilar skákdeildar Vals voru Skáksamband Íslands og Skákskóli Íslands. Skákstjórar voru Helgi Ólafsson, Björn Ívar Karlsson, Kristján Örn Elíasson, Róbert Harðarson og Vigfús Vigfússon.  

Vignir Vatnar fær Valshrókinn til varðveislu fram að næsta móti en auk þess fékk hann ársmiða á leiki Vals í knattspyrnu og sérhannaða landsliðstreyju Tólfunnar, sem er hinn harðsnúni stuðningshópur íslenska landsliðsins í knattspyrnu sem keppir á EM í Frakklandi í næsta mánuði. Björn Ívar fékk einnig Tólfu-treyju og ársmiða og Róbert fékk Tólfu-treyjuna í 3. verðlaun. Allir  keppendur 16 ára og yngri fengu treyju frá HENSON og var úr nokkrum tegundum að velja. Í mótslok var dreginn úr rásnúmerum keppenda og kom upp talan sex, rásnúmer Gunnars Freys Rúnarssonar sem þar með getur fylgst með leikjum félagsins sem hann hóf að æfa með barn að aldri.

Mótstöflu má finna á Chess-Results.

Myndaalbúm (KÖE og BÍK)