Ársskýrsla SÍ starfsárið 2015-16

Ársskýrsla SÍ fyrir starfsárið 2015-16 er nú aðgengileg á rafrænu formi. Hægt er að nálgast hana hér. 

 

Skrár tengdar þessari bloggfærslu:

• Ársskýrsla SÍ 2015-16

Saga Reykjavíkurskákmótsins í 50 ár fékk útgáfustyrk Miðstöðvar íslenskrar bókmennta

Miðstöð íslenskra bókmennta veitti fyrir skemmstu síðari bók Helga Ólafssyni um sögu Reykjavíkurskákmótsins í 50 ár 500.000 kr. útgáustyrk. Fyrri bókin var einnig styrkt af Miðstöðinni. 

Bækurnar hafa fengið mjög góða dóma í skáksamfélaginu og ljóst er að hún fellur einnig í góða dóma meðal þeirra sem þekkja best til bókmennta hérlendis. Skrif Helga þykja afar lipur og enginn þekkir sögu Reykjavíkurskákmótsins betur en hann. 

Skáksamband Íslands vill þakka Miðstöðinni fyrir ómetanlega aðstoða við varðveita hinu mikilvægu sögu Reykjavíkurskákmótsins.

Nánar hér.

 

EM einstaklinga hefst í dag - Björn í beinni

EM einstaklinga hefst í dag í Gjakvoa í Kósóvó. Fjórir íslenskir skákmenn taka þátt. Stórmeistararnir Hannes Hlífar Stefánsson (2581) og Héðinn Steingrímsson (2574) og alþjóðlegu meistararnir Guðmundur Kjartansson (2457) og Björn Þorfinnsson (2410). 

Ritstjóri Skák.is er einn starfsmanna mótsins en hann er í áfrýjunarnefnd mótsins. Ritstjóri stefnir á reglulega myndskeytta pistla frá skákstað og kemur sá fyrsti væntanlega í dag. Smá fyrirvara verður að hafa þar sem internettenging hefur ekki verið upp á marga fiska á hótelinu okkar. 

50 efstu skákirnar verða beint í hverri umferð. Björn verður sá eini sem verður í beinni í dag en hann teflir við úkraínska stórmeistarann, með erfiðaða nafnið, Yuriy Kryvoruchko (2691). Hinir tefla allir við mjög stigalága andstæðinga - jafnvel stigalausa!

Alls taka 239 skákmenn þátt í mótinu og þar af 103 stórmeistarar! Hannes er nr. 71 í stigaröð keppenda, Héðinn nr. 76, Gummi nr. 115 og Björn nr. 128. Baráttan stendur um það að verða meðal 23 efstu en þau sæti gefa keppnisrétt á Heimsbikarmótinu í Batumi í Georgíu á næsta ári. 

Nánar síðar í dag!

• Heimasíða mótsins
• Beinar útsendignar (kl. 13:30)
• Chess-Results

 

Jón bikarmeistari SA

Síðastliðið mánudagskvöld réðust úrslitin í bikarmóti Skákfélags Akureyrar. Keppnin fór þannig fram að dregið var um keppendur í hverri umferð og eftir þrjú töp féllu menn úr keppni.  Þrír keppendur voru eftir þegar sest var að taflborðinu á mánudagskvöldið, þeir Andri Freyr Björgvinsson, Símon Þórhallsson og Jón Kristinn Þorgeirsson. Andri hafði tapað 2,5 vinningi, Símon 2 en Jón Kristinn var taplaus og sat yfir í fyrstu umferð kvöldsins.

Viðureign Símonar og Andra var því keppni um hvor fengi að mæti Jóni í einvígi um titilinn. Svo fór í þeirri skák að Andri tefldi stíft til vinnings, enda dugði honum ekki jafntefli. Um tíma stóð hann mun betur en Símon náði gagnsókn sem auðveldlega gat leitt til þráteflis. Það gat Andri ekki sætt sig við og að lokum fór svo að hann tapaði.
Þá settust Símon og Jón að tafli. Símon stýrði hvítu mönnunum og upp kom Kóng-indversk vörn. Hart var barist en svo fór að lokum að Jón snéri á Símon og sigraði. Þar með féll Símon úr keppni og Jón stóð því uppi sem sigurvegari og það án þess að hafa tapað svo mikið sem hálfum vinningi.

Glæsilega gert hjá Jóni.

Nánar á heimasíðu SA

Vormót Víkingaklúbbsins fer fram á morgun

Vormót Víkingakĺúbbsins verður haldið miðvikudaginn 11. mai og hefst það kl. 17.15. Tefldar verða 6. umferðir með 7 mínútna umhugsunartíma á mann og hefst mótið kl. 17.15. Allir krakkar eru velkomnir og þátttaka er ókeypis. Veitt verða verðlaun fyrir þrjú efstu sætin i mótinu, auk þess sem veitur verður verlaunapeningur fyrir efsta keppandi í hverjum árgangi, auk þess sem þrjár efstu stúlkur fá verðlaunapening. Skákstjóri á mótinu verður Stefán Bergsson

Skráning á mótið fer m.a fram á netfangið: vikingaklubburinn(hjá)gmail.com, en einnig er hægt að skrá sig á staðnum. Tilgreina skal nafn og fæðingarár. Við vonumst til að sjá sem flesta.

Heimilisfang hér:Knattspyrnufélagið Víkingur Traðarlandi 1, 108 Reykjavík

Skákæfingar í Víkinni fyrir börn og unglinga halda svo áfram alla miðvikudaga fram í miðjan júní.

MótX-einvigið 2016: Hjörvar Steinn og Nigel Short mætast í Salnum

Goðsögnin Nigel Short og Hjörvar Steinn Grétarsson, yngsti stórmeistari Íslands, mætast í MótX-einvíginu í Salnum í Kópavogi, helgina 21.-22. maí. Skákfélagið Hrókurinn skipuleggur þennan stórviðburð í íslensku skáklífi, og má búast við mjög skemmtilegu einvígi, en báðir meistararnir þekktir fyrir frumlegan stíl og snilldartilþrif á skákborðinu.

Short og Hjörvar tefla sex atskákir, með 25 mínútna umhugsunartíma, og verður frábær aðstaða í Salnum til að fylgjast með spennandi einvígi. Aðgangur að MótX-einvíginu er ókeypis og eru allir velkomnir.

 

Tefldi við Kasparov um heimsmeistaratitilinn

Nigel Short fæddist 1965 og var undrabarn í skák. Fjórtan ára gamall varð hann yngsti alþjóðameistari sögunnar. Stórmeistari varð hann 19 ára og var þá yngstur allra í heiminum sem báru þann eftirsótta titil.

Short hefur unnið tugi alþjóðlegra skákmóta og verið í fremstu röð í áratugi. Íslendingar minnast sigurs hans á hinu gríðarlega sterka IBM-skákmóti í Reykjavík 1987 þar sem jöfrar á borð við Tal, Timman og Korchnoi voru meðal keppenda, auk bestu skákmanna Íslands. Short vann sér rétt til að tefla um heimsmeistaratitilinn við sjálfan Garry Kasparov árið 1993, en beið lægri hlut.

 

Galdrastrákur úr Grafarvogi

Hjörvar Steinn Grétarsson fæddist 1993 -- árið sem Short glímdi við Kasparov um heimsmeistaratitilinn -- og vakti kornungur mikla athygli fyrir hæfileika sína. Hann var lykilmaður í sigursælum skáksveitum Rimaskóla, sem sópuðu til sín Íslands- og Norðurlandameistaratitlum í skólaskák. 

 

Hjörvar náði fyrsta stórmeistaraáfanga sínum á Evrópumóti landsliða í Porto Carras árið 2011, þar sem hann lagði m.a. snillinginn Alexei Shirov í glæsilegri sóknarskák. Hann tryggði sér svo stórmeistaratitilinn á EM-taflfélaga á Rhodos 2013.

Hann er nú næststigahæsti skákmaður Íslands með 2580 stig. Hjörvar Steinn náði bestu árangri íslensku landsliðsmannanna á Evrópumóti landsliða í Laugardalshöll sl. haust, og er til alls líklegur gegn Short, þótt enski meistarinn skarti nú 2671 skákstigi.

 

Spennandi og skemmtilegt einvígi framundan

Nigel Short og Hjörvar Steinn munu tefla sex atskákir í MótX-einvígu í Salnum. Umhugsunartími er 25 mínútur fyrir hvorn keppanda. Það er mun styttri tími en í hefðbundnum kappskákum, og því mun skemmtilegri fyrir áhorfendur, enda má búast við tímahraki með tilheyrandi fjöri.

Einvígið hefst laugardaginn 21. maí klukkan 14 og mun Theódóra S. Þorsteinsdóttir, formaður bæjarráðs Kópavogs, leika fyrsta leikinn. Þrjár skákir verða tefldar á laugardaginn og þrjár á sunnudeginum.

Auk MótX og Hróksins taka Kópavogsbær, Reykjavík Residence Hotel, Heimilistæki, Edda útgáfa og skákdeild Breiðabliks þátt í þessari skemmtilegu skákhátíð.

Skáklífið í Kópavogi hefur blómstrað að undanförnu og sífellt fleiri grunnskólar láta að sér kveða. Þá er mikill kraftur í skákdeild Breiðabliks undir forystu Halldórs Grétars Einarssonar. Framtíðin í skáklífi Kópavogs er því björt og MótX-einvígið er ekki síst hugsað til þess að gefa skákáhugamönnum á öllum aldri í Kópavogi kost á að sjá og upplifa stórviðburð á skáksviðinu.

 

Fjöltefli og tónleikar með Nigel Short og The Knight b4

Skákáhugamönnum gefast fleiri tækifæri til að kynnast skáksnilld Shorts í návígi. Hann mun tefla fjöltefli í Smáralind föstudaginn 20. maí klukkan 15. Fjórtán áskorendur fá tækiæri til að spreyta sig gegn meistaranum og í þeim hópi verða sjö af efnilegustu skákmönnum Kópavogs af yngri kynslóðinni.

Lokapunktur skemmtilegrar hátíðar verða svo tónleikar á Húrra, Tryggvagötu 22 í Reykjavík, sunnudaginn 22. maí kl. 21.30. Þar treður Nigel Short upp sem söngvari í skák-rokkbandinu The Knight b4. Aðrir í hljómsveitinni eru Arnljótur Sigurðsson, Hjörtur Ingvi Jóhannsson, Viggó Einar Hilmarsson og Þorvaldur Ingveldarson.

Fyrir tónleikana verður hitað upp á Húrra með MótX-hraðskákmótinu, sem hefst klukkan 20.

 

Dagskrá MótX-einvígisins í Salnum:

Laugardagur 21. maí

 

Kl. 14 -- Setningarathöfn og 1. skák

Kl. 15 -- 2. skák

Kl. 16 -- 3. skák

 

Sunnudagur 22. maí

Kl. 14 -- 4. skák

Kl. 15 -- 5. skák

Kl. 16 -- 6. skák og verðlaunaafhending

 

Facebook-síða MótX-einvígisins

Úrtökumót fyrir fjöltefli við Short og firmakeppni Breiðabliks

Úrtökumót fyrir MótX-fjölteflið við enska snillinginn Nigel Short og firmakeppni Breiðabliks fer fram í Glersalnum í stúkunni við Kópavogsvöll fimmtudaginn 12.mai og hefst kl 16:00. Rétt til þátttöku eiga öll grunnskólabörn í Kópavogi með skákstig og auk þess sex efnilegir skákkrakkar frá hverjum skóla valdir af skákkennara.

Tefldar verða 7 umferðir af 7 mínútna skákum.

Þeir sem eru með skákstig geta skráð sig sjálfir, en skákkennari hvers skóla eða umsjónarmaður með skákstarfi skrá aðra inn.

Skráningarsíða er í gula kassanum efst á Skák.is. 

Verðlaun:

• 1.-7. sæti:  Sæti í fjöltefli við enska stórmeistarann Nigel Short föstudaginn 20.mai nk.
• 1.-3. sæti: 10þús kr úttekt í Heimilistækjum og Tölvulistanum
• 4.-10.sæti: Bókarverðlaun frá Eddu útgáfu

Fjöldi útdráttarvinninga.

MótX-fjölteflið við Nigel Short verður í Smáralind, föstudaginn 20. maí klukkan 15. Helgina 21.-22. maí fer svo fram MótX-einvígið í Salnum í Kópavogi -- sannkallaður stórviðburður!

Facebook-síða MótX-einvígisins

Vel heppnað skákmaraþon til styrktar börnum frá Sýrlandi

Hrafn Jökulsson tefldi 222 skákir!

Fjöldi fyrirtækja og einstaklinga lagði söfnuninni lið

Framlögin munu koma í afar góðar þarfir í Sýrlandi og nágrannaríkjunum

Um þrjár milljónir króna söfnuðust í skákmaraþoni Hrafns Jökulssonar, Skákfélagsins Hróksins og Skákakademíu Reykjavíkur til styrktar börnum frá Sýrlandi. Maraþonið fór fram í Ráðhúsi Reykjavíkur á föstudag og laugardag og tefldi Hrafn Jökulsson við gesti og gangandi. Hann hafði sett markið á 200 skákir en tefldi alls 222 skákir á tæpum 30 klukkustundum.

Fjöldi fyrirtækja og einstaklinga hafði í aðdraganda maraþonsins heitið á Hrafn. Þetta voru GAMMA, Landsbankinn, Íslandsbanki, Vodafone, TM, Kvika, Nova, Logos, Dominos, Hagar, Vilhjálmur Þorsteinsson, Vignir S. Halldórsson og Viggó Einar Hilmarsson. Einn velunnari sem ekki vildi láta nafns síns getið greiddi 1.000 krónur fyrir hverja skák og annar 2.000 krónur. Söfnunarféið fer í neyðaraðgerðir UNICEF í Sýrlandi og nágrannaríkjunum en milljónir barna búa þar við skelfilega neyð.

Á laugardeginum kom í Ráðhúsið drengur sem fermdist í vor og gaf 40.000 krónur af fermingarpeningunum sínum. Að auki lögðu gestir og gangandi henni lið með frjálsum framlögum.

Við erum ein fjölskylda

Skákmaraþonið var haldið í samvinnu við Fatimusjóðinn og UNICEF á Íslandi og fjöldi fólks gaf vinnuna sína svo það mætti verða að veruleika.

„Við erum innilega þakklát öllum þeim sem gerðu viðburðinn mögulegan,“ segir Bersteinn Jónsson, framkvæmdastjóri UNICEF á Íslandi.

„Framlögin sem söfnuðust munu koma í afar góðar þarfir. UNICEF er í Sýrlandi, var þar fyrir stríðið og verður áfram. Við höfum hjálpað milljónum sýrlenskra barna en neyðin er gríðarleg. Því er framtak eins og skákmaraþon Hrafns Jökulssonar óskaplega mikilvægt. Við erum innilega þakklát.“

Margt var um að vera í Ráðhúsinu samhliða skákmaraþoninu. Krakkar úr Rimaskóla og Barnaskóla Hjallastefnunnar í Reykjavík komu til dæmis og tefldu fjöltefli, Ragnheiður Gröndal flutti eigin lög ásamt Guðmundi Péturssyni, barnakór Langholtskirkju kom fram undir stjórn Bryndísar Baldvinsdóttur og fjöldi fólks fór í fjögurra mínútna langt ferðalag í flóttamannabúðir í Jórdaníu með hjálp sýndaveruleika.

„Mér er efst í huga þakklæti til allra sem tóku þátt í þessu með okkur – mættu á staðinn, lögðu okkur lið, létu eitthvað af hendi rakna og hvöttu okkur áfram. Ég mun minnast þessa dásamlega viðburðar með mikilli gleði. Og hlakka til næstu verkefna í þágu góðs málstaðar. Gens una sumus – við erum ein fjölskylda,“ segir Hrafn Jökulsson.

Enn er hægt að leggja söfnuninni lið. Hægt er að gera það með því að senda sms-ið STOPP í nr 1900 (1.900 krónur) eða leggja inn á reikning Fatimusjóðsins: 512-04-250461, kt 680808-0580.

Myndaalbúm

Gunnar endurkjörinn forseti SÍ

Gunnar Björnsson var endurkjörinn forseti Skáksambands Íslands á aðalfundi sambandsins sem fram sl. laugardag. 

Stjórn SÍ á næsta starfsári verður að langmestu leyti eins og á liðnu starfsári. Stórmeistarinn Hjörvar Steinn Grétarsson er eini nýi stjórnarmaðurinn en hann tekur sæti í varastjórn. Sjálfkjörið var í öll embætti.

Tillaga um leyfa fjölgun erlenda skákmanna var samþykkt á fundinum. Leyft verður að stilla upp fjórum erlendum skákmönnum í stað tveggja.

Stjórn SÍ 2016-17

Vignir Vatnar Íslandsmeistari í skólaskák - aukakeppni þarf í eldri flokki

Landsmótið í skólaskák fór fram um helgina í Smáraskóla. Vignir Vatnar Stefánsson (2227), Hörðuvallaskóla í Kópavogi, vann öruggan sigur í yngri flokki (1.-7. bekk - vann allar sínar skákir sjö talsins. Róbert Luu (1684), Álfhólsskóla í Kópavogi, varð annar með 5½ vinning. Stephan Briem (1538), Hörðuvallaskóla, og Alexander Oliver Mai (1741), Laugalækjarskóla, urðu í 3.-4. sæti með 4½ vinning. Stephan fékk bronsið eftir stigaútreikning.

Mótstafla yngri flokks

Spennan var öllu meiri í eldri flokki (8.-10. bekk). Þar urðu fjórir keppendur efstir og jafnir með 5½ vinning. Það voru þeir Hilmir Freyr Heimisson (2079), Grunnskóla Vesturbyggðar, Aron Þór Mai, Laugalækjarskóla, og tvíburabræðurnir úr Smáraskóla, Björn Hólm (1946) og Bárður Örn Birkissynir (2052) efstir og jafnir með 5½ vinning.

Þeir munu heyja aukakeppni um titilinn sem fram fer fljótlega. 

Mótstafla eldri flokks

Landsmótsstjóri var Stefán Bergsson. Hann naut dyggrar aðstoðarar Björns Karlssonar úr Smáraskóla.+

Myndaalbúm (SSB og GB)