Hnífjöfnu Bikarmóti stúlkna lauk í gær

Núna um helgina, 2.-4. desember, var í annað sinn haldið Bikarmót stúlkna samhliða Bikarsyrpu TR. Fyrirkomulagið var með sama sniði og í Bikarsyrpunni undanfarin tvö ár, þ.e. 5 umferðir tefldar með 30 mín. umhugsunartíma og 30 sek. viðbótartíma fyrir hvern leik.

Skákmótið var sett á laggirnar til þess að hvetja stúlkur til aukinnar þátttöku í skákmótum. Stúlkurnar gátu því valið hvort þær vildu taka þátt í opnu Bikarsyrpunni, sem í vetur hefur 7 umferðir, eða taka þátt í stúlknamótinu með 5 umferðum. Þetta fyrirkomulag hefur komið vel út og hefur vakið athygli áhorfenda, því til dæmis höfum við mótshaldarar verið spurðir hvort þetta sé sérstakt átak fyrir stelpur. Það má svara þeirri spurningu játandi, því það að auka fjölda stúlkna í skák, sem og auka þátttöku stúlkna í skákmótum, er eitt af þeim atriðum, sem við í stjórn TR, leggjum áherslu á.

Í fyrsta mótinu sem fór fram í byrjun nóvember tóku 5 stúlkur þátt og til viðbótar tóku þrjár TR-stúlkur þátt í Bikarsyrpunni sem fram fór á sama tíma. Í skákmótinu nú um helgina tóku sex stelpur þátt í Bikarmóti stúlkna og tvær TR-stúlkur, þær Freyja Birkisdóttir og Elsa Kristín Arnaldardóttir, tóku þátt í 7. umferða Bikarsyrpunni. Eins og síðast var þetta mjög skemmtilegt og stelpurnar fengu góða reynslu í því að skrifa niður skákirnar og að tefla með mun meiri umhugsunartíma, en sem tíðkast í flestum barna-og unglingamótum.

Það sást greinilega í þessu móti að stelpurnar hafa allar öðlast meira öryggi í að skrifa niður skákirnar, án þess að vera of uppteknar af því að skrifa! En ennþá er takturinn í skákunum dálítið hraður, miðað við langa umhugsunartímann. En það þarf líka að þjálfa það að vera einn/ein með sínum skákhugsunum á meðan skákklukkan tifar! Það kemur með aukinni taflmennsku í skákmótum!

Þar sem að taflmennskan var frekar hröð, þá hvarf sums staðar dálítið af liði út af skákborðinu, sem hefði annars verið gott að hafa til staðar. Sumt gerðist vegna fljótfærni, en svo á stundum fór allt í loft upp, vegna skyndilegrar fráskákar, eða skyndilegs máts, eða tvöföldunar hróka á d-línunni sem ásamt leppun gerði út um taflið. Svo var greinilegt að í sumum skákum var úrvinnslan mjög góð og leiddi því til öruggs vinnings. Eins og við segjum alltaf: Allt fer þetta í reynslubankann!

 

Úrslitin urðu sem hér segir:

 

1. Iðunn Helgadóttir, TR, 4 vinninga af 5.

2. Soffía Arndís Berndsen, TR, 4 v.

3. Anna Katarína Thoroddsen, TR, 4 v.

4. Katrín María Jónsdóttir, TR, 1,5 v.

5. Ásthildur Helgadóttir, TR, 1,5 v.

6. Bergþóra Helga Gunnarsdóttir, Víkingaklúbbnum, 0 v. 

 

Mótið var mjög jafnt og ekki var hægt með aðstoð tölvu að finna út réttmætan sigurvegara af þeim þremur sem voru efstar og jafnar með 4 vinninga. Því var beitt “heppnisaðferðinni” og dregið um sæti.

Iðunn hlaut bikar í verðlaun, Soffía Arndís fékk silfurmedalíu og Anna Katarína bronsmedalíu.

Það segir dálítið um þá góðu og skemmtilegu stemningu sem ríkir á milli stelpnanna, að þegar verið var að draga um verðlaunin, þá var ekki hægt að sjá á andlitum þeirra, hver þeirra hafði fengið hvaða verðlaun: Allar voru þær glaðar og kátar og brugðu á leik í myndatökunni!

Nánari upplýsingar um mótið má nálgast á chess-results.

Myndskreytta frásögn má finna á heimasíðu TR.

Hraðskákmót Garðabæjar fer fram í kvöld

Hraðskákmót Garðabæjar og verðlaunaafhending fyrir Skákþing Garðabæjar fer fram  5. desember kl. 20.00. Skráning fer fram á Skák.is (guli kassinn efst)

Fyrstu verðlaun 15 þús. kr. Aðalverðlaunum er skipt eftir Hort-kerfinu.

Aukaverðlaun: Efsti TG-ingur 5.000 (óskipt eftir stigum)

Besti árangur miðað við eigin stig ) 5.000 kr. (performance - eigin stig - stigalausir reiknast með 1500 stig)

Tímamörk 3 mínútur + 2 sek á leik.

Þátttökugjöld 2.000 kr. Frítt fyrir félagsmenn Taflfélags Garðabæjar og þátttakendur í Skákþingi Garðabæjar 2016.

Ef þátttaka utanfélagsmanna verður góð verður aðalverðlaunum fjölgað. (Yfir 20 manns greiða þátttökugjöld)

Mótsstaður
Garðatorg 1. 2 hæð. (Gamla Betrunarhúsið) Inngangur hægra megin við verslunina Víði inn á Garðatorgi.

Smellið á hlekkinn til að sjá þá sem þegar eru skráðir.
https://docs.google.com/…/1QQzBVdemWeyMr-dz6DIfHUANzo…/edit…

Jólaskákmót Vinaskákfélagsins fer fram í dag

Jólaskákmót Vinaskákfélagsins verður haldið mánudaginn 5. desember kl: 13, í Vin að Hverfisgötu 47. Ennfremur er þetta líka afmælisskákmót Hauks Halldórssonar sem verður 50 ára þann 7 desember.Tefldar verða 6 umferðir með 7 mínútur á skák. Í hléi verður boðið upp á kaffi og veitingar.

Allir velkomnir á meðan húsrúm leyfir.

 

Dramatískri Bikarsyrpu III lauk með sigri Benedikts

Í dag lauk þriðju Bikarsyrpu Taflfélags Reykjavíkur og var sem fyrr vel mætt í félagsheimilið að Faxafeni 12. Skákmeistarar framtíðarinnar glímdu af miklu kappi og varð mótið fyrir vikið viðburðaríkt. Eftirminnileg tilþrif sáust í öllum umferðum; fléttur og fórnir, djúpir pósar, hörku svíðingar, tímahrak, hrikalegir afleikir, ólöglegir leikir og síðast en ekki síst spenntir foreldrar á kaffistofunni sem sötruðu bragðvont kaffi -kurteisislega- á meðan þau biðu örlaga barna sinna.

Benedikt Briem, sem fyrr í vetur vann Bikarsyrpu II, hélt áfram að hrekkja andstæðinga sína á taflborðinu og vann fyrstu fjórar skákirnar. Þá skyndilega sveif jafnteflisandinn yfir hann og síðustu þrjár skákir hans enduðu með jafntefli. Það dugði Benedikt til sigurs í mótinu og lauk hann tafli með 5,5 vinning. Sannarlega glæsileg frammistaða hjá Benedikt sem nú rýkur upp metorðastiga skákarinnar, dyggilega studdur af bróður sínum, Stephani Briem, sem fylgdist með skákum litla bróður af miklum áhuga.

Halldór Atli Kristjánsson tefldi á efstu borðum allt mótið og tapaði ekki skák. Hann vann þrjár viðureignir og gerði fjögur jafntefli, og skiluðu þessir 5 vinningar honum 2.sæti. Í 3.sæti varð Örn Alexandersson einnig með 5 vinninga.

Guðmundur Peng Sveinsson og Kristján Dagur Jónsson fóru taplausir í gegnum mótið en voru engu að síður hálfum vinningi á eftir Halldóri Atla og Erni. Guðmundur Peng gerði fimm jafntefli í sjö skákum og Kristján Dagur gerði þrjú jafntefli í fimm skákum.

Benedikt Briem hækkar mest allra á stigum eftir mótið eða um alls 63 stig. Örn Alexandersson nældi sér í 46 stig og þeir Kristján Dagur Jónsson og Árni Ólafsson hækka um 38 stig. Sæmundur Árnason hækkar um 37 stig og Adam Omarsson bætir við sig 28 stigum.

Jafnteflisandinn tók sér bólfestu víða í skáksalnum, einkum þó á efstu borðum. Jafnteflin hafa aldrei verið fleiri í Bikarsyrpu en alls voru þau 16 talsins. Til samanburðar þá voru 5 jafntefli samin í síðustu Bikarsyrpu. Sum jafnteflin að þessu sinni voru samin í stöðum þar sem heilmikið líf var og mörg óleyst verkefni. Er það eilítið áhyggjuefni og veltir upp þeirri spurningu hvort taka þurfi upp 30 leikja regluna í Bikarsyrpunum. Gárungarnir velta nú fyrir sér hvort nýafstaðið heimsmeistaraeinvígi eigi þátt í að fjölga jafnteflum þessa helgina. Áhrif fyrirmynda eru margslungin.

Nánari upplýsingar um mótið má nálgast á chess-results.

Myndskreytta frásögn má finna á heimasíðu TR.

Ný íslensk skákstig

Ný íslensk skákstig eru komin út og miðaðst þau við 1. desember sl. Jóhann Hjartarson (2574) er stigahæsti skákmaður landsins. Bjarki Freyr Bjarnason er stigahægstur nýliða. Benedikt Briem hækkar mest allra frá september-listanum.

Topp 20

No	Name	RtgC	Diff	Cat	RtgF	Tit	Club
1	Jóhann Hjartarson	2574	0	-	2540	GM	TB
2	Héðinn Steingrímsson	2566	-8	-	2564	GM	Fjölnir
3	Hannes H Stefánsson	2562	-2	-	2570	GM	Huginn
4	Margeir Pétursson	2561	0	-	2513	GM	TR
5	Helgi Ólafsson	2543	0	SEN	2540	GM	Huginn
6	Hjörvar Grétarsson	2542	3	-	2563	GM	Huginn
7	Henrik Danielsen	2490	0	-	2481	GM	SR
8	Jón Loftur Árnason	2486	-7	-	2471	GM	TB
9	Helgi Áss Grétarsson	2476	0	-	2448	GM	Huginn
10	Stefán Kristjánsson	2443	-6	-	2459	GM	TR
11	Friðrik Ólafsson	2441	0	SEN	2373	GM	TR
12	Jón Viktor Gunnarsson	2439	-8	-	2450	IM	TR
13	Bragi Þorfinnsson	2438	18	-	2453	IM	TR
14	Guðmundur Kjartansson	2429	11	-	2468	IM	TR
15	Karl Þorsteins	2429	-8	-	2432	IM	TR
16	Þröstur Þórhallsson	2411	6	-	2414	GM	Huginn
17	Björn Þorfinnsson	2406	6	-	2404	IM	TR
18	Arnar Gunnarsson	2404	-1	-	2431	IM	TR
19	Dagur Arngrímsson	2399	-4	-	2375	IM	TB
20	Ingvar Jóhannesson	2352	1	-	2377	FM	Huginn
21	Magnús Örn Úlfarsson	2352	-17	-	2375	FM	Huginn

Heildarlistann má finna sem PDF-viðhengi.

Nýliðar

Bjarki Freyr Bjarnason (1631) er stigahæsti 15 nýliða á listanum. Í næstu sætum eru Pétur Bjarnason (1532) og Sverrir Ari Arnarsson (1487).

No	Name	RtgC	Diff	Cat	RtgF	Tit	Club
1	Bjarki Freyr Bjarnason	1631	1631	-	1731		TG
2	Pétur Bjarnason	1532	1532	SEN	1294		Sauðárkrókur
3	Sverrir Ari Arnarsson	1487	1487	-	0		Skákgengið
4	Stefán Daníel Jónsson	1376	1376	-	1477		TG
5	Finnur Kristján Finnsson	1220	1220	SEN	0		Fjölnir
6	Bárður Sigurðsson	1210	1210	-	0		Skákgengið
7	Arnar Smári Signýjarson	1182	1182	U14	1315		SA
8	Fannar Breki Karason	1171	1171	U12	1439		SA
9	Arnar Páll Rúnarsson	1087	1087	-	0		Vinaskákfélagið
10	Pall Ingi Fridgeirsson	1028	1028	U14	1050
11	Bjarki Kröyer Jóhannsson	1009	1009	U12	0		Fjölnir
12	Árni Jóhann Árnason	1000	1000	-	0		Vinaskákfélagið
13	Askur Ari Davíðsson	1000	1000	U14	0		TR
14	Elísabet Xiang  Sveinbjörnsdóttir	1000	1000	U12	1026		TR
15	Tristan Theódór Thoroddsen	1000	1000	U12	0		TR

Mestu hækkanir

Blikar raða sér í fjögur efstu sætin á hækkunarlistanum. Benedikt Briem (267) hækkar mest allra september-listanum. Í næstu sætum eru Gunnar Erik Guðmundsson (178), Ísak Orri Karllsson (143) og Stephan Briem (133)

No	Name	RtgC	Diff	Cat	RtgF	Tit	Club
1	Benedikt Briem	1267	267	U10	1264		Breiðablik
2	Gunnar Erik Guðmundsson	1178	178	U10	1196		Breiðablik
3	Ísak Orri Karlsson	1249	143	U12	1296		Breiðablik
4	Stephan Briem	1599	133	U14	1736		Breiðablik
5	Vignir Vatnar Stefánsson	2168	129	U14	2404	FM	TR
6	Ólafur Evert Úlfsson	1668	108	-	1694		Hrókar alls fagnaðar
7	Batel Goitom Haile	1178	105	U10	1275		TR
8	Jón Þór  Lemery	1601	90	U16	1721		TR
9	Ingvar Egill Vignisson	1574	89	-	1621		Vinaskákfélagið
10	Baldur Teodor Petersson	1779	79	U16	2074		TG
11	Jón Trausti Harðarson	2109	74	U20	2157		Fjölnir
12	Þorsteinn Magnússon	1325	72	U16	1395		TR
13	Freyja Birkisdóttir	1159	69	U10	1232		TR
14	Bárður Örn Birkisson	2057	66	U16	2175		TR
15	Hákon Garðarsson	1064	64	U14	1118		Fjölnir
16	Heimir Páll Ragnarsson	1574	60	U16	1695		Huginn
17	Knútur Finnbogason	1633	58	SEN	1586		Siglufjörður
18	Aron Þór Mai	1802	55	U16	1893		TR
19	Birkir Ísak Jóhannsson	1479	55	U14	1540		Breiðablik
20	Halldór Kristjánsson	1266	50	-	1560		Vinaskákfélagið

Reiknuð mót

• Bikarsyrpa stúlkna
• Bikarsyrpur TR 1 og 2
• Framsýnarmótið
• Haustmót SA (a- og b-flokkar)
• Haustmót TR (a-, b-, og c-flokkar)
• Íslandsmót skákfélaga (1.-4. deild)
• Meistaramót Hugins (suður)
• Skákþing Garðabæjar
• Skákþing Skagafjarðar
• Unglingameistaramót Íslands

Skrár tengdar þessari bloggfærslu:

• Íslensk skákstig, 1. desember 2016

Skákþáttur Morgunblaðsins: Magnús Carlsen jafnaði metin

 

Þungu fargi er létt af Magnúsi Carlsen og norsku þjóðinni. Eftir meira en 6½ klst. baráttu og 75 leiki gafst Rússinn Sergei Karjakin upp í 10. einvígisskákinni og fyrsti sigur Magnúsar í einvíginu var í höfn. Staðan er nú 5:5 og aðeins tvær skákir eftir þannig að talsverðar líkur standa til þess að úrslit einvígisins ráðist í styttri skákum. Ellefta skákin er á dagskrá í dag og hefst kl. 19 að íslenskum tíma. Og taugaspennan tekur sinn toll; í viðtali við norska blaðamenn strax eftir tíundu skákina kvaðst Magnús lítið hafa getað sofið, en hann var nálægt því að tapa þeirri níundu, sem lauk með jafntefli eftir 74 leiki upp úr miðnætti á fimmtudaginn. Það mun ekkert skorta á dramatík á lokasprettinum, en verði jafnt að loknum 12. skákinni á mánudaginn ráðast úrslitin á þriðjudaginn, fyrst með fjórum atskákum með tímamörkunum 25 10, verði enn jafnt verða tefldar tvær hraðskákir, 5 3, og ef allt um þrýtur fást úrslit með bráðabanaskák. Sá sem dregur hvítt þá verður að vinna en fær meiri tíma, 5 3 á móti 4 3.

Að skákir skuli hafa verið leiddar til lykta í löngum og ströngum endatöflum kemur ekki á óvart; ferill norska heimsmeistarans hin síðari ár hefur gengið út á það að vinna slíkar stöður. Ýmsum gagnrýnendum einvígisins finnst þó baráttan litlaus: „Bobby Fischer, við fyrirgefum þér allt. Komdu aftur,“ stóð skrifað í breska stórblaðinu The Guardian:

New York 2016; 10. einvígisskák:

Magnús Carlsen – Sergei Karjakin

Spænskur leikur

1. e4 e5 2. Rf3 Rc6 3. Bb5 Rf6 4. d3 Bc5 5. c3 0-0 6. Bg5 h6 7. Bh4 Be7 8. 0-0 d6 9. Rbd2 Rh5 10. Bxe7 Dxe7 11. Rc4 Rf4 12. Re3 Df6 13. g3 Rh3+ 14. Kh1 Re7 15. Bc4 c6 16. Bb3 Rg6 17. De2 a5 18. a4 Be6 19. Bxe6 fxe6 20. Rd2

„Skákvélarnar“ ráku upp „stór augu“. Hér gat Karjakin þvingað fram jafntefli með 20. ... Rxf2+ 21. Kg1 Rh4+! 22. Kg1 ( 22. gxh4 Dg6+ og svartur vinnur) Rh3+ o.s.frv. Hægt er að halda taflinu gangandi með því að taka á sig lakari stöðu, 21. Kg1 Rh3+ 22. Kg2?! Rhf4+ 23. gxf4 Rxf4+ 24. Hxf4 exf4 25. Rc2. 

20. ... d5 21. Dh5 Rg5 22. h4 Rf3 23. Rxf3 Dxf3 24. Dxf3 Hxf3 25. Kg2 Hf7 26. Hfe1 h5 27. Rf1 Kf8 28. Rd2 Ke7 29. He2 Kd6 30. Rf3 Haf8 31. Rg5 He7 32. Hae1 Hfe8 33. Rf3 Rh8 34. d4 exd4 35. Rxd4 g6 36. He3 Rf7 37. e5+ Kd7 38. Hf3 Rh6 39. Hf6 Hg7 40. b4 axb4 41. cxb4 Rg8 42. Hf3 Rh6 43. a5 Rf5 44. Rb3 Kc7 45. Rc5 Kb8 46. Hb1 Ka7 47. Hd3 Hc7 48. Ha3 Rd4 49. Hd1 Rf5 50. Kh3 Rh6 51. f3 Hf7 52. Hd4 Rf5 53. Hd2 Hh7 54. Hb3 Hee7 55. Hdd3 Hh8 56. Hb1 Hhh7?

Karjakin beið átekta og aðhafðist ekkert en klukkan rak á eftir og nú þvælast svörtu hrókarnir hvor fyrir öðrum. 

57. b5!

Spilar út síðasta trompinu. Skyndilega er Magnús kominn með frábæra vinningsmöguleika.

57. ... cxb5 58. Hxb5 d4 59. Hb6 Hc7 60. Rxe6 Hc3 61. Rf4 Hhc7 62. Rd5?

Aftur segir þreytan til sín. Hvíta staðan er léttunnin eftir 62. Hxg6 Hxd3 63. Rxd3 Hc3 64. Hf6 Re3 65. Rf4 Hc1 66. g4! o.s.frv.

62. ... Hxd3 63. Rxc7 Kb8 64. Rb5 Kc8! 65. Hxg6 Hxf3 66. Kg2 Hb3 67. Rd6+ Rxd6 68. Hxd6 He3?

Nú er staðan vonlaus, 68. .. Kc7! var eini möguleikinn, 69. Hxd4 Hb5 70. He4 Kd7! með jafnteflismöguleikum.

69. e6 Kc7 70. Hxd4 Hxe6 71. Hd5 Hh6 72. Kf3 Kb8 73. Kf4 Ka7 74. Kg5 Hh8 75. Kf6

- og Karjakin gafst upp.

Grein þessi birtist í Morgunblaðinu 26. nóvember 2016

Skákþættir Morgunblaðsins

[Event "Carlsen - Karjakin World Championship"] [Site "0:08:33-0:04:33"] [Date "2016.11.24"] [EventDate "2016.11.11"] [Round "10"] [Result "1-0"] [White "Magnus Carlsen"] [Black "Sergey Karjakin"] [ECO "C65"] [WhiteElo "?"] [BlackElo "?"] [PlyCount "149"] 1.e4 e5 2.Nf3 Nc6 3.Bb5 Nf6 4.d3 Bc5 5.c3 O-O 6.Bg5 h6 7.Bh4 Be7 8.O-O d6 9.Nbd2 Nh5 10.Bxe7 Qxe7 11.Nc4 Nf4 12.Ne3 Qf6 13.g3 Nh3+ 14.Kh1 Ne7 15.Bc4 c6 16.Bb3 Ng6 17.Qe2 a5 18.a4 Be6 19.Bxe6 fxe6 20.Nd2 d5 21.Qh5 Ng5 22.h4 Nf3 23.Nxf3 Qxf3+ 24.Qxf3 Rxf3 25.Kg2 Rf7 26.Rfe1 h5 27.Nf1 Kf8 28.Nd2 Ke7 29.Re2 Kd6 30.Nf3 Raf8 31.Ng5 Re7 32.Rae1 Rfe8 33.Nf3 Nh8 34.d4 exd4 35.Nxd4 g6 36.Re3 Nf7 37.e5+ Kd7 38.Rf3 Nh6 39.Rf6 Rg7 40.b4 axb4 41.cxb4 Ng8 42.Rf3 Nh6 43.a5 Nf5 44.Nb3 Kc7 45.Nc5 Kb8 46.Rb1 Ka7 47.Rd3 Rc7 48.Ra3 Nd4 49.Rd1 Nf5 50.Kh3 Nh6 51.f3 Rf7 52.Rd4 Nf5 53.Rd2 Rh7 54.Rb3 Ree7 55.Rdd3 Rh8 56.Rb1 Rhh7 57.b5 cxb5 58.Rxb5 d4 59.Rb6 Rc7 60.Nxe6 Rc3 61.Nf4 Rhc7 62.Nd5 Rxd3 63.Nxc7 Kb8 64.Nb5 Kc8 65.Rxg6 Rxf3 66.Kg2 Rb3 67.Nd6+ Nxd6 68.Rxd6 Re3 69.e6 Kc7 70.Rxd4 Rxe6 71.Rd5 Rh6 72.Kf3 Kb8 73.Kf4 Ka7 74.Kg5 Rh8 75.Kf6 1-0

Jólapakkamót Hugins fer fram 18. desember

Jólapakkaskákmót Hugins verður haldið sunnudaginn 18. desember nk. í Álfhólsskóla (Hjallaskóli Álfhólsvegi 120). Mótið hefst kl. 13 og er ókeypis á mótið. Mótið er fyrir börn og unglinga og fer nú fram í 19. skipti en það var fyrst haldið fyrir jólin 1996. Síðan hefur það verið haldið nánast á hverju ári og hefur alltaf verið eitt fjölmennasta skákmót ársins.

Keppt verður í allt að 6 flokkum:

• Flokki fæddra 2001-2003
• Flokki fæddra 2004-2005
• Flokki fæddra 2006-2007
• Flokki fæddra 2008-2009
• Flokki fæddra 2010 síðar
• Peðaskák fyrir þau yngstu

Tefldar verða 5 umferðir með 10 mínútna umhugsunartíma á mann. Jólapakkar eru í verðlaun fyrir 3 efstu sætin í hverjum aldursflokki fyrir sig fyrir bæði drengi og stúlkur. Auk þess verður happdrætti um 3 jólapakka í hverjum aldursflokki fyrir sig.

Jólaskákmót Vinaskákfélagsins fer fram á mánudaginn

Jólaskákmót Vinaskákfélagsins verður haldið mánudaginn 5. desember kl: 13, í Vin að Hverfisgötu 47. Ennfremur er þetta líka afmælisskákmót Hauks Halldórssonar sem verður 50 ára þann 7 desember.Tefldar verða 6 umferðir með 7 mínútur á skák. Í hléi verður boðið upp á kaffi og veitingar.

Allir velkomnir á meðan húsrúm leyfir.

 

Vignir Vatnar atskákmeistari Reykjavíkur

Vignir Vatnar Stefánsson sigraði örugglega á Atskákmóti Reykjavíkur sem fram fór síðast liðið þriðjudagskvöld. Vignir Vatnar var búinn að tryggja sér sigurinn fyrir síðustu umferð en lét ekki þar staðar numið heldur sigraði Örn Leó Jóhannsson í lokaumferðinni og vann þar með mótið með fullu húsi vinninga sex samtals í jafn mörgum skákum. Þrátt fyrir vaska frammistöðu á skákmótum síðustu mánuði þá koma sigurinn nokkuð á óvart því meðal keppenda var ríkjandi atskákmeistari Reykjavíkur Guðmundur Kjartansson alþjóðlegur meistari, nýkominn frá Færeyjum,  þar sem hann sigraði á alþjóðlegu skákmóti í Rúnavík. Vignir Vatnar var einnig þátttakandi í skákmótinu í Rúnavík og stóð sig sömuleiðis vel og fór yfir 2400 skákstig með frammistöðunni þar. Að þessu sinni var það hins vegar Vignir Vatnar sem sigraði á mótinu.

Næstir jafnir með 4,5 vinninga komu Guðmundur Kjartansson og Dagur Ragnarsson. Guðmundur hærri að stigum í öðru sæti og Dagur í því þriðja. Þeir tveir voru einnig í efstu sætum í fyrra ásamt Hörvari Steini Grétarssyni og þá þurfti lokakeppni til að úrskurða um titilinn eins og reyndar oft hefur þurft í þessu móti.

Vigfús Ó. Vigfússon varð efstur Huginsmanna í mótinu og því atskákmeistari Hugins.

Lokastaðan í Chess-results.

Myndin um Magnus - 5 stjörnur af 5 mögulegum!

Í dag hófust í Háskólabíó sýningar á myndinni Magnus sem fjallar um heimsmeistarann í skák. Þar er honum fylgt því frá því hann er krakki og fram til þess er að varð heimsmeistari í skák fyrir þremur árum síðan. 

Ritstjóri sá myndina í gær og telur óhætt að mæla með henni. Hún er mjög einlæg. Þar lýsir t.d. Magnus einelti sem hann varð í skóla og einnig þeim erfiðleikum sem hann gengur í gegnum við mótlæti. Það var t.a.m. magnað að sjá hvernig og fjölskyldan tókst á við mótlætið í upphafi einvígisins við Anand. 

Lýsingar af áskorendamótinu í London 2012 og heimsmeistaraeinvíginu í Chennai 2013 eru mjög góðar. Það góðar að ég varð spenntur þrátt fyrir að muna einstök úrslit.

Það er nauðsynlegt fyrir alla skákáhugamenn að sjá myndina. Fyrir aðra er einnig nauðsynlegt að sjá myndina - og kynnast þessum einstaka persónuleika - sem er mikli dýpri en margir halda. 

Myndin er í senn einlæg, fyndin og spennandi. 

5 stjörnur af 5 mögulegum!

Upplýsingar um sýningartíma o.þ.h. má finna á vef Háskólabíós.