Meistaramót Kópavogs 2016 - Liðakeppnir 1.bekk peðaskák, 1.-2.bekk og 8.-10.bekk

Tvo síðastliðna föstudagsmorgna hafa um 250 áhugasamir skákkrakkar úr skólunum í Kópavogi mætt í Glersalinn í stúkunni við Kópavogsvöll til að skera úr um það hvaða skólar eru bestir í skák. Samtals 60 fjögurra manna sveitir auk varamanna. Flestar sveitirnar komu úr Smáraskóla og Álfhólsskóla, en einnig mættu skáksveitir frá Salaskóla, Hörðuvallaskóla og Vatnsendaskóla.  S.l. föstudag var keppt í eftirfarandi hólfum: 1.bekk peðaskák, 1.-2.bekk, og 8.-10.bekk.

Það bar til tíðinda að Hörðuvallaskóli, með sterka sveit Norðurlandameistara barnaskólasveita, vann 8.-10.bekk með hreinu borði. 

1.bekkur – peðaskák

1. Álfhólsskóli a-sveit     12 vinninga
2. Hörðuvallaskóli a-sveit  7,5 vinninga
3. Álfhólsskóli b-sveit     7  vinninga
4. Álfhólsskóli c-sveit     5,5 vinninga 

 

1.-2.bekkur

1. Vatnsendaskóli a-sveit   15  vinninga
2. Hörðuvallaskóli a-sveit  11  vinninga        
3. Smáraskóli b-sveit       9 vinninga

 

• Best b sveita: Smáraskóli
• Best c sveita: Vatnsendaskóli
• Best d sveita: Smáraskóli

 

Flesta vinninga á 1.borði:

• Egil Breki Pálsson     Álfhólsskóla        4 vinninga
• Guðmundur Orri       Vatnsendaskóla        4 vinninga

Flesta vinninga á 2.borði:

• Mikael Bjarki Vatnsendaskóla        4 vinninga

Flesta vinninga á 3.borði:

• Árni Kristinn              Vatnsendaskóla        4 vinninga

Flesta vinninga á 4.borði:

• Guðrún Briem           Hörðuvallaskóla       4 vinninga

 

8.-10.bekkur

1. Hörðuvallaskóli a-sveit     28 vinninga
2. Álfhólsskóli a-sveit        19,5 vinninga
3. Salaskóli a-sveit           18 vinninga

 

• Best b sveita: Álfhólsskóli
• Best c sveita: Smáraskóli
• Best d sveita: Smáraskóli

 

Flesta vinninga á 1.borði:

• Vignir Vatnar Stefánsson   Hörðuvallaskóla 7 vinninga

Flesta vinninga á 2.borði:

• Stephan Briem              Hörðuvallaskóla 7 vinninga           

Flesta vinninga á 3.borði:

• Arnar Milutin Heiðarsson   Hörðuvallaskóla 7 vinninga

Flesta vinninga á 4.borði:

• Sverrir Hákonarson         Hörðuvallaskóla 7 vinninga

 

Skákkennarar í Kópavogi: Lenka Ptachnikova Álfhólsskóla, Björn Karlsson Smáraskóla, Sigurlaug Friðþjófsdóttir Salaskóla, Gunnar Finnsson Hörðuvallaskóla og Einar Ólafsson Vatnsendaskóla.

Skákdeild Breiðabliks sá um framkvæmd mótsins og skákstjóri var Halldór Grétar Einarsson.

 

Úrslit á Chess-Results:

1.bekkur peðaskák: http://chess-results.com/tnr251490.aspx?lan=1

1.-2. bekkur: http://chess-results.com/tnr251489.aspx?lan=1

8.-10.bekkur: http://chess-results.com/tnr251488.aspx?lan=1

 

Úrslit liðakeppna 3.-4.bekk og 5.-7.bekk sem fóru fram föstudaginn 25.nóvember eru hérna: http://skak.blog.is/blog/skak/entry/2185542/

Bræður tefla erlendis - bæði á Ítalíu og á Spáni

Tvennir bræður sitja þessa dagana að tafli erlendis. Annars vegar eru það Mai-bræður, Aron Þór og Alexander Oliver sem taka þátt í alþjóðlegu skákmóti í Róm og hins vegar tefla bræðurnir Óskar Víkingur og Stefán Orri í Benidorm á Spáni.

Rómar-bræður

Mai-bræður hafa byrjað mjög vel. Eftir 4 umferðir hefur Alexander Oliver (1717) hlotið 2½ vinning þrátt fyrir að hafa teflt upp fyrir sig í öllum umferð nema þeirri fyrstu. Hefur gerst jafntefli við þrjá stigahærri andstæðinga.

Aron Þór (1893) hefur 1½ vinning. Jafntefli við þrjá stigahærri andstæðinga en tapaði í fjórðu umferð fyrir ítölsku landsliðskonunni Marinu Brunello (2353).

Nánar um mótið á Chess-Results.

Benidorm-bræður

Óskar Víkingur (1707) hefur 3½ vinning eftir 6 umferðir í Benidorm þrátt fyrir að hafa teflt upp fyrir sig í öllum umferðunum nema einni.

Stefán Orri (1374) hefur 2½ vinning og hefur teflt upp fyrir sig öllum umferðum mótsins.

Nánar um árangur þeirra bræðra má finna hér. 

Skákþáttur Morgunblaðsins: Úrslit ráðast á afmælisdegi Magnúsar Carlsen

Jafntefli varð í tólftu og síðustu einvígisskák Magnúsar Carlsen og Sergei Karjakin í New York í gær eftir aðeins 24 leikja dauflega viðureign. Lokaniðurstaðan er því 6:6 og fleiri skákir verða ekki tefldar með venjulegum umhugsunartíma sem á tæknimáli útleggst 100 30 á fyrstu 40 leikina, 50 30 á næstu 20 leiki og síðan 15 30 til að ljúka skákinni. Einvígið verður til lykta leitt í skákum með styttri umhugsunartíma.

Í gær gerði Magnús Carlsen enga tilraun til þess að nýta sér það hagræði sem felst í því að vera með hvítt og virtist sáttur með að útkljá einvígið í fjórum at-skákum sem tefldar verða næsta miðvikudag hinn 30. nóvember sem er afmælisdagur hans. Hann verður þá 26 ára gamall. Úrslitaskákirnar hefjast kl. 19 að íslenskum tíma og tímamörkin eru 25 10 þ.e. hvor skákmaður fær 25 mínútur á alla skákina að viðbættum 10 sekúndum sem bætast við tímann eftir hvern leik. Verði enn jafnt tefla þeir tvær hraðskákir með tímamörkunum 5 3 og ef ekki hafa fengist úrslit þá tekur við bráðabani en sá sem dregur hvítt verður að vinna og hefur betri tíma svo munar mínútu, 5 3 á móti 4 3. Margir hafa kosið að tefla með svörtu undir þeim kringumstæðum.

Það er því ljóst að úrslitin í heimsmeistaraeinvíginu munu ráðast á miðvikudaginn en skákunnendur geta búið sig undir magnaða baráttu því styttri tímamörkin bjóða yfirleitt upp fjörugar skákir og mikla spennu. Magnús sigurstranglegri en hann hefur orðið heimsmeistari í atskák árin 2014 og 2015. Í gær féllu leikir þannig en skákin stóð í rúmlega 30 mínútur:

New York 2016; 12. einvígisskák:

Magnús Carlsen – Sergei Karjakin

Spænskur leikur

1. e4 e5 2. Rf3 Rc6 3. Bb5 Rf6

Berlínar-vörnin hefur verið afar vinsæl með fremstu skákmanna æ síðan Kramnik beitti henni í einvígi sínu við Kasparov árið 2000.

4. 0-0 Rxe4 5. He1 Rd6 6. Rxe5 Be7 7. Bf1 Rxe5 8. Hxe5 0-0 9. d4 Bf6 10. He1 He8 11. Bf4 Hxe1 12. Dxe1 Re8 13. c3 d5 14. Bd3 g6 15. Ra3 c6 16. Rc2 Rg7 17. Dd2 Bf5 18. Bxf5 Rxf5 19. Re3 Rxe3 20. Dxe3 De7 21. Dxe7 Bxe7 22. He1

Meinlaus leikur sem inniheldur þó eina gildru, 22.... Kf8 tapar vegna 23. Bh6+! Ke8 24. Bg5 og biskupinn fellur.

22.... Bf8 23. Kf1 f6 24. g4 Kf7

Jafntefli.

Grein þessi birtist í Morgunblaðinu 29. nóvember 2016

Skákþættir Morgunblaðsins

[Event "Carlsen - Karjakin World Championship"] [Site "1:38:33-1:28:33"] [Date "2016.11.28"] [EventDate "2016.11.11"] [Round "12"] [Result "1/2-1/2"] [White "Magnus Carlsen"] [Black "Sergey Karjakin"] [ECO "C67"] [WhiteElo "?"] [BlackElo "?"] [PlyCount "60"] 1.e4 e5 2.Nf3 Nc6 3.Bb5 Nf6 4.O-O Nxe4 5.Re1 Nd6 6.Nxe5 Be7 7.Bf1 Nxe5 8.Rxe5 O-O 9.d4 Bf6 10.Re1 Re8 11.Bf4 Rxe1 12.Qxe1 Ne8 13.c3 d5 14.Bd3 g6 15.Na3 c6 16.Nc2 Ng7 17.Qd2 Bf5 18.Bxf5 Nxf5 19.Ne3 Nxe3 20.Qxe3 Qe7 21.Qxe7 Bxe7 22.Re1 Bf8 23.Kf1 f6 24.g4 Kf7 25.h3 Re8 26.Rxe8 Kxe8 27.Ke2 Kd7 28.Kd3 Ke6 29.a4 a6 30.f3 Be7 1/2-1/2

Björn Þorfinnsson hraðskákmeistari Garðabæjar

Hraðskákmót Garðabæjar var haldið í gærkvöldi. Alls tóku 24 keppendur þátt og sigraði Björn Þorfinnsson mótið líkt og í fyrra. Hann fékk 10 vinninga af 11 mögulegum og 15 þúsund krónur sem hann á örugglega eftir að eyða í einhverja vitleystu. Í 2. sæti varð Davíð Kjartansson með 9 vinninga og í 3. sæti Vignir Vatnar Stefánsson með 8,5 vinninga.

Efst félagsmanna í Taflfélagi Garðabæjar varð Guðlaug Þorsteinsdóttir með 6 vinninga. Kristinn Jón Sævaldsson náði 4. sæti og var bestur miðað við eigin skákstig. 264 stig í plús. Þau fengu 5.000 krónu verðlaun hvort um sig.

Lokastöðuna má finna á Chess-Results.

Einnig voru veitt verðlaun fyrir Skákþing Garðabæjar sem lauk í síðustu viku. Páll Sigurðsson er skákmeistari Garðabæjar 2016. Í 2 sæti varð Baldur Möller og jafnir í 3.-4. sæti urðu þeir Ingvar Vignisson og Birkir Karl Sigurðsson.

Lokastöðuna má finna á Chess-Results.

Besti árangur umfram eigin stig. efstu menn.

1. Kristinn Jón Sævaldsson 1906 Haukar 8 2170 264
2. Ingvar Egill Vignisson 1621 Vinaskákfélagið 5,5 1838 217
3. Bjarnsteinn Þórsson 1748 TG 5 1872 124

Haustmót SA - úrslit í yngri flokkum

Á laugardaginn lauk Haustmóti Skákfélagsins í yngri flokkum. Keppt var í einum lagi um fjóra titla.

Í keppninni um skákmeistara SA í yngri flokkum samanlagt var hörð keppni milli þriggja drengja. Ágúst (fæddur 2005), Gabríel (fæddur 2004) og Fannar (fæddur 2005) börðust um sigurinn. Allir aðrir keppendur urðu að lúta í lægra haldi fyrir þeim í seinni hlutanum og réðust úrslit því í innbyrðis viðureignum þeirra. Ágúst gerði jafntefli við hina tvo en Fannar lagði Gabríel eftir afleik þess síðarnefnda. Fannar stóð sig því best keppenda. Í fyrri hlutanum voru Fannar og Gabríel efstir og dugði það forskot til að Gabríel hélt 2. sæti í heildarkeppninni fyrir Ágústi.

• Skákmeistari SA í flokki 14-15 ára – fædd 2002 og 2001 varð Tumi Snær með 2 vinninga úr fyrri umferð.
• Skákmeistari SA í flokki 11-13 ára – fædd 2005, 2004 og 2003 varð Fannar Breki með samtals 12,5 vinninga.
  Í 2. sæti varð Gabríel Freyr með 11,5 vinninga og þriðji varð Ágúst með 10 vinninga.
• Í yngsta flokknum, barnaflokki, þar sem keppendur eru fæddir árið 2006 og síðar var mikil spenna. Svo fór að lokum að þrír keppendur urðu efstir og jafnir með 5 vinninga og teljast þeir allir sigurvegarar.
• Skákmeistarar SA í barnaflokki – fædd 2006 og síðar eru: Jóel, Ingólfur og Brynja.
  
  
  Heildarúrslit í seinni umferð má sjá hér að neðan. Ártal í sviga er fæðingarár.

1. Fannar Breki(2005)8,5 vinningar
2. Ágúst (2005)8 vinningar
3. Gabríel (2004)7,5 vinningar
4. -6. sæti Jóel (2007), Ingólfur (2007) og Brynja (2006)5 vinningar

7.-8. sæti Máni (2010) og Ívan (2010) 2 vinningar

9. sæti Alexía (2011) 1 vinningur
10. sæti Skotta(1342) 0 vinningar

Róbert sigraði með glæsibrag í Vin

Róbert Lagerman sigraði með glæsibrag á Jólaskákmóti Vinaskákfélagsins og Hróksins sem haldið var í Vin, fræðslu- og batasetri Rauða krossins, á mánudag. Róbert hlaut 5,5 vinning af 6 mögulegum, Ingi Tandri Traustason varð annar með 4,5 og Hrafn Jökulsson varð í 3. sæti, sjónarmun á undan FIDE-meisturunum Davíð Kjartanssyni og Vigni Vatnari Stefánssyni, en allir hlutu þeir 4 vinninga. 

Sérlegur gestur á mótinu var Kristjana Guðmundsdóttir Motzfeldt, sem lék fyrsta leikinn í skák Björns Agnarssonar og Björgvins Kristbergssonar. 

Skáklífið í Vin hefur blómstrað síðan árið 2003 þegar Hróksmenn komu þangað fyrst í heimsókn og stóðu að stofnun Vinaskákfélagsins, sem nú er meðal líflegustu skákfélaga landsins og teflir m.a. fram þremur keppnissveitum á Íslandsmóti skákfélaga.

 

Fastar æfingar eru í Vin, Hverfisgötu 47, á mánudögum kl. 13 en þar er teflt flesta daga og Vinaskákfélagið stendur reglulega fyrir ýmsum skemmtilegum viðburðum þar sem allir eru hjartanlega velkomnir. Vinninga á jólaskákmótið gáfu forlögin Bjartur og Ugla, og í mótslok var boðið upp á dýrindis vöfflukaffi. 

Lokastaðan: 

1   Róbert Lagerman                      5.5      
2   Ingi Tandri Traustason            4.5      
3-5  Hrafn Jökulsson                       4        
      Davíð Kjartansson                     4        
      Vignir Vatnar Stefánsson         4        
6-9  Óskar Haraldsson                     3.5 
      Hjálmar Sigurvaldason              3.5
      Hörður Jónasson                        3.5     
      Magnús Magnússon                  3.5 
10-12 Guðni Stefán Pétursson       3 
      Pétur Jóhannesson                     3       
      Björn Agnarsson                          3        
13-14 Sveinbjörn Jónsson                2.5
      Halldór Kristjánsson                    2.5     
15-16 Björgvin Kristbergsson          1.5
      Konráð Björgólfsson                   1.5 
17   Sigurjón Ólafsson                       1 

Haraldur efstur fyrir lokaumferð U-2000 mótsins

Það var hart barist í sjöttu og næstsíðustu umferð U-2000 móts TR síðastliðið miðvikudagskvöld og nokkuð var um sigra þeirra stigalægri gegn þeim stigahærri. Á efsta borði gerðu Dawid Kolka (1907) og Hilmar Þorsteinsson (1800) jafntefli en við hlið þeirra sigraði Haraldur Baldursson (1957) Veroniku Steinunni Magnúsdóttur (1778) og skaust þar með einn í efsta sætið með 5,5 vinning. Dawid kemur næstur með 5 vinninga ásamt Kjartani Ingvarssyni (1822) sem lagði Óskar Haraldsson (1732). Hilmar fylgir þeim eins og skugginn með 4,5 vinning.

Hinn ungi Stephan Briem (1594) heldur áfram góðu gengi og gerði nú jafntefli við hinn margreynda Friðgeir Hólm (1739) eftir að hafa lengi reynt að vinna endatafl þar sem hvor hafði drottningu en Stephan hafði að auki tvö samstæð peð. Þá sigraði Ólafur Evert Úlfsson (1464) Helga Pétur Gunnarsson (1801) með svörtu og hin ungu Arnar Milutin Heiðarsson (1358), Freyja Birkisdóttir (1186) og Benedikt Briem (1077) höfðu betur gegn mun stigahærri andstæðingum.

Sjöunda og síðasta umferð fer fram næstkomandi miðvikudagskvöld og verður blásið til leiks kl. 19.30. Þá mætast á efstu borðum Haraldur og Jon Olav Fivelstad (1918), Dawid og Kjartan, sem og Hilmar og Friðgeir. Áhorfendur velkomnir. Alltaf heitt á könnunni!

Myndskreytta frásögn má finna á heimasíðu TR

• Chess-Results
• Skákirnar: 1 2 3 4 5 6

Geðveik úrslit í geðveiku móti - Smári sigurvegari

Í gær fór fram geðveikt skákmót á vegum Skákfélags Akureyrar. 18 skákmenn mættu og tóku þátt í hraðskák þar sem tímamörkin voru 5 mín og 3 sek. að auki fyrir hvern leik. Aðgangseyrir rann óskertur til Grófarinnar og sumir greiddu meira en farið var fram á. Það á við um heiðursfélaga, unglinga og venjulega félagsmenn. Samtals söfnuðust því 22 þúsund krónur og tók Eymundur Eymundsson við peningunum í mótslok.

Í þakkarávarpi sínu sagði Eymundur m.a. „Það gleymist stundum í forvörnum hvað Skákfélag Akureyrar hefur unnið frábært forvarnarstarf og menn unnið óeigingjarna vinnu með börnum og ungmennum gegnum tíðina. Eitt elsta eða elsta félag Akureyrar hefur verið og er mikils virði fyrir samfélagið sem hefur alið upp flott ungmenni. Fyrir það ber að þakka.“ Í upphafi móts sagði Eymundur frá Grófinni og starfseminni sem þar fer fram. 

Í lok móts voru dregin út verðlaun sem styrktaraðilar mótsins gáfu. Kertastjaki og kerti frá Blómabúð Akureyrar hlaut Haki Jóhannesson. Tafl að verðmæti 5000 krónur, sem Penninn Eymundsson gaf, hafnaði hjá Karli Agli Steingrímssyni. Að lokum var dregið út inneignarnóta frá Joe´s að upphæð kr. 5000.- Það hlaut heiðursmaðurinn Smári Ólafsson sem bar sigur úr bítum í mótinu sjálfu. Hann hafði lýst því yfir fyrir mót að hann ætlaði að afsala sér verðlaunum og láta þau renna til málefnisins. Því afhenti hann einum keppanda, Stefáni Júlíussyni, sem gjarnan hefur leitað til Grófarinnar, vinninginn.

Tefldar voru 9 umferðir eftir Monrad-kerfi og urðu úrslit þau að í 4. sæti lenti Ólafur Kristjánsson með 6 vinninga. Hann leiddi mótið lengi vel og var í 1. sæti í 4 umferðir og tefldi á þeim tíma glæsilegar skákir en fataðist flugið undir lok móts.
Hálfum vinningi og einu sæti ofar, með 6,5 vinninga varð Tómas Veigar Sigurðarson.
Í 2. sæti lenti Haraldur Haraldsson með 7 vinninga og í efsta sæti lenti Smári Ólafsson Hlaut hann 7,5 vinninga af 9 mögulegum.

Mikla athygli vakti gengi hins unga Fannars Breka, sem á laugardag sigraði á Haustmóti Skákfélagsins í yngri flokkum.  Hlaut Fannar 5 vinninga af 9 mögulegum í gær og tefldi á 1. borði í 2 síðustu umferðunum. Máttu margir reyndir kappar líta hann öfundaraugum vegna velgengninnar.

Skákþáttur Morgunblaðsins: Spennan í hámarki – úrslitaskák Carlsen og Karjakin verður tefld í kvöld

Heimsmeistarinn Magnús Carlsen og áskorandi hans, Sergei Karjakin, setjast niður kl. 19 í kvöld að íslenskum tíma og tefla tólftu og síðustu skákina í einvíginu um heimsmeistaratitilinn, sem staðið hefur yfir í New York síðan 11. nóvember sl. Margt bendir til þess að Norðmaðurinn muni tefla stíft til sigurs í kvöld en hann er með hvítt og eftir að hann jafnaði metin hefur sjálfstraust hans aukist, eins og sást þegar ellefta skákin fór fram á laugardaginn en þar mátti Karjakin gæta sín þó að hann hefði hvítt en náði að knýja fram jafntefli með þráskák. Staðan er því jöfn fyrir skákina í kvöld, 5 ½ : 5 ½, og spennan í hámarki.

Í sögulegu samhengi, og ef frá er talið tímabilið 1993 – 2005 þegar tveir heimsmeistaratitlar voru í „umferð,“ þá er þetta í fimmta sinn í sögunni sem slík staða kemur upp fyrir lokaskák heimsmeistaraeinvígis: Botvinnik gegn Bronstein 1951, Botvinnik gegn Smyslov 1954, Kramnik gegn Topalov 2006 og Anand gegn Gelfand 2012.

Ljúki skákinni í kvöld með jafntefli verða tefldar fjórar atskákir á miðvikudaginn með tímamörkunum 25 10. Magnús vann heimsmeistaramótið í atskák 2014 og 2015 og er sigurstranglegur á þeim vettvangi en sé miðað við þá erfiðleika sem hann hefur átt við að stríða í einvíginu er ekkert gefið. Verði áfram jafnt eftir atskákirnar eru á dagskrá tvær hraðskákir, 5 3 og svo að lokum bráðabanaskák.

Sergei Karjakin hefur lengi alið með sér þann draum að verða heimsmeistari. Hann er yngsti stórmeistari skáksögunnar, náði tilskildum áföngum aðeins 12 ára gamall. Hann er fæddur árið 1990 í Simferopol í Úkraínu á áhrifasvæði Rússa á Krímskaganum. Fyrir sjö árum fluttist hann til Moskvu og gerðist rússneskur ríkisborgari. Taflmennska hans í einvíginu bendir til þess að hann hafi dregið mikinn lærdóm af öllum heimsmeistaraeinvígjum sem háð hafa verið frá árinu 1951:

New York 2016; 11. einvígisskák:

Sergei Karjakin – Magnús Carlsen

Spænskur leikur

1. e4 e5 2. Rf3 Rc6 3. Bb5

Spænski leikurinn hefur komið fyrir í sjö af ellefu skákum einvígisins.

3. ... a6 4. Ba4 Rf6 5. O-O Be7 6. d3 b5 7. Bb3 d6 8. a3 O-O 9. Rc3 Be6

Carlsen lék 9. ... Ra5 í 2. einvígisskákinni. Báðir leikirnir eru góðir.

10. Rd5 Rd4 11. Rxd4 exd4 12. Rxf6 Bxf6 13. Bxe6

Dæmigert fyrir taflmennsku Karjakin. Var ekki aðeins meira púður í 13. Bd5?

13. ... fxe6 14. f4 c5 15. Dg4 Dd7 16. f5

Eftir mikil uppskipti sem þóttu benda til þess að Magnús væri sáttur við skiptan hlut virtist staða Karjakin örlítið betri. En ekki er allt sem sýnist.

16. ... Hae8 17. Bd2 c4 18. h3 c3 19. bxc3 d5!

Tveir síðustu leikir Carlsens þóttu bráðsnjallir þótt þeir nái ekki að raska jafnvægi stöðunnar.

20. Bg5 Bxg5 21. Dxg5 dxe4 22. fxe6 Hxf1+ 23. Hxf1 Dxe6 24. cxd4

Nú liggur beinast við að leika 24. ... exd3 25. cxd3 De3+ 26. Dxe3 Hxe3 27. Hd1 He2 og staðan er jafnteflisleg. En Magnús reynir að hrista upp í stöðunni með því að veðja á e-peðið.

24. ... e3!? 25. He1 h6 26. Dh5 e2 27. Df3 a5 28. c3 Da2

Hótar 29. ... Dd2 en Karjakin finnur bestu varnarleiðina.

29. Dc6! He6 30. Dc8+ Kh7 31. c4 Dd2 32. Dxe6 Dxe1+ 33. Kh2 Df2 34. De4+

- og hér sættust keppendur á jafntefli, hvítur þráskákar. Mælt er með vefsvæðinu Chess24.com til að fylgjast með skákinni í kvöld.

Grein þessi birtist í Morgunblaðinu 28. nóvember 2016

Skákþættir Morgunblaðsins

[Event "Carlsen - Karjakin World Championship"] [Site "New York, NY USA"] [Date "2016.11.26"] [EventDate "2016.11.11"] [Round "11"] [Result "1/2-1/2"] [White "Sergey Karjakin"] [Black "Magnus Carlsen"] [ECO "C78"] [WhiteElo "?"] [BlackElo "?"] [PlyCount "67"] 1.e4 e5 2.Nf3 Nc6 3.Bb5 a6 4.Ba4 Nf6 5.O-O Be7 6.d3 b5 7.Bb3 d6 8.a3 O-O 9.Nc3 Be6 10.Nd5 Nd4 11.Nxd4 exd4 12.Nxf6+ Bxf6 13.Bxe6 fxe6 14.f4 c5 15.Qg4 Qd7 16.f5 Rae8 17.Bd2 c4 18.h3 c3 19.bxc3 d5 20.Bg5 Bxg5 21.Qxg5 dxe4 22.fxe6 Rxf1+ 23.Rxf1 Qxe6 24.cxd4 e3 25.Re1 h6 26.Qh5 e2 27.Qf3 a5 28.c3 Qa2 29.Qc6 Re6 30.Qc8+ Kh7 31.c4 Qd2 32.Qxe6 Qxe1+ 33.Kh2 Qf2 34.Qe4+ 1/2-1/2

Nýr kennsluvefur í skák kominn í loftið

Friðrik Ólafsson stórmeistari í skák opnaði í dag formlega nýja vefsíðu, skakkennsla.is, á henni er að finna fjölbreytt úrval kennslumyndbanda í skák. Markmiðið með gerð vefsíðunnar er að auðvelda aðgengi að náms- og kynningarefni á íslensku um skák sem einkum nýtist börnum sem eru að læra að tefla, skákkennurum í skólum og foreldrum sem vilja hjálpa börnum sínum með að verða betri skákmenn. Á vefnum er að finna rúmlega 120 kennslumyndbönd bæði fyrir byrjendur og lengra komna. 

Vefsíðan er samstarfsverkefni Skáksambands Íslands og GAMMA Capital Management og er ætlunin að fjölga myndböndunum eftir því sem tíminn líður. Skáksambandið og GAMMA vonast til að verkefnið verði íslensku skáklífi mikil lyftistöng í framtíðinni og muni gagnast börnum vel sem kennsluefni í skák. Kennsluefnið skiptist í megingreinar skáklistarinnar; miðtöfl, endatöfl og byrjanir, auk þess er frægum skákum úr skáksögunni gerð góð skil ásamt myndböndum sem fjalla um feril íslensku stórmeistaranna. 

Vefsíðan var formlega tekin í notkun í Rimaskóla í dag og við það tilefni var spilað myndband um feril eins ástsælasta skákmanns landsins, Friðriks Ólafssonar. Friðrik varð íslandsmeistari í skák aðeins 17 ára gamall og Norðurlandameistari ári síðar. Hann varð stórmeistari í skák fyrstur Íslendinga árið 1958, þá 23 ára gamall.  

Friðrik sagði við það tækifæri, „Það er ánægjulegt að vönduð kennsluvefsíða um skák fyrir börn sé komin í gagnið. Það er von mín að vefsíðan verði vel sótt og hafi jákvæð áhrif á skákiðkun barna, foreldra og kennara. Skák er einstaklega skemmtileg, eflir rökhugsun, einbeitingu og sköpunargáfu sem styrkir jafnframt námsgetu barna.“ 

Gunnar Björnsson forseti Skáksambands Íslands sagði jafnframt við þetta tilefni að vefurinn kæmi á góðum tíma þar sem skákhreyfingin hefur verið vör við stóraukinn skákáhuga eftir sigur Magnúsar Carlsen í heimsmeistaraeinvíginu í New York. 

„Það er ánægjulegt að geta stutt við svona verðugt verkefni, við hjá GAMMA vonum að vefurinn veiti krökkum innblástur og hafi hvetjandi áhrif á skákiðkun þeirra,” sagði Agnar Tómas Möller hjá GAMMA við opnun kennsluvefsins í Rimaskóla. 

Höfundur kennslumyndbandanna er Björn Ívar Karlsson, sem hefur FIDE-þjálfaragráðu og er einn reyndasti skákkennari landsins. Björn talar jafnframt inn á öll myndböndin. Í dag er Björn í fullu starfi við að kenna skák við sjö grunnskóla og hefur undanfarin 8 ár kennt við 30 grunnskóla, í Reykjavík, Akureyri og Vestmannaeyjum. Björn hefur komið að kennslu efnilegustu skákmanna landsins auk þess að vera landsliðsþjálfari íslenska kvennaliðsins í skák.

Að lokinni opnuninni tók svo Friðrik eina bröndótta við Nansý Davíðsdóttur, einn af fjöldamörgum afreksskákmkrökkum sem komið hafa úr Rimaskóla. Skákinni lauk með jafntefli!