Tata Steel-mótið hófst í gær

Tata Steel-mótið hófst í gær í Sjávarvík (Wijk aan Zee) í Hollandi. Fjórtán skákmenn tefla í efsta flokki og þar á meðal, heimsmeistarinn í skák, Magnus Carlsen. Wesley So (2773), Ding Liren (2766) og Fabiano Caruana (2787) unnu sínar skákir í fyrstu umferð. Magnus Carlsen (2844) gerði jafntefli við David Navara (2730).

Úrslit fyrstu umferðar:

Hou, Y. - Karjakin, S.	½-½
So, W. - Giri, A.	1-0
Ding, L. - Adams, M.	1-0
Navara, D. - Carlsen, M.	½-½
Caruana, F. - Eljanov, P.	1-0
Wei, Y. - Tomashevsky, E.	½-½
Mamedyarov, S. - Van Wely, L.	½-½

Önnur umferð fer fram í dag og hefst kl. 12:30. Þá teflir Carlsen við Caruana.

• Heimasíða mótsins
• Beinar útsendingar
• Chess24

Skákþing Akureyrar hefst í dag

Skákþing Akureyrar 2016 hefst sunnudaginn 17 janúar kl 13:00

Tímamörk verða 90 mínútur + 30 sekúndur á leik eins og verið hefur. Ef 10 - þátttakendur tefla allir við alla eða 9 umferðir en ef fleiri en 11 verður 7 umferðir eftir svissneska kerfinu. þáttökugjald er 3.000 kr. fyrir félagsmenn en 4.000 kr. fyrir aðra.

Núverandi Skákmeistari Akureyrar er Áskell Örn Kárason og er það verðug áskorun fyrir unga og aldna meistara félagsins og annarra utan félagsins að velta honum úr sessi.

Þátttöku má tilkynna í netfangið [e-mail], S:820 7536, á Facebook-síðu Skákfélagsins eða með því að mæta tímanlega á sunnudaginn

Verðlaun

1. 18.000 kr
2. 12.000 kr
3.  6.000 kr

• Efstur innan 1700 Elo stiga 6.000 kr

Athugið að mótið góð æfing fyrir Íslandsmót skákfélaga og Reykjavíkurskákmótið í mars. Teflt verður á fimmtudagskvöldum og sunnudögum kl. 13

Skákþáttur Morgunblaðsins: Að leika peði beint ofan í þrælvaldaða reitinn

Í flóknum stöðum er gott að hafa í huga að ólíklegur leikur getur stundum verið sá eini rétti í stöðunni. Sá sem þessar línur ritar átti þess eitt sinn kost að fara yfir skák með Garrí Kasparov og hann hafði þá lagt Jan Timman að velli. Þemað „... að leika peði beint ofan í þrælvaldaðan reit“ var honum einkar hugleikið og hafði greinilega fengið fræðilegan sess í skákuppeldi hans. Á sterkasta opna móti ársins, sem lauk á milli jóla og nýárs í Katar, varð Magnús Carlsen efstur ásamt Kínverjanum Yu Yangyi með 7 vinninga af 9 mögulegum og vann svo úrslitaeinvígið, 2:0 í. Í fimmtu umferð tefldi Norðmaðurinn við sigurvegarann frá Reykjavíkurmótinu 2014 og í flóknu miðtafli setti hann allt í bál og brand með þess háttar peðsleik sem áður var minnst á. Eftir smá „hikst“ var það svo samdóma niðurstaða „vélanna“ að þarna hefði heimsmeistarinn enn einu sinni hitt naglann á höfuðið:

Magnús Carlsen – Li Chao

Grünfeld-vörn

1. d4 Rf6 2. c4 g6 3. f3

Tískuleikur sem sniðgengur hefðbundna Grünfeld-vörn.

3. ... d5 4. cxd5 Rxd5 5. e4 Rb6 6. Rc3 Bg7 7. Be3 O-O 8. Dd2 Rc6 9. O-O-O f5 10. e5 Rb4 11. Rh3 De8 12. Kb1 a5 13. Be2 c6 14. Hc1 Kh8 15. Ka1 Be6 16. Rf4 Df7 17. h4 Bxa2 18. h5 Kg8 19. hxg6 hxg6 20. g4 Bb3 21. Bd1 a4 22. Dh2 Hfd8 23. Dh7 Kf8

24. d5 Rc4 25. Rxg6+ Ke8

Ekki gengur 25. ... Dxg6 vegna 26. Dxg6 a3 27. Hh8+! Bxh8 28. Bh6+ og mátar.

26. e6 a3 27. exf7+ Kd7 28. Re5+! Bxe5 29. Dxf5+ Kc7 30. Dxe5+ Rxe5 31. Bxb3 axb2 32. Kxb2 Rbd3 33. Kb1 Rxc1 34. Hxc1 Kc8 35. dxc6 bxc6 36. f4

– og svartur gafst upp. 

Skákþing Reykjavíkur hafið – Jón Kristinsson meðal þátttakenda

Skákvertíðin 2016 hófst í Faxafeni á sunnudaginn með fyrstu umferð Skákþings Reykjavíkur. 64 skákmenn eru skráðir til leiks í efsta flokki mótsins og þar eru stigahæstir Stefán Kristjánsson, Jón Viktor Gunnarsson, Guðmundur Kjartansson og Björn Þorfinnsson. Athygli vekur þátttaka Jóns Kristinssonar, sem hefur ekki teflt á þessum vettvangi í meira en 40 ár. Á fimmtudaginn hófst svo Gestamót Hugins og Breiðabliks í Stúkunni á Kópavogsvelli, afar vel skipað mót þar sem teflt er einu sinni í viku. Meira um þessi mót síðar. 

Íslandsmeistarar í styttri skákum

Íslandsmót í hraðskák, atskák og netskák fóru fram í desembermánuði. Í hraðskákmótinu, Friðriksmóti Landsbankans sem fram fór 13. desember, bar Þröstur Þórhallsson sigur úr býtum með 9½ vinning af 11 mögulegum. Þann 27. desember sigraði undirritaður á at-skákmóti Íslands, hlaut 7½ vinning af níu, en mótið var jafnframt Atskákmót Skákklúbbs Icelandair. Að kveldi þessa sama dags fór fram Íslandsmótið í netskák, en Davíð Kjartansson sigraði í sjötta sinn, hlaut 10 vinninga af 11 mögulegum. 

Glæsileg frammistaða Hilmis í Danmörku

Það var gaman að fylgjast með hinum 14 ára Hilmi Frey Heimissyni á nýársmótinu í Öbro í Danmörku sem lauk á gamlársdag. Þar tefldu 65 skákmenn sjö umferðir og var Hilmir nr. 45 í stigaröðinni. Hann gerði sér lítið fyrir, hlaut 5 vinninga af sjö mögulegum, varð í 5. sæti eftir stigaútreikning, taplaus og hækkaði um 141 Elo-stig en árangur hans reiknast uppá 2.349 Elo-stig. Sigurvegari varð sænski stórmeistarinn Jonny Hector, sem hlaut 6 vinninga.

Helgi Ólafsson ([e-mail])

Skákþættir Morgunblaðsins birtast á Skák.is viku síðar en í sjálfu blaðinu. 

Grein þessi birtist í Morgunblaðinu 9. janúar 2016.

Skákþættir Morgunblaðsins

[Event "Qatar Masters"] [Site "Doha QAT"] [Date "2015.12.24"] [EventDate "2015.12.20"] [Round "5.1"] [Result "1-0"] [White "Magnus Carlsen"] [Black "Li Chao"] [ECO "D70"] [WhiteElo "2834"] [BlackElo "2750"] [PlyCount "71"] 1. d4 Nf6 2. c4 g6 3. f3 d5 4. cxd5 Nxd5 5. e4 Nb6 6. Nc3 Bg7 7. Be3 O-O 8. Qd2 Nc6 9. O-O-O f5 10. e5 Nb4 11. Nh3 Qe8 12. Kb1 a5 13. Be2 c6 14. Rc1 Kh8 15. Ka1 Be6 16. Nf4 Qf7 17. h4 Bxa2 18. h5 Kg8 19. hxg6 hxg6 20. g4 Bb3 21. Bd1 a4 22. Qh2 Rfd8 23. Qh7+ Kf8 24. d5 Nc4 25. Nxg6+ Ke8 26. e6 a3 27. exf7+ Kd7 28. Ne5+ Bxe5 29. Qxf5+ Kc7 30. Qxe5+ Nxe5 31. Bxb3 axb2+ 32. Kxb2 Nbd3+ 33. Kb1 Nxc1 34. Rxc1 Kc8 35. dxc6 bxc6 36. f4 1-0

Guðmundur Gíslason efstur á Nóa Síríus-mótinu

 

Það segir margt um hversu vel Nóa Síríus-mótið er skipað að aðeins einn keppandi hefur fullt hús eftir tvær umferðir. Guðmundur Gíslason er efstur á mótinu en hann lagði alþjóðlega meistarann Björn Þorfinnsson að velli eftir að hafa snúið á hann í verri stöðu.

Skákunum á 1.-3. borði lauk öllum með jafntefli og eru hvorki meira né minna en 12 keppendur jafnir í 2.-13. sæti með 1½ vinning.

Ingvar Þór Jóhannesson og Stefán Kristjánsson gerðu stutt jafntefli sem og Björgvin Jónsson og Karl Þorsteins. Guðmundur Kjartansson reyndi lengi að kreista fram sigur gegn Degi Ragnarssyni en tókst ekki og jafntefli samið eftir miðnætti í gær.

Þröstur Þórhallsson vann Jón Trausta Harðarson með glæsilegri mannsfórn. Vignir Vatnar Stefánsson sýndi að sigurinn á Birni Þorfinnssyni var engin tilviljun og gerði jafntefli við Sigurð Daða Sigfússon. Örn Leó Jóhannsson gerði jafntefli við Sigurbjörn J. Björnsson í mögnuðu hróksendatafli. 

Þriðja umferð fer fram fimmtudagskvöldið. Þá situr Guðmundur Gíslason yfir. Stefán Kristjánsson teflir við Björgvin Jónsson, Ingvar Þór og Guðmundur Kjartansson mætast og Karl teflir við Þorstein Þorsteinsson sem vann Björgvin Víglundsson á laglegan hátt á gær. Dagur Ragnarsson fær það erfiða verkefni að mæta Þresti Þórhallssyni.

Tveir aðrar viðureignir er sérstaklega vert að nefna. Vignir Vatnar teflir við Andra Áss sem og akureysku goðsagnirnar Stefán Bergsson og Halldór Brynjar Halldórsson mætast.

Nánar á Chess-Results.

B-flokkur

Hart er barist í b-flokki. Eftir fjórar umferðir eru þeir Dagur Andri Friðgeirsson, Snorri Þór Sigurðsson, Guðmundur Kristinn Lee og Bárður Örn Birkisson efstir með fullt hús. Snorri Þór vann stigahæsta keppendann Harald Baldursson í lengstu skák gærdagins.

Nánar á Chess-Results

 

Nánar á Skákhuganum.

• Skákhuginn
• A-flokkurinn á Chess-results
• B-flokkurinn á Chess-results

Smári og Rúnar efstir á Janúarmóti Hugins

Janúarmót Hugins hófst á Húsavík og á Vöglum um sl. helgi. Í Austur-riðli sem tefldur er á Húsavík er Smári Sigurðsson efstur með 2,5 vinninga þegar þremur umferðum er nánast lokið og Ævar Ákason er í öðru sæti með 2 vinninga. Hlynur Snær Viðarsson sem er með 1,5 vinning getur þó náð Smára og Ævari að vinningum þar sem hann á inni frestaða skák gegn Sigurði Daníelssyni. Einnig er ólokið viðureign Sighvats og Heimis frá því í fyrstu umferð.

Staðan í Austur-riðli á chess-results

Þegar öllum skákum í 1-3. umferð í Vestur-riðli er lokið er staðan sú að Rúnar Ísleifsson er efstur með 2,5 vinninga og Karl Egill Steingrímsson og Ármann Olgeirsson hafa tvo vinninga hvor.

Staðan í Vestur-riðli á chess-results

Riðlakeppnin klárast um helgina en þá verða tefldar síðustu tvær umferðirnar í báðum riðlum.

Skákhuginn

Jón Viktor og Jóhann efstir á Skákþinginu

Alþjóðlegi meistarinn Jón Viktor Gunnarsson (2455) og Jóhann H. Ragnarsson (2008) eru efstir með fullt hús vinninga að loknum fjórum umferðum á Skáþingi Reykjavíkur. Fjórða umferð fór fram í gærkveld og þar sigraði Jón Viktor Björns-banann, Vigni Vatnar Stefánsson (2071), og slíkt hið sama gerði Jóhann gegn Fide-meistaranum Guðmundi Gíslasyni (2307) en Jóhann, sem er sautjándi í stigaröð keppenda hefur farið vel af stað.

Stórmeistarinn Stefán Kristjánsson (2471), Mikael Jóhann Karlsson (2161) og Dagur Ragnarsson (2219) eru í 3.-5. sæti með 3,5 vinning en Stefán og Dagur gerðu jafntefli í innbyrðis viðureign og Mikael lagði Jón Kristinsson (2240). Hópur níu keppenda kemur næstur með 3 vinninga.

Í baráttu alþjóðlegu meistaranna hafði Björn Þorfinnsson (2418) betur gegn Guðmundi Kjartanssyni (2456) og óvæntustu úrslit umferðarinnar eru án efa sigur hins unga Mykhaylo Kravchuk (1504) á hinum margreynda Stefáni Bergssyni (2023). Þá heldur Héðinn Briem (1546) áfram góðu gengi og hafði nú betur gegn Lofti Baldvinssyni (1979) og þó nokkuð var um jafntefli hvar nokkru munaði á stigum keppenda í milli.

Glás af spennandi viðureignum verður í boði í fimmtu umferð og stemningin geggjuð eftir því. Á fyrsta borði mætast efstu menn og hlýtur alþjóðlegi meistarinn Jón Viktor það hlutskipti að stýra svörtu mönnunum gegn ljósum her Jóa Ragg. Á næsta borði verður það Dagur Ragg sem hefur hvítt gegn norðlendingnum skeinuhætta, Mikael Jóhanni, og þá mætir einn af hinum ógurlegu fyrrverandi Rimskælingum, Oliver Aron Jóhannesson (2198) stórmeistaranum Stefáni Kristjáns. Að auki verða margar afar athyglisverðar rimmur á öðrum borðum og má til að mynda benda á viðureign félaganna Vignis Vatnars og Björns Hólm Birkissonar (1962).

Fimmta umferð fer fram á sunnudag og hefst kl. 14. Áhorfendur velkomnir – heitt á könnunni og kruðerí með!

Skákir mótsins eru væntanlegar en unnið er að innslætti.

Nánar á heimasíðu TR.

• Heimasíða TR
• Chess-Results

Íslandsmót grunnskóla - stúlknaflokkur

Íslandsmót grunnskóla - stúlknaflokkur fer fram í Rimaskóla laugardaginn 30. janúar klukkan 12:00.

Teflt verður í þremur flokkum.

Fyrsti og annar bekkur.

Fimm umferðir með fimm mínútna umhugsunartíma.

Þriðji til finmmti bekkur.

Sex umferðir með sjö mínútna umhugsunartíma.

Sjötti til tíundi bekkur.

Sex umferðir með tíu mínútna umhugsunartíma.

Umferðafjöldi getur breyst með tilliti til fjölda þátttökuliða.

Keppendur geta teflt upp fyrir sig, þ.e. með eldri sveit síns skóla.

Í hverri sveit skulu vera fjögur borð. Varamenn mega vera allt að þrír.

Þátttökugjald á sveit: 5000 kr. Hámark 10.000 á skóla.

Skákakademía Reykjavíkur sér um framkvæmd mótsins.

Skráning og fyrirspurnir á [e-mail]

Skráningar þurfa að berast fyrir föstudaginn 29. janúar.

165 skráðir til leiks í Reykjavíkurskákmótið

Þegar sjö vikur eru í Reykjavíkurskákmótið er 165 skákmenn skráðir til leiks. Þeirra stigahæstir eru Richard Rapport (2721) og Gabriel Sargissian (2702). 

Enn eiga sterkir skákmenn eftir að bætast við í hópinn. 

Kependalistann eins og hann lítur út núna má nálgast á Chess-Results.

Umfjöllun um Reykjavíkurskákmótið má finna á Chess.com.

Kristinn Bjarnason nýr sigurvegari í Stangarhyl

Á öðrum skákdegi Ása á þessu nýbyrjaða ári, þá mættu tuttugu og fimm skáköldungar til leiks í gær í Stangarhylinn. Kristinn Bjarnason varð sigursælastur, hann fékk 8 vinninga af 10

Kristinn fór rólega af stað var með tvo vinninga eftir fjórar umferðir en vann svo sex síðustu, Kristinn hefur ekki verið efstur áður. Það voru Sæbjörn og Páll G sem náðu að vinna hann. Sumir eru stundum að segja það að það séu alltaf sömu mennirnir sem séu í efstu sætum, en það er ekki alveg rétt.

Nákvæm skráning á þessu hófst ekki fyrr en 1. september 2008. Síðan þá hafa 30 meistarar sigrað á skákdögum. Sumir bara einu sinni en aðrir miklu oftar.

Sá sem hefur sigrað oftast er Björgvin Víglundsson, hann hefur sigrað  39 sinnum. Ari Stefánsson varð í öðru sæti í gær með 7 ½ vinning.

Jafnir í þriðja til fjórða sæti urðu svo Sæbjörn G Larsen og Páll G Jónsson báðir með 7 vinninga. 

Sjá nánari úrslit  í töflu og myndir frá ESE.

Skákþing Akureyrar hefst á sunnudaginn

Skákþing Akureyrar 2016 hefst sunnudaginn 17 janúar kl 13:00

Tímamörk verða 90 mínútur + 30 sekúndur á leik eins og verið hefur. Ef 10 - þátttakendur tefla allir við alla eða 9 umferðir en ef fleiri en 11 verður 7 umferðir eftir svissneska kerfinu. þáttökugjald er 3.000 kr. fyrir félagsmenn en 4.000 kr. fyrir aðra.

Núverandi Skákmeistari Akureyrar er Áskell Örn Kárason og er það verðug áskorun fyrir unga og aldna meistara félagsins og annarra utan félagsins að velta honum úr sessi.

Þátttöku má tilkynna í netfangið [e-mail], S:820 7536, á Facebook-síðu Skákfélagsins eða með því að mæta tímanlega á sunnudaginn

Verðlaun

1. 18.000 kr
2. 12.000 kr
3.  6.000 kr

• Efstur innan 1700 Elo stiga 6.000 kr

Athugið að mótið góð æfing fyrir Íslandsmót skákfélaga og Reykjavíkurskákmótið í mars. Teflt verður á fimmtudagskvöldum og sunnudögum kl. 13