Hjörvar sigurvegari áskorendaflokks - Lenka Íslandsmeistari kvenna

Hjörvar Steinn Grétarsson (2554) sigraði í áskorendaflokki Íslandsmótsins í skák sem lauk í gær. Hann vann Dag Ragnarssonar (2347) í lokaumferðinni. Guðmundur Gíslason (2311), sem vann Oliver Aron Jóhannesson (2212), varð annar og fær því keppnisrétt í landsliðsflokki að ári ásamt Hjörvari. Lenka Ptácníková (2242) varð Íslandsmeistari kvenna.

Það verður að teljast með nokkrum ólíkindum að á níu umferða móti mætust ekki tveir efstu menn mótsins, Hjörvar og Guðmundur. Guðmundur tefldi heldur ekki við Davíð Kjartansson (2364) sem varð þriðji á mótinu 6,5 vinning. Það var góður endasprettur Guðmundar sem lagði grunn af silfrinu og sæti í landsliðsflokki en hann vann þrjár síðustu skákirnar. Toppaði á hárréttum tíma!

Elsa María Kristínardóttir (1875), sem átti afar gott mót, varð önnur á Íslandsmóti kvenna með 5,5 vinning. Tinna Kristín Finnbogadóttir (1950) og Veronika Steinunn Magnúsdóttir (1571) urðu jafnar í 3.-4. sæti með 5 vinninga. Frammistaða Veroniku var afar góð. 

Lokastaða efstu manna:

• 1. Hjörvar Steinn Grétarsson (2554) 7,5 v.
• 2. Guðmundur Gíslason (2321) 7 v.
• 3. Davíð Kjartansson (2364) 6,5 v.
• 4.-8. Lenka Ptácníková (2242), Jón Trausti Harðarson (2170), Dagur Ragnarsson (2347), Haraldur Baldursson (1971) og Stefán Bergsson (2063) 6 v.
• 9.-11. Oliver Aron Jóhannesson (2212), Björn Hólm Birkisson (1845) og Elsa María Kristínardóttir (1875) 5,5 v.

Staðan á Íslandsmóti kvenna:

• 1. Lenka Ptácníková (2242) 6 v.
• 2. Elsa María Kristínardóttir (1875) 5,5 v.
• 3.-4. Tinna Kristín Finnbogadóttir (1950) og Veronika Steinunn Magnúsdóttir (1571) og  4 v. 

Að lokum skulum við skoða hverjir hækka mest á stigum á mótinu. 

1. Aron Þór Mai (+81)
2. Björn Hólm Birkisson (+64)
3. Andri Freyr Björgvinsson (+45)
4. Óskar Víkingur Davíðsson (+36)
5. Héðinn Briem (+32)
6. Óskar Long Einarsson (+29)
7. Stefán Bergsson (+20)
8. Veronika Steinunn Magnúsdóttir (+17)
9. Hjálmar Sigurvaldason (+16)
10. Vignir Vatnar Stefánsson (+16)

 

• Heimasíða Skáksambands Íslands
• Chess-Results
• Myndaalbúm (GB)

Mariya Muzychuk heimsmeistari kvenna

Úkraínska skákkonan Mariya Muzychuk varð í gær 15. heimsmeistari kvenna. Hún vann rússnesku skákkonuna Natalia Pogonina í úrslitaeinvígi þeirra á milli 2,5-1,5 í Sochi í Rússlandi.

Hou Yifan, fráfarandi heimsmeistari kvenna, var ekki meðal keppenda á heimsbikarmótinu þar sem 64 skákkonur tóku þátt. Hún á hins vegar rétt á einvígi við Muzychuk þar sem hún sigraði á Grand Prix-mótaröðinni. 

Heimasíða einvígisins

 

 

Sune Berg Danmerkurmeistari í sjöunda sinn

Stórmeistarinn Sune Berg Hansen (2576) varð Danmerkurmeistari í skák þegar hann sigraði á danska meistaramótinu í skák sem lauk í gær. Curt Hansen (2625), átti góða endurkomu í skákina, varð annar með 6 vinninga.

Þetta er sjöundi meistaratitill Sune sem þar með er orðinn næstsigursælastur allra. Metið á Erik Andersen (12 titlar).

Heimasíða mótsins

Hjörvar efstur fyrir lokaumferðina - Lenka með vinningsforskot á Íslandsmóti kvenna

Hjörvar Steinn Grétarsson (2554) er efstur með með 6,5 vinning að lokinni áttundu umferð áskorendaflokks Íslandsmótsins í skák sem fram fór í dag. Guðmundur Gíslason (2321) og Dagur Ragnarsson (2347), sem hefur unnið 5 skákir í röð eftir hörmulega byrjun, eru jafnir í 2.-3. sæti með 6 vinninga. Lenka Ptácníková (2232), sem er í 4.-7. sæti, hefur vinnings forskot á Íslandsmóti kvenna, á Elsu Maríu Kristínardóttur (1875). 

Sú afar sérstaka staða er á mótinu - að þrír efstu menn mótsins hafa ekki mæst innbyrðis fyrir lokaumferðina. Hjörvar og Dagur tefla á morgun.

Staða efstu manna:

• 1. Hjörvar Steinn Grétarsson (2554) 6,5 v.
• 2.-3. Guðmundur Gíslason (2321) og Dagur Ragnarsson (2347) 6 v.
• 4.-7. Lenka Ptácníková (2242), Davíð Kjartansson (2364), Oliver Aron Jóhannesson (2212) og Haraldur Baldursson (1971) 5,5 v.
• 8.-11. Jón Trausti Harðarson (2170), Gylfi Þórhallsson (2084), Emil Sigurðarson (1922) og Stefán Bergsson (2063)

Í lokaumferðinni mætast meðal annars:

• Hjörvar (6,5) - Dagur (6)
• Guðmundur (6) - Oliver (5,5)
• Lenka (5,5) - Haraldur (5,5)
• Davíð (5,5) - Gylfi (5)

Staðan á Íslandsmóti kvenna:

• 1. Lenka Ptácníková (2242) 5,5 v.
• 2. Elsa María Kristínardóttir (1875) 4,5 v.
• 3.-4. Veronika Steinunn Magnúsdóttir (1571) og Tinna Kristín Finnbogadóttir (1950) 4 v. 

 

• Heimasíða Skáksambands Íslands
• Chess-Results
• Myndaalbúm (GB)

Skákþáttur Morgunblaðsins: Huginn öruggur sigurvegari á Íslandsmóti skákfélaga en leikreglur sæta gagnrýni

Skákfélagið Huginn, A-sveit, vann sannfærandi sigur á Íslandsmóti skákfélaga sem lauk í Rimaskóla um síðustu helgi. Huginn hlaut 56½ vinning af 72 mögulegum. Taflfélag Reykjavíkur varð 2. sæti með 55 vinninga og Taflfélag Vestmannaeyja varð í 3. sæti með 52½ vinning. Þessar sveitir höfðu umtalsverða yfirburði yfir önnur lið.

Taflfélag Vestmanneyja hefur mörg undanfarin ár lent í öðru eða þriðja sæti keppninnar en munurinn á sveit TV og t.d. sveit Hugins núna og sigurvegurum fyrri ára virðist liggja í því að keppinautarnir hafa haft meiri breidd. Sveit Hugins tefldi fram 18 liðsmönnum á keppnistímabilinu 2014-2015 þar af átta stórmeisturum og þrem þeirra vel yfir 2600 elo-stigum. Við þessu er ekkert að segja. Leikreglurnar að öðru leyti teljast varla sanngjarnar, er þá einkum litið til þess þegar öflugustu félögin eru með tvö lið í efstu deild. Huginn var að þessu sinni eina félagið sem var í aðstöðu til tefla fram B-sveit. Á það hefur verið bent að meðalstig B-sveitar Hugins í viðureigninni við Taflfélag Reykjavíkur hafi verið 2238 elo-stig; þegar B-sveitin mætti A-sveit Hugins voru meðalstigin dottin niður í 1854 elo-stig.

Það blasir við að breytinga er þörf á þessu fyrirkomulaginu; í öðrum keppnisgreinum þekkist þetta fyrirkomulag ekki; síðasta skráða dæmið um B-lið í alvarlegri keppni verður maður að sækja til ársins 1968 þegar B-lið KR komst alla leið á Melavöllinn í úrslitaleik bikarkeppni KSÍ í knattspyrnu.

Íslandsmót taflfélaga er eitt allsherjar gallerí af karakterum; Áskell Örn Kárason skartaði bleikum Lennon-gleraugum sem fóru honum mjög vel og Héðinn Steingrímsson kom með sérstakan skrifstofustól til að sitja í. Ekkert nýtt er að skákmenn haldi tryggð við sinn stól; stóll Fischers frá áskorendaeinvíginu við Tigran Petrosjan haustið 1971 kom nokkrum mánuðum síðar fljúgandi frá Buenos Aires til Íslands.

Aftur að liðunum í efstu deild: Kjarninn hjá Skákfélagi Akureyrar samstendur af liðsmönnum sem stigu sín fyrstu skref í skákinni hjá þessu frábæra félagi. Einn þeirra, Rúnar Sigurpálsson, lagði í glannalega fórn í fyrstu umferð gegn greinarhöfundi og tapaði. Í næstu umferð gekk betur. Hann tefldi þá við portúgalska stórmeistarann Louis Galego:

Louis Galego (Víkingaklúbburinn) – Rúnar Sigurpálsson (SA)

Sikileyjarvörn

1. e4 Rf6 2. d3 d6 3. f4 g6 4. Rf3 Bg7 5. Be2 0-0 6. 0-0 c5 7. Rc3 Rc6 8. De1 Rd4 9. Bd1

Þessa byrjun má einnig kalla hollenska vörn með skiptum litum.

9.... Bg4 10. Rxd4 cxd4 11. Re2 Db6 12. h3 Bxe2 13. Dxe2 Rd7 14. g4 Hac8 15. h4 e6 16. h5 gxh5?! 17. gxh5?!

Peðaframrás hvíts á kóngsvængum er ekki ýkja hættuleg en hér átti Galego tvímælalaust að leika 17. g5 og taka síðan h5-peðið við tækifæri.

17.... h6 18. Hf2 Kh8 19. b3 Hg8 20. Df3

Það er erfitt að andæfa á g-línunni þegar drottningarvængurinn situr eftir.

20.... f5 21. exf5 exf5 22. Hg2 Bf6 23. Dd5?

Hann varð að leika 23. Hg6! og þá er staðan í jafnvægi.

23.... Hxg2+! 24. Kxg2 Db4! 25. De6 Dc3 26. Hb1 Dc6+

Rúnar nær að knýja fram sigur með nokkrum hárbeittum leikjum.

27. Kh2 Hg8 28. De2

Valdar g2-reitinn en þessi leikur dugar skammt.

28. ... Re5! 29.Df1

Eða 29. fxe5 Bxe5+ 30. Kh3 Dh1+ og mátar.

29.... Rg4+ 30. Kh3 Rf2+

– og Galego gafst upp.

Helgi Ólafsson [e-mail]

Skákþættir Morgunblaðsins eru birtir á Skák.is viku síðar en í sjálfu Morgunblaðinu.  

Grein þessi birtist í Morgunblaðinu 28. mars 2015.

Skákþættir Morgunblaðsins

Rógvi er Føroyameistari - hörð barátta í Danaveldi

Rógvi Egilstoft Nielsen (2295) varð í dag Færeyjarmeistari í skák. Rógvi hlaut 6,5 vinning og varð hálfum vinningi fyrir ofan bróður sinn Högna (2373), Martin Poulsen (2274), Hans Kristian Simonsen (2128) og Eyðun Nolsoe (2194).

Mótstafla á Chess-Results.

Danska meistaramótinu lýkur á morgun. Þar berjast Sune Berg Hansen og Curt Hansen um sigurinn. Þeir mætast á morgun og þarf Curt nauðsynlega að sigra.

Heimasíða mótsins

 

 

 

 

Mariya Muzychuk í forystu í heimsmeistaraeinvígi kvenna

Þriðja skák heimsmeistaraeinvígis kvenna hófst fyrir skemmstu í Sochi í Rússlandi. Til úrslita tefla Mariya Muzychuk (2526), Úkraínu, og Natalija Pogonina (2456). Keppnin hófst í mars og hófu 64 skákkonur keppni. Staðan nú er 1,5-0,5 Muzychuk í vil. 

Þriðja skákin er núna í gangi og hefur sú úkraínska hvítt.

• Heimasíða mótsins
• Chess24 (beinar útsendingar)

 

Lenka, Oliver og Hjörvar efst í áskorendaflokki

Lenka Ptácníková (2242), Oliver Aron Jóhannesson (2212) og Hjörvar Steinn Grétarsson (2554) eru efst og jöfn með 5,5 vinning að lokinni sjöttu og sjöundu umferð áskorendaflokks Íslandsmótsins sem fram fóru í gær á löngum föstudegi. Lenka gerði jafntefli við Hjörvar en Oliver Aron vann Davíð Kjartansson (2364).

Nokkuð var um óvænt úrslit í gær. Í sjöttu umferð gerði  Vignir Vatnar Stefánsson (1909) jafntefli við Guðmund Gíslason (2321) og Alex Sigurðarson (1348) vann Ingvar Örn Birgisson (1887).

Í þeirri sjöundu gerðu Lenka og Hjörvar jafntefli og Oliver vann Davíð eins og áður hefur komið fram. Óskar Long Einarsson (1574) gerði jafntefli við Tinnu Kristínu Finnbogadóttur (1950) og Héðinn Briem (1462) vann Bárð Örn Birkisson (1839). 

Staða efstu manna:

• 1.-3. Lenka Ptácníková (2242), Oliver Aron Jóhannesson (2212) og Hjörvar Steinn Grétarsson (1554) 5,5 v.
• 4.-6. Gylfi Þórhallsson (2084), Guðmundur Gíslason (2321) og Dagur Ragnarsson (2347) 5 v.
• 7.-10. Davíð Kjartansson (2364), Jón Árni Jónsson (2084), Eiríkur Kolbeinn Björnsson (1961) og Haraldur Baldursson (1971)

Í áttundu og næstsíðustu umferð sem hefst kl. 14 mætast meðal annars:

• Oliver (5,5) - Hjörvar (5,5)
• Dagur (5) - Lenka (5,5)
• Gylfi (5) - Guðmundur (5)
• Jón Árni (4,5) - Davíð (4,5)
• Haraldur (4,5) - Eiríkur (4,5)

Staðan á Íslandsmóti kvenna:

• 1. Lenka Ptácníková (2242) 5,5 v.
• 2. Elsa María Kristínardóttir (1875) 4 v.
• 3. Tinna Kristín Finnbogadóttir (1950) 3,5 v.
• 4. Veronika Steinunn Magnúsdóttir (1571) 3 v.

Lokastaða efstu manna í opnum flokki:

• 1. Stefán Orri Davíðsson (1038) 6 v.
• 2. Hjörtur Kristjánsson 4,5 v.
• 3.-5. Freyja Birkisdóttir (1000), Birkir Ísask Jóhannsson og Alexander Már Bjarnþórssoson (1000) 4.

 

• Heimasíða Skáksambands Íslands
• Chess-Results
• Myndaalbúm (GB)

Riddarinn: Páskamótið - Jón Þorvaldsson vann með sitjandi sæld

Hinir sókndjörfu riddarar reitaða borðsins sem storkuðu örlögum sínum á hvítum reitum og svörtum í Vonarhöfn á miðvikudaginn var, vonglaðir í von um vinning eða annars konar glaðning, fóru ekki bónleiðir til búðar. Margir uppskáru sæta sigra og sumir páskanamm í verðlaun eða í kaupbæti.

Tveir tugir vasklegra eldri skákmanna voru þar mættir til að vegast á til að láta ljós sitt sína og beita hverja aðra lúmskum bellibrögðum að fremsta mætti. Sjaldan hefur vopnaskakið þar glumið jafn hátt og verið eins jafnt alveg niður í 18. sæti.

Jón Þorvaldsson „Huginsdalakappi“ stóðst ekki mátið og var það mættur galvaskur og gaf hvorki grið né frið en geystist fram og hjó sér lið. Hann gerði sér lítið fyrir og vann mótið með sitjandi sæld í hans fyrsta móti í 60+ þyngdarflokki. Varð þó að sjá af tveimur vinningum með trega í annarra hendur en þó með bros á vör. Þór Valtýs lenti í öðru sæti, síðan Jón Þ. Þór og fleiri valinkunnir kappar og fyrrverandi sigurvegarar í halarófu.

Sumir teflenda fengu þarna útrás fyrir innibyrða veðurgremjuskapröskun einkum þeir sem er farið að lengja mjög eftir vorinu og geta vart á heilum sér tekið nema tappa henni af yfir tafli dag eftir dag, núna þriðja daginn í röð. Guðfinnur, Páll, Einar og Friðgeir með 34 skákir á þremur dögum, sem milda vandann en leysa hann ekki að fullu fyrr en vorið kemur með blóm í haga.

Nánari úrslit má sjá á meðf. mótstöflu hér að neðan. Önnur rimma á sama stað og tíma í næstu viku og svo alla miðvikudaga sem eftirlifir ársins. Munið að mæta.   

Skákdeild KR - Gunnar Freyr vígreifur sigurvegari í Gunnaslag

Það var þröng á þingi KR-heimilinu sl. mánudag þegar þar var blásið í herlúðra í svokölluðum „Gunnaslag“ þar sem  6 garplegir og geigvænlegir Gunnarar voru mættir herskáir til tafls, gráir og rauðir fyrir járnum.  Sumir komnir um langan veg til að ögra sjálfum sér og öðrum þátttakendum í Páskamóti KR þar sem á annan tug  skákgeggjara reyndu með sér í mannauðsstjórnun á skákborðinu og börðust um páskanammi.  

Þetta voru þeir: Gunnar Björnsson, Gunnar I. Birgisson, Gunnar Kr. Gunnarsson, Gunnar Skarphéðinsson, Gunnar Finnsson og  Gunnar Freyr Rúnarsson, víkingakappi, allt valinkunnir meistarar og alkunnir bragðarefir á skákborðinu.

Víkingurinn vaski  Gunnar Freyr átti afar sterka innkomu eftir að hafa tafist og tapað fyrstu skákinni án taflmennsku. Hann gerði sér samt  lítið fyrir og vann mótið sannfærandi með 1.5 vinningi umfram næsta mann. Fékk alls 10.5 vinning af 13 (12) mögulegum. Gunni Björns hjó af honum einn vinning og Gunni Gunn hálfan. Fimm Gunnarar af sex skipuðu sér í sjö efstu sætin ásamt Gussa hinum grimma sem jafnframt var sá sem náði bestum árangri gegn þeim með því að leggja tvo þeirra af velli af alkunnri vestfirskri snilld.  

Þessi nýstárlega keppni hefur vakið nokkra athygli á sérstakri lokaðri mótasíðu á „feisbúkk“, sem allir skákáhugamenn geta fengið aðgang að, enda ekki á hverjum degi sem svo margir nafnkunnir nafnar og skákhrafnar reyna með sér innbyrðis og að öðrum keppendum sé att gegn þeim og verðlaunaðir sérstaklega fyrir að vinna þeim mein, gera þeim sem mestar skráveifur á skákborðinu.

Segja má að allir keppendur hafi gengið vasklega fram og af miklum rammleik og að mikil óbeisluð orka hafi leyst úr læðingi sem vert hefði verið að virkja utan Rammaáætlunnar meðan á mótinu stóð án þess þó að allir vinningarnir skiluðu sér þó í réttar hendur eins og gengur.

Nánari úrslit má sjá á meðf. mótstöflu: