Carlsen efstur í Shamkir

Magnus Carlsen (2863) er efstur á minningarmótinu um Gashimov eftir sigur á Maxime Vachier-Lagrave (2762) í dag. MVL kom heimsmeistaranum strax á óvart í öðrum leik (1. Rf3 Rf6. 2. g3 b5!). Það dugði þó skammt því Norðmaðurinn vann nokkuð öruggan sigur.

Being out of book on move 2 has never been as fun as it was today! #ShamkirChess @MVL

— Magnus Carlsen (@MagnusCarlsen) April 21, 2015 

Vishy Anand (2791) vann góðan sigur á Wesley So (2788) með afar kröftugri taflmennsku. Mamedyarov (2754) vann svo Kramnik (2783).

Carlsen er efstur með 4,5 vinning, So annar með 4 vinninga og Anand þriðji með 3 vinninga. Mamedyarov og og Kramnik koma næstir með 2,5 vinning.

Frídagur er á morgun. 

Vert er að benda skákáhugamönnum á hópinn "Íslenskir skákmenn" á Facebook en þar eru skákirnar ræddar á meðan þær fara fram. Fjörlegar og skemmtilegar umræður!

• Heimasíða mótsins
• Beinar útsendingar

Íslandsmót grunnskólasveita: Rimaskóli Íslandsmeistari

Sjaldan eða aldrei hefur verið jafn gríðarlega mikil spenna á Íslandsmóti grunnskólasveita og liðna helgi. Rúmlega þrjátíu sveitir voru mættar til leiks. Nokkrar þeirra voru afar vel mannaðar og meiri breidd greinilega ríkjandi í skólaskákinni en oft áður: Álfhólsskóli hefur verið sigursæll á undanförnum árum og sveit skólans sem varð Íslandsmeistari barnaskólasveita fyrst árið 2013 var nú sameinuð á unglingastigi. Ölduselsskóli er afar efnileg sveit sem hefur náð góðum árangri undanfarin ár. Hörðuvallaskóli hefur Vigni Vatnar á fyrsta borði og annar skóli úr Kópavogi, Smáraskóli,  er afar sterkur með tvíburana Bárð Örn og Björn Hólm á fyrstu tveimur borðunum. Laugalækjarskóli hefur sennilega á að skipa virkustu ungu skákmönnum landsins sem tefla nokkurn veginn á öllum mótum og hafa verið í mikilli framför þó ekki hafi þeir teflt af alvöru í mörg ár. Þá á eftir að telja upp sveit Rimaskóla sem var ekki endilega sigurstrangleg fyrir mótið þar sem sveitin hefur endurnýjast gríðarlega mikið á síðustu árum eftir að Dagur Ragnarsson, Oliver Aron og Jón Trausti Harðarson kláruðu grunnskóla.

Í fyrstu umferð mættust tvær af sterkustu sveitunum: Rimaskóli og Álfhólsskóli. Álfhólsskóli fór með nokkuð þægilegan 3-1 sigur af hólmi. Í annarri umferð skildu Smáraskóli og Álfhólsskóli jafnir þar sem tvíburarnir stóðu fyrir sínu. Í þriðju umferð tefldu tvær af efnilegustu sveitum landsins þegar Hörðuvallaskóli lagði Ölduselsskóla 2.5- 1.5. Leiddir áfram af Vigni Vatnari sýndi Hörðuvellingar piltunum úr Laugarlæk engin grið í fjórðu umferð og komust á toppinn með 3-1 sigri. Á meðan vann Rimaskóli góðan sigur á Smáraskóla 3-1. Í fimmtu ferð hélt spútniklið Hörðuvallaskóla áfram á sinni fljúgandi siglingu og lagði b-sveit Álfhólsskóla. A-sveit skólans hafði í síðustu umferðum unnið stóra sigra og komin ofarlega en missti niður 2 vinninga gegn Laugalækjarskóla eftir að stöðurnar gáfu um tíma til kynna að 4-0 sigur myndi vinnast.

Staðan eftir fyrri dag var því þannig að sveit Hörðuvallaskóla var óvænt efst en með nauma forystu og átti eftir að tefla við sterkar sveitir.  Nokkrar sterkar sveitir komu skammt undan og því ljóst að spennan á seinni deginum yrði gríðarleg.

Teningunum var kastað í sjöttu umferð: Rimaskóli skellti Hörðuvallaskóla 3-1 og Álfhólsskóli sigraði b-sveit sína örugglega 4-0: einvígi var framundan milli Rimaskóla og Álfhólsskóla. Í sjöundu og áttundu umferð fengu báðar sveitirnar samtals sjö vinninga af átta og voru hnífjafnar fyrir síðustu umferð með 25.5 vinning!

Rimaskóli átti Salaskóla og Álfhólsskóli tefldi gegn sveit Ölduselsskóla. Sannarlega erfiðara hlutskipti sem Álfhólsskóli fékk enda sveit Ölduselsskóla sennilegasta efnilegasta sveit landsins með bræðurna Óskar Víking og Stefán Orra Davíðssyni sem eru einungis í 4. og 5. bekk. Fór svo að Álfhólsskóli missti niður vinning á meðan Rimaskóli smám saman mjatlaði niður vinninga inn gegn Salaskóla. Að lokum samdi Jóhann Arnar Finnsson annars borðs maður Rimaskóla jafntefli í mun betri stöðu og tryggði þannig Rimskælingum titilinn sjónarmun og hálfum vinningi á undan Álfhólsskóla. Sannarlega æsispennandi keppni og aðdáunarvert að fylgjast með efnilegum skákmönnum sveitanna leggja allt undir fyrir heiður sinna skóla. Glæsilegur árangur hjá Rimaskóla sem vann nú titilinn fimmta árið í röð! Þriðja sætinu náði vösk sveit Laugalækjarskóla sem verður spennandi að fylgjast með á næstu árum enda á sveitin eftir að haldast óbreytt næstu 2-3 árin.

Lokastöðuna má finna á Chess-Results.

Sveit Rimaskóla skipa: Nansý Davíðsdóttir, Jóhann Arnar Finnsson, Kristófer Jóel Jóhannsson, Joshua Davíðsson og Kristófer Halldór Kjartansson. Liðsstjóri Jón Trausti Harðarson.

Sveit Álfhólsskóla skipa: Dawid Kolka, Felix Steinþórsson, Róbert Luu, Guðmundar Agnar Bragason og Halldór Atli Kristjánsson. Liðsstjóri Lenka Ptacnikova.

Sveit Laugalækjarskóla skipa: Aron Þór Mai, Daníel Ernir Njarðarson, Jón Þór Lemery, Eldar Sigurðarson, Jason Gíslason og Alexander Sigurðarson. Liðsstjóri Daði Ómarsson.

Borðaverðlaun

1. Vignir Vatnar Stefánsson Hörðuvallaskóla 9v/9!
2. Bárður Örn Birkisson 8v/9
3. Kristófer Jóel Jóhannsson 7.5v/8
4. Atli Mar Baldursson 7v/9

Salaskóli náði eins og oft áður góðum árangri sem sýnir enn og aftur það góða starf sem Tómas Rasmus vinnur í skólanum.

Efst b-sveita Álfhólsskóli.

Efst c-sveita Rimaskóla.

Efst d-g sveita Salaskóli.

Skákstjórar voru Omar Salama og Stefán Bergsson.

Wesley So efstur á minningarmóti Gashimovs

Wesley So (2788) virðist vera sjóðheitur um þessar mundir. Hann er efstur á minningarmótinu um Gashimov sem er í gangi í Shamkir í Aserbaídsjan. Í dag vann hann Rauf Mamedauf (2651) en öðrum skákum lauk með jafntefli. So hefur 3½ vinning og hefur hálf vinnings forskot á heimsmeistarann Magnus Carlsen (2863). Þriðji er Vladimir Kramnik (2783) með 2½ vinning.

Fimmta umferð hefst kl. 10 í fyrramálið. Þá teflir So við Anand (2791), Carlsen við MVL (2762). 

Vert er að benda skákáhugamönnum á hópinn "Íslenskir skákmenn" á Facebook en þar eru skákirnar ræddar á meðan þær fara fram. Fjörlegar og skemmtielgar umræður!

• Heimasíða mótsins
• Beinar útsendingar

Íslandsmót barnaskólasveita fer fram næstu helgi

Íslandsmót barnaskólasveita 2015 fer fram í Rimaskóla dagana 25. og 26. apríl nk. 

Tefldar verða níu umferðir eftir svissneska kerfinu. Fimm á laugardegi,og fjórar á sunnudegi Umhugsunartími 15 mínútur á skák fyrir hvern keppenda. Taflið hefst kl. 13 á laugardeginum en kl. 11 á sunnudeginum.

Hver skóli getur sent fleiri en eina sveit - en hver sveit er skipuð fjórum nemendum 1.-7. bekkjar (auk 4 varamanna)

Þátttökugjöld kr. 7.500.- á sveit.  Þó ekki hærri en kr. 15.000.- fyrir hvern skóla.

Veitt verða verðlaun fyrir efstu b-e sveitir ásamt verðlaunum fyrir efstu sveitina sem er einungis skipuð nemendum í 1.-4. bekk.

Veitt verða borðaverðlaun fyrir bestan árangur á 1.-4. borði. 

Sigurvegari mótsins hlýtur rétt til þátttöku á Norðurlandamóti grunnskólasveita sem fram fer í Danmörku í september næstkomandi.  

Skráning fer fram á Skák.is (guli kassinn efst).

Skráningu skal lokið í í síðasta lagi 23. apríl

Hægt er að fylgjast með þegar skráðum sveitum hér.

Ath. Áríðandi er að sveitirnar séu skráðar fyrirfram.

 

Guðmundur endaði með 50% vinningshlutfall

Alþjóðlegi meistarinn Guðmundur Kjartansson (2471) endaði með 50% vinningshlutfall á alþjóðlegu móti sem lauk í gær í Ströbeck í Þýskalandi. Mótið var að miklu leyti ætlað ungum og efnilegum skákmönnum. 

Frammistaða Guðmundar samsvaraði 2495 skákstigum og koma í hús fyrir Guðmund þrjú mikilvæg skákstig á vegferðinni upp í 2500 skákstig. 

Sigurvegari mótsins var pólski stórmeistarinn Kacper Piorun (2546) en stórmeistararnir fjórir röðuðu sér í efstu sætin. Guðmundur var efstur alþjóðlegu meistaranna í 5.-6. sæti ásamt Þjóðverjanum Rasmus Svane (2513).

Tíu keppendur tefldu á mótinu og tefldu allir við alla. Meðalstig mótsins voru 2492 og var Guðmundur nr. 6 í stigaröð keppenda.

• Heimasíða mótsins
• Chess-Results

Sumarskákmót Fjölnis 2015 verður haldið í Rimaskóla á sumardaginn fyrsta

Hið árlega sumarskákmót Fjölnis verður haldið í Rimaskóla á sumardaginn fyrsta, n.k. frá kl. 14:00 - 16:00. Sumarskákmótið er að þessu sinni hluti af dagskrá Barnamenningarhátíðar Reykjavíkur og einnig á dagskrá hverfishátíðar Grafravogs sem að vanda er haldin í Rimaskóla. 

Mótið hefst eins og áður segir í Rimaskóla kl. 14.00 og því lýkur rúmlega 16:00 með verðlaunahátíð þar sem afhentir verða þrír verðlaunagripir sem Rótarýklúbbur Grafarvogs gefur til mótsins. Bikarana hljóta sigurvegari eldri flokks 1999-2003, sigurvegari yngri flokks og sigurvegari stúlkna. 

Að vanda eru ótrúlega margir vinningar á skákmótum Fjölnis og nú eru það 20 bíómiðar á SAMbíó - Egilshöll sem dreifast á 20 þátttakendur. Í skákhléi verða seldar veitingar á 300 kr.  

Mótið er ætlað nemendum grunnskóla og er þátttaka ókeypis. Tefldar verða sex umferðir með sex mínútna umhugsunartíma. Skákstjórar verða þeir Omar Salama alþjóðlegur skákdómari og Helgi Árnason formaður Skákdeildar Fjölnis. Fjölmennum á skákmót Fjölnis

Skákþáttur Morgunblaðsins: Hjörvar Steinn vann áskorendaflokk Íslandsmótsins

Danski stórmeistarinn Bent Larsen á eina skákbyrjun sem ber nafn hans: Larsens-byrjun hefst með hinum hógværa peðsleik 1. b2-b3. Leikurinn einn sér er í sjálfu sér ekki merkilegur, hvítur vill koma biskupinum fyrir á hornalínunni og þeir sem fylgdust með taflmennsku Larsens á sjöunda áratug síðustu aldar vissu að hann sérhæfði sig í vængtöflum og spegilmynd þessa leiks á kóngsvængnum, 1. g2-g3, kom einnig fyrir í skákum hans. Árið 1970 tefldi Larsen eina sína frægustu skák. Á 1. borði heimsliðsins í keppni við úrvalslið Sovétríkjanna mætti hann heimsmeistaranum Boris Spasskí. Larsen hóf taflið með 1. b2-b3. Allt ætlaði um koll að keyra í Sava-center í Belgrad þar sem keppnin fór fram þegar Spasskí vann skákina í 17 leikjum! Eftir það fækkaði skákum Larsen með þessari byrjun, a.m.k. í viðureignum hans við þá bestu. Bobby Fischer, sem hafði gefið eftir að tefla á fyrsta borði fyrir heimsliðið, fylgdist grannt með því sem Larsen tók sér fyrir hendur og í fjórum skákum þetta ár valdi hann upphafsleik Larsens og vann allar skákirnar með glæsibrag. Nálgun hans var samt önnur; í skákunum sem hann tefldi við Svíann Ulf Anderson og Úkraínumanninn Vladimir Tukmakov fékk hann upp ákveðna stöðutýpu sem líktist Sikileyjarvörn og þar var hann öllum hnútum kunnugur.

Byrjun Larsens kom við sögu í einni skák áskorendaflokks Íslandsmótsins sem lauk um síðustu helgi með öruggum sigri Hjörvars Steins Grétarssonar sem hlaut 7 ½ vinning af 9 mögulegum. Keppt var um tvö sæti í landsliðsflokki árið 2016 og hitt sætið kom í hlut Guðmundar Gíslasonar sem hlaut 7 vinninga. Í 3. sæti varð Davíð Kjartansson með 6 ½ vinning. Þar á eftir komu svo Lenka Ptacnikova og nokkrir ungir skákmenn sem allir áttu möguleika á landsliðsæti fram á síðasta dag. Einn þeirra, Dagur Ragnarsson, sem nýlega vann það afrek að hækka meira á stigum millli mánaða en dæmi eru um, tefldi við Hjörvar Stein í lokaumferðinni og tapaði. Hann hafði byrjað illa en vann svo fimm skákir í röð. Í næstsíðustu umferð mætti hann Lenku Ptacnikovu og ákvað að fylgja í fótspor Larsens:

Skákþing Íslands 2015 – áskorendaflokkur; 8. umferð.

Dagur Ragnarsson – Lenka Ptacnikova

Larsens-byrjun

1. b3 e5 2. Bb2 Rc6 3. e3 d6 4. d4 exd4 5. exd4 d5 6. Rf3 Bb4+ 7. Rbd2 Rf6 8. a3 Be7 9. Bd3 a6 10. Re5 Rb8 11. O-O c5

Byrjunarleikir svarts eru fremur ómarkvissir og þessi hjálpar til við virkja biskupinn á b2.

12. He1 O-O 13. dxc5 Bxc5 14. Df3 Be6 15. Rf1 He8 16. Rg3 Bf8 17. Rh5!

Svartur á þegar í miklum erfiðleikum, 17. ... Rbd7 strandar á 18. Rxd7 Rxd7 19. Bxg7! og vinnur, 19. ... Bxg7 er svarað með 20. Dg3.

17. ... Rxh5 18. Dxh5 h6

Hvað annað? 18. ... g6 er svarað með 19. Rxg6! fxg6 20. Bxg6! og vinnur.

19. Rxf7! Bxf7 20. Df5! He4

20. ... g6 liggur beinast við en hvíta drottningin kemst á hornalínuna a1-h8 með 21. Hxe8! t.d. 21. .... Bxe8 22. De5 eða 21. ... Dxe8 22. Df6 og vinnur.

21. Hxe4 Dg5

Þetta er vonlaust framhald en 21. ... dxe4 22. Bxe4 g6 23. De5 kemur í sama stað niður.

22. Dxg5 hxg5 23. Hg4 Be7 24. He1 Bf6

Eða 24. ... Rc6 25. h4 Bh5 26. Hxe7! Rxe7 27. Hxg5 o.s.frv.

25. Bxf6 gxf6 26. h4 Bh5 27. Hg3 g4 28. f3 Rc6 29. fxg4 Bf7 30. g5

- og svartur gafst upp.

Helgi Ólafsson [e-mail]

Skákþættir Morgunblaðsins eru birtir á Skák.is viku síðar en í sjálfu Morgunblaðinu.  

Grein þessi birtist í Morgunblaðinu 11. apríl 2015.

Skákþættir Morgunblaðsins

[Event "Icelandic Championship Challengers"] [Site "Faxafen, Reykjavik ISL"] [Date "2015.04.04"] [Round "8"] [White "Ragnarsson, Dagur"] [Black "Ptacnikova, Lenka"] [Result "1-0"] [ECO "A01"] [WhiteElo "2347"] [BlackElo "2242"] [PlyCount "59"] [EventDate "2015.03.27"] 1. b3 e5 2. Bb2 Nc6 3. e3 d6 4. d4 exd4 5. exd4 d5 6. Nf3 Bb4+ 7. Nbd2 Nf6 8. a3 Be7 9. Bd3 a6 10. Ne5 Nb8 11. O-O c5 12. Re1 O-O 13. dxc5 Bxc5 14. Qf3 Be6 15. Nf1 Re8 16. Ng3 Bf8 17. Nh5 Nxh5 18. Qxh5 h6 19. Nxf7 Bxf7 20. Qf5 Re4 21. Rxe4 Qg5 22. Qxg5 hxg5 23. Rg4 Be7 24. Re1 Bf6 25. Bxf6 gxf6 26. h4 Bh5 27. Rg3 g4 28. f3 Nc6 29. fxg4 Bf7 30. g5 1-0

Jón Kristinn og Gabríel umdæmismeistarar Norðurlands-eystra í skólaskák 2015

Jón Kristinn Þorgeirsson og Gabríel Freyr Björnsson unnu sigur hvor í sínum aldursflokki, á umdæmismóti Norðurlands-eystra í skólaskák (kjördæmismótinu) sem fram fór á Laugum í Reykjadal dag. Jón Kristinn vann öruggan sigur í eldri flokki þegar hann lagði alla sína andstæðinga. Benedikt Stefánsson varð í öðru sæti með 3 vinninga af fjórum mögulegum og Jón Aðalsteinn Hermannsson varð þriðji með 2 vinninga. Alls tóku fimm keppendur þátt í eldri flokki.

Lokastaðan í eldri flokki.

1. Jón Kristinn Þorgeirsson           4 af 4
2. Benedikt Stefánsson                    3
3. Jón Aðalsteinn Hermannsson        2
4. Ari Rúnar Gunnarsson                 1
5. Eyþór Kári Ingólfsson                   0

Gabríel Freyr Björnsson vann sigur í yngri flokki með 5 vinningum af 6 mögulegum. Gunnar Breki Gíslason  varð í öðru sæti með 4 vinninga og jafnir í 3-4. sæti urðu þeir Björn Gunnar Jónsson og Tumi Snær Sigurðsson með 3 vinninga hvor.

Lokastaðan í yngri flokki:

1. Gabríel Freyr Björnsson                5 af 6
2. Gunnar Breki Gíslason                   4,5
3-4. Björn Gunnar Jónsson                  3
3-4. Tumi  Snær Sigurðsson                3
5. Ari Ingólfsson                              2,5
6. Magnús Máni Sigurgeirsson          2
7. Auðunn Elfar Þórarinsson              1

Tímamörk í eldri flokki voru 15. mín á mann en í yngri flokki 10. mín á mann. Jón Kristinn, Benedikt og Jón Aðalsteinn hafa því unnið sér keppnisrétt á Landsmótinu í skólaskák í eldri flokki og Gabríel Freyr í yngri flokki.

Landsmótið í skólaskák fer fram á Selfossi 30. april til 3. maí.

Carlsen, Wesley So og Kramnik efstir í Shamkir

Magnus Carlsen (2863), Wesley So (2788) og Vladimir Kramnik (2783) eru efstir og jafnir með 1,5 vinning að loknum tveimur umferðir á minningarmóti Gashimovs sem fram fer í Shamkir í Aserbaídsjan. Carlsen vann í dag öruggan sigur á Mamedyarov (2754). So sigraði Anish Giri (2790) í gær og Kramnik hafði betur gegn Adams.

Þriðja umferð hefst kl. 10 í fyrramálið. Þá mætast meðal annars og Caruana (2802) - Carlsen, 

Vert er að benda skákáhugamönnum á hópinn "Íslenskir skákmenn" á Facebook en þar eru skákirnar ræddar á meðan þær fara fram. 

• Heimasíða mótsins
• Beinar útsendingar

Reykjavíkurskákmótið valið fjórða besta opna mótið 2014

Reykjavíkurskákmótið 2014 var valið fjórða besta opna skákmót ársins 2014 af samtökum atvinnaskákmanna (ACP).

Það verður að teljast mikill heiður fyrir Reykjavíkurskákmótið enda skipta opin mót í heiminum hundruðum ef ekki þúsundum ár hvert. Röð efstu móta varð sem hér segir:

1. Gibraltar Tradewise Chess  
2. Qatar Masters 
3. Millionaire Chess  
4. Reykjavik Open 
5. Baku Open

Það sem gerir árangur Reykjavíkurskákmótsins enn betri er að mótið að mótið er rekið fyrir margfalt lægri fjárhæðir en öll hin mótin í efstu sætunum! 

Nánari upplýsingar á heimasíðu ACP.