Skákþáttur Morgunblaðsins: Yfirburðasigur Björns Þorfinnssonar í Bunratty

Fischer og Kasparov skildu stundum við keppinauta sína með þessum hætti, munurinn í mótslok á þeim og næsta manni var kannski 2-4 vinningar. Á skákhátíðinni í Bunratty á Írlandi á dögunum – þeim hluta sem fram fór í lokuðum flokki – gerðist einmitt þetta. Björn Þorfinnsson hlaut 7 vinniga af níu mögulegum og varð tveim vinningum fyrir ofan næstu menn. Hann hægði samt á sér í lokin með tveimur stuttum jafnteflum og náði árangri sem mældist uppá 2677 elo stig og krækti sér í leiðinni í annan áfanga að stórmeistaratitli. Tíu keppendur tefldu einfalda umferð og var Björn stigalægsti keppandi mótsins. Lítum á lokaniðurstöðuna:

1. Björn Þorfinnsson 7 v. (af 9 mögulegum) 2. Trent (England) 5 v. 3.-5. Maze (Frakkland), Tan (Ástralía) og Costa (England) 4 ½ v. 6. – 9. Bragi Þorfinnsson, Galego (Portúgal), Hunt (England) og Collins (Írland ) 4 v. 10. Williams (England) 3 ½ v.

Bragi bróðir Björns var einnig með í mótinu. Hann byrjaði fremur illa en sótti sig þegar á leið þó þátttaka hans félli vitaskuld algerlega í skuggann á framgöngu stóra bróður. Í gegnum tíðina hefur Bragi yfirleitt verið hærri á skákstigalistum en alltaf annað veifið kemur Björn fram og slær honum við. Gömul þræta innan fjölskyldunnar um það hvor sé betri, er aftur komin á dagskrá.

Björn hefur af einhverjum ástæðum leitað upp miklar flækjur í skákum sínum þó að róleg stöðubarátta með taktískri undiröldu eigi ekki síður við hann. Þannig tefldi hann á Írlandi, lenti aldrei í taphættu og nýtti sér þau færi sem gáfust. Meðal keppenda í Bunratty voru nokkrir sem hafa verið að tefla á Íslandsmóti skákfélaga og í sjöttu umferð mætti hann Frakkanum Maze sem teflt hefur fyrir Taflfélag Vestmannaeyja undanfarin ár:

Bunratty 2015; 6. umferð:

Sebastian Maze – Björn Þorfinnsson

Fjögurra riddara tafl

1. e4 e5 2. Rf3 Rc6 3. Rc3 Rf6 4. Bb5 Bb4 5. 0-0 0-0 6. d3 d6 7. He1 h6 8. h3 a6

Brýtur upp hermikráku-leikinn. Annar góður möguleiki var 8.... Bxc3 9. bxc3 Re7.

9. Bxc6 bxc6 10. d4 exd4 11. Dxd4 c5 12. Dd3 Bb7 13. Bd2 He8 14. e5?!

Hvítur hefur ekkert fengið út úr byrjuninni en eftir þennan leik nær svartur betri stöðu. Jafnt tafl var að hafa með 14. Rd5. )

14.... dxe5 15. Rxe5 Dd4!

Hann hefur ekkert á móti drottningaruppskitpum en fer í þau á eigin forsendum.

16. Dxd4 cxd4 17. Rb1 Bf8 18. Rd3 Be4 19. Ba5 Hab8 20. b3 Hb5 21. Bd2 Hb6 22. f3 Bxd3 23. Hxe8 Rxe8 24. cxd3 Hc6!

Hvítur á í erfiðleikum með drottningarvænginn og hrókurinn er á leiðinni til c2.

25. b4 Hc2 26. Kf1!

Kóngurinn skundar á vettvang og hvítur nær að halda í horfinu.

26.... Rf6 27. Ke1 Rd5 28. Kd1 Hc6 29. a3 Hb6!

Rýmir fyrir c-peðinu.

30. Bc1 f5 31. g4 g6 32. Ha2

Engu betra var 32. Rd2 Re3+! 33. Ke2 He6! og o.s.frv.

32.... c5 33. Hc2 a5!

Gefur engin grið!

34. Bd2 axb4 35. axb4 cxb4 36. Hc8 Kf7 37. Kc2

Hann á enn eftir að leika b1-riddaranum fram. Skyldi hann sleppa út?

37.... Rc3!

Nei!

38. Hc7+ Ke6 39. Be1 b3+ 40. Kb2 Ra4+ 41. Kc1 Rc5 42. Hc8 Bd6

– og Maze lagði niður vopnin. Hann sá fram á að 43. Ke2 er svarað með 43....Ha6 os.frv.

 

Helgi Ólafsson [e-mail]

Skákþættir Morgunblaðsins eru birtir á Skák.is viku síðar en í sjálfu Morgunblaðinu.  

Grein þessi birtist í Morgunblaðinu 28. febrúar 2015

Skákþættir Morgunblaðsins

[Event "Bunratty Classic"] [Site "Bunratty IRL"] [Date "2015.02.21"] [EventDate "2015.02.20"] [Round "6"] [Result "0-1"] [White "Sebastien Maze"] [Black "Bjorn Thorfinnsson"] [ECO "C49"] [WhiteElo "2585"] [BlackElo "2373"] [PlyCount "84"] 1. e4 e5 2. Nf3 Nc6 3. Nc3 Nf6 4. Bb5 Bb4 5. O-O O-O 6. d3 d6 7. Re1 h6 8. h3 a6 9. Bxc6 bxc6 10. d4 exd4 11. Qxd4 c5 12. Qd3 Bb7 13. Bd2 Re8 14. e5 dxe5 15. Nxe5 Qd4 16. Qxd4 cxd4 17. Nb1 Bf8 18. Nd3 Be4 19. Ba5 Rab8 20. b3 Rb5 21. Bd2 Rb6 22. f3 Bxd3 23. Rxe8 Nxe8 24. cxd3 Rc6 25. b4 Rc2 26. Kf1 Nf6 27. Ke1 Nd5 28. Kd1 Rc6 29. a3 Rb6 30. Bc1 f5 31. g4 g6 32. Ra2 c5 33. Rc2 a5 34. Bd2 axb4 35. axb4 cxb4 36. Rc8 Kf7 37. Kc2 Nc3 38. Rc7+ Ke6 39. Be1 b3+ 40. Kb2 Na4+ 41. Kc1 Nc5 42. Rc8 Bd6 0-1

Páskaeggjasyrpa Nóa Síríus hefst 15. mars!

Nú styttist í eina af skemmtilegustu mótasyrpum ársins!  Páskaeggjasyrpa Nóa Síríus og Taflfélags Reykjavíkur sló rækilega í gegn í fyrra þegar vel á annað hundrað krakkar tóku þátt í þremur mótum syrpunnar.  Í ár endurtökum við leikinn og með þessu framtaki vill T.R. í samstarfi við Nóa Síríus þakka þeim gríðarlega fjölda sem sótt hefur barna- og unglingaæfingar félagsins í vetur.

Frábærar aðstæður eru hjá Taflfélagi Reykjavíkur, margir reyndir þjálfarar og félagið býður eitt félaga upp á ítarlegasta námsefni sem völ er á hér á landi. Allar æfingar og allt námsefni er frítt, það þarf bara að mæta og taka þátt í þessum stórskemmtilegu æfingum!

Mtin í ár verða reiknuð til alþjóðlegra hraðskákstiga og glæsileg verðlaun eru í öllum mótunum, sem og fyrir samanlagðan árangur úr þeim öllum.  Í hverju móti verður síðan dregin út glæsileg DGT Easy skákklukka handa einum heppnum þátttakanda.

Páskaeggjasyrpan mun samanstanda af þremur skákmótum sem haldin verða þrjá sunnudaga fyrir páska í skákhöll Taflfélags Reykjavíkur að Faxafeni 12:

1. NÓA KROPP PÁSKAEGGJAMÓTIÐ. Sunnudaginn 15. mars kl. 14

2. NIZZA LAKKRÍS PÁSKAEGGJAMÓTIÐ. Sunnudaginn 22. mars kl. 14

3. NIZZA HRÍSKÚLU PÁSKAEGGJAMÓTIÐ. Sunnudaginn 29. mars kl.14

• Keppt verður í tveimur flokkum, 1-3 bekk (og yngri) og 4-10 bekk.
• Sex umferðir verða tefldar í hverju móti með 10 mínútna umhugsunartíma á mann.
• Glæsileg verðlaun eru í boði fyrir alla hressu skákkrakkana sem taka þátt í syrpunni!
• Verðlaunapeningar fyrir þrjú efstu sætin í hvorum flokki á hverju páskaeggjamóti.
• Stór páskaegg fyrir þrjú efstu sætin samanlagt úr mótunum í hvorum flokki (misstór eftir sætum)
• Allir sem taka þátt í minnst tveimur af þremur mótum í syrpunni fá lítið páskaegg í verðlaun fyrir þátttökuna og verða þau veitt í lok þriðja mótsins í syrpunni.
• Dregin verður út ein stórglæsileg DGT Easy skákklukka handa heppnum skákkrakka á hverju páskaeggjamóti!

Skráning fer fram hér og lista yfir skráða keppendur má sjá hér.

Taflfélag Reykjavíkur og Nói Síríus hlakka til að sjá ykkur á PÁSKAEGGJASYRPUNNI 2015!

Yfirlýsing vegna skákbúða Fjölnis

Skak.is vill koma því á framfæri í fyrsta lagi að allir eru heilir á húfi en sá leiði atburður átti sér stað að rúta á leið til skákbúða Fjölnis valt útaf en þó á mjög litlum hraða.  Hætt hefur verið við búðirnar útaf þessum atburði og unnið er að því að koma þátttakaendum heim. Fjórir voru sendir með sjúkrabíl en meiðsli þeirra eru algjörlega minni háttar. Brottför er líkleg á næstunni og er stefnan sett aftur til baka á Rimaskóla!

Ef nauðsyn ber er hægt að ná í Stefán Bergs son til upplýsingar í síma 863-7562.

 

UPPFÆRT: Rútan lögð af stað klukkan 14:12 heim!

Friðrik meðal keppenda í Sardiníu í sumar

Friðrik Ólafsson hefur skráð sig til leiks á alþjóðlega mótinu í Sardiníu í sumar. Þar verður hann meðal keppenda ásamt stórmeisturunum Jóhanni Hjartarsyni og Margeiri Péturssyn og fleiri Íslendingum eins og sjá má á keppendalista mótsins. Mótið fer fram 6.-13. júní.

Yuri Garret, aðalskipuleggjandi mótsins, greinir frá þessu á Facebook-síðu mótsins. 

 

 

Post by Porto Mannu Chess Open.

Jafntefli hjá Hannesi og Guðmundi - kemst Hannes á Heimsbikarmótið?

Hannes Hlífar Stefánsson (2573) og Guðmundur Kjartansson (2484) gerðu báðir jafntelfi í tíundu og næstsíðustu umferð EM einstaklinga sem fram fór í dag í Jerúsalem. Hannes verði jafntefli við ísraelska stórmeistarann Ilia Smirin (2650) en Guðmundur við ungverska stórmeistarann Viktor Erdos (2615) en hann var mjög nærri því að landa dýrmættum vinningi á afmælisdegi sínum.

Hannes hefur 6,5 vinning og er í nítjánda sæti. 23 efstu sætin gefa keppnisrétt á Heimbikarmótinu í Bakú í Aserbaídsjan í haust. Það er hugsanlegt að jafntefli dugi Hannesi til að komast áfram en það er á engan hátt öruggt. 

Andstæðingur Hannesar í lokaumferðinni, rússneski stórmeistarinn, Boris Graschev (2670) er aðeins í 41. sæti þótt hann hafi jafn marga vinninga og Hannes. Graschev þessi þarf því nauðsynlega á sigri að halda ætli hann sér áfram á Heimsbikarmótið. Það er því engar líkur á stuttu jafntefli hjá Hannesi í lokaumferðinni. 

Guðmundur hefur 5,5 vinning og er í 107. sæti. Í lokaumferðinni teflir hann við pólska stórmeistarann Dariusz Swiersz (2617).

Rússneski stórmeistarinn, Evgeniy Najar (2634), er efstur með 8 vinninga. Í 2.-3. sæti eru Tékkinn David Navara (2735), sem verður meðal keppenda á Reykjavíkurskákmótinu, og Rússinn Denis Khismatullin (2653) sem vann magnaðan sigur á Pavel Eljanov (2727) í dag. Lok skákarinnar verða sýnd í Fréttablaðinu á morgun.

Á morgun verður hvíldardagurinn tekinn heilagur í Jerúsalem. Lokaumferðin fer fram á sunnudag og hefst kl. 11. 

Alls taka 250 skákmenn frá 33 löndum þátt í mótinu. Þar af eru 113 stórmeistarar. Hannes er nr. 84 í stigaröð keppenda en Guðmundur er nr. 116. Alls er tefldar 11 umferðir.

• Heimasíða mótsins
• Beinar útsendingar (hefjast almennt kl. 13)
• Chess-Results

Nansý fyrst til að leggja Hrafn í maraþoneinvíginu í Hörpunni

Hrafn Jökulsson skákfrömuður hóf skákmaraþon í Hörpunni kl. 9:00 í morgun föstudaginn 6. mars og ætlar að halda því áfram til miðnættis á laugardag. Hrafn sem er með skákmarþoninu að styðja góðan málstað og safna framlögum í söfnun Fatímusjóðs og UNICEF í þágu skólahalds fyrir sýrlensk flóttabörn. Hann óskaði sérstaklega eftir því að fá að tefla við skákstúlkur í Rimaskóla, núverandi Íslandsmeistarasveit grunnskóla í stúlknaflokki.

Þær Nansý, Halldóra Hlíf og Sara í 7-EH og Valgerður og Heiðrún Anna í 8. bekk tóku áskoruninni og tefldu allar við Hrafn sem var ánægður með þá góðu taflmennsku sem þær sýndu. Norðurlandameistarinn Nansý Davíðsdóttir tefldi afar vel og þrátt fyrir tímaþröng þá knúði hún fram sigur á lokasekúntunum og var þar með sú fyrsta til að leggja Hrafn. Nansý uppskar langt lófatak allra þeirra sem voru viðstaddir í Hörpunni og ekki síst Hrafns sjálfs sem var afar ánægður með endataflið hjá Nansý. (HÁ)

 

Ný íslensk skákstig

Ný íslensk skákstig komu út 1. mars sl. Jóhann Hjartarson er sem fyrr stigahæsti íslenski skákmaðurinn á íslenskum skákstigum. Ellefu nýliðar eru á listanum. Stigahæstur þeirra er Gabríel Freyr Björnsson (1242). Róbert Luu hækkar mest allra frá desember-listanum eða um 152 skákstig.

Topp 20

Jóhann Hjartarson (2607) er stigahæstur allra. Í næstum sætum eru Margeir Pétursson (2591) og Hannes Hlífar Stefánsson (2585).

No.	Name	RtgC	Diff
1	Jóhann Hjartarson	2607	0
2	Margeir Pétursson	2591	0
3	Hannes H Stefánsson	2585	0
4	Helgi Ólafsson	2551	0
5	Héðinn Steingrímsson	2542	0
6	Hjörvar Grétarsson	2539	0
7	Jón Loftur Árnason	2513	0
8	Henrik Danielsen	2510	0
9	Helgi Áss Grétarsson	2489	0
10	Stefán Kristjánsson	2471	-11
11	Friðrik Ólafsson	2459	0
12	Karl Þorsteins	2451	-6
13	Jón Viktor Gunnarsson	2439	8
14	Guðmundur Kjartansson	2436	0
15	Þröstur Þórhallsson	2428	-6
16	Bragi Þorfinnsson	2421	0
17	Dagur Arngrímsson	2396	-4
18	Arnar Gunnarsson	2381	0
19	Björn Þorfinnsson	2381	-11
20	Magnús Örn Úlfarsson	2360	0

Nýliðar:

Ellefu nýliðar eru á listanum nú. Stigahæstur þeirra eru Gabríel Freyr Björnsson (1242) en í næstum eru Daníel Ernir Njarðarson (1131) og Guðmundur Hólmgeirsson (1065).

 

No.	Name	RtgC	Diff	Cat
1	Gabriel Freyr Bjornsson	1242	1242	U12
2	Daníel Ernir  Njarðarson	1131	1131	U14
3	Guðmundur Hólmgeirsson	1065	1065	SEN
4	Atli Mar Baldursson	1038	1038	U14
5	Alexander Ragnarsson	1000	1000	U16
6	Alexander Sigurðarson	1000	1000	U14
7	Axel Ingi Árnason	1000	1000	U12
8	Axel Örn Heimisson	1000	1000	U12
9	Kristján Dagur Jónsson	1000	1000	U10
10	Nikulas Ymir Valgeirsson	1000	1000	U14
11	Sigurður Gunnar Jónsson	1000	1000	U12

Mestu hækkanir

Róbert Luu hækkar mest frá desember-listanum eða um 152 stig. Í næstu sætum eru Bárður Örn Birkisson (116) og Arnór Ólafsson (110).

 

No.	Name	RtgC	Diff	Cat
1	Róbert Luu	1336	152	U10
2	Bárður Örn Birkisson	1801	116	U16
3	Arnór Ólafsson	1110	110	U14
4	Hlynur Snær Viðarsson	1193	103	U18
5	Mikael Jóhann Karlsson	2184	101	U20
6	Agnar Tómas Möller	1729	99	-
7	Halldór Atli Kristjánsson	1276	97	U12
8	Sindri Snær Kristófersson	1120	97	U12
9	Gauti Páll Jónsson	1870	94	U16
10	Sigurbjörn Ásmundsson	1257	82	-

Reiknuð mót

• Skákþing Reykjavíkur
• Bikarsyrpa TR #3
• Janúarmót Hugins (austur-, vestur og úrslit)
• Nóa Síríus mótið - Gestamót Hugins og Breiðabliks
• Skákþing Akureyrar - Norðurorkumótið
• Skákþing Garðabæjar - a- og b-flokkar
• Vetrarmót öðlinga.

Íslensk skákstig

Undanrásir fyrir Barna Blitz halda áfram á morgun

Sjöunda árið í röð stendur Skákakademía Reykjavíkur í samvinnu við taflfélög borgarinnar fyrir Reykjavik Open Barna-Blitz.

Undanrásir fara fram hjá taflfélögum borgarinnar. Undanrásir hjá Víkingaklúbbnum og Fjölni eru þegar búnar. Þar komust áfram ungmennalandsliðsmennirnir Óskar Víkingur Davíðsson, Misha Kravchuk, Róbert Luu og Nansý Davíðsdóttir. 

Tvær undanrásir eru eftir:

Taflfélag Reykjavíkur

7. mars klukkan 14:00 að Faxafeni 12.

Skákfélagið Huginn

9. mars klukkan 17:15 að Álfabakka 14a, 3. hæð.

Tveir skákmenn úr hverri undanrás komast áfram í úrslitin.

Úrslitin verða tefld á sviðinu í Hörpu laugardaginn 15. mars klukkan 12:00. Teflt verður með útsláttarfyrirkomulagi með tímamörkunum 4 02.

 

Hannes og Guðmundur unnu í dag

Bæði Hannes Hlífar Stefánsson (2573) og Guðmundur Kjartansson (2484) unnu báðir sínar skákir í níundu umferð EM einstaklinga sem fram fór í Jerúsalem í dag. Hannes vann ungverska stórmeistarann Viktor Erdos (2615) en Ungverjinn féll á tíma með erfiða stöðu. Guðmundur vann serbnesku skákkonuna Maria Manakova (2318) sem er stórmeistari kvenna.

Hannes er með 6 vinninga og lyfti sér upp í fimmtánda sæti með sigrinum. 23 efstu sætin gefa keppnisrétt á heimsbikarmótinu í Aserbaídsjan í haust. Gummi hefur 5 vinninga og er í 114. sæti. 

Í tíundu og næstsíðustu umferð, sem fram fer á morgun, teflir Hannes við ísraelska stórmeistarann Ilia Smirin (2650) en Gummi við áðurnefndan Erdos.

Vakin er athygli á því að umferðin á morgun hefst mun fyrr en venjulega eða kl. 9. Í Jerúsalem taka menn hvíldardaginn heilagan og þarf skákunum að ljúka áður en sólin sest annað kvöld. Frídagur er svo á laugardag en mótinu lýkur á sunnudag.

Kurubov (2687), Navara (2735) og Najer (2634) eru efstir og jafnir með 7 vinninga.

Alls taka 250 skákmenn frá 33 löndum þátt í mótinu. Þar af eru 113 stórmeistarar. Hannes er nr. 84 í stigaröð keppenda en Guðmundur er nr. 116. Alls er tefldar 11 umferðir.

• Heimasíða mótsins
• Beinar útsendingar (hefjast almennt kl. 13)
• Chess-Results

Róbert og Nansý unnu sér þátttökurétt á BarnaBlitz

Skákdeild Fjölnis stóð fyrir undankeppni í BarnaBlitz á vikulegri skákæfingu á miðvikudegi. Þrátt fyrir að það gengi á með roki og slydduveðri þá þyrptust Fjölniskrakkar og efnilegir skákmenn úr öðrum hverfum og félögum til þátttöku um tvö laus sæti á BarnaBlitz. BarnaBlitz er einn af aukaviðburðum á Reykjavik Open 2015 í Hörpunni og eru það átta krakkar sem tefla þar til úrslita og glæsilegra verðlauna.

Tefldar voru sex umferðir með sjö mínútna umhugsun. Rúmlega 30 skákkrakkar mættu til leiks og keppnin var jöfn og spennandi. Þegar fjórum umferðum var lokið voru þau Robert Luu og Nansý Davíðsdóttir jöfn að vinningum með fullt hús og tefldu því saman í 5. umferð. Þegar leið á skákina var Nansý komin í tímahrak með örlítið lakari stöðu. Þetta nýtti Róbert sér í þaula og vann skákina örugglega.

Í lokaumferðinni kórónaði Robert glæsilega frammistöðu með því að sigra Sindra Snæ og klára mótið með fullu húsi. Systkinin Nansý og Joshua urðu í 2. – 3. sæti mótsins með 5 vinninga og í aukaskák um þátttökurétt á BarnaBlitz sigraði Nansý bróður sinn. Á Fjölnisæfingum er alltaf teflt um fjölda vinninga og einnig dregið í happadrætti.

Í næstu sætum á eftir Roberti, Nansý og Joshua komu þeir Hákon Garðarsson, Sindri Snær Kristófersson, Einar Bjarki Arason, Halldór Atli Kristjánsson, Sæmundur Árnason, Jón Hreiðar Rúnarsson, Kristján Dagur Jónsson, Ísak Orri Karlsson og Ívar Björnsson. Þátttakendum var boðið upp á skúffuköku í skákhléi kláraðist hún fljótt og vel. Skákstjóri var Helgi Árnason formaður skákdeildar Fjölnis og naut hann aðstoðar fjölda foreldra sem fylgdust með mótinu.