U-2000 mótinu lokið: Haraldur öruggur sigurvegari

U-2000 móti Taflfélags Reykjavíkur lauk í gærkveld þegar sjöunda og síðasta umferðin fór fram í húsnæði félagsins, Faxafeni 12. Haraldur Baldursson hafði fyrir umferðina þegar tryggt sér sigur og var með fullt hús vinninga þegar hinar þöglu tímavélar voru settar í gang. Baráttan um annað og þriðja sætið var hinsvegar hörð og höfðu nokkrir keppendur möguleika á að smella sér í verðlaunasæti.

Það var Tjörvi Shciöth sem fékk það verkefni að eiga við sigurvegara mótsins og stýrði hann hvítu mönnunum gegn svörtum her Haraldar. Strax var ljóst að hvorugur keppenda ætlaði sér að eiga náðuga stund í lokaumferðinni með jafnteflisboð í huga. Snemma skákar myndaðist mikil spenna í stöðunni sem spratt upp úr hinu beitta Najdorf afbrigði Sikileyjarvarnar þar sem Tjörvi blés til kröftugrar sóknar. Úr varð að hvítur náði mátsókn en svartur hafði ekki hrókfært og hröklaðist svarti kóngurinn því undan stanslausum ágangi hvítu mannanna. Þrátt fyrir smá krókaleiðir hvíts þegar mát lá í loftinu var staðsetning svarta kóngsins slæm og Haraldur varð að játa sig sigraðan í fyrsta sinn í mótinu. Góður sigur sem tryggði Tjörva verðskuldað silfur, en hann hlaut 5,5 vinning, hálfum vinningi minna en Haraldur sem með sigrinum í mótinu tryggði sér, auk verðlaunafés, þátttökurétt í næstkomandi WOW-air móti félagsins.

 

Bronsið hlaut enginn annar en jaxlinn Friðgeir Hólm sem hlaut 5 vinninga og tefldi oft hressilega í mótinu eins og honum einum er lagið. Friðgeir gerði jafntefli við Gauta Pál Jónsson í lokaumferðinni þar sem sá síðarnefndi reyndi mikið að kreista fram sigur í drottningarendatafli. Gauti hafði tök á að vekja upp aðra drottningu og vera þannig með tvær dömur gegn einni dömu Friðgeirs en sá á síðarnefndi átti þó alltaf örugga þráskák og skiptur hlutur varð því niðurstaðan.

 

Af öðrum úrslitum umferðarinnar má nefna mjög gott jafntefli hins unga Halldórs Atla Kristjánsson gegn Birni Hólm Birkissyni hvar lokastaðan var öll Halldóri í hag. Þá lagði Arnaldur Bjarnason Ingvar Egil Vignisson nokkuð örugglega en Arnaldur átti gott mót og flýgur inn á næsta stigalista Fide. Síðast en ekki síst tefldi hinn ungi Stephan Briem afar góða skák gegn reynsluboltanum Sigurjóni Haraldssyni og hafði síst lakari stöðu lengi vel. Reynslan sagði þó að lokum til sín og eftir langa og stranga endataflsbaráttu hafði Sigurjón betur.

Tjörvi kom í veg fyrir að Haraldur lyki móti með fullu húsi.

Vel heppnuðu og endurvöktu U-2000 móti er því lokið en ljóst er að mótafyrirkomulagið býður upp á skemmtilega blöndu af ungum og efnilegum skákmönnum ásamt þeim sem eldri eru og reyndari. Eftirtektarvert var hversu skemmtilegur og fjörugur stór hluti skákanna var og styttri jafntefli sáust varla, það var barist fram í rauðan dauðan. Enn og aftur sást berlega hversu mikill efniviður er til staðar í skákinni þessi misserin og mikið er um unga skákmenn sem eru í hraðri framför. Það er ekki sjálfgefið að þeir reynslumeiri leggi í hina ungu kynslóð því mörg stig eru í húfi. Þó er hluti skákmanna ávallt reiðubúinn að setjast gegnt þeim yngri og veita þeim með því tækifæri til að öðlast enn meiri reynslu og jafnvel stíga lítið eitt upp stigalistann með góðum sigrum.

Taflfélag Reykjavíkur þakkar keppendum fyrir þátttökuna og óskar verðlaunahöfum til hamingju. Við vonumst til að sjá sem flesta að ári.

• Heimasíða TR
• Chess-Results
• Skákir mótsins
• Myndir má finna á heimasíðu TR

Gabriel Sargassian tekur þátt í Reykjavíkurskákmótinu

Reykjavíkurskákmótið 2016 fer fram dagana 8.-16. mars nk. Skráning er í fullum gangi og nú, þegar um þrír mánuðir eru í mót, er 91 keppandi skráður til leiks. Enn eru fáir stórmeistarar skráðir til leiks en það mun breytast hratt á næstum vikum. Í dag bættist í keppendahópinn armenski ofurstórmesitarinn, Gabriel Sargassian (2702). 

Sargassian sem er þrefaldur ólympíumeistari með Armeníu hefur góðar minningar frá Íslandi. Hann hefur teflt hér tvívegis. Hann tefldi á Reykjavíkurskákmótinu 2006 þar sem hann var einn sigurvegara mótsins - fyrir ofan sjálfan Magnus Carlsen.

Sargassian tefldi á EM landsliða í Laugardalshöll þar sem Armenar urðu í öðru sæti. Þar fór Sargassian mikinn og hlaut borðaverðlaun á öðru borði en árangur hans samsvaraði 2808 skákstigum. Hann var aðeins annar tveggja skákmanna sem unnu skák gegn Rússum á EM en þar vann hann Grischuk.

Mun Sargassian enn einu sinni slá í gegn í Reykjavík í mars næstkomandi?

• Heimasíða Reykjavíurskákmótsins
• Keppendalisti Reykjavíkurskákmótsins
• Skráning í Reykjavíkurskákmótið

 

Hraðskákmót Hugins norðan heiða fer fram á laugardagskvöld

Laugardagskvöldið 12. desember kl 20:00 fer fram okkar árlega hraðskákmót. Mótið fer fram í Seiglu (áður Litlulaugaskóli) í Reykjadal. Tefldar verða skákir með 5 mín umhugsunartíma á mann og allir við alla. Mótið verður reiknað til hraðskákstiga hjá FIDE.

Keppt verður í einum flokki en verðlaun veitt í fullorðinsflokki og U-16 ára til þriggja efstu í hvorum flokki.

Þátttökugjald er krónur 500 á alla keppendur.

Smári Sigurðsson vann mótið í fyrra, en hann hefur oftast allra unnið þetta mót í gegnum tíðina.

Vonast er eftir góðri þátttöku í mótinu og eru áhugasamir beðnir um að skrá sig til leiks með því hringja í Hermann, jafnvel þótt hann sé staddur í fjósinu, í síma 4643187 eða 8213187.

 

Jóhann skákmeistari Garðabæjar

Sjöunda umferð skákþings Garðabæjar fór fram í gærkvöldi eða hluti hennar. Sigurjón Haraldsson og Jón Úlfljótsson gerðu jafntefli sem þýðir að Jóhann Ragnarsson er Skákmeistari Taflfélags Garðabæjar 2015. Hins vegar liggja úrslitin í mótinu ekki fyrir að öðru leiti því frestaðar skákir verða tefldar á kvöld, morgun og föstudag. Næst verður gefin upp staða þegar fimmtudagsumferðinni er lokið.

Tjörvi Schiöth nýr liðsmaður TG vann Ingvar Egil örugglega, Aron Mai samdi jafntefli við Dag Kjartans í kolunnini stöðu, Sveinn Gauti vann Hjálmar og Bjarnsteinn og Alec gerðu jafntefli eftir að Bjarnsteinn lék af sér peði í miðtaflinu.

Í B flokki gerðu þeir Jón þór Lemery og Björn Magnússon jafntefli þar sem staðan var mun betri á Björn. Þorsteinn Magnúson fékk ókeypis vinning og því liggur staðan fyrir hjá 3 efstu. en Jón Lemery er sigurvegari B flokks 2015 með 6,5 vinning af 7, Þorsteinn Magnússon varð annar með 6 vinninga og Björn Magnússon í þriðja sæti með 5 vinninga. Aðrir geta ekki náð þeim.

Frestaðar skákir verða tefldar:

A flokkur
Ólafur Hlynur - Jóhann miðvikudag kl. 13:30
Jón Trausti - Jón Árni fimmtudag kl. 19:30
Loftur - Birkir Karl fimmtudag kl. 19.30
Kjartan Másson - Gauti Páll föstudag kl. 19:30

B flokkur.
Sigurður Gunnar - Sigurþór Miðvikudag kl. 19:30
Sindri Snær - Björgvin (miðvikudag, sunnudag eða mánudag).

• Heimasíða TG
• Facebook síða TG
• Chess-Results

Jólamót Víkingaklúbbsins fer fram í dag

Jólamót Víkingaklúbbsins fyrir börn og unglinga verður haldið í Víkinni Víkingsheimilinu miðvikudaginn 9. desember.  Telfdar verða 5. umferðir með 7 mínútna umhugsunartíma á mann.  Mótið hefst mótið kl. 17.00. Allir krakkar eru velkomnir og þátttaka er ókeypis. Allir fá verðlaun, auk þess sem veitt verða auakverðlaun í hverjum aldursflokki. Yfirskákstjóri verður hinn reynslumikli Stefán Bergsson. 

Keppt verður nokkrum aldursflokkum á mótinu.  

A flokkur keppendur fæddir 2000-2004 (6-10 bekkur).
B flokkur keppendur fæddir 2005-2006 
C flokkur 2007-2008 
D flokkur 2009
E flokkur peðaskák (2010 og yngri)

Barna og unglingaæfingar voru vikulega í vetur, en næsta æfing eftir jólafríð verður miðvikudaginn 13. janúar og verða æfingar vikulega fram á vor. 
Skráning á mótið fer m.a fram á netfangið:  vikingaklubburinn(hjá)gmail.com og á skak.is (guli kassinn)

Skráningu lýkur miðvikudaginn 9 des kl 12.00.  NAUÐSYNLEGT ER AÐ SKRÁ SIG TIL AÐ TRYGGJA ÞÁTTTÖKU.  Nánari upplýsingar veitir Gunnar (gsm:  8629744).

Í fyrra sigraði Vignir Vatnar Stefánsson eldri flokk, en Alexander Bjarnþórsson sigraði í yngri flokki.

Úrslit jólamótsins 2014 hér:
Úrslit jólamótsins 2013 hér:
Úrslit jólamótsins 2012 hér:

Kæfingamát og kökuát í Laugarlækjarskóla

Á skákæfingu Laugalækjarskóla á dögunum var sannarlega tilefni til að gera sér dagamun. Keppnissveitin í opnum flokki hafði nýverið tryggt sér sigur í eldri flokki á jólamóti grunnskóla í Reykjavík og stúlknasveitin varð í öðru sæti í sínum flokki á sama móti. Þá fögnuðum við því einnig að fyrrverandi nemandi skólans, Örn Leó Jóhannsson varð á dögunum Íslandsmeistari 22 ára og yngri og fékk að launum sæti í landsliðsflokki Íslandsmóts fullorðinna í vor.   

Krakkarnir og Daði Ómarsson þjálfari buðu því Erni Leó að koma í heimsókn og tefla við þau fjöltefli og þiggja kökur.  Rifjað var upp að bæði Daði og Örn áttu sæti í mjög sigursælum skáksveitum á vegum skólans á  sínum tíma, en þeir bentu einnig á að þeir voru ekki alltaf fyrsta borðs menn. Þá fékk Örn Leó einnig leiðsögn í byrjunum frá Daða við nokkur tækifæri.

Hin skemmtilegasta stund í alla staði. Þess má geta að Örn Leó vann allar sínar skákir nema þrjár. Bræðurnir Alexander Mai og Aron Þór Mai náðu góðum jafnteflum og það gerði einnig þjálfarinn Daði Ómarsson.

Hin skemmtilegasta stund sem verður endurtekin um leið og tilefni gefast.  

Myndskreytta frásögn má finna á vef Laugarlækjarskóla

Nýtt fréttabréf SÍ

Nýtt Fréttabréf SÍ er komið út. Uppistaðan í því er Evrópumót landsliða auk þess sem farið yfir þau Íslandsmót sem fram hafa farið síðan síðasta fréttabréf kom út í júlí sl.

Meðal efnis í blaðinu:

• EM landsliða - stærsta verkefni íslenskrar skákhreyfingar í 43 ár: Rússar, komu, sáu og sigruðu
• EM í opnum flokki: Besti árangur Íslands í 23 ár!
• Góður árangur kvennaliðsins - Guðlaug með áfanga
• Forsætiráðherra fært skákborð að gjöf
• Þakkir til stuðningsaðila
• Útgáfa fréttabréfs SÍ
• Friðriksmót Landsbankans fer fram 12. desember
• Örn Leó unglingameistari Íslands
• Björgvin Íslandsmeistari eldri skákmanna
• Tíu nýir Íslandsmeistarar
• TR Íslandsmeistari unglingasveita
• Reykjavíkurskákmótið 2016 - í boði GAMMA - 73 keppendur skráðir til leiks
• Mót á döfinni

Fréttabréfið má nálgast hér.

Hægt er að skrá sig fyrir fréttabréfinu á Skák.is (ofarlega til vinstri).

Ein vinningsskák á dag í London - Gummi mætir frú Giri í dag

Taflmennskan á London Chess Classic hefur ekki þótt skemmtilegt og fram hefur komið töluverð gagnrýni á Elítu-mótin þar sem sömu skákmennirnir tefla sí og æ gegn hverjum öðrum og lítil áhætta tekin í skákunum. Gekk það lengst í þriðju umferð mótsins þegar Berlínarvörn var beitt í fjórum skákum af fimm. Öllum þeim skákum lauk með jafntefli. 

Á Facebook lét einn skákáhugamanna hafa eftir sér:

I´m having exactly the same feeling. Events like Berlin, Reykjavik, or Qatar, where top players face ordinary GMs and IMs and where a kind of unexpected rivalry might occur, are a dozen times more interesting to watch than the closed elite ones, except maybe Wijk aan Zee. To be honest, I don't see much sense in both GP series, be it organized by FIDE or by Kasparov.

Í 4. umferð sem fram fór í gær vann Nakamura (2793) Anand (2796) en öðrum skakum lauk með jafntefli. Alls hafa 3 skákir af 20 endað með hreinum úrslitum.

Nakamura, Vachier-Lagrave (2773) og Giri (27849 eru efstir rmeð 2½ vinning. Heimsmeistarinn, Carlsen (2834) er í 4.-8. sæti með 2 vinninga. 

Fimmta umferð fer fram í dag. Þá teflir Carlsen við Aronian (2788). Heimsmeistarinn á harma að hefna gegn Armenum frá því á EM landsliða í Reykjavík í nóvember sl. þegar hann steinlá.

Guðmundur Kjartansson (2477) sem teflir í FIDE Open hefur 3½ vinning eftir 5 umferðir. Hann teflir við georgísku skákkonuna Sopiko Guramishvili (2368), eiginkonu Anish Giri.

Ofurstórmeistararnir hefja taflmennsku kl. 16:00 en skák Gumma hefst kl. 16:30. 

• Heimasíða mótsins
• Beinar útsendingar (aðalmót)
• Beinar útsendingar (FIDE-Open)
• Chess-Results (FIDE-Open)

 

Friðriksmót Landsbankans - Íslandsmótið í hraðskák fer fram á laugardag

Friðriksmót Landsbankans - Íslandsmótið í hraðskák - fer fram í útibúi Landsbankans við Austurstræti 11 laugardaginn 12. desember nk. Mótið hefst kl. 13 og stendur til kl. 16.30.

Gera má ráð fyrir að flestir sterkustu skákmenn landsins taki þátt og efsti keppandi mótsins fær titilinn Íslandsmeistari í hraðskák. Tímamörkin eru 5+2 og tefldar eru ellefu umferðir.

Skráning fer fram á Skák.is (guli kassinn efst) og eru örfá sæti enn laus í mótið. 

Upplýsingar um þegar skráða keppendur má finna hér.

Þetta er tólfta árið í röð sem Landsbankinn og Skáksamband Íslands standa fyrir Friðriksmótinu í skák, en mótið er haldið til heiðurs Friðriki Ólafssyni, fyrsta stórmeistara Íslendinga. Margir af sterkustu stórmeisturum landsins hafa undanfarin ár teflt til heiðurs Friðriki.

Verðlaun fyrir efstu sæti eru eftirfarandi:

1. 100.000 kr.
2.  60.000 kr.
3.  50.000 kr.
4.  30.000 kr.
5.  20.000 kr.

Séu tveir eða fleiri jafnir í efsta sætinu verður stigaútreikningur látinn ráða Íslandsmeistaratitlinum. Verðlaunafé skiptist eftir Hort-kerfinu.

Aukaverðlaun

• Efsti maður með 2001-2200 skákstig 10.000 kr.
• Efsti maður með 2000 stig og minna: 10.000 kr.
• Efsta konan: 10.000 kr.
• Efsti strákur 16 ára og yngri (1999 eða síðar): 10.000 kr.
• Efsta stúlka 16 ára og yngri (1999 eða síðar): 10.000 kr.
• Efsti eldri skákamaður (1955 eða fyrr): 10.000 kr.
• Útdreginn heppinn keppandi: 10.000 kr.

Aukaverðlaun eru miðað við alþjóðleg skákstig 1. desember sl.(íslensk skákstig hafi keppendur ekki alþjóðleg stig). Stigaútreikningur ræður séu menn jafnir og efstir.
Hver keppandi getur aðeins unnin ein aukaverðlaun og eru aukaverðlaunin valin í þeirri röð sem fram kemur að ofan.

Mótið er reiknað til alþjóðlegra hraðskákstiga. 

Fyrri sigurvegarar

• 2014 - Héðinn Steingrímsson 
• 2013 – Helgi Ólafsson
• 2012 - Bragi Þorfinnsson, Hjörvar Steinn Grétarsson og Jón Viktor Gunnarsson
• 2011 - Henrik Danielsen
• 2010 - Jón Viktor Gunnarsson og Þröstur Þórhallsson
• 2009 - Héðinn Steingrímsson
• 2008 - Helgi Ólafsson
• 2007 - Héðinn Steingrímsson
• 2006 - Helgi Áss Grétarsson
• 2005 - Jón Viktor Gunnarsson og Arnar E. Gunnarsson
• 2004 - Jóhann Hjartarson og Stefán Kristjánsson

Lokaumferð Skákþings Garðabæjar frestað til morguns

ATH. 7. umferð Skákþings Garðabæjar er frestað til kl. 19.30 á morgun þriðjudag vegna mjög slæmrar veðurspár og tilkynninga frá almannavörnum.

Ath. ljóst er að umferðin fer ekki öll fram á sama tíma og ljóst að við þurfum að finna aðra tíma fyrir einhverjar viðureignir. td. á efsta borði fer sú viðureign fram kl. 13.30 á miðvikudag. Birkir Karl mun fresta til miðvikudags einnig gegn Lofti (líklega teflt samhliða U2000 mótinu) og amk. 1 skák verður frestað í B flokki milli Sigurþórs og Sigurðar.

Taflfélag Garðabæjar