HM ungmenna: Átta vinningar í lokaumferðinni

Ellefta og síðasta umferð HM ungmenna fór fram í dag. Átta vinningar komu í hús í lokumferðinni. Dagur Ragnarsson (u18), Jón Trausti Harðarson (u18), Björn Hólm Birkisson (u16), Heimir Páll Ragnarsson (u14), Óskar Víkingur Davíðsson (u10), og Veronika Steinunn Magnúsdóttir (u18) unnu sínar skákir. 

Úrslit krakkanna má finna hér (hægt að stækka með því að tvíklikka á mynd)

Nánar á Chess-Results

Vignir Vatnar Stefánsson (u12) og Óskar Víkingur (u10) urðu efstir Íslendinganna með 6,5 vinninga. Símon Þórhallsson (u16) hlaut 6 vinninga. Dagur Ragnarsson (u18), Björn Hólm Birkisson (u16) og Róbert Luu (u10) hlutu 5,5 vinninga.

Alls komu 66 skákstig inní íslenskt skákstigahagkerfi (hækkun að frádreginni lækkun). Björn Hólm Birkisson hækkaði mest allra eða um 149 stig. Aðrir sem hækkuðu á stigum voru Stefán Orri Davíðsson (107), Símon (100), Dawid Kolka (28), Adam Omarsson (25), Veronika Steinunn Magnúsdóttir (23) og Óskar Víkingur (5).

Fararstjórar krakkanna voru Helgi Ólafsson, Lenka Ptácníková og Björn Ívar Karlsson.

 

• Heimasíða mótsins
• Chess-Results
• Beinar útsendingar

HM ungmenna: 11. pistill

10. umferðin, sem fór fram í gær, var okkar versta hingað til; 5 vinningar af 17. Stundum skiptast á skin og skúrir í þessum bransa. Það er spurning hvort góði árangurinn í 9. umferð hafi verið of mikil innspýting í hópinn en það var eitthvað einbeitingarleysi í flestum íslensku keppendunum í gær.

Adam byrjaði á því að vinna, í góðri skák, gegn Kungys (1211) frá Litháen. Hann fékk þægilegra tafl eftir byrjunina og fórnaði tveimur peðum á meðan hann kom mönnum sínum á framfæri. Andstæðingurinn skildi mest allt lið sitt eftir uppi í borði og Adam þakkaði pent fyrir sig, fórnaði skiptamun, og mátaði. Mjög vel klárað! Veronika hafði hvítt á Gabrielu Ebeling (1515) sem kemur úr stórri finnskri skákfjölskyldu. Veronika var vel undirbúin fyrir byrjunina og fékk snemma þægilega stöðu. Í miðtaflinu tókst henni að vinna mann og eftir það var úrvinnslan auðveld. Góður sigur.

Dawid Kolka hafði hvítt gegn Adar (2060) frá Ísrael. Dawid fékk yfirburðartafl eftir byrjunina en var heldur bráður á sér í framhaldinu og hleypti Ísraelsmanninum aðeins inn í skákina. Staðan var sem betur fer það góð að það skipti ekki máli og Dawid vann fínan sigur. Hann hefur verið á góðu skriði í síðustu umferðum.

Jón Trausti hafði svart á Narayanan (1758) frá Bandaríkjunum. Hann fékk fína stöðu eftir byrjunina en hvítur settist í skotgrafirnar, beið rólegur, og var greinilega mjög sáttur með jafntefli. Jóni tókst að setja töluverða pressu á Narayanan en fann aldrei neitt afgerandi. Í tímahrakinu fékk Bandaríkjamaðurinn mótspil og náði í framhaldinu þráskák. Símon hafði svart gegn Tahbaz (2350) frá Íran, í beinni útsendingu á efstu borðunum. Þessi skák var ótrúlega spennandi. Símon tefldi Najdorf-afbrigði sikileyjarvarnar og fékk fína stöðu. Í miðtaflinu tókst honum að töfra fram kröftugt mótspil á drottningarvæng á meðan Íraninn þandi sig á kóngsvæng. Í kjölfarið fórnaði Símon manni og fékk óstöðvandi frípeð á a-línunni. Íraninn gat gefið skiptamun til að stöðva peðið en tók í staðinn þá ákvörðun að leyfa Símoni að vekja upp drottningu svo skyndilega var hann með tvær drottningar í miðtaflinu! Í framhaldinu kom upp staða þar sem Símon hafði tvo hróka og drottningu gegn tveimur hrókum og biskupapari Tahbaz. Sú staða var ekki eins einföld og við héldum því biskupaparið var ótrúlega öflugt. Eftir mikið sprikl hvíts í framhaldinu þráléku keppendur í óljósri stöðu. Svolítið svekkjandi að ná ekki að vinna þessa skemmtilegu skák en engu að síður fyrirfram góð úrslit hjá Símoni sem er búinn að standa sig frábærlega á mótinu.
Róbert hafði hvítt á CM Low (1798) frá Kanada. Róbert tefldi byrjunina vel en missti nokkrum sinnum af góðum sóknarleiðum í miðtaflinu. Hann komst út í hróksendatafl, peði yfir, og átti góða vinningsmöguleika. Skákin fjaraði þó út í jafntefli sem svartur mátti þakka fyrir. Með örlítið meiri ákveðni hefði Róbert vafalaust unnið skákina. Freyja hafði svart gegn Ziegenfuss (1608) frá Þýskalandi. Freyja hefur verið að bæta sig jafnt og þétt frá því að mótið hófst. Hún tefldi byrjunina vel, enda hafði hún undirbúið sig sérstaklega fyrir hana. Hún vann peð en gaf andstæðingnum smá spil í framhaldinu. Hún vann skiptamun en vegna veikrar kóngstöðu Freyju voru sífelldar hættur á þráskák. Með örlítið meiri nákvæmni hefði hún átt góða sigurmöguleika en á endanum fann Ziegenfuss leið til að þráskáka og jafntefli varð niðurstaðan. Oliver, Dagur, Jón Kristinn, Björn Hólm, Bárður Örn, Hilmir Freyr, Heimir Páll, Vignir Vatnar, Óskar Víkingur og Stefán Orri töpuðu allir.

Erfið umferð en svona er þetta stundum. Þegar þessi orð eru skrifuð er lokaumferðin nýhafin. Í kvöld er svo verðlaunaafhending en við stefnum að því að nota frítímann vel í dag og fara út í sólina.

Bestu kveðjur,
Björn Ívar

EM ungmenna: Ekki gekk vel í tíundu umferð

Ekki gekk vel í tíundu umferð HM ungmenna sem fram fór í Porto Carras í Grikklandi í dag. Alls komu 5 vinningar í hús í 17 skákum. Dawid Kolka (u16), Adam Omarsson (u8) og Veronika Steinunn Magnúsdóttir (u18) unnu sínar skákir. Jón Trausti Harðarson (u18), Símon Þórhallsson (u16) og Róbert Luu (u10) gerðu jafntefli.

Úrslit krakkanna má finna hér (hægt að stækka með því að tvíklikka á mynd)

Nánar á Chess-Results

Símon Þórhallsson(u16) og Vignir Vatnar (u12) eru efstir íslensku krakkanna með 6 vinninga, Óskar Víkingur Davíðsson (10) hefur 5,5 vinning og Jón Kristinn Þorgeirsson (u16),  Dawid Kolka (u16), Hilmir Freyr Heimisson (u14), Róbert Luu (u10) og Freyja Birkisdóttir (u10) hafa 5 vinninga. 

Lokaumferðin hefst kl. 8 í fyrramálið.

Sautján fulltrúar taka þátt fyrir hönd Íslands á HM ungmenna og hafa aldrei verið fleiri.

 

• Heimasíða mótsins
• Chess-Results
• Beinar útsendingar

HM ungmenna: 10. pistill

9. umferðin, sem fram fór í gær, var okkar besta hingað til; 12 vinningar af 17 mögulegum.

Dagur hafði svart gegn Portúgalanum Leao (1994). Hvítur óð beint út í afbrigði sem Dagur hafði undirbúið sig vel fyrir og Dagur fékk yfirburðarstöðu. Hann vann peð í miðtaflinu og yfirspilaði Portúgalann í endataflinu. Öruggur sigur hjá Degi. Oliver hafði svart gegn Isaakidis (1819) frá Kýpur. Isaakidis tefldi vel í byrjuninni og Oliver var ekki nógu sáttur með stöðuna sína. Í miðtaflinu valdi hvítur kolranga leið og lék sig í mát í framhaldinu. Mikilvægir sigrar fyrir Dag og Oliver sem eiga alla möguleika á því að klára mótið með stæl. Símon hafði hvítt gegn FM Livaic (2372). Símon valdi trausta leið í byrjuninni og upp kom staða með jöfnum færum. Livaic þandi sig á kóngsvængnum en Símon varðist vel og hélt sínu. Eftir mikil uppskipti á mönnum sættust keppendur á jafntefli. Símon hefur verið að sýna að hann stendur alveg jafnfætis þessum stigaháu andstæðingum.

Jón Kristinn hafði hvítt á Chew (2112) frá Ástralíu. Jón Kristinn fékk mun betra tafl eftir byrjunina og var sennilega með unnið tafl í miðtaflinu þegar hann gaf andstæðingnum færi á gagnsókn og þráskák í kjölfarið. Örlítil óheppni. Dawid Kolka gerði einnig jafntefli, með svörtu, gegn hinum ísraelska Triger (2091). Góð úrslit hjá Dawid sem hefur verið á fínu skriði eftir rólega byrjun. Tvíburarnir, Björn Hólm og Bárður Örn, unnu báðir góða sigra gegn hinum skoska Abdulla (2001) og CM Klevansky (1640) frá Suður-Afríku. Strákarnir hafa báðir verið að breyta aðeins til í byrjunarvali og það virðist hitta vel í mark. Hilmir Freyr vann heimamanninn Serpetsidakis (1854) af öryggi. Hann fékk trausta stöðu eftir byrjunina og þegar miðtaflið tók við var Grikkinn yfirspilaður. Hilmir Freyr hefur verið á góðri siglingu í síðustu umferðum. Heimir Páll sigraði Evans (1488) frá Wales, með hvítu mönnunum. Heimir Páll tefldi örlítið ónákvæmt eftir byrjunina en það kom sem betur fer ekki að sök því það gerði andstæðingurinn líka og sá tapar víst sem leikur síðasta afleiknum! Mikilvægur sigur fyrir Heimi Pál.

Vignir Vatnar hafði hvítt á Nakada (1831) frá Bandaríkjunum. Vignir hélt áfram að tefla nýja gæluafbrigðið sitt með hvítu og fékk mun betri stöðu. Þá fór Nakada að sprikla heilmikið og lagði nokkur erfið vandamál fyrir Vigni. Vignir er orðinn reynslumikill og leysti vandamálin vel og vann góðan sigur. Óskar Víkingur hafði svart gegn Cebotari (1422) frá Moldavíu. Óskar tefldi byrjunina af öryggi og uppskar fína stöðu. Í miðtaflinu tókst honum að vinna peð af andstæðingnum og skákina í framhaldinu. Óskar hefur verið að tefla mjög vel í mótinu og er að bæta sig mikið. Róbert Luu hafði svart á Ghosh frá Bandaríkjunum. Róbert tefldi traust í byrjuninni eins og oft áður. Hann fékk örlítið betra tafl og komst út í hróksendatafl tveimur peðum yfir sem hann vann af öryggi. Góð skák hjá Róberti sem er á góðri siglingu eftir rólega byrjun. Stefán Orri hafði hvítt gegn Hartman (1310) frá Skotlandi. Stefán fannst við hæfi að tefla skoska leikinn get Skotanum og var vel undirbúinn fyrir byrjunina. Hann vann mann í miðtaflinu og úrvinnslan var góð í framhaldinu. Öruggur sigur og Stefán er í góðum stigagróða eftir flottan árangur á mótinu. Freyja hafði hvítt gegn hinni rússnesku WCM Olgu Melenchuk (1497). Freyja var spennt fyrir skákina því hún hafði aldrei áður teflt gegn titilhafa. Hún tefldi skoska leikinn, sem við höfðum undirbúið vel, og byrjunarleikirnir voru nánast þeir sömu og hjá Stefáni Orra. Hún fékk betra tafl en Olga varðist vel, að rússneskum sið! Freyja pressaði stíft en sætti sig að lokum við jafntefli. Góð skák og mér fannst Freyja alveg hafa átt skilið að vinna.

Jón Trausti, Veronika og Adam töpuðu öll í skákum þar sem þau áttu góð tækifæri. Hlutirnir hafa ekki alveg verið að falla með þeim í síðustu skákum.

Nú erum við farin að fara í tvo göngutúra á dag. Annars vegar er það morgungangan, sem við förum í rétt fyrir hádegismat, og svo er það Botvinnik-gangan góða sem við tökum að kvöldi dags. Þetta virðist hafa haft góð áhrif á íslensku keppendurnar í síðustu tveimur umferðum.

Á morgun er lokaumferðin og hefst hún kl. 10 að staðartíma. Annað kvöld er svo verðlaunaafhending kl. 20:30. Heimför er um miðjan dag á föstudaginn. Við ættum að hafa einhvern frítíma eftir umferðina á morgun og mér skilst að menn séu farnir að pússa takkaskóna...

Bestu kveðjur heim,
Björn Ívar

Guðfinnur vopnfimastur hjá Ásum í gær.

Æsir tefldu sinn níunda skákdag í gær. Guðfinnur R Kjartansson var vopnfimastur í dag og uppskar 8½ vinning af 10 mögulegum. Guðfinnur tapaði engri skák en gerði þrjú jafntefli við þá Ara Stefánsson, Gísla Árnason og Gísla Gunnlaugsson. 

Í öðru sæti varð Stefán Þormar með 7 vinninga. Svo komu fjórir jafnir með 6½ vinning, það voru þeir Gísli Gunnlaugsson, Sæbjörn Larsen, Kristinn Bjarnason og Ari Stefánsson. Gísli með bestu stiga stöðu.

Næsta laugardag verður Íslandsmót öldunga haldið í safnaðarheimili Hafnarfjarðarkirkju. Riddarar sjá um mótshald. Tefldar verða níu umferðir með 10 mín umhugsun +3 sek. á leik.

Ég vil hvetja skákfélaga mina til þess að taka þátt í þessu móti. 

Sjá nánari úrslit gærdagsins í töflu og myndir frá ESE.

 

Frábært gengi í dag á HM ungmenna

Aldrei hefur gengið betur á HM ungmenna en í dag. 12 vinningar komu í hús af 17 mögulegum! Dagur Ragnarsson (u18), Oliver Aron Jóhannesson (u18), Bárður Örn Birkisson (u16), Björn Hólm Birkisson (u16), Hilmir Freyr Heimisson (u14), Heimir Páll Ragnarsson (u14), Vignir Vatnar Stefánsson (u12), Óskar Víkingur Davíðsson (u10), Róbert Luu (u10) og Stefán Orri Davíðsson (u10) unnir allir í dag. Auk þess gerðu fjórir krakkanna jafntefli.

Úrslit krakkanna má finna hér (hægt að stækka með því að tvíklikka á mynd)

Nánar á Chess-Results

Vignir Vatnar (u12) er efstur íslensku krakkana með 6 vinninga. Símon (u16) og Óskar Víkingur (u10) hafa 5,5 vinning. Jón Kristinn (u16) og Hilmir Freyr (14) hafa 5 vinninga.

Sautján fulltrúar taka þátt fyrir hönd Íslands á HM ungmenna og hafa aldrei verið fleiri.

 

• Heimasíða mótsins
• Chess-Results
• Beinar útsendingar

HM ungmenna: 9. pistill

8. umferð

Oliver hafði hvítt á Leao (1994) frá Portúgal. Hann fékk yfirburðartafl eftir byrjunina en svartur varðist vel og á krítísku augnabliki missti Oliver af vænlegu framhaldi og þurfti að sætta sig við jafnt endatafl. Hann var orðinn tímanaumur og tók jafntefli sem var sennilega skynsamleg ákvörðun á þeim tímapunkti. Símon heldur áfram að eiga gott mót. Hann hafði svart á Sousa (2251), sem einnig er frá Portúgal. Sousa lék 2. b3 gegn sikileyjarvörn Símons sem hann var þó vel undirbúinn fyrir. Símon fékk trausta stöðu og beið átekta á meðan Sousa þandi sig á kóngsvængnum. Um leið og hann fékk tækifæri snéri Símon vörn í sókn og hvítur missti öll tök á stöðunni. Við Helgi vorum ánægðir með þessa taktík og ef ég man rétt kallaði Helgi þetta ,,að drepa andstæðinginn gjörsamlega úr leiðindum´´! Símon fórnaði skiptamun fyrir góð færi í framhaldinu og í erfiðri stöðu lék Sousa af sér drottningunni og gafst upp í kjölfarið. Mjög góður sigur.
Dawid Kolka og Bárður Örn mættust innbyrðis. Dawid tefldi uppskiptaafbrigðið í spænskum leik og hafa þeir félaga víst teflt nokkrar hraðskákir í gegnum tíðina í því afbrigði. Dawid hafði kynnt sér vel sigur Fischers gegn Spassky, í 9. einvígisskák endurkomueinvígisins frá árinu 1992. Hann nýtti sér vel hugmyndir Fischers úr skákinni og vann góðan sigur. Það eina sem skyggði á þennan góða sigur Dawids var að þetta skyldi vera gegn öðrum Íslendingi.
Björn Hólm hafði svart gegn Szustakowski (2057) frá Póllandi. Björn tefldi traust og uppskar þægilega stöðu. Hvítur reyndi að pressa en Björn varðist vel og hélt jafntefli í langri skák. Björn er í góðum stigagróða eins og staðan er núna. Hilmir Freyr átti mjög góðan dag. Hann hafði hvítt gegn Liang (1808) frá Kanada. Hilmir tefldi trausta leið í byrjuninni og fékk mun þægilegra tafl. Svartur gerði strategísk mistök og veikti sig illa á hvítu reitunum sem Hilmir nýtti sér vel. Hann skipti svo upp í endatafl þar sem svartur var með vonlausa peðastöðu. Úrvinnslan var sannfærandi og góður sigur í höfn. Vignir Vatnar hafði svart á Pislaru (1809) frá Þýskalandi. Vignir jafnaði taflið snemma og nýtti sér mistök andstæðingsins í miðtaflinu. Hann fékk í framhaldinu mun betra tafl, vann skiptamun, og í framhaldinu skákina af öryggi. Lok skákarinnar birtust í Fréttablaðinu í dag. Óskar Víkingur hafði hvítt gegn Ratnesan (1613) frá Englandi. Óskar fékk betra tafl eftir byrjunina og hefði á einum tímapunkti getað komist út í endatafl peði yfir. Hann fékk engu að síður vænlegt endatafl en sætti sig heldur snemma við jafntefli, í stöðu sem hann hefði getað teflt aðeins lengur án þess að vera í taphættu. Þetta fer í reynslubankann.

Róbert Luu hafði hvítt gegn heimamanninum Dimitros Nikolakopoulos (1143). Róbert fékk þægilega sóknarstöðu eftir byrjunina og þrátt fyrir að svartur ynni peð réð hann ekkert við sóknartilburði Róberts á kóngsvængnum. Róbert innsiglaði sigurinn svo með skemmtilegri mátfléttu. Öruggur sigur. Adam hafði hvítt gegn Thoreux-Josso, frá Monaco. Adam tefldi nokkuð trausta byrjun og fékk heldur þægilegra tafl. Eftir töluverð uppskipti á mönnum sömdu keppendur um jafntefli. Adam hefði kannski, eins og Óskar, getað teflt aðeins lengur án þess að vera í taphættu. Þetta fer líka í reynslubankann!
Veronika hafði hvítt á Mendez (1589) frá Mexíkó. Veronika vann mann í miðtaflinu og hafði yfirburðarstöðu þegar henni yfirsást leikur sem snéri dæminu algjörlega við og Veronika sat uppi með tapað tafl. Henni tókst þó af mikilli útsjónarsemi að plata andstæðinginn í endatafl þar sem Veronika hafði kóng gegn svartreita biskup og h-peði. Veronika kom kóngnum á h1 og flestir sæmilega þenkjandi skákmenn þekkja að sú staða er rakið jafntefli. Mendez ákvað þó að reyna að vinna stöðuna í meira en 30 leiki áður en hún sættist á jafntefli!

Freyja hafði svart gegn Viktoria Russeva frá Úkraínu. Freyja tefldi byrjunina vel, vann peð, og hafði sómastöðu. Þegar Russeva fór skyndilega í kóngssókn missti Freyja af bestu varnarleiðinni og tapaði í framhaldinu 2 peðum. Hún fór út í erfitt hróksendatafl en varðist vel (eins og áður!) og hélt jafntefli með góðri baráttu.
Dagur, Jón Trausti og Jón Kristinn töpuðu allir gegn sterkum andstæðingum. Einnig töpuðu Heimir Páll og Stefán Orri í erfiðum skákum.

Hópurinn fór aftur í góðan göngutúr í gærkvöldi. Við röltum meðfram sjónum og ræddum skákir dagsins, stjörnurnar á himninum, óendanleikann og hið stóra samhengi lífsins. Ég get sagt ykkur að íslensku keppendurnir á HM ráðast ekki á garðinn þar sem hann er lægstur! Það var nokkuð skemmtilegt að mæta Arthur Jussupow á göngu, í myrkrinu, en Helgi hafði þær skýringar á reiðum höndum að Jussupow þekkti að sjálfsögðu prinsipp Botvinniks!

Þegar þessi orð eru rituð er 9. umferðin nýhafin. Símon, sem hefur 5 vinninga, hefur hvítt á FM Livaic (2372) á einum af toppborðunum. Vignir, sem einnig hefur 5 vinninga, hefur einnig hvítt á Nakada (1831) á efstu borðunum.

Við vonum það besta fyrir alla okkar keppendur í dag, eins og alltaf!

Bestu kveðjur heim,
Björn Ívar

Íslandsmót eldri skákmanna - Strandbergsmótið haldið á föstudaginn

Íslandsmót eldri skákmanna 65+ (fædda 1950 eða fyrr) verður haldið laugardaginn 7. nóvember nk. í Strandbergi, safnaðarheimili Hafnarfjarðarkirkju í umsjá  RIDDARANS - skákklúbbs öldunga,  sem þar hefur aðsetur sitt. 

Þetta er í annað sinn sem slíkt mót með atskákarsniði fer fram í þessum aldursflokki. Tefldar verða 9 umferðir með 10 mínútna umhugsunartíma plús 3 sekúndur á leik. Fjórar umferðir fyrir hádegi en lokaumferðirnar fimm eftir hádegisverðarhlé. 

Mótið hefst kl. 10 árdegis og lýkur um kl. 16 með verðlaunaafhendingu og kaffisamsæti.  Teflt verður í hátíðarsalnum við kjöraðstæður. Boðið verður upp á kaffi, svaladrykki og snarl meðan á móti stendur.  Góð verðlaun og aldursflokkaviðurkenningar. 

Verðlaun

• 1. 10.000 kr.
• 2.  6.000 kr.
• 3.  4.000 kr.

Aldurflokkaverðlaun.

• 65-70
• 71-75
• 76 -80
• 81 og eldri

Jói Útherji gefur alla verðlaunagripi.

Sértök verðlaun fyrir 70+, 75+ og 80+. Jói Útherji gefur aukaverðlaunin.

Þátttökugjald er kr. 2.500.

Skráing fer fram á Skák.is. Upplýsingar um þegar skráða keppendur má finna hér. 

HM ungmenna: Átta vinningar í hús í dag

Átta vinningar duttu í hús í dag í áttundu umferð HM ungmenna. Símon Þórhallsson (u16), Dawid Kolka (u16), Hilmir Freyr Heimisson (u14), Vignir Vatnar Stefánsson U12), Róbert Luu (u10) unnu allir í dag. Sex krakkanna gerðu jafntefli. 

Meðal úrslita dagsins má nefna að Símon vann andstæðing sem eru um 200 skákstigum hærri en hann sjálfur. 

Úrslit krakkanna má finna hér (hægt að stækka með því að tvíklikka á mynd)

Nánar á Chess-Results

Símon og Vignir eru efstir íslensku krakkanna en þeir hafa 5 vinninga. Jón Kristinn Þorgeirsson (u16) og Óskar Víkingur Davíðsson (u10) hafa 4½ vinning. Hilmir Freyr Heimisson og Freyja Birkisdóttir (u10) hafa 4 vinninga.

Sautján fulltrúar taka þátt fyrir hönd Íslands á HM ungmenna og hafa aldrei verið fleiri.

 

• Heimasíða mótsins
• Chess-Results
• Beinar útsendingar

HM ungmenna: 8. pistill

7. umferð

Dagur hafði hvítt á Norðmanninn Lobersli (2101). Við höfðum undirbúið óvænta leið gegn Norðmanninum en hann virðist hafa grunað eitthvað og kom Degi á óvart á móti. Dagur fékk ívið verri stöðu eftir byrjunina en tókst með útsjónarsemi að þvinga fram jafntefli með þráleik. Jón Trausti mætti Weerashinge (1692) frá Sri Lanka, með hvítu mönnunum. Við höfðum litlar upplýsingar um andstæðinginn fyrir skákina en Jóni tókst að fá vel teflanlega stöðu eftir byrjunina. Á krítísku augnabliki tók Weerashinge þá undarlegu ákvörðun að skipta upp í endatafl þar sem Jón Trausti hafði tvo biskupa gegn hrók svarts. Svartur réð lítið við sterkt biskupapar Jóns og hann vann endataflið sannfærandi.
Jón Kristinn var í beinni útsendingu, með hvítt, gegn FM Makhynov (2399) frá Kasakstan. Jokkó fékk ágæta stöðu út úr byrjuninni og tókst að veikja kóngsstöðu svarts í miðtaflinu. Tölvurnar mátu stöðuna engu að síður betri fyrir svartan en með taktískri kænsku sinni tóks Jokkó að töfra fram færi gegn svarta kóngnum sem endaði með þráskák. Fín úrslit og Jón Kristinn er aftur í beinni útsendingu í dag á einum af toppborðunum. Símon hafði líka hvítt gegn FM Philippe (2260) frá Frakklandi. Símon hafði undirbúið sig vel fyrir skákina og tefldi byrjunina hratt og sannfærandi. Hann uppskar mun betra tafl en Frakkinn varðist vel. Eftir uppskipti á mönnum í tímahraki ákvað Símon að taka jafntefli í stöðu sem var þá orðin jöfn. Skynsöm ákvörðun og Símon stendur vel að vígi fyrir framhaldið. Dawid Kolka hafði svart gegn Marais (1674) frá Suður-Afríku. Hann tefldi afbrigði sem hann þekkir vel og uppskar góða stöðu og vann af öryggi. Mjög mikilvægur sigur fyrir Dawid. Björn Hólm gerði jafntefli, með hvítu, gegn Tifferet (2028) frá Ísrael. Björn hefur verið að tefla vel í mótinu og er greinilega að bæta
sig mikið.

Stefán Orri hafði hvítt gegn Osmonaliev (1383) frá Kirgistan. Stefán tefldi byrjunina af krafti og fékk mun betri stöðu. Osmonaliev vann peð í miðtaflinu en Stefán fékk fyrir það góð færi. Hann fór beint í mátsókn og svartur fann ekki bestu vörnina. Stefán töfraði þá fram úr erminni glæsilega mátfléttu. Lok skákarinnar birtast í DV á morgun!
Róbert Luu hafði svart gegn hinum rússneska Velikovich (1232). Róbert tefldi traust í byrjuninni og skipti á hárréttu augnabliki upp í hagstætt hróksendatafl. Róbert hefur rólegan og traustan stíl og svona stöður virðast henta honum vel. Hann yfirspilaði andstæðinginn í endataflinu og vann af öryggi.

Freyja hafði hvítt gegn Kalavala frá Wales. Freyja fékk prýðilega stöðu eftir byrjunina. Hún vann mann en tapaði honum aftur ásamt tveimur peðum í miklum flækjum í miðtaflinu. Þá kom fram helsti styrkleiki Freyju. Hún berst alltaf eins og ljón, alveg sama hvernig staðan er! Henni tókst að búa til hættulegar hótanir í kringum kóngsstöðu andstæðingsins í framhaldinu og vinna af henni hrók. Úrvinnslan var svo upp á 10 og góður sigur í höfn. Oliver, Bárður Örn, Hilmir Freyr, Heimir Páll, Vignir Vatnar, Óskar Víkingur, Adam og Veronika töpuðu öll.

Veðrið hefur verið gott í dag, heiðskýrt og hægur vindur. Við fórum nokkur í góðan göngutúr í morgun með Helga. Daglegir göngutúrar eru góðir þegar krakkarnir sitja við taflborðið allan liðlangan daginn. Helgi sagði okkur frá því að Botvinnik hefði alltaf farið í göngutúr að kvöldi dags og tekið hann svo alvarlega að þegar gesti bar að garði hefði hann undantekningalaust tekið göngutúrin framyfir gestina, til að raska ekki rútínunni!

Við nýttum sólina vel eftir hádegið og fórum nokkur niður að strönd. Það er magnað dýralíf hér á svæðinu. Sjórinn morandi í fiskum og smásílum og falleg fiðrildi flögrandi um í gróðrinum. Sjórinn er orðinn frekar kaldur en við, Adam, Freyja og Símon, skelltum okkur í hressandi sjóbað með Birki, pabba Freyju og tvíburanna Bárðar og Björns. Freyja skoraði ítrekað á okkur í kappsund en við strákarnir áttum ekkert í hana í sjósundinu enda er stelpan þaulæfð sundkona!

Í 8. umferðinni, sem er nýhafin, mætast meðal annars Dawid Kolka og Bárður Örn. Þetta er í þriðja skiptið sem Íslendingar mætast í ferðinni! Jón Kristinn er í beinni útsendingu gegn FM Valentin Dragnev (2380) sem sjá má hér:
FM Dragnev - Jón Kristinn

Bestu kveðjur frá Porto Carras!

Björn Ívar