Friðrik Ólafsson gerður að heiðursborgara

Friðrik Ólafsson, stórmeistari í skák, verður gerður að heiðursborgara Reykjavíkur við hátíðlega athöfn í Höfða, miðvikudaginn 28. janúar. Borgarráð samþykkti tillögu borgarstjóra þar að lútandi á fundi sínum sl. fimmtudag.

Friðrik Ólafsson er sjötti einstaklingurinn sem gerður er að heiðursborgara Reykjavíkurborgar. Þeir sem hlotið hafa þessa nafnbót áður eru; séra Bjarni Jónsson árið 1961, Kristján Sveinsson augnlæknir árið 1975, Vigdís Finnbogadóttir árið 2010, Erró árið 2012 og Yoko Ono árið 2013.

Með því að sæma Friðrik Ólafsson heiðursborgaratitli vill Reykjavikurborg
þakka Friðriki fyrir árangur hans og afrek á sviði skáklistarinnar. Friðrik fagnar 80 ára afmæli sínu í dag, 26. janúar, og er vel við hæfi að heiðra hann fyrir dýrmætt framlag hans til íslenskrar menningar á þeim tímamótum.

Áhugi á skák er óvíða meiri en á Íslandi. Þessi áhugi stendur á gömlum merg en líklega hefur enginn Íslendingur haft jafn mikil áhrif á skákíþróttina hérlendis og Friðrik Ólafsson.

Friðrik er fæddur árið 1935 og varð Íslandsmeistari í skák aðeins 17 ára gamall. Hann varð Norðurlandameistari árið eftir og stórmeistari í skák árið 1958, fyrstur íslenskra skákmanna. Með því hóf hann sig upp í hóp sterkustu skákmanna heims og varð um leið víðkunnur jafnt innan skákheimsins sem utan. Afrek hans við skákborðið mörkuðu jafnframt ótvíræð tímamót í íslenskri skáksögu.

Athygli manna á Friðriki vaknaði fljótlega eftir að hann fór að taka þátt í skákmótum sem ungur drengur, bæði vegna þess hve góðum árangri hann náði og ekki síst vegna þess hvernig hann fór að því að ná þessum árangri. Þegar í upphafi sýndi hann óvenjulega dirfsku og hugkvæmni og í skákum hans brá fyrir meiri tilþrifum en menn áttu að venjast.

Árangur Friðriks hafði einnig mikil áhrif á það í hvaða farveg þróun skákmála féll. Jarðvegur skáklistarinnar var plægður þannig að hér hefur sprottið upp og dafnað slík sveit stórmeistara að hver einasta stórþjóð mætti telja sig fullsæmda af slíkri fylkingu.

Friðrik lauk lögfræðiprófi frá Háskóla Íslands og starfaði hjá dómsmálaráðuneytinu áður en hann varð atvinnumaður í skákíþróttinni árið 1974. Friðrik var forseti alþjóðaskáksambandsins FIDE á árunum 1978-1982 og að því loknu starfaði hann sem skrifstofustjóri Alþingis. Á sínum skákferli vann Friðrik allmörg alþjóðleg skákmót, varð skákmeistari Norðurlanda og sex varð hann Íslandsmeistari.

Það er Reykjavíkurborg mikill heiður að tilnefna Friðrik Ólafsson sem heiðursborgara Reykjavíkur.

GAMMA helsti stuðningsaðili Reykjavíkurskákmótsins 2015-18

Nú þegar hafa 25 stórmeistarar í skák skráð sig á Reykjavikurskákmótið og á enn eftir að fjölga í þeim hópi að mati Gunnars Björnssonar, forseta Skáksambands Íslands. Reykjavíkurskákmótið 2015 fer fram 10. til 18. mars í Hörpu og er 29. mótið í ríflega fimmtíu ára sögu þess.

GAMMA verður aðalstyrktaraðili Reykjavíkurskákmótsins og undirrituðu Gunnar Björnsson og Agnar Tómas Möller, fyrir hönd GAMMA, samstarfssamning til fjögurra ára í dag. Við sama tilefni var nýtt merki mótsins afhjúpað á sjálfum skákdeginum, sem haldinn er hátíðlegur á afmælisdegi Friðriks Ólafssonar, fyrsta stórmeistara Íslendinga í skák.

 

Gunnar Björnsson segist fagna tímamótasamstarfi við GAMMA um alþjóðlegu Reykjavíkurskákmótin 2015 til 2018: „Sá öflugi stuðningur tryggir mótinu áframhaldandi umgjörð við hæfi. Áherslur Gamma á fagmennsku og árangur falla vel að framtíðarsýn Skáksambandsins, sem væntir góðs af samstarfinu við GAMMA, ekki síst varðandi mótið í ár og 80 ára afmælismót Friðriks Ólafssonar,“ segir Gunnar.

Friðrik Ólafsson sem er áttræður í dag var viðstaddur undirskriftina. Friðrik varð Íslandsmeistari í skák 17 ára gamall árið 1952 og næstu árin var hann á meðal bestu skákmanna heims. Þá var Friðrik forseti FIDE frá 1978 til 1982 og skrifstofustjóri Alþingis um árabil. Er Reykjavíkurskákmótið haldið honum til heiðurs í ár.

Metþátttaka var slegin í fyrra þegar 255 skákmenn frá 35 löndum tóku þátt á Reykjavíkurskákmótinu. Mótið nýtur mikillar virðingar og var í fyrra valið næst besta opna skákmót heims af samtökum atvinnuskákmanna en mörg hundruð opin mót eru haldin um allan heim á hverju ári.

Meðal keppenda í ár er aserski ofurstórmeistarinn Shakhriyar Mamedyarov, einn sterkasti skákmaður heims, og lykilmaður í landsliði Aserbaídsjan sem er núverandi Evrópumeistari landsliða. Indverska skákdrottningin, Tanya Sadchev, tekur einnig þátt en hún er af mörgum álitin þjóðhetja  á Indlandi. 

• Mynd 1: Gunnar Björnsson og Agnar Tómas Möller skrifa undir samstarfssamning til fjögurra ára. Viðstaddur undirritunina var Friðrik Ólafsson, fyrsti stórmeistari Íslendinga, sem er áttræður í dag.
• Mynd2: Agnar Tómas Möller, stjórnandi hjá GAMMA, skoraði á Friðrik Ólafsson í hraðskák eftir að skrifað var undir samninginn. Eftir snarpa viðureign var þráteflt. 

Stefán Þór sigraði á Friðriksmóti Víkingaklúbbsins

Stefán Þór Sigurjónsson sigraði á Friðriksmótinu, miðnæturmóti Víkingaklúbbsins, sem haldið var á veitingarstaðnum Ölstofunni í gærkvöldi. Mótið var jafnframt fyrsti viðburður skákdagsins, en hlé var gert á taflmennsku um miðnætti , til að heiðra meistara Friðrik með kveðskap og skálað var fyrir goðinu, sem er áttræður í dag, Telfd var bæði skák og Víkingaskák og tapaði Stefán einungis einni viðureign, en þátttakendur voru sex. Stefán hlaut því hinn forkunnarfagra Friðriksbikar í verðlaunasafn sitt. Ólafur B. Þórsson og Gunnar Fr. Rúnarsson urðu í 2-3 sæti.

KR & Gallerý Skák - Kappteflið um Taflfkóng Friðriks

Gunnar Freyr Rúnarsson hefur, tekið forustuna í mótaröðinni til heiðurs Friðrik Ólafssyni eftir tvo mót af fjórum sem fram fer um þessar mundir í KR-heimilinu í Frostaskjóli í samstarfi við Gallerý Skák. Þriðja umferðin verður tefld þar í kvöld á 80 ára afmælisdegi meistarans, jafnframt því sem Íslenska skákdeginum er fagnað. 

Þrjú bestu mót hvers keppanda af fjórum telja til stiga og vinnings.  Gunnar Freyr leiðir nú með 15 stig, Kristján Stefánsson með 10 en hann vann fyrsta mótið Óskar Long með 9; Björgvin Víglundsson með 8 stig  eftir eitt mót, svo allt er í raun opið enn. Mótinu lýkur svo að viku liðinni. 

Meistara Friðrik eru færðar innilegar hamingjuóskir í tilefni dagsins og skákmenn hvattir til að fjölmenna í  kvöld kl. 19.30 til að tefla honum og skákgyðjunni til dýrðar. /ESE 

Skákdagurinn runninn upp - Friðrik áttræður í dag

Í dag 26. janúar er Skákdagur Íslands haldinn hátíðarlegur. Teflt er víðsvegar um land og töflin tekin upp í allmörgum félögum, skólum og jafnvel verslunarmiðstöðum! 

Víkingaklúbburinn reið á vaðið en hans mót, hófst kl. 22 og átti að standa framyfir miðnætti. Þá átti að skála fyrir meistaranum að hætti Víkinga.

Skákfélag Akureyrar stendur fyrir skákmóti í verslunarmiðstöðunni Glerártorgi. Skákfélagið Huginn stendur fyrir mótum bæði í Reykjavík og á Húsavík. Vinaskákfélagið og Hrókurinn standa fyrir hinu árlega Friðriksmóti í Vin. Skákdeild KR og Gallerý Skák tefla um Taflkóng Friðriks þar sem Gunnar Freyr Rúnarsson stefnir að því að fjórði Gunnarinn á fjórum árum sem hampar kónginum! Hinir eru Gunnar Skarphéðinsson, Gunnar I. Birgisson og Gunnar Gunnarsson.

Skólaheimsóknir eru farnar um Suðurlandið þar sem Björn Þorfinnsson mun heimsækja skóla og sundlaugartöfl eru vígð á ýmsum stöðum um landið.

Staðið er fyrir keppni á milli grunnskólanna í Patreks- og Tálknafjarðar, Suðurfjarðarkeppnin.

Skákdagur Íslands er ekki bara Skákdagur því um er eiginlega að ræða skákviku. Félagar Friðriks í Taflfélagi Reykjavíkur, halda skemmtikvöld á föstudaginn, Frikkinn, þar sem stöður úr skákum Friðrik verða tefldar. Þess fyrir utan er Skákþing Reykjavíkur nú í ár haldið honum til heiðurs.

Eldri skákmenn í Ásum og Riddaranum halda sitt árlega á Toyota-skákmót á föstudaginn.

Hér hefur verið stiklað á stóru en gera má ráð töfl verði víða tekinn upp í dag!

Ein stórfrétt tengd Reykjavíkurskákmótinu, sem í ár er afmælismót Friðriks, verður gerð opinber á Skákdaginn en nánar um það síðar!

Óskað er eftir stuttum fréttum og myndum um viðburði sem fram fara á Skákdaginn í netföngin stefan@skakakademia eða [e-mail].

Til hamingju með daginn skákmenn! Og síðast en ekki síst. Til hamingju með daginn Friðrik Ólafsson!

               

Stefán og Jón Viktor efstir á Skákþingi Reykjavíkur

Stórmeistarinn Stefán Kristjánsson (2492) og alþjóðlegi meistarinn Jón Viktor Gunnarsson (2433) eru efstir á Skákþingi Reykjavíkur en sjöunda umferð fór fram í dag. Stefán vann Oliver Aron Jóhannesson (2170) en Jón Viktor hafði sigur gegn Guðmundi Gíslasyni (2315). Sem fyrr var nokkuð um óvænt úrslit. Ungstirnið Vignir Vatnar Stefánsson (1959) gerði sér lítið fyrir og vann Daða Ómarsson (2256).

Annar ungur og efnilegur skákmaður, Jóhann Arnar Finnsson (1477) vann Hörð Garðarsson (1792) og Mikael Jóhann Karlsson (2077) lagði Omar Salama (2282) að velli. 

Mikael Jóhann er í 3.-5. sæti með 5,5 vinning ásamt þeim Degi Ragnarssyni (2059) og alþjóðlega meistaranum Björns Þorfinnssonar (2373) sem vann kollega sinn Dag Arngrímsson (2368).

Áttunda og næstsíða umferð fer fram á miðvikudaginn. Þá mætast meðal annars toppmennirnir Stefán-Jón Viktor, Dagur R-Mikael Jóhann, Björn-Oliver og Dagur A.-Vignir Vatnar.

• Heimasíða TR
• Chess-Results
• Myndaalbúm (GB)

Fimm efstir og jafnir á Skákþingi Akureyrar - Norðurorkumótinu

Önnur umferð Norðurorkumótsins - Skákþings Akureyrar fór fram í dag. Fimm skákmenn eru efstir og jafnir með fullt hús. Það eru Ólafur Kristjánsson (2118), Áskell Örn Kárason (2271), Jón Kristinn Þorgeirsson (2059), Símon Þórhallsson (1961) og Haraldur Haraldsson (1957).

Þriðja umferð fer fram á sunnudaginn og þá mætast meðal annars Haraldur-Áskell, Ólafur-Jón Kristinn og Hjörleifur Halldórsson-Símon..

• Heimasíða SA
• Chess-Results

Keppt um Friðriksbikarinn á afmælisdegi Friðriks Ólafssonar

Víkingaklúbburinn ætlar að minnast 80. ára afmælis Friðriks Ólafssonar í dag sunnudaginn 25. janúar kl 22.00 á Ölstofunni. Keppt verður um Friðriksbikarinn, í skák og Víkingaskák og verður mótið fram yfir miðnætti, en þá skála hinir miklu Víkingar í mjöð Friðrik til heiðurs, enda verður hann áttræður á miðnætti.

Öll þekkjum við afrek Friðriks yfir skákborðinu á síðustu öld, en færri vita að Friðrik er guðfaðir Víkingaskákarinnar á Íslandi, því hann kynnti sér leikinn, eins og lesa má í bæklingi sem höfundur Víkingaskákarinnar Magnús Ólafsson lét gefa út:

Friðrik Ólafsson stórmeistari hefur kynnt sér víkingaskák og gefið eftirfarandi umsögn:

"Það eru greinilegt, að þetta er miklu flóknara tafl en venjulegt tafl, vegna þess að það eru þrjár stefnur í borðinu í staðinn fyrir tvær. Svo eru fleiri menn og fleiri reitir.

Í venjulegri skák leikur hvítur fyrsta leiknum og byggir strax upp hótun, sem er svarað með vörn eða gagnhótun, en í víkingaskák komast liðin ekki í snertingu við hvort annað fyrr en eftir eina tíu leiki. Það tekur t.d. 4 leiki að hóta með biskup í byrjuninni í víkingaskák. Það þarf að leika fyrst tveim peðum fram og síðan biskupnum tvo leiki. manngangur víkingaskákarinnar er auðlæarður, en það tekur svolítinn tíma að átta sig á stefnum í borðinu.

Ég býst við að það verði að byggja upp skákfræði fyrir víkingaskákina frá grunni. Þó eru ýmsar meginreglur sem halda sér eins og t.d. að hafa sterkt miðborð, að koma mönnum fljótt og veikja ekki kóngsstöðuna, en aðferðin til þess að gera þetta verður allt öðruvísi í víkingaskák. http://viking-chess.blogspot.com/.../samantekit-islensku...

Magnus Carlsen sigurvegari í Sjávarvík

Tata Steel mótinu lauk í dag Sjávarvík (Wijk aan Zee). Magnus Carlsen (2862) gerði jafntefli í lokaumferðinni við Króatann Ivan Saric (2666) og það dugði til sigurs í mótinu þar sem heimamaðurinn Anish Giri (2784) sem var aðeins hálfum vinningi á eftir honum gerði jafntefli við Pólverjann Wojtaszek (2744). Vachier-Lagrave (2767), Ding Liren (2732) og Wesley So (2762) unnu allir í dag og náðu Giri þar með að vinningum.

Lokaröð efstu manna:

• 1. Magnus Carlsen (2862) 9 v.
• 2.-5. Maxime Vachier-Lagrave (2757), Anish Giri (2784), Wesley So (2762), Ding Liren (2732) 8½ v.
• 6. Vassily Ivanchuk (2715) 7½
• 7. Fabiano Caruana (2820) 7 v.

Kínverjinn Wei Yi (2675) sigraði í b-flokki en hann hlaut 10½. David Navara (2729) varð annar með 10 vinninga og Sam Shankland (2652) varð þriðji með 9 vinninga.

• Heimasíða mótsins
• Beinar útsendingar

Tómas Veigar sigurvegari Janúarmótsins - Vestrið með besta liðið

Nú er lokið því mikla og krefjandi verkefni að halda skákmót í fullri lengd fyrir keppendur frá gervöllu Norðurlandi.

Janúarmótinu lauk í dag með pompi og prakt þegar riðlarnir tveir mættust í keppni um endanleg sæti í mótinu, sem einnig var liðakeppni. 16 keppendur tókust í hendur og tefldu tvær kappskákir við liðsmann hins liðsins, raðað eftir nákvæmri röð sem hafði fengist eftir 7 kappskákir þar á undan.

Þeir villtu og trylltu, sem segjast vera að vestan og geta ekki annað, byrjuðu gríðarvel og unnu sínar viðureignir allar á borðum 4-8, sem sagt fimm vinningar fyrir Vestur en þrír fyrir Austur.

Áhugavert er að engri skák lauk með jafntefli í fyrri umferðinni, en Vestanmenn eru sérstakir áhugamenn um einmitt jafntefli – líklega hafa þeir þó samið yfir sig í mótinu sjálfu, enda gerðu þeir 10 jafntefli á meðan Austanmenn létu sér nægja að gera tvö.

Þá var komið að seinni umferðinni, sérstaklega vegna þess að hana mátti ekki tefla á undan þeirri fyrri – það hefði nú verið firra.

Helmingur keppenda varð að vinna til að jafna stöðuna og vonast til að gera betur í hraðskák, en væri jafnt eftir kappskákirnar skyldi tefla 2 hraðskákir og eina armageddon skák ef enn yrði jafnt.

Á efsta borðinu gerðu Hjörleifur og Tómas Veigar jafntefli og var þá ljóst að Tómas er sigurvegari mótsins – fékk 8 vinninga af 9 mögulegum í heildina og tapaði ekki skák.

Jakob Sævar, Ævar Ákason og Sam Rees áttu það sameiginlegt að hafa tapað fyrri skákinni en unnið þá seinni og þurfti því að tefla hraðskák til úrslita.

Fyrstir tefldu Ævar Ákason og Sigurbjörn Ásmundsson og lauk þeirri glímu með fullnaðarsigri Sigurbjörns.

Því næst tefldu Jakob Sævar og Sigurður G Daníelsson hraðskák til úrslita. Siggi er velþekktur refur í hraðskák og tókst að vinna báðar og tryggja sér þannig 3. sætið í heildarmótinu.

Að lokum var komið að Sam Rees og Jóni Aðalsteini að tefla hraðskák til úrslita. Viðureign þeirra var afar spennandi og fóru leikar þannig að þeir unnu hvor sína hraðskákina. Þurfti því að grípa til bráðabana eða armageddon skákar, en þar dugar svörtum jafntefli til að vinna viðureignina. Sam Rees stýrði svörtu mönnunum og komst í ágætt liðsaflaforskot, en ekki vildi betur til en að ólöglegur leikur birtist á borðinu og tapaði hann því skákinni. Jón stóð því uppi sem sigurvegari viðureignarinnar.

2. umferð lauk sem sagt 4 – 4, en það dugði Austanmönnum skammt, því Vestanmenn unnu fyrri umferðina 5 – 3. Villtu trylltu unnu því 9 – 7 þegar öllu hefur verið haldið til haga.

Lokastaða mótsins er því svofelld:

Hermann Aðalsteinsson bar hitann og þungann af mótshaldinu og honum til aðstoðar var Tómas Veigar. Keppendum er þökkuð þátttakan, sérstaklega þeim sem hliðruðu til fyrir ferðalöngum – og hinir líka

Til hamingju Vestanmenn! – Þangað til næst..

 

• Chess-Results
• Heimasíða mótsins
• Austurskákir
• Vesturskákir