Hraðkvöld hjá GM Helli í kvöld

Skákfélagið GM Hellir heldur hraðkvöld mánudaginn 10. febrúar nk. og hefst taflið kl. 20:00. Tefldar verða 7 umferðir með sjö mínútna umhugsunartíma. Teflt er í félagsheimili GM Hellis í Álfabakka 14a í Mjóddinni.

Sigurvegarinn á hraðkvöldinu fær í verðlaun máltíð fyrir einn á Saffran. Einnig verður dreginn út af handahófi annar keppandi sem einnig fær máltíð fyrir einn á Saffran. Þar eiga allir jafna möguleika, án tillits til árangurs á mótinu.

Þátttökugjöld eru kr. 300 fyrir félagsmenn (kr. 200 fyrir 15 ára og yngri) og kr. 500 fyrir aðra (kr. 300 fyrir 15 ára og yngri).

Jón Kristinn skákmeistari Akureyrar - sá yngsti í sögunni?

Sá fáheyrði atburður gerðist í dag að unglingur úr 9. bekk tryggði sér titilinn skákmeistari Akureyrar árið 2014! Það sem gerir þetta enn merkilegra er að enn er ólokið heilli umferð í mótinu! Þetta varð ljóst þegar fráfarandi skákmeistari Akureyrar og helsti keppinautur hins unga Jóns Kristins, Haraldur Haraldsson, féll á tíma með vonda stöðu gegn Sigurði Eiríkssyni sem leiddi mótið um tíma. Þegar þetta varð ljóst sömdu Jón og Jakob Sigurðsson um jafntefli.  Skömmu síðar gafst Logi Rúnar Jónsson upp fyrir Andra Frey eftir vel teflt endatafl hjá hinum síðarnefnda. Andri hefur nú unnið tvær skákir í röð með glæsilegum endataflstilþrifum. Í lokaskák dagsins vann Tómas Veigar Sigurðsson Hjörleif Halldórsson. Hjörleifur tefldi byrjunina ekki nógu nákvæmt með hvítu mönnunum og Tómas vann peð í 13. leik. Eftir það hallaði á Hjörleif og hann gafst upp í 44. leik. Skák Rúnars og Símonar var frestað til morguns.

Skákfréttaritara rekur ekki minni til að jafn ungur skákmaður hafi hampað þessum titli. Þar sem minni fréttaritara er óvenju slappt er lítið að marka það. 
Skákfélagið óskar skákmeistara Akureyrar til hamingju með árangurinn.

• Heimasíða SA
• Chess-Results

Hraðskákmót Reykjavíkur: Guðmundur sigraði - Róbert meistari

Það voru Fide meistarar sem hirtu tvö efstu sætin á Hraðskákmóti Reykjavíkur sem fór fram í dag í húsnæði Taflfélags Reykjavíkur. Guðmundur Gíslason stóð uppi sem siurvegari mótsins með 12 vinninga af 14 en fast á hæla hans fylgdi Róbert Lagerman með hálfum vinningi minna.  Guðmundur er hvorki í reykvísku skákfélagi né hefur lögheimili í Reykjavík og getur því ekki hlotið meistaratitilinn.  Róbert er því Hraðskákmeistari Reykjavíkur 2014.

Ungir og efnilegir skákmenn komu næstir í röðinni, þeirra fremstur Gauti Páll Jónsson en hann lauk keppni 10 vinninga sem dugðu í þriðja sætið.  Jöfn í mark með 9,5 vinning komu síðan Oliver Aron Jóhannesson, Elsa María Kristínardóttir og Vignir Vatnar Stefánsson. Jóhanna Björg Jóhannsdóttir varð sjöunda með 9 vinninga.  Sannarlega góð framganga hjá þessum hópi sem skaut margri kempunni ref fyrir rass.

Tefldar voru tvisvar sinnum sjö umferðir og voru þátttakendur 29 talsins.  Ásamt verðlaunaafhendingu fyrir hraðskákmótið voru einnig veitt verðlaun fyrir nýafstaðið Skákþing Reykjavíkur þar sem Jón Viktor Gunnarsson og Einar Hjalti Jensson sigruðu en Jón Viktor hlaut titilinn Skákmeistari Reykjavíkur 2014.

Lokastaða:

1	Guðmundur Gíslason,	12,0
2	Róbert Lagerman,	11,5
3	Gauti Páll Jónsson,	10,0
4.-6.	Oliver Aron Jóhannesson,	9,5
	Elsa María Kristínardóttir,	9,5
	Vignir Vatnar Stefánsson,	9,5
7	Jóhanna Björg Jóhannsdóttir,	9,0
8.-10.	Þorvarður F.Ólafsson,	8,5
	Helgi Brynjarsson,	8,5
	Guðmundur Gunnlaugsson,	8,5
11	Eiríkur K.Björnsson,	8,0
12.-13.	Hjálmar Sigurvaldason,	7,5
	Hörður Jónasson,	7,5
14.-15.	Friðgeir Hólm,	7,0
	Kristján Hallberg,	7,0
16.-18.	Jón Þór Helgason,	6,5
	Jón E.Hallsson,	6,5
	Björn Hólm Birkisson,	6,5
19.-20.	Gunnar Randversson,	6,0
	Sigurður F.Jónatansson,	6,0
21.-24.	Þorsteinn Magnússon,	5,5
	Guðmundur Agnar Bragason,	5,5
	Brynjar Bjarkason,	5,5
	Jónsson, Helgi Svanberg	5,5
25.-27.	Bárður Örn Birkisson,	5,0
	Jónsson, Þorsteinn Emil	5,0
	Bragi Þór Thoroddsen,	5,0
28.-29.	Björgvin Kristbergsson,	4,0
	Pétur Jóhannesson,	4,0

Skákþáttur Morgunblaðsins: Fyrsta mót heimsmeistarans Magnúsar Carlsen

Nýbakaður heimsmeistari, Magnús Carlsen, er aftur sestur að tafli eftir að hafa baðað sig í sviðsljósinu um stund sem eðlilegt hlýtur að teljast; hann sparkaði af stað leik hjá uppáhaldsliði í spænsku deildinni, Real Madrid, heimsótti höfuðstöðvar Google í Kísildalnum og tefldi fjöltefli við toppana þar, var heiðraður í bak og fyrir í Noregi og sitthvað fleira hefur verið á dagskrá hjá norsku þjóðhetjunni.

En nú er hann aftur sestur að tafli í Zürich í Sviss, borg sem státar af ýmsum frægum mótum, t.d. hinu ofmetna áskorendamóti sem fram fór árið 1953. Kostnaðarmaður er rússneskur auðkýfingur, Oleg Skvortsov. Keppendur auk Magnúsar eru Lev Aronjan, sem sigraði með yfirburðum á Wijk aan Zee mótinu á dögunum, Anand fyrrverandi heimsmeistari, Nakamura, Caruana og Gelfand. Meðalstigatala keppenda er 2801 elo og í stigum telst þetta sterkasta skákmót allra tíma.

Á miðvikudaginn var töfluröðin ákveðin með hraðskákmóti, aðferð sem fyrst var notuð á Reykjavik rapid 2004 og hefur notið vaxandi vinsælda síðustu misserin. Skákmennirnir munu tefla eina umferð kappskáka og síðan aðra umferð atskák. Í hraðskákinni á fimmtudaginn varð Magnús efstur ásamt Aronjan; þeir hlutu 3 vinninga af 5 mögulegum.

Í 1. umferð kappskákanna á fimmtudaginn vann Magnús öruggan sigur yfir Gelfand og Aronjan vann Anand.

Mörgum lék forvitni á að vita hvernig Magnús reiddi af í viðureignum sínum við gamla heimsmeistarann Anand. Ekki verður betur séð en að Norðmaðurinn hafi áfram sterkt tak á Indverjanum. Hraðskákirnar hafa þann kost að skemmtileg afbrigði sjá oftar dagsins ljós m.a. vegna þess að mönnum gefst ekki kostur á því að rýna djúpt í stöðurnar. Taflmennska Magnúsar minnti á laufléttan stíl Paul Murphy sem hefði þó áreiðalega ekki sleppt því að leika riddaranum strax til e8.

Magnús Carlsen - Wisvanathan Anand

Vængtafl

1. Rf3 d5 2. b3 c5 3. e4!?

Magnús velur létt og leikandi afbrigði. Vitaskuld getur Anand hafnað áskoruninni og reynt að loka taflinu með 3. ... d4 en hann vill sjá hvað hvítur hefur fram að færa peði undir.

3. ... dxe4 4. Rg5 Rf6 5. Rc3 Rc6 6. Bc4 e6 7. Bb2 Be7 8. O-O O-O 9. Rcxe4 Rxe4 10. Rxe4 e5 11. f4 exf4 12. Dh5 Rd4 13. Hxf4 g6 14. De5!

Magnaður reitur fyrir drottninguna. Þaðan verður hún ekki hrakin í burtu og þessi staða er unnin á hvítt!

14. ... b6 15. Haf1 Bf5 16. g4 Be6 17. Bxe6 fxe6 18. Hxf8 Bxf8 19. Rf6 Kh8

20. c3

Frá fagurfræðilegum sjónarhól séð var 20. Re8+ fallegri leikur; svartur er óverjandi mát: 20. ... Kg8 21. Dh8+! Kxh8 22. Hxf8 mát.

20. ... Rc6

21. Re8+!

- og Anand gafst upp þar sem mátið blasir við.

Barátta Jóns Viktors og Einars Hjalta á Skákþingi Reykjavíkur

Fyrir lokaumferð Skákþings Reykjavíkur sem fram fer í dag stendur baráttan um efsta sætið milli Jóns Viktors Gunnarssonar og Einars Hjalta Jenssonar. Þeir eru með 7 vinninga af átta mögulegum. Í 3. - 7. sæti koma svo Davíð Kjartansson, Þorvarður Ólafsson, Lenka Ptacnikova, Jón Trausti Harðarson og Oliver Aron Jóhannesson, öll með með 6 vinninga. Af þessum hefur hinn ungi Jón Trausti Harðarson komið mest a óvart með stigahækkun uppá 34 stig.

Helgi Ólafsson [e-mail]

----------------------------------------------

Skákþættir Morgunblaðsins eru birtir á Skák.is viku síðar en í sjálfu Morgunblaðinu.  

Grein þessi birtist í Sunnudagsmogganum, 2. febrúar 2014

Skákþættir Morgunblaðsins

[Event "Zurich Chess Challenge (Blitz)"] [Site "Zurich SUI"] [Date "2014.01.29"] [EventDate "2014.01.29"] [Round "4.2"] [Result "1-0"] [White "Magnus Carlsen"] [Black "Viswanathan Anand"] [ECO "A01"] [WhiteElo "2872"] [BlackElo "2773"] [PlyCount "41"] 1. Nf3 d5 2. b3 c5 3. e4 dxe4 4. Ng5 Nf6 5. Nc3 Nc6 6. Bc4 e6 7. Bb2 Be7 8. O-O O-O 9. Ncxe4 Nxe4 10. Nxe4 e5 11. f4 exf4 12. Qh5 Nd4 13. Rxf4 g6 14. Qe5 b6 15. Raf1 Bf5 16. g4 Be6 17. Bxe6 fxe6 18. Rxf8+ Bxf8 19. Nf6+ Kh8 20. c3 Nc6 21. Ne8+ 1-0

Bragi og Stefán efstir á Nóa Síríus mótinu

Alþjóðlegi meistarinn Bragi Þorfinnsson (2454) og stórmeistarinn Stefán Kristjánsson (2491) eru efstir með 4½ vinning að lokinni fimmtu umferð Nóa Síríus mótsins - Gestamóts GM Hellis og Breiðabliks sem fram fór sl. fimmtudagskvöld. Stefán vann Björn Þorfinnsson (2387) en Bragi gerði jafntefli við Dag Arngrímsson (2381) sem er einn í þriðja sæti með 4 vinninga. Tólf skákmenn hafa 3½ vinning. Allt getur því gerst í lokaumferðunum!

Meðal óvæntra úrslita má nefna að Björgvin S. Guðmundsson (1914) heldur áfram að gera frábæra hluti og gerði nú jafntefli við Elvar Guðmundsson (2322). Hrafn Loftsson (2192) gerði jafntefli við stórmeistarann Þröst Þórhallsson (2445). Dagur Ragnarsson hafði betur gegn Benedikt Jónassyni (2256).

Halldór Brynjar Halldórsson (2233) vann "uppgjörið um Akureyri" með sigri á Stefán Bergssyni (2122).

Næsta umferð

Sjötta umferð fer fram á fimmtudagskvöldið. Þá mætast meðal annars: Stefán - Bragi,  Karl Þorsteins - Dagur, Jón Viktor - Sigurður Daði, Björn - Guðmundur G., Lenka - Magnús Örn, Halldór Brynjar - Björgvin J., Björgvin G. - Davíð og Kristján E - Þröstur Þ.

 

• Heimasíða GM Hellis
• Chess-Results
• Myndaalbúm (GB, SB og HGE)
  

Hraðskákmót Reykjavíkur fer fram í dag

Hraðskákmót Reykjavíkur verður haldið í félagsheimili Taflfélags Reykjavíkur að Faxafeni 12 sunnudaginn 9. febrúar kl. 14.

Tefldar verða 2x7 umferðir eftir Sviss Perfect kerfi. Umhugsunartími verður 5 mínútur á skák.

Þátttökugjald er kr 500 fyrir 16 ára og eldri en frítt fyrir 15 ára og yngri.

Þrenn verðlaun í boði. 

Eftir Hraðskákmótið fer fram verðlaunaafhending fyrir Skákþing Reykjavíkur 2014.

Núverandi hraðskákmeistari er Oliver Aron Jóhannesson.

Góð frammistaða Veroniku í Gíbraltar - Cheparinov sigurvegari mótsins

Veronika Steinunn Magnúsdóttir (1561) stóð sig geysivel á Gíbraltar-mótinu sem lauk sl. fimmtudag. Í tíundu og síðustu umferð gerði hún jafntefli við Nýsjálendingin Alistair Compton (2105). Veronika hlaut 4 vinninga. Faðir hennar Magnús Kristinsson (1741) tapaði hins vegar sinni skák og endaði með 3 vinninga.

Frammistaða hennar samsvaraði 2010 skákstigum og hækkar hún um 42 stig fyrir hana. Frammistaða Magnúsar samsvaraði 1789 skákstigum og hækkar hann um 1 stig.  

Úrslit í skákum feðgina má nálgast á Chess-Results. 

Þrír keppendur urðu efstir og jafnir á sjálfu mótinu. Ivanchuk (2739), Vitiugov (2737) og Cheparinov (2672). Samkvæmt venju er þar teflt til úrslita. En fyrirkomulagið er sérstakt og margir telja það ósanngjarnt. Dregið var um hver þremenningana kæmust í úrslit. Það var Cheparinvov. Svo tefldu Ivanchuk og Vitiugov um hvor mætti Búlgaranum í úrslitum. Þar hafði Vitiugov betur en tapaði svo fyrir óþreyttum Cheparinov í úrslitum. Margir telja að sanngjarnara hefði verið ef Ivanchuk hefði komist beint í úrslit - í ljósi þess að hann var hæstur á Buchols-stigum.

• Heimasíða mótsins
• Chess Results

Rimaskólakrakkar fjölmennastir og sigursælastir á Miðgarðsmótinu í skák 2014

Miðgarður, þjónustumiðstöð Grafarvogs og Kjalarness stóð í 9. sinn fyrir Miðgarðsmótinu sem er skákmót grunnskólasveita í hverfinu. Mótið fór fram í íþróttahúsi Rimaskóla og mættu 10 skáksveitir til leiks. Landsbankinn, útibúið Vínlandsleið, gaf 150.000 krónur til verðlauna á mótinu. Skólarnir fengu verðlaunin til kaupa á skákbúnaði sem alþjóðlegi skákmeistarinn Björn Þorfinnsson selur hér á landi.

Allir skólarnir sem tóku þátt í mótinu fengu 25.000 kr í viðurkenningu til kaupa á skákbúnaði fyrir þátttöku á mótinu en annað verðlaunafé skiptis eftir frammistöðu hvers skóla. Skákstjóri að þessu sinni var Gunnar Björnsson forseti Skáksambands Íslands og kom það í hans hlut einnig að afhenda hin glæsilegu verðlaun Landsbankans að móti loknu.

Rúmlega 60 grunnskólanemendur á öllum aldri tóku þátt í skákmótinu og voru skólunum sínum til mikils sóma með góðri frammistöðu og framkomu. Tefldar voru sex umferðir og í lokin stóð A sveit Rimaskóla uppi sem sigurvegari með 31,5 vinning af 36 mögulegum. Rimaskóli sem er mikill afreksskóli í skák hefur alltaf unnið Miðgarðsmótið frá upphafi.

A sveit Kelduskóla varð í 2. sæti með 28 vinninga en þessar tvær sterku skáksveitir urðu í 1. og 3. sæti á fjölmennu jólaskákmóti ÍTR og TR í desember sl. B sveit Rimaskóla hlaut 3. sætið og D sveit skólans varð nokkuð óvænt í 4. sæti Miðgarðsmótsins.

Skákakademía Reykjavíkur er með kennslu í öllum þeim skólum sem tóku þátt í Miðgarðsmótinu og er árangur þess starfs greinilega að skila sér. Miðgarður bauð upp á veitingar í skákhléi og fáni Landsbankans var dreginn að hún á meðan að á mótinu stóð.

Eins og áður sagði reyndust Rimaskólakrakkarnir skrefinu á undan öðrum skólum og unnu skáksveitir þeirra alls 62.500 kr til kaupa á skákbúnaði. Kelduskóli kom næstur en í hlut skólans komu 37.500 kr til kaupa á skákvörum. Hera Hallbera Björnsdóttir frá Miðgarði hefur umsjón með undirbúningi mótsins og hefur gert það frá upphafi. Þrjár efstu skáksveitirnar hlutu verðlaunapeninga og sigursveit Rimaskóla fékk afhenta eignar-og farandbikar.

Lokastaðan á Chess-Results

Myndaalbúm (Baldvin Örn Berndsen)

Gallerý Skák - Júlíus vann en Gunnar með aðra höndina á Friðrikskóngnum

Þriðja mótið í Kappteflinu um skákkóng Friðriks Ólafssonar fór fram í gærkvöldi að viðstöddu fjölmenni, 22 þátttakendum frá 8 ára til áttræðs og nokkrum áhorfendum.

Segja má að hinn aldni meistari Gunnar Kr. Gunnarsson (81) sé búinn að tryggja sér sigurinn þó eitt mót sé eftir í mótaröðinni því 3 bestu mót hvers keppanda telja til vinnings. Gunnar er kominn með 28 stig og enginn getur náð honum úr þessu, þó endanleg stigatala liggi ekki fyrir fyrr en að viku liðinni.  "Gunnar" hefur ávallt unnið í þessari keppni, Gunnar Skarphéðinsson í fyrsta sinn og Gunnar I. Birgisson í fyrra. Spurning hvort þetta sé ekki að verða mál fyrir Samkeppniseftirlitið :)  

Mikla athygli vakti þátttaka og atgangur hins unga og upprennandi skáksnillings Óskars Víkings Davíðssonar 8 ára en sá stutti hann gerði sér lítið fyrir og skellti Elsu Maríu, Jon Olav, Sigurði E; Kristni Bj. og tók svo bakarameistarann Jón Víglundsson í bakaríið líka. Feikilega mikið efni þarna á ferð sem gaman verður að fylgjast með í framtíðinni. Sannur skákvíkingur sem "gefur hvorki grið né frið, en geysist fram og heggur" eða þaðan af meira.

Heildarúrslit má sjá á meðf. mótstöflu og einstök úr á skortöflu ef vel er að gáð.

Lokamótið fer svo fram að viku liðinni.

 

 

Hraðskákmót Reykjavíkur á sunnudaginn

Hraðskákmót Reykjavíkur verður haldið í félagsheimili Taflfélags Reykjavíkur að Faxafeni 12 sunnudaginn 9. febrúar kl. 14.

Tefldar verða 2x7 umferðir eftir Sviss Perfect kerfi. Umhugsunartími verður 5 mínútur á skák.

Þátttökugjald er kr 500 fyrir 16 ára og eldri en frítt fyrir 15 ára og yngri.

Þrenn verðlaun í boði. 

Eftir Hraðskákmótið fer fram verðlaunaafhending fyrir Skákþing Reykjavíkur 2014.

Núverandi hraðskákmeistari er Oliver Aron Jóhannesson.