Gallerý Skák - Gunnar Björnsson vann grjótið

Kappteflinu um Patagóníusteininn lauk nýlega með verðskulduðum sigri hins kunna skákforkólfs Gunnars Björnssonar, sem uppskar 38 stig af 40 mögulegum og var vel að sigrinum kominn. Ritstjórinn hefur því góða afsökun fyrir því að birta mynd af sjálfum sér hér á fréttasíðunni að þessu sinni. 

X  

Eftir að hafa unnið 3 mót í röð með afar sannfærandi hætti og hlotið 30 vinninga af 33 mögulegum varð forsetinn þó að sætta sig við þriðja sætið í lokamótinu eftir að hafa lotið í gras fyrir Guðfinni, Páli og Tóta Tönn. Þeir tveir síðarnefndu eru gamlir meistaraflokksmenn frá því fyrir rúmri hálfri öld sem gengið hafa í endurnýjun lífdaganna í skákinni. Páll kominn yfir áttrætt og Þórarinn að nálgast þann virðulega aldur, mesti aflakóngur landsins á stöng og þó víðar væri leitað.  Hann sést hér á myndinni etja kappi við Jon Olav Fivelstad, nojarann glaðbeitta, en Páll og aðrir keppendur fylgjast spenntir með baráttu þeirra á borðinu.

  X

Þetta dugði Gunnari hinum grjótharða til sigurs þar sem Stefán Bergsson, útbreiðslustjóri, var fjarri góðu gamni sem hefði getað sett smá strik í reikninginn hefði hann verið i stuði. Mótsstjórinn afhenti síðan sigurvegaranum Patagóníusteininn í hendur sem hann fékk að handleika smá stund meðan klappað var fyrir honum og hann hneigði sig djúpt. Þetta er farandgripur sem þrír efstu menn fá nafn sitt greypt á gullnu letri og fer á Skáksögusafnið í fyllingu tímans - en þeir ekki.

X

Lokaúrslitin í þessari 6 kvölda Grand Prix mótaröð urðu eins og sést á meðf. mynd af fimm efstu mönnum sem þar eru nafngreindir ásamt skoruðum stigum sínum.  Alls hlutu 18 keppendur stig í mótunum sex en fjögur bestu töldu til stiga og vinnings. 

X

Skákkvöldin í Gallerýinu á fimmtudagskvöldum hafa verið nokkuð vel sótt af ástríðuskákmönnum á öllum aldri það sem af er vetri. Tvo mót er eftir  fyrir Jól og annan fimmtudag verður aðeins meira um dýrðir en venjulega  þegar sérstakt JólaKapp&Happ-mót verður haldið. Þá verður væntanlega kátt í skákhöllinni í Faxafeni ef að líkum lætur. Munið að mæta kl. 18 réttstundis.

Myndaablúm (ESE)

Björgvin efstur í ellefta sinn

Það var nú frekar afslappað andrúmsloft á þessum tólfta skákdegi haustsins hjá skákfélaginu Æsir í dag.

Auðvitað var barist til síðasta manns í mörgum viðureignum, en það fór allt fram innan velsæmismarka  og það komu ekki upp nein alvarleg ágreinings efni í orrustunum 140 sem háðar voru í dag.

Menn verða ekkert kátir þegar þeir leika ólöglegum leik og tapa þar með skákinni,kannski eftir örfáa leiki.

Það er ekki við neinn að sakast nema sína eigin fljótfærni.

Björgvin Víglundsson tefldi af sínu venjulega öruggi eins og venjulega og uppskar 9 vinninga af 10,

Það voru samt tveir kappar sem náðu jafntefli við hann,það voru þeir Jón Þorleifur Jónsson og Þorsteinn Þorsteinsson.

Friðgeir Hólm náði öðru sætinu með 8 ½ vinning, svo kom Guðfinnur R Kjartansson í þriðja sæti með 8 vinninga. 

Sjá nánari úrslit í töflu og myndir frá ESE

 

Kramnik vann Giri - eru efstir og jafnir

Heimsmeistarinn fyrrverandi, Vladimir Kramnik (2760), vann Anish Giri (2776) í sjöundu umferð opna ofurmótsins í Katar í dag. Þar með stöðvaði hann siguröngu Hollendings sem hafði unnið allar sínar sex skákir. Þeir eru efstir og jafnir. Úsbekinn Saleh Salem(2586) og Kínverjinn Yu Yangvi (2705) eru í 3.-4. sæti með hálfum vinningi minna.

Áttundua og næstsíðasta umferð fer fram á morgun. Þá mætast Giri - Yangvi og Salem - Kramnik.

Röð efstu manna:

Alls taka 92 stórmeistarar þátt í mótinu og hafa 14 þeirra meira en 2700 skákstig.

• Heimasíða mótsins
• Chess-Results
• Beinar útsendingar (skákirnar)
• Beinar útsendingar (lýsendur)

 

Guðlaug skákmeistari Garðabæjar

Gauðlaug Þorsteinsdóttir (2006) kom sú og sigraði á Skákþingi Garðabæjar sem lauk í gær. Segja má að Guðlaug hafi komið að hlið en hún tapaði í fyrstu umferð en hlaut svo 5½ vinning í lokaumferðunum sex. Í síðustu umferð vann hún Agnar Tómas Möller (1657). 

Bárður Örn Birkisson (1636) og Páll Sigurðsson (1919) urðu í 2.-3. sæti með 5 vinninga. Frábær árangur hjá Bárði sem hækkar um 117 stig fyrir frammistöðu sína! Páll byrjaði rólega eins og Guðlaug. Tapaði tveimur fyrstu skákunum en vann þær fimm síðustu! Fórnarlambið í lokaumferðin var Jóhann Helgi Sigurðsson (2013).

Vert er að benda einnig á árangur Agnars Tómasar Möller sem endaði í 4.-6. sæti og hækkar um 101 fyrir frammistöðuna. 

Lokastöðuna í a-flokki má finna á Chess-Results.

B-flokkur

Þorsteinn Magnússon (1241) sigraði í b-flokki en hann hlaut 6 vinninga í sjö skákum. Góður árangur hjá Þorsteini en var aðeins sjötti í stigaröð keppenda. Þorsteinn hækkar um 85 stig fyrir frammistöðuna.

Guðmundur Agnar Bragason (1352) og Róbert Luu (1315) urðu í 2.-3. sæti með 5½ vinning.

Lokastöðuna í b-flokki má nálgast á Chess-Results.

Hraðskákmót Garðabæjar fer fram nk. mánudagskvöld. 

• Heimasíða TG
• Chess-Results

Riddarinn - Kappteflið um Skákseglið

Hinni árlegu mótaröð um Skákseglið lauk í síðustu viku með sigri Friðgeirs K. Hólm, hins brúnaþunga en samt brosmilda skáköðlings.    

Hin vikulegu skákmót á vegum Riddarans eru að jafnaði mjög vel sótt, sumpart af sömu skággeggjurunum og tefla í hinum skákklúbb eldri borgara, sem Æsir heitir.  Munurinn er sá að þar syðra tefla menn allt árið um kring og slá ekkert af yfir sumarið, enda oftast rigning hvort sem er eða sem betra er að komast í forsælu undan sólarhitanum. Því miður stefnir í að mótin verði aðeins 50 á þessu ári því aðfangadag og gamlársdag ber upp á miðvikudag að þessu sinni.   

Sextán garpar sátu þar að tafli í síðustu viku við Suðurgötuna í Gaflarabæ og eltu  grátt silfur saman. Allt var þetta þó í góðu en baráttan stóð um það hver myndi verða efstur að stigum í kappteflinu um Skákseglið, minningargrip um Grím Ársælsson, sem nú var keppt um í 6. sinn. Friðgeir og Jón Þ. Þór stóðu best að vígi að þrem mótum loknum en í fjarveru þess síðarnefnda í dag átti Friðgeir með tvo mót unnin og 20 stig á hendi besta möguleika.

Þannig fór það líka að Guðfinnur R. Kjartansson, sigurvegari sl. árs og Friðgeir urðu efstir og jafnir og það dugði hinum síðarnefnda til sigurs. Hann hlaut alls 28 stig, Guðfinnur 21 og Sigurður E. Kristjánsson og Jón Þ. Þór 18 (2. mót). Þrjú bestu mót hvers keppanda töldu til stiga og vinnings. Sigurvegarinn fær nafn sitt skráð silfruðu letri á hinn fagra farandgrip sem fer á Skáksögusafnið í fyllingu tímans.

Teflt verður grimmt í Vonarhöfn næstu 3 miðvikudaga en Jólamót Riddarans verður háð og haldið 17. desember.  Öll mót hefjast kl. 13 og tefldar eru 10. mínútna hvatskákir, 11. umferðir.  Allir skákþyrstir skákgarpar 60+ velkomnir til tafls og skrafs milli skáka.

 

Hraðskákmót Garðabæjar fer fram nk. mánudagskvöld

Hraðskákmót Garðabæjar verður haldið mánudaginn 8. desember 2014. Mótsstaður: Garðatorg 1. (gamla Betrunarhúsið). 2. hæð. Inngangur til hægri við verslunina Víði. 

Umhugsunartími er 5 mínútur á mann og er teflt í einum flokki. Reikna má með að mótið verði búið um kl. 22. 

1. verðlaun í Hraðskákmóti Garðabæjar eru 15.000 kr. auk verðlaunagrips. Medalíur fyrir 2. og 3. sæti. Efsti TG-ingur hlýtur 5.000 kr. Verðlaunafé skiptist eftir Hort kerfi.

Frítt er í hraðskákmótið fyrir þátttakendur skákþingsins og félagsmenn TG en aðrir gestir borga 1.000 kr.

Hraðskákmeistari 2013 var Hjörvar Steinn Grétarsson

Eftir hraðskákmótið er verðlaunahending fyrir bæði Hraðskákmótið auk Skákþings Garðabæjar. 

Mótið verður reiknað til alþjóðlegra hraðskákstiga.

Skráning fer fram á Skák.is (guli kassinn). Upplýsingar um þegar skráða keppendur má finna hér.

Rimaskóli og Laugalækjarskóli sigruðu á Jólamóti TR og SFS

 

 

Glæsilegu og vel sóttu Jólamóti TR og SFS lauk í gærkvöld í húsakynnum Taflfélags Reykjavíkur.

Í úrslitakeppni yngri flokks sigraði sveit Rimaskóla og fékk hún 10,5 vinning. Í 2.sæti varð Ölduselsskóli með 8,5 vinning. Fossvogsskóli endaði í 3.sæti með 4 vinninga.

 

Í eldri flokki sigraði Laugalækjarskóli með 18,5 vinning en Árbæjarskóli kom í humátt á eftir með 18 vinninga. Rimaskóli endaði í 3.sæti með 17 vinninga. Hjá stúlkunum var það sveit Rimaskóla sem reyndist hlutskörpust með 10 vinninga. Sveit Breiðholtsskóla kom skammt á eftir með 8,5 vinning.

Mótinu verða gerð ítarlegri skil í máli og myndum á næstu dögum.

Yngri flokkur

1. Rimaskóli 10,5v

2. Ölduselsskóli 8,5

3. Fossvogsskóli 4

4. Háteigsskóli 1

Eldri flokkur

1. Laugalækjarskóli A 18,5v

2. Árbæjarskóli A 18

3. Rimaskóli A 17

4. Hólabrekkuskóli 15

5. Laugalækjarskóli B 14,5

6. Árbæjarskóli B 12,5

7. Rimaskóli st. 10

8. Breiðholtsskóli st 8,5

9. Breiðholtsskóli A 5

Skákþáttur Morgunblaðsins: Magnús vann lokaskákina og heldur heimsmeistaratitlinum næstu tvö árin

Skákþáttur Morgunblaðsins frá 24. nóvember sl.

---------------------------------------------

Taugar hans stóðust álagið betur,“ sagði Wisvanathan Anand eftir að elleftu skák heimsmeistaraeinvígisins í Sochi lauk með sigri Magnúsar Carlsen í 45 leikjum sem þar með hafði hlotið 6½ vinning gegn 4½ og þarf því ekki að tefla 12. skák einvígisins. Þrátt fyrir ósigurinn í gær var Anand afar vel undir þessa skák búinn en í 27. leik lét hann skiptamun af hendi og reyndist það afar misráðin ákvörðun þó að á yfirborðinu liti fórnin vel út. Á því augnabliki skákarinnar höfðu áhangendur Magnúsar miklar áhyggjur af stöðu hans en hann greip tækifærið sem Anand rétti honum og tefldi framhaldið óaðfinnanlega og knúði fram sigur með hárnákvæmum leikjum. Hann getur nú andað léttar því að alþjóðaskáksambandið FIDE gerir ráð fyrir að næsta heimsmeistaraeinvígi fari fram eftir tvö ár. Hverfandi líkur eru taldar á því að Anand verði næsti áskorandi hans en Indverjinn svaraði þó spurningum fréttamanna eftir skákina í gær á þá leið að hann væri alls ekki hættur. Athyglin beinist nú að Ítalanum Fabiano Caruano sem fyrir nokkrum vikum vann öflugt skákmót í Saint Louis í Bandaríkjunum með fáheyrðum yfirburðum.

Í samanburði við sum önnur heimsmeistaraeinvígi telst þetta einvígi í besta falli miðlungi gott, kannski vegna þess hversu stutt það er. Það er einfaldlega söguleg staðreynd að þau heimsmeistaraeinvígi sem samanstóðu af 24 skákum að undangengnu skipulögðu ferli svæðamóta, millisvæðamóta og áskorendaeinvígja heppnuðust yfirleitt afar vel. Keppendur gátu tekið meiri áhættu í skákum sínum og svo dæmi sé tekið þá var einvígi Fischers og Spasskís í Reykjavík 1972 sneisafullt af nýjum hugmyndum og afar flóknum stöðum svo ekki sé minnst á óvænta atburði utan skákborðsins. Magnús og Anand virtust hins vegar á stundum vera fastir í viðjum kerfisbundinna byrjana sem gáfu hugmyndafluginu ekki mikið pláss.

Engum dylst að Magnús er verðugur heimsmeistari þótt hann hafi ekki náð sínu besta fram í einvíginu í Sochi. Og miklar breytingar hafa orðið á högum hans frá því hann kom hingað til Íslands í fyrsta sinn fyrir röskum tíu árum. Þá var hann tiltölulega lítt þekktur í heimalandi sínu en skákir sem hann tefldi við Anatolí Karpov og Garrí Kasparov á Reykjavík rapid-mótinu í mars 2004 breyttu því. Nú er hann þjóðhetja í Noregi og skákir hans eru í beinni útsendingu í sjónvarpi og á netmiðlum. Um það leyti ákváðu foreldrar hans að leggja niður störf, selja bæði hús og bíl og fjölskyldan ferðaðist síðan víða um lönd til að styðja Magnús á framabraut skákarinnar. Hann þótti lengi vel feiminn og óframfærinn og var af sumum talinn einhverfur en sá orðrómur var úr lausu lofti gripinn. Skákhæfni hans byggist á mögnuðu innsæi, bestu leikirnir virðast „koma til hans“ alveg áreynslulaust og lok elleftu skákarinnar í gær eru gott dæmi um það:

11. einvígisskák:

Magnús Carlsen – Wisvanathan Anand

Spænskur leikur

1. e4 e5 2. Rf3 Rc6 3. Bb5 Rf6 4. 0-0 Rxe4 5. d4 Rd6 6. Bxc6 dxc6 7. dxe5 Rf5 8. Dxd8+ Kxd8 9. h3 Bd7 10. Rc3 h6 11. b3 Kc8 12. Bb2 c5 13. Had1 b6 14. Hfe1 Be6 15. Rd5

Magnús eftir lét Anand að tefla Berlínarvörnina í þriðja sinn í einvíginu. Sú leið að leika riddaranum til d5 virðist ógnandi en veldur svarti engum sérstökum erfiðleikum.

15.... g5 16. c4 Kb7 17. Kh2 a5 18. a4 Re7 19. g4 Rg6 20. Kg3 Be7 21. Rd2 Hhd8 22. Re4 Bf8 23. Ref6 b5!

Magnaður leikur sem almennt var talinn uppfinning „tölvuheila“. Magnus vék sér undan því að taka þeirri áskorun sem í leiknum fólst, t.d. 24. axb5 a4! með sterkri gagnsókn.

24. Bc3 bxa4 25. bxa4 Kc6 26. Kf3 Hdb8

Undirbýr að fórna skiptamun. Svartur gat tryggt sér góða stöðu með 26.... Be7 eða 26.... Bg7.

27. Ke4

27.... Hb4?

Tapleikurinn. Magnús var greinilega undir þessa fórn búinn. Betra var 27.... b3 og staðan er í jafnvægi.

28. Bxb4 cxb4 29. Rh5 Kb7 30. f4 gxf4 31. Rhxf4 Rxf4 32. Rxf4!

Mun sterkara en 32. Kxf4 c6! 33. Re3 Kb6 og svartur má vel við una.

32.... Bxc4 33. Hd7!

Eftir þetta verður stöðu svarts ekki bjargað.

33.... Ha6 34. Rd5 Hc6 35. Hxf7 Bc5 36. Hxc7+! Hxc7 37. Rxc7 Kc6.

(Ekki gekk 37.... Kxc7 vegna 39. Hc1! t.d. 39.... b3 40. Hxc4 b3 41. Hxc5+ ásamt 42. Hb5 og vinnur b-peðið.

38. Rb5! Bxb5 39. axb5 Kxb5 40. e6 b3 41. Kd3 Be7 42. h4 a4 43. g5 hxg5 44. hxg5 a3 45. Kc3

– og þetta var síðasti leikur heimsmeistaraeinvígisins. Svörtu peðin komast ekki lengra og Anand gafst upp.

Helgi Ólafsson [e-mail]

Skákþættir Morgunblaðsins eru birtir á Skák.is viku síðar en í sjálfu Morgunblaðinu.  

Grein þessi birtist í Morgunblaðinu 24. nóvember 2014

Skákþættir Morgunblaðsins

Anish Giri með fullt hús eftir sex umferðir í Katar!

Hollenski ofurstórmeistarinn Anish Giri (2776) er mikinn á opnu móti sem nú er í gangi í Katar. Hann vann sína sjöttu skák í röð þegar hann lagði Svíann Nils Grandelius 2573) að velli. Vladimir Kramnik (2760) er kominn á beinu brautina eftir rólega byrjun og er annar með 5 vinninga. Giri og Kramnik mætast í sjöundu umferð á morgun. Vinnur Hollendingurinn ungi sína sjöundu skák í röð?

Röð efstu manna:

Alls taka 92 stórmeistarar þátt í mótinu og hafa 14 þeirra meira en 2700 skákstig.

• Heimasíða mótsins
• Chess-Results
• Beinar útsendingar (skákirnar)
• Beinar útsendingar (lýsendur)

 

Frábær skemmtun á Jólaskákmóti TR og SFS

Hátt í 200 börn settust til tafls í húsakynnum Taflfélags Reykjavíkur í gær er teflt var í yngri flokki Jólaskákmóts TR og SFS. Óhætt er að segja að vel hafi tekist til, bæði við framkvæmd mótsins en ekki síður á taflborðunum sjálfum þar sem hart var tekist á í drengilegri keppni. Mótið var tvískipt og hóf Suður riðill keppni kl.10:30 en Norður riðill hófst klukkan 14:00. 

Í Suður riðli -opnum flokki- vann Ölduselsskóli með miklum yfirburðum enda einkar vel skipuð skáksveit með reynslumikla skákmeistara á hverju borði. Sveitin hlaut hvorki fleiri né færri en 23 vinninga í 24 skákum! Keppnin um annað sætið og þar með sæti í úrslitum var æsispennandi. Fyrir síðustu umferð hafði Háteigsskóli 1,5 vinnings forskot á Norðlingaskóla en sveitirnar mættust einmitt í síðustu umferðinni. Að loknum þremur skákum leiddi Norðlingaskóli 2-1 og þurfti því sigur í síðustu skákinni til að tryggja sér annað sætið. Eftir mikinn barning fór þó svo að skákin endaði með jafntefli og þar með tryggði Háteigsskóli sér annað sætið þrátt fyrir að tapa viðureigninni 1,5-2,5. Háteigsskóli hlaut 16 vinninga en Norðlingaskóli varð í þriðja sæti með 15,5 vinning. 

Í Norður riðli -opnum flokki- vann Rimaskóli með sömu yfirburðum og Ölduselsskóli fyrr um daginn. Hin feikisterka skáksveit Rimaskóla hlaut 23 vinninga í 24 skákum!

 

Fossvogsskóli endaði í öðru sæti með 19 vinninga. Það má með sanni segja að þessar tvær sveitir hafi verið í nokkrum sérflokki. Ingunnarskóli endaði í 3.sæti með 16,5 vinning. 

Í stúlknaflokki voru tvær sveitir efstar og jafnar með 13 vinninga; Melaskóli og Breiðholtsskóli. Því þurfti að grípa til stigaútreiknings til að fá fram sigurvegara og þá kom í ljós að skáksveit Melaskóla hafði hlotið efsta sætið en Breiðholtsskóli varð í 2.sæti. Í 3.sæti varð stúlknasveit Rimaskóla en hún hlaut 12,5 vinning. Skammt þar á eftir kom Ingunnarskóli með 11 vinninga. 

Í dag, mánudag, verður teflt til úrslita í opnum flokki yngri flokks. Þar mætast Rimaskóli, Ölduselsskóli, Fossvogsskóli og Háteigsskóli. Rimaskóli sigraði á mótinu í fyrra og á því titil að verja. Taflið hefst klukkan 17 og eru áhorfendur hjartanlega velkomnir að líta við og fylgjast með framtíðarstjörnum skáklistarinnar að störfum við skákborðið. 

 

Á sama tíma og teflt er til úrslita í yngri flokki verður teflt í eldri flokki Jólaskákmóts TR og SFS. Þar verður án efa hart barist enda margar sterkar skáksveitir skráðar til leiks. Rimaskóli á titil að verja í opnum flokki, en stúlknaflokkinn í fyrra sigraði Breiðholtsskóli. Taflið hefst klukkan 17 og eru áhorfendur hjartanlega velkomnir. 

Nánari fréttir munu birtast um mótið að því loknu. Taflfélag Reykjavíkur vill koma á framfæri þakklæti til allra þeirra fjölmörgu liðsstjóra, foreldra og skákbarna sem lögðu sitt á vogarskálarnar til að gera þennan vindasama sunnudag að þeirri glæsilegu skákveislu sem hann svo sannarlega var.