Góð byrjun Hannesar og Guðmundar

Hannes Hlífar Stefánsson (2564) og Guðmundur Kjartansson (2451) hafa fullt hús að loknum fjórum umferðum á alþjóðlegu móti sem nú er í gangi í El Salvador. Í fjórðu umferð vann Guðmundur hinn sterka venesúelska stórmeistara Eduardo Iturrizaga (2654). Á morgun eru tefldar tvær umferðir. Í þeirri fyrri mætast þeir félagarnir frá Íslandi.

131 skákmaður frá 12 löndum taka þátt í mótinu. Þar af eru sex stórmeistarar og níu alþjóðlegir meistarar. Hannes er nr. 3 í stigaröð keppenda en Guðmundur eru nr. 7.

• Heimasíða mótsins
• Chess-Results

Fjölmennasta Jólaskákmót TR og SFS frá upphafi!

Árlegt Jólaskákmót Taflfélags Reykjavíkur og Skóla- og frístundasviðs Reykjavíkur var haldið dagana 1.-2.desember síðastliðinn. Líkt og síðustu ár var mótið afar vel sótt, bæði af ungum skákmönnum sem og gestum. Alls tefldu 50 skáksveitir á mótinu sem er metþátttaka, en í fyrra var einnig sett þátttökumet þegar 44 skáksveitir öttu kappi.

Mótið í fyrra heppnaðist frábærlega sem hefur vafalítið átt þátt í því hve margar skáksveitir tóku þátt að þessu sinni, en ekki má heldur gleyma því að skákstarf í skólum og taflfélögum borgarinnar er með blómlegasta móti þessi misserin. Áætlað er að hátt í 300 manns hafi heimsótt Taflfélag Reykjavíkur þá tvo daga sem mótið stóð yfir. Yngri flokkur reið á vaðið á sunnudeginum en þeir eldri settust við skákborðin daginn eftir.

Yngri flokkur – opinn flokkur

Yngstu skákmennirnir tefldu í tveimur riðlum; Norður riðli og Suður riðli. Það fyrirkomulag var tekið upp í fyrra enda stækkar mótið ár frá ári.  Þessi tvískipting yngri flokks hefur gefist vel og gengu mótin afar vel þrátt fyrir þennan mikla fjölda keppenda.

 

Suður riðill hófst klukkan 10:30 og voru margar sterkar skáksveitir skráðar til leiks. Í opnum flokki fór þar fremst a-sveit Ölduselsskóla sem mætti til leiks grá fyrir járnum með reynslumikla og sterka skákpilta á öllum borðum. Bjuggust flestir við að Ölduselsskóli myndi vinna riðilinn og tryggja sér annað af tveimur sætum í úrslitakeppni yngri flokks sem fyrirhuguð var daginn eftir. Það fór enda svo að Ölduselsskóli sigraði með miklum yfirburðum og fékk hvorki fleiri né færri en 23 vinninga í 24 skákum. Frábær árangur hjá þessari vösku sveit sem á svo sannarlega framtíðina fyrir sér, enda liðsmenn enn ungir að árum og munu tefla í yngri flokki næstu árin.

Baráttan um 2.sætið var æsispennandi og er þá vægt til orða tekið. Fyrir síðustu umferð hafði a-sveit Háteigsskóla 1,5 vinnings forskot á a-sveit Norðlingaskóla, en svo skemmtilega vildi til að sveitirnar mættust í síðustu umferðinni. Norðlingaskóli þurfti að vinna þá viðureign 3-1 til að tryggja sér 2.sætið og næla sér í sæti í úrslitakeppninni. Að loknum þremur skákum leiddi Norðlingaskóli 2-1 og stóð auk þess til vinnings í síðustu skákinni. Eftir mikinn barning reyndust þó lukkudísirnar á bandi Háteigsskóla þegar liðsmaður Norðlingaskóla varð fyrir því óláni að patta andstæðing sinn þegar stutt var í mátið. Þar með lauk viðureigninni með sigri Norðlingaskóla 2,5-1,5, en það dugði Háteigsskóla hins vegar til að halda 2.sætinu. Háteigsskóli endaði með 16 vinninga en Norðlingaskóli varð í 3.sæti með 15,5 vinning. Þess má til gamans geta að það var einmitt Norðlingaskóli sem kom í veg fyrir að Ölduselsskóli sigraði með fullu húsi.

Norður riðill hófst klukkan 14:00 og voru nokkuð fleiri sveitir skráðar til leiks þar samanborið við Suður riðil. Á meðal sterkra skáksveita í Norður riðli var a-sveit Rimaskóla sem átti titil að verja en auk hennar var a-sveit Fossvogsskóla vel skipuð og til alls líkleg. Þessar tvær sveitir voru í nokkrum sérflokki og tryggðu þær sér báðar sæti í úrslitakeppninni. Sveit Rimaskóla varð hlutskörpust með hvorki fleiri né færri en 23 vinninga í 24 skákum. Munaði þar mestu um glæsilegan sigur sveitarinnar í 3.umferð gegn helstu keppinautum sínum í Fossvogsskóla, 4-0.

Það voru einmitt þessir 4 vinningar sem skyldu liðin að. Fossvogsskóli endaði í 2.sæti með 19 vinninga og a-sveit Ingunnarskóla nældi sér í 3.sæti með 16,5 vinning.

Úrslitakeppni yngri flokks

Það skein mikil eftirvænting úr augum þeirra 16 keppnismanna sem tefldu fyrir hönd sinna skóla í úrslitakeppni yngri flokks. Spennustigið var hátt en einbeitingin góð. Fyrirfram mátti búast við harðri baráttu Rimaskóla og Ölduselsskóla um sigurinn í mótinu. Líklegt var að innbyrðis viðureign þeirra myndi fara langt með að ráða úrslitum í mótinu. Eftir að dregið hafði verið um töfluröð var ljóst að Rimaskóli og Ölduselsskóli áttu að mætast í 1.umferð. Viðureignin stóð svo sannarlega undir væntingum og var alls ekki fyrir hjartveika. Eftir mikla baráttu og sviptingar hafði Rimaskóli sigur í viðureigninni 2,5-1,5.

Hin reynslumikla sveit Rimaskóla steig ekki feilspor eftir það og vann bæði Fossvogsskóla og Háteigsskóla 4-0. Rimaskóli stóð því uppi sem verðugur sigurvegari í yngri flokki og varði því titil sinn frá því í fyrra. Sveitin var leidd áfram af hinni reynslumiklu skákdrottningu Nansý Davíðsdóttur sem sýndi styrk sinn í úrslitakeppninni, einkum og sér í lagi þegar stöðurnar voru tvísýnar og lítið eftir á klukkunni. Strákarnir höfðu ekki roð við henni í þeim aðstæðum. Sveit Ölduselsskóla hafnaði í 2.sæti eftir örugga sigra á Fossvogsskóla og Háteigsskóla. Fossvogsskóli nældi í 3.sætið með sigri á Háteigsskóla 3-1.

Yngri flokkur - Stúlkur

Í stúlknaflokki voru tvær sveitir efstar og jafnar með 13 vinninga; Melaskóli og Breiðholtsskóli. Því þurfti að grípa til stigaútreiknings til að fá fram sigurvegara og þá kom í ljós að skáksveit Melaskóla hafði hlotið efsta sætið en Breiðholtsskóli varð í 2.sæti. Í 3.sæti varð stúlknasveit Rimaskóla en hún hlaut 12,5 vinning. Skammt þar á eftir kom Ingunnarskóli með 11 vinninga.

Eldri flokkur – opinn flokkur

Í eldri flokki skráðu sig til leiks níu skáksveitir frá fimm skólum. Keppni í opnum flokki reyndist æsispennandi, en fyrirfram var búist við miklu af sveitum Rimaskóla, Laugalækjarskóla og Árbæjarskóla. Þessar þrjár sveitir fylgdust að í toppbaráttunni nánast allt mótið og voru innbyrðis viðureignir þeirra oftar en ekki æsispennandi. Í seinni hluta mótsins varð sveit Rimaskóla þó fyrir nokkrum skakkaföllum er tveir liðsmenn þurftu frá að hverfa, og tefldi sveitin meðal annars á þremur mönnum undir lokin. Það varð til þess að sveitin dróst eilítið aftur úr forystusauðunum og endaði að lokum í 3.sæti með 17 vinninga. Árbæjarskóli og Laugalækjarskóli mættust í næstsíðustu umferð í spennuþrunginni viðureign þar sem Laugalækjarskóli hafði sigur 3-1. Sá sigur reyndist piltunum í Laugalækjarskóla einkar mikilvægur því þeir náðu 1,5 vinnings forskoti fyrir síðustu umferð. Árbæjarskóli var þó ekki af baki dottinn og vann góðan 4-0 sigur í síðustu umferð.

Laugalækjarskóli hélt þó velli og vann sína viðureign 3-1. Laugalækjarskóli stóð því uppi sem sigurvegari í eldri flokki með 18,5 vinning, en Árbæjarskóli kom í humátt á eftir með 18 vinninga. Rimaskóli varð sem fyrr segir í 3.sæti með 17 vinninga.

Eldri flokkur – Stúlkur

Í stúlknaflokki voru tvær sveitir skráðar til leiks; Breiðholtsskóli og Rimaskóli. Sveit Rimaskóla reyndist sterkari er upp var staðið og hlaut sveitin 10 vinninga. Fráfarandi jólameistarar Beiðholtsskóla nældu sér í 8,5 vinning.

Taflfélag Reykjavíkur vill koma á framfæri þökkum til þeirra fjölmörgu barna og unglinga sem lögðu leið sína í húsakynni félagsins og gerðu Jólamót TR og SFS að þeirri frábæru skákveislu sem raunin varð. Vöskum liðsstjórum skáksveitanna 50 sem og foreldrum og öðrum gestum eru jafnframt færðar miklar og góðar þakkir fyrir samveruna.  Sérstakar þakkir fær Skóla og frístundasvið Reykjavíkurborgar fyrir frábært samstarf, sem og Skákakademía Reykjavíkur sem annast kennslu í fjölmörgum skólum borgarinnar.

Við hlökkum til að sjá ykkur öll aftur að ári, og vonandi fleiri til!

Nánari úrslit í riðlunum tveimur í yngri flokk, sem og úrslit í yngri og eldri flokk má sjá hér að neðan.

 

 

 

 

 

Skákþáttur Morgunblaðsins: Davíð Kjartansson sigraði á Haustmóti TR

Haustmót Taflfélags Reykjkavíkur hefur löngum verið eitt af best skipuðu reglulegu mótum hérlendis og er þá átt við mót með fullum umhugsunartíma en minna framboð er af slíkum mótum nú en oft áður. Gamla góða kappskákin stendur alltaf fyrir sínu og vonandi heldur TR áfram að halda haustmótið og Skákþing Reykjavíkur með hefðbundnum hætti. Haustmóti TR lauk ekki alls fyrir löngu með öruggum sigri Davíð Kjartanssonarsem hlaut 7 vinninga af níu mögulegum í vel skipuðum A-flokki mótsins. Þar sem Davíð er ekki félagsmaður í TR gengur sæmdarheitið „Skákmeistari TR 2014“ til Þorvarðar Ólafssonar sem varð í 2. – 3. sæti ásamt Þorsteini Þorsteinssyni, gömlum TR-ingi sem undanfarið hefur teflt fyrir Taflfélag Vestmannaeyja. Þeir hlutu báðir 6 vinninga af níu mögulegum.

Í B-flokki sigraði Spánverjinn Damia Benet Menet með 7 vinninga af níu mögulegum og í C-riðli var Bárður Örn Birkisson hlutskarpastur með 8 vinninga af níu mögulegum. Í D-riðli gerði Ólafur Evert Úlfsson sér lítið fyrir og vann allar skákir sínar níu talsins og varð langefstur.

Davíð Kjartansson hefur lengi verið í fremstu röð íslenskra skákmanna. Hann vann Skákþing Reykjavíkur 2009 fyrir ofan Henrik Danielssen og aftur þetta sama mót 2013 og hefur vart tölu á sigrum sínum á haustmóti TR eða á meistaramóti Hellis þar sem hann var lengstum félagi. Hann varð tvisvar Norðurlandameistari unglinga í sínum aldursflokki og Íslandsmeistari skáksveita með Víkingasveitinni og Helli. Þá hefur Davíð getið sér gott orð sem skákkennari en starfar nú sem hótelstjóri á ION luxury Adventury hotel að Nesjavöllum. Hann hefur býsna frumlega skákstíl og er ekki mikið fyrir að fara troðnar slóðir.

Um helstu keppinautar hans þá Þorvarð Ólafsson og Þorstein Þorsteinsson er það segja áttu báðir gott mót en þó var sigur Davíðs einhvern veginn aldrei í hættu. Í einni að lokaumferðunum mætti hann reynsluboltanum Sævari Bjarnasyni og hafði betur:

Haustmóti TR 2014; 7. umferð:

Sævar Bjarnason – Davíð Kjartansson

Kóngsindversk vörn

1. d4 d6 2. e4 Rf6 3. f3 g6 4. c4 Bg7 5. Rc3 O-O 6. Be3 a5!?

Frekar óvenjulegur leikur, svartur byggir taflið oftar upp með 6. .. a6, – Hb8 o.s.frv.

7. Dd2 Rc6 8. Rge2 e5 9. d5 Rb4 10. Rc1 Rd7 11. a3 Ra6 12. b4 f5 13. Bd3 Rf6 14. exf5?!

Ekkert lá á þessum uppskiptun. Eftir 14. Rb3, sem hótar 15. b5, á hvítur góða stöðu.

14. ... gxf5 15. Hb1 axb4 16. axb4 e4!

Setur af stað hrinu snarpra peðsleikja sem tryggja frumkvæði svarts.

17. Be2 exf3 18. gxf3 f4!19. Bf2 Bf5 20. Hb3 Rd7 21. Rb5 Re5 22. Rd4 Bd7 23. Re6?

Ótímabær innrás riddarans. Hvítur gat leikið 23. O-O en hefr sennilega óttast 23. ... Bh3 sem má svara með 24. Kh1 Bxf1 25. Bxf1 og þó hvítur sé skiptamun undir er staðan býsna vænleg, öflugur riddari á leið til e6.

23. ... Bxe6 24. dxe6 De7 25. O-O Kh8 26. Kh1 Dxe6 27. Dc2 Rb8 28. De4 c6 29. Bd3 Dh3 30. Bd4 Rbd7 31. De2 Hae8 32. Hg1 Rf6 33. Bb1 Rh5 34. Bf2 Bf6

Bætir sífellt við sóknarmáttinn kóngsmegin.

35. Dc2 Hf7 36. Hg2 Hg8 37. Hxg8 Kxg8 38. De2 Hg7 39. Be1

Þessi biskup reynir að fremsta megni að verja kógsstyðuna en með næsta leik sínum ryður svartur honum úr vegi.

39. ... Bh4! 40. Hb2 Bxe1

- og Sævar gafst upp enda staðan hrunin.

Helgi Ólafsson [e-mail]

Skákþættir Morgunblaðsins eru birtir á Skák.is viku síðar en í sjálfu Morgunblaðinu.  

Grein þessi birtist í Morgunblaðinu 29. nóvember 2014

Skákþættir Morgunblaðsins

Jólapakkamót Hugins fer fram 20. desember

Jólapakkaskákmót Hugins (áður Jólapakkaskákmót Hellis) verður haldið laugardaginn 20. desember nk. í Ráðhúsi Reykjavíkur. Mótið hefst kl. 13 og er ókeypis á mótið. Mótið er fyrir börn og unglinga og fer nú fram í 17. skipti en það var fyrst haldið fyrir jólin 1996. Síðan hefur það verið haldið nánast á hverju ári og hefur alltaf verið eitt fjölmennasta skákmót ársins.

Keppt verður í allt að 6 flokkum: Flokki fæddra 1999-2001, flokki fæddra 2002-2003, flokki fæddra 2004-2005, flokki fæddra 2006-2007 og flokki fæddra 2008 síðar og peðaskák fyrir þau yngstu. Tefldar verða 5 umferðir með 10 mínútna umhugsunartíma á mann. Jólapakkar eru í verðlaun fyrir 3 efstu sætin í hverjum aldursflokki fyrir sig fyrir bæði drengi og stúlkur. Auk þess verður happdrætti um 3 jólapakka í hverjum aldursflokki fyrir sig. Skráning á mótið fer fram á Skák.is (guli kassinn) og á Skákhuganum.

 

Jólaskákmót í Vin á mánudaginn!

Jólaskákmót verður haldið í Vin, Hverfisgötu 47, mánudaginn 8. desember kl. 13. Tefldar verða sex umferðir með 7 mínútna umhugsunartíma, og eru allir hjartanlega velkomnir.

 

Vin er athvarf Rauða krossins fyrir fólk með geðraskanir og þar hefur skáklífið blómstrað síðan 2003, en þá komu liðsmenn Hróksins fyrst í heimsókn. Í kjölfarið var Vinaskákfélagið stofnað, sem stendur fyrir reglulegum æfingum og skákviðburðum, auk þess að tefla fram sveitum á Íslandsmóti skákfélaga.

 

Á jólaskákmótinu verða fjölmargir vinningar og verðlaun, sem Sögur útgáfa og 12 tónar leggja til. Að auki verður efnt til happdrættis svo allir eiga möguleika á glaðningi. Að mótinu standa Hrókurinn og Vinaskákfélagið, og er þátttaka ókeypis.

Opið fyrir skráningu í Friðriksmót Landsbankans - Íslandsmótið í hraðskák

Búið er að opna fyrir skráningu í Friðriksmót Landsbankans - Íslandsmótið í hraðskák, sem fram fer laugardaginn 13. desember í útibúi Landsbankans í Austurstræti.

Skákmenn eru hvattir til að skrá sig sem fyrst enda takmarkast þátttaka við um u.þ.b. 80 manns. Gildir þar lögmálið, fyrstir koma, fyrstir fá, en þó njóta stórmeistarar og alþjóðlegir meistarar forgangs varðandi þátttöku.

Frekar upplýsingar um mótið má nálgast hér.

Upplýsingar um þegar skráða keppendur má nálgast hér.

 

 

Yu Yangyi vann í Katar

Kínverski stórmeistarinn Yu Yangyi (2705) kom sá og sigraði á ofurmótinu í Katar sem lauk í dag. Yu vann Kramnik (2760) í lokaumferðinni en heimsmeistarinn fyrrverandi hafði unnið sex skákir í röð fyrir umferð dagsins. Kínverjinn ungi, sem var meðal keppenda á N1 Reykjavíkurskákmótinu 2013, hlaut 7,5 vinning. Kramnik varð í 2.-3. sæti með 7 vinninga ásamt Anish Giri (2776).

Lokaröð efstu manna

Alls taka 92 stórmeistarar þátt í mótinu og hafa 14 þeirra meira en 2700 skákstig.

• Heimasíða mótsins
• Chess-Results
• Beinar útsendingar (skákirnar)
• Beinar útsendingar (lýsendur)

 

Magnús Pálmi og Þorvarður Fannar efstir fyrir lokaumferð Vetrarmóts öðlinga

Magnús Pálmi Örnólfsson og Þorvarður Fannar Ólafsson eru efstir og jafnir með 5 vinninga að loknum sex umferðum á Vetarmóti öðlinga. Í sjöttu og næstsíðustu umferðinni sem fór fram í gærkveldi vann Magnús Siguringa Sigurjónsson en Þorvarður lagði Sverri Örn Björnsson. Hvorki fleiri né færri en sex keppendur koma næstir með 4 vinninga.

Staða efstu manna:

Það er ljóst að baráttan á lokasprettinum verður æsispennandi en lokaumferðin fer fram næstkomandi miðvikudagskvöld og hefst hún kl. 19.30. Þá mætast m.a. Þorvarður og Kristján Halldórsson, Magnús og Vignir Bjarnason, John Ontiveros og Sverrir sem og Guðmundur Aronsson og Magnús Magnússon.

Áhorfendur eru velkomnir en ávallt er heitt á könnunni.

• Heimasíða TR
• Chess-Results

Friðriksmót Landsbankans - Íslandsmótið í hraðskák fer fram 13. desember

Friðriksmót Landsbankans - Íslandsmótið í hraðskák - fer fram í útibúi Landsbankans við Austurstræti 11 laugardaginn 13. desember nk. Mótið hefst kl. 13 og stendur til kl. 16.30.

Gera má ráð fyrir að flestir sterkustu skákmenn landsins taki þátt og efsti keppandi mótsins fær titilinn Íslandsmeistari í hraðskák. Tímamörkin eru 5+2 og tefldar eru ellefu umferðir.

Skráning fer fram á Skák.is (guli kassinn efst) og hefst á morgun 5. desember nk. Skákmenn eru hvattir til að skrá sig sem fyrst enda takmarkast þátttaka við um u.þ.b. 80 manns. Gildir þar lögmálið, fyrstir koma, fyrstir fá, en þó njóta stórmeistarar og alþjóðlegir meistarar forgangs varðandi þátttöku.

Þetta er ellefta árið í röð sem Landsbankinn og Skáksamband Íslands standa fyrir Friðriksmótinu í skák, en mótið er haldið til heiðurs Friðriki Ólafssyni, fyrsta stórmeistara Íslendinga. Margir af sterkustu stórmeisturum landsins hafa undanfarin ár teflt til heiðurs Friðriki.

Verðlaun fyrir efstu sæti eru eftirfarandi

1. 100.000 kr.
2.  60.000 kr.
3.  50.000 kr.
4.  30.000 kr.
5.  20.000 kr.

Séu tveir eða fleiri jafnir í efsta sætinu verður stigaútreikningur látinn ráða Íslandsmeistaratitlinum. Verðlaunafé skiptist eftir Hort-kerfinu.

Aukaverðlaun

• Efsti maður með 2001-2200 skákstig 10.000 kr.
• Efsti maður með 2000 stig og minna: 10.000 kr.
• Efsta konan: 10.000 kr.
• Efsti strákur 16 ára og yngri (1998 eða síðar): 10.000 kr.
• Efsta stúlka 16 ára og yngri (1998 eða síðar): 10.000 kr.
• Efsti eldri skákamaður (1954 eða fyrr): 10.000 kr.
• Útdreginn heppinn keppandi: 10.000 kr.

Aukaverðlaun eru miðað við alþjóðleg skákstig 1. desember sl.(íslensk skákstig hafi keppendur ekki alþjóðleg stig). Stigaútreikningur ræður séu menn jafnir og efstir.
Hver keppandi getur aðeins unnin ein aukaverðlaun og eru aukaverðlaunin valin í þeirri röð sem fram kemur að ofan.

Mótið er reiknað til alþjóðlegra hraðskákstiga. 

Fyrri sigurvegarar

• 2013 – Helgi Ólafsson
• 2012 - Bragi Þorfinnsson, Hjörvar Steinn Grétarsson og Jón Viktor Gunnarsson
• 2011 - Henrik Danielsen
• 2010 - Jón Viktor Gunnarsson og Þröstur Þórhallsson
• 2009 - Héðinn Steingrímsson
• 2008 - Helgi Ólafsson
• 2007 - Héðinn Steingrímsson
• 2006 - Helgi Áss Grétarsson
• 2005 - Jón Viktor Gunnarsson og Arnar E. Gunnarsson
• 2004 - Jóhann Hjartarson og Stefán Kristjánsson

Jólamót Víkingaklúbbsins

Jólamót Víkingaklúbbsins fyrir börn og unglinga verður haldið í Víkinni Víkingsheimilinu miðvikudaginn 10. desember. Í A og B flokki verða telfdar 6. umferðir með 7 mínútna umhugsunartíma á mann, en í C flokki verða telfdar 4. umferðir með 7. mínútur á mann.  Mótið hefst mótið kl. 17.00. Allir krakkar eru velkomnir og þátttaka er ókeypis. Skákstjóri verður hinn reynslumikli Stefán Bergsson. 

Keppt verður þrem aldursflokkum á mótinu.  

A flokkur keppendur fæddir 1999-2004 (5-10 bekkur).
B flokkur keppendur fæddir 2005-2007 (2-4 bekkur).
C flokkur keppendur fæddir 2008 og yngri, PEÐASKÁK (1. bekkur).  Þeir keppendur sem fæddir 2008 og yngri sem vilja taka þátt í B flokki geta það að sjálfsögðu.

Skráning fer fram á Skák.is (guli kassinn)

Einnig verða sérstök stúlknaverðlaun auk þess sem veitt verða fjöldi aukaverðlauna. Barna og unglingaæfingar voru vikulega í vetur, en næsta æfing eftir jólafríð verður miðvikudaginn 14. janúar og verða æfingar vikulega fram á vor. 
Skráning á mótið fer m.a fram á netfangið:  vikingaklubburinn(hjá)gmail.com

Í fyrra sigraði Vignir Vatnar Stefánsson eldri flokk, en Óskar Víkingur Davðsson sigraði í yngri flokki

Úrslit jólamótsins 2013 hér:

Heimilisfang hér: 

Knattspyrnufélagið Víkingur

Traðarlandi 1, 108 Reykjavík