Skák.is

Bloggfærslur mánaðarins, janúar 2014

19.1.2014 | 20:00

Skákþáttur Morgunblaðsins: Metþátttaka á mótum í Reykjavík og Kópavogi

Skákárið 2014 byrjar vel hér á landi hvað þátttöku varðar. Á 83. Skákþingi Reykjavíkur sem Björn Jónsson, formaður Taflfélags Reykjavíkur, setti sl. sunnudag eru keppendur 75 talsins og er það mesta þátttaka í 15 ár. Tefldar verða níu umferðir og er teflt þrisvar í viku. Fyrstu umferðirnar hafa að mestu farið eftir bókinni en meðal þeirra sem hlotið hafa 2 vinninga eru Jón Viktor Gunnarsson, Sigurbjörn Björnsson, Einar Hjalti Jensson, Davíð Kjartansson, Lenka Ptacnikova og ungu ljónin Dagur Ragnarsson og Oliver Aron Jóhannesson.

Væntanlega fara línur að skýrast í næstu umferðum. Myndarlega er að málum staðið hvað varðar skrár tefldra skáka en þær hafa verið birtar degi eftir að umferð lýkur.

Teflt vikulega á Nóa Síríus-mótinu

Jón Þorvaldsson og félagar í GM Helli halda enn og aftur hið vinsæla vetrarmót sitt og er það að þessu sinni gert í samvinnu við Skákdeild Breiðabiks og aðalstyrktaraðilann, Nóa Síríus. Jón Þorvaldsson sem er aðalskipuleggjandi þessa móts komst að þeirri niðurstöðu að fjölmargir öflugir skákmenn geta hugsað sér að tefla eina kappskák á viku en eiga erfiðara með fleiri umferðir. Tefld verður ein umferð á viku og næstu sex fimmtudaga fer fram geysiöflugt mót í Stúkunni á Kópavogsvelli. Meðal tæplega 70 þátttakenda eru nokkrir sem einnig taka þátt í Skákþingi Reykjavíkur en stigahæstu keppendurnir eru Stefán Kristjánsson, Karl Þorsteins, Þröstur Þórhallsson, Bragi Þorfinnsson og Jón Viktor Gunnarsson. Þá eru þarna skákmenn sem lítið hafa teflt undanfarið og er þátttaka þeirra árangur af yfirlýstri stefnu GM Hellis að laða slíka skákmenn aftur til keppni. Kvennalandsliðið í skák er þarna líka og einnig margir af yngstu og efnilegustu skákmönnum þjóðarinnar. Full ástæða er til að óska þeim Birni Jónssyni, formanni TR, og Jóni Þorvaldssyni frá GM Helli til hamingju með þessi tvö glæsilegu skákmót.

Karpov ekki dauður úr öllum æðum

Þessa helgi hefst í Wijk aan Zee í Hollandi eitt vinsælasta og sterkasta mót ársins. Nýbakaður heimsmeistari Magnús Carlsen er ekki meðal þátttakenda og keppendur í A-flokknum verða 12 talsins. Annar bær í Hollandi, Groningen, getur líka státað af merkri skákhefð og um jólin var þar haldin mikil skákhátíð þar sem meðfram ýmsum öðrum viðburðum fór fram fjögurra skáka einvígi Anatolí Karpovs og Jan Timmans. Þessir tveir hafa auðvitað marga hildi háð á löngum tíma og eins og oftast áður hafði Karpov betur og vann 2 ½ : 1 ½ . Tilþrifin voru gamalkunn eins og lokaskák einvígisins ber með sér; Karpov eygði smá veikleika á c6-reitnum og eftir að hann var lentur þar þjarmaði hann að andstæðingi sínum eftir öllum kúnstarinnar reglum:

Anatolí Karpov - Jan Timman

Drottnigarindversk vörn

1. d4 Rf6 2. c4 e6 3. Rf3 b6 4. g3 Ba6 5. b3 b5 6. cxb5 Bxb5 7. Bg2 Bb4 8. Bd2 a5 9. a3 Bxd2 10. Dxd2 Bc6 11. O-O Dc8 12. Dc2 Db7 13. Rbd2 O-O 14. Hfc1 Ha7 15. Ha2 Bd5 16. Hb2 d6 17. Re1 Bxg2 18. Rxg2 Rbd7

19. Dc6 Hb8 20. Hbc2 h6 21. Dxc7 Da6 22. Dc4 Dxc4 23. Hxc4 Rb6 24. Hc6 Re8 25. e4 Kf8 26. Re3 Ke7 27. d5 Kd7 28. dxe6+ fxe6 29. e5 d5 30. H6c5 Kd8 31. f4 Rd7 32. Hc6 Rc7 33. a4 Hb6 34. Hxb6 Rxb6 35. Hc6 Rd7 36. Rf3 Rb8 37. Rd4 Kd7 38. Hb6 Rba6 39. f5 Rc5 40. fxe6+ R5xe6 41. Hd6+

- og svartur gafst upp.

Helgi Ólafsson helol@simnet.is

----------------------------------------------

Skákþættir Morgunblaðsins eru birtir á Skák.is viku síðar en í sjálfu Morgunblaðinu.

Grein þessi birtist í Sunnudagsmogganum, 12. janúar 2014.

Skákþættir Morgunblaðsins

Spil og leikir | Breytt 20.1.2014 kl. 09:58 | Slóð | Facebook | Athugasemdir (0)

19.1.2014 | 07:00

Stelpudagur í Skákskólanum í dag

Skákskóli Íslands býður allar skákstelpur velkomnar á sérstakan stelpudag sunnudaginn 19. janúar næstkomandi, klukkan 11:00. Framundan eru stelpunámskeið í skák sem verða kynnt ásamt því að kvennalandsliðið lítur í heimsókn og teflir við stelpurnar.

Skráning fer fram hér fyrir laugardag. Skákskólinn er staðsettur að Faxafeni 12, gengið inn á vesturhlið hússins.

Íslenska kvennalandsliðið hefur teflt víða um heiminn síðustu árin. Stelpurnar munu mæta á stelpudaginn í Skákskólanum og tefla við ungar og efnilegar skákstelpur. Á myndina vantar sjálfan Íslandsmeistarann hana Lenku sem mun koma að stelpunámskeiðunum. Frá vinstri: Hallgerður Helga Þorsteinsdóttir, Elsa María Kristínardóttir, Tinna Kristín Finnbogadóttir og Jóhanna Björg Jóhannsdóttir.

Spil og leikir | Breytt s.d. kl. 03:20 | Slóð | Facebook | Athugasemdir (1)

17.1.2014 | 17:59

Mörg óvænt úrslit í 2. umferð Nóa Síríus mótsins

Baráttuandi, fingurbrjótar og snilldartilþrif settu svip sinn á 2. umferð Nóa Síríus mótsins sem fór fram í gær í hinum aðlaðandi vistarverum á Kópavogsvelli. Keppendur skerptu einbeitinguna og leikgleðina með ljúfmeti frá Nóa Síríusi og óvænt úrslit létu ekki á sér standa. Þannig sigraði Þröstur Árnason (2267) alþjóðlega meistarann Karl Þorsteins (2452), hinn glaðbeitti formaður Skákdeildar Breiðabliks, Halldór Grétar Einarsson (2190), knésetti Sigurð Daða Sigfússon (2328) og Dagur Ragnarsson (2073) gerði sér lítið fyrir og lagði Davíð R. Ólafsson (2316) eftir miklar kúvendingar. Síðast en ekki síst vakti athygli að hinn bráðefnilegi Kristófer Ómarsson (1756) náði að leggja kappann unga Nökkva Sverrisson (2081) að velli.

Sigurður P. Steindórsson (2240) og Þröstur Þórhallsson, stórmeistari, (2445) skildu jafnir og stórmeistari kvenna, Lenka Ptácníková (2245), hélt upp á afmæli sitt með skiptum hlut við aljóðlega meisarann Jón Viktor Gunnarsson (2412). Fleiri konur voru í essinu sínu þetta kvöld því að þrefaldur Norðurlandameistari kvenna, Guðlaug Þorsteinsdóttir (2052), sigraði Hafnfirðinginn geðþekka FM Benedikt Jónasson (2256) og háskólastúdínan Hallgerður Þorsteinsdóttir (1955) sneri á söngvarann og sjentilmanninn Sæberg Sigurðsson (2153).

Birkir Karl Sigurðsson (1742), hélt jöfnu við Hrannar Arnarson (2111) og prófessor Snorri Þór Sigurðsson (1808) beitti vísindalegri sundurgreiningu til að halda skiptum hlut gegn Sverri Erni Björnssyni (2010). Vignir Vatnar Stefánsson (1800) tók hraustlega á móti Magnúsi Pálma Örnólfssyni (2161) og skildu þeir jafnir. Kristján Halldórsson (1811) mætti grjótharður til leiks og gerði jafnt við Arnald Loftsson (2107). Sama varð uppi á teningnum í skák Páls Andrasonar (1767) og Olivers Arons Jóhannessonar (2105) og í viðureign Andra Steins Hilmarssonar (1631) við víkingakappann hrikalega Gunnar Frey Rúnarsson (2058) sem mun vera sterkasti skákmaður heims, pund fyrir pund.

Bæta mannbroddar árangur?

Aðvara þurfti keppendur fyrir umferðina vegna mikillar hálku á bílaplaninu við leikvanginn og voru þeir hvattir til þess að setja mannbrodda undir skóna. Sú öryggiskennd sem mannbroddar veita virðist hafa yfirfærslugildi fyrir taflmennskuna því að enginn þeirra keppenda sem væddust mannbroddum tapaði skák þetta kvöld! Fiskisagan flýgur og hafa margir á orði það þeir komi á mannbroddum í næstu umferð hvort sem hált verður eða færðin sem á sumardegi. Vert er að benda þeim sem veigra sér við að setja mannbrodda undir blankskó á að einnig má mannbroddavæða bomsur, stigvél, strigaskó, flókaskó og klossa svo að eitthvað sé nefnt.

Stálin stinn í 3. umferð

Þriðja umferð Nóa Siríus mótsins fer fram fimmtudaginn 23. janúar. Þá leiða m.a. saman hesta sína Stefán Kristjánsson og Davíð Kjartansson, Guðmundur Gíslason og Bragi Þorfinnsson, Dagur Arngrímsson og Þröstur Árnason og Björgin Jónsson og Halldór Grétar Einarsson en allir þessir skákmenn hafa fullt hús eftir tvær fyrstu umferðirnar.

Spil og leikir | Breytt 18.1.2014 kl. 10:25 | Slóð | Facebook | Athugasemdir (0)

17.1.2014 | 15:28

Stelpudagur í Skákskólanum á sunnudaginn

Skráning fer fram hér fyrir laugardag. Skákskólinn er staðsettur að Faxafeni 12, gengið inn á vesturhlið hússins.

Spil og leikir | Slóð | Facebook | Athugasemdir (0)

17.1.2014 | 15:18

Sigurður, Haraldur og Jón Kristinn með fullt hús á Skákþingi Akureyrar

Annarri umferð Skákþings Akureyrar lauk í gærkveldi á þennan hátt:

Andri-Hjörleifur jafntefli
Símon-Jakob Sævar 1-0
Rúnar-Jón Kristinn 0-1
Logi-Sigurður 0-1
Tómas-Haraldur 0-1

Þá er lokið með jafntefli skák þeirra Hjörleifs og Rúnars úr fyrstu umferð.

Þrír keppendur hafa unnið báðar skákir sínar á mótinu, þeir Sigurður Eiríksson, Haraldur Haraldsson og Jón Kristinn Þorgeirsson. Næstur þeim með 1,5 vinning kemur svo Símon Þórhallsson.

Þriðja umferð mótsins fer fram á sunnudaginn og þá leiða saman hesta sína Jón Kristinn og Andri, Hjörleifur og Símon, Sigurður og Rúnar, Haraldur og Logi, Jakob og Tómas. Umferðin hefst kl. 13.

Spil og leikir | Slóð | Facebook | Athugasemdir (0)

17.1.2014 | 06:00

Reykjavíkurborg styrkir Skáksamband Íslands

Fyrsta Reykjavíkurskákmótið var haldið þann 14. janúar til 1. febrúar árið 1964 í Lídó og tóku 16 keppendur þátt í mótinu. Reykjavíkurborg hefur allar götur síðan styrkt Reykjavíkurskákmótið sem í dag er orðið eitt stærsta og virtasta alþjóðlega mót hvers árs í skákheiminum. Á síðasta ári tóku 230 keppendur frá 37 löndum þátt í mótinu.

Mótið verður haldið í Hörpu í mars á þessu ári og verður með veglegri hætti að þessu sinni í tilefni tímamótanna. Nú þegar hafa 170 manns skráð sig og búast skipuleggjendur jafnvel við fleiri keppendum í ár en í fyrra.

Þá var einnig undirritað samkomulag um mót EM landsliða í skák sem haldið verður í Reykjavík árið 2015.

Reykjavíkurborg mun styrkja mótið með endurgjaldslausum afnotum af húsnæði Íþrótta- og sýningarhallarinnar í Laugardal og vegna hluta af búnaði skv. nánara samkomulagi á milli Skáksambands Íslands og íþrótta- og tómstundasviðs Reykjavíkurborgar (ÍTR). ÍTR mun fyrir hönd Reykjavíkurborgar hafa umsjón með þeim hluta samningsins.

Með undirritun samkomulags þessa er staðfestur gagnkvæmur skilningur og vilji aðila til þess að undirbúa og kynna mót EM landsliða í skák 2015 og Reykjavík sem best. Til þess að tryggja tengsl milli Skáksambandsins og Reykjavíkurborgar verði komið á laggirnar samstarfsnefnd, skipuð þremur fulltrúum frá hvorum aðila.

Spil og leikir | Breytt 16.1.2014 kl. 11:18 | Slóð | Facebook | Athugasemdir (0)

16.1.2014 | 16:18

Skákkennsla á Vestfjörðum

Frá því í desember 2013 hefur GM Henrik Danielsen mætt tvisvar í viku í Patreksskóla til að kenna skák þeim krökkum sem eru í Patreksskóla, Bíldudalsskóla og Birkimelsskóla. Frá Patreksskóla hafa um 30 nemendur sótt kennsluna og eru krakkarnir mjög áhugasamir. Í vor munu nemendur Henriks svo tefla mót á netinu við krakka frá Schwerin í Þýskalandi.

Vestfirðir eiga núna í maí þrjú sæti á Landsmótinu í skólaskák og ætla nemendur á suðurfjörðunum ekki að láta sitt eftir liggja með að komast á Landsmótið en Henrik hefur einnig verið að kenna skák í Tálknafjarðarskóla. Í tengslum við Skákdag Íslands þann 26. janúar nk er svo á dagskránni að hafa liðakeppni milli Patreksskóla og Tálknafjarðarskóla.

Það má því með sanni segja að syðstu firðir Vestfjarða séu komnir á íslenska skákkortið!

Myndaalbúm (Áróra Hrönn)

PDF-viðhengi fylgir með fréttinni.

Skrár tengdar þessari bloggfærslu:

Skákkennsla á Vestfjörðum

Spil og leikir | Slóð | Facebook | Athugasemdir (0)

16.1.2014 | 15:29

Skákþing Reykjavíkur: Skákir fjórðu umferðar

Kjartan Maack hefur slegið inn skákir fjórðu umferðar Skákþings Reykjavíkur. Þær fylgja með sem viðhengi. Þar má finna margar athyglisverðar skákir en brot af því besta úr umferðinni verður að finna í skákdálki Fréttablaðsins næstu daga.

Veljið skák (32 alls):

Spil og leikir | Breytt s.d. kl. 15:32 | Slóð | Facebook | Athugasemdir (0)

16.1.2014 | 11:26

Sturlubúðir að Úlfjótsvatni - Skákbúðir Fjölnis 1. og 2. febrúar

Áhugasömum skákkrökkum á barna-og unglingsaldri sem æfa með íslenskum skákfélögum stendur til boða tveggja daga æfinga- og skemmtiferð á vegum Skákdeildar Fjölnis í samstarfi við Skákakademíu Reykjavíkur og Skákskóla Íslands. Skákbúðirnar verða í útilífsmiðstöð skáta við Úlfljótsvatn. Umsjón og fararstjórn verður undir stjórn þeirra Helga Árnasonar formanns Skákdeildar Fjölnis og Andreu Margrétar Gunnarsdóttur frá Skákfélagi fjölskyldunnar.

Fjöldi skákkennara og leiðbeinenda halda utan um alla skákkennslu og skákmót undir forystu Helga Ólafssonar landsliðsþjálfara og skólastjóra Skákskóla Íslands og Stefáns Bergssonar og Björns Ívars frá Skákakademíu Reykjavíkur.

Verð á hvern þátttakenda er 10.000 kr fyrir tvo daga og eina nótt. Innifalið í gjaldinu er uppáhaldsmatur krakkanna í hvert mál, kennsla, skálaleiga, námsgögn, þátttaka í Nóa-Síríus skákmótinu og rútuferð fram og til baka. Þátttakendur eiga ekki að hafa með sér nesti né peninga til ferðarinnar. Þátttökugjaldið greiðist í upphafi ferðar eða inn á reikning Umf. Fjölnis, skákdeildar, kt. 631288-7589, bankareikning 0114-26-1160.

Aðstaða öll við Úlfljótsvatn telst einstök fyrir skákbúðir og þar er umhverfið fallegt. Svefnskálar, matsalur og hópherbergi eru til staðar fyrir samstilltan hóp. Í frjálsum tíma er boðið upp á frábæra aðstöðu á skipulögðu útivistarsvæði sem höfðar til allra þátttakenda. Reglur eru í gildi í ferðinni líkt og um skólaferðalag væri að ræða.

Skákbúðir við Úlfljótsvatn eru einstakt tækifæri fyrir alla áhugasama skákkrakka til að fá góða skákkennslu og efla samfélag við aðra skákkrakka. Dagskrá skákbúðanna er í samræmi við skákbúðir Fjölnis í Vatnaskógi apríl 2011 og á Úlfljótsvatni okt. 2012 sem heppnuðust mjög vel. Skráning fer fram á skrifstofu Skáksambands Íslands s. 568 9141 netfang skaksamband@skaksamband.is.Upplýsingar veitir Helgi Árnason s. 6648320.

STURLUBÚÐIR AÐ ÚLFLJÓTSVATNI

Skákbúðir Fjölnis helgina 1. - 2. feb. 2014

Heppilegt er að hafa meðferðis:

- Svefnpoka eða sængurfatnað

- Fatnað til skiptanna (nærföt, sokka, buxur, skyrtu, peysu)

- Úlpu, lopapeysu, vettlinga, ullarsokka, trefil og húfu

- Stígvél og inniskó

- Handklæði, tannbursta og tannkrem

- Skemmtileg spil

- Myndavél / Ipod (ekki tekin ábyrgð á þessum tækjum)

Dagskrá skákbúða 1. - 2. feb. 2014:

laugardagur : 1. feb. sunnudagur : 2. feb.

kl. 10:00 Brottför frá BSÍ kl. 09:00 Morgunmatur

- 10:15 Brottför frá N1Ártúnsbrekku kl. 10:00 Skákkennsla (hópar)

- 11:00 Móttaka við Úlfljótsvatn kl. 11:30 Hádegismatur

- 11:30 Frjáls tími úti og inni kl. 12:30 Nóa - Síríus hraðskákmótið

- 12:30 Hádegisverður kl. 14:30 Verðlaunaafhending - Dagskrárlok

- 13:15 Skákkennsla (hópar) kl. 15:00 Heimferð frá Úlfljótsvatni

- 15:00 Kaffi. kl. 16:00 Ferðarlok við BSÍ - 15:30 Frjáls tími - göngutúr

- 17:00 Skákkennsla (hópar)

- 19:00 Kvöldverður.

- 19:30 Frjáls tími

- 20:30 Kvöldvaka, tvískák og spilatími

- 22:00 Kvöldhressing og spjall á herbergjum

- 23:15 Hljóð komið á í herbergjum

Sturlubúðir, skákbúðir Fjölnis að Úlfljótsvatni, eru tengdar nafni Sturlu Péturssonar sem var þekktur skákmaður í Reykjavík á 20.öld. Hann leiðbeindi fjölmörgum ungum skákmönnum í félagsstarfi TR.

Sonarsonur Sturlu og alnafni, íbúi í Grafarvogi, heiðrar minningu afa síns með stuðningi við skákbúðir Fjölnis 2014 og greiðir niður þátttökugjald allra Fjölniskrakka. Skákdeild Fjölnis færir Sturlu Péturssyni og fjölskyldu hans bestu þakkir fyrir frábæran stuðning.

Skákdeild Fjölnis - Skákakademía Reykjavíkur - Skákskóli Íslands

Spil og leikir | Slóð | Facebook | Athugasemdir (0)

16.1.2014 | 00:55

Jón Viktor, Þorvarður Fannar og Einar Hjalti efstir á Skákþingi Reykjavíkur

Alþjóðlegi meistarinn Jón Viktor Gunnarsson (2412), FIDE-meistarinn Einar Hjalti Jensson (2347) og Þorvarður F. Ólafsson (2256) eru efstir með fullt hús að lokinni fjórðu umferð Skákþings Reykjavíkur sem fram fór í kvöld. Þorvarður hafði betur gegn Sigurbirni Björnssyni (2375) og Einar Hjalti lagði Atla Jóhann Leósson (1756) að velli og Jón Viktor vann Lenku Ptácníková (2245). Þess má geta að þau síðastnefndu mætast aftur annað kvöld en þá í Nóa Síríus-móti GM Hellis!