Skáktímar hefjast í Stúkunni í dag

Samvinnuverkefni Skákskóla Íslands og Skákakademíu Kópavogs fer aftur af stað í Stúkunni á Kópavogsvell og verður fyrsti tími næsta föstudag þann 13.  september   kl. 14.30 og stendur til að verða kl. 16.30. Sem fyrr verður það Helgi Ólafsson stórmeistari og skólastjóri Skákskóla Íslands sem hefur umsjón með þessum tímum. Kennsla verður einkum miðuð við börn og unglinga í  grunnskólum Kópavogs sem hafa verið dugleg við að tefla á skólaskákmótum.  

Dagur vann Veroniku í dag

Alþjóðlegi meistarinn Dagur Arngrímsson (2381) vann ungversku skákkonuna Veronika Schneider (2266), sem er stórmeistari kvenna, í fimmtu umferð First Saturday-mótsins sem fram fór í dag. Í gær tapaði hann hins vegar fyrir ungverska stórmeistaranum Krisztian Szabo (2561).

Dagur hefur 3,5 vinning og er í öðru sæti. Szabo er efstur með 4 vinninga. Í sjöttu umferð, sem fram fer á morgun, teflir hann við danska alþjóðlega meistarann Mads Andersen (2479).

Tíu keppendur taka þátt í mótinu og tefla allir við alla. Meðalstig mótsins eru 2415 skákstig og er Dagur nr. 7 í stigaröð keppenda.

• Heimasíða mótsins
• Chess-Results

Álfhólskóli teflir á Norðurlandamóti barnaskólasveita

Barnaskólavveit Álfhólsskóla teflir núna um helgina á Norðurlandamóti barnaskólasveita sem haldið er í Helsinki í Finnlandi.

Sveitina skipa:

1. borð  Dawid Kolka

2. borð Felix Steinþórsson

3. borð Guðmundur Agnar Bragason

4. borð Oddur Unnsteinsson

varamaður Halldór Atli Kristjánsson

Sveitin er í öðru sæti meðalstiga með heldur færri meðalstig en finnska sveitin. Í viðhengi er listi yfir keppendur. Taflið hefst kl 9 á morgun föstudag að íslenskum tíma en á morgun verða telfdar tvær umferðir kl 9 og kl 14.

Finnarnir hafa staðið sig afar vel við undirbúning mótsins og hafa meðal annars sett upp heimasíðu fyrir mótið þar sem ætlun þeir er m.a. að sýna allar skákirnar beint. Slóðin á síðuna er http://www.shakki.net/kerhot/MatSK/nm/ Við auðvitað vonum að þau áform þeirra gangi eftir.

Sveitin ferðaðist í dag til Finnlands á 13 ára afmælisdegi Dawid Kolka sem fekk auðvitað að velja hvar yrði borðað og fyrir valinu hjá honum varð Pizza Hut í miðborg Helsinki þar sem slegið var upp afmælisveislu. Á morgun hefst svo alvaran hjá þessum vösku drengjum.

 

Skrár tengdar þessari bloggfærslu:

• sveitiaskipan_a_nm_barnaskolasveita.pdf

Friðrik vann Westerinen - hálfum vinningi á eftir heims- og Norðurlandameisturum

Stórmeistarinn Friðrik Ólafsson (2407) vann finnska stórmeistarann Heikki Westerinen (2281) í sjöttu umferð NM öldunga sem fram fór í dag á Borgundarhólmi. Friðrik hefur 4,5 vinning og er í þriðja sæti. Hann er hálfum vinningi á eftir heimsmeistaranum Jens Kristiansen (2403) og Norðurlandameistaranum Jörn Sloth (2330). Áskell Örn Kárason (2205) vann í dag Danann Poulsten Holm Grabow (2157) og er í 4.-6. sæti með 4 vinninga. Sigurður Kristjánsson (1912) vann einnig og hefur 3 vinninga.

Frídagur er á morgun en í sjöundu umferð, sem fram fer á laugardaginn, teflir Friðrik við Svíann Ulf Nyberg (2130), Áskell við Sloth (2330) og Sigurður við sænska FIDE-meistarann Nile-Ake Malmdin (2230).

32 skákmenn taka þátt í mótinu frá öllum Norðurlöndunum nema Færeyjum. Þar af eru þrír stórmeistarar og fjórir FIDE-meistarar. Friðrik er stigahæstur keppenda, Áskell er nr. 7 í stigaröðinni og Sigurður nr. 18.

• Heimasíða mótsins
• Beinar útsendingar (hefjast almennt kl. 11)

Skákæfingar í KR fyrir börn og unglinga að hefjast

Skákæfingar í KR fyrir börn og unglinga á grunnskólaaldri hefjast föstudaginn 20. september. Æfingarnar fara fram í skákherberginu í Frostaskjóli, á annarri hæð. Æfingarnar verða vikulega á föstudögum, og standa frá 17:40 - 18:40. Æfingarnar verða byggðar upp þannig að fyrst verður kennsla og verkefni og svo teflt. Skákdeild KR og Skákakademían standa að æfingunum eins og síðustu ár. Vel hefur verið mætt síðustu ár enda mikil skákkennsla í grunnskólum hverfisins.

Umsjónarmaður æfinganna er Stefán Bergsson en nokkrir þjálfarar koma að æfingunum.

Dagskrá fram að áramótum:

• 20. september  - Fyrsta skákæfingin, skráning.
• 27. september - Æfing.
• 4. október - Æfing.
• 11. október - Frí.
• 18. október - Haustmót hefst.
• 25. október - Haustmóti lýkur.
• 1. nóvember - Æfing.
• 8. nóvember - Keppendur á Íslandsmót unglingasveita valdir.
• 15. nóvember - Síðasta æfing fyrir Íslandsmót.
• 16. nóvember -Íslandsmót unglingasveita.
• 22. nóvember - Æfing.
• 29. nóvember - Æfing.
• 6. desember - Fjöltefli skákmeistara.
• 13. desember - Síðasta æfing fyrir jól. Góðir gestir líta í heimsókn með góðgæti og verðlaun veitt fyrir árangur og ástundun.

Nánari upplýsingar gefur Stefán í netfang [e-mail] eða í síma 863-7562.

Skákæfingar Skákdeildar Breiðabliks í vetur

Langþráðu takmarki Skákdeildarinnar um kvöldtíma í Stúkunni var náð í síðustu viku!

Skákdeild Breiðabliks verður því með opið hús í Stúkunni við Kópavogsvöll á þriðjudagskvöldum kl 20:00 í vetur. Gengið er inn um kjallarahæð bakatil. Fyrsta opna húsið verður þriðjudaginn 17.september.

Kvöldin eru fyrir þá sem vilja hittast og iðka skák, hver á sínum forsendum. Menn geta komið til að tefla léttar skákir, stúdera, tefla á ICC, horfa á, einkakennsla, kaffiskákspjall, skákbókaviðskipti  eða bara hvað sem er tengt skák.

Það eru nokkur aðskilin rými af mismunandi stærð í Stúkunni þannig að það ætti að vera hægt að þjóna sem flestum.  Í Stúkunni eru borð og stólar af hentugri stærð fyrir teflendur, töfl&klukkur, þráðlaust net, kaffivél og hægt að fá lánaðan skjávarpa.

Fastur liður verður létt átta umferða mót í aðalsalnum á 3ju hæð með glæsilegu útsýni yfir grasvöllinn. Tefldar verða 5 mínútna skákir með tveggja sekúndna viðbót fyrir hvern leikinn leik.

Reiknuð verða hraðskákstig og áfangakerfi verður í gangi þar sem menn geta unnið sér inn áfanga fyrir góðan árangur til hinna ýmsu titla (BM, FM, AM og GM) !

Það er léleg sjónvarpsdagskrá og enginn að segja neitt af viti á Facebook á þriðjudögum!

Tökum þriðjudagskvöldin frá, drífum okkur út úr húsi og fyllum Stúkuna af skákþönkum í vetur!

Ókeypis er á Opnu húsin þau eru fyrir alla sama í hvaða taflfélagi þeir eru!

 

Skákdeild Breiðabliks

Netfang: [e-mail]

Sími: 6699784

Heimasíða:  http://www.breidablik.is/skak

Friðrik með jafntefli við Norðurlandameistarann

Stórmeistarinn Friðrik Ólafsson (2407) gerði í dag jafntefli við danska FIDE-meistarann FIDE-meistarann Jörn Sloth (2322) á NM öldunga sem fram fer á Borgundarhólmi. Sloth þessi er núverandi Norðurlandameistari en hann sigraði á mótinu í Reykjavík í hitteðfyrra. Friðrik hefur 3,5 vinning og er í 4.-6. sæti.

Áskell Örn Kárason (2205) tapaði fyrir danska stórmeistaranum Jens Kristiansen (2405) og Sigurður Kristjánsson (1912) tapaði einnig. Áskell hefur 3 vinninga og Sigurður hefur 2 vinninga. vann einnig og hefur 2 vinninga.

Kristiansen, Sloth og Svíinn Ulf Nyberg (2130) eru efstir með 4 vinninga.

Friðrik teflir á morgun við finnska stórmeistarann og goðsögnina Heikki Westerinen (2281).

32 skákmenn taka þátt í mótinu frá öllum Norðurlöndunum nema Færeyjum. Þar af eru þrír stórmeistarar og fjórir FIDE-meistarar.

Friðrik er stigahæstur keppenda, Áskell er nr. 7 í stigaröðinni og Sigurður nr. 18.

• Heimasíða mótsins
• Beinar útsendingar (hefjast almennt kl. 11)

Hou Yifan vann fyrstu skák heimsmeistaraeinvígis kvenna

Heimsmeistaraeinvígi kvenna hófst í morgun í Taizhou í Kína. Þar mætast hin úkraínska (2500), Anna Ushenina (2500), núverandi heimsmeistari kvenna, og kínverska skákdrottningin Hou Yifan (2609).

Hou Yifan sem stýrði svörtu mönnunum vann fremur auðveldan sigur í fyrstu skákinni en flestir spá henni öruggum sigri í einvíginu. Önnur skákin fer fram á morgun.

Alls verða tefldar 10 skákir. 

• Heimsasíða einvígisins
• Beinar útsendingar (hefjast kl. 7)

Haustmót TR hefst á sunnudaginn

Haustmót Taflfélags Reykjavíkur 2013 hefst sunnudaginn 15. september kl.14. Mótið er eitt af aðalmótum vetrarins í reykvísku skáklífi og jafnframt meistaramót T.R. Það er áratuga gömul hefð fyrir hinu vinsæla Haustmóti og er það flokkaskipt.  Mótið er öllum opið. 

Mótið fer fram í félagsheimili Taflfélags Reykjavíkur, skákhöllinni að Faxafeni 12. Sú nýbreytni verður að teflt er tvisvar í viku.  Alls eru níu umferðir í hverjum flokki. Lokuðu flokkarnir eru skipaðir tíu keppendum hver þar sem allir tefla við alla, en í opna flokknum er teflt eftir svissnesku kerfi.

Skráning fer fram hér á Skák.is og á heimasíðu Taflfélags Reykjavíkur.

Hægt er að fylgjast með skráningu hér..

Skráningu í alla lokaða flokka lýkur laugardaginn 14. september kl. 18.

Lokaumferð fer fram föstudaginn 18. október en mótinu lýkur með verðlaunaafhendingu sunnudaginn 20. október ásamt Hraðskákmóti T.R.

Núverandi skákmeistari Taflfélags Reykjavíkur er Daði Ómarsson.

Dagskrá:

1. umferð: Sunnudag 15. september kl.14.00 
2. umferð: Miðvikudag 18. september kl.19.30

3. umferð: Sunnudag 22. september kl.14.00 
4. umferð: Miðvikudag 25. september kl.19.30

5. umferð: Sunnudag 29. september kl.14.00

6. umferð: Miðvikudag 2. október kl.19.30 
7. umferð: Sunnudag 6. október kl.14.00

---Hlé vegna Islandsmóts skákfélaga---
8. umferð: Miðvikudag 16. október kl. 19.30 
9. umferð: Föstudag 18. október. kl.19.30 

Verðlaun í A-flokki: 
1. sæti kr. 100.000 
2. sæti kr. 50.000 
3. sæti kr. 25.000 
4. og 5. sæti ókeypis í Skákþing Reykjavíkur 2014

Verðlaun í B-flokki: 
1. sæti kr. 20.000
2.-3. sæti ókeypis í Skákþing Reykjavíkur 2014

Verðlaun í C-flokki: 
1. sæti kr. 15.000 
2. og 3. sæti ókeypis í Skákþing Reykjavíkur 2014

Verðlaun í opnum flokki:

1. sæti kr. 10.000 
2. og 3. sæti ókeypis í Skákþing Reykjavíkur 2014

Ef fjöldi lokaðra flokka eykst, verða verðlaun í þeim þau sömu og í C-flokki.

Að auki ávinnur sigurvegari hvers flokks sér þátttökurétt í næsta styrkleikaflokki að ári liðnu.

Verði keppendur jafnir í efstu sætum verður peningaverðlaunum skipt en stigaútreikningur látinn ráða lokaröð keppenda.

Tímamörk:

1 klst. og 30 mín. + 30 sek. á leik. 

Þátttökugjöld:

3.500 kr. fyrir félagsmenn T.R. 16 ára og eldri (5.000 kr. fyrir aðra). 
1.500 kr. fyrir félagsmenn T.R. 15 ára og yngri (2.500 kr. fyrir aðra).

Öldungaklúbburinn Æsir - Þór Valtýsson efstur á stigum

Öldungar á öllum aldri háðu harða hildi sín á milli í Ásgarði í félagsheimili Félags eldri borgara í Stangarhyl á sínu vikulega atskákmóti síðdegis í gær og mátti lengi vel ekki milli sjá hver færi með sigur af hólmi.

Er nær dró síðustu umferðinni af tíu var ljóst að keppnin um efsta sætið yrði á milli Sæbjörns Larsens Guðfinnssonar og Þórs Valtýssonar, sem báðir eru þekktir fyrir þrautseigu sína og útsjónarsemi og gefa ógjarnan hlut sinni fyrr en í fulla hnefanna og þaðan af síður jafntefli.

Eins og sést á meðf. myndskreytti mótstöflu lauk Þór keppi í deildu efsta sæti á stigum, en Sæbjörn leiddi mótið lengi vel. 15 keppendur af 24 voru með 50% vinningshlutfall eða meira svo baráttan var nokkuð jöfn og keppnin skemmtileg. Aðrir uppskáru heldur minna í þetta sinn eins og gengur.

Nokkrar vettvangsmyndir fylgja með sem sjá má í myndasafni Ása hér á síðunni.