Kristján Guðmundsson gengur til liðs við Goðann-Máta

Hinn snjalli skákmeistari Kristján Guðmundsson (2289) hefur gengið til liðs við Goðann-Máta. Vart þarf að orðlengja að félaginu er mikill styrkur í liðsinni svo öflugs og reynds meistara. Kristján hefur um langt árabil verið áberandi í íslensku skáklífi. Hann var á sínum tíma Íslandsmeistari unglinga í skák, var fulltrúi þjóðar sinnar á heimsmeistaramóti unglinga og  fékk 7 vinninga af  9 á World Open í Bandaríkjunum 1982. Sá árangur fleytti honum í efstu sætin á því öfluga móti, mitt í öllum stórmeistarafansinum og hlaut Kristján sérstök verðlaun fyrir frammistöðuna.    Meðal annarra afreka má nefna að hann hefur unnið Öðlingamót TR nokkrum sinnum, auk sigra í fleiri sterkum mótum, og  varð Íslandsmeistari með TG á Íslandsmóti skákfélaga.Síðast en ekki síst var Kristján liðsstjóri landsliðs Íslands í skák á fjórum Ólympíumótum í röð, m.a. þegar liðið náði 4. sæti í Dubai og vantaði einungis  ½ vinning til að hreppa bronsið. Hermann Aðalsteinsson, formaður Goðans-Máta: „Þetta er mikil gleðifregn. Kristján fellur ekki bara vel í okkar hóp sem sterkur skákmaður heldur líka sem skemmtilegur félagi. Góður liðsandi skiptir okkur GM-ara nefnilega jafnvel enn meira máli en geta í skák og þar er skemmst að minnast þáttar góðrar stemningar og samheldni í sigri okkar á Íslandsmóti skákfélaga í hraðskák  á dögunum. Þá er heldur ekki amalegt að njóta atfylgis nýja liðsmannsins í herkænsku því að Kristján er eins og kunnugt er doktor í sálfræði. Ljóst er að Kristján mun efla enn frekar hina grjóthörðu a-sveit okkar í efstu deild Íslandsmóts skákfélaga sem senn fer í hönd." Stjórn og liðsmenn Goðans-Máta bjóða Kristján Guðmundsson velkominn í sínar raðir. 

EM-keppandinn: Mikael Jóhann Karlsson

Átta fulltrúar frá Íslandi taka þátt í EM ungmenna sem fram fer í Budva í Svartfjalllandi dagana 28. september - 9. október. Einn keppandi verður kynntur daglega fram að móti. Byrjað er á þeim elsta Mikael Jóhanni Karlssyni sem keppir í U18.

Nafn

Mikael Jóhann Karlsson.

Fæðingardagur

26. júní 1995.

Félag

Skákfélag Akureyrar.

Hefurðu teflt áður á EM/HM ungmenna?

Keppti síðast á HM í Tyrklandi 2009 og afþakkaði boðið á EM í fyrra.

Helstu skákafrek

Íslandsmeistari í skólaskák 2008 og 2011, Íslandsmeistari drengja og telpna 2010, unglingameistari Íslands 2011 (U20), Meistari Skákskóla Íslands 2012, annað sæti á Unglingameistaramóti Íslands 2012 (eftir Hjörvari).  Vann Norðurlandsmót unglinga 7 sinnum í röð  8 sinnum allt í allt. Vann B-flokk Haustmóts TR 2011, 3. sæti á Skákþingi Reykjavíkur 2013 og 3. sæti á NM í skólaskák (17-19 ára).

Skemmtilegasta skákferðin

Czech Open 2013 sem var að ljúka, ég fór í ferð með félögum mínum og var á tímabili í toppbaráttunni og græddi 40 stig.

Eftirminnilegasta skákin

Þegar ég vann Dag Andra Friðgeirsson í úrslitaskák um fyrsta Íslandsmeistaratitilinn minn!

Viltu styrkja ungmennin sem fara á EM?

Það er hægt að styrkja við ungmennin, sem er mestan kostnaðinn sjálf, með framlögum með greiðslukorti; 2.000 kr., 5.000 kr. og 10.000 kr.

Skákæfingar í Reykjavík

 

 

Öll skákfélög Reykjavíkur með æskulýðsstarfsemi hafa nú hafið barna- og unglingaæfingar. Alls eru fimm æfingar í boði sem standa ungum og efnilegum skákmönnum til boða. 

• Mánudagar 17:15: Hellir. Álfabakki 14a.
• Miðvikudagar 17:10: Víkingaklúbburinn. Víkinni.
• Föstudagar 17:40: KR. Frostaskjól.
• Laugardagar 11:00: Skákdeild Fjölnis. Rimaskóla.
• Laugardagar 14:00: Taflfélag Reykjavíkur.

Mikið fagnaðarefni er að Víkingaklúbburinn hefur hafið reglulegar barnaæfingar og má lesa um þær hér: http://vikingaklubburinn.blogspot.com/

Aðalfundur Hellis fer fram í kvöld

Aðalfundur Taflfélagsins Hellis verður haldinn fimmtudaginn 19. september og hefst kl. 20. Venjuleg aðalfundarstörf eins og yfirferð ársskýrslu og kosning stjórnar.

Félagið hvetur félagsmenn til að fjölmenna

Stefán, Jón Viktor og Einar Hjalti efstir á Gagnaveitu-mótinu

Önnur umferð Gagnaveitumótsins - Haustmóts TR fór fram í kvöld. Þrír stigahæstu keppendur mótsins Stefán Kristjánsson (2491), Jón Viktor Gunnarsson (2408) og Einar Hjalti Jensson (2305) unnu allir sínar skákir og leiða með fullu húsi. Stefán Bergsson (2131) vann einnig sína skák. Fjörlega er teflt í a-flokki og aðeins einni skák hefur lokið með jafntefli í tveimur fyrstu umferðunum. 

B-flokkur:

Jón Trausti Harðarson (1951) og Ingi Tandri Traustason (1804) unnu sínar skákir en öðrum skákum lauk með jafntefli.

Það stefnir í jafna og spennandi keppni enda hafa keppendurnir flestir mjög áþekk skákstig. Athyglisvert er að enginn hefur fullt hús.

Jón Trausti, Ingi Tandri, Þórir Benediktsson (1942) og Hallgerður Helga Þorsteinsdóttir (1949) leiða með 1,5 vinning.

C-flokkur:

Stigalægsti keppandi flokksins, Kristófer Ómarsson (1598) er efstur með fullt hús!

D-flokkur:

Óvænt úrslit urðu þegar Hilmir Hrafnsson (1245) vann Bárð Örn Birkisson (1461). Björn Hólm (1231) vann Sóleyju Lind Pálsdóttur (1442).

Hilmir og Björn Hólm eru efstir ásamt Hjálmari Sigurvaldasyni (1361) og Heimi Páli Ragnarssyni (1455).

• Heimasíða TR
• Chess-Results 
• Myndaalbúm (GB)

Gagnaveitumótið: Bein útsending

Önnur umferð Gagnaveitumótsins - Haustmóts TR hefst kl. 19:30. Skákir a-flokksins verða sýndar beint. Í 2. umferð mætast:

• Oliver Aron - Stefán K.
• Jóhann - Jón Viktor
• Gylfi - Einar Hjalti
• Sverrir Örn - Stefán B.
• Kjartan - Dagur

Beinar útsending úr 2. umferð

Heimasíða mótsins

SSON fær góðan styrk til skákfræðslu

Skákfélag Selfoss og nágrennis (SSON) fékk fyrir skemmstu góðan styrk í héraði. Alls fékk félagið 400.000 kr. sem á að renna til skákfræðslu.

Í frétt á DFS segir meðal annars:

Dagmar Una Ólafsdóttir á Selfossi hefur styrkt tvö verkefni á staðnum um 700.000 krónur.  300.000 króna styrkur rennur til skammtímavistunar fyrir fatlaða í Álftarima 2 og hinn, 400.000 krónur til skákfræðslu hjá Skákfélagi Selfoss og nágrennis.

„Ég hef unnið með fötluðum í gegnum tíðina og eru málefni fatlaðra mér mjög hugleikin. Varðandi skákina vildi ég styðja við bakið á þeim vaxtarsprotum sem nú eru hér í skákinni og styrkja skákfélagið til skákkennslu grunnskólabarna. Skákíþróttin er öllum holl og góð forvörn. Það er engin sérstök fjáröflun er að baki þessum styrkjum, ég vil bara láta gott af mér leiða, við eigum öll að hjálpast að ef við getum," sagði Dagmar.

Frétt DFS

Hou Yifan vann enn - komin með þriggja vinninga forskot

Kínverska skákdrottningin Hou Yifan (2609) fer mikinn í heimsmeistaraeinvígi hennar og Önnu Ushenina (2500) sem nú er í gangi í Taizhou í Kína. Hún vann sjöttu skákina og hefur nú unnið allar skákirnar með svörtu en þegar hún hefur haft hvíttu hefur þeim lokið með jafntefli. Staðan er nú 4½-1½ og þarf hún aðeins einn vinning til viðbótar í síðustu fimm skákunum til að tryggja sér heimsmeistaratitlinn.

• Heimsasíða einvígisins
• Beinar útsendingar (hefjast kl. 7)

Stórmeistaramót Taflfélags Reykjavíkur hefst 1. október

Frá 1. til 8. október næstkomandi mun alþjóðlegt lokað 10 manna stórmót verða haldið í skákhöll Taflfélags Reykjavíkur.  Þá fer fram í fyrsta sinn Stórmeistaramót Taflfélags Reykjavíkur sem stefnt er að, að verði árviss viðburður í framtíðinni.  Vefur mótsins er nú kominn í loftið og verða upplýsingar þar uppfærðar í aðdraganda þess.

Mótið verður geysiöflugt og meðal þátttakenda eru þrír stórmeistarar og fimm alþjóðlegir meistarar. Aðstæður verða eins og best verður á kosið, bæði fyrir keppendur og áhorfendur.  Allar skákir mótsins verða sýndar beint á netinu, en auk þess verður hægt að fylgjast með þeim á stóru tjaldi á keppnisstað.  Reiknað er með að skákskýringar verði á mótsstað í hverri umferð, og svo síðast en ekki síst verða hinar rómuðu veitingar í boði sem ætíð fylgja mótum félagsins.

Mótið er nú fullbókað og eftirtaldir meistarar munu leiða saman hesta sína á reitunum 64:

1. Úkraínski ofurstórmeistarann Sergey Fedorchuk (2667)

Fedorchuck varð Evrópumeistari unglinga undir 14 ára árið 1995, en meðal annara afreka hans má nefna efsta sætið á Cappelle la Grande Open árið 2008, ásamt TR-ingunum Vugar Gashimov (2737), Erwin L'Ami (2640), nýbökuðum skákmeistara Úkraínu, Yuriy Kryvoruchko (2678) og fleirum. Einnig sigraði hann á Dubai Open 2006 ásamt Armenunum Sargissian og Petrosian.  Fedorchuk gekk nýverið í Taflfélag Reykjavíkur og verður spennandi að sjá hvort hann muni einnig tefla fyrir félagið í Íslandsmóti skákfélaga.

2. Úkraínski stórmeistarinn Mikhailo Oleksienko (2596)

Oleksienko sem er 27 ára, varð sextán ára alþjóðlegur meistari og þremur árum síðar stórmeistari.  Fyrr í sumar sigraði hann Czech Open þar sem hann vann 6 skákir í röð eftir rólega byrjun.  Nú í ágúst varð hann síðan í 1.-3. sæti á ZMDI Open í Dresden.  Hann er því til alls líklegur á mótinu, og hefur verið á hraðri uppleið á stigalista Fide.  Oleksienko er íslenskum skákmönnum að góðu kunnur, enda hefur hann verið fastamaður í liði Taflfélags Reykjavíkur á Íslandsmóti skákfélaga undanfarin ár.

3. Stórmeistarinn Henrik Danielsen (2500)

Henrik þarf vart að kynna, enda verið einn af okkar sterkustu og virkustu skákmönnum um árabil.  Hann er fæddur í Nyköbing í Danmörku en hefur síðan 2006 teflt fyrir íslands hönd.  Sex sinnum hefur hann teflt á Ólympíuskákmótinu, þar af þrisvar (2006, 2008 og 2012) fyrir Ísland.  Henrik varð Íslandsmeistari í skák árið 2009, þar sem hann sigraði með nokkrum yfirburðum. Henrik Danielsen er liðsmaður Taflfélags Vestmannaeyja.

4. Færeyski alþjóðlegi meistarinn Helgi Dam Ziska (2468)

Þessi mikli Íslandsvinur og liðsmaður T.R. náði nýverið sínum fyrsta áfanga að stórmeistaratitli á opnu móti í Riga Lettlandi.  Þar sýndi hann úr hverju hann er gerður, var með árangur upp á 2600 stig og mun hækka mikið á næsta stigalista Fide. Helgi er 23 ára, og varð alþjóðlegur meistari sautján ára.  Á XXII Reykjavíkurskákmótinu 2006, sigraði Ziska (þá sextán ára)  hollenska stórmeistarann Jan Timman í frægri skák.  Stórmeistarinn þekkti gafst þá upp í tuttugasta leik með unna stöðu!   Helgi mun örugglega sækja stíft annan áfanga sinn að stórmeistaratitli á mótinu, og verður spennandi að fylgjast með þessum geðþekka frænda vor.

5. Danski alþjóðlegi meistarinn Simon Bekker-Jensen (2414)

Simon hefur margoft teflt á Íslandi, bæði með Taflfélagi Reykjavíkur á Íslandsmóti Skákfélaga, og eins á Reykjavíkurskákmótinu.  Hann varð norðurlandameistari drengja (U16), alþjóðlegur meistari 18 ára, og 9 ár í röð varð hann danskur meistari með liði sínu Helsinge Chess Club.  Hann stefnir á sinn fyrsta áfanga að stórmeistaratitli á mótinu, og verður án efa erfiður viðureignar.  Simon kemur inn í mótið í stað Jakob Vang Glud (2520) sem nýverið náði sínum öðrum áfanga að stórmeistaratitli á Politiken Cup.  Glud sá Stórmeistaramót Taflfélagsins sem kjörið tækifæri til að ná lokaáfanganum, en vegna anna við nám, þurfti hann að hætta við þátttöku.

6. Alþjóðlegi meistarinn Arnar Erwin Gunnarsson (2441)

Arnar er án efa einn hæfileikaríkasti skákmaður landsins. Snemma kom í ljós hversu mikið efni væri hér á ferð, enda varð pilturinn hvorki meira né minna en áttfaldur Norðurlandameistari í skák.  Arnar hefur unnið sigur allavegana einu sinni á öllum stærstu mótum landsins, að undanskildum landsliðsflokknum. Fjórum sinnum hefur hann orðið atskákmeistari Íslands, og er einnig þekktur sem einn snjallasti hraðskákmaður landsins. Eflaust munu nú margir bíða spenntir eftir að sjá meistarann taka þátt í stórmóti í kappskák eftir þó nokkuð hlé. Arnar hefur allan sinn skákferil verið liðsmaður Taflfélags Reykjavíkur.

7. Alþjóðlegi meistarinn Guðmundur Kjartansson (2434)

Guðmundur er án efa virkasti íslenski skákmeistarinn í dag. Hann hefur á árinu þegar teflt vel yfir 100 kappskákir og geri aðrir betur! Guðmundur varð Norðurlandameistari U-20 og síðan alþjóðlegur meistari árið 2009. Fyrsti áfanginn að stórmeistaratitli kom sama ár á skoska meistaramótinu.  Í fyrra tefldi Guðmundur mikið í suður Ameríku og varð m.a. í 1.-3. sæti á alþjóðlegu móti í Bogotá, Kólumbíu. Fyrr í sumar sigraði hann stigahæsta keppenda Stórmeistaramótsins, Sergey Fedorchuk í glæsilegri skák á Evrópumeistaramóti einstaklinga. Guðmundur er því í góðri þjálfun, getur unnið hvern sem er á góðum degi og stefnir án efa á annan stórmeistaraáfanga sinn.  Guðmundur er uppalinn hjá Taflfélagi Reykjavíkur og hefur allan sinn feril teflt fyrir félagið.

8.  Alþjóðlegi meistarinn Bragi Þorfinnsson  (2493)

Bragi varð alþjóðlegur meistari árið 2003.  Árið 2012 var hann á meðal sigurvegara á Opna skoska meistaramótinu með 7 v. af níu.  Fyrsta áfanginn að stórmeistaratitli kom í hús í ár í bresku deildakeppninni.  Þar tefldi hann fantavel og gerði m.a. jafntefli við stórmeistarann þekkta Nigel Short.  Bragi hefur margsinnis teflt fyrir hönd Íslands og varð Ólympíumeistari með sveit Íslands, á Ólympíumóti unglingalandsliða í Las Palmas, Kanaríeyjum, árið 1995. Auk þess tefldi hann með landsliðinu á Ólympíumótinu 2004 og 2010 sem og í þremur Evrópukeppnum landsliða 2001, 2003 og 2010.  Nokkuð ljóst má vera að Bragi er hvað líklegastur til afreka á mótinu, og gæti hæglega nælt sér í sinn annan áfanga að stórmeistaratitli.  Bragi er liðsmaður Taflfélags Bolungarvíkur.

9.  Fide meistarinn Sigurbjörn Björnsson (2395)

Sigurbjörn hefur einn áfanga til alþjóðlegs meistaratitils og hefur sannarlega styrk til að sækja annan á Stórmeistaramóti Taflfélags Reykjavíkur.  Sigurbjörn hefur unnið fjölmörg mót innanlands og besti árangur hans á erlendri grundu er 4-13. sæti á Politiken Cup árið 2004 og 2.-12 sæti á Politiken Cup árið 2005, í bæði skiptin með sjö og hálfan vinning af tíu.  Það verður gaman að fylgjast með kappanum, enda einn af þeim líklegri til að ná "normi" á mótinu.  Sigurbjörn er liðsmaður Taflfélags Vestmannaeyja.

10.  Þorvarður Fannar Ólafsson (2266)

Þorvarður er nýjasti liðsmaður Taflfélags Reykjavíkur og það er okkur mikil ánægja að hann skuli nú taka þátt í fyrsta Stórmeistaramóti félagsins.  Fáir hafa verið duglegri að sækja mót félagsins en Þorvarður og hann hefur stórbætt sig undanfarið eitt og hálft ár.  Hann sigraði á Skákþingi Reykjavíkur 2009 og hefur sigrað á Öðlingamóti T.R. undanfarin tvö ár.  Þorvarður varð skákmeistari Hafnarfjarðar þrjú ár í röð 2003-2005.  Það skildi enginn afskrifa "Varða" þótt hann sé stigalægstur keppenda.  Stigin telja nefnilega ekkert á reitunum sextíu og fjórum og Þorvarður gæti hæglega sett strik í reikning gegn mun stigahærri keppendum á þessu móti. 

 

Taflfélag Reykjavíkur vill með þessu móti gefa nokkrum af efnilegustu skákmönnum landsins kost á að tefla hér á landi á öflugu lokuðu móti sem sérsniðið er til áfangaveiða.  Má segja að þar með hafi félagið svarað kalli íslenskra afreksskákmanna um slíkt mótahald, og það er von okkar í stjórn Taflfélagsins að þetta mót verði nú sem og næstu ár sú vítamínsprauta inn í íslenskt afreksskáklíf sem vantað hefur. Það er einnig von okkar í T.R. að það muni hvetja önnur félög til slíks mótahalds í framtíðinni, hvort sem er upp á eigin spýtur eða í samvinnu sín á milli.

En Taflfélagið mun einnig nýta komu erlendu meistaranna til að gefa þeim fjölmörgu börnum og unglingum sem sækja æfingar félagsins tækifæri á að kynnast þeim og tefla við þá.  Boðið verður t.d. upp á fjöltefli við einn af meisturunum og fleira skemmtilegt verður á dagskránni.

Meira um fyrirkomulag mótsins, töfluröðun, tímasetningar umferða og fleira, mun verða tilkynnt fljótlega

Gunnar og Arnaldur sigurvegarar á Breiðbliksæfingu

Gunnar Björnsson og Arnaldur Loftsson urðu efstir og jafnir á fyrstu Breiðabliksæfingunni sem fram fór í Stúkunni í gær. Þeir hlutu 8 vinninga í 9 skákum. Æfingar Skákdeildar Breiðabliks fara fram í Stúkunni hvert þriðjudagskvöld í vetur og segja má að aðstæður þar séu hreint frábærar fyrir skákmótahald.

Tólf keppendur tóku þátt en ekki var hægt að klára mótið því skila þurfti húsnæðinu kl. 22. Var það Arnaldi til happs því hann átti bæði eftir að mæta Gunnari og Stefáni Bergssyni.

Teflt var með tímamörkunum 4+2.

Röð efstu manna:

1. Gunnar Björnsson 8 v. af 9 (41 SB)
2. Arnaldur Loftsson 8 v. (33 SB)
3. Vignir Vatnar Stefánsson 7 v.
4. Halldór Grétar Einarsson 7 v.
5. Stefán Bergsson 6 v.
6. Siguringi Sigurjónsson 5 v.

• Heimasíða Skákdeildar Breiðabliks
• Mótstaflan