Guðmundur tapaði í lokaumferðinni - endaði í 9.-15. sæti

Guðmundur Kjartansson (2434) tapaði fyrir alþjóðlega meistarann Felix Jose Ynojosa (2405) frá Venesúela í níundu og síðustu umferð alþjóðlega mótsins í Badalona sem fram fór í gær. Guðmundur hlaut 6 vinninga og endaði í 9.-15. sæti.

Frammistaða Guðmundar samsvaraði 2459 skákstigum og hækkar hann um 4 stig fyrir hana.

Spænski alþjóðlegi meistarinn Joan Fluvia Poyatos (2491) sigraði á mótinu en hann hlaut 7,5 vinning.

Guðmundur hélt á annað alþjóðlegt skákmót á Spáni sem hófst í dag.

Alls tóku 94 skákmenn frá 21 landi þátt í efsta flokki. Meðal keppenda voru sex stórmeistarar og 22 alþjóðlegir meistarar. Guðmundur var nr. 17 í stigaröð keppenda.

Engar beinar útsendingar.

• Heimasíða mótsins
• Chess-Results 

Bræðurnir töpuðu í lokaumferðinni

Bræðurnir Bragi (2493) og Björn Þorfinnssynir (2403) töpuðu báðir í níundu og síðustu umferð alþjóðlegs móts í Riga sem lauk í dag. Bragi fyrir þýska alþjóðlega meistaranum Jonathan Carlstedt (2387) og Björn fyrir finnska FIDE-meistaranum Tommi Luukkonen (2284).

Bragi hlaut 5 vinninga og endaði í 57.-74. sæti (60. á stigum) en Björn hlaut 4,5 vinning og endaði í 75.-99. sæti (77. á stigum). 

Frammistaða Braga samsvaraði 2408 skákstigum en Björns 2239 skákstigum. Báðir lækka þeir á stigum. Bragi um 10 stig en Björn um 18 stig.

Stórmeistararnir Bartosz Socko (2646), Póllandi, sem er félagi í Víkingaklúbbnum, og Robin Van Kampen (2606), Hollandi, sem er félagi í Goðum-Mátum sigruðu á mótinu en þeir hlutu 7 vinninga.

Alls tóku 173 skákmenn frá 28 löndum þátt í efsta flokki. Þar af voru 27 stórmeistarar og jafnmargir alþjóðlegir meistarar. Bragi var nr. 24 í stigaröð keppenda en Björn var nr. 46.

• Heimasíða mótsins 
• Chess-Results
• Beinar útsendingar (ýmist kl. 8 eða kl. 14)

David Howell með yfirburði á 100. breska meistaramótinu

Stórmeistarinn David Howell (2639) sigraði með yfirburðum á 100. Breska meistaramótinu í skák sem fram fór 29. júlí - 9. ágúst í  Torquay á Englandi. Howell hlaut 9,5 vinning í 11 skákum og samsvaraði frammistaða hans 2768 skákstigum. í 2.-4. sæti með 8 vinninga urðu stórmeistararnir Gawain Jones (2643), Mark Hebden (2555) og  Stephen Gordon (2521).

Yfir 1000 keppendur tóku þátt á breska meistaramótinu í 23 flokkum. Þar af voru 13 stórmeistar. Stærstu bresku stjörnurnar Adams, McShane og Short tóku ekki þátt.

Heimasíða mótsins

Stórmót Árbæjarsafns og TR fer fram í dag

Stórmót Árbæjarsafns og Taflfélags Reykjavíkur fer fram í níunda sinn sunnudaginn 11. ágúst. Teflt verður í Árbæjarsafni og hefst taflið kl. 14. Tefldar verða sjö umferðir með umhugsunartímanum 7 mín. á skák.

Breyting verður gerð á lifandi taflinu sem verið hefur árviss atburður á Stórmóti Árbæjarsafns og T.R.  Notast verður nú við taflmennina af útitafli Reykjavíkur í stað "lifandi taflmanna".  Hefst sú skák klukkan 13.

Veitt verða verðlaun fyrir þrjú efstu sætin í Stórmótinu, 12.000 kr., 8.000 kr. og 5.000 kr.

Þátttökugjöld í Stórmótinu eru kr. 1.000 fyrir 18 ára og eldri, en ókeypis fyrir yngri en 18 ára, eldri borgara (67) og öryrkja.  Þátttökugjöld eru jafnframt aðgangseyrir að safninu en þeir sem þegar hafa aðgang, t.d. með menningarkorti, þurfa ekki að borga þátttökugjald.

Frekari upplýsingar veitir Torfi Leósson, netfang: ([e-mail]) eða í síma 697-3974.  

Mótið er jafnan upphafsviðburður skákársins, og við vonumst til að sjá sem flesta á þessu skemmtilega móti.

Borgarskákmótið fer fram á þriðjudag

Borgarskákmótið fer fram þriðjudaginn 13. ágúst, og hefst það kl. 16:00. Mótið fer fram venju samkvæmt í Ráðhúsi Reykjavíkur og standa Reykjavíkurfélögin, Taflfélag Reykjavíkur og Taflfélagið Hellir, að mótinu, eins og þau hafa gert síðustu ár. Gera má ráð fyrir að margir af sterkustu skákmönnum þjóðarinnar taka þátt í því. Skákmenn eru hvattir til að skrá sig sem fyrst eftir að opnað verður fyrir skráningu. Mótið er öllum opið og er þátttaka ókeypis en skráning fer fram hér á Skák.is

Einnig er hægt að skrá sig í í síma 866 0116 Vigfús og 899 9268 (Björn). Tefldar verða 7 umferðir með 7 mínútna umhugsunartíma. Þetta er í 27. sinn sem mótið fer fram og er þetta iðulega eitt best sótta skákmót hvers árs. Í fyrra sigraði Sigurbjörn Björnsson sem tefldi fyrir Verkís.

Borgarstjórinn í Reykjavík, Jón Gnarr, setur mótið og leikur fyrsta leik þess.

Verðlaun:

1. 15.000 kr.
2. 10.000 kr.
3. 5.000 kr.

Hátíð í Fischersetri á sunnudag

Sunnudaginn 11.ágúst kemur Helgi Ólafsson stórmeistari til Selfoss og heldur fyrirlestur um kynni sín af Bobby Fischer. 

Þetta er án efa mikill fengur fyrir alla skákáhugamenn sem og aðra enda Helgi ekki bara með eindæmum skemmtilegur fyrirlesari heldur þekkti hann Fischer vel og átti mikil samskipti við hann síðustu æviár heimsmeistarans.

Helgi mun auk þess sem hann segir frá kynnum sínum af Fischer taka þátt í hraðskákmóti sem fram fer að loknu erindi, hann kemur ekki einn, því með honum í för verða nokkrir nemendur hans úr Skákskóla Íslands sem einnig munu taka þátt í hraðskákmótinu.

Hvetjum alla skákáhugamenn til að mæta og hlusta á stórmeistarann og taka síðan nokkrar skákir við efnilegustu börn landsins.  Mótið er náttúrulega síðan einnig góð upphitun fyrir Hraðskákkeppni skákfélaga en þar mætir SSON Taflfélagi Vestmannaeyja á heimavelli Eyjamanna, í Reykjavík!

Fyrirlesturinn hefst kl 13:30 og ætla má að hraðskákmótið sem er öllum opið hefjist um klukkustund síðar.

Guðmundur með jafntefli við stórmeistara í dag

Guðmundur Kjartansson (2434) gerði jafntefli við spænska stórmeistarann Daniel Alsina Leal (2538) í áttundu og næstsíðustu umferð Badalona-mótins sem fram fór í dag. Guðmundur hefur 6 vinninga og er í 4.-8. sæti.

Í lokaumferðinni, sem fram á morgun, teflir hann við alþjóðlega meistarann Felix Jose Ynojosa (2405) frá Venesúela.

Spænski alþjóðlegi meistarinn Joan Fluvia Poyatos (2491) er efstur á mótinu með 7 vinninga.

Alls taka 94 skákmenn frá 21 landi þátt í efsta flokki. Meðal keppenda eru sex stórmeistarar og 22 alþjóðlegir meistarar. Guðmundur er nr. 17 í stigaröð keppenda.

Engar beinar útsendingar.

• Heimasíða mótsins
• Chess-Results 

Bragi vann í Riga í dag

Bragi Þorfinnsson (2493) vann bandaríska FIDE-meistarann Valdis Saulespurens (2324) í 7. umferð alþjóðlega mótsins í Riga sem fram fór í dag. Björn (2403), bróðir hans, tapaði hins vegar fyrir eistneska FIDE-meistaranum Egons Lavendelis (2300).

Bragi hefur 4,5 vinning en Björn hefur 3,5 vinning. Fimm skákmenn eru efstir og jafnir með 4,5 vinning. Það eru alþjóðlegu meistararnir Mikhail Antipov (2488), Rússlandi, og Daniel Naroditsky (2503), Bandaríkjunum, og stórmeistararnir Robin Van Kampen (2606), Hollandi, Aloyzas Kveinys (2491), Litháen, og Igors Rausis (2552), Tékklandi. 

Í áttundu og næstsíðustu umferð, sem fram fer á morgun, tefla þeir báðir við titillausa andstæðinga. Bragi við Ísraelsmann (2341) en Björn við Eista (2214).

Alls taka 173 skákmenn frá 28 löndum þátt í efsta flokki. Þar af eru 27 stórmeistarar og jafnmargir alþjóðlegir meistarar. Bragi er nr. 24 í stigaröð keppenda en Björn er nr. 46.

• Heimasíða mótsins 
• Chess-Results
• Beinar útsendingar (ýmist kl. 8 eða kl. 14)

Hannes efstur í Búdapest - vann Varga í dag

Stórmeistarinn Hannes Hlífar Stefánsson (2526) er efstur á First Saturday-móti sem nú er í gangi í Búdapest. Að loknum sex umferðum hefur hann 4 vinninga. Í fimmtu umferð tapaði hann fyrir Bandaríkjamanninum Erik F. Santarius (2263) en í sjöttu umferð sem fram fór í dag, vann hann ungverska stórmeistarann Zoltan Varga (2449).

Í sjöundu umferð, sem fram fer á morgun, teflir hann við Kínverjann Jia Haoxiang (2363).

Hannes teflir í lokuðum 10 manna flokki þar sem meðalstigin eru 2410 skákstig. Hannes er næststigahæstur keppenda.

• Heimasíða mótsins
• Chess-Results

 

Dagur vann í lokaumferðinni - endaði í 3.-10. sæti

Alþjóðlegi meistarinn Dagur Arngrímsson (2385) vann rúmenska alþjóðlega meistarann Ervin Mozes (2207) í níundu og síðustu umferð Arad-mótsins í Rúmeníu sem fram fór í morgun.

Dagur hlaut 7 vinninga og endaði í 3.-10. sæti á mótinu. Hann mætti 8 Rúmenum í þessum 9 umferðum! Frammistaða hans samsvaraði 2392 skákstigum og hækkar hann um 3 stig fyrir hana. 

Sigurvegarar mótsins með 7½ vinning voru úkraínski alþjóðlegi meistarinn Konstantin Tarlev (2545) og ungverski stórmeistarinn Attila Czebe (2467).

241 skákmaður frá 16 löndum tók þátt í mótinu. Þar af voru 8 stórmeistarar og 19 alþjóðlegir meistarar. Dagur var nr. 21 í stigaröð keppenda.

• Heimasíða mótsins
• Chess-Results
• Beinar útsendingar (ýmist kl. 6:30/7:00 eða 13:30)