Hrannar sigraði á móti í Sandnessi

Hrannar Baldursson (2138) er búsettur í Noregi og teflir þar reglulega. Hann vann öruggan sigur á skákmóti sem fram fór 3. september - 3. desember í Sandnessi. Hann hlaut 6½ vinning í 7 skákum og var vinningi fyrir ofan næstu mann.

Mótstöflu má nálgast hér.

 

Jólaskákmót í Vin á mánudaginn: Ljúffengir vinningar!

Vinaskákfélagið og Hrókurinn bjóða til jólaskákmóts í Vin, Hverfisgötu 47, mánudaginn 9. desember klukkan 13. Tefldar verða sex umferðir með 7 mínútna umhugsunartíma, og verðlaunin eru sannkallað hnossgæti, enda í boði Argentínu steikhúss, Lækjarbrekku og Nóa-Síríus. Sigurvegari mótsins fær heldur engan venjulegan verðlaunabikar, heldur djásn frá Grænlandi.

Þetta er 10. árið í röð sem Vinaskákfélagið og Hrókurinn standa fyrir jólamóti í Vin, sem er griðastaður á vegum Rauða krossins á Íslandi. Daglega er teflt í Vin, en fastar æfingar eru á mánudögum kl. 13. Reglulega eru haldin stórmót, og jólaskákmótið er einn af hápunktum ársins.

Allir eru hjartanlega velkomnir til að tefla eða fylgjast með, og njóta þeirra ljúffengu veitinga sem jafnan eru í boði á mótum Vinaskákfélagsins. Þátttaka er ókeypis, en keppendum býðst að  kaupa miða í jólahlutaveltu Ferðafélagsins Víðsýnar, en markmið félagsins er að efna til ferða fyrir félagsmenn, auka lífsgæði þeirra og gleði.

Einkunnarorð Jólaskákmótsins eru: Við erum ein fjölskylda! 

 

Skráning hafin í Friðriksmót Landsbankans - Íslandsmótið í hraðskák

Skráning er hafin í Friðriksmót Landsbankans - Íslandsmótið í hraðskák - sem fer fram í útibúi Landsbankans við Austurstræti 11 laugardaginn 14. desember nk. Mótið hefst kl. 13 og stendur til kl. 16.30.

Gera má ráð fyrir að flestir sterkustu skákmenn landsins taki þátt og efsti keppandi mótsins fær titilinn Íslandsmeistari í hraðskák. Skráning fer fram á Skák.is og hófst í morgun. Skákmenn eru hvattir til að skrá sig sem fyrst enda takmarkast þátttaka við um 80 manns. Gildir þar lögmálið, fyrstir koma, fyrstir fá, en þó njóta stórmeistarar og alþjóðlegir meistarar forgangs varðandi þátttöku.

Hægt er að fylgjast með skráningu í mótið hér.

Þetta er tíunda árið í röð sem Landsbankinn og Skáksamband Íslands standa fyrir Friðriksmótinu í skák, en mótið er haldið til heiðurs Friðriki Ólafssyni, fyrsta stórmeistara Íslendinga. Margir af sterkustu stórmeisturum landsins hafa undanfarin ár teflt til heiðurs Friðriki.

Verðlaun fyrir efstu sæti eru eftirfarandi

1. 100.000 kr.
2. 60.000 kr.
3. 50.000 kr.
4. 30.000 kr.
5. 20.000 kr.

Aðalverðlaun skiptast séu menn jafnir að vinningum.  

Aukaverðlaun

• Efsti strákur 16 ára og yngri: 10.000 kr.
• Efsta stúlka 16 ára og yngr: 10.000 kr.
• Efsta konan: 10.000 kr.
• Efsti maður með 2.200 stig og minna: 10.000 kr.
• Efsti maður með 2.000 stig og minna: 10.000 kr.
• Útdreginn heppinn keppandi: 10.000 kr.

Aukaverðlaun eru miðað við nýjustu útgefin íslensk skákstig. Reiknuð eru stig séu menn jafnir og efstir. 

Fyrri sigurvegarar

• 2012 - Bragi Þorfinnsson, Hjörvar Steinn Grétarsson og Jón Viktor Gunnarsson
• 2011 - Henrik Danielsen
• 2010 - Jón Viktor Gunnarsson og Þröstur Þórhallsson
• 2009 - Héðinn Steingrímsson
• 2008 - Helgi Ólafsson
• 2007 - Héðinn Steingrímsson
• 2006 - Helgi Áss Grétarsson
• 2005 - Jón Viktor Gunnarsson og Arnar E. Gunnarsson
• 2004 - Jóhann Hjartarson og Stefán Kristjánsson

Chess-Results

Jón Árni og Loftur sigurvegarar Skákþings Garðabæjar - Bjarnsteinn skákmeistari TG og Garðabæjar

Jón Árni Halldórsson (2193) og Loftur Baldvinsson (1923) urðu efstir og jafnir á Skákþingi Garðabæjar sem lauk (næstum því) í gærkvöldi. Þeir hlutu 6 vinninga í 7 skákum. Loftur gerði sér lítið fyrir og vann Gylfa Þórhallsson (2154) í lokaumferðinni. Gauti Páll Jónsson (1565) og Bjarnsteinn Þórsson (1781) sem áttu báðir afar gott mót urðu í 3.-4. sæti. Bjarnsteinn varð í senn bæði skákmeistari Garðabæjar sem og skákmeistari Taflfélags Garðabæjar.

Gauti Páll (1565) vann Siguringa Sigurjónsson (1964) í lokaumferðinni. Loftur, Gauti og Bjarnsteinn hækka allir verulega á skákstigum.

Einni skák er ólokið en hún hefur ekki áhrif á röð efstu manna. Mótstöflu a-flokks má finna á Chess-Results.  

Brynjar Bjarkason (1179) sigraði í b-flokki en hann hlaut 6 vinninga. Þorsteinn Magnússon (1286), Mykhaylo Kravcnhuk (1472) og Bjarki Arnaldarson (1075) urðu jafnir í 2.-4. sæti. 

Mótstöflu b-flokks má finna á Chess-Results.

• Heimasíða TG
• Chess-Results

Rússar heimsmeistarar landsliða

Rússar eru heimsmeistarar landsliða. Það er ljóst eftir æsispennandi lokaumferð á HM landsliða sem lauk í Antalya í Tyrklandi í gær. Rússarnir unnu þá Egyptana með minnsta mun. Rússarnir byrjuðu illa, gerðu jafntefli í fyrstu umferð, töpuðu í þeirri annarri en sjö sigrar í röð tryggði sigurinn. Kínverjarnir náðu öðru sætinu en Úkraínumenn sem leiddu lengst af enduðu í þriðja sæti.

• Heimasíða mótsins
• Beinar útsendinga

Halldór og Gylfi efstir á Vetrarmóti öðlinga

Halldór Pálsson (2051) og Gylfi Þór Þórhallsson (2154) eru efstir með 5 vinninga að lokinni sjöttu umferð Vetrarmóts öðlinga sem fram fór í gærkvöldi. Halldór vann stigahæsta keppandann Hrafn Loftsson (2218) en Gylfi lagði Harald Baldursson (1980), sem var efstur fyrir umferðina, að velli.  Gylfi og Halldór mætast í lokaumferðinni sem fram fer nk. miðvikudagskvöld og því öruggt að a.m.k. annar þeirra verður efstur.

Haraldur, Jon Olav Fivelstad (1910) og Magnús Pálmi Örnólfsson (2169) eru í 3.-5. sæti með 4½ vinning.

Í lokaumferðinni mætast meðal annars: Gylfi-Halldór, Haraldur-Magnús og Hrafn-Jon Olav.

Mótstöflu má nálgast á Chess-Results.

• Heimasíða TR
• Chess-Results 
• Myndaalbúm (GB)

Haustmót yngri flokka - Sprettsmótið

Laugardaginn 7. desember verður haustmót yngri flokka SA háð í Skákheimilinu.

Þangað eru allir krakkar fæddir 1998 og síðar boðnir velkomnir. Teflt verður í um meistaratitil skákfélagsins í unglingaflokki og í þremur eftirtöldum aldursflokkum:

• Í flokki 11 ára og yngri (fædd 2002 og síðar)
• Í flokki 12-13 ára (fædd 2000 og 2001)
• í flokki 14-15 ára (fædd 1998 og 1999

Tefldar verða 7 umferðir með 15 mín. umhugsunartíma, en mótshaldari áskilur sér þó rétt til að breyta fjölda umferða og umhugsunartíma lítillega ef það hentar betur þegar fjöldi keppenda liggur fyrir.

Hitt er þó víst að áður en síðasta umferð hefst verða bornar á borð pizzur í boði Spretts-inn, sem löngum hefur verið okkur skákmönnum innan handar í pizzumálum. Svaladrykkur býðst með pizzunum og herma heimildir okkar að þær verði óvenju ljúffengar að þessu sinni.

Þátttaka er með öllu ókeypis og hefst mótið kl. 13 laugardaginn 7. desember 

Ath. að teflt verður í suðursal félagsins - ekki þar sem æfingarnar eru venjulega

Áshreppningar unnu Héraðsmót HSK

Héraðsmót HSK í sveitakeppni í skák var haldið í Fischer-setrinu á Selfossi 27. nóvember 2013. Tefldar voru atskákir og skipuðu fjórir einstaklingar hverja sveit, óháð aldri eða kyni. 

Fimm sveitir mætti til leiks og lið Umf. Ásahrepps stóð uppi sem sigurvegari með 12,5 vinninga af 16 mögulegum. Þetta er í fyrsta skipti sem lið félagsins vinnur HSK meistaratitil í skák. Sigurliðiðið skipuðu þeir Grantas Grigoranas, Erlingur Jensson, Magnús Garðarsson og Þorvaldur Siggason. Erlingur og Þorvaldur voru einnig með bestan einstaklingsárangur en þeir unnu allar skákir sínar.

Úrslit urðu sem hér segir:

Umf. Ásahrepps - Umf. Hekla       3 - 1

Umf. Gnúpverja - Umf. Selfoss     1,5 - 2,5

Umf. Ásahrepps - Íþr.f. Dímon      3 - 1

Umf. Hekla - Umf. Gnúpverja        2 - 2

Umf. Ásahrepps - Umf. Gnúpverja 3,5 - 0,5

Umf. Selfoss - Íþr.f. Dímon          3,5 - 0,5

Umf. Ásahrepps - Umf. Selfoss     3 - 1

Umf. Hekla - Íþr.f. Dímon             2 - 2

Umf. Selfoss - Umf. Hekla            4 - 0

Íþr.f. Dímon - Umf. Gnúpverja      0 - 4

 

Lokataðan:

1.    Umf. Ásahrepps       12,5 vinningar

2.    Umf. Selfoss           11 vinningar

3.    Umf. Gnúpverja         8 vinningar

4.    Umf. Hekla               5 vinningar

5.    Íþr.f. Dímon              3,5 vinningar

F3-klúbburinn hefur sína starfsemi í kvöld - HM-kvöld í umsjón Helga Ólafssonar

F3-klúbburinn - vildarvinir skákarinnar tekur formlega til starfa fimmtudagskvöldið 5. desember en þá verður stofnfundur klúbbsins og klúbbskírteini afhend. Þá verður jafnframt fyrsti viðburður klúbbsins sem ber nafnið HM-kvöld. Helgi Ólafsson fer yfir hápunkta HM-einvígisins á milli Carlsen og Anand.  

Bóksala Sigurbjörns verður með bókatilboð á völdum skákbókum auk þess sem Bobbý Skákverslun mun kynna skákklukkur og taflsett. Tilvalið í jólapakka skákmannsins!

HM-kvöldið stendur yfir á milli kl. 20-22. Léttar veitingar verða í boði. 

HM-kvöldið er opið fyrir alla meðlimi F3-klúbbsins. Allar upplýsingar um klúbbinn má nálgast hér.

Sérstakur gestur kvöldsins og heiðursfélagi í klúbbnum verður fyrsti stórmeistari Íslendinga, Friðrik Ólafsson. Hann einn þeirra sem þriggja sem klúbburinn er kenndur við en hinir eru Williard Fiske og Bobby Fischer. 

Skákáhugamenn eru hvattir til að ganga í klúbbinn og styðja um leið við skákíþróttina.

Skráning í klúbbinn fer fram hér og einnig efst á Skák.is

Eitt fyrsta verkefni klúbbsins verður að styðja við endurnýjun á skákmunum Skáksambandsins sem þarfnast endurnýjunar.  

 

Öldungis fyrirlestur (eða hvernig Áskell missti af áfanganum)

Að venju verður opið hús í Skákheimili Skákfélags Akureyrar á fimmtudagskvöldið.  Í þetta sinn ætlar Áskell Örn Kárason að stytta gestum stundir með frásögn af ferð sinni á heimsmeistaramót öldunga í Króatíu fyrir skemmstu.

Áskell mun fara yfir nokkrar skákir sínar á mótinu, m.a. hina afdrifaríku viðureign við „Íslandsvininn" Mihai Suba  þegar áfangi að alþjóðlegum meistaratitli var innan seilingar.  Þá verða sýndar myndir frá mótinu; meira að segja hreyfimyndir ef vel tekst til. Fleira verður til skemmtunar ef fyrirlesarinn verður í stuði.

Kaffi verður á könnunni.

Á myndinni sést fráfarandi heimsmeistari, Jens Kristiansen að hefja skák sína við Per Ofstad, sem varð síðast Noregsmeistari árið 1961. Áskell virðist vera að huga að einhverju öðru en skák þeirra félaganna.