Ari og Sæbjörn efstir í Ásgarði í dag.

Það mættu tuttugu og fimm baráttufúsir eldri skákmenn til leiks í Ásgarði í dag. Ari Stefánsson og Sæbjörn G Larsen urðu efstir og jafnir með 7,5 vinning. Ari var hærri á stigum og er því Hrókur dagsins. Jafnir í þriðja til fjórða sæti urðu svo Viðar Jónsson og Gunnar Finnsson með 7 vinninga. Viðar var aðeins hærri á stigum. Viðar er Austfirðingur, frá Stöðvarfirði og er sterkur skákmaður, hann kemur við hjá okkur og Riddurunum þegar hann er staddur í bænum. Það er ávallt ánægjulegt að fá óvænta gesti.

Nánari úrslit dagsins:

1-2       Ari Stefánsson                                                7.5 vinninga

            Sæbjörn G Larsen                               7.5

3-4       Viðar Jónsson                                      7

            Gunnar Finnsson                                 7

5-6       Stefán Þormar                                     6.5

            Haraldur Axel                                     6.5

7-9       Guðfinnur R Kjartansson                    6

            Þorsteinn K Guðlaugsson                   6

            Ásgeir Sigurðsson                               6

10-11   Jón Steinþórsson                                 5.5

            Magnús V Pétursson                           5.5

12-16   Valdimar Ásmundsson                       5

            Baldur Garðarsson                              5

            Hlynur Þórðarson                                5

            Gísli Árnason                                      5

            Jón Bjarnason                                      5

Næstu níu skákmenn voru svo með svolítið færri vinninga í þetta sinn.

Íslandsmót barna fer fram á laugardag í Rimaskóla

Íslandsmót barna í skák fer fram í Rimaskóla laugardaginn 12. janúar og hefst klukkan 12. Þátttökurétt hafa börn í 1. til 5. bekk (fædd 2002 og síðar) og sigurvegarinn fær sæmdarheitið Íslandsmeistari barna 2013 og keppnisrétt á Norðurlandamótið í skólaskák sem haldið er að Bifröst í febrúar 2013.
 
Alls verða tefldar 9 umferðir með 10 mínútna umhugsunartíma. Eftir 5 umferðir verður keppendum fækkað þannig að þeir sem hafa 3 vinninga eða fleiri halda áfram keppninni um Íslandsmeistaratitilinn en þeir sem hafa færri en 3 vinninga hafa lokið þátttöku.

Þetta er í 20. sinn sem keppt er um Íslandsmeistaratitil barna. Sigurður Páll Steindórsson sigraði á fyrsta mótinu árið 1994, en meðal annarra meistara má nefna titilhafana Dag Arngrímsson, Guðmund Kjartansson og Hjörvar Stein Grétarsson. Núverandi Íslandsmeistari barna er Nansý Davíðsdóttir. Hún er eina stúlkan sem hefur hampað titlinum.
 
Skáksamband Íslands og Skákakademían annast framkvæmd mótsins. Keppendur eru hvattir til að skrá sig sem fyrst á Skák.is (skráning opnar hér í dag). Þátttökugjald er 1.000 kr (1.500 að hámarki á systkini) og greiðist á mótsstað fyrir upphaf umferðar. Hægt er að fylgjast með skráningu hér.

Veitt eru sérstök verðlaun fyrir bestan árangur í hverjum árgangi.

Sigurvegarar á Íslandsmóti barna frá upphafi:
 

• 1994 Sigurður Páll Steindórsson
• 1995 Hlynur Hafliðason
• 1996 Guðjón H. Valgarðsson
• 1997 Dagur Arngrímsson
• 1998 Guðmundur Kjartansson
• 1999 Víðir Smári Petersen
• 2000 Viðar Berndsen
• 2001 Jón Heiðar Sigurðsson
• 2002 Sverrir Þorgeirsson
• 2003 Hjörvar Steinn Grétarsson
• 2004 Svanberg Már Pálsson
• 2005 Nökkvi Sverrisson
• 2006 Dagur Andri Friðgeirsson
• 2007 Kristófer Gautason
• 2008 Kristófer Gautason
• 2009 Jón Kristinn Þorgeirsson
• 2010 Jón Kristinn Þorgeirsson
• 2011 Dawid Kolka
• 2012 Nansý Davíðsdóttir

Gallerý Skák - Nýársmótið: Gunnar Gunnarsson hrósaði sigri - einu sinni enn

Nýársmót og fagnaður Gallerý Skákar í síðustu viku kveikti skákneistann í mönnum á ný eftir bílífi hátíðanna.  Góður blandaður hópur yngri og eldri skákmanna úr ýmsum félögum var þar saman kominn  Fulltrúar „sjálfhverfu kynslóðarinnar" sem allir ætluðu sér mikið og  sumir um of eins og kom á daginn. Betra er kapp með forsjá.    

Mótið var einkar jafnt og tvísýnt að þessu sinni og  lauk með frækilegum sigri hins aldna meistara Gunnars Gunnarssonar (79) sem gerir það ekki endasleppt þrátt fyrir háan aldur, fyrrv. Íslandsmeistara í skák og fótamennt.  Að vísu lenti hann oft í kröppum dansi að þessu sinni m.a. við annan meistara á sínu sviði, sem landað hefur fleiri (stór) löxum en nokkur annar Íslendingur (20.000 fiskum), sennilega mesti laxabani í heimi fyrr og síðar.  Nýkjörinn aflakló ársins 2012.  Þórarinn Sigþórsson (74), betur þekktur sem Tóti Tönn meðal kollega sinna, vann Gunnar glæsilega og varð í öðru sæti.  Þórarinn var virkur og öflugur meistaraflokksmaður á sinni tíð, fyrir tæpri hálfri öld eða svo.  Mikill og harðskeyttur keppnismaður sem gefur ekkert eftir fyrr en í fulla hnefanna, hvort  sem um er að ræða að landa laxi við erfiðar aðstæður eða  snúnum vinningi í skák með hálfgerðum töfrabrögðum. Hann hefur engu gleymt þrátt fyrir að hafa ekki teflt að ráði árum saman. Sneri til baka í fyrra fyrir áeggjan góðra vina og tók að tefla sér yndisauka og öðrum til hrellingar í Gallerýinu þó hann sé enn í fullu starfi og ekki farinn að hægja ferðina á öðrum áhugasviðum enda ákafur stang- og skotveiðimaður.

 Það er mikill akkur fyrir skákunnendur að fá Tóta aftur að taflborðinu og upplifun fyrir bæði yngri sem eldri að fá tækifæri til að etja kappi við svo slyngan og þekktan keppnismann sem hann. Skák hans við Gunna Gunn mótaðist af miklum undirliggjandi flækjum og mikilli stöðubaráttu og endaði í feikilegum  darraðardansi þar sem Þórarinn sýndi styrk sinn og útsjónarsemi og vann að lokum eins og sjá má á meðf. myndasyrpu, og var unun með að fylgjast og á að horfa.

Stundum er ekki síður skemmtilegt að fylgjast með öðrum tefla  en að tefla sjálfur, því að tefla skák er oft á tíðum mikil þolraun og þrautaganga.  Stefán Þormar Guðmundsson (67), sem varð þriðji sýndi líka hvers hann er megnugur og vann Gunnar í fyrstu umferð, enda ekki titlaður Hellisheiðarséníið fyrir ekki neitt.  Svo kom Páll G. Jónsson (77) með sinn Xfaktor í fjórða sæti og  síðan ýmsir kunnir kappar og upprennandi snillingar í halarófu. 

Kristján Hreinsson, skáld hinn djúpúðgi, kom sterkur til leiks en hann hefur ekki sést lengi í mótum vegna djúpköfunar í viskubrunna heimspekinnar í tengslum við BA-ritgerð hans í háskólanum.  Var honum fagnað með virtum. Varpaði hann þá  af munni fram eftirfarandi stöku „Nú var haldið Nýársmót /  og nokkrum tókst að bjóða. /  Sumum varð það sárabót  / að sjá þar skáldið góða!"  Kristján oft nefndur Skerjafjarðarskáld en einn mesti hagyrðingur sem nú er uppi, snilldar textahöfundur og afar glúrinn skákmaður.  Hann setti af slægð sinni og slóttugheitum óvænt strik í reikning og  sigurgöngu sumra eins og Friðgeirs, Þórarins, Jóns, Kristófers og fleiri,  en aðrir urðu þeim mun glaðari og fegnari að sjá hann. Hinn efnilegi yngissveinn Gauti Páll Jónsson stóð vel fyrir sínu og lauk keppni með 50%  vinningshlutfall og sýndi að hann er orðinn vel að sér í skákfræðunum, efnilegur piltur sem á framtíðina fyrir sér.  Sjá má nánari úrslit hér að neðan og vettvangsmyndir í myndasafni.

 

 

Það verður teflt að nýju í Gallerýinu næsta fimmtudagskvöld kl. 18-22 og eflaust margir sem vilja hefna harma sinna í innbyrðis viðureignum fastagesta og reyna sig gegn nýjum velkomnum leynigestum.

 

 

 ESE- Skákþankar frá Skorradal 7.1.2013  

Skákþing Akureyrar hefst 13. janúar

Skákþing Akureyrar hefst sunnudaginn 13. janúar kl. 13.00. Teflt verður í Skákheimilinu í Íþróttahöllinni við Skólastíg.

Teflt verður í einum flokki og er öllum heimil þátttaka. Aðeins þeir skákmenn sem eiga lögheimili eða eru fullgildir félagsmenn í Skákfélagi Akureyrar geta unnið titilinn sem teflt er um: „SKÁKMEISTARI AKUREYRAR 2013."

Á mótinu eru áformað að tefla 8-10 umferðir á eftirtöldum dögum

• Sunnudaginn 13. janúar kl. 13.00         1. umferð
• Fimmtudaginn 17. janúar kl. 18.00       2. umferð
• Sunnudaginn 20. janúar kl. 13.00         3. umferð
• Fimmtudaginn 24. janúar kl. 18.00       4. umferð
• Sunnudaginn 27. janúar kl. 15.00         5. umferð
• Þriðjudaginn 29. febrúar kl. 18.00        6. umferð
• Sunnudaginn 3. febrúar kl. 13.00         7. umferð
• Fimmtudaginn 7. febrúar kl. 18.00       8. umferð
• Sunnudaginn 10. febrúar kl. 13.00       9. umferð
• Sunnudaginn 17. febrúar kl. 13.00       10. umferð

Mótsstjórn ákveða endanlegan fjölda umferða og tafldaga þegar fjöldi þátttakenda liggur fyrir. Ákvörðun um þetta mun liggja fyrir við upphaf 1. umferðar. 

Umhugsunartími verður 90 mínútur á skákina, auk þess sem 30 sekúndur bætast við tímann fyrir hvern leik (90+30).

Þátttökugjald er kr. 3.000 fyrir skuldlausa félagsmenn, kr. 4.000 fyrir aðra. Þátttaka er ókeypis fyrir þá unglinga sem greitt hafa æfingagjald. 

Þátttaka tilkynnist formanni félagsins með tölvupósti í [e-mail], eða á skákstað eigi síðar en 10 mínútum fyrir auglýst upphaf 1. umferðar.

Skák Þrastar frá Ólympíuskákmótinu valin skák ársins

Samkvæmt vali Hornverja var skák ársins 2012 skák Þrastar Þórhallssonar gegn Muhammed Dastan í Ólympíumótinu í Tyrklandi 2012! Þetta er í annað sinn sem Þröstur vinnur þennan titil og hefur hann alltaf átt tilnefnda skák.

1. Þröstur Þórhallsson - Muhammed Dastan   23   57% 
2. Gunnar Björnsson - Þorsteinn Þorsteinsson   8   20% 
3. Þorvarður Fannar Ólafsson - Sigurður Daði Sigfússon   6   15% 
4. Guðmundur Gíslason - Viktor Kortsnoj   2   5%   
5. Sverrir Örn Björnsson - Hjörvar Steinn Grétarsson   1   3% 

Skák ársins
2009: Þröstur Þórhallsson - Guilleux Fabien Reykjavíkurskákmótinu 2009  http://skaksamband.is/assets/Timaritid_Skak/Bestu2009.pgn og http://skaksamband.is/assets/Timaritid_Skak/Bestu2009.pgn
2010: Lenka Ptacnikova - Evu Repkova ÓL í Khanty-Mansiysk september 2010 http://hornid.com/cgi-bin/mwf/topic_show.pl?tid=11127
2011: Hjörvar Steinn Grétarsson - Alexei Shirov EM landsliða 2011 http://hornid.com/cgi-bin/mwf/topic_show.pl?pid=72153
2012: Þröstur Þórhallsson - Muhammed Dastan ÓL Tyrklandi 2012 http://skak.blog.is/blog/skak/entry/1257152/

Skákæfingar fyrir ungmenni hefjast hjá Breiðabliki í dag

Skákdeild Breiðabliks er með æfingatíma fyrir ungmenni 16-25 ára í Stúkunni við Kópavogsvöll á mánudögum kl 17-19 í vetur.

Þetta verður skákæfingar fyrir ungmenni og stjórnað af ungmennum.

Þetta er einn flottasti skáksalur á landinu og þarna er tækifæri fyrir unga skákmenn til að koma saman tefla, stúdera, fá fyrirlesara, fjöltefli eða bara hvað sem er tengt skák.

Páll Andrason ætlar að stjórna æfingunum og svo hjálpast þáttakendur við að hafa þetta skemmtilegt.
Kjarninn verður ungir skákmenn úr Kópavogi, en utanbæjarmenn eru líka velkomnir!

Fyrsti tíminn verður mánudaginn 7.janúar.

Skákdeild Breiðabliks

Atkvöld hjá Helli í kvöld

Taflfélagið Hellir heldur atkvöld mánudaginn 7. janúar nk. og hefst taflið kl. 20:00. Fyrst eru tefldar 3 hraðskákir þar sem hvor keppandi hefur 5 mínútur til að ljúka skákinni og síðan þrjár atskákir, með fimmtán mínútna umhugsun. Teflt er í félagsheimili Hellis í Álfabakka 14a í Mjóddinni. 

Sigurvegarinn á hraðkvöldinu fær í verðlaun máltíð fyrir einn á Saffran. Einnig verður dreginn út af handahófi annar keppandi sem einnig fær máltíð fyrir einn á Saffran. Þar eiga allir jafna möguleika, án tillits til árangurs á mótinu. Þátttökugjöld eru kr. 300 fyrir félagsmenn (kr. 200 fyrir 15 ára og yngri) og kr. 500 fyrir aðra (kr. 300 fyrir 15 ára og yngri)

Áskell fyrsti fjórðungur ársins

Í dag laust eyfirsku skákköppum saman á fyrsta fjórðungsmóti ársins - en þar hafa menn til umráða fjórðung stundar til umhugsunar í hverri skák. Nýta menn þann tíma misvel. Í þetta sinn gerðu ellefu kappar tilkall til sigursins og fengu til þess sjö skákir hver. Þrátt fyrir tap í síðustu umferð fyrir fjandvini sínum Sveinbirni, tókst Áskatli Erni að innbyrða sigur í mótinu, enda tapaði helsti keppinautur hans, sem ber viðurnefnið Ziggi A, líka sinni skák, fyrir "Kortsnoj norðursins" Karli Agli. Annars var lokaniðurstaðan þessi:

Áskell Örn Kárason   5,5

Sigurðar Arnar- og Eiríkssynir 5

Karl Egill Steingrímsson     4,5

Einar Garðar Hjaltason, Andri Freyr Björgvinsson,

Ari Friðfinnsson og Hjörleifur Halldórsson 3,5

Sveinbjörn Sigurðsson     3

Símon Þórhallsson og Hrenn Hrafnsson  2,5

Næst verður teflt nk. fimmtudag þegar TM-mótaröðin hefst.

Hjörvar með sigur í lokaumferðinni - Guðmundur með jafntefli við stórmeistara

Alþjóðlegi meistarinn Hjörvar Steinn Grétarsson (2516) vann Wales-verjann Francis Rayner (2166) í 10. og síðustu umferð Hastings Chess Congress sem fram fór í dag. Guðmundur Kjartansson (2404) gerði jafntefli við spænska stórmeistarann Daniel Alsina Leal (2511).

Hjörvar fékk 7 vinninga og endaði í 2.-9. sæti. Guðmundur fékk 6 vinninga og endaði í 16.-23. sæti. Frammistaða Hjörvars samsvaraði 2497 skákstigum og stendur hann í stað stigalega fyrir hana. Frammistaða Guðmundar samsvaraði 2500 skákstigum og hækkar hann um 14 stig fyrir hana. Guðmundur heldur því áfram að hækka á stigum en hann hefur hækkað jafnt og þétt á stigum síðustu misseri.

Báðir halda þeir áfram að tefla. Hjövar teflir í Tata Steel mótinu sem hefst í Wijk aan Zee 12. janúar nk. en Guðmundur teflir á alþjóðlegu móti í Sevilla á Spáni sem hefst 11. janúar nk. 

Enski stórmeistarinn, Gawain Jones (2644), sem verður meðal keppenda á N1 Reykjavíkurskákmótinu vann mótið en hann hlaut 7,5 vinning.

92 keppendur tóku þátt og þar af 13 stórmeistarar. Hjörvar var nr. 10 í stigaröð keppenda en Guðmundur var nr. 19.

• Heimasíða mótsins
• Beinar útsendingar (hefjast kl. 14:15)

Skákþáttur Morgunblaðsins: Skákárið 2012

Skákárið 2012 hófst fyrir alvöru hér á landi með lokaumferðum Íslandsmóts taflfélaga og hið árlega Reykjavíkurskákmót hlaut glæsilegan vettvang í Hörpunni. Skákþing Íslands fór síðan fram í Stúkunni á Kópavogsvelli og þar bar helst til tíðinda að Þröstur Þórhallsson, sem teflt hafði sleitulaust í landsliðsflokki síðan 1985, varð Íslandsmeistari í fyrsta sinn eftir æsispennandi einvígi við Braga Þorfinnsson. Kornungir skákmenn vöktu mikla athygli: Hilmir Freyr Heimisson, Vignir Vatnar Stefánsson og Nancy Davíðsson unnu góð afrek á árinu og hinn 14 ára gamli Oliver Aron Jóhannesson var næstum því orðinn heimsmeistari áhugamanna þegar hann fékk ferð á mótið í fermingargjöf. Kvennaliðið stóð sig betur en oft áður á ÓL í Istanbul og karlaliðið var á pari.

Anand tókst með naumindum að verja heimsmeistaratitilinn í einvígi við Boris Gelfand í Moskvu sl. vor en Norðmaðurinn Magnús Carlsen átti sviðið og sló stigamet Kasparovs og er nú með 2861 elo-stig. Þess var minnst víða um heim og einnig hér á landi, að í sumar voru liðin 40 ár frá „einvígi aldarinnar". Í vor kom út bók undirritaðs um Fischer og fékk góðar viðtökur. Hjá uppboðshaldara í Kaupmannahöfn voru boðnir upp gripir tengdir einvíginu en um uppruna þeirra stóðu deilur milli Gunnars Finnlaugssonar búsetts í Svíþjóð og Páls G. Jónssonar. Stuttu síðar var stofnað skáksetur á Selfossi, steinsnar frá grafreit Fischers við Laugardælakirkju. Og einn góðan veðurdag í ágúst hvarf heimsmeistarinn frá ´72, Boris Spasski, frá heimili sínu í Frakklandi. Hann fékk heilablóðfall haustið 2010 og hefur verið bundinn við hjólstól. Frakkar þurftu svo sem ekki að velta þessu máli lengi fyrir sér og áttu ágætis orðatiltæki yfir uppákomuna: Leitið konunnar! Þegar Spasski kom fram nokkrum dögum síðar i Moskvu var hann furðu hress og þá kom auðvitað á daginn að rússnesk kona, Valentina Kuznetsova, hafði hjálpað honum við flóttann. Hann lagði ekki illt orð til nokkurs mann; hafði fundið fyrir „andnauð" á heimili sínu í Frakklandi og óskað sér þess oft að vera aftur nýr. James Bond kvikmyndirnar áttu 50 ára afmæli og skákunnendur hafa fengu tækifæri til að horfa á upphafsatriði „From Russia with love" þar sem skúrkurinn Kroonsteen lagði andstæðing sinn McAdams að velli en lokaatlagan var tekin nánast óbreytt upp úr glæsilegum sigri vinar okkar yfir Bronstein frá sovéska meistaramótinu 1960:

Boris Spasskí - David Bronstein Kóngsbragð

1. e4 e5 2. f4

Kóngsbragðið gafst Spasskí ótrúlega og Bronstein beitti því einnig með góðum árangri og vann m.a. frægan sigur yfir Tal árið 1969.

2. ... exf4 3. Rf3 d5

Í dag er talið best að leika 3. .... d6 veða 3. ... g5.

4. exd5 Bd6 5. Rc3 Re7 6. d4 O-O 7. Bd3 Rd7 8. O-O h6 9. Re4 Rxd5 10. c4 Re3 11. Bxe3 fxe3 12. c5! Be7 13. Bc2 He8

Bæði hér og í næsta leik þráaðist Bronstein við að leika 13. ... f5 sem á að tryggja jöfn færi.

14. Dd3 e2 15. Rd6!

Skilur hrókinn eftir en leikurinn sýnir hversu frumkvæðið er mikilvægt.

15. ... Rf8

16. Rxf7! exf1(D)+ 17. Hxf1 Bf5

Eða 17. .. Kxf7 18. Rg5 + Kg8 19. Bb3+ Kh8 20. Hxf8+ og mát í næsta leik.

18. Dxf5 Dd7 19. Df4 Bf6 20. R3e5 De7 21. Bb3 Bxe5 22. Rxe5 Kh7 23. De4+

- og Bronstein gafst upp.

Helgi Ólafsson

[e-mail]

----------------------------------------------

Skákþættir Morgunblaðsins eru birtir á Skák.is viku síðar en í sjálfu Morgunblaðinu.  

Grein þessi birtist í Sunnudagsmogganum, 30. desember 2012

Skákþættir Morgunblaðsins

[Event "USSR Championship"] [Site "Leningrad (RUS)"] [Date "1960.??.??"] [EventDate "1960.??.??"] [Round "?"] [Result "1-0"] [White "Boris Spassky"] [Black "David Bronstein"] [ECO "C36"] [WhiteElo "?"] [BlackElo "?"] [PlyCount "45"] 1. e4 e5 2. f4 exf4 3. Nf3 d5 4. exd5 Bd6 5. Nc3 Ne7 6. d4 O-O 7. Bd3 Nd7 8. O-O h6 9. Ne4 Nxd5 10. c4 Ne3 11. Bxe3 fxe3 12. c5 Be7 13. Bc2 Re8 14. Qd3 e2 15. Nd6 {One of the deepest sacrifices this side of The Evergreen Game -- Soltis} Nf8 16. Nxf7 exf1=Q+ 17. Rxf1 Bf5 18. Qxf5 Qd7 19. Qf4 Bf6 20. N3e5 Qe7 21. Bb3 Bxe5 22. Nxe5+ Kh7 23. Qe4+ 1-0