Síðasta barna- og unglingaæfing á vormisseri hjá Helli verður í dag

Síðasta Hellisæfingin fyrir börn- og unglinga verður haldin mánudaginn 21. maí. Auk venjulegrar æfingar verða veittar viðurkenningar fyrir veturinn og þátttakendur fá sé pizzu á miðri æfingunni. Úrslit í stigakeppni vetrarins er ljós fyrir síðustu æfinguna en Dawid Kolka hlaut fyrsta sætið, Vignir Vatnar annað sætið og Felix það þriðja. Dawid er einnig með bestu mætinguna á æfingunum í vetur en þar fylgja margir fast á hæla honum en mætingin á æfingunum hefur verið mjög góð í vetur. Til að fá viðurkenningu fyrir mætingu þarf að mæta a.m.k. 20 sinnum.
 

Eftirtaldir fá viðurkenningu fyrir þátttöku og frammistöðuna í vetur:

Fyrir bestu mætinguna:

• Dawid Kolka                              33 mætingar
• Sindri Snær Kristófersson          32 ----"------
• Heimir Páll Ragnarsson             31 ----"------
• Felix Steinþórsson                    30 ----"------
• Vignir Vatnar Stefánsson         28 ----"------
• Bárður Örn Birkisson                28 ----"------
• Björn Hólm Birkisson                28 ----"------
• Óskar Víkingur Davíðsson        27 ----"------
• Pétur Steinn Atlason                25 ----"------
• Róbert Leó Jónsson                 23 ----"------
• Axel Óli Sigurjónsson               21 ----"------
• Ívar Andri Hannesson              20 ----"------
• Egill Úlfarsson                          19 ----"------

Efstir í stigakeppninni:

• 1. Dawid Kolka                                     61 stig
• 2. Vignir Vatnar Stefánsson                50   -
• 3. Felix Steinþórsson                           17   -

Viðurkenningu fyrir framfarir hljóta:

• Bárður Örn Birkisson
• Birgir Logi Steinþórsson
• Björn Hólm Birkisson
• Felix Steinþórsson
• Óskar Víkingur Davíðsson
• Stefán Orri Davíðsson

Hraðkvöld Hellis fer fram í kvöld

Taflfélagið Hellir heldur hraðkvöld mánudaginn 21. maí nk. og hefst taflið kl. 20:00. Tefldar verða 7 umferðir með sjö mínútna umhugsunartíma.  Teflt er í félagsheimili Hellis í Álfabakka 14a í Mjóddinni.

Sigurvegarinn á hraðkvöldinu fær í verðlaun pizzu frá Dominos Pizzum. Einnig verður dreginn út af handahófi annar keppandi, sem einnig fær pizzu hjá Dominos Pizzum. Þar eiga allir jafna möguleika, án tillits til árangurs á mótinu.

Þátttökugjöld eru kr. 300 fyrir félagsmenn (kr. 200 fyrir 15 ára og yngri) og kr. 500 fyrir aðra (kr. 300 fyrir 15 ára og yngri).

Aðalfundur TR fer fram á miðvikudag

Aðalfundur Taflfélags Reykjavíkur verður haldinn miðvikudaginn 23. maí kl. 20 í húsnæði félagsins að Faxafeni 12.

Dagskrá fundarins er venjuleg aðalfundarstörf.

Stjórn T.R.

Björn efstur í Salento ásamt þremur öðrum

Björn Þorfinnsson (2388) er efstur ásamt þremur öðrum skákmönnum að loknum þremur umferðum á alþjóðlegu skákmóti, sem fram fer þessa dagana, í Salento á Ítalíu.   Í dag voru tefldar tvær umferðir.  Í þeirri fyrri gerði Björn jafntefli við ítalska alþjóðlega meistarann Duilio Collutiis (2513) en í þeiri síðari vann hann ítalska alþjóðlega meistarann Fabrizio Bellia (2425).  

Björn hefur 2½ vinning og er efstur ásamt þýska stórmeistaranum Igor Khenkin (2670) og heimamönnunum Roberto Mogranzini (2461) og Francesco Bentivegna (2276).  Björn mætir Khenkin í fjórðu umferð sem fram fer á morgun og hefst kl. 13:30.

Vignir Vatnar Stefánsson (1512) heldur áfram að ná góðum úrslitum í b-flokki en þar var aðeins tefld ein umferð í dag.  Í dag gerði hann jafntefli við mun stigahærri skákmann (1835) og hefur 1½ vinning eftir 2 umferðir.   Hilmir Freyr Heimisson (1752) tapaði sinni skák og hefur 1 vinning.

22 skákmenn tefla í a-flokki og þar af eru 4 stórmeistarar og 6 alþjóðlegir meistarar.  Björn er nr. 8 í stigaröð keppenda.  

• Heimasíða mótsins
• Beinar útsendingar (hefjast almennt kl. 13:30 eða 14:00)

 

Skákþáttur Morgunblaðsins: Haukur Angantýsson

Ég hygg að ég hafi séð Hauk Angantýsson, sem lést hinn 4. maí, í fyrsta sinn í Laugardalshöllinni sumarið 1972. Hann var að skýra skák úr einvígi Fischers og Spasskís. Haukur var ásamt Guðmundi Sigurjónssyni talinn fremsti skákmaður sinnar kynslóðar og á dögum einvígisins fór mikið orð af honum fyrir framgöngu við skákborðið; hann hafði unnið afar öflugt hraðskákmót í skákklúbbi einvígisins í Glæsibæ og voru þar engir veifiskatar á ferð, ef ég man rétt var Friðrik Ólafsson meðal þátttakenda.

Eftir að Haukur kom að loknu efnafræðinámi í Gottingen í Þýskalandi tefldi ég oft við hann á heimili Guðmundar Ágústssonar bakarameistara á Vesturgötunni. Hann jók þátttöku á skákmótum heilmikið, varð efstur við fjórða mann á Skákþingi Íslands 1975, Íslandsmeistari 1976, efstur ásamt greinarhöfundi á Íslandsmótinu 1978 og við þurftum að tefla einvígi um titilinn. Í millitíðinni flugum við vestur um haf og tefldum á opnu móti í þorpi upp við Klettafjöllin í Bandaríkjunum, Lone Pine. Að lokinni eftirminnilegri ferð til Las Vegas settist Haukur á móti gamla undrabarninu Samuel Reshevsky. „Sammy" hafði orð á sér fyrir að vera dálítið „bröndóttur" og í miðri skák tók hann upp leik. Eftir skákina, sem Haukur vann, spurðum við hann af hverju hann hefði látið hinn fræga andstæðing komast upp með þessa framkomu. Við fengum þau svör að hann hefði ekki haft geð í sér til að kalla á skákstjórann.

„Þar fyrir utan," bætti hann við hlæjandi, „tók hann upp besta leikinn í stöðunni."

Á Þýskalandsárum sínum tefldi hann fyrir þarlenda klúbba, háði harða baráttu við Guðmund Sigurjónsson um Íslandsmeistaratitilinn 1968, ári síðar mætti Friðrik Ólafsson og hafði sigur eftir mikla keppni við Guðmund. Þar réð miklu að Guðmundur tapaði fyrir Hauki í skák sem hér fer á eftir:

Skákþing Íslands 1969:

Haukur Angantýsson - Guðmundur Sigurjónsson

Sikileyjarvörn

1. f4 g6 2. Rf3 Bg7 3. g3 c5 4. Bg2 Rc6 5. 0-0 d6 6. e4 e6 7. c3 Rge7 8. Ra3 Hb8 9. Rc2 b5 10. d4 b4 11. c4 Ba6 12. dxc5 Bxc4

Knýr hvítan til að fórna skiptamun, öruggara var var 12.... dxc5 og staðan er í jafnvægi eftir 13. De2.

13. cxd6! Bxf1 14. Kxf1 e5 15. fxe5 Bxe5

Eftir 15.... Rxe5 á hvítur 16. Bg5! peðið á d6 er sem óþægur ljár í þúfu.

16. Rxe5 Rxe5 17. Bf4 R7c6 18. Dd5 Df6 19. Rd4!

Enn einn hnitmiðaður leikur.

19.... g5 20. Rxc6 Rxc6 21. e5 Df5

Nú blasir við að leika 22. Dxc6+ en eftir 22....f8 sleppur kóngurinn til g7 og biskupinn á f4 fellur. Næsti leikur Hauks kom eins og þruma úr heiðskíru lofti.

22. e6! Dxd5 23. Bxd5 Rd4 24. Be5 fxe6 25. Bxh8 Rc2 26. Bc6 Kf7 27. Hc1 b3 28. axb3 Rb4 29. Be5 Rd3 30. He1

- og Guðmundur gafst upp. Glæsileg skák.

Einn sinn stærsta sigur vann Haukur svo á World open-mótinu 1979 og var yfirleitt í toppbaráttunni á þeim mótum sem hann tók þátt í á þessum árum. Það var þungbært fyrir fjölskylduna og alla sem þekktu hann að horfa á Hauk veikjast alvarlega snemma á níunda áratugnum. Hann tefldi alltaf annað veifið eftir það en náði aldrei fyrri styrk. En í veikindum sínum stóð hann keikur; Sævar Bjarnason frændi hans sagði mér að Haukur hefði varla misst úr dag í vinnu sinni við netagerð í Hampiðjunni en þar starfaði hann um áratugaskeið.

Helgi Ólafsson [e-mail]

-------------------------------------------

Skákþættir Morgunblaðsins eru birtir á Skák.is viku síðar en í sjálfu Morgunblaðinu.  

Grein þessi birtist í Sunnudagsmogganum, 13. maí

Skákþættir Morgunblaðsins

Irina Krush bandarískur skákmeistari kvenna

rina Krush (2457) varð í kvöld bandarískur skákmeistari kvenna.  Hún vann Anna Zatonskih (2510) í úrslitaeinvígi 2-0 en þær höfðu komið jafnar í mark á sjálfu aðalmótinu með 7 vinninga í 9 skákum.  Rusudan Goletiani (2333) varð í þriðja sæti með 5½ vinning.

Ekkert skákmót hefur jafn skemmtilegar og líflegar útsendingar og bandaríska meistaramótið í skák.  Það var Macauley Peterson, sem sá um tæknilegu hlið útsendinganna.  Sá sami og sá um útsendingar N1 Reykjavíkurskákmótsins í fyrr í ár.  Peterson hefur þegar samþykkt að taka að sér útsendingar mótsins á næsta ári. 

• Heimasíða mótsins
• Beinar útsendingar
• Myndbandsútsendingar

Henrik sigurvegari alþjóðlegs móts í Óðinsvéum

 

Stórmeistarinn Henrik Danielsen (2498) er sigurvegari á alþjóðlegu móti sem fram fór um helgina í Óðinsvéum í Danmörku.  Henrik hlaut 7 vinninga í 9 skákum rétt eins og makedóníski stórmeistarinn Vladimir Georgiev (2555).  Henrik telst hins vegar sigurvegari mótsins eftir stigaútreikning.

Tvær síðustu umferðirnar fóru fram í dag.  Í þeirri fyrri vann hann búlgarska stórmeistarann Krasimir Rusev (2525) en í þeirri síðari gerði hann jafntefli við danska alþjóðlega meistarann Andreas Skytte Hagen (2425).

Frammistaða Henriks samsvaraði 2632 skákstigum.  Fyrir frammistöðuna hækkar Henrik um heil 17 skákstig og er því aftur kominn yfir 2500 skákstig eftir stutt hlé eins og sjá má á stigalista afreksmanna.

Næst á dagskrá hjá Henrik er lokað alþjóðlegt mót sem fram fer í  Brønshøj í Danmörku 1.-5. júní nk.

56 skákmenn tóku þátt í mótinu og þar af 5 stórmeistarar og 9 alþjóðlegir meistarar.  Henrik var nr. 5 í stigaröð keppenda.

• Heimasíða mótsins
• Chess-Results
• Beinar útsendingar

Álfhólsskóli sigurvegari vinamótsins

Álfhólsskóli sigraði í tveimur síðustu umferðunum á Vinamóti Eyja- og Álfhóls í Kópavogi og unnu því þrjár umferðir af fjórum og þar með mótið.

Í þriðju umferð vann Álfhólsskóli með 3 vinningum gegn 2 vinningum Eyjamanna og í síðustu umferðinni unnu þier með 4,5 vinningum gegn 1/2 vinningi Eyjamanna.

Bestu skákir í hvoru liði um sig voru valdar og unnu þeir sérstök verðlaun: Guðlaugur Gísli Guðmundsson Vestmannaeyjum í 2 umferð og Felix Steinþórsson Álfhólsskóla fyrir skák í 3 umferð.

Frekari umfjöllun um mótið er væntanleg á morgun.

Heimasíða TV

Andleysið tekur enda: Gelfand vann Anand - leiðir 4-3

Þar kom að því að hrein úrslit fengust í heimsmeistaraeinvígi Anand og Gelfand. Gelfand vann sjöundu skákina og leiðir nú 4-3 í einvíginu.  Tefld var slavnesk vörn.  Fyrsta vinningsskák Gelfand gegn Anand síðan 1993!  Áttunda skák einvígisins fer fram á morgun og hefst kl. 11

Henrik Danielsen er með myndbandsskýringar frá hverri skák sem finna má á Chessdom. 

Alls tefla þeir 12 skákir. 

• Heimasíða einvígisins
• ChessBomb
• Myndbandsskýringar Henriks
  

Úrslitaeinvígi Íslandsmótsins í skák fer fram um Hvítasunnuhelgina í Stúkunni

Fjögurra skáka úrslitaeinvígi Íslandsmótsins í skák fer fram Hvítasunnuhelgina, 25.-28. maí, í Stúkunni í Kópavogi.  Til úrslita tefla þeir Þröstur Þórhallsson og Bragi Þorfinnsson.   Alls tefla þeir 4 kappskákir föstudag-mánudag og tefla svo til þrautar á miðvikudaginn 30. maí með styttri tímamörkum verði jafnt eftir þessar 4 skákir.  

Mikið er í húfi því sigurvegarinn vinnur sér bæði inn sæti í landsliði Íslands á Ólympíuskákmótinu í Istanbul í haust og fær keppnisrétt fyrir Íslands hönd á EM einstaklinga sem fram fer í Póllandi í apríl 2013.

Dagskrá:

 

• 1. skák, föstudaginn, 25. maí, kl. 16:00
• 2. skák, laugardaginn, 26. maí, kl. 14:00
• 3. skák, sunnudaginn, 27. maí, kl. 14:00
• 4. skák, mánudaginn, 28. maí, kl. 14:00
• Bráðabani ef jafnt, miðvikudaginn, 30. maí, kl. 16:00 

 

Samhliða einvíginu á föstu- og laugardag tefla þeir Dagur Ragnarsson og Oliver Aron Jóhannesson til úrslita um Íslandsmeistaratitilinn í skólaskák í eldri flokki.