Hrannar sigraði á móti í Noregi

Hrannar Baldursson sigraði á móti í Sandnesi í Noregi nýlega.  Hrannar hlaut 6,5 vinning af 7 mögulegum.  Sat yfir í fyrstu umferð og fékk jafntefli.

Mótstöflu má nálgast á Tournament Service

Meistaramót Skákskólans fer fram 1.-3. júní

Meistaramót Skákskóla Íslands fyrir starfsárið 2011/2012 hefst föstudaginn 1. júní. Tefldar verða sjö umferðir eftir svissneska kerfinu. Þátttökurétt hafa nemendur skólans og allir þeir sem tekið hafa þátt í námskeiðum á vegum  skólans eða hlotið þjálfun á vegum skólans.  

Núverandi meistari Skákskóla íslands er Hjörvar Steinn Grétarsson.   

Þátttökuréttur:

Allir nemendur skólans og þeir sem tekið hafa þátt í námskeiðum á vegum skólans.

Að öðru leyti áskilur skólastjóri/mótsnefnd sér rétt til að bjóða völdum einstaklingum til þátttöku.

Dagskrá mótsins verður með eftirfarandi hætti:

Umferðafjöldi: Sjö umferðir. Í þrem fyrstu umferðunum verða tefldar atskákir en fjórar lokaumferðirnar eru kappskákir.

Tímamörk: Atskákir 25 10  þ.e 25 mínútur að viðbættum sekúndum fyrir hvern leik. 

Kappskákir:  90 30 þ.e. 90 mínútur á alla skákina og 30 sekúndur bætast við eftir hvern leik.

Fyrirkomulag: Svissneska kerfið - Swiss Perfect

Skákstig: Mótið verður reiknað til skákstiga, en þrjár fyrstu umferðirnar til at-skákstiga.

Verðlaun:

A:

1. verðlaun:

Meistaratitill Skákskóla Íslands 2011/2012 og farandbikar. Einnig  flugfar m/Flugleiðum á Evrópuleið* og uppihalds kostnaði kr. 30 þús.

2. verðlaun: Flugfarmiði á leiðum Flugfélags Íslands innanlands.  

3. - 5. verðlaun: Vandaðar skákbækur.

Sérstök stúlknaverðlaun:

Farmiði á leiðum Flugfélags Íslands innanlands.

Aldursflokkaverðlaun. 

1. Tvenn verðlaun fyrir þá keppendur sem ná bestum árangri í hópi 14 ára og yngri

2. Tvenn verðlaun fyrir þær stúlkur sem bestum árangri ná í mótinu.

Verðlaun fyrir keppendur 12 ára og yngri.

1. - 3. verðlaun: Vandaðar skákbækur.

* ^{Mótshaldarinn áskilur sér rétt til að finna hagstæðasta fargjald sem hægt er að fá enda verði tilkynnt um ferðir með góðum fyrirvara.} 

Verðlaunahafi verður að nýta sér farmiða innan 12 mánuða frá lokum mótsins.

B:

Dagskrá:

• 1. umferð: Föstudagurinn 1. júní kl. 18  
• 2. umferð: Föstudagurinn 1. júní kl. 19
• 3. umferð. Föstudagurinn 1. júní kl. 20.
• 4. umferð: Laugardagurinn 2. júní kl. 10-14  
• 5. umferð: Laugardagurinn 2. júní 15 - 19
• 6. umferð: Sunnudagurinn 3. júní kl. 10.-14.
• 7. umferð: Sunnudagurinn 3. júní kl. 15-19.

 ^{* Hljóti einhver stúlka 1. eða 2. verðlaun mun 2. sæti meðal stúlkna gilda til sérstakra stúlknaverðlauna.}

 Verðlaunaafhending fer fram strax að móti loknu.

Þátttöku skal tilkynna í síma SÍ 5689141 á netfangið [e-mail] eða [e-mail] .

Mótsnefnd áskilur rétt til að gera breytingar á fyrirfram boðaðri dagskrá.

Búdapest: Dagur vann í 6. umferð

Dagur Arngrímsson (2381) vann mexíkanska alþjóðlega meistarann Julian Estrado Nieto (2309) í sjöttu umferð First Saturday-mótsins sem fram fór í dag.  Dagur hefur 4 vinninga og er í 2.-4. sæti.

Í 7. umferð, sem fram fer á morgun, teflir Dagur við ungverska stórmeistarann Zoltan Varga (2451).

12 skákmenn tefla í SM-flokki og eru meðalstigin 2393 skákstig.  Til að fá stórmeistaraáfanga þarf 8,5 vinning.

• First Saturday-mótið
• Chess-Results

Reykjavíkurskákmótið 2013

Búið er að fastsetja Reykjavíkurskákmótið 2013.  Það verður haldið 19.-27. febrúar 2013 í Hörpu.  Að þessu sinni verður mótið lengt um eina umferð og verða því tefldar 10 umferðir.   Tvöfaldi dagurinn verður færður framar í mótið og verða 2. og 3. umferð tefldar sama dag.  Búið er að opna fyrir skráningu í mótið á Chess-Results. 

Einnig er búið að fastsetja mótið árið 2014.  Það verður haldið 4.-12. mars 2014 og einnig í Hörpu.  Það ár á Reykjavíkurskákmótið 50 ára afmæli.  

Jafntefli í fyrstu skák heimsmeistaraeinvígis Anand og Gelfand

Jafntefli varð í fyrstu skák heimsmeistaraeinvígis Anand og Gelfand sem fram fór í dag í Moskvu.  Skákin var aðeins 24 leikir.  Önnur skákin fer fram á morgun og hefst kl. 11.

• Heimasíða einvígisins
• ChessBomb

Hraðskákmót á vegum Vinjar í Mosfellsbæ á þriðjudag

Skákfélag Vinjar heldur hraðskákmót í húsnæði Kjósarsýsludeildar Rauða kross Íslands, Þverholti 7 í Mosfellsbæ, þriðjudaginn 15. maí klukkan 13:15.

Tefldar verða sex umferðir með sjö mínútna umhugsunartíma og boðið verður upp á kaffi og léttar veitingar í hléi.

Bókavinningar fyrir efstu sætin sem og happadrætti. Þetta verður huggulegt og kostar ekki krónu.  Endilega mæta tímanlega.

Úrslitaeinvígi Íslandsmótsins í atskák fer fram á RÚV á sunnudag

Úrslitaeinvígi Hjörvar Steins Grétarssonar og Guðmundar Gíslasonar fer fram á sunnudag á íslandsmótinu í atskák.  Tefla þeir í beinni útsendingu á RÚV og hefst útsendingin kl. 14:45.  Tefldar verða 2 atskákir og verði jafnt tefla þeir bráðabanaskák (armageddon).

Útsendingin verður í umsjón Helga Ólafssonar og Björns Þorfinnssonar.  

Skákþing Norðlendinga fer fram um Hvítasunnuhelgina

Skákþing Norðlendinga 2012

Akureyri 25.-28. maí 2012

150 ára afmælismót Akureyrarkaupstaðar

100 ára afmælismót Júlíusar Bogasonar skákmeistara

Skákþingið hefur verið haldið árlega frá 1935 og er nú háð í 78. sinn.  Sérstaklega verður vandað til mótshaldsins nú í tilefni af því að 150 ár eru liðin frá því Akureyrarbær öðlaðist kaupstaðaréttindi. Þá er með mótshaldinu þess minnst að í ár eru 100 ár liðin frá fæðingu Júlíusar Bogasonar skákmeistara. Júlíus varð skákmeistari Akureyrar 19 sinnum og  5 sinnum skákmeistari Norðlendinga.

Teflt verður í félagsheimili Skákfélags Akureyrar, Íþróttahöllinni við Skólastíg (gengið inn að vestan).  

Dagskrá:

Tefldar verða 7 umferðir eftir svissnesku kerfi, 3 atskákir og 4 kappskákir.  

Föstudagur 25. maí kl. 20.00: 1.-3. umferð. Atskák, 25 mín/mann.
Laugardagur 26. maí kl. 10.00: 4. umferð. Kappskák, 90 mín + 30 sek/leik.
Laugardagur 26. maí kl. 16.00: 5. umferð. Kappskák, 90 mín + 30 sek/leik.
Sunnudagur 27. maí kl. 13:00: 6. umferð. Kappskák, 90 mín + 30 sek/leik.
Mánudagur 28. maí kl. 10.00: 7. umferð. Kappskák, 90 mín + 30 sek/leik.

Mánudagur 28. maí kl. 14.30: Hraðskákmót Norðlendinga.

Mótið verður reiknað til íslenskra skákstiga og til FIDE-skákstiga.

Keppni í kvennaflokki fer fram laugardaginn 26. maí og hefst kl. 10.00. Þetta að því tilskildu að næg þátttaka fáist. Lágmark er 6 keppendur svo mótið fari fram. Tefldar verða atskákir, 5-7. umferðir.  

Þátttökugjald:   kr. 4000 fyrir 17 ára og eldri, kr. 2000 fyrir 16 ára og yngri.  Þátttaka í hraðskákmótinu er innifalin. Þeir sem einungis tefla í hraðskákmótinu greiða kr. 500 fyrir þátttökuna.  Þátttökugjald í kvennaflokki kr. 1000.

Verðlaun: Verðlaunafé verður að lágmarki kr. 150.000, þar af kr. 40.000 í fyrstu verðlaun. 

Öllum er heimil þátttaka á mótinu, en aðeins þátttakendur með lögheimili á Norðurlandi geta unnið þá meistaratitla sem teflt verður um, þ.e. Skákmeistari Norðlendinga, (í meistaraflokki, kvennaflokki og unglingaflokki) og Hraðskákmeistari Norðlendinga.  

Skráning:  í netfangið [e-mail] og er skráningarfrestur til miðnættis 24. maí. Þeir sem mæta til leiks eftir að skráningarfrestur er liðinn geta ekki verið vissir um að fá sæti á mótinu. 

Lokamót Skákakademíu Kópavogs í dag

Vörönn Skákakademíu Kópavogs og Skákskóla Íslands sem staðið hefur yfir í Stúkunni á Kópavogsvelli lýkur með móti næsta föstudag þann 11. maí.   Mótið hefst kl. 14.30 og eru væntalegir þátttakendur beðnir um að mæta tímalega  Glæsileg verðlaun verða í boði. Allir þeir sem tekið hafa þátt í skakæfingum í Kópvogi þetta vormisseri hafa þátttökurétt.
 
Skákkennarar í Kópavogi eru hvattir til að beina því til nemenda að mæta í Stúkuna á föstudaginn.   
 
Helgi Ólafsson stórmeistari og skólastjóri Skákskóla Íslands hefur haft umsjón með namskeiðahaldinu í Stúkunni á Kópavogsvelli síðustu misseri enda er um að ræða samstarfsverkefni Skákakademíu Kópavogs og Skákskóla Íslands.
 
Ungir skákmenn úr Kópavogi hafa vakið mikla athygli undanfarið fyrir góða frammistöðu sem má ekki síst þakka góðum skákkennurum á borð við Smára Rafn Teitsson, Tómas Rasmus, Gunnar Finnsson, Sigurlaugu Friðþjófsdóttur og Lenku Ptacnikovu sem allir hafa kennt í hinum ýmsu grunnskólum Kópavogs.   

Haukur Angantýsson 1948-2012: Fáein minningarorð um meistarann frá Flateyri

Haukur Angantýsson skákmeistari verður jarðsunginn frá Guðríðarkirkju í Grafarholti föstudaginn 11. maí klukkan 15.

Meistarinn mikli frá Önundarfirði hefur teflt sína síðustu skák. Haukur Angantýsson kvaddi jarðlífið aðfararnótt 4. maí á 64. aldursári. Vinir hans og félagar í íslenskri skákhreyfingu minnast hans með söknuði, hlýju og virðingu.

Ég man eftir Hauki þegar hann var ungur og tápmikill á áttunda áratug síðustu aldar. Hann komst snemma í fremstu röð íslenskra skákmanna og var til dæmis í úrvalsliði ungmenna frá Norðurlöndum sem háðu mikla keppni við lið Sovétríkjanna árið 1968. Um sumarið hafði Haukur sigrað með yfirburðum á norrænu ungmennamóti, og þannig sýnt að hann var meðal efnilegustu skákmanna Vestur-Evrópu.

Haukur var vel nestaður gáfum og ómældum hæfileikum. Hann nam efnafræði í Þýskalandi og hafði skipstjórnarpróf frá Stýrimannaskólanum – ég veit ekki um aðra sem geta státað af slíkri tvennu. En skáklistin var köllun hans, og fyrir tilþrif sín við taflborðið verður Hauks minnst um ókomin ár.

Hann varð Íslandsmeistari 1976, og nokkrum sinnum hársbreidd frá því að vinna titilinn. Sigur hans á World Open í Fíladelfíu árið 1979 verður lengi í minnum hafður; þegar ungur og titillaus Íslendingur skákaði mörgum þekktustu stórmeisturum heims. Honum virtust allir vegir færir. En sitt er hvað, gæfa og gjörvileiki.

Við Haukur kynntumst á sjúkrahúsi fyrir meira en tveimur áratugum. Ég var þangað kominn í sálardrepandi leit minni að tilgangi lífsins, Haukur var að stríða við sjúkdóm sem löngum lagði dimman skugga yfir tilveru hans. Við tefldum 20 skáka einvígi – minnið, sá líknandi félagi, heldur því fram að ég hafi náð að vinna eina skák. Þá var Haukur að mestu hættur að tefla opinberlega, glíman við dimmuna dró þrótt úr hinum kraftmikla Vestfirðingi.

En uppgjöf virðist ekki hafa verið til í orðabók þessa fjölgáfaða skáksnillings, enda með blóð gamalla hákarlaveiðimanna í æðum. Enginn, sem ekki hefur reynt á sjálfum sér, veit hvílíka orku það útheimtir að stríða við sjúkdóm sem virðist ósýnilegur og ósigrandi.

Kannski var mesta afrek Hauks Angantýssonar, burtséð frá sigrum hans á stórmeisturum úr öllum hreppum jarðarinnar, að lifa með þeim innri vágesti sem tortímir öllum möguleikum til þess sem kallast eðlilegt líf. En gleymum því ekki: Hann átti margar ánægjustundir og augnablik tærrar hamingju.

Það var mikil gleðistund þegar Haukur skráði sig til leiks á Minningarmóti um Dan Hansson, sem fram fór í Ráðhúsi Reykjavíkur í febrúar 2002. Þetta var, að ég hygg, síðasta alþjóðlega skákmótið sem Haukur tók þátt í. Við Róbert Lagerman skipulögðum mótið til að heiðra minningu Danna vinar okkar, sem átti hugmyndina að stofnun Hróksins. Þarna voru 25 stórmeistarar, muni ég rétt, þeirra á meðal allir íslensku stórmeistararnir. Það sem gladdi okkur þó mest var að sjá Hauk Angantýsson aftur við taflborðið.

Seinna urðum við Haukur liðsfélagar, og hefði örugglega þurft að segja mér það tvisvar þegar pjakkurinn ég horfði agndofa á meistarann mikla í gamla daga. Þetta var þegar Haukur gekk til liðs við Skákfélag Vinjar, sem haldið er úti af fádæma atorku Arnars Valgeirssonar í Vin við Hverfisgötu. Haukur fór að venja komur sínar í Vin, og var fastamaður á mánudagsæfingum félagsins. Þar var Haukur jafnan sigursæll, og hann leiddi skáksveit Vinjar á Íslandsmóti skákfélaga í vetur. Þá var hann virkur í starfi heldri skákmanna og átti þar margar ánægjustundir.

Síðustu kappskákina tefldi Haukur við fornvin sinn og náfrænda, Sævar Bjarnason, alþjóðameistara, á Íslandsmótinu á Selfossi í mars. Báðir eru þeir meðal fremstu meistara íslenskrar skáksögu, og mér mun ávallt þykja sérstaklega vænt um myndina sem ég tók af þeirri epísku viðureign. Ungi snillingurinn frá Önundarfirði var orðinn roskinn og lífsreyndur, og hafði margt reynt í lífsins ólgusjó, en myndin sýnir meistara sem er öllu vanur, sem tekur sigri sem ósigri með jafnaðargeði.

Haukur var háttvís og hógvær, launkíminn og ljúfur í lund. Hann lætur eftir sig glitrandi skákperlur og endurminningasjóð, sem ávallt verður gott að leita í. Systkinum hans og öðrum ástvinum, skákfélögum og samferðamönnum, votta ég mína dýpstu samúð.

Gegnum þjáningarnar til stjarnanna.

Hrafn Jökulsson.

Haukur Angantýsson - Myndaalbúm