Firma- og félagakeppni Fjölnis

Ágæti skákmaður!

Með þessu bréfi vill Skákdeild Fjölnis bjóða til glæsilegrar sveitakeppni í skák sem fram fer í Ráðhúsi Reykjavíkur 9. maí kl. 16:00 - 19:00.

Auk verðlaunagripa og medalía verða eftirtalin verðlaun veitt fyrir efstu þrjú sætin:
 

• 1. verðlaun: Flug til Evrópu með Iceland Express fyrir 3 liðsmenn - öll gjöld innifalin!
• 2. verðlaun: Flug til Evrópu með Iceland Express fyrir 3 liðsmenn - öll gjöld innifalin!
• 3. verðlaun: Ljósmyndabókin frá Sögum útgáfu og geisladiskur frá 12 tónum fyrir 3 liðsmenn!

Einnig verða veitt verðlaun

• fyrir bestan árangur einstaklings: GSM snjallsími, að verðmæti kr. 100.000, frá Símanum.
• fyrir óvæntustu úrslitin: Út að borða fyrir tvo á veitingastaðnum Vox.
• fyrir stigalægsta þátttökuliðið: Út að borða fyrir tvo á veitingastaðnum Skrúði - 3 gjafabréf.

Að auki verða fjölmargir góðir vinningar dregnir af handahófi úr hópi allra þátttakenda.
 
Fyrirkomulag

• Teflt verður í Ráðhúsi Reykjavíkur 9. maí næstkomandi kl. 16:00-19:00.
• Hvert fyrirtæki eða félag sendir þriggja manna skáksveit til leiks. Ekki er nauðsynlegt að keppendur séu starfsmenn viðkomandi fyrirtækis, eða meðlimir í viðkomandi félagi.
• Tefldar verða 7-10 umferðir með 7-10 mínútna umhugsunartíma.
• Samanlögð íslensk skákstig sveitar skulu takmarkast við 6.000 stig í hverri umferð. Stigalausir verða reiknaðir með 1.200 íslensk skákstig.
• Lið þurfa að fá samþykki mótshaldara við skráningu.
• Veitingar í hléi verða í boði Saffran og Icelandic Glacial.

Skákdeild Fjölnis stendur að mótinu en verkfræðistofan Verkís, sem fagnar 80 ára starfsafmæli í ár, er aðalstyrktaraðili mótsins. Mótið er haldið til fjáröflunar fyrir barna- og unglingastarf skákdeildar Fjölnis en einnig til að styrkja kaup á vélbúnaði fyrir Héðin Steingrímsson, stigahæsta virka stórmeistara Íslands, sem jafnframt er félagi í Fjölni.
 
Stefnt er að því að gera mótið að árlegum viðburði og endurvekja þá skemmtilegu stofnanakeppni sem var við lýði fram að síðustu aldamótum.

Þátttökugjald hvers fyrirtækis/félags er 50.000 kr. Tilkynnið þátttöku sem fyrst á [e-mail]. Við hvetjum þig til að hafa frumkvæði í málinu og vekja athygli á keppninni innan þíns fyrirtækis eða félags.

Með von um jákvæð viðbrögð, stuðning og skemmtilegt samstarf,

Helgi Árnason, formaður skákdeildar Fjölnis, gsm 664-8320
Héðinn Steingrímsson, stórmeistari og núverandi Íslandsmeistari í skák, gsm 894-0807

Sýslumót Kjósarsýslu fer fram 23. apríl í Garðabæ

Sýslumót Kjósarsýslu í skólaskák verður haldið mánudaginn 23. apríl, kl 18:00 til 20:00 í Hofsstaðaskóla í Garðabæ.

Þátttökurétt hafa krakkar í skólum í Garðabæ, Álftanesi, Seltjarnarnesi og Mosfellsbæ.

Haldin verða 2 mót samtímis.

• 1.-7. bekkur
• 8.-10. bekkur

Umhugsunartími er 7-10 mín á skák og hefst taflið stundvíslega kl 18:00.
Tefldar verða 7 umferðir skv. Svissnesku kerfi.

Mikilvægt að fá send nöfn keppenda fyrir hádegi Mánudaginn 23 april.
Fullt nafn - bekkur - skóli - sendist á [e-mail]

Hver skóli má senda hámark 6 keppendur í hvern flokk. (ath undanskildir eru sérstaklega krakkar sem stunda reglulegar æfingar í Hofsstaðaskóla. Ef ósk er um fleiri keppendur vinsamlega hafið samband. (Helst gegnum tölvupóst þar sem ég verð erlendis frá fimmtudegi til mánudags))

Efstu 2 úr flokknum 8.-10. bekkur komast á kjördæmismót Reykjaneskjördæmis hins forna.
Efstu 2 úr flokknum 1.-7. bekkur komast á kjördæmismót Reykjaneskjördæmis hins forna.  

Kjördæmismótið er ekki komið með dagsetningu eða staðsetningu en verður haldið fyrir 29. apríl. (Landsmót verður svo fyrstu helgi í maí í Stórutjarnarskóla á Norðurlandi Eystra)

Veitt verða bikar, silfur og brons í hvorum flokki.

sjá má reglur mótsins með því að smella á þennan hlekk.
http://www.skaksamband.is/?c=webpage&id=244

Íslandsmótið í skák: Fimmta umferð hefst kl. 16 - spennan eykst

Fimmta umferð Íslandsmótins í skák hefst kl. 16 í Stúkunni á Kópavogsvelli.  Óvenju hart er barist á mótinu og ekkert um stutt jafntefli.  Henrik Danielsen er efstur með 3,5 vinning, Þröstur Þórhallsson er annar með 3 vinninga og Hannes Hlífar Stefánsson, Bragi Þorfinnsson og Sigurbjörn Björnsson fylgja fasta á eftir með 2,5 vinning.  Allt er því galopið og búast má við harðri baráttu í dag!

Eðalaðstæður eru skákstað og hægt að fylgjast með skákunum á tjaldi þar sem helstu skákspekingar landsins mæta á staðinn og láta ljós sitt skína.

Viðureignir dagsins:

• Davíð Kjartansson (1,5) - Henrik Danielsen (3,5)
• Þröstur Þórhallsson (3,0) - Guðmundur Gíslason (2,0)
• Dagur Arngrímsson (1,5) - Hannes Hlífar Stefánsson (2,5)
• Guðmundur Kjartansson (1,5) - Bragi Þorfinnsson (2,5)
• Sigurbjörn Björnsson (2,5) - Stefán Kristjánsson (1,5)
• Einar Hjalti Jensson (0,5) - Björn Þorfinnsson (1,5)

Beinar útsendingar úr 5. umferð má nálgast hér.  

• Heimasíða mótsins
• Chess-Results
• Beinar útsendingar
• Myndaalbúm mótsins (HJ)

Öðlingamót: Pörun 4. umferðar

Í gær fór fram frestuð skák úr þriðju umferð öðlingamóts TR.  Vignir Bjarnason (1828) og Þór Valtýsson (1973) gerðu jafntefli  Þorvarður Ólafsson (2175) er efstur með fullt hús en 2,5 vinning hafa Vignir, Sigurður Daði Sigfússon (2346) og Bjarni Hjartarson (2038).   Í fjórðu umferð, sem fram fer annað kvöld mætast m.a.: Þorvarður-Sigurður Daði og Vignir-Bjarni.

Röðun 4. umferðar má finna í heild sinni hér.   Stöðu mótsins má finna hér. 

• Heimasíða mótsins 
• Chess-Results

 

Skáklist án landamæra í dag í Hafnarfirði

Þar sem List án landamæra hefst í vikunni tekur Skákfélag Vinjar forskot á sæluna í dag og heldur mót, „skáklist án landamæra" í Læk, sem er athvarf Rauða kross Íslands fyrir fólk með geðraskanir í Hafnarfirði. Mótið hefst klukkan 13:15.

Þetta er fyrsta alvörumótið sem haldið er í Læk, sem er við Hörðuvelli 1, alveg við lækinn og fyrir framan Lækjarskóla.

Tefldar verða 7 umferðir með 7 mínútna umhugsunartíma og boðið verður upp á kaffiveitingar í hléi.

Bókavinningar fyrir efstu sætin og happadrætti, allir eiga séns.

Bara mæta tímanlega og skrá sig. Síminn í Læk er 566-8600.

Nánar um athvarfið: http://redcross.is/page/rki_hafnarfjardardeild_laekur

Kópavogsmótið í skólaskák fer fram í dag

 

Kópavogsmótið í skólaskák verður í Salaskóla þann 17. apríl kl 17:00 til 20:00. Hugmyndin er að halda þrjú mót samtímis.

• 1.-4. bekkur
• 1.-7. bekkur
• 8.-10. bekkur

Umhugsunartími er 12 mín á skák og hefst taflið stundvíslega kl 17:00.

Tefldar verða 7 umferðir skv. Monrad kerfi.

Mikilvægt að fá send nöfn keppenda fyrir hádegi mánudaginn 16. apríl.  

Fullt nafn -  bekkur -  skóli  -  sendist á [e-mail]

Hver skóli má senda hámark 12 keppendur í hvern flokk.

Efstu 2 úr flokknum 8.-10. bekk komast á kjördæmismót Reykjaneskjördæmis hins forna.

Efstu 2 úr flokknum 1.-.7. bekk komast á kjördæmismót Reykjaneskjördæmis hins forna.

Þeir krakkar sem eru í 1. til 4. bekk geta fengið að keppa í flokkinum 1.-7. bekk ef þeir telja sig eiga erindi í baráttuna um 2 efstu sætin þar, sem gefa rétt til keppni á kjördæmismeistarmótinu í flokki 1.-7. bekk sem verður síðar í apríl-mánuði.

Þetta er ekki alveg í anda reglugerðarinnar um skólaskák en alveg tilraunarinnar virði að vera með sérstakan flokk fyrir þau yngstu.

Unglingar úr Salaskóla munu selja veitingar meðan á keppni stendur.

Veitt verða gull silfur og bros í hverjum flokki að auki er farandbikar fyrir efsta sætið.

Hafnarfjarðarmótið í skólaskák fer fram í dag

Hafnarfjarðarmót í skólaskák verður haldið þriðjudaginn 17. apríl, kl 17:00 til 19:00 á Ásvöllum. (Æfingatími skákdeildar Hauka, ath. tvöfaldur tími)

Haldin verða 2 mót samtímis.

• 1.-7. bekkur
• 8.-10. bekkur

Umhugsunartími er 7-10 mín á skák og hefst taflið stundvíslega kl 17:00.
Tefldar verða 7 umferðir skv. Svissnesku kerfi.

Mikilvægt að fá send nöfn keppenda fyrir hádegi þriðjudaginn 17 april.
Fullt nafn - bekkur - skóli - sendist á [e-mail]

Hver skóli má senda hámark 6 keppendur í hvern flokk. (ath undanskildir eru sérstaklega krakkar sem stunda reglulegar æfingar hjá Skákdeild Hauka, en athugið að mótið er yfir báða æfingatímana.)

Efstu 2 úr flokknum 8.-10. bekkur komast á kjördæmismót Reykjaneskjördæmis hins forna.
Efstu 2 úr flokknum 1.-7. bekkur komast á kjördæmismót Reykjaneskjördæmis hins forna.

Veitt verða bikar, silfur og brons í hvorum flokki.

sjá má reglur mótsins með því að smella á þennan hlekk.
http://www.skaksamband.is/?c=webpage&id=244

 

Henrik efstur á Íslandsmótinu í skák

Stórmeistarinn Henrik Danielsen vann Einar Hjalta Jensson í 4. umferð landsliðsflokks Íslandsmótsins í skák sem fram fór í kvöld í Stúkunni á Kópavogsvelli.  Henrik er einn efstur með 3,5 vinning.  Þröstur Þórhallsson, sem vann Stefán Kristjánsson er annar með 3 vinninga.  Hannes Hlífar Stefánsson, sem vann Guðmund Kjartansson, Bragi Þorfinnsson og Sigurbjörn Björnsson, sem gerðu innbyrðis jafntefli, eru í 3.-5. sæti með 2,5 vinning.

Ákaflega hart er barist á mótinu og aðeins einni skák lauk með jafntefli í skákum kvöldsins og það var í lengstu skák umferðarinnar.   

Úrslit dagsins:

• Henrik Danielsen (2,5) - Einar Hjalti Jensson (0,5) 1-0
• Bragi Þorfinnsson (2) - Sigurbjörn Björnsson (2) 0,5-0,5
• Stefán Kristjánsson (1,5) - Þröstur Þórhallsson (2) 0-1
• Hannes Hlífar Stefánsson (1,5) - Guðmundur Kjartansson (1,5) 1-0
• Guðmundur Gíslason (1) - Davíð Kjartansson (1,5) 1-0
• Björn Þorfinnsson (1,5) - Dagur Arngrímsson (0,5) 0-1

Staða mótsins:

• 1. SM Henrik Danielsen (2504) 3,5 v.
• 2. SM Þröstur Þórhallsson (2398) 3 v.
• 3.-5. SM Hannes Hlífar Stefánsson (2531), AM Bragi Þorfinnsson (2421) og FM Sigurbjörn Björnsson (2393) 2,5 v.
• 6. Guðmundur Gíslason (2346) 2 v.
• 7.-11. AM Dagur Arngrímsson (2361), FM Davíð Kjartansson (2305), AM Björn Þorfinnsson (2416), AM Guðmundur Kjartansson (2416) og SM Stefán Kristjánsson (2500) 1,5 v.
• 12. Einar Hjalti Jensson (2245) 0,5 v.

Fimmta umferð fer fram á morgun og hefst kl. 16.   Þá mætast meðal annars: Davíð-Henrik, Þröstur-Guðmundur G. og Dagur-Hannes. 

Skákskýringar í boði margra af sterkustu skákmönnum landsins, sem ekki taka þátt hefjast um kl. 18.

• Heimasíða mótsins
• Chess-Results
• Beinar útsendingar
• Myndaalbúm mótsins (HJ)

Meistaramót Skákskóla Íslands 2012

Meistaramót Skákskóla Íslands fyrir starfsárið 2011/2012 hefst föstudaginn 1. júní. Tefldar verða sjö umferðir eftir svissneska kerfinu. Þátttökurétt hafa nemendur skólans og allir þeir sem tekið hafa þátt í námskeiðum á vegum  skólans eða hlotið þjálfun á vegum skólans.  

Núverandi meistari Skákskóla íslands er Hjörvar Steinn Grétarsson.   

Þátttökuréttur:

Allir nemendur skólans og þeir sem tekið hafa þátt í námskeiðum á vegum skólans.

Að öðru leyti áskilur skólastjóri/mótsnefnd sér rétt til að bjóða völdum einstaklingum til þátttöku.

Dagskrá mótsins verður með eftirfarandi hætti:

Umferðafjöldi: Sjö umferðir. Í þrem fyrstu umferðunum verða tefldar atskákir en fjórar lokaumferðirnar eru kappskákir.

Tímamörk: Atskákir 25 10  þ.e 25 mínútur að viðbættum sekúndum fyrir hvern leik. 

Kappskákir:  90 30 þ.e. 90 mínútur á alla skákina og 30 sekúndur bætast við eftir hvern leik.

Fyrirkomulag: Svissneska kerfið - Swiss Perfect

Skákstig: Mótið verður reiknað til skákstiga, en þrjár fyrstu umferðirnar til at-skákstiga.

Verðlaun:

A:

1. verðlaun:

Meistaratitill Skákskóla Íslands 2011/2012 og farandbikar. Einnig  flugfar m/Flugleiðum á Evrópuleið* og uppihalds kostnaði kr. 30 þús.

2. verðlaun: Flugfarmiði á leiðum Flugfélags Íslands innanlands.  

3. - 5. verðlaun: Vandaðar skákbækur.

Sérstök stúlknaverðlaun:

Farmiði á leiðum Flugfélags Íslands innanlands.

Aldursflokkaverðlaun. 

1. Tvenn verðlaun fyrir þá keppendur sem ná bestum árangri í hópi 14 ára og yngri

2. Tvenn verðlaun fyrir þær stúlkur sem bestum árangri ná í mótinu.

Verðlaun fyrir keppendur 12 ára og yngri.

1. - 3. verðlaun: Vandaðar skákbækur.

* ^{Mótshaldarinn áskilur sér rétt til að finna hagstæðasta fargjald sem hægt er að fá enda verði tilkynnt um ferðir með góðum fyrirvara.} 

Verðlaunahafi verður að nýta sér farmiða innan 12 mánuða frá lokum mótsins.

B:

Dagskrá:

• 1. umferð: Föstudagurinn 1. júní kl. 18  
• 2. umferð: Föstudagurinn 1. júní kl. 19
• 3. umferð. Föstudagurinn 1. júní kl. 20.
• 4. umferð: Laugardagurinn 2. júní kl. 10-14  
• 5. umferð: Laugardagurinn 2. júní 15 - 19
• 6. umferð: Sunnudagurinn 3. júní kl. 10.-14.
• 7. umferð: Sunnudagurinn 3. júní kl. 15-19.

 ^{* Hljóti einhver stúlka 1. eða 2. verðlaun mun 2. sæti meðal stúlkna gilda til sérstakra stúlknaverðlauna.}

 Verðlaunaafhending fer fram strax að móti loknu.

Þátttöku skal tilkynna í síma SÍ 5689141 á netfangið [e-mail] eða [e-mail] .

Mótsnefnd áskilur rétt til að gera breytingar á fyrirfram boðaðri dagskrá.

Aðalfundur SÍ fer fram 19. maí - lagabreytingatillögur þurfa að berast eigi síðar en á miðvikudag

Á fundi stjórnar SÍ í gær var ákveðið að aðalfundur Skáksambandsins 2012 muni fara fram 19. maí nk.  Formlegt bréf varðandi fundinn mun fara út 18. apríl og þurfa lagabreytingatillögur að hafa borist skrifstofu SÍ fyrir þann tíma.