Hið árlega Halldórsmót á Flúðum

Hið árlega Halldórsmót, í skák, var haldið miðvikudaginn 14. mars 2012, í Flúðaskóla. Mótið er haldið til minningar um Halldór Gestsson sem var húsvörður í skólanum til fjölda ára og mikill skákáhugamaður. 
Keppt var í tveimur flokkum, 3. - 7. bekk og 8. - 10. bekk, hver þátttakandi tefldi sjö skákir. 77% nemenda í 3. - 10. bekk tóku þátt í mótinu. Öllum nemendum og starfsfólki var boðið uppá vöfflur að hætti Halldórs meðan á móti stóð.

Sigurvegari í eldri flokki var Elís Arnar Jónsson, 8. bekk. en í yngri flokki Nói Mar Jónsson, 6. bekk og fengu þeir afhentan farandbikar, sem foreldrafélag Flúðaskóla gaf, ásamt verðlaunapeningi. Árni Þór Hilmarsson, kennari hafði veg og vanda af skipulagningu mótsins en Jón G. Valgeirsson sveitarstjóri sá um verðlaunaafhendingu.

Skákmót öðlinga hefst í kvöld

Skákmót öðlinga 40 ára og eldri hefst miðvikudaginn 21. mars kl. 19.30 í félagsheimili T.R. að Faxafeni 12.  Tefldar verða 7 umferðir eftir svissneska-kerfinu og er umhugsunartíminn 90 mínútur á alla skákina + 30 sekúndna viðbótartími á hvern leik.

Skákmót öðlinga verður nú haldið í 21. sinn. Sigurvegari á Skákmóti öðlinga 2011 var Þorsteinn Þorsteinsson.

Dagskrá:

• 1. umferð miðvikudag 21. mars kl. 19.30
• 2. umferð miðvikudag 28. mars kl. 19.30
• Hlé gert á mótinu vegna Páska
• 3. umferð miðvikudag 11. apríl kl. 19.30
• 4. umferð miðvikudag 18. apríl kl. 19.30
• 5. umferð miðvikudag 25. apríl kl. 19.30
• 6. umferð miðvikudag 2. maí kl. 19.30
• 7. umferð miðvikudag 9. maí kl. 19.30

Mótinu lýkur miðvikudaginn 16. maí kl. 19:30 með hraðskákmóti og verðlaunaafhendingu.  Keppt er um veglegan farandbikar,en auk hans eru verðlaun fyrir þrjú efstu sætin, bæði í aðalmótinu og hraðskákmótinu.

Þátttökugjald er kr. 4.000 fyrir aðalmótið og kr 500 fyrir hraðskákmótið.  Innifalið er frítt kaffi allt mótið ásamt rjómavöfflum og öðru góðgæti á lokakvöldi.

Skráning fer fram á skráningarformi á heimasíðu T.R.

Rammislagur fer fram í dag

Í dag kl. 15 lýstur saman fylkingum eldri skákmanna í RAMMASLAG. Það er árleg viðureign klúbba eldri borgara á höfuðborgarsvæðinu ÁSA OG RIDDARA.  Þetta var í 12. sinn sem slíkir kappleikar fara fram og hefur Riddarinn oftar farið með sigur af hólmi.

Breiðfylkingar klúbbanna eigast nú við á 21 borði og verður keppt í þremur 7 manna riðlum þar sem allir tefla við alla. Alls taka nærri 50 öldungar þátt í þessum mikla darraðardansi. Búast má við að það verði mikið hark þegar fylkingunum lýstur saman kl. 13 í dag í Strandbergi.

Reikna má með að nokkur ásmegin svífi á menn, einkum Æsi og loft verði læviblandið mjög.  Riddararnir mega örugglega hafa sig alla við til að ná vopnum sínum í tíma því Æsir eru þess óðir og auðfúsir að hefna ófara sinna frá í fyrra en þá lögðu Riddarar þá með 98 vinningum gegn 49.

Boðið verður  upp á kaffiveitingar fyrir gesti kl. 15 í Hásölum Strandbergs, Safnaðarheimili Hafnarfjarðarkirkju, þar sem rimman fer fram.

EM-pistill nr. 1: Héðinn og Hannes með auðvelda sigra í fyrstu umferð

Stórmeistararnir Héðinn Steingrímsson (2556) og Hannes Hlífar Stefánsson (2531) unnu auðvelda sigra í fyrstu umferð EM einstaklinga sem hófst í Plovdid í Búlgaríu í dag.  Héðinn vann Rússann Alexander Yakimenko (2223) en Hannes lagði Grikkjann Dimitros Balokas (2080).  Á morgun fá þeir  mun erfiðari andstæðinga og verða báðir í beinni útsendingu sem hefst kl. 13.

Héðinn mætir rússneska stórmeistaranum Mikhaeil Kobila (2666) og Hannes mætir serbneska stórmeistaranum Bojan Vukovic (2628). 

Töluvert var um óvænt úrslit í fyrstu umferð og töpuðu t.d.  Mamedyarov (2752), Jobava (2706) og Navara (2700) niður punktum.

Sjálfur er ég meðal skákstjóra á mótinu og er annar yfirdómara í neðri salnum ásamt búlgarska stórmeistaranum Ventzislav Inkiov sem margir Íslendinga kannast við.   Þar erum við með borð 78 og niður.  Ég vona að þetta verði í eina skiptið sem þeir Hannes og  Héðinn tefli í mínum sal. 

Margir Íslandsvinir eru hérna.  Caruna er stigahæstur keppenda.  Það er unun að sjá þennan skákmann tefla í hverjum mótinu á fætur öðru en hann teflir kappskák u.þ.b. þriðja hvern dag ársins og hækkar sífellt á stigum. 

Ivan Sokolov kom til mín í dag kampakátur eftir auðveldan sigur.  23 efstu menn komast áfram á Heimsbikarkeppnina (World Cup) og sagðist Ivan telja að +4 myndu duga.  Reynsla mín er að Ivan er býsna glöggur á slíkt.  Til dæmis mat hann að það þyrfti nú 7,5 vinning til að sigra á N1 Reykjavíkurskákmótinu sem reyndist rétt. 

Í gær kom ég til Búlgaríu eftir langt ferðalag.  Lenti þar í rútu með Gawain Jones, Adam Hunt og fleiri góðum mönnum.  Gawain sagði mér að enska skáksambandið styrkti engan til þátttöku á mótinu að því undanskyldu að greiða keppnisgjaldið sem er að ég held að sé 100 evrur.  Það þýðir að t.d. Adams, Short og McShane taka ekki þátt en bæði Jones og David Howell greiða að allan sinn kostnað sjálfir.   Jones býr ekki á hótelinu heldur leigir sér herbergi.   

Enginn norskur skákmaður tekur þátt, einn Svíi (Grandelius), einn Finni (Nyback) og einn Dani (Skytte) en sá síðastnefndi er væntanlega á eigin vegum.   Athyglisvert í ljósi þess að SÍ fær reglulega skammir fyrir að gera ekki nóg fyrir sína bestu skákmenn.  

Eg stefni að því að skrifa reglulega pistla héðan þótt þeir verði e.t.v. ekki daglega né mjög langir í hvert sinn.

Gunnar Björnsson

• Heimasíða mótsins 
• Beinar útsendingar (borð 1-47)
  
• Chess-Results
• Myndaalbúm (GB)

Meiri erlend umfjöllun um N1 Reykjavíkurskákmótið

 

Nokkrar erlendar umfjallanir hafa dottið í hús um N1 Reykjavíkurskákmótið.  Hér að neðan má sjá nokkur sýnishorn.  Í grein Peterson má m.a. sjá tvö myndbönd.  Í öðru þeirra útskýrir Caruana af hverju hann tók þátt í N1 Reykjavíkurskákmótinu og í hinu má sjá upplifun Bandaríkjamannanna.

Mun stærri grein eftir Peterson kemur svo í prentaðri útgáfu Chess Life í maí.

• Chess Life Online (Macauley Peterson) 
  
• New York Times (Dylan McClain)
• Simon Williams bloggar 
• Færeyska skáksambandið (Helgi Dam Ziska)
• TWIC (Malcolm Pein skrifar)

Málþing um skákkkennslu

 

Samhliða Reykjavíkurskákmótinu fór fram Málþing um skákkennslu, haldið af Skákakademíu Reykjavíkur, Skákskóla Íslands og nýstofnuðum Skákkennaraklúbbi. Málþingið var vel sótt og fjölbreyttur hópur sem sótti það, meðal annars kennarar frá grunnskólanum í Hvalfjarðarsveit. Skák er nefnilega kennd víða um landið eins og kom fram í erindi Stefáns Bergssonar. Stefán gerði athugun meðal grunnskóla landsins hvort skákkennsla í einhverju formi væri í skólanum. Kom í ljós að í um 40% skóla landsins er einhver skákkennsla.

 

Helgi Árnason flutti erindi um Rimaskóla - og hvað liggur að baki árangri skólans. Afar fróðlegt erindi Helga og komu þar fram mörg smáatriði sem skapa eina heild, heildina bakvið árangur skólans.

 

Ingibjörg Rósa Ívarsdóttir grunnskólakennari Lágafellsskóla í Mosfellsbæ flutti erindi um jákvæð áhrif skákiðkunnar á nemendur. Margt afar fróðlegt í erindi Ingibjargar.

 

Helgi Ólafsson flutti erindi um skák og tölvunotkun og kom meðal annars inn á skák frá einvígi aldarinnar.

Síðasta erindið flutti Maurice Ashley, einn þekktasti skákfyrirlesari heims. Ashley fjallaði um skák og ákvarðanatökur. Lagði hann mikið upp úr þeim lærdómi í skák að gera ráð fyrir hugsanagangi andstæðingsins, eða hins aðilans eina og hann kallaði það. Slíkt mætti yfirfæra á lífið sjálft í miklum mæli þar sem oft væri maður í einhvers konar sambandi samskiptum við annan aðila án þess að hugsa nógu mikið um hugsanagang hans, sem að skákin kenndi manni.

Málþingið í heild sinni má finna á myndbandi (í þremur pörtum):

http://blip.tv/reykjavikopen/seminar_part1-6032886
http://blip.tv/reykjavikopen/seminar_part2-6032864
http://blip.tv/reykjavikopen/seminar_part3-6032863

Myndaalbúm (Hrafn Jökulsson)

Þór Valtýsson efstur í Ásgarði

Það mættu tuttugu og sex eldri skákmenn til tafls í Ásgarð í dag, þar sem Þór Valtýsson sigraði með 7,5 vinning af 9 mögulegum. Gísli Sigurhansson varð annar með 6,5 vinning.  Jafnir í 3.-5. sæti urðu Guðfinnur R. Kjartansson,Valdimar Ásmundsson og Þorsteinn Guðlaugsson, Guðfinnur var efstur á stigum af þeim þremur.

Á morgun mætast þessir heldri manna skákklúbbar Æsir og Riddarar í Hafnarfjarðarkirkju og berjast eins og þeir gera alltaf einu sinni á ári.

Þar verða háðar tuttugu til þrjátíu skákorustur, og margar skemmtilegar ef að vanda lætur.

Nánari úrslit dagsins:

• 1        Þór Valtýsson                         7.5
• 2        Gísli Sigurhansson                            6.5
• 3-5    Guðfinnur R. Kjartansson       6
•           Valdimar Ásmundsson            6
•           Þorsteinn Guðlaugsson           6
• 6-8    Gísli Árnason                          5.5
•           Ari Stefánsson                         5.5
•           Leifur Eiríksson                       5.5
• 9-12  Birgir Sigurðsson                    5
•           Jón Steinþórsson                     5
•           Kristján Guðmundsson           5
•           Bragi G Bjarnarson                 5
• 13-15 Haraldur Axel                         4.5
•           Egill Sigurðsson                      4.5
•           Ásbjörn Guðmundsson           4.5

Næstu ellefu skákmenn fengu örlítið færri vinninga

Barna og unglingameistaramót Goðans 2012

Mánudaginn 26 mars kl 16:00 - 17:50 verður Barna og unglingameistaramót skákfélagins Goðans í skák haldið í Framsýnarsalnum Garðarsbraut 26 á Húsavík.

Öll börn og unglingar 16 ára og yngri í Þingeyjarsýslu geta tekið þátt í mótinu.

Tefldar verða 5-7 umferðir (monrad-kerfi) með 7-10  mín umhugsunartíma á mann.

Verðlaun verða veitt í eftirtöldum flokkum:
(bæði farandverðlaun og eignarverðlaun)

Stúlkur:

• 4 bekkur og yngri     (börn fædd 2002 eða síðar)
• 5-7 bekkur                (börn fædd 1999- 2001)
• 8-10 bekkur              (börn fædd 1996-1998)

Strákar:

• 4 bekkur og yngri
• 5-7 bekkur
• 8-10 bekkur

Skráning í mótið fer fram hjá Hermanni í síma 4643187 eða 8213187.

Einnig á [e-mail]

Skráningu líkur kl 15:55 á mótsdegi.

Þátttökugjald er krónur 500 á keppanda, sem greiðist á mótsstað.

(Ef fleiri en tvö systkyni keppa er frítt fyrir þau)

EM einstaklinga hefst kl. 13

EM einstaklinga hefst nú kl. 13 í Plovdid í Búlgaríu.  Héðinn Steingrímsson (2556) og Hannes Hlífar Stefánsson (2531) eru fulltrúar landans að þessu sinni.  

Alls taka 348 skákmenn þátt og þarf af 174 stórmeistarar.  15 hafa 2700 skákstig eða meira og 98 hafa 2600 skákstig eða meira.  Héðinn er nr. 133 í stigaröð keppenda og Hannes er nr. 152.  Fabiano Caruana (2767), sigurvegari N1 Reykjavíkurmótsins er stigahæstur keppenda.  

Undirritaður er meðal skákstjóra á mótinu.   Í fyrstu umferð teflir Héðinn við Rússann Alexander Yakimenko (2223) og Hannes við Grikkjann Dimitros Balokas (2080).  Hvorugur þeirra verður í beinni útsendingu í dag en 47 borð verða sýnd beint í hverri umferð.  

Gunnar Björnsson

• Heimasíða mótsins 
• Beinar útsendingar

 

 

Íslandsmót grunnskólasveita fer fram næstu helgi

Íslandsmót grunnskólasveita verður haldið helgina 24.-25. mars í Rimaskóla í Reykjavík.

Skákakademía Reykjavíkur er mótshaldari fyrir hönd Skáksambands Íslands.

Fyrirkomulag: Fjórir skákmenn eru í hverri sveit og 1-4 til vara. Tefldar verða níu umferðir með 15 mínútna umhugsunartíma á mann.

Liðsstjórar skulu mæta 12:30 á laugardag og skila inn liðum sínum á Monrad-spjöldum.

Dagskrá mótsins; Tefldar verða fimm umferðir á laugardegi og fjórar á sunnudegi. Taflið hefst 13:00 á laugardag og 11:00 á sunnudag.

Skráning sveita og fyrirspurnir skulu berast á [e-mail] eigi síðar en fimmtudaginn 22.  mars. Með skráningu skal fylgja gsm og netfang liðsstjóra.

Verðlaun verða veitt fyrir þrjú efstu sætin í mótinu, bestu b-e sveitir og borðaárangur.

Íslandsmeistarar munu vinna sér inn rétt til þátttöku á Norðurlandamóti grunnskólasveita sem fram fer í haust.  Viðkomandi skóli ber ábyrgð á skipulagningu og fjármögnun ferðarinnar en Skáksamband Íslands mun aðstoða við þjálfun keppenda.