Að loknu N1 vel heppnuðu Reykjavíkurskákmóti

 

Það er óhætt að segja að N1 Reykjavíkurskákmótið hafi gengið vel.  Metþátttaka var þegar um 200 keppendur tóku þátt frá 33 löndum, sem einnig er met. Teflt var við einstakar aðstæður í Hörpu sem hefur sannað sig sem frábær keppnisstaður.  Íslensku skákmennirnir nýttu tækifærið vel og hækkuðu um nærri 500 skákstig sem eitt og sér segir okkur hversu mikilvægt mótið er fyrir íslenskt skáklíf.  Og fyrirkomulagið að láta mótið standa undir nafni sem „Open" hefur enn á ný sannað sig.

Mótsstaðurinn

Mótið fór fram í fyrsta skipti í Hörpu.  Mótið hefur farið fram á ýmsum stöðum í gegnum tíðina, nú síðustu ár í Ráðhúsinu.  

Ákaflega vel fór um skákmennina í Hörpu og segja má að þar sé hinn fullkomni keppnisstaður.   Toppaðstæður fyrir skákskýringar og skákstúderingar.  Stutt í veitingar og alla þjónustu.

 

Það fór hins vegar ekki framhjá keppendum að teflt var í tónlistarhöll.  Garðar Cortes tók aríu þegar hann fór á náðhúsið, Páll Óskar hitaði sig upp á svölunum fyrir ofan keppnissalinn og einn trompetleikari ákvað að æfa sig fram á gangi!  Allt var þetta þó viðráðanlegt og starfsfólkið í Hörpu lagði sig fram um að koma þessu í sem best lag og var þetta í mun betra lagi þegar leið á mótið.  Og verður enn betra á næsta ári. 

Reykjavíkurskákmótið er komið til að vera í Hörpu!

Toppbaráttan

 

Ítalski skákmaðurinn Fabiano Carauna kom sá og sigraði á mótinu.  Hann hlaut 7½ vinning í 9 skákum og er sá fyrsti sem endar einn efstur síðan 2000 þegar Hannes Hlífar Stefánsson varð einn efstur á mótinu.  Sjö skákmenn urðu í 2.-8. sæti með 7 vinninga.   Þar setti kínverska skákdrottningin, Hou Yifan, óneitanlega mestan svip á mótið en hún var nærri því að leggja Ítalann í lokaumferðinni og hefði með því tryggt sér sigur á mótinu.  Henrik Danielsen var einnig í þeim hópi og varð efstur Íslendinga. 

Það er aðdáunarvert að fylgjast með Ítalanum unga sem hefur rokið upp stigalistann.  Á síðustu 100 dögum hefur hann teflt um 50 kappskákir.  Hann gerir nánast aldrei stutt jafntefli og teflir nú í Plovdid þar sem hann teflir á EM einstaklinga ásamt Hannesi Hlífari og Héðni.  Í gegnum tíðina hafa ofurstórmeistarar eins og Caruana forðast opin mót eins og N1 Reykjavíkurskákmótið eins og heitan eldinn í ótta við að tapa stigum en Caruana sýnir að sú mýta á ekki rétt á sér því hann hækkaði um 5,5 stig fyrir frammistöðuna.   Skora á menn að fylgjast vel með þessum unga dreng sem vel gæti orðið heimsmeistari á næstum árum. 

 

Hou Yifan hefur ákaflega mikla útgeislun og kraft og var mjög ánægjulegt að kynnast henni.  Ákafleg geðþekk og brosmild stúlka sem margir telja að geti orðið heimsmeistari í skák.  Ég skal viðurkenna manna fyrstur að það er auðvelt að dást að þessari stúlku sem veit nákvæmlega hvað hún vill.  Það  var til að mynda ákaflega gaman að fara með henni að gröf Fischers þar sem hún dró okkur (mig, Hrafn Jökulsson og Magnús Matthíasson formannn SSON) sérstaklega í blómabúð til að kaupa blóm til að leggja á leiði átrúnaðargoðsins.

 

Ivan Sokolov var sá skákmaður sem virtist helst vera líklegur til að veita Ítalanum unga keppni en náði ekki að kreista fram sigur gegn Avrukh í lokaumferðinni og varð meðal þeirra sem enduðu í 2.-8. sæti.  Ivan gengur iðulega vel hérlendis og var meðal sigurvegara 2010 og 2011 og hefur sigrað á samtals sex alþjóðlegum skákmótum hérlendis.  

Íslendingarnir

 

Henrik Danielsen varð efstur Íslendinga eins og áður sagði og fékk fyrir vikið €829 í verðlaun.  Gott mót hjá Henriki.   

Héðinn Steingrímsson og Hannes Hlífar Stefánsson fengu 6½ vinning og enduðu í 9.-18. sæti.  Vegna mikillar skiptingar verðlauna urðu þeir að sætta sig við €70 hvor. 

Hjörvar Steinn Grétarsson og Sigurður Daði Sigfússon fengu 6 vinninga og urðu í 19.-34. sæti og hækka báðir verulega á stigum.   Allmargir fengu 5½ vinning.   Þar á meðal Einar Hjalti Jensson sem náði sínum fyrsta áfanga að alþjóðlegum meistaratitli og örugglega ekki þeim síðasta.  Einar Hjalti er skráður til leiks í áskorendaflokk Íslandsmótsins og stefnir á að komast þannig í landsliðsflokkinn í ár sem fram fer í Kópavogi í apríl.

Þeir Íslendingar sem unnu til aukaverðlauna voru eftirtaldir:

• Mikael Jóhann Karlsson varð þriðji í unglingaflokki
• Dagur Kjartansson vann verðlaun fyrir bestan árangur í samanburði við stig.
• Jón Trausti Harðarson varð annar í sama flokki
• Leifur Þorsteinsson varð þriðji í sama flokki
• Sigurður Daði Sigfússon varð þriðji í u-2400 flokki
• Þorvarður F. Ólafsson varð efstur í u-2200 flokki
• Magnús Pálmi Örnólfsson varð þriðji í sama flokki
• Siguringi Sigurjónsson varð annar í u-2000 flokki
• Halldór Pálsson varð þriðji í sama flokki

Henrik var með bestan stigaárangur allra Íslendinga en árangur hans samsvaraði 2574 skákstigum.  Næstir voru Bragi Þorfinnsson (2549), Hannes Hlífar Stefánsson (2541) og Hjörvar Steinn Grétarsson (2513).

Hilmir Freyr Heimisson, sem er aðeins 10 ára, hækkar mest allra eða um 86 stig og er kominn nálægt 1700 stigum  sem er magnað hjá svo ungum skákmanni.  Andri Freyr Björgvinsson er næstur með 69 stiga hækkun, Jón Trausti Harðarson þriðji með 54 stig og Dagur Kjartansson fjórði með 52 stig.  Aðrir sem hækka um 30 stig eða meira eru: Sóley Lind Pálsdóttir (38), Dagur Ragnarsson (37), Einar Hjalti Jensson (34), Mikael Jóhann Karlsson (32), Halldór Pálsson (31), Nansý Davíðsdóttir (31) og Oliver Aron Jóhannesson (31).   Til samanburðar er mesta lækkun íslensks skákmanns á mótinu aðeins 26 skákstig.  Þetta segir okkur mikið um það hversu stigalágir íslenskir skákmenn eru í samanburði við erlenda og hversu mikilvægt Reykjavíkurskákmótið er fyrir íslenska skákþjóð.

Íslendingar hækka samtals um 473 skákstig!  En hvaðan koma þau stig?  Þjóðverjar voru rausnarlegir og 11 Þjóðverjar töpuðu samtals 174 stigum, 22 Norðmenn töpuðu samtals 104 stigum og 6 Hollendingar töpuðu samtals 57 stigum. 

Ýmiss tölfræði

198 skákmenn tóku þátt í mótinu.  85 íslenskir og 113 erlendir.  22 Norðmenn, 11 Þjóðverjar, 9 Bandaríkjamenn og 7 keppendur frá Danmörku, Svíþjóð og Englandi hverri þjóð.

26 stórmeistarar tóku þátt, 3 stórmeistarar kvenna og 20 alþjóðlegir meistarar.

24 konur tóku þátt og hefðu án efa verið fleiri ef mótið hefði ekki rekist á EM kvenna.  27 ungmenni 17 ára og yngri tefldu á mótinu. 

874 skákir voru tefldar á mótinu.  Hvítur vann 375 þeirra, svartur vann 278 en 208 enduðu jafntefli.  13 skákir á mótinu voru ótefldar. 

Fyrirkomulag mótsins

Eftir hvert einasta Reykjavíkurskákmót hefjast umræður um breytt fyrirkomulag mótsins og er það oft á þann hátt að menn vilja breyta mótinu að sínum þörfum!  Sterkustu skákmennirnir hafa talað um lokaðan flokk, titilveiðarar vilja leggja sérstaka áherslu á áfangamöguleika, skákmenn með 2000-2300 stig tala sumir hverjir fyrir um tvískiptingu mótsins í tvo flokka og þeir sem hafa færri stig vilja óbreytt fyrirkomulag.

Hlutverk mótshaldara er að horfa á heildarmyndina í stað þess að horfa á hagsmuni einstakra hópa.   Það er staðreynd að mótið stækkar ár frá ári, óskum sterkra skákmanna sem vilja komast í mótið fjölgar sífellt, ásókn erlenda sem og innlendra áhugamanna eykst jafnt og þétt.  Núna í höfðu t.d. fjórar stórmeistarar með 2700+ samband að fyrra bragði við mótshaldara en enginn í fyrra.  Fjölmiðlaathygli á mótinu hérlendis og erlendis hefur margfaldast. 

Engar stórvægilegar tillögur um breytt fyrirkomulag hafa fengið mig til að skipta um skoðun á því að fyrirkomulagið nú er einfaldlega það besta.  Að mótið skuli vera opið öllum og teflt skuli í einum flokki.  Að breyta einhverju sem vex og vex á allan hátt hlítur að teljast vafasamt.  Og hvað rímar betur við einkunnarorð skákhreyfingarinnar, Gens Una Sumus; Við erum ein fjölskylda, en galopið mót þar sem allir tefla í sama flokki.

Hins vegar má gera smærri breytingar.  Tvöfalda daginn á annaðhvort að afnema eða hafa mun fyrr í mótinu, t.d. að tefla 2. og 3. umferð sama dag.  Einnig finnst mér koma til greina að fjölga umferðum í 10 eða 11.  Þó verður að athuga að allar slíkar breytingar þýða aukinn kostnað og mögulega minni áhuga áhugamanna að sækja mótið þar sem það tæki lengri tíma en eykur þess í stað möguleika á hreinni úrslitum og möguleika manna að ná í áfanga að alþjóðlegum meistaratitlum. 

Töluverðar umræður hafa verið um pörun lokaumferðar á Skákhorninu.  Mótsstjórn mun koma saman í apríl og ræða hvað betur megi fara á Reykjavíkurmótum framtíðarinnar.  Pörun verður þar sjálfsagt meðal efnis.

Fjölmiðlun

Mótshaldarar ákváðu að leggja töluvert meiri vinnu við erlenda fjölmiðlun en oft áður.  Var boðið til landsins aðilum sem hafa sérhæft sig í fjölmiðlun á skákmótum.  Má þar nefna myndbandssérfræðinginn Vijay Kumar sem birti sín myndbönd eftir hverja umferð og Macauley Peterson sem hafði tæknilega umsjón með pallborði hverrar umferðar sem var svo í umsjón Simons Williams, Björns Þorfinnssonar og Ingvars Þórs Jóhannessonar.  Peterson setti einnig upp vefmyndavél sem sýndi frá hverri umferð.  Halldór Grétar Einarsson hafði yfirumsjón með tæknimálum fyrir mót og á að öðrum ólöstuðum mestan þátt í hversu vel til tókst.  

Allt þetta tókst vonum framar.

Peter Doggers frá Chessvibes birti reglulega pistla á Chessvibes og það gerði einnig Alina L´ami á Chessbase.  Flottir pistlar sem voru ekki eingöngu jákvæðir um sjálft mótshaldið heldur voru einnig prýðileg landkynning fyrir landið okkar.   

Sérviðburðir

Margir skemmtilegir sérviðburðir fóru fram í kringum mótið.  Stefán Bergsson hafði yfirumsjón með þeim og fórst það vel úr hendi.

Eftirfarandi sérviðburðir fóru fram:

 

Stelpuskákdagurinn.  Hou Yifan var aðalnúmerið í viðburði í tilefni fyrsta kvennaskákdagsins sem fram fór í Sjóminjasafninu á sunnudaginn fyrir mótið.  Yifan gaf engin grið og fékk 25½ í 26 skákum bæði gegnum stelpum og strákum á öllum aldri.  Jafntefli náði Kristófer Jóel Jóhannesson. Nánar má lesa um stelpuskákdaginn hér.

 

Vin Open.  Vin Open fór fram degi fyrir mót.  Það er alltaf gott að tefla í notalegu andrúmsloftinu í Vin og mótið var vel sótt.  Mótið hófst með upphitunarskák Sokolovs og Hauks Angantýssonar.  Gunnar Freyr Rúnarsson sigraði svo á sjálfu mótinu sem 22 tóku þátt í.  Nánar má lesa um mótið hér.

 

 

Fótbolti.  Keppt var í fótbolta á milli Íslands og heimsins eftir fyrstu umferð.  Spilaður voru hörkuleikur og urðu úrslitin 3-3.   Fótbolinn er orðinn að algjörlega ómissandi viðburði.  Myndir frá leiknum má finna hér. 

Gullni hringurinn.   Erlendum skákmönnum var boðið að fara gullna hringinn fyrir mjög sanngjarnt verð og notfærðu um 40 manns sér það.  Um þá ferð er m.a. fjallað um á Chessvibes.

Fyrirlestrar Boris Avrukh.  Ísraelski stórmeistarinn Boris Avrukh hélt tvo fyrirlestra að morgni fimmtudags og sóttu um 40 manns þá.  Nánar má lesa um þá hér. 

 

Pub Quiz.  Hið heimsþekkta Pub Quiz fór fram á föstudagskvöldið.  Um 60 manns tóku þátt í því og þar unnu Kanadamennirnir David Cummings og Michael Dougherty sigur.  Nánar má lesa um það hér. 

 

 

Málþing um skákkennslu.  Málþingið um skákkennslu fór fram í Hörpu.  Það var vel sótt.  Stefán Bergsson, Helgi Árnason, Ingibjörg Rósa Ívarsdóttir, Helgi Ólafsson og Maurice Ashley fluttu erindi.  Nánar má lesa um málþingið hér. 

 

 

Gagnaveitumótið - Reykjavik Barna Blitz.  Úrslit á Gagnaveitumótinu - Reykjavík Barna Blitz fóru fram í Hörpu.  Hilmir Freyr Heimisson hafði þar sigur eftir að hafa lagt Nansý Davíðsdóttir í úrslitum.  Hilmir vann alla sínar skákir.  Nánar má lesa um mótið hér. 

Þakkir

Mót eins og N1 Reykjavíkurmótið fer ekki vel fram nema með ákaflegu færu starfsfólki.  Svo var nú.  Það er lukka skákhreyfingarinnar hversu margir eru tilbúnir að leggja sig fram fyrir hana þessi misseri.  Mótsstjórnina skipuðu auk mín þau: Andrea Margrét Gunnarsdóttir, Björn Þorfinnsson, Halldór Grétar Einarsson, Helgi Árnason, Hrafn Jökulsson, Jón Gunnar Jónsson, Jón Þorvaldsson, Omar Salama, Óskar Long Einarsson, Róbert Lagerman og Stefán Bergsson.   Allt þetta fólk skilaði vel sínu.  

 

Skákstjórn skipuðu Ríkharður Sveinsson, sem var yfirdómari, Andri Valur Hrólfsson, Haraldur Baldursson, Kristján Örn Elíasson, Omar Salama, Ólafur S. Ásgrímsson Páll Sigurðsson og Rúnar Berg.   Allir skiluðu þeir sínu hlutverki með sóma og Ríkharður tók á þeim vandamálum sem upp komu með mikilli festu sem er nauðsynlegt í svona fjölmennu móti.   Það er frábært að hafa dómara sem ekki hikar við að taka erfiðar ákvarðanir.  Páll sá um pörun og gerði það með mikilli prýði.  Rétt eins Ríkharður hikaði Páll ekki við að taka erfiðar ákvarðnir.  

 

Omar Salama sá um beinu útsendingarnar sem hafa aldrei verið í jafn góðu lagi og nú. Í fyrsta skipti sem engar kvartanir bárust og það þrátt fyrir að skákum í beinn útsendingu fjölgaði um 50%!

 

Skákskýringar voru í umsjón 3ja af fjórmenningunum svokölluðu; þeirra Helga Ólafssonar, Jóhanns Hjartarsonar og Jóns L. Árnasonar.   Margeir Pétursson átti ekki heimangengt að þessu sinni. Allir stóðu sig með mikilli prýði og var það skemmtilegt að þurfa að biðja um fleiri stóla í skákskýringarstóla eins og gerðist í síðustu umferð.  Ég held að það þurfi að leita mjög langt aftur til að finna dæmi um jafn marga áhorfendur, sem skiptu hundruðum, og nú voru. 

Innslátturinn var í höndum Patrek Marons, Þormars Leví og Guðmundar Kristins Lee sem stóðu vel þrátt fyrir mikið álag og margar illa skrifaðar skákir!

Hrafn Jökulsson tók allar myndir mótsins.  Margar glæsilegar myndir sem lífguðu heldur betur upp á fréttaflutning frá mótinu.

Ef ég gleymt að telja einhvern upp í þessari upptalningu bið ég afsökunar á því!

 

Hrafn var mér innan handar allan tímann og sannarlega gott að hafa svo hugmyndaríkan og úrræðagóðan mann sér við hlið.  Að öðrum ólöstuðum hef ég honum mest að þakka ásamt Stefán Bergssyni og Halldóri Grétari Einarssyni en þessir þrír eru ávallt boðnir og búnir og gera allt vel sem þeir taka sér fyrir hendur.  Að sjálfsögðu þarf vart að nefna styttu og stoð íslenskrar skákhreyfingar síðustu áratugina, Ásdísi Bragadóttur framkvæmdastjóra Skáksambandsins sem sinnir flestum verkefnum mótsins sem minnst ber á, en eru hvað mikilvægust. 

 

Styrktaraðilar mótsins fá sínar þakkir.  Má þar sérstaklega nefna Reykjavíkurborg sem með sanni hefur verið helsti samstarfsaðili SÍ og TR hér á árum áður varðandi mótshaldið í nærri hálfa öld.   

Ríkisstjórn Íslands styrkti með myndarskap við mótið og réði sá stuðningur úrslitum varðandi það að hægt var bjóða Hou Yifan til landsins.  

N1 kom að mótinu með skömmum fyrirvara og þakka ber Hermanni Guðmundssyni sérstaklega fyrir fljót viðbrögð.  Það var ánægjulegt að starfa með N1 að mótshaldinu. 

Gagnaveita Reykjavíkur kom einnig að mótinu og var Reykjavík Barna Blitz kennt við fyrirtækið að þessu sinni.  Birgir Rafn Þráinsson á miklar þakkir skyldar fyrir stuðninginn. 

Reykjavíkurskákmótið er eitt elsta opna skákmót heims og ein elsta hátíðin sem kennd er við Reykjavíkurborg. Mótið dregur að sér yfir hundrað erlenda skákmenn, sem eru einnig almennir ferðamenn hér í landi og kynna sér land og þjóð samhliða taflmennskunni. Erlendu keppendurnir voru ánægðir með dvölina, og nefndu margir þann vinalega brag sem einkennir hátíðina. Mótið stækkar og stækkar og áhrif þess og vægi innan hins alþjóðlega skákheims síaukast. Skákhátíðin í marsmánuði ár hvert í Reykjavíkurborg göfgar skáklíf landsins svo um munar.

Nokkur ummæli erlendu gestanna

Eftir mótið hef ýmislegt verið skrifað um mótið.  Bæði þá vefsíðum, í tölvupóstum og á Facebook.  Hér eru nokkur sýnishorn.

GM Maurice Ashley (Bandaríkin)

Back home from an amazing trip to Iceland! Reconnected with old friends and made a few new ones. The organization of the tournament was fabulous; they do everything to make you feel right at home. And the food! Some of the best soups and freshly made fish I've had in years. Iceland's simply one of the best places in the world. I can't wait to return!

GM Robert Hess (Bandríkin)

Thanks again for the fantastic tournament. I plan on returning to Reykjavik many more times.

IM  John Bartholomew (Bandaríkin)

Thanks for a very enjoyable and professionally-run event! I will definitely be returning to Iceland.

FM Michael Langer (Bandaríkin)

I want to express my thanks again for the wonderful tournament.

GM Alexander Ipatov (Tyrklandi)

The tournament in Reykjavik is finished. I met so many great people here and spent the time really great. Iceland is an amazing country! I'm very grateful to Gunnar Bjornsson and all other people who took participation in the organization of this great festival

Peter Doggers (Hollandi) - af Chessvibes

And so an end has come to a wonderful tournament, or rather, festival, in "chess city" Reykjavik. The closing ceremony was organized in a way that one normally only sees at super tournaments: in the reception area of the town hall, with free champagne and hors-d'oevres. Afterwards we joined the organizers at a tapas place, and in a number of speeches everyone thanked each other for their part of the success. The organizers are ambitious: they are planning to grow further for the 49th and 50th edition which will also take place in Harpa and for which more private sponsorship has already been secured. Besides, for 2015 they hope to get the European Team Championship to Reykjavik.

Alina L´ami (Rúmeníu) - af Chessbase

Being able to watch such high class chess in a very beautiful location is not the only reason for the increasing popularity of this special tournament. Its organizers simply refuse to rest before things are solved, before they know you are happy. And they always learn from the previous edition, making the next one even better. To me, it looks like the entire nation, the local authorities, the sponsors, the politicians, they are all weaving an atmosphere which is difficult to describe.

Daniel Vanheirzeele (Belgía)

I'm coming back and not alone:)-...

I've played around the world and seen many places, but you really are in my Top 3 of all!

The combination of nice people, venue, soccer ' yes indeed!), good food and great chessculture, is simply a perfect reason to return!

Gunnar Björnsson,
formaður mótsstjórnar N1 Reykjavíkurmótsins

Hannes og Héðinn í beinni

Bein útsending frá 3. umferð hefst nú kl. 13.  Hannes mætir rússneska stórmeistaranum Ildar Khairullin (2626) en Héðinn mætir búlgarska stórmeistaranum Ivan Cheparinov (2664).

Bæði er hægt að fylgjast með skákunum á heimasíðu mótsins sem og á Chessbomb.   Hannes teflir á borði nr. 17 en Héðinn á borði nr. 40.

Meðal annarra eftirtektarverðum viðureignum má nefna Popov (2605) - Caruana (2767) og Sokolov (2653) og Neverov (2544).

• Heimasíða mótsins 
• Beinar útsendingar (borð 1-47)
  
• Chess-Results
• Myndaalbúm (GB)

Skákmót öðlinga hófst í gær

Skákmót öðlinga hófst í gær og voru úrslit nokkuð hefðbundin.  Þó má nefna að Vignir Bjarnason vann Jóhann H. Ragnarsson og að Pétur Jóhannesson gerði jafntefli við Eggert Ísólfsson.   Þremur skákum varð að fresta. Tvær tefldar annað kvöld og sú þriðja á mánudagskvöld, þannig að pörun seinkar.

• Sigurður D.Sigfússon-Sigurður H.Jónsson  Frestað
• Pálmar Breiðfjörð      -Þorvarður F.Ólafsson   0-1
• Magnús P.Örnólfsson-Sigurjón Haraldsson    1-0
• Vignir Bjarnason       -Jóhann H.Ragnarsson   1-0
• Bjarni Hjartarson       -Sveinbjörn Jónsson  Frestað
• Kári Sólmundarson   -Kjartan Ingvarsson         1-0
• Eiríkur K.Björnsson  -Sigurlaug R.Friðþjófsd.  0.5-0.5
• Friðgeir K.Hólm       -Halldór Pálsson               0-1
• Þór Valtýsson         -John Ontiveros                1-0
• Tómas Á.Jónsson  -Bjarni Sæmundsson         0-1
• Siguringi Sigurjónsson-Björgvin Kristbergss.   1-0
• Pétur Jóhannesson-Eggert Ísólfsson             0.5-0.5
• Kjartan Másson     -Ulrich Schmidhauser    Frestað

Ekki hefur verið hægt að setja mótið á Chess-Results.

Heimasíða TR

Rammislagur 2012 - Riddarinn fór með sigur af hólmi

Hin árlega sveitakeppni ÆSA Skákklúbbs FEB (félags eldri borgara) og Riddarans (skákklúbbs eldri borgara á höfurborgarsvæðinu) fór fram í 12. sinn í gær, (miðvikudaginn 21. mars) í Strandbergi, félagsheimili Hafnarfjarðarkirkju.

Að þessu sinni var keppt á 20 borðum sem skipt var í 3 riðla eftir styrkleika.  Allir tefldu við alla i hverjum riðli og því tefldar 134 skákir.   Fréttaflutningur fyrr um daginn þar sem sagt var að breiðfylkingum eldri skákmanna myndi ljósta saman og að ásmegin myndi renna á menn, einkum Æsi, blés keppendum miklum baráttuanda í brjóst og örvaði þá til dáða.

Þó keppnin væri hörð og skákir tvísýnar var hún að þessu sinni nokkuð ójöfn frá byrjun.  Riddararnir tóku fljótt forustuna og héldu henni allt til loka og unnu sannfærandi sigur með 80.5 vinningum gegn 53.5.   Í A-riðli urðu úrslitin : 26-23 fyrir Riddarann og í B-riðli 36-13 og í C-riðli 18.5-17.5  "Æsir í Ásgarði" urðu því að sætta sig við tap þriðja árið í röð.                            

Bestum árangri í A-riðli náði þeir Jón Þ. Þór og Guðfinnur R. Kjartansson, Riddaranum, með 5 v af 7 en Jónas Þorvaldsson, Æsum kom þriðji með 4.5 v.  

Í B-riðli voru það þeir: Össur Kristinsson með fullt hús, 7 vinn., Páll G. Jónsson með 6v og Kristinn Bjarnason 5.5v, allir úr Riddaranum sem stóðu sig best. Aldursforsetinn Björn Víkingur Þórðarsson var með 4.5 v og Gísli Árnason einnig.

Í C-riðli urði þeir Ari Stefánsson og Jón Steinþórsson, Æsum,  efstir að vinningum með 4.5v af 6, en þeir Einar S. Einarsson og Eiríkur Viggóson, Riddarar, komu næstir með 4v.

Allir ofangreindir keppendur fengu borðaverðlaun.

Keppt er um veglegan farandbikar sem Magnús Pétursson, forstjóri Jóa Úherja, hefur gefið til keppninnar.  Liðstjórar voru þeir Einar S. Einarsson, Riddaranum og Birgir Sigurðsson og Finnur Kr. Finnsson, Æsum.

Taflæfingar þessara tveggja skáklúbba eldri borgara á höfðuðborgarsvæðinu eru haldnar hjá Æsum í Ásgarði, Stangarhyl, á þriðjudögum kl. 13-16.15 (9 umferðir - 10 mín. skákir) og hjá Riddaranum, í Vonarhöfn, Strandbergi, safnaðarheimili Hafnarfjarðarkirkju,  á miðvikudögum kl. 13-17 (11 umferðir, 10 mín. skákir allan ársins hring).   

Myndaalbúm (ESE)

Íslandsmót grunnskólasveita hefst á laugardag

Íslandsmót grunnskólasveita verður haldið helgina 24.-25. mars í Rimaskóla í Reykjavík.

Skákakademía Reykjavíkur er mótshaldari fyrir hönd Skáksambands Íslands.

Fyrirkomulag: Fjórir skákmenn eru í hverri sveit og 1-4 til vara. Tefldar verða níu umferðir með 15 mínútna umhugsunartíma á mann.

Liðsstjórar skulu mæta 12:30 á laugardag og skila inn liðum sínum á Monrad-spjöldum.

Dagskrá mótsins; Tefldar verða fimm umferðir á laugardegi og fjórar á sunnudegi. Taflið hefst 13:00 á laugardag og 11:00 á sunnudag.

Skráning sveita og fyrirspurnir skulu berast á [e-mail] eigi síðar en fimmtudaginn 22.  mars. Með skráningu skal fylgja gsm og netfang liðsstjóra.

Verðlaun verða veitt fyrir þrjú efstu sætin í mótinu, bestu b-e sveitir og borðaárangur.

Íslandsmeistarar munu vinna sér inn rétt til þátttöku á Norðurlandamóti grunnskólasveita sem fram fer í haust.  Viðkomandi skóli ber ábyrgð á skipulagningu og fjármögnun ferðarinnar en Skáksamband Íslands mun aðstoða við þjálfun keppenda.

 

Fimmtudagsmót hjá TR í kvöld

Fimmtudagsmót hjá TR 2012 verður í kvöld og hefst að venju kl. 19:30 en húsið opnar kl. 19:10.

Tefldar verða 7 umferðir með 7 mínútna umhugsunartíma.

Mótin fara fram í félagsheimili T.R., skákhöllinni að Faxafeni 12. Glæsilegur verðlaunapeningur er í boði fyrir sigurvegarann.

Mótin eru öllum opin og er aðgangseyrir kr. 500 fyrir 16 ára og eldri en frítt er fyrir 15 ára og yngri.  Boðið er upp á kaffi ásamt léttum veitingum án endurgjalds.

EM pistill nr. 2 - Góður dagur

 

 

 

Það gekk vel hjá Hannesi og Héðni í dag.  Hannes vann mjög góðan sigur á serbneska stórmeistaranum Bojan Vuckovic (2628) i í vel tefldri skák í aðeins 29 leikjum.   Héðinn Steingrímsson, sem hafði svart, jafnaði taflið auðveldlega gegn rússneska stórmeistaranum Mikhail Kobalia (2666) og hafði síst lakar í lokastöðunni. 

Hannes er meðal 40 skákmanna sem hafa fullt hús en Héðinn er í 41.-124. sæti.   Minni á að þeir þurfa að vera meðal 23 efstu til að ávinna sér rétt til að tefla á Heimsbikarmótinu (World Cup).  Minni líka á það mat Ivan Sokolov að það þurfi +4 (þ.e. 7,5 af 11) til að komast áfram svo baráttan er vart hafin. 

Mótið fer fram í Novatel-hótelinu í Plovdid sem margir kannast við.  Hér fór t.d. fram EM landsliða 2003.  Teflt er á hótelinu sem er alltaf mikill plús.  Teflt er í tveimur sölum.  Í þeim betri eru 77 fyrstu borðin en í mínum sal tefla „skúnkarnir". 

Aðstæður eru fínar en í samanburði en ná samt ekki aðstæðum í Hörpu.  Borðin eru í minna lagi og engir dúkar.   Og hér er líka heldur þrengra en í Hörpu.  Eina sem þessi keppnisstaður hefur fram yfir Hörpu er að hér mun minn hávaði og engin þörf á eyrnatöppum!  Enginn Garðar Cortes að taka aríur á salerninu!

Í dag voru margir sterkir skákmenn í "gúanóinu".  Armenar voru fjölmennir og hér voru t.d. Sargassian, Akopian og Petrosian.  Pólski stórmeistarinn Tomasz Markowski (2612) tefldi hér í dag og tapaði aftur og virðist því vera hálf sestur hér að! Sá stigalægsti sem hefur fullt hús er hins vegar makedónski alþjóðlegi meistarinn Filip Pancevski (2470) sem hefur unnið bæði Volokitin (2695) og Eduoard (2607).  

Plovdid mun vera ein elsta borg Evrópu og reka sögu hennar frá því um 6.000 árum fyrir Krist.  Sjá nánar um borgina hér.  Ég stefni á göngutúr í miðbæinn á morgun.  Hér er líka frábært veður.  Sól um um 20 gráður.  Hér munu vera byggingar frá 13. öld.   Verðlag hér er mjög lágt og bjórinn á 100 kr. út úr búð.  Betl hér hins vegar eitthvað og hef ég verið eltur af konum sem tala um börnin sín og mat fyrir þau. 

Á skástað gildir zero-tolerance reglan það er að menn þurfa að vera sestir áður en skák hefst.  Sérstök regla sem veldur því að menn mæta stundvíslega og sitja sem hlýðnir skólakrakkar.  Einn keppendanna kom í dag um hálfri mínútu fyrir umferð og var í paník að leita sér að sínu borði.  Við skákstjórarnir byrjum hins vegar ekki umferðirnar við slík tilvik heldur gefum mönnum tækifærið á að setjast áður en umferð er hafin. 

Skemmtileg umferð á morgun og ég hef fulla trú á mínum mönnum.

Gunnar Björnsson

• Heimasíða mótsins 
• Beinar útsendingar (borð 1-47)
  
• Chess-Results
• Myndaalbúm (GB)

EM: Pörun 3ju umferðar

Bein útsending frá 3. umferð hefst kl. 13 á morgun. Hannes mætir rússneska stórmeistaranum Ildar Khairuillin (2626) og Héðinn mætir búlgarska stórmeistaranum Ivan Cheparinov (2664).  

Bæði er hægt að fylgjast með skákunum á heimasíðu mótsins sem og á Chessbomb.   Hannes teflir með svörtu á borði 17 en Héðinn með hvítu á borði 37.

• Heimasíða mótsins 
• Beinar útsendingar (borð 1-47)
  
• Chess-Results
• Myndaalbúm (GB)

EM: Hannes með góðan sigur - Héðinn með jafntefli

Stórmeistararnir Hannes Hlífar Stefánsson (2556) og Héðinn Steingrímsson (2531) náðu báðir fínum úrslitum í 2. umferð EM einstaklinga í Plovdid í Búlgaríu sem enn er í gangi.  Báðir tefldu þeir við mun stigahærri andstæðing.  Hannes vann serbneska stórmeistarann Bojan Vukovic (2628) en Héðinn gerði jafntefli við rússneska stórmeistarann Mikhaeil Kobila (2666).  Hannes hefur fullt hús en Héðinn hefur 1,5 vinning.

Pörun 3. umferðar kemur ekki fyrr en eftir 3-4 klukkustundir enda flestar skákir enn í gangi.   

Frétt um pörun og smá pistill síðar í kvöld.  

Hægt er að skoða skákirnar á heimasíðu mótsins sem og á Chessbomb.  

• Heimasíða mótsins 
• Beinar útsendingar (borð 1-47)
  
• Chess-Results
• Myndaalbúm (GB)

EM: Héðinn og Hannes í beinni

Bein útsending frá 2. umferð hefst nú kl. 13. Héðinn mætir rússneska stórmeistaranum Mikhaeil Kobila (2666) og Hannes mætir serbneska stórmeistaranum Bojan Vukovic (2628).  

Bæði er hægt að fylgjast með skákunum á heimasíðu mótsins sem og á Chessbomb.   Héðinn teflir á borði 17 en Hannes á borði 40.

Meðal annarra eftirtektarverðum viðureignum má nefna Caruana (2767) - Banusz (2583) og Nyzhnik (2585) - Giri (2717).

• Heimasíða mótsins 
• Beinar útsendingar (borð 1-47)
  
• Chess-Results
• Myndaalbúm (GB)