Áskorendaflokkur Íslandsmótsins í skák hefst á föstudag

Áskorendaflokkur Íslandsmótsins í skák 2012 fer fram dagana 30. mars  - 8. apríl  nk.  Mótið fer fram í Faxafeni 12, Reykjavík.  

Efstu tvö sætin gefa föst sæti í Landsliðsflokki 2012 eða 2013.  Tveir efstu menn í áskorendaflokki nú geta valið þar á milli.  Fyrirkomulag landsliðsflokks má finna hér.

Dagskrá:

• Föstudagur, 30. mars, kl. 18.00, 1. umferð
• Laugardagur, 31. mars, kl. 14.00, 2. umferð
• Sunnudagur, 1. apríl, Frídagur
• Mánudagur, 2. apríl, kl. 18.00, 3. umferð
• Þriðjudagur, 3. apríl, kl. 18.00, 4. umferð
• Miðvikudagur, 4. apríl, kl. 18.00, 5. umferð
• Fimmtudagur, 5. apríl, Frídagur
• Föstudagur, 6. apríl, kl. 11.00, 6. umferð
• Föstudagur, 6. apríl, kl. 17.00, 7. umferð
• Laugardagur, 7. apríl, kl. 14.00, 8. umferð
• Sunnudagur, 8. apríl, kl. 14.00, 9. umferð

Umhugsunartími: 90 mín. + 30 sek. til að ljúka.

Verðlaun:

• 1. 50.000.-
• 2. 30.000.-
• 3. 20.000.-

Aukaverðlaun:            

• U-2000 stigum, 10.000.-
• U-1600 stigum, 10.000.-
• U-16 ára, 10.000.-
• Kvennaverðlaun, 10.000.-
• Fl. stigalaura eða með 1.000 stig, 10.000.-

Aukaverðlaun eru háð því að a.m.k. 5 keppendur séu í hverjum flokki og eingöngu er hægt að vinna til einna aukaverðlauna.  Reiknuð verða stig séu fleiri en einn í efsta sæti.  Stigaverðlaunin miðast við íslensk skákstig.

Þátttökugjöld:

• 18 ára og eldri             3.000.-
• 17 ára og yngri            2.000.-

Skráning fer fram hér á Skák.is.  Einnig er hægt að skrá tölvupósti á [e-mail] eða tilkynna í síma 568 9141 virka daga kl. 10-13.   Upplýsingar um þegar skráða keppendur má nálgast hér.

Chess-Results

Páskahátíð á Grænlandi: Skák í afskekktasta þorpi norðurslóða

Skákhátíð verður haldin um páskana í grænlenska þorpinu Ittoqqortoormiit, sem er á 70. breiddargráðu, 800 kílómetra frá næsta byggða bóli. Að hátíðinni standa Hrókurinn og Kalak, vinafélag Íslands og Grænlands. Heimsóknin markar upphaf 10. starfsár liðsmanna Hróksins og Kalak, meðal grænlenskra barna.

Heimsóknin nú stendur frá 31. mars til 7. apríl og verður fjölbreytt skákdagskrá í skólanum. Rúmlega 100 börn búa í Ittoqqortoormiit, sem telja má afskekktasta þorpi á norðurhveli jarðar. Alls eru íbúar nú tæplega 500 og hafa flestir viðurværi af veiðum og þjónustu.

Þetta er fimmta páskaheimsóknin í röð til Ittoqqortoormiit, og hátíðin er orðin fastur liður í mannlífinu. Langflest börnin í þorpinu kunna nú mannganginn og eiga taflborð, og bíða spennt eftir skákhátíðinni um páskana.

Margir leggjast á eitt svo hátíðin heppnist sem best. Menningar- og tómstundaráð sveitarfélagsins Sermersooq og NunaFonden veittu fjárhagslegan stuðning.

Bónus gefur 100 páskaegg í vinninga á barnaskákmótum, og fjölmargir leggja til vinninga og verðlaun, m.a. Ísspor, Penninn/Eymundsson, Atlantsolía, Sögur útgáfa, Íslenskt grænmeti, Actavis og Fjallið hvíta.

Þá gefur Cintamani veglega vinninga handa börnunum og leggur leiðangursmönnum til skjólfatnað, enda allra veðra von svo norðarlega á Grænlandi.

Leiðangursstjóri er Arnar Valgeirsson, sem hefur stjórnað skákvæðingunni í Ittoqqortoormiit frá upphafi. Liðsmenn hans verða Hrafn Jökulsson, Jón Birgir Einarsson og Stefán Bergsson.

Grænlandskvöld á Haítí á miðvikudagskvöld

Miðvikudagskvöldið 28. mars efna Grænlandsfararnir og aðrir velunnarar til Grænlandsmóts á Kaffi Haítí við Geirsgötu 7b. Gleðin hefst klukkan 20.30 og eru allir velkomnir.

Tefldar verða 6 umferðir með tímaforgjöf. Þátttökugjöld eru engin, en leiðangursstjóri mun taka við framlögum í verðlaunakaupasjóð!

Grænlendingar eru næstu nágrannar Íslendinga. Hrókurinn hélt fyrsta alþjóðlega skákmótið í sögu Grænlands árið 2003. Meðal keppenda voru Friðrik Ólafsson, Halldór Blöndal, Jonathan Motzfeldt, Ivan Sokolov, Luke McShane, Regina Pokorna og Ivan Sokolov.

Síðan 2004 hefur öll áhersla verið lögð á skákviðburði á austurströnd Grænlands, og veglegar skákhátíðir hafa verið haldnar í Tasiilaq og öll þorpin á Austur-Grænlandi heimsótt. Vel á annað þúsund grænlensk börn hafa fengið taflsett að gjöf, og heimamenn hafa stofnað til skákfélaga í nokkrum þorpum.

Fréttir af leiðangrinum til Grænlands verða sagðar hér á Góðum granna.

EM: Pörun 7. umferð - 10 skákmenn efstir og jafnir

Frídagur er í dag á EM.   10 skákmenn eru efstir og jafnir með 5 vinninga.  Þar á meðal má finna Íslandsvinina Yuriy Kuzubov (2615) og Gawain Jones (2635).  24 skákmenn hafa 3,5 vinning og meðal þeirra eru Movsesian (2702) og Caruana (2767).  23 sæti eru í boði á Heimsbikarmótinu (World Cup) svo nóg er eftir!

Í sjöundu umferð sem fram fer á morgun teflir Héðinn við tyrkenska alþjóðlega meistarann Burak Firat (2405) en Hannes við rússneska FIDE-meistarinn Kirill Alekseenko (2367).þ

• Heimasíða mótsins 
• Beinar útsendingar (hefjast kl. 12 - borð 1-47)
  
• Chess-Results
• Myndaalbúm (GB)

Páskaeggamót Góu og Hellis fer fram í dag

Páskaeggjamót Góu og Hellis verður haldið mánudaginn 26. mars 2012, og hefst taflið kl. 17, þ.e. nokkru fyrr heldur en venjulegar mánudagsæfingar. Páskaeggjamótið kemur í stað mánudagsæfingar. Tefldar verða 7 umferðir með 7 mínútna umhugsunartíma. Mótið er opið öllum krökkum á grunnskólaaldri. Skráning í mótið verður á heimasíðu Hellis: http://hellir.blog.is/  

Ókeypis er fyrir félagsmenn í Helli en fyrir aðra er þátttökugjald kr. 500. Allir þátttakendur keppa í einum flokki en verðlaun verða veitt í tveimur aðskildum flokkum. Páskaegg frá Góu verða í verðlaun fyrir þrjú efstu sætin, bæði í eldri flokki (fæddir 1996 - 1998) og yngri flokki (fæddir 1999 og síðar). Að auki verða tvö páskaegg dregin út og efsta stúlkan í mótinu fær páskaegg í verðlaun. Enginn fær þó fleiri en eitt páskaegg.

Páskaeggjamótið verður haldið í félagsheimili Hellis að Álfabakka 14a í Mjóddinni. Inngangurinn er milli Subway og Fröken Júlíu og salur félagsins er á þriðju hæð hússins.

Atkvöld hjá Helli í kvöld

Taflfélagið Hellir heldur atkvöld mánudaginn 26. mars nk. og hefst taflið kl. 20:00. Fyrst eru tefldar 3 hraðskákir þar sem hvor keppandi hefur 5 mínútur til að ljúka skákinni og síðan þrjár atskákir, með fimmtán mínútna umhugsun. Teflt er í félagsheimili Hellis í Álfabakka 14a í Mjóddinni. 

Sigurvegarinn fær í verðlaun pizzu frá Dominos Pizzum. Þá verður einnig dreginn út af handahófi annar keppanda, sem einnig fær pizzu hjá Dominos Pizzum. Þar eiga allir jafna möguleika, án tillits til árangurs á mótinu. Þátttökugjöld eru kr. 300 fyrir félagsmenn (kr. 200 fyrir 15 ára og yngri) og kr. 500 fyrir aðra (kr. 300 fyrir 15 ára og yngri)

Barna- og unglingameistaramót Goðans fer fram í dag

Mánudaginn 26 mars kl 16:00 - 17:50 verður Barna og unglingameistaramót skákfélagins Goðans í skák haldið í Framsýnarsalnum Garðarsbraut 26 á Húsavík.

Öll börn og unglingar 16 ára og yngri í Þingeyjarsýslu geta tekið þátt í mótinu.

Tefldar verða 5-7 umferðir (monrad-kerfi) með 7-10  mín umhugsunartíma á mann.

Verðlaun verða veitt í eftirtöldum flokkum:
(bæði farandverðlaun og eignarverðlaun)

Stúlkur:

• 4 bekkur og yngri     (börn fædd 2002 eða síðar)
• 5-7 bekkur                (börn fædd 1999- 2001)
• 8-10 bekkur              (börn fædd 1996-1998)

Strákar:

• 4 bekkur og yngri
• 5-7 bekkur
• 8-10 bekkur

Skráning í mótið fer fram hjá Hermanni í síma 4643187 eða 8213187.

Einnig á [e-mail]

Skráningu líkur kl 15:55 á mótsdegi.

Þátttökugjald er krónur 500 á keppanda, sem greiðist á mótsstað.

(Ef fleiri en tvö systkyni keppa er frítt fyrir þau)

EM: Pistill nr. 6

Í dag tók við sumartími hér í Búlgaríu og reyndar á flestum stöðum í Evrópu sem þýddi það að umferðin í dag hófst aðeins 23 tímum síðar en umferðin í gær.  Reyndar er ekki sumartími á Íslandi og að mér skilst ekki heldur í sumum af gömlu Sovétlýðveldunum.  Og það olli vandræðum því 6-7 manns ættu ekki til leiks í umferðina.  Og þar á meðal held ég 5 Georgíumenn af samtals 9 keppendum þaðan.   Baadur Jobova, sem tefldi á öðru borði mætti þó til leiks. Þetta var samt sem áður margkynnt og m.a. á rússnesku og merkilegt að þeir hafi ekki rætt þetta sín á milli. 

Þessi tímabreyting truflaði mig sjálfan og mér vantaði sárlega þennan klukkutíma. Ég vaknaði á „hefðbundnum" tíma og reyndar rúmlega það en hafði þá sofið af mér bæði morgunmat og göngutúr.

Ég veit fremur lítið um skákir dagsins enda hvorugur í beinni og ég hef ekki rætt við strákana.  Hannes tefldi hvasst fórnaði manni í byrjun tafls og tapaði gegn Smeets.  Héðinn reyndi að tefla til vinnings en andstæðingurinn til jafnteflis og náði því fram. 

Búið er að setja á aðlagaða Sofíu-reglu á EM-mótum sem mér sýnist að hafi reynst mjög vel hér.  Nú eru öll samskipti á milli skákmannanna bönnuð innan 40 leikja og þar með er bannað að bjóða jafntefli fyrir þann tíma.  Gott skref sem skilar í sér strax í færri stuttum jafnteflum, sem eru til ama, og kemur um leið fyrir taktísk jafnteflisboð.    

Þetta getur hins vegar orðið til þess að steindauðar jafnteflisstöður er tefldar lengur en þörf er á.  Um daginn sá ég skák þar sem keppendur höfðu mislita biskupa og 3 peð á sama væng og þurftu að tefla um 10 leiki til viðbótar engum til ánægju.  En á móti má nefna að það tók þá aðeins nokkrar mínútur. 

Þegar skákirnar eru orðnar jafnteflislegar eiga skákmennirnir það til að þrátefla og kalla svo á skákstjóra til að krefjast jafntefli.  Þetta þarf að gera á þennan hátt þrátt fyrir báðir keppendur séu sáttir við jafnteflið.  Stundum spaugilegt þegar þetta gerist eftir 38 eða 39 leiki.  Af hverju ekki að tefla 1-2 leiki til viðbótar og semja svo sjálfir!  Og í dag gerðist það að 2 stigalágir skákmenn sömdu jafntefli eftir 19 leiki.  Niðurstaða skákstjóra var að jafnteflið var dæmt ógilt og skákin tefld áfram.   Volkov og Dreev tókst svo að þrátefla í aðeins 13 leikjum sem verður teljast ansi gott!

Á morgun er frídagur.  Í kvöld ætla ég mér að gera mér glaðan dag.  Stærsta verkefni morgundagsins er svo skattskýrslugerð sem hefur legið á hakanum. 

Hakuna Matata!

Gunnar Björnsson

Skákþáttur Morgunblaðsins: Viðburðarík lokaumferð Reykjavíkurskákmótsins

Reykjavíkurskákmótið 9. umferð:

Hou Yifan - Caruana

Hér réðust úrslit 27. Reykjavíkurskákmótsins. Kínverski heimsmeistarinn, sem hafði teflt flókna miðtaflsstöðu af hreinni snilld gegn stigahæsta skákmanni mótsins, gat nú leikið 41. Rac4! sem á að vinna, t.d. 41.... Hd8 42. Ra5! Bxe4 43. He2 og vinnur mann eða 41.... f6 42. Rd7! Ba6 43. Rdb6 os.frv. Með sigri hefði Hou Yifan unnið mótið en Caruana hékk á jafntefli og varð því einn efstur. Skákin í heild gekk þannig fyrir sig:

1. e4 e5 2. Rf3 Rc6 3. Bb5 a6 4. Ba4 Rf6 5. 0-0 b5 6. Bb3 Bc5 7. c3 d6 8. d4 Bb6 9. h3 0-0 10. Be3 h6 11. Rbd2 He8 12. He1 Bd7 13. Db1 Ra5 14. Bc2 c5 15. d5 c4 16. b4 cxb3 17. axb3 Bxe3 18. Hxe3 Rb7 19. b4 Rh5 20. Bd3 Rf4 21. Bf1 Hf8 22. c4 bxc4 23. Bxc4 a5 24. bxa5 Rxa5 25. Db4 Rxc4 26. Hxa8 Dxa8 27. Rxc4 Da1 28. He1 Da2 29. Rfd2 Hc8 30. He3 Dc2 31. Kh2 Rd3 32. Db7 Rc5 33. Db6 Rd3 34. Rxd6 Hf8 35. R6c4 Rxf2 36. Db1 Dxb1 37. Rxb1 Bb5 38. Rba3 Ba6 39. Rxe5 He8 40. d6 Bb7

- sjá stöðumynd -

41. Rxf7 Kxf7 42. Hf3 Ke6 43. Rb5 Hb8 44. Hxf2 Bxe4 45. He2 Hxb5 46. Hxe4 Kxd6 47. Kg3 Kd5

- Jafntefli.

Henrik Danielsson náði bestum árangri íslensku keppendanna, hlaut 7 vinninga og varð í 2.-8. sæti. Héðinn Steingrimsson og Hannes Hlífar Stefánsson hlutu 6½ vinning og urðu í 9.-18. sæti. Framan af móti var það Bragi Þorfinnsson sem stóð sig best. Hann var með 4½ vinning eftir fyrstu fimm umferðirnar, fékk ½ vinning úr næstu þremur skákum en átti samt möguleika á stórmeistaraáfanga ef hann fengi að tefla við tiltölulega „þægilegan" 2.360 stiga mann í síðustu umferð. Hins vegar „sagði tölvan nei" og dró úr hatti sínum alltof stigalágan andstæðing fyrir Braga, hinn „þrælmorkna" Ian Thompson. Við það gat Bragi ekki unað og mætti ekki til að tefla lokaskákina. Um þetta mál hafa síðustu daga staðið harðar deilur á umræðuhorni skákhreyfingarinnar, skákstjórar lífs og liðnir fengið það óþvegið en einkum þó sá þeirra sem ýtti á enter-takkann og gerði pörun lokaumferðarinnar opinbera. Ýmsir góðir menn hafa þar farið hressilega fram úr sér. Ávallt hefur legið fyrir að svo stórt opið mót með miklum styrkleika- og stigamun á keppendum er ekki sérlega heppilegt fyrir „titilveiðara". Reykjavíkurskákmótið er haldið á ári hverju og má hiklaust bjóða upp á annað fyrirkomulag annað veifið a.m.k.

Uppskera okkar manna var með besta móti í ár. Mikhael Jóhann Karlsson hlaut 3. verðlaun í flokki skákmanna 16 ára og yngri. Dagur Kjartansson, Jón Trausti Harðarson og Leifur Þorsteinssson röðuðu sér í þrjú efstu sætin með bestan árangur miðað við stig en Sigurður Daði Sigfússon varð í 1. sæti í stigaflokknum 2.201-2.400 og Þorvarður Ólafsson varð efstur í stigaflokknum 2.001-2.200 en þar varð Magnús Pálmi Örnólfsson í 3. sæti. Í keppni þeirra sem voru undir 2.000 stigum varð Siguringi Sigurjónsson í 2. sæti og Halldór Pálsson í 3. sæti. Þeir eiga báðir mikið inni. Þess má geta að hinn 10 ára gamli Hilmir Freyr Heimisson hækkaði langmest allra keppenda á mótinu en hann hlaut 4 vinninga af 9 mögulegum og hækkaði um tæplega 90 elo-stig og verður með um 1.700 stig á næsta lista FIDE. Og allir fögnuðu með Einari Hjalta Jenssyni sem náði áfanga að alþjóðlegum meistaratitli.

Helgi Ólafsson [e-mail]

-------------------------------------------

Skákþættir Morgunblaðsins eru birtir á Skák.is viku síðar en í sjálfu Morgunblaðinu.  

Grein þessi birtist í Sunnudagsmogganum, 18. mars 2012

Skákþættir Morgunblaðsins

[Event "Reykjavik Open"] [Site "Reykjavik ISL"] [Date "2012.03.13"] [EventDate "2012.03.06"] [Round "9"] [Result "1/2-1/2"] [White "Hou Yifan"] [Black "F Caruana"] [ECO "C78"] [WhiteElo "2639"] [BlackElo "2767"] [PlyCount "94"] 1. e4 e5 2. Nf3 Nc6 3. Bb5 a6 4. Ba4 Nf6 5. O-O b5 6. Bb3 Bc5 7. c3 d6 8. d4 Bb6 9. h3 O-O 10. Be3 h6 11. Nbd2 Re8 12. Re1 Bd7 13. Qb1 Na5 14. Bc2 c5 15. d5 c4 16. b4 cxb3 17. axb3 Bxe3 18. Rxe3 Nb7 19. b4 Nh5 20. Bd3 Nf4 21. Bf1 Rf8 22. c4 bxc4 23. Bxc4 a5 24. bxa5 Nxa5 25. Qb4 Nxc4 26. Rxa8 Qxa8 27. Nxc4 Qa1+ 28. Re1 Qa2 29. Nfd2 Rc8 30. Re3 Qc2 31. Kh2 Nd3 32. Qb7 Nc5 33. Qb6 Nd3 34. Nxd6 Rf8 35. N6c4 Nxf2 36. Qb1 Qxb1 37. Nxb1 Bb5 38. Nba3 Ba6 39. Nxe5 Re8 40. d6 Bb7 41. Nxf7 Kxf7 42. Rf3+ Ke6 43. Nb5 Rb8 44. Rxf2 Bxe4 45. Re2 Rxb5 46. Rxe4+ Kxd6 47. Kg3 Kd5 1/2-1/2

EM: Jafntefli hjá Héðni - tap hjá Hannesi

Héðinn Steingrímsson gerði jafntefli við bosníska alþjóðlega meistarann Dalibor Stojanovic (2471) í sjöttu umferð EM einstaklinga sem fór í dag í Plovdid í Búlgaríu.  Hannes Hlífar Stefánsson (2531) tapaði hins vegar fyrir hollenska stórmeistaranum Jan Smeets (2610).  Báðir hafa þeir 3 vinninga.  

Frétt um pörun og pistill kemur síðar í kvöld eða í fyrramálið.  

Frídagur er á morgun.   Sjöunda umferð fer fram á þriðjudag og hefst kl. 12.  

• Heimasíða mótsins 
• Beinar útsendingar (borð 1-47)
  
• Chess-Results
• Myndaalbúm (GB)

Sögulegur sigur Rimaskóla á Íslandsmóti grunnskólasveita

 

 

Allir bestu skákmenn landsins á unglingastigi voru mættir um helgina í Rimaskóla til að keppa á Íslandsmóti grunnskólasveita í skák. Það má segja að heimavöllurinn hafi reynst sveitum Rimaskóla sterkur. Þannig sigraði a-sveit skólans með fáheyrðum yfirburðum en sveitin hlaut 34,5 vinning af 36 mögulegum.

Aðeins ein skák tapaðist þegar Nansý Davíðsdóttir fyrirliði b-sveitarinnar lagði Dag Ragnarsson að velli í fyrstu umferð. B-sveit skólans skipuð nemendum sem enn eru á barnaskólastigi hlaut silfrið eftir mikla spennu í lokin en margar sveitir áttu möguleika á verðlaunasæti fyrir lokaumferðina.

 

Er þetta sögulegur sigur hjá Rimaskóla en í langri sögu mótsins hafa tvær sveitir frá sama skólanum aldrei áður lent í tveimur efstu sætunum. A-sveit Salaskóla frá Kópavogi hlaut bronsið, en Landsliðsflokkurinn í skák hefst í Kópavogi 13. apríl.

 

 

 

Borðaverðlaun hlutu:

• 1. Birkir Karl Sigurðarson Salaskóla 8v/9
• 2. Oliver Aron Jóhannesson Rimaskóla 9v/9
• 3. Jón Trausti Harðarson Rimaskóla 9v/9
• 4. Hrund Hauksdóttir Rimaskóla 9v/9

 

Sannarlega glæsilegur árangur, öll ungmennin sem hlutu borðaverðlaun hafa teflt með unglingalandsliðum Íslands.

 

Salaskóla sigraði í keppni e, d og c sveita en Rimaskóli vitanlega í keppni b sveita.

Íslandsmeistarar Rimaskóla:

• 1. Dagur Ragnarsson
• 2. Oliver Aron Jóhannesson
• 3. Jón Trausti Harðarson
• 4. Hrund Hauksdóttir

 

Silfurlið b-sveitar Rimaskóla:

• 1. Nansý Davíðsdóttir
• 2. Jóhann Arnar Finnsson
• 3. Svandís Rós Ríkharðsdóttir
• 4. Joshúa Davíðsson

Liðsstjórar sveitanna voru Helgi Árnason og Hjörvar Steinn Grétarsson.

Bronslið Salaskóla:

• 1. Birkir Karl Sigurðarson
• 2. Hilmir Freyr Heimisson
• 3. Þormar Leví Magnússon
• 4. Hildur Berglind Jóhannsdóttir
• v. Jón Smári Ólafsson

Liðsstjóri sveita Salaskóla var Tómas Rasmus.

Yfirskákstjóri var Omar Salama.

Liðsstjórum er sérstaklega þakkað fyrir helgina, en við mótshald sem þetta munar mikið um að hafa reynda liðsstjóra enda gekk mótshaldið vel fyrir sig og ekki eitt deilumál kom upp.

Lokastaðan:

 

Rk.	Team	TB1	TB2
1	Rimaskóli A	34,5	18
2	Rimaskóli B	24	13
3	Salaskóli A	23,5	13
4	Hólabrekkuskóli	23	13
5	Álfhólsskóli A	22	12
6	Hagaskóli	20	10
7	Smáraskóli A	19,5	8
8	Glerárskóli	19	11
9	Ölduselsskóli	19	9
10	Árbæjarskóli	19	9
11	Vatnsendaskóli	18,5	11
12	Salaskóli B	18,5	10
13	Salaskóli C	18,5	10
14	Álfhólsskóli B	18,5	10
15	Laugalækjarskóli A	18,5	8
16	Vættaskóli	17,5	8
17	Melaskóli	17,5	8
18	Sæmundarskóli	17,5	8
19	Rimaskóli C	17	7
20	Hofsstaðaskóli	16,5	10
21	Snælandsskóli	16	8
22	Salaskóli D	13,5	6
23	Rimaskóli D	12,5	5
24	Salaskóli E	11	5
25	Smáraskóli B	8	3
26	Álfhólsskóli C	5	1

Myndaalbúm frá síðari degi (HJ)