Kappteflið um Patagóníusteininn: Vignir Vatnar öruggur sigurvegari

Lokamótið í mótaröðinni um Patagóníusteininn fór fram í fyrrakvöld í Gallerý Skák þar sem 22 keppendur mættu grjótharðir til tafls.  „Ungstirnið undraverða"  Vignir Vatnar Stefánsson, aðeins 9 ára, sem þegar hafði tryggt sér sigur sló ekkert af og vann bæði mótið og kappteflið í heild glæsilega.  Gerði sér meira segja lítið fyrir og lagði þrautakónginn Jón Þ. Þór með lúmskri brellu.  Frændi hans Gunnar Skarphéðinsson varð í öðru sæti og Ingimar Jónsson og Þór Valtýsson jafnir í 3.-4. sæti.  Sjá mótstöflu.

Sá stutti lauk keppni  með 36 stigum af 40 mögulegum miðað við fjögur mót.  Næstur í röðinni kom skákgeggjarinn  Guðfinnur R. Kjartansson  með 27 GrandPrix stig og goðsögnin Harvey Georgsson varð þriðji enda þótt hann tefldi bara í þremur  mótum með 21 stig, en hann vann tvö fyrstu mótin.

Áður hefur verið fjallað ítarlega um keppnina svo að þessu sinni  eru myndirnar frá verðlaunaafhendingunni  og af vettvangi látnar duga enda segja þær meiri sögu  en mörg orð um velheppnað mót og skemmtilega keppni.

Nánar má lesa um keppnina og sigurgöngu unga mannsins á www. galleryskak.net hér á síðunni  undir http://www.skak.blog.is/blog/skak/entry/1269861/

Hinn ungi sveinn fékk ágreyptan blágrýtisstein með nafni sínu í verðlaun og nafnið sitt skráð gullnu letri á undrasteininn merkilega frá landinu fjarlæga á heimsenda.

 

 

ESE- 30.11.2012  

Myndaalbúm (ESE)

Jólaskákmót TR og SFS fara fram á sunnudag og mánudag

Jólaskákmót TR og SFS fara fram á morgun (yngri flokkur) og á mánudag (eldri flokkur). 

Keppnisstaður:  Taflfélag Reykjavíkur, Faxafeni 12.

Yngri flokkur (1. - 7. bekkur).

Keppt verður í stúlkna og drengja flokkum (opnum flokkum). Heimilt er að senda A, B, C o.s.frv. stúlknasveitir og A, B, C o.s.frv. drengjasveitir.  Í hverri sveit eru 4 keppendur og 0-2 til vara.

Keppni í yngri flokki verður sunnudaginn  2. desember kl. 14:00.

Tefldar verða 6 umferðir (hraðmót) eftir Monrad kerfi.

Umhugsunartími: 15 mín. á skák. Þátttökurétt hafa börn úr grunnskólum Reykjavíkur í

1.-7. bekk.  Verðlaunaafhending verður að lokinni keppni.

Keppnisstaður:  Taflfélag Reykjavíkur, Faxafeni 12.

Eldri flokkur (8. - 10. bekkur).

Keppt verður í stúlkna og drengja flokkum (opnum flokkum). Heimilt er að senda A, B, C o.sfrv. stúlknasveitir og A, B, C o.s.frv. drengjasveitir.  Í hverri sveit eru 4 keppendur og 0-2 til vara.

Keppni í eldri flokki verður mánudaginn 3. desember kl. 17:00.

Tefldar verða 6 umferðir (hraðmót) eftir Monrad kerfi.

Umhugsunartími: 15. mín. á skák. Þátttökurétt hafa unglingar úr grunnskólum Reykjavíkur í 8.-10. bekk. Verðlaunaafhending verður að lokinni keppni.

 

Tómas Íslandsmeistari í Víkingaskák

Hörkuspennandi Íslandsmóti í Vîkingaskák lauk fimmtudagskvöldið 29. nóvember í húsnæði Knattspyrnufélagsins Víkings í Víkinni, en Víkingaklúbburinn hefur fengið frábæra aðstöðu fyrir æfingar í vetur í Víkinni.  Eftir nokkuð grimma baráttu á víkingataflborðinu varð Tómas Björnsson efstur, en Tómas náði að vinna allar sex skákir sínar, en tefldar voru 15. mínútna skákir.  

Tómas hefur verið að ná sínum fyrri styrk og hefur hann tekið stefnuna á að velta Gunnari Fr. úr efsta sæti á heimslistanum, en heimslistinn er sérstök eló víkingaskákstig.  Annar varð Þröstur Þórsson með 5.5 vinninga, en Þröstur hefur verið í mikilli framför síðasta ár og hefur eins og Tómas tekið stefnuna upp heimslistann.  Þriðji varð svo Páll Andrason, en hann að koma sterkur inn aftur eftir nokkurt hlé.   Þröstur Þórsson varð Íslandsmeistari í flokki 45. ára og eldri.  Ingi Tandri varð Íslandsmeistari í flokki 35-45 ára, en Páll Andrason vann unglingaflokkinn. 

ÚRSLIT:

Unglingaflokkur 20 ára og yngri:
1. Páll Andrason 4.5
2. Örn Leó Jóhansson 1.0 

Öðlingaflokkur I, 35 ára og eldri:
1. Ingi Tandri Óskarsson 4.0
2. Ólafur B. Þórsson 3.0 
3. Ólafur Freyr Orrason 0.0

Öðlingaflokkur II, 45 ára og eldri:

1. Þröstur Þórsson 5.5
2. Sigurður Ingason 3.0

Opinn flokkur:

* 1 Tómas Björnsson 7.o
* 2 Þröstur Þórsson   5.5
* 3 Páll Andrason 4.5
* 4 Ingi Tandri Traustason 4.0
* 5 Sigurður Ingason 3.0
* 6 Ólafur B. Þórsson 3.0
* 7. Örn Leó Jóhannsson 1.0
* 8. Ólafur Freyr Orrason 0.0

Heimasíða Víkingaklúbbsins (fleiri myndir

Frábær skákhátíð í Kringlunni: Seinni hálfleikur í dag

Seinni hálfleikur í skákmaraþoninu í þágu Barnaspítala Hringsins hefst í Kringlunni klukkan 12 á laugardag og stendur til kl. 18. Frábær stemmning var í Kringlunni í gær og stóðu krakkarnir sig eins og hetjur.

Við upphaf maraþonsins færði Donika Kolica, talsmaður krakkanna, fulltrúum leikstofunnar og skólans í Hringnum nýjar fartölvur og leikjatölvur að gjöf, sem fengnar voru með sérlega rausnarlegum kjörum hjá Heimilistækjum og Senu. Þeir peningar sem safnast í maraþoninu renna óskertir í tækjasjóð Hringsins.

Margir góðir gestir komu í Kringluna til að spreyta sig gegn krökkunum og leggja góðu málefni lið, en flestir máttu játa sig sigraða -- með bros á vör.

Meðal þeirra sem hafa boðað komu sína í dag eru margir stjórnmálamenn, listamenn og skemmtikraftar. Strax klukkan 12.30 mun meistari Bjartmar Guðlaugsson taka nokkur af sínum þekktustu lögum, og meðal annarra gesta í dag er söngkonan dáða, Ragnheiður Gröndal, og eftirlæti ungu kynslóðarinnar, þær Skoppa og Skrítla.

Þá er tilhlökkunarefni að margir af helstu meisturum íslenskrar skáksögu munu leika listir sínar við skákborðið í dag. Í þeim hópi eru Friðrik Ólafsson, Jóhann Hjartarson, Jón L. Árnason og Helgi Ólafsson. Hægt er að ,,leiga stórmeistara" til að tefla á móti krökkunum, og er þessi þjónusta hugsuð fyrir þau sem ekki komast á vettvang eða treysta sér ekki til að tefla sjálf.

Í gær fengu krakkarnir okkar þannig að spreyta sig á móti Henrik Danielsen, Lenku Ptacnikovu og Hjörvari Steini Grétarssyni, auk þess sem margir aðrir öflugir skákmenn mættu til að sýna samstöðu og styðja góðan málstað.

Skákáhugamenn á öllum aldri eru hvattir til að mæta í Kringluna í dag og taka þátt í einstæðum viðburði sem er í senn fjölskylduhátíð, skákveisla og söfnun í þágu Barnaspítala Hringsins.

Hægt er að leggja inn á söfnunarreikning 0101-26-083280, kt. 700608-3280.

Facebook-síða viðburðarins: Hér.

Myndaalbúm frá fyrri degi maraþonsins (HJ o.fl.)