Jólaskákmót SFS og TR: Tvöfaldur sigur Rimaskóla í yngri flokki

Í gær, 2. desember, fór hið árvissa Jólaskákmót Skóla-og frístundasviðs og Taflfélags Reykjavíkur fram. Þetta skákmót var nú haldið í 30. sinn. Ólafur H. Ólafsson, ötull félagsmaður í Taflfélagi Reykjavíkur, fyrrum skákþjálfari og fyrrverandi formaður í T.R., hefur verið skákstjóri á þessum mótum frá upphafi og var því í dag skákstjóri á Jólaskákmótinu í 30. sinn!

Frá árinu 1983 - 2010 var þetta skákmót kallað Jólaskákmót ÍTR og TR. En eftir skipulagsbreytingar hjá Reykjavíkurborg færðist mótið frá Íþrótta-og tómstundasviði yfir til Skóla-og frístundasviðs og heitir því Jólaskákmót SFS og TR. Skákmótið er tvískipt og er fyrir skáksveitir frá grunnskólum Reykjavíkur, annars vegar fyrir aldursflokkinn frá 1.-7. bekk og hins vegar fyrir aldursflokkinn frá 8.-10. bekk.

Í gær var teflt í yngri flokki en það eru nemendur úr 1.- 7. bekkjum grunnskólanna og ídag verður teflt í eldri flokki. Veitt voru verðlaun fyrir þrjár efstu drengjasveitirnar (eða opnu sveitirnar, þar sem sveitirnar eru blandaðar stúlkum og drengjum). Einnig voru þrenn verðlaun fyrir stúlknasveitir, en að þessu sinni var aðeins ein stúlknasveit meðal þátttakenda. Eitthvað sem skólastjórnendur í grunnskólum Reykjavíkur svo og skákhreyfingin öll geta íhugað. Skemmtilegt væri ef þátttaka stúlkna í skákmótum yfirleitt og þá sérstaklega í þessum Jólaskákmótum fyrir grunnskólanemendur í Reykjavík væri til jafns við þátttöku drengjanna. En í dag voru af ca. 80 keppendum um 10 stúlkur meðal þátttakenda.

Teflt var í einum flokki, 6 umferðir eftir Monradkerfi með 15 mínútna umhugsunartíma. 17 sveitir voru skráðar til leiks.

Rimaskóli bar sigur úr býtum í báðum flokkunum, en eina stúlknasveit mótsins kom einmitt frá Rimaskóla. Stúlknasveitin lenti einnig í 4. sæti í heildarmótinu með 14 vinninga. A-sveit Rimaskóla fékk 21,5 vinning af 24 mögulegum. Melaskóli varð í 2. sæti í mótinu með 19,5 vinning. Kelduskóli fékk bronsverðlaunin með 14,5 vinning.

Fyrstu þrjár sveitirnar í drengjaflokki/opnum flokki fengu medalíur og sigursveitirnar eignabikar og svo farandbikar til varðveislu fram að næsta Jólaskákmóti.

Jólaskákmótið fór mjög vel fram. Soffía Pálsdóttir frá SFS kom með hljóðkerfi með sér sem kom sér mjög vel! Með hljóðnema í hönd veittist skákstjórum léttara en ella að ná til keppenda og halda utan um gang mótsins. Meðal keppenda voru mörg börn sem þegar hafa töluverða reynslu í keppni á skákmótum, svo lítið var um vafaatriði á meðan mótinu stóð sem skákstjórar þurftu að skera úr um.

Birna Halldórsdóttir sá um veitingar á meðan mótinu stóð sem er ómissandi þáttur í skákmóti sem þessu sem tekur um þrjá og hálfan tíma. Margir foreldrar, systkini, afar og ömmur voru meðal áhorfenda sem setti skemmtilegan svip á mótið. 

Jólaskákmótið fór fram í félagsheimili Taflfélags Reykjavíkur. Mótsstjóri var Soffía Pálsdóttir, SFS. Skákstjórar voru Ólafur H. Ólafsson og Sigurlaug Regína Friðþjófsdóttir, formaður Taflfélags Reykjavíkur.

Keppni í eldri flokki fer fram á dag, mánudaginn 3. desember og hefst klukkan 17. Eins og í dag verður teflt í félagsheimili T.R., Skákhöllinni að Faxafeni 12.

Heildarúrslit í yngri flokki urðu sem hér segir:

• 1. Rimaskóli A-sveit               22,5 v. af 24.
• 2. Melaskóli                             19,5 v.
• 3. Kelduskóli                           14,5 v.
• 4. Rimaskóli - stúlkur              14 v.
• 5. Rimaskóli B-sveit                13 v.
• 6. Ölduselsskóli                       13 v.
• 7. Vesturbæjarskóli                 12,5 v.
• 8. Landakotsskóli                    12,5 v.            
• 9. Ingunnarskóli B-sveit          12 v.
• 10. Árbæjarskóli                      11,5 v.
• 11. Ingunnarskóli A-sveit       11,5 v.
• 12. Grandaskóli                       11 v.
• 13. Austurbæjarskóli               11 v. 
• 14. Selásskóli                          10,5 v. 
• 15. Rimaskóli C-sveit              10 v. 
• 16. Foldaskóli                         9 v.
• 17. Ártúnsskóli                        8 v.  

Rimaskóli A sveit:

1. Nansý Davíðsdóttir
2. Jóhann Arnar Finnsson
3. Kristófer Halldór Kjartansson
4. Joshua Davíðsson

Melaskóli:

1. Kolbeinn Ólafsson
2. Ellert Kristján Georgsson
3. Svava Þorsteinsdóttir
4. Sigurður Kjartansson

1. varam. Björn Ingi Helgason
2. varam. Katrín Kristjánsdóttir

Kelduskóli:

1. Hilmir Hrafnsson
2. Sigurður Bjarki Blumenstein
3. Styrmir Rafn Ólafsson
4. Hilmir Sigurðsson

1.   varam. Andri Gylfason

Rimaskóli-stúlkur:

1. Svandís Rós Ríkharðsdóttir
2. Heiðrún A. Hauksdóttir
3. Ásdís Birna Þórarinsdóttir
4. Tinna Sif Aðalsteinsdóttir

Pistill og myndir: Sigurlaug Regína Friðþjófsdóttir        

Myndaablúm (SRF)                    

 

Hraðkvöld hjá Helli í kvöld

Taflfélagið Hellir heldur hraðkvöld mánudaginn 3. desember nk. og hefst taflið kl. 20:00. Tefldar verða 7 umferðir með sjö mínútna umhugsunartíma. Teflt er í félagsheimili Hellis í Álfabakka 14a í Mjóddinni.

Sigurvegarinn á hraðkvöldinu fær í verðlaun máltíð fyrir einn á Saffran. Einnig verður dreginn út af handahófi annar keppandi sem einnig fær máltíð fyrir einn á Saffran. Þar eiga allir jafna möguleika, án tillits til árangurs á mótinu. Verður Björgvin dreginn út þriðja skiptið í röð?

Þátttökugjöld eru kr. 300 fyrir félagsmenn (kr. 200 fyrir 15 ára og yngri) og kr. 500 fyrir aðra (kr. 300 fyrir 15 ára og yngri).

Carlsen vann Aronian - slær stigamet!

Magnus Carlsen (2848), stigahæsti skákmaður heims, vann í dag Levon Aronian (2815), þann stigahæsta. Með sigrunum er sá norski kominn með 2855,7 skákstig  og hefur þar með slegið stigamet Kasparov, sem var 2851 skákstig. Þó með þeim fyrirvara að stig Magnusar hafa enn ekki birst á opinberum stigalista heldur eru aðeins birt á ópinberum stigalista. Carlsen er efstur, með með 6 stig (veitt eru 3 stig fyrir sigur) ásamt Kramnik (2795) sem vann Nakamura (2760)

Níu skákmenn taka þátt í mótinu og því situr alltaf einn yfir. Viðkomandi sér um skákskýringar í þeirri umferð.

Í 3. umferð sem fram fer á morgun mætast meðal annars Kramnik og Carlsen.

Úrslit 2. umferðar:

Judit Polgar	½-½	Gawain Jones
Hikaru Nakamura	0-1	Vladimir Kramnik
Magnus Carlsen	1-0	Levon Aronian
Vishy Anand	½-½	Luke McShane

 

Staðan:

• 1.-2. Kramnik (2795) og Carlsen (2848) 6/2
• 3. Adams (2710) 3/1
• 4. Nakamura (2760) 3/2
• 5. Anand (2775) 1/1
• 6.-8. McShane (2713), Polgar (2705) og Jones (2644) 1/2
• 9. Aronian (2815) 0/2

 

• Heimasíða mótsins
• Beinar útsendingar (hefjast almennt kl. 14)

Skákþættir Morgunblaðsins: Vignir Vatnar hafði betur gegn Rússunum

Vignir Vatnar Stefánsson var eini fulltrúi Íslands á heimsmeistaramóti ungmenna, 8-18 ára, í opnum flokkum og stúlknaflokkum sem lauk í Maribor í Slóveníu um síðustu helgi. Keppendur voru um 1.600 talsins en alls komu um 3.500 manns til Slóveníu vegna mótsins. Árið 2007 tefldu tíu íslensk ungmenni á HM í Tyrklandi en nú eru aðrir tímar og í ár lagði SÍ meiri áherslu á Evrópumótið sem fram fór eftir svipuðu fyrirkomulagi.

Heimsmeistaramótið er stærra í sniðum. Fyrir utan heimamenn voru Rússar með stærsta hóp keppenda, vel yfir hundrað manns. Þeir áttu sigurvegara í nokkrum flokkum, einnig Indverjar og Bandaríkjamenn en í flokki Vignis, þar sem keppendur voru 10 ára og yngri, bar Víetnaminn Anh Khoi Ngyen sigur úr býtum og vann allar skákir sínar!

Vignir Vatnar, sem er 9 ára gamall, er á fyrra ári í 10 ára flokknum, hlaut 6 vinninga af 11 mögulegum. Elo-stigatala hans er mun lægri en styrkleikinn segir til um og hann var að tefla „upp fyrir sig" nær allt mótið. Fyrir undirritaðan, sem var þjálfari hans á mótsstað, gafst góður tími til að huga að ýmsum þáttum taflmennsku hans. Og í sex skákum í röð í 4.-9. umferð gegn „rússneska skákskólanum" reyndi talsvert á undirbúning. Vignir hlaut 3 ½ vinning gegn 2 ½ Rússanna og átti raunar unnið tafl á einhverjum punkti í flestum skákanna. Það er af sú tíð þegar aðildarlönd FIDE gátu aðeins sent einn keppanda í hvern keppnisflokk. Rússar áttu 16 skákmenn í flokki Vignis. Viðureignir sjöundu og áttundu umferðar reyndu mjög á úthaldið og voru samtals um 200 leikir.

HM Maribor 2012; 4. umferð:

Vignir Vatnar Stefánsson - Antion Sidorov (Rússland)

Kóngsindversk vörn

1. d4 Rf6 2. c4 d6 3. Rc3 e5 4. e3 Rbd7 5. Bd3 g6 6. Rge2 Bg7 7. O-O

Leiðin sem hvítur velur sést oft hjá svarti þegar hvítur beitir kóngsindversku uppbyggingunni.

7. ... O-O 8. b4 c6 9. Ba3 He8 10. Hb1 Dc7 11. Db3 Rh5 12. b5 f5?

Svartur hefði átt að bíða með þennan leik.

Sjá stöðumynd.

13. Bxd6!

Nú dugar ekki að leika 13. .... Dxd6 vegna 14. c5+! De6 15. Bc4 og drottningin fellur.

13. ... Dd8 14. c5+ Kh8 15. d5! e4 16. Bc4 Re5 17. dxc6 bxc6 18. bxc6 Rxc4 19. c7 Df6 20. Dxc4 Be6 21. Da6 Hac8 22. Rd4 Bd7 23. Rcb5?!

Einfaldara var 23. Hb8 eða 23. Rd5.

23. ... f4 24. Db7 f3 25. Rxa7 Dg5 26. Bg3 fxg2 27. Hfe1 Bxd4 28. exd4 Rxg3 29. Rxc8 Bxc8

Þetta var eina tækifæri Rússans til að flækja málin, 29. ... Rf1 gaf meiri von því að 30. Rd6 má svara með 30. ... Dh5! og svartur er sloppinn. Hinsvegar vinnur 30. Hxe4 t.d. 30. ... Hxc8 31. Hbe1 Dh5 32. h4 o.s.frv.

30. Dc6 Hf8 31. Dd6 Kg8 32. Dxg3 Df6 33. Hbd1 Bg4 34. Hd2 Bf3 35. De5 Da6 36. Dd5 Kg7 37. De5 Kg8 38. d5 Da5 39. De7?

Vignir ætlaði að leika 39. De6+ sem vinnur létt, en „missti" drottninguna til e7.

39. ... Dxd2 40. Dxf8+! Kxf8 41. c8=D+ Kg7 42. Dd7 Kh6 43. Hb1

Úrvinnslan er ekki vandalaus en Vignir missir þó aldrei þráðinn.

43. ... Dd3 44. Dh3 Kg5 45. Dg3 Kh5 46. De5 Kh6 47. Df4 Kh5 48. Hc1 Dxd5 49. h4 h6 50. c6 g5 51. Df8 e3 52. De8 Kxh4 53. Dxe3 Bg4 54. Dg3 Kh5 55. Dxg2

55. Dxg4+! Kxg4 56. c7 o.s.frv. var einnig gott.

55. ... Dd2 56. Hf1 Dc3 57. Dh2 Kg6 58. Dg3 Bf3 59. c7 g4 60. Dd6 Kh5 61. Df4 Bb7 62. Hc1 Dh3 63. Df5 Kh4 64. Df6 Kh5 65. Hc5

Og Sidorov gafst upp.

Helgi Ólafsson [e-mail]

----------------------------------------------

 

Skákþættir Morgunblaðsins eru birtir á Skák.is viku síðar en í sjálfu Morgunblaðinu.  

Grein þessi birtist í Sunnudagsmogganum, 25. nóvember 2012.

Skákþættir Morgunblaðsins

[Event "Wch U10"] [Site "Maribor"] [Date "2012.11.11"] [Round "4.38"] [White "Stefansson, Vignir Vatnar"] [Black "Sidorov, Anton"] [Result "1-0"] [ECO "A53"] [WhiteElo "1595"] [BlackElo "1843"] [Annotator "Reinhold Goldau"] [PlyCount "129"] [EventDate "2012.11.??"] [EventRounds "11"] [EventCountry "SLO"] [Source "Cbase R.Goldau"] [SourceDate "2000.03.01"] 1. d4 Nf6 2. c4 d6 3. Nc3 e5 4. e3 Nbd7 5. Bd3 g6 6. Nge2 Bg7 7. O-O O-O 8. b4 c6 9. Ba3 Re8 10. Rb1 Qc7 11. Qb3 Nh5 12. b5 f5 13. Bxd6 Qd8 14. c5+ Kh8 15. d5 e4 16. Bc4 Ne5 17. dxc6 bxc6 18. bxc6 Nxc4 19. c7 Qf6 20. Qxc4 Be6 21. Qa6 Rac8 22. Nd4 Bd7 23. Ncb5 f4 24. Qb7 f3 25. Nxa7 Qg5 26. Bg3 fxg2 27. Rfe1 Bxd4 28. exd4 Nxg3 29. Nxc8 Bxc8 30. Qc6 Rf8 31. Qd6 Kg8 32. Qxg3 Qf6 33. Rbd1 Bg4 34. Rd2 Bf3 35. Qe5 Qa6 36. Qd5+ Kg7 37. Qe5+ Kg8 38. d5 Qa5 39. Qe7 Qxd2 40. Qxf8+ Kxf8 41. c8=Q+ Kg7 42. Qd7+ Kh6 43. Rb1 Qd3 44. Qh3+ Kg5 45. Qg3+ Kh5 46. Qe5+ Kh6 47. Qf4+ Kh5 48. Rc1 Qxd5 49. h4 h6 50. c6 g5 51. Qf8 e3 52. Qe8+ Kxh4 53. Qxe3 Bg4 54. Qg3+ Kh5 55. Qxg2 Qd2 56. Rf1 Qc3 57. Qh2+ Kg6 58. Qg3 Bf3 59. c7 g4 60. Qd6+ Kh5 61. Qf4 Bb7 62. Rc1 Qh3 63. Qf5+ Kh4 64. Qf6+ Kh5 65. Rc5+ 1-0

Taflmennska Sigur-ðar Eiríkssonar affarasælust

Í dag, sunnudaginn 24. desember að frádregnum 22 í aðventu, stóð Skákfélag Akureyrar, í samstarfi við Jóla, fyrir 15 mínútna skákmóti.

Slík mót væri illmögulegt að halda, ef ekki væri fyrir svokallaðar skákklukkur sem mæla tímanotkun keppenda.

Þekkt er sú saga þegar Taflfélag Hornstrendinga gerði tilraunir með klukkulaus kortersmót, en  skemmst er frá því að segja að þær tilraunir enduðu í glundroða og innbyrðis átökum sem að lokum urðu til þess að byggð lagðist af í margra kílómetra radíus, SSA af Færeyjum.

Akureyringar þekkja skáksöguna, Hornstrendingasögu og söguna um Nýju föt keisarans þó nokkuð af ljósmyndum og gerðu viðeigandi ráðstafanir að þessu sinni, sveitarfélaginu og rekstrarfélagi Hólabúðarinnar til heilla.

Tíu litlir jólasveinar mættu til leiks, en þurftu því miður frá að hverfa áður en mótið hófst, vegna yfirvofandi greiðsluþrots Norðurpósins (Reykjadals).

Þeir sem eftir sátu og stóðu létu það sem vind um augu þjóta, enda komast fáir með hnakkann, þar sem agureyringar eru með hælana.

Fóru leikar að lokum þannig að Sigur-ður Eiríksson hafði tryggt sér sigurinn fyrir síðustu umferðina, enda þótti honum hún of síð. Spjátrungarnir í Vatíkaninu, austur á Seyðisfirði, höfðu að orði að aðrar eins skákir hafi ekki sést síðan Hinrik 17. Noregskonungur tefldi við Jóhannes Pál Pálsson Páfa í Bónus hér um árið. Aðrir fengu miklu færri og lakari vinninga.

 

Lokastaðan

• 1.       Sigurður Eiríksson                                                     4 af 5
• 2.       Tómas Veigar                                                             3,5
• 3.       Einar Garðar Hjaltason                                             3
• 4.       Sveinbjörn Óskabarn Sigurðsson                            2,5
• 5.       Karl Elliot Ness Steingrímsson VII.                           2
• 6.       Hreinn Hrafnsson                                                      Færri en hinir.

Frásögn tekin af heimasíðu SA

CCP færði Taflfélagi Reykjavíkur veglega gjöf á fjölmennri barna-og unglingaæfingu 1. des

Tölvuleikjafyrirtækið CCP sem framleiðir og rekur fjölspilunarleikinn Eve online færði Taflfélagi Reykjavíkur sl. laugardag, að gjöf öflugan skjávarpa, fartölvu af nýjustu gerð auk peningastyrks.  Eldar Ástþórsson frá CCP afhenti búnaðinn á fjölmennri barna- og unglingaæfingu félagsins og mun hann nýtast einkar vel við þjálfun og kennslu í öflugu barnastarfi félagsins.  Það voru Vignir Vatnar Stefánsson Unglingameistari T.R. 2012, sem nýkominn er af Heimsmeistaramóti barna og unglinga í Slóveníu og Donika Kolica, Stúlknameistari T.R. 2012,  sem veittu búnaðinum viðtöku fyrir hönd félagsins.

Taflfélag Reykjavíkur kann CCP hinar bestu þakkir fyrir stuðninginn, sem mun koma félaginu og iðkendum þess mjög vel um ókomna framtíð.

London Chess Classic byrjar með látum

London Chess Classic byrjaði fjörlega í dag. Þegar í fyrstu umferð unnust tvöfalt fleiri skákir en í Kónga-mótinu sem fram fór fyrir skemmstu í Rúmeníu. Carlsen, Nakamura, Kramnik og Adams unnu allir. Nakamura vann Aronian og Kramnik vann Polgar. Önnur umferð fer fram á morgun en þá mætast m.a. Carlsen-Aronian og Nakamura-Kramnik.

Úrslit 1. umferðar:

• McShane - Carlsen 0-1
• Aronian - Nakamura 0-1
• Kramnik - Polgar 1-0
• Jones - Adams 0-1

Heimasíða mótsins

Beinar útsendingar (hefjast kl. 14)

Ný alþjóðleg skákstig

Ný alþjóðleg skákstig komu út í dag, 1. desember. Litlar breytingar eiga sér stað frá nóvember-listanum enda var aðeins eitt innlent mót reiknað til stiga, Íslandsmót kvenna. Engar breytingar eiga sér stað meðal efstu manna og er því röð efstu manna óbreytt. Jóhann Hjartarson (2592) er langstigahæstur. Enginn nýliði er á listanum er Vignir Vatnar Stefánsson (32) hækkar mest frá nóvember-listanum.

Nánari úttekt um listann má finna í PDF-viðhengi sem fylgir með fréttinni. Einnig fylgir með Excel-viðhengi fyrir þá sem vilja grúska frekar.

Virkir íslenskir skákmenn

267 íslenskir skákmenn teljast nú virkir. Engar breytingar eiga sér stað meðal efstu manna. Jóhann Hjartarson (2592), Héðinn Steingrímsson (2560) og Helgi Ólafsson (2547) eru sem fyrr stigahæstu menn landsins.  Það þarf að fara niður í 17. sæti til að finna verulegar stigabreytingar en Guðmundur Kjartansson (2404) hækkar um 10 stig og nær að fara aftur yfir 2400 skákstig.

No.	Name	Tit	dec12	Gms	Ch.
1	Hjartarson, Johann	GM	2592	0	0
2	Steingrimsson, Hedinn	GM	2560	0	0
3	Olafsson, Helgi	GM	2547	0	0
4	Petursson, Margeir	GM	2532	0	0
5	Gretarsson, Hjorvar Steinn	IM	2516	0	0
6	Stefansson, Hannes	GM	2512	0	0
7	Danielsen, Henrik	GM	2507	0	0
8	Arnason, Jon L	GM	2498	0	0
9	Kristjansson, Stefan	GM	2486	0	0
10	Thorfinnsson, Bragi	IM	2484	0	0
11	Gretarsson, Helgi Ass	GM	2464	0	0
12	Thorsteins, Karl	IM	2464	0	0
13	Thorhallsson, Throstur	GM	2441	8	-1
14	Gunnarsson, Arnar	IM	2440	0	0
15	Olafsson, Fridrik	GM	2419	0	0
16	Gunnarsson, Jon Viktor	IM	2413	0	0
17	Kjartansson, Gudmundur	IM	2404	19	10
18	Bjornsson, Sigurbjorn	FM	2391	0	0
19	Thorfinnsson, Bjorn	IM	2386	0	0
20	Ulfarsson, Magnus Orn	FM	2386	0	0

Heildarlistann má finna í PDF-viðhenginu.

Nýliðar

Engir nýliðar eru á listnum nú.

Mestu hækkanir

Vignir Vatnar Stefánsson (32) hækkar mest eftir góða frammistöðu á HM ungmenna. Í næstum sætum eru Jón Árni Halldórsson (26) eftir góða frammistöðu í mótum í Tékklandi og Tinna Kristín Finnbogadóttir (21) eftir góða frammistöðu á Íslandsmóti kvenna.

No.	Name	Tit	dec12	Gms	Changes
1	Stefansson, Vignir Vatnar		1627	9	32
2	Halldorsson, Jon Arni		2222	16	26
3	Finnbogadottir, Tinna Kristin		1871	6	21
4	Kjartansson, Gudmundur	IM	2404	19	10
5	Kolica, Donika		1251	5	5

Skákkonur

Ekki er ástæða til að skoða ungmennalistann né öðlingalistann þar sem engar stigabreytingar eru meðal efstu manna. Rétt er hins vegar að skoða skákkonurnar.

16 skákkonur er á listanum. Íslandsmeistarinn Lenka Ptácníková (2281) er sem fyrr langefst. Þrátt fyrir að hafa orðið Íslandsmeistari í skák og hlotið 6 vinninga í 7 skákum lækkar hún um 6 stig. Guðlaug Þorsteinsdóttir (2041) er önnur og Guðfríður Lilja Grétarsdóttir (1984) er þriðja en því miður tefla þær stöllur ekki mikið. Tinna Kristín Finnbogadóttir hækkar um 21 skákstig.

No.	Name	Tit	dec12	Gms	Changes
1	Ptacnikova, Lenka	WGM	2281	7	-6
2	Thorsteinsdottir, Gudlaug	WF	2041	0	0
3	Gretarsdottir, Lilja	WIM	1984	0	0
4	Thorsteinsdottir, Hallgerdur		1960	6	1
5	Johannsdottir, Johanna Bjorg		1872	7	-3
6	Finnbogadottir, Tinna Kristin		1871	6	21
7	Birgisdottir, Ingibjorg		1783	0	0
8	Helgadottir, Sigridur Bjorg		1754	0	0
9	Kristinardottir, Elsa Maria		1747	6	3
10	Fridthjofsdottir, Sigurl. Regina		1708	0	0

Heimslistinn

Magnus Carlsen (2848) er sem fyrr stigahæsti skákmaður heims. Í næstum sætum eru Aronian (2815) og Kramnik (2795). Röð stigahæstu skákmanna heims má nálgast hér: http://ratings.fide.com/top.phtml?list=men

Skrár tengdar þessari bloggfærslu:

• Alþjóðleg skákstig, 1. desember 2012
• Excel-skjal yfir útreikninga

Dagur með jafntefli í fyrstu umferð í Búdapest

Alþjóðlegi meistarinn Dagur Arngrímsson (2384) tekur þátt í First Saturday-móti sem hófst í dag í Búdapest. Í fyrstu umferð gerði hann jafntefli við króatíska stórmeistarann Bogdan Lalic (2484). Dagur mætir í þremur fyrstu umferðunum öllum þremur stórmeisturunum sem þátt taka. Frídagur er á morgun en á mánudag mætir hann Ungverjanum Zoltan Varga (2455).

Tíu skákmenn taka þátt og eru meðalstig 2426 skákstig. Dagur er nr. 7 í stigaröð keppenda.

• Heimasíða mótsins
• Chess-Results

 

Anna Ushenina heimsmeistari kvenna

 

Úkraínska skákkonan Anna Ushenina (2452) varð í dag heimsmeistari kvenna eftir sigur á Antoaneta Stefanova (2491) í heimsmeistaraeinvígi þeirra á millum. Úrslitin urðu 3,5-2,5 Önnu í vil. Staðan var 2-2 eftir kappskákirnar en Anna hafði betur í tveimur atskákum sem tefldar voru í dag.

 

Anna mætir Íslandsvinkonunni og fráfarandi heimsmeistara Hou Yifan (2606) í heimsmeistaraeinvígi á næsta ári. Yifan vann sér réttindi til þess með öruggum sigri á Grand Prix-seríu kvenna sem fram fór 2011-2012.

Heimasíða heimsmeistarakeppni kvenna