Friðriksmót Landsbankans - Íslandsmótið í hraðskák - skráning hefst í kvöld

Friðriksmót Landsbankans - Íslandsmótið í hraðskák fer fram í útibúi Landsbankans við Austurstræti 11 sunnudaginn 16. desember nk.

Gera má ráð fyrir að flestir sterkustu skákmenn landsins taki þátt. Skráning fer fram hér á Skák.is og hefst í kvöld. Skákmenn eru hvattir til að skrá sig sem fyrst enda takmarkast þátttaka við um 80 manns. Gildir þar lögmálið, fyrstir koma, fyrstir fá, en þó njóta stórmeistarar og alþjóðlegir meistarar forgangs varðandi þátttöku.

Mótið hefst kl. 13 og stendur til kl. 16.30.

Verðlaun eru sem hér segir:

• 1) 100.000 kr.
• 2) 60.000 kr.
• 3) 50.000 kr.
• 4) 30.000 kr.
• 5) 20.000 kr.

Aðalverðlaun skiptast séu menn jafnir að vinningum.  

Aukaverðlaun:

• Efsti unglingurinn 16 ára og yngri: 10.000 kr.
• Efsta konan: 10.000 kr.
• Efsti maður með 2200 stig og minna: 10.000 kr.
• Efsti maður með 2000 stig og minna: 10.000 kr.
• Útdreginn heppinn keppandi: 10.000 kr.

Aukaverðlaun eru miðað við nýjustu útgefin íslensk skákstig.   Reiknuð eru stig séu menn jafnir og efstir. 

Efsti keppandi mótsins verður Íslandsmeistari í hraðskák.   Verði tveir eða fleiri efstir ræður stigaútreikningur. 

Þetta er níunda árið í röð sem Landsbankinn og Skáksamband Íslands standa fyrir Friðriksmótinu í skák, en mótið er haldið til heiðurs Friðriki Ólafssyni, fyrsta stórmeistara Íslendinga. Margir af sterkustu stórmeisturum landsins hafa undanfarin ár teflt til heiðurs Friðriki.

Fyrri sigurvegarar:

• 2011 - Henrik Danielsen
• 2010 - Jón Viktor Gunnarsson og Þröstur Þórhallsson
• 2009 - Héðinn Steingrímsson
• 2008 - Helgi Ólafsson
• 2007 - Héðinn Steingrímsson
• 2006 - Helgi Áss Grétarsson
• 2005 - Jón Viktor Gunnarsson og Arnar E. Gunnarsson
• 2004 - Jóhann Hjartarson og Stefán Kristjánsson

 

Gallerý Skák: Minningarskákkvöld um Bent Larsen

Efnt verður til sérstaks minningarskákkvölds í Gallerý Skák mánaðarlega í vetur um mæta skákmenn og merka stórmeistara sem horfnir eru af sjónarsviðinu og yfir móðuna miklu.  Nánar verður tilkynnt um það fyrirfram hverjum  skákkvöldin verða tileinkuð hverju sinni.  Áður hafa skákmót í Gallerýinu verið tefld í minningu látinna félaga og vina en nú verður þetta gert með formlegri hætti.   

Ákveðið hefur verið að skákvöldið á fimmtudaginn kemur þann 6. desember verði helgað minningu hins eftirminnilega danska Íslandsvinar og frábæra stórmeistara Bent Larsens.  Hans verður minnst með nokkrum orðum í upphafi þegar að búið er að para í fyrstu umferð og stuttri þögn.   Tendrað verður á kerti og gömul skákklukka sem hann notaði eitt sinn látin tifa út. 

Sérstök verðlaun honum tengd verða  veitt af þessu tilefni. Teflt verður að venju 11 umferða hvatskákmót með 10 mínútna umhugsunartíma á skákina.  Lagt í púkk fyrir veisluföngum, kaffi og kruðerí.

Allir velkomnir óháð aldri eða félagsaðild enda Gallerýið skákstofa  og listasmiðja en ekki skákklúbbur.   

Myndaalbúm um Larsen

www.galleryskak.net  

Ný íslensk skákstig

Ný íslensk skákstig eru komin út og eru þau miðuð við 1. desember sl. Jóhann Hjartarson (2628) er sem fyrr stigahæstur en í næstum sætum eru Margeir Pétursson (2589) og Hannes Hlífar Stefánsson (2581). Páll Magnússon (1657) er stigahæstur nýliða og Dawid Kolka (160) hækkar mest frá september-stigalistanum.

Topp 20:

 

No.	Name	RtgC	Ch.
1	Jóhann Hjartarson	2628	4
2	Margeir Pétursson	2589	-11
3	Hannes H Stefánsson	2581	0
4	Héðinn Steingrímsson	2551	0
5	Helgi Ólafsson	2542	-1
6	Henrik Danielsen	2534	5
7	Jón Loftur Árnason	2511	-4
8	Helgi Áss Grétarsson	2501	0
9	Friðrik Ólafsson	2492	-5
10	Stefán Kristjánsson	2482	13
11	Bragi Þorfinnsson	2474	4
12	Karl Þorsteins	2469	2
13	Hjörvar Steinn Grétarsson	2459	10
14	Þröstur Þórhallsson	2438	6
15	Jón Viktor Gunnarsson	2418	-6
16	Arnar Gunnarsson	2403	0
17	Sigurbjörn Björnsson	2376	-7
18	Magnús Örn Úlfarsson	2374	-2
19	Guðmundur Kjartansson	2366	0
20	Dagur Arngrímsson	2366	-10

 
Nýliðar:

Tólf nýliðar eru á stigalistanum. Þeirra stigahæstur er Páll Magnússon (1657). Í næstum sætum eru Ragnar Árnason (1566) og Bárður Örn Birkisson (1479).

 

No.	Name	RtgC
1	Páll Magnússon	1657
2	Ragnar Árnason	1566
3	Bárður Örn Birkisson	1479
4	Gunnar Björn Helgason	1478
5	Orri Árnason	1336
6	Eyþór Trausti Jóhannsson	1307
7	Doran Tamasan	1286
8	Arsenij Zacharov	1280
9	Þorsteinn Freygarðsson	1226
10	Kormákur Máni Kolbeins	1158
11	Árni Garðar Helgason	1150
12	Bjarki Arnaldarson	1000

Mestu hækkanir

Dawid Kolka hækkar mest frá septemer-listanum eða um 160 skákstig. Bjarnsteinn Þórsson (155) og Felix Steinþórsson (91) koma næstir.

 

 

No.	Name	RtgC	Ch.
1	Dawid Kolka	1528	160
2	Bjarnsteinn Þórsson	1490	155
3	Felix Steinþórsson	1370	91
4	Heimir Páll Ragnarsson	1181	81
5	Sævar Jóhann Bjarnason	2118	65
6	Þorvaldur Siggason	1450	55
7	Svandís Rós Ríkharðsdóttir	1287	51
8	Róbert Leó Jónsson	1264	47
9	Rúnar Ísleifsson	1717	46
10	Sóley Lind Pálsdóttir	1452	46

Reiknuð mót

• Framsýnarmótið (5.-7. umferð)
• Haustmót SA (3.-7. umferð)
• Íslandsmót skákfélaga (1.-4. deild)
• Meistaramót Hellis
• Skákþing Garðabæjar ( a-flokkur)
• Tölvuteksmótið - Haustmót TR (a-, b- og opinn flokkur)

 

Allar upplýsingar má nálgast á Chess-Results.

Jólapakkamót Hellis fer fram 22. desember

Jólapakkaskákmót Hellis verður haldið laugardaginn 22. desember nk. í Ráðhúsi Reykjavíkur. Mótið hefst kl. 13 og er ókeypis á mótið. Mótið er fyrir börn og unglinga og fer nú fram í 15. skipti en það var fyrst haldið fyrir jólin 1996. Síðan hefur það verið haldið nánast á hverju ári og hefur alltaf verið eitt fjölmennasta skákmót ársins.
 
Keppt verður í allt að 5 flokkum: Flokki fæddra 1997-1999, flokki fæddra 2000-2001, flokki fæddra 2002-2003 og flokki fæddra 2004 og síðar og peðaskák fyrir þau yngstu. Tefldar verða 5 umferðir með 10 mínútna umhugsunartíma á mann. Jólapakkar eru í verðlaun fyrir 3 efstu sætin í hverjum aldursflokki fyrir sig fyrir bæði drengi og stúlkur. Auk þess verður happdrætti um 3 jólapakka í hverjum aldursflokki fyrir sig.  Skráning á mótið fer fram á heimasíðu Hellis.

Sævar efstur á öðlingamóti

Alþjóðlegi meistarinn Sævar Bjarnason (2100) er efstur með 5 vinninga á Vetrarmóti öðlinga að lokinni sjöttu og næstsíðustu umferð fer fram fór í kvöld. Sævar vann þá Júlíus Friðjónsson (2187) sem leiddi fyrir umferðina. Mikill skriður á Sævari sem tapaði í fyrstu umferð en hefur síðan verið óstöðvandi. Júlíus, Sverrir Örn Björnsson (2154), Gylfi Þórhallsson (2156) og Halldór Pálsson (2064) koma næstir með 4,5 vinning. 

Úrslit sjöttu umferðar má finna hér. Stöðu mótsins má finna hér. Röðun sjöundu og síðustu umferðar, sem fram fer á miðvikudagskvöld má finna hér.

Í lokaumferðinni mætast meðal annars: Halldór-Sævar, Júlíus-Gylfi og Jóhann Ragnarsson (2081)-Júlíus.

• Heimasíða TR
• Chess-Results

Carlsen efstur í London eftir sigur á Jones - kominn í 2857 skákstig

London Chess Classic mótið hefur svo sannarlega staðið fyrir sínu. Ótrúlega fjörlega og skemmtileg taflmennska þar sem Magnus Carlsen (2848) fer sannarlega á kostum. Carlsen vann í dag Íslandsvininn Gawain Jones (2644) í afar fjörugri skák. Með sigrinum bætir Carlsen enn stigametið á tifandi stigalistanum og er kominn með 2857 skákstig og hefur nú þar 50 stiga forskot á Aronian (2815) sem vann í dag Luke McShane (2713), í ekki síður skemmtilegri skák. Öðrum skákum lauk með jafntefli.

Frídagur er á morgun. Á fimmtudaginn mætast meðal annars Adams-Carlsen og Kramnik-McShane.

Níu skákmenn taka þátt í mótinu og því situr alltaf einn yfir. Viðkomandi sér um skákskýringar í þeirri umferð. Veitt eru 3 stig fyrir sigur og 1 fyrir jafntefli.

Birkir Karl Sigurðsson (1725) teflir í FIDE-Open, sem fram fer samhliða. Eftir 4 umferðir hefur 1½ vinning en hann hefur teflt upp fyrir sig allt mótið.

Úrslit 4. umferðar: 

Hikaru Nakamura	½-½	Michael Adams
Magnus Carlsen	1-0	Gawain Jones
Vishy Anand	½-½	Vladimir Kramnik
Luke McShane	0-1	Levon Aronian

Staðan:

• 1. Carlsen (2848) 10/4
• 2. Kramnik (2795) 8/4
• 3. Adams (2710) 7/3
• 4. Nakamura (2760) 5/4
• 5. Aronian (2815) 4/4
• 6. Anand (2775) 3/3
• 7. Jones (2644) 2/4
• 8.-9. McShane (2713) og Polgar (2705) 1/3

• Heimasíða mótsins
• Beinar útsendingar (hefjast almennt kl. 14)

Dagur með 1 vinninga eftir 3 umferðir í Búdapest

Alþjóðlegi meistarinn Dagur Arngrímsson (2384) er með 1 vinning eftir 3 umferðir á First Saturday-mótinu sem nú er í gangi í Búdapest. Í 2. umferð, sem fram fór í gær, gerði hann jafntefli við ungverka stórmeistarann Zoltan Varga (2455) en í dag tapaði hann fyrir Attila Czebe (2481), sem einnig er ungverskur stórmeistari.

Tíu skákmenn taka þátt og eru meðalstig 2426 skákstig. Dagur er nr. 7 í stigaröð keppenda.

• Heimasíða mótsins
• Chess-Results

 

Sæbjörn sigursæll í Stangarhyl í dag

Það mættu tuttugu og fjórir heldri skákmenn til leiks í dag. Sæbjörn G. Larsen fór geyst af stað eins og oft áður, hann vann fyrstu þrár skákirnar, en í fjórðu og fimmtu umferðum tapaði kappinn fyrir þeim Gunnari Finnssyni og Haraldi Axel. Það er nú ekki oft sem Sæbjörn tapar tveimur skákum í röð, enda setti kappinn í hærri gírinn og vann síðustu fimm skákirnar og varð efstur með átta vinninga af tíu mögulegum.

Jafnir í öðru til þriðja sæti urðu svo Haraldur Axel og Guðfinnur R Kjartansson báðir með sjö og hálfan vinning en Haraldur var hærri á stigum.

Haraldur slær ekkert af þótt hann sé kominn á áttugasta og þriðja ár.

Næsta þriðjudag verður svo Jólahraðskákmótið þá ætlum við að tefla níu umferðir með sjö mínútna umhugsunartíma.

Þrír efstu fá verðlauna peninga.

Að því loknu verður dregið í nokkurs konar happdrætti þar sem allir þátttakendur fá vinning alveg óháð því hvaða vinninga þeir fá í mótinu.

Allir skákmenn 60+ velkomnir.

Mótið byrjar kl.13.00.

Nánari úrslit dagsins:

• 1          Sæbjörn G Larsen                               8
• 2-3       Haraldur Axel Sveinbjörnsson            7.5
•             Guðfinnur R Kjartansson                    7.5
• 4          Gunnar Finnsson                                 7
• 5-7       Kristján Guðmundsson                       6
•             Ari Stefánsson                                                6
•             Valdimar Ásmundsson                       6
• 8          Magnús V Pétursson                           5.5
• 9-15     Páll G Jónsson                                     5
•             Garðar Guðmundsson                         5
•             Sigurður Kristjánsson                          5
•             Ásgeir Sigurðsson                               5
•             Gísli Árnason                                      5
•             Einar S Einarsson                                5
•             Baldur Garðarsson                              5
• 16-17   Jón Víglundsson                                 4.5
•             Gísli Sigurhansson                              4.5
• 18        Friðrik Sófusson                                  4
• 19-20   Jónas Ástráðsson                                 3.5
•             Halldór Skaftason                               3.5
• 21-23   Eiður Á Gunnarsson                           3
•             Hlynur Þórðarson                                3
•             Reynir Jóhannesson                            3
• 24        Óli Árni Vilhjálmsson                         2.5

Adams byrjar vel á London Chess Classic - Jafntefli hjá Kramnik og Carlsen

Adams byrjar vel á London Chess Classic - Jafntefli hjá Kramnik og Carlsen

Michael Adams (2710) byrjar vel á London Chess Classic. Hann vann Judit Polgar (2705) í 3. umferð í gær og hefur unnið báðar sínar skákir. Kramnik (2795) og Carlsen (2848) gerðu jafntefli í uppgjöri efstu manna og leiða sem fyrr á mótinu. Öðrum skákum lauk einnig með jafntefli.

Fjórða umferð fer fram í dag og hefst síðar en vanalega eða kl. 16. Þá mætast m.a. Carlsen-Jones og Anand-Kramnik.

Níu skákmenn taka þátt í mótinu og því situr alltaf einn yfir. Viðkomandi sér um skákskýringar í þeirri umferð. Veitt eru 3 stig fyrir sigur.

Birkir Karl Sigurðsson (1725) teflir í FIDE-Open, sem fram fer samhliða. Eftir 4 umferðir hefur 1½ vinning en hann hefur teflt upp fyrir sig allt mótið.

Úrslit 3. umferðar: 

Levon Aronian	½-½	Vishy Anand
Vladimir Kramnik	½-½	Magnus Carlsen
Gawain Jones	½-½	Hikaru Nakamura
Michael Adams	1-0	Judit Polgar

Staðan:

• 1.-2. Kramnik (2795) og Carlsen (2848) 7/3
• 3. Adams (2710) 6/2
• 4. Nakamura (2760) 4/3
• 5. Anand (2775) 2/2
• 6. Jones (2644) 2/3
• 7. McShane (2713) ½
• 8.-9.  Aronian (2815) og Polgar (2705) 1/3 

• Heimasíða mótsins
• Beinar útsendingar (hefjast almennt kl. 14)

Nýtt fréttabréf Skáksambandsins

Fréttabréf Skáksambands Íslands kom út í fyrsta skipti í dag. Fréttabréfið mun koma út tvisvar á mánuði yfir vetrarmánuðina en sjaldnar yfir sumarið. Fréttabréfið verður sent í tölvupósti og er einnig aðgengilegt á vefnum.

Meðal efnis í fyrsta tölublaðinu er:

• Ný fréttabréf SÍ
• N1 Reykjavíkurskákmótið
• Verkefnin framundan
• Skákdagurinn
• Friðrik teflir í Tékklandi
• Nýr heimsmeistari kvenna
• Grænlandstrúboð
• Íslendingur í Sjávarvík?
• Maraþon til styrktar Hringum.